← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

81011: TgChron2 21

Click on a word for lexical analysis
Click on a red-colored coordinate for comments and/or translations of the line

previous chapter


2 21:01 ושכיב יהושפט עם אבהתוי ואתקבר עם אבהתוי בקרתא דדוד ומליך יהורם בריה באתרוהי:
2 21:02 וליה אחין בני יהושפט עזריה ויחיאל וזכריהו ועזריהו ומיכעל ושפטיהו כל אלין בני יהושפט מלכא דישראל:
2 21:03 ויהב להון אבוהון מתנן סגיעין לכספא ולדהבא וללבושין דיקר ואקניאונון על גב קרקעא בהדי קרוין כרכין בארעא דבית יהודה וית מלכותא יהב ליהורם בריה ארום הוא בוכרא:
2 21:04 וקם יהורם על מלכותא דאבוהי ואתקף וקטל ית כל אחוהי בחרבא ואוף מרברבי ישראל:
2 21:05 בר תלתין ותרתין שנין הוה יהורם כד מלך ותמני שנין מלך בירושלם:
2 21:06 והליך באורח מלכיא דבית ישראל היכמה דעבדו אנשי בית אחאב ארום ברת אחאב הות ליה לאנתו לעבד דביש קדם ייי:
2 21:07 ולא הות רעוא מן קדם ייי לחבלא ית בית דוד מן בגלל קיימא די גזר עם דוד והיכמה דאמר למתן ליה מלכו ולבנוי כל יומיא:
2 21:08 ביומוי מרדו אדומאי ואשתמיטו מתחות ידא דבית יהודה ואמליכו עליהון מלכא:
2 21:09 ועבד יהורם עם רברבנוי וכל ארתיכיה דעמיה והוה כד קם בליליא וקטל ית אדומאי דקיימין חזור חזור ליה וית רברבי ארתיכא:
2 21:10 ומרדו אדומאי דאשתמיטו מתחות ידא דבית יהודה עד יומא הדין הא בכין מרדת לבנה בעדנא ההיא ואשתמיטת מתחות ידיה ארום מטול דשבק ית דחלתא דייי אלהא דאבהתוי:
2 21:11 אוף הוא עבד במוסייה בטוורי יהודה ואטעי ית יתבי ירושלם ואטעי ית דבית יהודה:
2 21:12 ואתא לותיה פיטקה מן אליהו נביא למימר כדנן אמר ייי אלהא דדוד אבוך חולף די לא הליכתא באורחתא דיהושפט אבוך ובאורחתא דאסא מליך שבטא דבית יהודה:
2 21:13 והליכתא באורחת מלכיא דבית ישראל ואטעיתא ית דבית יהודה וית יתבי ירושלם היכמה דאטעיו יתהון דבית אחאב ואוף ית אחך בני אבֻ<ו>ך דטבין מנך קטילתא:
2 21:14 והא מימרא דייי מגרי מותנא רבתא בעמך ובבנייך ובנשיך ובכל קנינך:
2 21:15 ואנת במרעין סגיעין במרעות מעיינך עד זמן די יפקון מעיינך מן גושמך מן מרעית דיוריך עלך יומיא על שניא:
2 21:16 וגרי מימרא דייי על יהורם ית רוחא דפלשתאי וערבאי די על תחומי אפריקאי:
2 21:17 וסליקו בארעא דבית יהודה וכבשוהא ושבו ית כל קניינא דאשתכח לבית מלכא ואוף ית בנוי ונשוי ולא אשתייר ליה בר אלהן יהואחז דזוטר בבנוי:
2 21:18 ומן בתר כל דנא תבריה מימרא דייי במעיינוי במרעין דלית אסו:
2 21:19 והוה לזמן יומין ושנין ובעדן דעבד צורכיה יתיר מן קציה ליומין תרין נפקו מעיינוי עם מרעיה ומית במרעין בישין ולא עבדו ליה עמיה יקידת קיסי בוסמנין היך יקידת אבהתוי:
2 21:20 בר תלתין ותרתין שנין הוה כד מלך ותמני שנין מלך בירושלם ואזל לבית קבורתא בלא רגיגתא וקברו יתיה בקרתא דדוד ולא בקברי מלכיא:

next chapter