The Comprehensive Aramaic Lexicon

Exod07:01	ואמר ייי למשה למא אנת מסתפי חמי דכבר שוית יתך דחילא לפרעה כאילו אלהא דיליה ואהרן אחוך הוי נביא דילך
Exod07:02	אנת תמליל לאהרן ית כל דאיפקדינך ואהרן אחוך ימליל לפרעה ויפטור ית בני ישראל מארעיה
Exod07:03	ואנא אקשי ית יצרא דליבא דפרעה ואסגי ית אתוותיי וית תימהיי בארעא דמצרים
Exod07:04	יקבל מנכון פרעה ואיגרי בהון גירין דקטול ואיתין מחת גבורת ידי במצרים ואפיק ית עמי בני ישראל פריקין מארעא דמצרים בדינין רברבין
Exod07:05	וינדעון מצראי ארום אנא הוא ייי כד ארים ית מחת גבורתי על מצרים ואנפיק ית בני ישראל פריקין מביניהון
Exod07:06	ועבד משה ואהרן היכמא דפקיד ייי יתהון היכדין עבדו
Exod07:07	ומשה בר תמנן שנין ואהרן בר תמנן ותלת שנין במלילתהון עם פרעה
Exod07:08	ואמר ייי למשה ולאהרן למימר
Exod07:09	ארום ימלל עמכון פרעה למימר הבו לכון תימהא ותימר לאהרן סב ית חוטרך וטלוק יתיה קדם פרעה יהי לחוי חורמן ארום עתידין כל דיירי ארעא למשמע קל ציווחתהון דמצרים בתברותי יתהון היכמא דשמעו כל בירייתא ית קל ציווחת חיויא כד איתערטל מן שירויא
Exod07:10	ואעל משה ואהרן לות פרעה ועבדו היכדין היכמא דפקד ייי וטלק אהרן ית חוטריה קדם מיחמי פרעה וקדם מיחמי עבדוי והוה לחורמנא
Exod07:11	וקרא לחוד פרעה לחכימייא ולחרשייא ועבדו לחוד הינון יניס וימבריס חרשין דבמצרים בלחשי קוסמיהון היכדין
Exod07:12	וטלקון אינש חוטריה והוו לחורמנין ומן יד איתהפיכו למיהוי כמ{ר}<י>ן שירויא ובלע חוטרא דאהרן ית חוטריהון
Exod07:13	ואיתקף יצרא דלבא דפרעה ולא קביל מנהון היכמא ייי
Exod07:14	ואמר ייי למשה איתקף יצרא דלבה דפרעה מסרב למפטור ית עמא
Exod07:15	איזל לות פרעה בצפרא הא נפיק למ{פ}<ינ>טור קוסמין עילוי מיא הי כאמגושא ותיתעתד לקדמותיה על גיף נהרא וברם חוטרא דאהרן דאיתהפיך לחיוי תיסב לידך
Exod07:16	ותימר ליה ייי אלקא דיהודאי שדרני לוותך למימר פטור ית עמי ויפלחון קדמי במדברא והא לא קבילת עד כדון
Exod07:17	כדנא אמר ייי בדא סימנא תינדע ארום אנא ייי הא אנא מחי בחוטרא דבידי על מוי די בנהרא ויתהפכון לאדמא
Exod07:18	ונוני דיבנהרא ימותון ויסרי נהרא וישתלהון מצראי למישתי מוי מן נהרא
Exod07:19	ואמר ייי למשה אימר לאהרן סב חוטרך וארים ידך על מוי דמצראי על נהריהון על ביציהון על שיקייאון ועל כל בית כנישות מימיהון ויהון דמא ויהי דמא בכל ארע דמצרים ובמני אעא ובמני אבנא
Exod07:20	ועבדו היכדין משה ואהרן היכמא דפקיד ייי וארים בחוטרא ומחא ית מוי דבנהרא לאחמי פרעה ולאחמי עבדוי ואיתהפיכו כל מוי דבנהרא לאדמא
Exod07:21	ונוני די בנהרא מיתו וסרי נהרא ולא יכילו מצראי למישתי מוי מן נהרא והות מחת דמא בכל ארעא דמצרים
Exod07:22	ועבדו היכדין איצטיגנוני מצרים בלחשיהון והפיכו מן מיא דגושן לאדמא ואיתקף יצרא דליבא דפרעה ולא קביל מיניהון היכמא דמליל ייי
Exod07:23	ועבד פרעה צורכיה ועאל לביתיה ולא שוי ליביה לחוד למחתא הדא
Exod07:24	וחפרו מצראי חזרנות נהרא מוי למישתי ולא אשכחו צלילן ארום לא יכילו למשתי מן מוי דבנהרא
Exod07:25	ושלימו שובעא יומין מן בתר די מחא ייי ית נהרא ומבתר כן אסי מימרא דייי ית נהרא
Exod07:26	ואמר ייי למשה עול לות פרעה ותימר ליה כדנא אמר ייי פטור ית עמי ויפלחון קדמי
Exod07:27	ואין מסרב אנת למפטור הא אנא מחי ית כל תחומך בעורדענייא

Exod07:28	וירבי נהרא עורדעניא ויסקון ויעלון בביתך ובקיטון בי דמכך ועילוי דרגשך ובבית עבדך ובעמך ובתנורך ובאצוותך

Exod07:29	ובגופך ובגופי עמך ובכל עבדך ישלטון עורדעניא