The Comprehensive Aramaic Lexicon

Gen29:01	ונטל יעקב בקלילותא ריגלוי לטיילא ואזל לארע בני מדינחא
Gen29:02	וחמא והא בירא בחקלא והא תמן תלתא עדרין דעאן רביעין עלה ארום מן בירא ההיא משקן עדריא ואבנא רבתא מחתא על פם בירא
Gen29:03	ומתכנשין תמן כל עדריא ומגלגלין ית אבנא מעל פם בירא ומשקן ית ענא ומתיבין ית אבנא על פם בירא לאתרא
Gen29:04	ואמר להום יעקב אחי מנן אתון ואמרו מחרן אנחנא
Gen29:05	ואמר להום הידעתון ית לבן בר נחור ואמרו ידענא
Gen29:06	ואמר השלם ליה ואמרו שלם והא רחל ברתיה אתיה עם ענא
Gen29:07	ואמר הא עדן יומא סגי לא עידן למיכנוש בעיר אשקו ענא ואיזילו רעו
Gen29:08	ואמרו לא ניכול עד די יתכנשון כל עדריא ויגלגלון ית אבנא מעל פם בירא ונשקי ענא
Gen29:09	עד דהוא ממלל עמהון ורחל אתת עם ענא דלאבוהא ארום רעיתא היא בההוא זימנא ארום הוה מחתא דייי בענא דלבן ולא אשתיירו מינהון אלהין קלילין ותריך רעיא דיליה ומה דאשתארו שוי קדם רחל ברתיה
Gen29:10	והוה כדי חמא יעקב ית רחל ברת לבן אחוהא דאימיה וקריב יעקב וגלגיל ית אבנא בחדא מן אדרעוי מעילוי פם בירא וטפת בירא וסליקו מיא לאנפוי ואשקי ית ענא דלבן אחוהא דאימיה והוות טייפא עשרין שנין
Gen29:11	ונשק יעקב לרחל וארים ית קליה ובכא
Gen29:12	ותני יעקב לרחל ארום לאיתותבא עם אבוהא אתא ולמיסב חדא מן ברתוי ענת רחל ואמרת לית איפשר לך למיתב עימיה ארום גבר רמאי הוא אמר לא יעקב אנא רמאי וחכים יתיר מיניה ולית ליה רשו לאבאשא לי ארום מימרא דייי בסעדי וכדי ידעת ארום בר רבקה הוא ורהטת ותניאת לאבוהא
Gen29:13	והוה כדי שמע לבן ית שמע גבורתיה וחסידותיה דיעקב בר אחתיה היך נסיב ית בכירותא וית סדר ברכתא מן יד אחוי והיך אתגלי ליה ייי בביתאל והיך נדד ית אבנא והיך טפת בירא וסליקת לאנפוי ורהט לקדמותיה וגפיף ליה ונשיק ליה ואעליה לביתיה ותני ללבן ית כל פיתגמיא האילין
Gen29:14	ואמר ליה לבן ברם קריבי ודמי לי אנת ויתב עימיה ירח יומין
Gen29:15	ואמר לבן ליעקב המדאחי אנת חשיב ותיפלחינני מגן תני לי מן יהי אגרך
Gen29:16	וללבן הוון תרתין בנן שום רבתא לאה ושום זעירתא רחל
Gen29:17	ועיני לאה הוון צירנייתן דבכיא ובעיא מן קדם ייי דלא יזמן לה לעשו רשיעא ורחל הות יאיא בריוא ושפירא בחיזוא
Gen29:18	ורחם יעקב ית רחל ואמר אפלחינך שב שנין בגין רחל ברתך זעירתא
Gen29:19	ואמר לבן ברמיו טב דאיתן יתה לך מן דאיתן יתה לגבר אוחרן תיב עימי
Gen29:20	ופלח יעקב בגין רחל שב שנין והוו דמיין בעינוי כיומין קלילין מדרחים יתה
Gen29:21	ואמר יעקב ללבן הב ית אינתתי ארום אשלימו יומי פולחני ואיעול לותה
Gen29:22	וכנש לבן ית כל אינשי אתרא ועבד להון שירו עני ואמר להום הא שב שנין דאתא יעקב לגבן בירן לא חסרו ובית שקיותן סגו וכדון אית{ן}<ו> נתיעט עליה עיטא דרמיו דיימתן לגבן ועבדו ליה עיטא דרמיו לאסאבא ליה לאה חולף רחל
Gen29:23	והוה ברמשא ודברית לאה ברתיה ואעיל יתה לותיה ועל לותה
Gen29:24	ויהב לבן ליה ית זלפה ברתיה דילידת ליה פילקתיה ומסרה ללאה ברתיה לאמהו

Gen29:25	והוה לעידוני צפרא ואיסתכל בה והא היא לאה דכולא לילייא הוה חשיב דרחל היא מן בגלל דמסרת לה רחל כל מליא דמסר לה יעקב וכד חמא כן אמר ללבן מה דא עבדת לי הלא בגין רחל פלחית עימך ולמא שקרת בי

Gen29:26	ואמר לבן לא מתעביד כדין באתר{י}ן למיתן זעירתא קדם רבתא
Gen29:27	אשלים כדון שובעתי יומי משתיא דדא וניתן לך אוף ית דא בפולחנא דתיפלח עימי תוב שב שנין אוחרנין
Gen29:28	ועבד יעקב כדין ואשלים שבעתי יומי משתיא דלאה ויהב ליה ית רחל ברתיה לאינתו
Gen29:29	ויהב לבן לרחל ברתיה ית בלהה ברתיה דילידת ליה פילקתיה ומסרה לה לאמהו
Gen29:30	ועל אוף לות רחל ורחים אוף ית רחל מלאה ופלח עימיה בגינה תוב שב שנין אוחרניין
Gen29:31	וגלי קדם ייי ארום לא הוה לאה רחימתא באנפי יעקב ואמר במימריה למיתן לה בנין ורחל הות עקרה
Gen29:32	ואיתעברת לאה וילידת בר וקרת ית שמיה ראובן ארום אמרת ארום גלי קדם ייי עולבני ארום כדון ירחמנני בעלי והיכמה דאיתגלי קדם ייי עולבני היכדין יהוי גלי קדמוי עולבנהון דבניי כד יהון משתעבדין בארעא דמצראי
Gen29:33	ואתעברת תוב וילידת בר ואמרת ארום שמיע קדם ייי ארום שניתא אנא ויהב לי אוף ית דין והכדין ישתמע קדמוי קלהון דבניי כד יהון משתעבדין במצרים וקרת שמיה שמעון
Gen29:34	ואתעברת תוב וילידת בר ואמרת הדא זימנא יתחבר עימי בעלי ארום ילידית ליה תלתא בנין והיכדין עתידין בנוי למיהויהון מתחברין לשמשא קדם ייי בגין כן קרא שמיה לוי
Gen29:35	ואיתעברת תוב וילידת בר ואמרת הדא זימנא אודי קדם ייי דמן ברי דין עתיד למיפק מלכין ומיניה יפוק דוד מלכא דעתיד לאודויי קדם ייי בגין כן קרת שמיה יהודה וקמת מלמילד