← Back
The Comprehensive Aramaic Lexicon
← Return to the Text Browser
click on the file description for more information
81009: TgLam (Sperber)

Click on a word for lexical analysis.
Click on a red-colored coordinate for comments and/or translations of the line
Ask AI about a passage
Hide manuscript variants

previous chapter


3:01 [ai]אנא הוא גברא דחזי עינייא בחוטרא דרדי ברוגזיה׃
3:02 [ai]ויתי דבר ואוביל לחשוכא ולא לנהורא׃
3:03 [ai]ברם בי יתוב יגלגל עלי מחתיה כל יומא׃
3:04 [ai]עתק בסרי ממכתשין ומשכי מן מחתא תבר גרמי׃
3:05 [ai]בנא עלי כרקומין ואקיף קרתא ועקר רישי עמא ושלח אינון׃
3:06 [ai]בבית אסירין מחשוכא יתיבני כמיתין דאזלין לעלמא אחרנא׃
3:07 [ai]סגר בתרי בדיל דלא אפוק מן איסורי ייקר על רגלי כבלין דנחש׃
3:08 [ai]אף ארום אצוח ואצלי אסתתים בית צלותי׃
3:09 [ai]סגר אורחי באבנין פסילן שבילי סרך׃
3:10 [ai]דיבא מכמן הוא לי אריא דמתעתד בבישא׃
3:11 [ai]אורחי סדר ושסעני שויני צדו׃
3:12 [ai]מתח קשתיה ועתדני כפלגליסא לגירא׃
3:13 [ai]אעיל בכליותי גירי תיקיה׃
3:14 [ai]הויתי חוכא לכל פריצי עמי ומזמרן עלי כל יומא׃
3:15 [ai]אסבעני מריר חיון ארויני גידין׃
3:16 [ai]ורצץ באבנין שני כנעינני באפרא׃
3:17 [ai]ושבקת משלמא נפשי אתנשיתי טבתא׃
3:18 [ai]ואמרית הובד תוקפי וטובא דהויתי אוריך מן קדם ייי׃
3:19 [ai]אידכר עניי נפשי ומה דמרירו בי סנאי ואשקיאו יתי גידין ורישי חיון׃
3:20 [ai]מדכר תדכר ותצלי עלי נפשי על סיגופא׃
3:21 [ai]דא נחמתא אתיב על לבי בגין כן אוריך׃
3:22 [ai]טיבותא דייי ארום לא פסקו ארום לא יתמנעו רחמוהי׃
3:23 [ai]נסין חדתין מרחיש לצפריא סגיאה היא הימנותך׃
3:24 [ai]חולקי ייי אמרת נפשי בגין כין אוריך ליה׃
3:25 [ai]טב הוא ייי לדמסברין לפרקניה לנפשא דתתבע אולפניה׃
3:26 [ai]טב הוא לאורכא ולמשתק עד תיתי פורקנא דייי׃
3:27 [ai]טב הוא לגברא ארום יליף נפשיה לסוברא ניר פקודיא דייי דמן עולמוי׃
3:28 [ai]יתיב בלחודוי וישתוק ויסבול ייסורין דאתין עלוהי בדיל יחוד שמא דייי דמשתלחין לאתפרעא ברחמוהי על חובא קלילא דחב בעלמא הדין עד דיתוב ויטלינון מעילוי׃
3:29 [ai]יתין בעפרא פומיה וישתטח קדם רבוניה מא אם אסתבר׃
3:30 [ai]יושיט למחוהי ליסתא בגין דחלתא דייי ישבע בקלנא׃
3:31 [ai]ארום לא ישבוק עמיה בעקתא לעלם רבונהון ייי׃
3:32 [ai]ארום אלהין ברישא יתבר והדר יתוב ויחוס עליהון כסגיאות טיבותיה׃
3:33 [ai]ארום בגין דלא עני גבר ית לביה בתעניתא ארום גרם לתברא בני אנשא׃
3:34 [ai]למדכא ולמכבשא תחות רגלוהי כל אסירי ארעא׃
3:35 [ai]ולמצלי דין גבר מסכין קביל אפי עלאה׃
3:36 [ai]לסרבא אנש מסכין במצותיה אפשר דמן קדם ייי לא אתגלי׃
3:37 [ai]מן הוא אנשא דאמר והות בשתא מתעבדא בעלמא אלהין בגין דעבדו מא דלא אתפקדו מן קדם ייי׃
3:38 [ai]מפום אלהא עלאה לא תיפוק בשתא אלהין על ברת קלא מיתכרזא למהוי בישין על חטופין דאתמליאת ארעא ובעדן די יבעי למגזר טבא בעלמא מפום קדשא נפיק׃
3:39 [ai]מא ממון ישכח גבר כד הוא חי על חובוהי דיחוב׃
3:40 [ai]נבלוש אורחנא ונבקר ונתוב בתיובתא קדם ייי׃
3:41 [ai]נטול לבנא בריר ונדכי ידנא מגזילן ונתוב אל אלהא דמדוריה בשמיא׃
3:42 [ai]נחנא מרדנא וסרבנא ועל דלא הדרנא בתיובתא את לא שבקת׃
3:43 [ai]טללתא עלנא ברגז ורדפתנא בגלותא קטלתא ולא חסת׃
3:44 [ai]טללתא שמיא בענני יקרא דילך בגין לא תעבר לותך צלותא׃
3:45 [ai]כניעותא ומאיסותא תשוי יתנא בחובנא ביני עממיא׃
3:46 [ai]פתחו עלנא פומהון למגזר עלנא גזירן כל בעלי דבבנא׃
3:47 [ai]אימתא וזיע הוה עלנא רתיתא ותברא׃
3:48 [ai]היך יבלין דמיא תזלוג עיני דמען על תבר כנשתא דעמי׃
3:49 [ai]עיני זלגת דמען ולא תשתוק מלמבכי מדלית פאיג עקתי וממליל תנחומין על לבי׃
3:50 [ai]עד דיסתכי ויחזי ייי בעלבני מן שמיא׃
3:51 [ai]בכותא דעיני לא אסתקפת למדע על חורבן כל פלכי עמי וני{ז}<ו>ול בנתא דירושלם קרתי׃
3:52 [ai]מכמן כמנו לי כציפרא בעלי דבבי על מגן׃
3:53 [ai]עברו בגובא חיי ורגמו אבנא בי׃
3:54 [ai]שטו מיא אטיפו על רישי אמרית במימרי אתגזרית מן עלמא׃
3:55 [ai]צליתי לשמך ייי מן גוב ארעיתא׃
3:56 [ai]צלותי קבילתא בזמנא ההוא וכען לא תכסי אודנך מלקבלא צלותי לרוחתי לבעותי׃
3:57 [ai]שלחתא מלאכא לשיזבא יתי ביומא דצליתי קדמך אמרת במימרך לא תדחל׃
3:58 [ai]נציתא ייי לעבדין מצותא לנפשי פרקתא חיי׃
3:59 [ai]חזיתא ייי סריך דסריכו לי דון דינאי׃
3:60 [ai]גלי קדמך כל נקמתהון כל מזימתהון עלי׃
3:61 [ai]שמיע קדמך כסופיהון ייי כל מזמתהון עלי׃
3:62 [ai]שפות דקיימין עליי ומלוליהון עלי כל יומא׃
3:63 [ai]מותבהון וזקיפתהון אסתכל אנא זמריהון׃
3:64 [ai]תתיב להון גמילא בישא ייי כעובדי ידיהון׃
3:65 [ai]תתין להון תבירות לבא ושלהאותך ישלהי להון׃
3:66 [ai]תדליקינון ברגז ותשיצינון מתחות שמיא דייי׃

next chapter