The Comprehensive Aramaic Lexicon

Gen17:01	והוה אברם בר תשעין ותשע שנין ואתגלי ייי לאברם ואמר ליה אנא אל שדי פלח קדמי והוי שלים בבישרך
Gen17:02	ואיתן קימי בין מימרי ובינך ואסגי יתך לחדא לחדא
Gen17:03	ועל דלא אברם גזיר לא הוה יכיל למיקם וגחן על אנפוי ומליל עימיה ייי למימר
Gen17:04	אנא הא גזר קימי עימך ותהי לאב סגי עממין
Gen17:05	ולא יתקרי תוב שמך אברם ויהי שמך אברהם ארום לאב סגי סוגעי עממין מניתך
Gen17:06	ואפיש יתך לחדא לחדא ואיתנינך לכינשין ומלכין שליטין בעממיא מינך יפקון
Gen17:07	ואקים ית קימי בין מימרי ובינך ובין בנך בתרך לדריהון לקים עלך למהוי לך לאלקא ולבנך בתרך
Gen17:08	ואתן לך ולבנך בתרך ית ארע{א} תותבותך ית כל ארעא דכנען לאחסנת עלם ואהוי להון לאלקא
Gen17:09	ואמר ייי לאברהם ואנת ית קימי תיטר אנת ובנך בתרך לדריהון
Gen17:10	דא קימי דתיטרון בין מימרי וביניכון ובין בנך בתרך מיגזר לכון כל דכורא אין לית ליה איבא למיגזריה
Gen17:11	ותיגזרון ית בישרא דעורלתכון ויהי לאת קים בין מימרי וביניכון

Gen17:12	ובר תמניא יומין יגזר לכום כל דכורא לדריכון מרבייני בתיכון וזביני כספיכון מן כל בר עממין דלא מבינך הוא

Gen17:13	מן דהוא גזיר יגזר מרבייני בתיכון ו{ס}<ז>ביני כספיכון ותהי קימי בבשרכון לקים עלם
Gen17:14	וערלאה דכורא דלא יגזר ית בישרא דעורלתיה אין לית ליה מן דיגזר וישתצי בר נשא ההוא מעמי<ה> ית קימי אשני
Gen17:15	ואמר ייי לאברהם שרי אינתתך לא תהי קרי ית שמ{א}<ה> שרי ארום שרה שמה
Gen17:16	ואברך יתה בגופה ואף איתן מינה ל{ה}<ך> בר ואברכיניה ביה ותהי לכינשין ומלכין שליטין בעממיא מינה יהון
Gen17:17	ונפל אברהם על אנפוי ותמה ואמר בליביה הלבר מאה שנין יהי וולד ואין שרה הברת תשעין שנין תוליד
Gen17:18	ואמר אברהם קדם ייי הלואי ישמעאל יתקיים ויפלח קומך
Gen17:19	ואמר ייי בקושטא שרה אינתתך תליד לך בר ותיקרי ית שמיה יצחק ואקים ית קימי עימיה לקים עלם לבנוי בתרוי
Gen17:20	ועל ישמעאל קבילית צלותך הא בריכית יתיה ואפיש יתיה ואסגי יתיה לחדא לחדא תריסר רברבין יוליד ואיתיניניה לעם סגי
Gen17:21	וית קיימי אקיים עם יצחק דתיליד לך שרה בזימנא הדין בשתא אוחרנתא
Gen17:22	ופסק מלמללא עימיה ואיסתלק יקרא דייי מעילוי אברהם
Gen17:23	ודבר אברהם ית ישמעאל בריה וית כל מרבייני בייתיה וית כל זביני כספיה כל דכורא באינשא ביתא דאברהם וגזר ית בישרא דעורלתהון ביכרן יומא הדין כמא דמליל עימיה ייי
Gen17:24	ואברהם בר תשעין ותשע שנין כד גזר ית בישרא דעורלתיה
Gen17:25	וישמעאל בריה בר תלתיסרי שנין כד גזר ית בישרא דעורלתיה
Gen17:26	בכרן יומא הדין בארבעת עשר <שנין> גזר אברהם וישמעאל בריה
Gen17:27	וכל אינשי ביתיה מריבייני ביתא וזביני כספא מן בר עממין אתגזרו עימיה