The Comprehensive Aramaic Lexicon

2 29:01	יחזקיהו מלך בר עשרין וחמש שנין ועשרין ותשע שנין מלך בירושלם ושום אמיה אביה ברת זכריה:
2 29:02	ועבד דכשר קדם ייי הי ככל מה דעבד דוד אבוי:
2 29:03	הוא בשתא קדמיתא כד מלך בירחא קדמאה פתח ית דשי בית מקדשא דייי ותקיפנון:

2 29:04	ואייתי ית כהניא וית ליואי וכנשינון לפתאת מדנחא:

2 29:05	ואמר להון קבילו מני ליואי כדון הוו זמינין ותתקדשון וקדישו ית בית מקדשא דייי אלהא דאבהתכון ואפיקו ית ריחוקא מן קודשא:
2 29:06	ארום שקרו אבהתנא ועבדו דביש קדם ייי אלהנא ושבקוהי ואחזרו אפיהון ממשכנא דייי ואפכו ליה קדל:
2 29:07	אוף אחדו דשי אולמא ואטיפו ית בוציניא וקטרת בוסמין לא אסיקו ועלתא לא אסיקו בקודשא לאלהא דישראל:
2 29:08	והוה רוגזא דייי על אנש יהודה וירושלם ויהבונון לזייע ולצדו ולאשתעממו הי כמא דאתון חמן בעיניכון:
2 29:09	והא נפלו אבהתנא קטילין בחרבא ובננא ובנתנא ונשנא בשבייתא מן בגלל דא:
2 29:10	כדון עם לבבי למגזר קיים ייי אלהא דישראל ויתוב מננא תקוף רוגזיה:
2 29:11	בני כדון לא תתרשלון ארום בכון אתרעי ייי למקם קדמוי לשמשותיה ולמהוי קדמוי משמשין ומסקין קטרת בוסמין:
2 29:12	וקמו ליואי מחת בר עמסי ויואל בר עזריה מן בני קהת ומן בני מררי קיש בר עבדי ועזריה בר יהללאל ומן בני גרשון יואח בר זמה ועדן בר יואח:
2 29:13	ומן בני אליצפן שמרי ויעיאל ומן בני אסף זכריה ומתניה:
2 29:14	ומן בני הימן יחיאל ושמעי ומן בני ידותון שמעיה ועזיאל:
2 29:15	וכנשו ית אחוהון ואתקדשו ואתו הי כתפקידתא דמלכא בפתגמיא דייי לדכאה בית מקדשא דייי:
2 29:16	ואתו כהניא מן לגיו לבית מקדשא דייי ואפיקו ית כל סואבותא די אשכחו בהיכלא דייי לדרת בית מקדשא דייי וקבילו ליואי לאפקא לנחלא דקדרון לברא:
2 29:17	ושריאו בחדא לירחא קדמאה בניסן לקדשא וביומא תמניא לירחא אתו לאולמא דייי וקדישו ית בית מקדשא דייי לזמן יומין תמניא וביומא שיתסרי לירחא דניסן שיציאו:
2 29:18	ואתו לגיו לות יחזקיהו מלכא ואמרו דכינא ית כל בית מקדשא דייי וית מדבחא דעלתא וית כל מנוי וית פתור סדורא וית כל מנוי:
2 29:19	וית כל מניא דסאיב אחז ושקיצנון קדם טעות נוכראין כד מלך בשקרותיה במימרא דייי תקיננא יתהון וטמרנא יתהון וזמיננא חורנין חלופיהון והא אנון קדם מדבחא דייי:
2 29:20	ואקדים יחזקיה מלכא וכנש ית כל רבני קרתא וסליק לבית מקדשא דייי:
2 29:21	ואיתיאו תורין שבעא ודכרין שבעא ואמרין שבעא וצפירי בני עזין שבעא לחטתא לכפרא על מלכותא ועל מוקדשא ועל אנש יהודה ואמר לבני אהרן כהניא לאסקא על מדבחא דייי:
2 29:22	ונכיסו תוריא וקבילו כהניא ית אדמא למדבחא ודריקו למדבחא ונכיסו דכריא ודריקו אדמא למדבחא ונכיסו אמריא ודריקו אדמא למדבחא:
2 29:23	וקריבו ית צפירי חטאתא קדם מלכא וקהלא וסמכו ידיהון עליהון:
2 29:24	ונכיסנון כהניא ודכיאו מן אדמהון למדבחא לכפרא על כל ישראל ארום על כל ישראל אמר מלכא לאתעובדא עלתא וחטאתא:
2 29:25	ואקים ית ליואי בבית מקדשא דייי בצלצלין ובנבלין ובכנרין הי כתפקידתא דדוד וגד נביא דמלכא ונתן נביא ארום על מימרא דייי תפקידתא ביד נביוהי:
2 29:26	וקמו ליואי בזיני תושבחתא דדוד וכהניא בחצצרתא:
2 29:27	ואמר חזקיה לאסקא עלתא על מדבחא וכד שריאת עלתא שרי תושבחתא דייי בחצצרתא ועל ידי זיני זמר דדוד מלכא דישראל:
2 29:28	וכל קהלא מסגדין ודאמר שירא משבח וחצצרתא מחצרין כלהון כחדא עד דשיציאת עלתא:
2 29:29	וכד שיציאת עלתא לאסקא כרעו מלכא וכל דמשתכחין תמן וסגידו:
2 29:30	ואמר יחזקיה מלכא ורבניא לליואי לשבחא קדם ייי הי כפתגמי דדוד ואסף סכואה ושבחו עד דחדו חדוה רבתא וכרעו וסגידו:
2 29:31	ואתיב יחזקיה ואמר כדון קריבתון קורבנכון קדם ייי קריבו ואיתו נכסין ותודאתא לבית מקדשא דייי ואיתיאו קהלא נכסין ותודאתא וכל דאתרעי לביה ייתי עלוון:
2 29:32	והוה סכום מניין עלוותא די איתיאו קהלא תורין שבעין דכרין מאה אמרין מאתן לעלתא קדם ייי כל אלין:
2 29:33	ונכסת קודשיא תורין שית מאה וענא תלת אלפין:
2 29:34	לחוד כהניא הוו קלילין ולא יכילו למשלח ית עלוותא וסייעונון אחוהון ליואי עד זמן דשיציאו עבידתא ועד זמן דאתקדשו כהניא ארום ליואי תריצי לבא לאתקדשא יתיר מכהניא:
2 29:35	ואוף עלוותא לסוגעי בתרבי נכסת קודשיא ובנסוכין לעלתא ואתקנת פולחן בית מקדשא דייי:
2 29:36	וחדא יחזקיה וכל עמא מן בגלל דאתקין ייי לעמא יצרא דלבהון ארום בתכיף הוה פתגמא: