← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

81001: TgPsJon Exod chapter 11

Click on a word for lexical analysis
Click on a red-colored coordinate for comments and/or translations of the line

previous chapter


Exod11:01 ואמר ייי למשה תוב מכתש חד אנא מייתי עלוי פרעה ועילוי מצראי דקשי עליהון מכולהון ומבתר כדין יפטור יתכון מיכא כמיפטריה גמירא יהי ליה מטרד יטרוד יתכון מכא
Exod11:02 מליל כדון במשמעהון דעמא וישיילון גבר מן רחמיה מצראי ואיתתא מן רחמה מצריתא מאנין דכסף ומנין דדהב
Exod11:03 ויהב ייי ית עמא לרחמין קדם מצראי אוף גברא משה רב לחדא בארעא דמצרים קדם עבדי פרעה וקדם עמא
Exod11:04 ואמר משה לפרעה כדנא אמר ייי לילייא חורן כשעתא דא אנא מתגלי בגו מצראי
Exod11:05 וימות כל בוכרא בארעא דמצרים מביר בוכרא דפרעה דעתיד דייתיב על כורסיי מלכותיה עד בוכרא דאמתא בצירתא דבמצרים דמתיליד לה כד היא טחנא אחורי ריחייא וכל בוכרא דבעירא
Exod11:06 ותהי צווחתא רבתא בכל ארעא דמצרים דדכותיה לילייא לא הות ביה מחתא כדא ודכוותיה לילייא לא תוסיף למיהוי מחתא כדא
Exod11:07 ולכל בני ישראל לא יהנזק כלבא בלישניה למנבח למאינשא ועד בעירא מן בגלל דתינדעון דיפריש ייי בין מצראי וביני ישראל
Exod11:08 ויחתון כל עבדך אליין לותי ויבעון מטו מיני למימר פוק אנת וכל עמא דעימך ומבתר כדין איפוק ונפק מלות פרעה בתקוף רגז
Exod11:09 ואמר ייי למשה לא יקביל מנכון פרעה מן בגלל לאסגאה תמהיי בארעא דמצרים
Exod11:10 ומשה ואהרן עבדו ית כל תימהייא האילין קדם פרעה ותקיף ייי ית יצרא דלבא דפרעה ולא פטר ית בני ישראל מארעיה

next chapter