The Comprehensive Aramaic Lexicon


1 16:01	ואיתיאו ית ארונא דה׳ ואקימו יתיה במצע משכנא די פרש ליה דוד וקריבו עלוון ונכסת קודשין קדם ה׳:

1 16:02	ופסק דוד מן למסק<א> עלתא ונכסת קודשי׳ ובריך ית עמא בשום מימרא דה׳:
1 16:03	ופליג לכל אנש ישר׳ מגבר ועד אתתא לכל חד טולמא דלחמא חדא ופלוג חד מן אשתה בתורא ומנא חד מן אשתה בהינא דחמרא:
1 16:04	ומני קדם ארונא דה׳ מן ליואי משבחיא ולאדכרא ולאודויי ולשבוחי קדם ה׳ אלהא דישראל:
1 16:05	אסף ברישא ותנייניה זכריה יעיא׳ ושמירמו׳ ויחיאל ומתתיהו ואליאב ובניהו ועבד אדום ויעיאל בזיני זמר נבלין וכנרין ואסף בצלצלין משמע:
1 16:06	ובניהו ויחזיאל כהניא בחצוצרתא תדירא קדם ארון קיימא דה׳:
1 16:07	ביומא ההוא הא בכין אתמנא דוד ברישא לשבחא קדם ה׳ בידא דאסף ואחוהי:
1 16:08	שבחו קדם ה׳ קרו בשמיה הודעו בעמיא עובדוי:
1 16:09	שבחו קדמוי זמרו קדמוי מלילו כולהון פרישוותיה:
1 16:10	אשתבחון בשום קודשיה יחדי לבהון דתבעי מימרא דה׳:
1 16:11	תבעו מימרא דה׳ ותוקפיה קבילו אפוהי תדירא:
1 16:12	אדכרו פרישוותיה דעבד תמהוהי ודיני פומיה:
1 16:13	זרעא דישר׳ עבדיה בני יעקב דאתרעי בהון:
1 16:14	הוא ה׳ אלהנא בכולא ארע׳ דינוהי:
1 16:15	אדכרו לעלם קיימיה פתגמא דפקיד לאלפין דרין:
1 16:16	די גזר עם אברהם וקיימיה ליצחק:
1 16:17	ואוקמה ליעק׳ לגזירא ולישראל קיים עלם:
1 16:18	למימר לך אתן ית ארעא דכנען עדב אחסנתכון:
1 16:19	כד הויתון עם דמניין קלילין ויתבין בה:
1 16:20	והליכו מן עמא לות עמא ומן מלכו לעם חורן:
1 16:21	לא ארשי גבר לטלמא להון ואוכח אמטולהון מלכיא:
1 16:22	לא תנזקון בקדישי דרביתנון בשום טב ובנביי לא תבאשון:
1 16:23	שבחו קדם ה׳ כל יתבי ארעא בשרו מן יומא ליומא פורקניה:
1 16:24	אשתעו בעממיא יקריה בכולהון אומיא פרישוותיה:
1 16:25	מטול דרב ה׳ ומשבח לחדא ודחיל הוא על כולהון מלאכייה:
1 16:26	מטול דכלהון טעות עממי׳ דחלן דלית בהון צרוך וה׳ שמיא עבד:
1 16:27	זיוא ושבהורא קדמוי תוקפא ודיצותא באתריה:
1 16:28	הבו קדם ה׳ גניסת עממי׳ הבו קדם ה׳ יקרא ותוקפא:
1 16:29	הבו קדם ה׳ איקר שמיה טולו תקרובתא ועולו קדמוהי וסגודו קדם ה׳ בשבהורי קודשא:
1 16:30	אזדעזעו מן קדמוהי כל יתבי ארעא ברם אתקין ארעא דלא תזדעזע:
1 16:31	יחדון אנגלי מרומא ויבועון יתבי ארעא יימרון בעמיא ה׳ מלך:
1 16:32	יכלי ימא ומלאיה יבועון אילני חקלא וכל עשבא דביה:
1 16:33	הא בכין ירננו אילני חורשא מן קדם ה׳ ארום אתגלי למדן כל יתבי ארעא:
1 16:34	אודו קדם ה׳ ארום טב מטול די לעלם טוביה:
1 16:35	ואמרו פרוק יתנא אלהא פורקננא וכנוש יתנא ושיזיב יתנא מן עממיא לאודויי לשום קודשך ולאשתבחא בתושבחתך:
1 16:36	בריך ה׳ אלהא דישראל מן עלמא הדין ועד עלמא דאתי ואמרו כל עמא אמן שבחא קדם ה׳:
1 16:37	ושבק תמן קדם ארון קיימא דה׳ לאסף ולאחוהי לשמשא קדם ארונ׳ תדירא פתגם יום ביומיה:
1 16:38	ועבד אדום ואחיהון אשתין ותמניה ועבד אדום בר ידותון וחסה לתרעייה:
1 16:39	וית צדוק כהנא ואחוהי כהניא קדם משכנא דה׳ בבית כנישתא די בגבעון:
1 16:40	לאסקא עלוון קדם ה׳ על מדבח עלתא תדירא לצפרא ולרמשא ולכל מה דכתיב באוריתא דה׳ די פקיד על ישראל:
1 16:41	ועמהון הימן וידותון ושייר בחירייה די אתפרשו בשמהן לאודויי קדם ה׳ מטול די לעלם טוביה:
1 16:42	ועמהון הימן וידותון בחצצרתא וצלצלין למשמעייה וזיני תושבחא קדם ה׳ ובני ידותון ממנן על תרעייה:
1 16:43	ואזל כל עמא אנש לבייתיה וחזר דוד לברכא ית עמא: