The Comprehensive Aramaic Lexicon

Exod27:01	ותעביד ית מדבחא דקיסי שיטא חמש אמין אורכא וחמש אמין פותיא מרבע יהי מדבחא ותלת אמין רומיה

Exod27:02	ותעביד קרנוי על ארבע זיוייתיה מיניה יהויין קרנוי זקיפן לעיל ותחפי יתיה נחשא

Exod27:03	ותעביד דודוותיה למרדדא יתיה ומגרפתיה ומזירקוי ומשילייתיה ומחתייתיה כל מנוי תעביד נחשא
Exod27:04	ותעביד ליה קנקל עובד מצדתא דנחשא ותעבד על מצדתא ארבע עיזקן דנחשא על ארבע ציטרוי
Exod27:05	ותיתן יתה תחות סובבי מדבחא מלרע ותיהי מצדתא על פלגות מדבחא ואין נפיל גרמא או גומרא דאשא מעילוי מדבחא נפיל עילוי קנקל ולא יתמטי לארעא ונסבין יתיה כהניא מעילוי קנקל ומהדרין יתיה על מדבחא
Exod27:06	ותעביד אריחין דקיסי שיטא ותחפי יתהון נחשא
Exod27:07	ויהנעל ית אריחוי בעיזקתא ויהון אריחיא על תרין ציטרי מדבחא במיטל מדבחא
Exod27:08	חליל לוחין מלי עפרא תעביד יתיה הי כמא דאחמיתך בטוורא היכדין יעבדון
Exod27:09	ותעבד ית דרת משכנא לרוח עיבר דרומא ווילוון לדרתא דבוץ שזיר מאה אמין אורכא לרוח חדא
Exod27:10	ועמודוי עשרין וחומריהון עשרין דנחשא ווי עמודיא וכיבושיהון כסף
Exod27:11	והיכדין לרוח ציפונא באורכא ווילוון מאה אורכא ועמודיהון עשרין וחומריהון עשרין דנחשא ווי עמודיא וכיבושיהון כסף
Exod27:12	ופותיא לרוח מערבא ווילוון חמשין אמין עמודיהון עשרה וחומריהון עשרה
Exod27:13	ופותיא דדרתא לרוח קידומא מדינחא חמשין אמין
Exod27:14	וחמיסירי אמין ווילוון לעיברא עמודיהון תלתא וחומריהון תלתא
Exod27:16	ולתרע דרתא פרסא עשרין אמין דתיכלא וארגוונא וצבע זהורי ובוץ שזיר עובד צייור מחטא עמודיהון ארבעא וחומריהון ארבעא
Exod27:17	כל עמודי דרתא חזור חזור מכבשין כסף וויהון כסף וחומריהון דנחשא
Exod27:18	ארכא דדרתא מאה אמין ופותיא חמשין למערבא וחמשין למדינחא ורומא חמש אמין דבוץ שזיר וחומריהון דנחשא
Exod27:19	לכל מני משכנא בכל פולחניה וכל מתחוי וכל מתחי דרתא חזור חזור דנחשא
Exod27:20	ואנת תפקד ית בני ישראל ויסבון לך מישחא דזיתא דכיא כתישא לאנהורי לאדלקא בוציניא תדירא
Exod27:21	במשכן זימנא מברא לפרגודא דעל סהדותא יסדר יתיה אהרן ובנוי מן רמשא ועד צפרא קדם ייי קיים עלם לדריהון מן בני ישראל