The Comprehensive Aramaic Lexicon

1 19:01	והוה מן בתר כדין ומית נחש מלכא דבני עמון ומליך חנון בריה תחתוהי:
1 19:02	ואמר דוד אעביד טיבו עם חנון בר נחש מטול דעבד אבוהי עמי טיבו ושדר/ושלח#1#/ דוד עזגדין לנחמותיה על אבוהי ואתו עבדי דוד לארע בני עמון לות חנון לנחמותיה:
1 19:03	ואמרו רברבי בני עמון לחנון האפשר דמייקר דוד ית אבוך קדמך ארום שדר לך מנחמין הלא מן בגלל למחקר ולהפכא ולאללא ית ארעא אתו עבדוהי לותיך:
1 19:04	ודבר חנון ית עבדי דוד וגרענון ופסק ית לבושיהון מן פלגיהון עד בית בהתתהון ופטרנון:
1 19:05	ואזלו וחויאו לדוד על עיסק גבריא ושדר לקדמותהון ארום הוון גובריא מתכלמין לחדא ואמר מלכא תיבו ביריחו עד זמן די ירבי דקניכון ותתובון:
1 19:06	וחמון בני עמון ארום אתגריאו בדוד ושדר חנון ובני עמון אלף קנטירין דכסף למיגר להון מן ארם דעל פרת ומן ארם דעל מעכה ומצובה ארתכין ופרשין:
1 19:07	ואגרו להון תלתין ותרין אלפין ארתכין וית מליך מעכה וית עמיה ואתו ושרו קדם מידבא ובני עמון אתכנישו מקרויהון ואתו לאגחא קרבא:
1 19:08	ושמע דוד ושדר ית יואב וית כל רישי חילא ואוכלוסי גבריא:
1 19:09	ונפקו בני עמון וסדרו קרבא במעלנא דקרתא ומלכיא די אתו בלחודיהון בחקלא:
1 19:10	וחמא יואב ארום תקיפו עבדי קרבא עלוי מן קדמוהי ומן בתרוהי ובחר מכל עולימי ישראל וסדר קרבא לקדמות ארם:
1 19:11	וית שייר עמא מני ביד אבשי אחוהי וסדרו קרבא לקדמות בני עמון:
1 19:12	ואמר אין מתקפין מני ארמאי ותהי לי לפריק ואין בני עמון יתקפון מנך ואפרקנך:
1 19:13	אתקף ונתקפה מטול עמנא ומטול קרוי אלהנא וה׳ דתקין קדמוהי יעביד:
1 19:14	וקריב יואב ועמא די עמיה קדם ארם לקרבא ואפכו מן קדמוהי:
1 19:15	ובני עמון חמון ארום אפכו אנש ארם ואפכו ברם הנון מן קדם אבשי אחוהי ועלו לקרתא ואתא יואב לירושלם:
1 19:16	וחמון אנש ארם ארום אתברו קדם ישראל ושדרו עזגדין ואפיקו ית ארם די בעיבר פרת ושופך רב חילא דהדרעזר קדמיהון:

1 19:17	ואתחוה לדוד וכנש ית כל ישראל ועבר ית יורדנא ואתא לותהון וסדר לותהון וסדר דוד לקדמות ארם קרבא ואגיחו עמה:

1 19:18	ואפכו אנשי ארם מן קדם ישראל וקטל דוד מאנשי ארם שבעת אלפין ארתכין וארבעין אלפין גוברין רגלאין וית שופך רב חילא קטל:
1 19:19	וחמון עבדי הדרעז׳ ארום אתברו קדם ישראל ואשלימו עם דוד פלחו ליה ולא צבו אנשי ארם למפרק ית בני עמון תוב: