The Comprehensive Aramaic Lexicon

Exod08:01	ואמר ייי למשה ארים ית ידך בחוטרך על נהריא על ביציא ועל שיקייא ואסיק ית עורדעניא על ארעא דמצרים
Exod08:02	וארים אהרן ית ידיה על מיא דמצרים וסליקת מחת עורדענייא וחפת ית ארעא דמצרים ברם משה לא אלקי ית מיא לא באדמא ולא בעורדענייא מן בגלל דהות ליה בהון שיזבותא בזמן דטלקת יתיה אימיה בנהרא
Exod08:03	ועבדו היכדין אסטגניניא בלחשיהון ואסיקו ית עורדענייא על ארעא דמצרים
Exod08:04	וקרא פרעה למשה ולאהרן ואמר צלון קדם ייי ויעדי עורדענייא מיני ומן עמי ואפטור ית עמא וידבחון נכסת חגא קדם ייי
Exod08:05	ואמר משה לפרעה שבח נפשך בגיני לאימת דאנת בעי איצלי עלך ועל עבדך ועל עמך לשיצאה עורדענייא מינך ומבתך לחוד מה דבנהרא ישתיירון
Exod08:06	ואמר למחר ואמר כפתגמך מן בגלל דתינדע ארום לית כייי אלקנא
Exod08:07	ויעדון עורדענייא מינך ומיבתך ומן עבדך ומן עמך לחוד מה דבנהרא ישתיירון
Exod08:08	ונפק משה ואהרן מלות פרעה וצלי משה קדם ייי על עיסק עורדעניא דשוי לפרעה
Exod08:09	ועבד ייי כפתגמא דמשה ומיתו עורדעניא מן בתיא ומן דרתא ומן חקליא
Exod08:10	וכנשו יתהון כירוויין כירוויין וסריית ארעא
Exod08:11	וחמא פרעה ארום הות רווחתא לעקתיה ויקר ית ליביה ולא קביל מנהון היכמא דמליל ייי
Exod08:12	ואמר ייי למשה אימר לאהרן ארים ית חוטרך ומחי ית עפרא דארעא ויהי לקלמי בכל ארעא דמצרים ברם על ידך לית אפשר למילקי ארעא דבה הות לך שיזבותא כד קטלתא ית מצראי וקבילתיה
Exod08:13	ועבדו היכדין וארים אהרן ית ידיה בחוטריה ומחא ית עפרא דארעא והות מחת קלמי בבישרא דאינשא ודבעירא כל עפרא דארעא איתהפיך למיהוי קלמי בכל ארעא דמצרים
Exod08:14	ועבדו היכדין איסטיגניניא חרשיותא בלחשיהון לאנפקא ית קלמין ולא יכילו והות מחת קלמי שלטא באינשא ובבעירא
Exod08:15	ואמרו איסטגניני פרעה ולא מן כח גבורת משה ואהרן היא אלהן מחא משתלחא מן קדם ייי היא ואיתקף יצרא דליבא דפרעה ולא קבל מנהון היכמא דמליל ייי
Exod08:16	ואמר ייי למשה אקדים בצפרא ותיתעתד קדם פרעה הא נפיק למינטר קוסמין עילוי מיא הי כאמגושתא ותימר ליה כדנא אמר ייי פטור ית עמי ויפלחון קדמי
Exod08:17	ארום אין ליתך מפטר ית עמי האנא מגרי בך ובעבדך ובעמך ובביתך ית עירבוב חיות ברא ויתמלון בתי מצראי עירבו{ת}<ב> חיות ברא ואוף ית ארעא דהינון עלה
Exod08:18	ואעבד פלאין ביומא ההוא עם ארעא דגושן דעמי שרי עלה בדיל דלא למיהוי תמן עירבוב חיות ברא מן בגלל דתינדע ארום אנא ייי שליט בגו ארעא
Exod08:19	ואישוי פורקן לעמי ועל עמך אייתי מחא לעידן מחר יהי אתא הדין
Exod08:20	ועבד ייי כן ואיתי עירבוב חיות ברא תקיף לבית פרעה ולבית עבדוי ובכל ארעא דמצרים אתחבלו יתבי ארעא מן קדם עירבוב חיות ברא
Exod08:21	וקרא פרעה למשה ולאהרן ואמר איזילו פלחו נכסת חגא קדם ייי אלהכון בארעא הדא
Exod08:22	ואמר משה לא תקין למעבד כן ארום אימריא דהינון טעוותהון דמצראי מינהון ניסב ונקרבא קדם ייי אילהן הא אין מקרבין אנן ית טעוותהון דמצראי קדמיהון הוא מן דינא הוא לאטלא יתן באבנין
Exod08:23	מהלך תלתא יומין נטייל במדברא ונדבח נכסת חגא קדם ייי אלקנא היכמא דיימר לנא
Exod08:24	ואמר פרעה אנא אפטור יתכון ותדבחון קדם ייי אלקכון במדברא לחוד ארחקא לא תרחקון לטיילא צלו עלי

Exod08:25	ואמר משה הא אנא נפיק מלותך ואיצלי קדם ייי ויעדי עירבוב חיות ברא מן פרעה ומן עבדוי ומן עמיה למחר לחוד לא יוסיף פרעה למשקרא בדיל דלא למפטור ית עמא למדבחא ניכסת חגא קדם ייי

Exod08:26	ונפק משה מלות פרעה וצלי קדם ייי
Exod08:27	ועבד ייי כפתגם בעותא דמשה ואעדי עירבוב חיות ברא מפרעה ומעבדוי ומעמיה לא אישתאר חד
Exod08:28	ויקר פרעה ית יצרא דליביה אוף בזימנא הדא ולא פטר ית עמא