The Comprehensive Aramaic Lexicon

092:001	שבחא ושירא די אמר אדם קדמאה על יומא דשבתא:
092:002	טב לאודאה קדם ייי ולשבחא שמך עילאה:
092:003	לתנאה/לתנויי#1#/ בצפרא טובך וקושטך בלילון:
092:004	על פום כנורא דעשרתי נימין ועל פום ניבלא עלי ריננת כינרייא:
092:005	ארום אחדיתני ייי בעובדך בעובדי אידך אביע/אבוע#1#/:
092:006	כמה /הינון#1#/ רברבין עובדך ייי לחדא עמיקין מחשבתך:
092:007	בר נש שטיא/טפשא#1#/ לא ידע וכסילא/ושטיא#1#/ לא יתביין ית דא:

092:008	כד מיתלבלבן רשיעיא היך עסבא ונצצין כל עבדי שקר ועתיד דישצינון אלהא עד עלמא:

092:009	ואת/ואנת#1#/ רמא ועילאה בעלמא הדין ייי ואת/ואנת#1#/ רמא ועילאה לעלמא דאתי: /{ת׳׳א} ואנת ידך עיליתא לאיתפרעא מן חייביא לעלמא דאתי ליום דינא רבא ייי ואנת ידך עיליתא למיתן אגר טב לצדיקיא לעלמא דאתי ייי#1#/:
092:010	ארום הא בעלי דב<ב>ך /מצלחין בעלמא הדין#1#/ ייי ארום הא בעלי דבבך יהובדון לעלמא דאתי ומתפרשין מן סיעתהון דצדיקיא כל עבדי שקר:
092:011	וזקיפתא היך רימנא תוקפי רביתא יתי במשח רבותא רטיבא דזית עבוף:
092:012	ואיסתכלת עייני בהובדנא דמעיקי בקיימין עלי לאבאשא שמען אודני קל תברהון:
092:013	צדיקא היך דיקלא ילבלב פירין היך ארזא בליבנן יסגא ויעביד שרשין:
092:014	בנוי יהויין שתילין בבית מקדשא דייי בדרת בית אלהנא ילבלבון:
092:015	תוב כאבהתהון יעבדון בנין בשיבו דהינין ורטיבין יהון:
092:016	מטול דיחוון דיירי ארעא ארום תריץ ייי תקפי/תקיפי#1#/ ולית עוולתא ביה: