The Comprehensive Aramaic Lexicon

Lev09:01	והוה ביומא תמינאה לרבות אהרן ובנוי ויום תמינאה לאשלמוותא הוא יומא קדמאה לירחא דניסן אקים משה ית משכנא ולא פרקיה ולא שמיש תוב על גבי מדבחא בכן קרא משה לאהרן ולבנוי ולסבי סנהדרי ישראל
Lev09:02	ואמר לאהרן סב לך עיגל בר תורי לחטאתא מטול דלא ישתעי עלך סטנא לישן תליתאי על עיסק עיגלא דעבדת בחורב וברם דכר לעלתא תיסב מן בגלל די ידכר לך זכותא דיצחק דכפתיה אבוי כדיכרא בטוור פולחנא תריהון יהון שלמין וקריב קדם ייי
Lev09:03	ועם בני ישראל תמליל למימר סבו ברם אתון צפיר בר עיזי מטול דסטנא מימתיל ביה מטול דלא ישתעי עליכון לישן תליתאיי על עיסק צפיר בר עיזי דנכיסו שבטוי דיעקב ורמייו יתיה ועיבד יתיה לחטאתא ועיגלא מטול דאשתעבדתון לעיגלא ואימר בר שתיה מטול דידכר לכון זכותא דיצחק דכפתיה אבוי הי כאימרא תריהון שלמין לעלתא
Lev09:04	ותור ואימר לניכסת קודשיא לדבחא קדם ייי מן בגלל דיתרעי בכון ומנחתא פתיכא במשח זיתא ארום יומא דין איקר שכינתא דייי מתגלי לכון
Lev09:05	ואזדרזון אהרן ובנוי וכל בני ישראל ונסיבו ית מה דפקיד משה והייתיו לקדם משכן זימנא וקריבו כל כנישתא וקמון בלב שלים קדם ייי

Lev09:06	ואמר משה דין פיתגמא דתעבדון אעברו ית יצרא בישא מן ליבכון ומן יד איתגלי לכון איקר שכינתא דייי

Lev09:07	והוה כיוון דחמא אהרן מדבחא בקרנוי מידמי לעיגלא איסתפי למיקרב לגביה בכין אמר ליה משה אגיס מנדעך וקריב למדבחא ולא תיסתפי ועיבד ית חטאתך וית עלתך וכפר אמטולתך ואמטול עמא ועיבד ית קרבן עמא וכפר עליהון היכמא דפקיד ייי
Lev09:08	וקריב אהרן למדבחא בזריזותא ונכיס ית עיגלא דחטאתא דידיה
Lev09:09	וקריבו בני אהרן ית אדמא לוותיה וטבל אדבעיה באדם תורא ויהב על קרנת מדבחא וית שאר אדמא אריק ליסודא דמדבחא וקדשיה למכפרא עלוי
Lev09:10	וית תריב וית כוליין וית חצרא מן כבדא מן חטאתא אסיק למדבחא היכמא דפקיד ייי ית משה
Lev09:11	וית בשרא וית מושכיה אוקיד בנורא מברא למשריתא
Lev09:12	ונכס ית עלתא ואקריבו בני אהרן ליה ית אדמא ודרקיה על מדבחא חזור חזור
Lev09:13	וית עלתא אקריבו יתה לפסגהא וית רישא ואסיק על מדבחא
Lev09:14	וחליל ית בני גווא וית ריגלייא ואסיק על עלתא למדבחא
Lev09:15	וקריב ית קרבן עמא ונסב ית צפירא דחטאתא די לעמא ונכסיה וכפר באדמיה דצפירא היכמא דכפר באדם עיגלא דחטאתא דיליה דקריב בשירויא
Lev09:16	וקריב ית עלתא ועבד{א}<ה> כהילכת עלתא דקריב אמטולתיה
Lev09:17	וקריב ית מנחתא ומלא ידיה מינה ונסיב מיניה צרי{ד}<ר> אדכרתא ואסיק על מדבחא בר מן עלת צפרא
Lev09:18	ונכיס ית תורא וית דיכרא ניכסת קודשיא די לעמא ואקריבו בני אהרן ית אדמא ליה ודרקיה על מדבחא חזור חזור
Lev09:19	וית תרביא מן תורא ומן דיכרא אליתא ודחפי בני גווא וכולייתא וחצר כבדא
Lev09:20	ושוייו ית תרביא על חדוותא ואסיק תרביא למדבחא
Lev09:21	וית חדוותא וית שקא דימינא ארים אהרן ארמא קדם ייי היכמא דפקיד ייי ית משה
Lev09:22	ופרס אהרן ית ידוי לקבל עמא ובריכינון ונחת מן מדבחא בחדוא מן דפסק למעבד חטאתא ועלתא ונכסת קודשיא
Lev09:23	וכיוון דאיתעבידו קורבניא ולא איתגליית שכינתא הוה אהרן מיבהית ואמר למשה דילמא לא איתרעי מימרא דייי בעובדי ידיי בכן עלו משה ואהרן למשכנא זימנא וצלו עמא בית ישראל ונפקו ובריכו ית עמא ואמר יקבל מימר דייי ברעוא ית קורבניכון וישרי וישבוק על חוביכון ומן יד איתגלי איקר שכינתא דייי לכל עמא
Lev09:24	ונפקת אישתא מן קדם ייי ואכלת על גבי מדבחא ית עליא וית תרביא וחמון כל עמא ואודון ואתרכינו בצלו על אנפיהון