The Comprehensive Aramaic Lexicon

Gen35:01	ואמר ייי ליעקב קום סוק לביתאל ותיב תמן ועיבד תמן מדבחא לאלקא דאיתגלי לך במיערקך מן קדם עשו אחוך
Gen35:02	ואמר יעקב לאינשי בייתיה ולכל דעימיה עטרון ית טעוות עממייא דביניכון דדברתון מבית טעוות שכם ואידכו מסואבות קטילייא דקרבתון בהון ושנ{ן}<ו> כסותכון
Gen35:03	ונקום וניסק לביתאל ואעביד תמן מדבחא לאלקא דקבל צלותי ביומא דעקתי והוה מימריה בסעדי באורחא דאזלית
Gen35:04	ומסרו ביד יעקב ית כל טעוות עממייא דבידיהון דדברו מן בית טעוות שכם וית קדשייא דהוו באודניהון דיתבי קרתא דשכם דהוה צייר בהון דמות פיסליה וטמר יתהום יעקב תחות בוטמא דסמיכא לקרתא דשכם
Gen35:05	ונטלו מתמן מודים ומצליין קדם ייי והות רתיתא מן קדם ייי על עממייא דבקוריי חוזרניהום ולא רדפו בתר בני יעקב
Gen35:06	ואתא יעקב ללוז דבארעא דכנען היא ביתאל הוא וכל עמא דעימיה
Gen35:07	ובנא תמן מדבחא וקרא לאתרא אל דאשרי שכינתיה בביתאל ארום תמן אתגליו ליה מלאכייא דייי במיערקיה מן קדם עשו אחוי
Gen35:08	ומיתת דבורה פידגוגתא דרבקה ואתקברת מן לרע לביתאל בשיפולי מישרא וברם תמן אתבשר יעקב על מיתת רבקה אימיה וקרא שמיה אוחרן בכות{י}א
Gen35:09	ואיתגלי ייי ליעקב תוב במיתוהי מפדן דארם ובריך ייי בשום מימריה בתר דמיתת אימיה
Gen35:10	ואמר ליה ייי עד כדון הוה שמך יעקב לא יתקרי שמך תוב יעקב אלהין ישראל יהי שמך וקרא ית שמיה ישראל
Gen35:11	ואמר ליה ייי אנא אל שדי פוש וסגי עם קדיש וכינשת נביאין וכהנין יהון מבינך דאולידתא ותרין מלכין תוב מינך יפקון
Gen35:12	וית ארעא דיהבית לאברהם וליצחק לך איתנינה ולבנך בתרך אתן ית ארעא
Gen35:13	ואיסתלק מעילווי יקר שכינתא דייי באתרא דמליל עימיה
Gen35:14	ואקים תמן קמה באתרא דמליל עימיה קמה דאבנא ונסיך עלה ניסוך חמר וניסוך מוי ארום כדין עתידין בנוי למעבר בחגא דמטלייא ואריק עלה משח זיתא
Gen35:15	וקרא יעקב ית שמיה דאתרא דמליל עימיה תמן ייי ביתאל
Gen35:16	ונטלו מביתאל והוה תוב סוגעי אשו{ו}ן עללתא דארעא במיתיה לאפרת וילידת רחל וקשיית במילדה
Gen35:17	והוה בקשיות{א}<ה> במילדה ואמרת לה חייתא לא תידחלין ארום אוף דין ליך בר דכר
Gen35:18	והוה במיפק נפשא ארום מטת עלה מותא וקרת שמיה בר דווי ואבוי קרא ליה בנימין
Gen35:19	ומיתת רחל ואתקברת באורח אפרת היא בית לחם
Gen35:20	ואקים יעקב קמתא על בית קבורתא היא קמת בית קבורתא דרחל עד יומא דין
Gen35:21	ונטל יעקב ופרס למשכניה מן להלא למוגדלא דעדר אתרא דהתמן עתיד דאיתגלי מלכא משיחא בסוף יומייא

Gen35:22	והוה כד שרא ישראל בארעא ההיא ואזל ראובן ובלבל ית מצעא דבלהה פילקתיה דאבוי דהות מסדרא כל קבל מצעא דלאה אימיה ואיתחשיב ע{י}לוי כאילו שמיש עימה ושמע ישראל ובאיש ליה ואמר ווי דילמא נפיק מיני פסולא היכמא דינפק מן אברהם ישמעאל ומן אבא נפק עשו מתיבא רוחא דקודשא וכן אמר ליה לא תידחל דכולהון צדיקין ולית בהון פסולא דמבתר דאיתיליד בנימין הוו בני יעקב תריסר

Gen35:23	בני לאה בוכרא דיעקב ראובן ושמעון ולוי ויהודה ויששכר וזבולן
Gen35:24	בני רחל יוסף ובנימין
Gen35:25	ובני בלהה אמתא דרחל דן ונפתלי
Gen35:26	ובני זלפה אמתא דלאה גד ואשר אילין בני יעקב דאיתילידו ליה בפדן דארם
Gen35:27	ואתא יעקב לות יצחק אבוי לממרא קרית ארבע היא חברון דדר תמן אברהם ויצחק
Gen35:28	והוו יומי יצחק מאה ותמנן שנין
Gen35:29	ואיתנגיד יצחק ומית ואתכנש לעמיה סיב ושבע יומין וקברו יתיה עשו ויעקב בנוי