The Comprehensive Aramaic Lexicon

Gen26:01	והוה כפנא תקיף בארעא דכנען בר מכפנא קדמאה דהוה ביומי אברהם ואזל יצחק לות אבימלך מלכא דפלישתאי לגרר
Gen26:02	והוה בלבביה דיצחק למיחות למצרים ואתגלי ליה ייי ואמר לא תיחות למצרים שרי בארעא דאימר לך
Gen26:03	דור בארעא הדא ויהי מימרי בסעדך ואבריכינך ארום לך ולבנך אתן ית כל ארעתא האילין ואקיים ית קיימא דקיימית לאברהם אבוך
Gen26:04	ואסגי ית בנך הי ככוכבי שמיא ואיתן לבנך ית כל ארעתא האילין ויתברכון בגין בנך כל עממי ארעא
Gen26:05	חולף די קבל אברהם במימרי ונטר מטרת מימרי פיקודיי קיימיי ואורייתיי
Gen26:06	ויתיב יצחק בגרר
Gen26:07	ושאילו אינשי אתרא על אינתתיה ואמר אחתי היא ארום דחיל למימר לה אינתתי ארום חשיב בליביה דילמא יקטלונני אינשא אתרא על עיסק רבקה ארום שפירת חזו היא
Gen26:08	והוה כד סגו ליה תמן יומיא למשרי ואודיק אבימלך מלכא דפלישתאי מן חרכא וחמא והוה יצחק חאיך עם רבקה אינתתיה
Gen26:09	וקרא אבימלך ליצחק ואמר ברם הא אינתתך היא והיכדין אמרת אחתי היא ואמר ליה יצחק ארום אמרית בלבבי דילמא אתקטל בגינה
Gen26:10	ואמר אבימלך מה דא עבדת לנא כזעיר פון שכיב מלכא דמיחד בעמא עם אינתתך ואייתיתא עלינא חובא
Gen26:11	ופקיד אבימלך ית כל עמא למימר דיקרב לביש בגברא הדין ובאינתתיה איתקטלא יתקטל
Gen26:12	וזרע יצחק לצדקתא בארעא ההיא ואשכח בשתא ההיא על חד מאה בדשערוי וברכיה ייי
Gen26:13	ורבא גברא ואזל אזיל ורבי עד די רבא לחדא
Gen26:14	והוו ליה גיתי עאן וגיתין תורין ופולחנא סגיאה וקניאו יתיה פלישתאי
Gen26:15	וכל בירין דחפסו עבדי אבוי ביומי אברהם אבוי טמונינון פלישתאי ומלונון עפרא
Gen26:16	ואמר אבימלך ליצחק איזל מעימנא ארי תקיפתא מיננא בניכסין לחדא
Gen26:17	ואזל מתמן יצחק ושרא בנחלא דגרר ויתיב תמן
Gen26:18	ותב יצחק וחפס ית בירן דמוי די חפסו עבדי אבוי ביומי אברהם אבוי וטמונינון פלישתאי בתר דמית אברהם וקרא להון שמהן הי כשמהן די הוה קרי להון אבוי
Gen26:19	וחפסו עבדי יצחק ביספר נחלא ואשכחו תמן ביר מוי נבעין

Gen26:20	ונצו רעוותא דיגרר עם רעוותא דיצחק למימר דילנא מיא והות צבו מן שמיא ויבשת ובכן אהדרו יתה ליצחק ונבעת וקרא שמא דבירא עסק ארום אתעסקו עלה עימיה

Gen26:21	וחפסו ביר אוחרי נצו אוף עלה ויבשת ותו לא נבעת וקרא שמ{א}<ה> סטנא
Gen26:22	ואיסתלק מתמן וחפס ביר אוחרי ולא נצו עלה הי כקדמאי וקרא שמ{א}<ה> רווחתא ואמר ארום כדון ארווח ייי לנא ויפישיננא בארעא
Gen26:23	וסליק מתמן לבירא דשבע
Gen26:24	ואיתגלי ליה ייי בלילייא ההוא ואמר אנא אלקיה דאברהם אבוך לא תידחל ארום בסעדך מימרי ואיבריכינך ואסגי ית בנך בגין זכוותא דאברהם עבדי
Gen26:25	ובנא תמן מדבחא וצלי בשמא דייי ופרס תמן משכניה וחפסו תמן עבדי יצחק בירא
Gen26:26	וכד נפק יצחק מגרר איתיבשן ביריהון ואילניהון לא עבדו פירין וארגישו דבגין דתריכו יתיה הוות להון כל דא ואזל אבימלך לוותיה מגרר ואתקיף ברחמוי למיזל עימיה ופיכל רב חיליה
Gen26:27	ואמר להון יצחק מדין אתיתון לותי דאצלי עליכון ואתון סניתון יתי ותרכתוני מלוותכון
Gen26:28	ואמרו מחמא חמינא ארום הוה מימרא דייי בסעדך דבזכותך הוות לן כל טבתא וכדו נפקתא מן ארען יבישו בירן ואילננא לא עבדו פירין ואמרנא נהדריניה לותנא ותתקיים כדון מומתא דהות בינן ומבכין תהי בינן ובינך ונגזור קים עמך
Gen26:29	אם תעבד עימנא בישא היכמא דלא קריבנא בך לביש והיכמה דעבדנא עימך לחוד טב ושלחנך פון בשלם אנת כדון בריכא דייי
Gen26:30	<٠٠٠٠٠٠>
Gen26:31	ואקדימו בצפרא וקיימו גבר לאחוי ופסג מתגא דחמריה ויהב פסגא חדא להום לסהדו וצלי עליהום יצחק ואתרווחו ואלוינון יצחק ואזלו מלותיה בשלם
Gen26:32	והוה ביומא ההוא ואתו עבדי יצחק ותנו ליה על עיסק בירא דחפסו ואמרו ליה אשכחנא מוי
Gen26:33	וקרא יתה שבעה בגין כן שמא דקרתא ביר שבע עד יומא הדין
Gen26:34	והוה עשו בר ארבעין שנין ונסיב איתא ית יהודית ברת בארי חיתאה וית בשמת ברת אילון חיתאה
Gen26:35	והוון מגחנן בפולחנא נוכראה ומתכוונן לאמרדא בעובדיהון בישיא ליצחק ולרבקה