The Comprehensive Aramaic Lexicon

00:01	ܐܘܢܓܠܝܘܢ ܕܠܘܩܐ܀
01:01	ܡܛܠ ܕܣܓܝܐܐ ܨܒܘ ܠܡܟܬܒ ܘܠܡܫܬܥܝܘ ܥܠ ܨܒܘ̈ܬܐ ܐܝܠܝܢ ܕܒܢ ܡܫܡ̈ܠܝܢ܂
01:02	ܐܝܟܢܐ ܕܐܫܠܡܘ ܠܢ ܗܢܘܢ܂ ܕܡܢ ܩܕܝܡ ܗܘܘ ܚ̈ܙܝܐ ܘܡܫܡܫܢܐ ܕܡܠܬܐ
01:03	ܐܬܚܙܝ ܠܝ ܐܦ ܠܝ ܕܒܚܢܬ ܐܢܝܢ ܟܠܗܝܢ ܡܢ ܪܫ܂ ܒܛܝܠܐܝܬ ܚܕܐ ܚܕܐ ܡܢܗܝܢ ܠܡܟܬܒ ܠܟ ܢܨܝܚܐ ܬܐܘܦܠܐ
01:04	ܕܬܕܥ ܫܪܪܐ ܕܡ̈ܠܐ ܕܐܬܠܡܕܬ ܠܗܝܢ܀
01:05	ܗܘܐ ܒܝܘܡܬܗ ܕܗܪܘܕܣ ܡܠܟܐ ܕܝܗܘܕ ܟܗܢܐ ܚܕ ܕܫܡܗ ܗܘܐ ܙܟܪܝܐ ܡܢ ܦܠܓܘܬܐ ܕܒܝܬ ܐܒܝܡ܂ ܘܐܢܬܬܗ ܡܢ ܒܢܬܗ ܗܘܬ ܕܐܗܪܘܢ ܫܡܗ ܗܘܐ ܐܝܠܝܫܒܥ
01:06	ܬܪܝܗܘܢ ܕܝܢ ܙܕܝܩܝܢ ܗܘܘ ܩܕܡ ܐܠܗܐ ܘܡܗ̈ܠܟܝܢ ܗܘܘ ܒܟܠܗܘܢ ܦܘܩܕܢܘܗܝ ܘܒܟܢܘܬܗ ܕܡܪܝܐ ܘܕܠܐ ܥܕܠܝ ܗܘܘ ܒܟܠܗ ܥܘܡܪܗܘܢ܂
01:07	ܒܪܐ ܕܝܢ ܠܝܬ ܗܘܐ ܠܗܘܢ܂ ܡܛܠ ܕܐܠܝܫܒܥ ܥܩܪܬܐ ܗܘܬ܂ ܘܬܪ̈ܝܗܘܢ ܣܓܝܐܝ ܝܘܡܬܐ ܗܘܘ܀
01:08	ܗܘܐ ܗܿܘܐ ܕܝܢ ܟܕ ܡܫܡܫ ܗܘܐ ܒܛܟܣܐ ܕܟܗ̈ܢܐ ܩܕܡ ܐܠܗܐ
01:09	ܒܥܝܕܐ ܕܬܫܡܫܬܐ ܕܟܗܢܐ܂ ܡܛܝܗܝ ܗܘܐ ܠܡܥܠܘ ܒܣ̈ܡܐ܂ ܘܟܕ ܥܠ ܠܗܝܟܠܐ܂
01:10	ܣܘܓܐܐ ܕܥܡܐ ܩܐܡ ܗܘܐ ܘܡܨܠܐ ܒܥܕܢܐ ܕܒܣ̈ܡܐ܂
01:11	ܘܐܬܚܙܝ ܠܗ ܠܙܟܪܝܐ ܡܠܐܟܐ ܕܡܪܝܐ ܟܕ ܩܐܡ ܡܢ ܝܡܝܢܐ ܕܡܕܒܚܐ ܕܒܣܡܐ܂
01:12	ܘܐܫܬܓܫ ܘܙܥ ܟܕ ܚܙܝܗܝ ܠܡܠܐܟܐ܂ ܘܕܚܠܬܐ ܢܦܠܬ ܥܠܘܗܝ
01:13	ܐܡܪ ܠܗ ܡܠܐܟܐ܂ ܠܐ ܬܕܚܠ ܙܟܪܝܐ܂ ܗܐ ܓܝܪ ܫܡܥ ܐܠܗܐ ܒܩܠ ܨܠܘܬܟ܂ ܘܐܢܬܬܟ ܐܠܝܫܒܥ ܬܐܠܕ ܠܟ ܒܪܐ܂ ܘܬܩܪܐ ܫܡܗ ܝܘܚܢܢ܂
01:14	ܘܬܗܘܐ ܠܟ ܚܕܘܬܐ ܘܫܘܒܗܪܐ ܘܣ̈ܓܝܐܐ ܢܚܕܘܢ ܒܡܘܠܕܗ܂
01:15	ܡܛܠ ܕܢܗܘܐ ܪܒ ܩܕܡ ܡܪܝܐ ܘܚܡܪܐ ܘܫܟܪܐ ܠܐ ܢܫܬܐ ܘܪܘܚܐ ܕܩܘܕܫܐ ܢܬܡܠܐ ܥܕ ܗܘ ܒܟܪܣܗ ܕܐܡܗ
01:16	ܘܣܓܝܐܐ ܡܢ
01:38	ܡܠܐܟܐ ܡܢ ܠܘܬܗ
01:39	ܘܩܡܬ ܡܪܝܡ ܒܗܘܢ ܒܝܘܡܬܐ ܗܢܘܢ ܘܣܠܩܬ ܒܒܛܝܠܘܬܐ ܠܛܘܪܐ ܠܟܪܟܐ ܕܝܗܘܕ
01:40	ܘܥܠܬ ܠܒܝܬܗ ܕܙܟܪܝܐ ܘܫܐܠܬ ܒܫܠܡܗ ܕܐܠܝܫܒܥ
01:41	ܘܗܘܐ ܟܕ ܫܡܥܬ ܐܠܝܫܒܥ ܫܠܡܗ ܕܡܪܝܡ ܕܨ ܥܘܠܐ ܒܟܪܣܗ ܘܐܬܡܠܝܬ ܐܠܝܫܒܥ ܒܪܘܚܐ ܕܩܘܕܫܐ
01:42	ܘܒܩܠܐ ܪܡܐ ܩܥܬ ܘܐܡܪܬ ܠܡܪܝܡ ܐܢܬܝ ܗܝ ܒܪܝܟܬ ܒܢ̈ܫܐ ܘܡܒܪܟ ܗܘ ܦܐܪܐ ܕܒܟܪܣܟܝ܂
01:43	ܡܢܘ ܥܒܕ ܠܝ ܗܕܐ ܕܐܡܗ ܕܡܪܝ ܬܐܬܐ ܠܘܬܝ܂
01:44	ܗܐ ܓܝܪ ܟܕ ܢܦܠ ܩܠܐ ܕܫܠܡܟܝ ܒܐܕܢܝ ܒܚܕܘܬܐ ܪܒܬܐ ܕܨ ܥܘܠܐ ܒܟܪܣܝ
01:45	ܘܛܘܒܝܗ ܠܐܝܕܐ ܕܬܗܝܡܢ ܕܗܘܐ ܫܘܠܡܐ ܠܐܝܠܝܢ ܕܐܬܡܠܠ ܥܡܗ ܡܢ ܠܘܬ ܡܪܝܐ
01:46	ܘܐܡܪܐ ܡܪܝܡ ܡܘܪܒܐ ܢܦܫܝ ܠܡܪܝܐ
01:47	ܘܚܕܝܬ ܪܘܚܝ ܒܐܠܗܐ ܡܚܝܢܐ
01:48	ܕܚܪ ܒܡܟܝܟܘܬܗ ܕܐܡܬܗ ܡܢ ܗܫܐ ܓܝܪ ܛܘܒܐ ܢܗܘܝܢ ܝܗܒܢ ܠܝ ܟܠܗ̈ܝܢ ܫܪ̈ܒܬܐ
01:49	ܕܥܒܕ ܠܘܬܝ ܪܘܪܒܬܐ܂ ܗܘ ܐܝܢܐ ܕܡܫܒܚ ܘܩܕܝܫ ܫܡܐ
01:50	ܕܚܢܢܗ ܥܕ ܕܪܐ ܘܥܠ ܫܪܒܬܐ ܠܕܕܚܠܝܢ ܠܗ
01:51	ܘܥܒܕ ܐܘܚܕܢܐ ܒܕܪܥܗ ܘܒܕܪ ܬܪܥܝܬܐ ܕܠܒ̈ܘܬܐ ܕܚܬܝܪ̈ܐ
01:52	ܘܐܢܚܬ ܬܩܝܦܐ ܡܢ ܟܘܪܣܘܬܗܘܢ ܘܐܪܝܡ ܡܟܝܟܐ
01:53	ܘܡܠܐ ܡܣܟܢܐ ܡܢ ܛܘܒܗ ܘܫܛ ܥܬܝܪ̈ܐ ܟܕ ܣܪ̈ܝܩܝܢ
01:54	ܘܐܬܒܛܠ ܠܗ ܥܠ ܐܝܣܪܐܝܠ ܒܪܗ܂ ܘܐܬܕܟܪ ܚܢܢܗ
01:55	ܐܝܟܢܐ ܕܡܠܠ ܥܡ ܐܒܗܝܢ ܥܡ ܐܒܪܗܡ ܘܥܡ ܙܪܥܗ ܠܥܠܡ܂
01:56	ܩܘܝܬ ܕܝܢ ܡܪܝܡ ܠܘܬ ܐܠܝܫܒܥ܂ ܐܝܟ ܝܪܚܐ ܬܠܬ̈ܐ ܘܗܦܟܬ ܠܒܝܬܗ
01:57	ܘܟܕ ܫܠܡ ܙܒܢܐ ܕܡܘܠܕܗ ܕܐܠܝܫܒܥ ܝܠܕܬ ܒܪܐ
01:58	ܘܫܡܥܘ ܫܒܒ̈ܝܗ ܘܒ̈ܢܝ ܛܘܗܡܗ ܕܐܣܓܝ ܡܪܝܐ ܚܢܢܗ ܠܘܬܗ܂ ܘܚܕܝܢ ܗܘܘ ܠܗ܂
01:59	ܘܗܘܐ ܝܘܡܐ ܕܬܡ̈ܢܝܐ ܐܬܘ ܠܡܓܙܪܗ ܕܛܠܝܐ܂ ܘܩܪܝܢ ܗܘܘ ܠܗ ܒܫܡܐ ܕܐܒܘܗܝ ܙܟܪܝܐ
01:60	ܘܐܡܪܬ ܐܡܗ ܕܠܐ ܗܟܢܐ ܐܠܐ ܢܬܩܪܐ ܝܘܚܢܢ܂
01:61	ܘܐܡܪ̈ܝܢ ܠܗ ܠܝܬ ܐܢܫ ܒܫܪܒܬܟܝ ܕܡܬܩܪܐ ܒܫܡܐ ܗܢܐ ܝܘܚܢܢ܂
01:62	ܘܐܡܪܘ ܗܘܘ ܐܦ ܠܐܒܘܗܝ ܕܐܝܟܢܐ ܨܒܐ ܕܢܬܩܪܐ܂
01:63	ܘܫܐܠ ܦܢܩܝܬܐ ܘܟܬܒ ܒܗ ܕܝܘܚܢܢ ܗܘ ܫܡܗ
01:64	ܘܒܗ ܒܫܥܬܐ ܐܫܬܪܝ ܐܣܘܪܐ ܕܠܫܢܗ܂ ܘܒܪܟ ܠܐܠܗܐ ܘܬܡܝܗܘ ܟܘܠܗܘܢ܂
01:65	ܘܗܘܬ ܕܚܠܬܐ ܥܠ ܟܠܗܘܢ ܫܒܒܝܗܘܢ ܘܒܟܠܗ ܛܘܪܐ ܕܝܗܘܕ ܗܠܝܢ ܡܬܡܠܠܢ ܗܘܝ
01:66	ܘܣܝܡܝܢ ܗܘܘ ܒܠܒܗܘܢ ܘܐܡܪܝܢ ܗܘܘ ܡܢܐ ܢܗܘܐ ܛܠܝܐ ܗܢܐ ܕܐܝܕܗ ܕܡܪܝܐ ܥܡܗ܂
01:67	ܘܐܬܡܠܝ ܙܟܪܝܐ ܐܒܘܗܝ ܒܪܘܚܐ ܕܩܘܕܫܐ ܘܐܬܢܒܝ ܘܐܡܪ
01:68	ܡܒܪܟ ܗܘ ܐܠܗܗ ܕܐܝܣܪܐܝܠ ܕܣܥܪ ܠܥܡܗ܂ ܘܥܒܕ ܠܗ ܦܘܪܩܢܐ܂
01:69	ܘܐܩܝܡ ܠܢ ܩܪܢܐ ܕܚܝ̈ܐ ܒܒܝܬܗ ܕܕܘܝܕ ܥܒܕܗ
01:70	ܐܝܟܢܐ ܕܡܠܠ ܒܦܘܡܐ ܕܢܒܝ̈ܘܗܝ ܩܕܝܫ̈ܐ ܕܡܢ ܥܠܡ܂
01:71	ܘܐܥܕܝܢ ܠܚ̈ܝܐ ܡܢ ܐܝܕܐ ܕܒܥܠܕܒܒܝܢ܂ ܘܕܟܠ ܕܣܢܝܢ ܠܢ܂
01:72	ܕܢܥܒܕ ܚܢܢܐ ܥܡ ܐܒܗܝܢ ܘܐܬܕܟܪ ܠܕܝܬܩܘܗܝ ܩܕܝܫܬܐ
01:73	ܡܘܡܬܐ ܕܝܡܐ ܠܐܒܪܗܡ ܐܒܘܢ ܕܢܬܠ ܠܢ
01:74	ܕܕܠܐ ܕܚܠܐ ܢܬܦܪܩ ܡܢ ܐܝܕܐ ܕܒܥܠܕܒ̈ܒܝܢ ܕܢܦܠܚ ܩܕܡܘܗܝ
01:75	ܒܟܐܢܘܬܐ ܘܒܙܕܝܩܘܬܐ ܟܠܗܘܢ ܝܘܡܬܐ ܕܚܝ̈ܝܢ܂
01:76	ܘܐܢܬ ܛܠܝܐ ܢܒܝܗ ܕܥܠܝܐ ܬܬܩܪܐ ܬܐܙܠ ܩܕܡ ܦܪܨܘܦܗ ܕܡܪܝܐ ܠܡܛܝܒܘ ܐܘܪܚܬܗ
01:77	ܕܢܬܠ ܡܕܥܐ ܕܚ̈ܝܐ ܠܥܡܗ ܒܫܘܒܩܢܐ ܕܚ̈ܛܗܝܗܘܢ
01:78	ܡܛܠ ܚܢܢܐ ܕܪܚܡܘܗܝ ܕܐܠܗܢ ܕܒܗܘܢ ܢܣܥܪܢ ܡܕܢܚܐ ܡܢ ܪܘܡܐ܂
01:79	ܬܢܗܪ ܠܐܝܠܝܢ ܕܒܚܫܘܟܐ ܘܒܛ̈ܠܠܘܗܝ ܕܡܘܬܐ ܝܬܒܝܢ ܕܢܬܪܘܨ ܪ̈ܓܠܝܢ ܒܐܘܪܚܐ ܕܫܠܡܐ܂
01:80	ܛܠܝܐ ܕܝܢ ܪܒܐ ܗܘܐ ܘܡܬܚܝܠ ܒܪܘܚܐ ܘܒܡܕܒܪܐ ܓܗܐ ܗܘܐ ܥܕܡܐ ܠܝܘܡܐ ܕܬܚܘܝܬܗ ܕܠܘܬ ܐܝܣܪܐܝܠ܀
02:01	ܘܗܘܐ ܒܝܘܡ̈ܬܐ ܗܢܘܢ ܦܩܕ ܗܘܐ ܐܓܘܣܛܘܣ ܩܣܪ ܕܢܬܟܬܒܘܢ ܟܘܠܗ ܐܪܥܐ܂
02:02	ܗܕܐ ܕܝܢ ܡܟܬܒܘܬܐ ܩܕܡܝܬܐ ܗܘܬ ܒܫ̈ܢܝ ܩܝܪܝܢܘܣ ܗܓܡܘܢܐ ܕܣܘܪܝܐ
02:03	ܟܘܠ ܐܢܫ ܕܝܢ ܐܙܠ ܗܘܐ ܠܡܬܟܬܒܘ ܐܦ ܡܢ ܡܕܝܢܬܗ ܐܙܠ ܗܘܐ ܠܐܬܪܗ ܕܬܡܢ ܢܬܟܬܒ
02:04	ܘܐܦ ܝܘܣܦ ܣܠܩ ܗܘܐ ܡܢ ܢܨܪܬ ܡܕܝܢܬܐ ܕܓܠܝܠܐ ܠܝܗܘܕ ܠܡܕܝܢܬܗ ܕܕܘܝܕ ܕܡܬܩܪܝܐ ܒܝܬ ܠܚܡ ܡܛܠ ܕܬܪܝܗܘܢ ܡܢ ܒܝܬܗ ܗܘܘ ܕܕܘܝܕ
02:05	ܗܘ ܘܡܪܝܡ ܐܢܬܬܗ ܟܕ ܒܛܢܐ ܕܬܡܢ ܢܬܟܬܒܘܢ
02:06	ܘܟܕ ܬܡܢ ܐܢܘܢ ܐܬܡܠܝܘ ܝܘ̈ܡܬܗ ܠܡܐܠܕ
02:07	ܘܝܠܕܬܗ ܠܒܪܗ ܒܘܟܪܐ܂ ܘܟܪܟܬܗ ܒܥܙܪܘܪܐ ܘܐܪܡܝܬܗ ܒܐܘܪܝܐ ܡܛܠ ܕܠܝܬ ܗܘܬ ܠܗܘܢ ܕܘܟܬܐ
02:08	ܪܥܘܬܐ ܕܝܢ ܐܝܬ ܗܘܘ ܬܡܢ ܒܗ ܒܐܬܪܐ ܘܥܝܪ̈ܝܢ ܗܘܘ ܘܢܛܪܝܢ ܡܛܪܬܐ ܥܠ ܢܩܘܬܗܘܢ
02:09	ܐܬܚܙܝ ܠܗܘܢ ܡܠܐܟܐ ܕܡܪܝܐ ܟܕ ܩܐܡ ܘܬܫܒܘܚܬܗ ܕܡܪܝܐ ܢܗܪܐ ܗܘܬ ܥܠܝܗܘܢ ܘܗܢܘܢ ܕܚܠܘ ܕܚܠܬܐ ܪܒܬܐ
02:10	ܐܡܪ ܠܗܘܢ ܡܠܐܟܐ ܠܐ ܬܕܚܠܘܢ ܡܛܠ ܕܗܐ ܡܣܒܪܢܐ ܠܟܘܢ ܚܕܘܬܐ ܪܒܬܐ ܕܬܗܘܐ ܠܟܠܗ ܥܠܡܐ
02:11	ܕܐܬܝܠܕ ܠܟܘܢ ܝܘܡܢܐ ܡܚܝܢܐ ܕܐܝܬܘܗܝ ܡܪܝܐ ܡܫܝܚܐ ܒܡܕܝܢܬܗ ܕܕܘܝܕ
02:12	ܗܐ ܝܗܒܢܐ ܠܟܘܢ ܐܬܐ ܡܫܟܚܝܢ ܐܢܬܘܢ ܛܠܝܐ ܟܕ ܟܪܝܟ ܒܥܙܪ̈ܘܪܐ ܘܣܝܡ ܒܐܘܪܝܐ
02:13	ܘܡܢ ܫܠܝܐ ܐܬܚܙܝܘ ܠܘܬܗ ܚܝܠܐ ܘܡܠܐܟܐ ܕܫܡܝܐ ܣܓܝܐܐ ܡܫܒܚܝܢ ܠܐܠܗܐ ܘܐܡܪ̈ܝܢ܂
02:14	ܫܘܒܚܐ ܠܐܠܗܐ ܒܡܪܘܡܐ ܘܫܠܡܐ ܒܐܪܥܐ ܘܐܪܥܘܬܐ ܠܒܢܝ ܐܢܫܐ܀
02:15	ܡܢ ܒܬܪ ܕܐܙܠܘ ܡܢ ܠܘܬܗܘܢ ܡܠܐܟܐ ܗܢܘܢ ܠܫܡܝܐ ܐܡܪܝܢ ܗܘܘ ܪܥܘܬܐ ܚܕ ܠܚܕ ܬܘ ܢܬܚܙܩ ܠܒܝܬ ܠܚܡ ܘܢܚܙܐ ܗܢܐ ܡܐ ܕܗܘܐ ܐܝܟܢܐ ܕܡܠܐܟܐ ܚܘܝܢ
02:16	ܘܐܙܠܘ ܡܣܪܗܒܐܝܬ ܘܐܫܟܚܘ ܠܝܘܣܦ ܘܠܡܪܝܡ ܘܠܥܘܠܐ ܟܕ ܣܝܡ ܒܐܘܪܝܐ
02:17	ܘܐܫܬܥܝܘ ܡܕܡ ܕܐܬܡܠܠ ܥܡܗܘܢ ܥܠܘܗܝ ܥܠ ܛܠܝܐ
02:18	ܟܠ ܐܢܫ ܕܝܢ ܕܫܡܥ ܗܘܐ ܡܢ ܪ̈ܥܘܬܐ ܟܕ ܡܫܬܥܝܢ ܗܘܘ ܥܠ ܐܝܠܝܢ ܕܚܙܘ ܘܫܡܥܘ ܬܡܝܗܝܢ ܗܘܘ ܘܡܬܕܡܪܝܢ
02:19	ܡܪܝܡ ܕܝܢ ܟܠ ܡܕܡ ܣܝܡܐ ܗܘܬ ܒܠܒܗ ܘܡܦܚܡܐ ܗܘܬ ܒܪܥܝܢܗ
02:20	ܘܗܦܟܘ ܪ̈ܥܘܬܐ ܗܢܘܢ ܟܕ ܡܫܒܚܝܢ ܠܐܠܗܐ ܘܡܡܠܠܝܢ ܥܠ ܐܝܠܝܢ ܕܚܙܘ ܘܫܡܥܘ ܐܝܟܢܐ ܕܐܬܐܡܪ ܠܗܘܢ܀
02:21	ܘܟܕ ܡܠܘ ܬܡܢ̈ܝܐ ܝܘܡ̈ܝܢ ܐܬܓܙܪ ܛܠܝܐ ܘܐܬܩܪܝ ܫܡܗ ܝܫܘܥ ܐܝܟܢܐ ܕܐܬܐܡܪ ܡܢ ܡܠܐܟܐ ܡܢ ܩܕܡ ܕܢܬܒܛܢ ܒܟܪܣܐ
02:22	ܘܫܠܡܘ ܝܘܡ̈ܬܐ ܕܬܕܟܝܬܗ ܐܝܟܢܐ ܕܟܬܝܒ ܒܢܡܘܣܐ ܕܡܘܫܐ ܗܝܕܝܢ ܐܣܩܘܗܝ ܠܐܘܪܫܠܡ ܕܢܩܝܡܘܢܗ ܩܕܡ ܡܪܝܐ
02:23	ܐܝܟܢܐ ܕܟܬܝܒ ܒܢܡܘܣܐ ܕܡܪܝܐ ܕܟܠ ܒܘܟܪܐ ܦܬܚ ܡܪܒܥܐ ܩܕܝܫܗ ܕܡܪܝܐ ܢܬܩܪܐ
02:24	ܘܕܢܬܠ ܕܒܚܬܐ ܐܝܟܢܐ ܕܟܬܝܒ ܒܢܡܘܣܐ ܕܡܪܝܐ ܙܘܓܐ ܕܫܘ̈ܦܢܝܢܐ ܐܘ ܬܪ̈ܝܢ ܦܪ̈ܘܓܐ ܕܝܘܢܐ܀
02:25	ܓܒܪܐ ܕܝܢ ܚܕ ܐܝܬ ܗܘܐ ܒܐܘܪܫܠܡ ܫܡܗ ܗܘܐ ܫܡܥܘܢ ܟܝܢ ܗܘܐ ܘܙܕܝܩ ܘܡܩܒܠ ܗܘܐ ܒܥܘܬܐ ܕܐܝܣܪܝܠ ܘܪܘܚܐ ܩܕܝܫܬܐ ܐܝܬ ܗܘܬ ܥܠܘܗܝ
02:26	ܘܐܡܝܪ ܗܘܐ ܠܗ ܡܢ ܗܝ ܪܘܚܐ ܩܕܝܫܬܐ ܕܡܘܬܐ ܠܐ ܢܚܙܐ ܥܕܡܐ ܕܢܚܙܐ ܠܡܫܝܚܗ ܕܡܪܝܐ
02:27	ܘܐܬܐ ܒܪܘܚܐ ܠܗܝܟܠܐ ܘܟܕ ܡܥܠܝܢ ܠܗ ܐܒܗܘܗܝ ܠܝܫܘܥ ܛܠܝܐ ܕܢܥܒܕܘܢ ܠܗ ܐܝܟܢܐ ܕܦܩܝܕ ܒܐܘܪܝܬܐ
02:28	ܗܘ ܫܡܥܘܢ ܩܒܠܗ ܥܠ ܕܪܥܘܗܝ ܘܒܪܟ ܠܐܠܗܐ ܘܐܡܪ
02:29	ܡܟܝܠ ܫܪܐ ܐܢܬ ܠܗ ܡܪܝ ܒܫܠܡܐ ܠܥܒܕܟ ܐܝܟܢܐ ܕܐܡܪܬ
02:30	ܕܗܐ ܚܙܝ ܥܝ̈ܢܝ ܚܢܢܟ
02:31	ܗܘ ܕܛܝܒܬ ܩܕܡ ܦܪܨܘܦܐ ܕܟܠܗܘܢ ܥܡܡܐ
02:32	ܢܘܗܪܐ ܠܓܠܝܢܐ ܕܥܡ̈ܡܐ܂ ܘܫܒܚܐ ܕܥܡܟ ܐܝܣܪܐܝܠ܂
02:33	ܐܒܘܗܝ ܕܝܢ ܘܐܡܗ ܬܡܝܗܝܢ ܗܘܘ ܥܠ ܐܝܠܝܢ ܕܡܬܡܠܠܢ ܥܠܘܗܝ܂
02:34	ܘܒܪܟ ܐܢܘܢ ܫܡܥܘܢ ܘܐܡܪ ܠܡܪܝܡ ܐܡܗ܂ ܗܐ ܗܢܐ ܣܝܡ ܒܐܝܣܪܐܝܠ ܠܡܦܘܠܬܐ ܘܠܩܝܡܐ ܕܣ̈ܓܝܐܐ ܘܠܐܬܐ ܕܚܝܪܝܢܐ ܕܡܡܠܠܐ܂
02:35	ܘܠܢܦܫܟܝ ܕܝܠܟܝ ܬܥܒܪܝܢܗ ܪܘܡܚܐ ܕܢܬܓܠܝܢ ܡܚܫܒ̈ܬܐ ܡܢ ܠܒܘܬ̈ܐ ܕܣܓ̈ܝܐܐ
02:36	ܘܐܦ ܚܢܐ ܢܒܝܬܐ ܒܪܬܗ ܕܦܢܘܐܝܠ ܡܢ ܫܒܛܐ ܕܐܫܝܪ ܘܐܦ ܗܝ ܣܓܝܐܬ ܝܘܡ̈ܬܐ ܗܘܬ ܘܫܒܥܐ ܝܘܡܝܢ ܒܠܚܘܕ ܥܡ ܓܒܪܐ ܗܘܬ ܡܢ ܒܬܪ ܒܬܘܠܘܬܗ
02:37	ܘܫܪܟܐ ܕܝܢ ܕܥܘܡܪܗ ܒܐܪܡܠܘܬܐ ܗܘܬ ܫܢ̈ܝܢ ܬܡܢ̈ܐܝܢ ܘܐܪ̈ܒܥ܂ ܗܝ ܗܕܐ ܡܢ ܗܝܟܠܐ ܠܐ ܢܦܩܐ ܗܘܬ܂ ܘܒܨܘܡܐ ܘܒܨܠܘܬܐ ܘܒܒܥܘܬܐ ܒܐܝܡܡܐ ܘܒܠܠܝܐ ܦܠܚܐ ܗܘܬ
02:38	ܘܐܦ ܗܝ ܩܡܬ ܒܗ ܒܫܥܬܐ ܘܐܘܕܝܬ ܠܡܪܝܐ܂ ܘܡܡܠܠܐ ܗܘܬ ܥܠܘܗܝ ܥܠ ܟܘܠ ܐܢܫ ܕܡܣܒܪ ܗܘܐ ܦܘܪܩܢܗ ܕܐܘܪܫܠܡ܂
02:39	ܝܘܣܦ ܕܝܢ ܘܡܪܝܡ ܟܕ ܫܠܡܘ ܒܗܝܟܠܐ ܥܠ ܒܘܟܪܐ ܟܘܠ ܡܕܡ ܕܟܬܝܒ ܒܐܘܪܝܬܐ ܗܦܟܘ ܠܓܠܝܠܐ ܠܢܨܪܬ ܡܕܝܢܬܗܘܢ܀
02:40	ܛܠܝܐ ܕܝܢ ܪܒܐ ܗܘܐ ܘܡܬܚܝܠ ܘܡܬܡܠܐ ܚܟܡܬܐ ܘܛܝܒܘܬܐ ܕܐܠܗܐ ܐܝܬ ܗܘܬ ܥܠܘܗܝ
02:41	ܘܐܢܫܘܗܝ ܒܟܠ ܫܢܐ ܐܙܠܝܢ ܗܘܘ ܠܐܘܪܫܠܡ ܒܥܕܥܕܐ ܕܦܛܝܪ̈ܐ ܕܦܣܟ
02:42	ܘܟܕ ܗܘܐ ܒܪ ܫܢܝܢ ܬܪܬܥܣܪܐ ܣܠܩܘ ܐܝܟܢܐ ܕܡܥܕܝܢ ܗܘܘ ܠܥܕܥܕܐ
02:43	ܘܟܕ ܫܠܡܘ ܝܘܡܬܐ ܕܥܕܥܕܐ ܗܦܟܘ ܠܗܘܢ ܘܝܫܘܥ ܛܠܝܐ ܦܫ ܠܗ ܡܢܗܘܢ ܒܐܘܪܫܠܡ ܘܐܢܫ̈ܘܗܝ ܠܐ ܝܕܥܘ
02:44	ܣܒܪܝܢ ܗܘܘ ܓܝܪ ܕܥܡ ܠܘܝܬܗܘܢ ܢܦܩ ܘܟܕ ܐܬܘ ܡܪܕܐ ܕܚܕ ܝܘܡܐ ܘܒܥܝܢ ܗܘܘ ܠܗ ܠܝܫܘܥ ܠܘܬ ܒܢܝ ܠܘܝܬܗܘܢ ܘܠܘܬ ܐܢܫܘܬܗܘܢ ܘܠܘܬ ܡܢ ܕܝܕܥ ܠܗܘܢ
02:45	ܘܟܕ ܠܐ ܐܫܟܚܘܗܝ ܗܦܟܘ ܠܗܘܢ ܠܐܘܪܫܠܡ ܘܬܡܢ ܒܥܝܢ ܗܘܘ ܠܗ܂
02:46	ܘܡܢ ܒܬܪ ܬܠܬܐ ܝܘܡܝܢ ܐܫܟܚܘܗܝ ܒܗܝܟܠܐ ܟܕ ܝܬܒ ܡܨܥܬ ܡܠܦܢ̈ܐ ܘܫܡܥ ܗܘܐ ܠܗܘܢ ܘܡܫܐܠ ܗܘܐ ܠܗܘܢ
02:47	ܘܬܡܝܗܝܢ ܗܘܘ ܟܠܗܘܢ ܐܝܠܝܢ ܕܫܡܥܝܢ ܗܘܘ ܠܗ܂ ܘܡܬܕܡܪܝܢ ܗܘܘ ܒܚܟܡܬܗ ܘܒܦܬܓܡܘܗܝ
02:48	ܘܟܕ ܐܫܟܚܘܗܝ ܐܢܫܘܗܝ ܬܡܗܘ܂ ܘܐܡܪܐ ܠܗ ܐܡܗ ܒܪܝ ܠܡܢܐ ܥܒܕܬ ܠܢ ܗܟܢܐ ܕܗܐ ܐܒܘܟ ܘܐܢܐ ܒܛܘܪܦܐ ܣܓܝܐܐ ܒܥܝܢ ܗܘܝܢ ܠܟ
02:49	ܐܡܪ ܠܗܘܢ ܡܢܐ ܒܥܝܢ ܗܘܝܬܘܢ ܠܝ ܠܐ ܝܕܥܝܢ ܗܘܝܬܘܢ ܕܒܝܬ ܐܒܝ ܘܠܐ ܗܘܐ ܠܝ ܕܐܗܘܐ
02:50	ܗܢܘܢ ܕܝܢ ܠܐ ܐܫܬܘܕܥܘܗ ܠܡܠܬܐ ܕܐܡܪ ܠܗܘܢ
02:51	ܘܢܚܬ ܥܡܗܘܢ ܘܐܬܐ ܠܢܨܪܬ ܘܡܫܬܥܒܕ ܗܘܐ ܠܗܘܢ ܐܡܗ ܕܝܢ ܟܘܠܗܝܢ ܡܠܐ ܢܛܪܐ ܗܘܬ
02:52	ܝܫܘܥ ܕܝܢ ܪܒܐ ܗܘܐ ܒܩܘܡܬܗ ܘܣܓܐ ܗܘܐ ܒܚܟܡܬܗ ܘܒܛܝܒܘܬܗ ܠܘܬ ܐܠܗܐ ܘܠܘܬ ܒܢ̈ܝ ܐܢܫܐ܀
03:01	ܒܫܢܬ ܚܡܫܥܣܪܐ ܕܝܢ ܒܡܕܒܪܢܘܬܐ ܕܛܒܪܝܘܣ ܩܣܪ ܒܗܓܡܢܘܬܐ ܕܦܢܛܘܣ ܦܝܠܛܘܣ ܒܝܗܘܕܐ ܟܕ ܪܝܫܐ ܪܒܝܥܝܐ ܗܪܘܕܣ ܒܓܠܝܠܐ ܘܦܝܠܝܦܘܣ ܐܚܘܗܝ ܪܝܫܐ ܪܒܝܥܝܐ ܒܐܬܪܐ ܕܐܝܛܘܪܝܐ ܘܒܟܘܪ ܕܛܪܟܘܢܐ ܘܠܘܣܢܝܐ ܪܝܫܐ ܪܒܝܥܝܐ ܒܐܬܪܐ ܕܗܒ̈ܠܝܢܐ
03:02	ܒܪܒܘܬ ܟܗܢܘܬܐ ܕܚܢܢ ܘܕܩܝܦܐ܂ ܗܘܬ ܡܠܬܐ ܕܐܠܗܐ ܥܠ ܝܘܚܢܢ ܒܪ ܙܟܪܝܐ
03:03	ܘܡܟܪܙ ܗܘܐ ܒܡܕܒܪܐ ܘܒܟܠܗ ܐܬܪܐ ܕܚܕܪܝ ܝܘܪܕܢܢ ܡܥܡܘܕܝܬܐ ܕܬܝܒܘܬܐ ܠܫܘܒܩܢܐ ܕܚܛܗܐ
03:04	ܐܝܟܢܐ ܕܟܬܝܒ ܒܢܒܝܘܬܐ ܕܐܫܥܝܐ ܢܒܝܐ ܩܠܐ ܕܩܪܐ ܒܡܕܒܪܐ ܛܝܒܘ ܐܘܪܚܐ ܠܡܪܝܐ ܘܬܪܘܨܘ ܒܦܩܥܬܐ ܫܒܝܠܐ ܠܐܠܗܢ܂
03:05	ܟܠܗܘܢ ܢܚ̈ܠܐ ܢܬܡܠܘܢ܂ ܛܘܪܐ ܘܪܡܬܐ ܢܬܡܟܟܘܢ ܘܢܗܘܐ ܥܪܡܐ ܠܫܦܝܐ ܘܐܬܪܐ ܥܣܩܐ ܠܦܩܥܬܐ
03:06	ܘܢܬܓܠܐ ܐܝܩܪܗ ܕܡܪܝܐ ܘܢܚܙܘܢܝܗܝ ܐܟܚܕܐ ܟܘܠ ܒܣܪ܀
03:07	ܘܐܡܪ ܗܘܐ ܠܟܢܫܐ ܐܝܠܝܢ ܕܐܬܝܢ ܗܘܘ ܠܗ ܠܡܥܡܕ ܝܠܕܐ ܕܐܟܕܢܐ ܡܢܘ ܚܘܝܟܘܢ ܠܡܥܪܩ ܡܢ ܪܘܓܙܐ ܕܥܬܝܕ
03:08	ܥܒܕܘ ܗܟܝܠ ܦܐܪ̈ܐ ܕܫܘܝܢ ܠܬܝܒܘܬܐ ܘܠܐ ܬܫܪܘܢ ܠܡܐܡܪ ܐܝܬ ܠܢ ܐܒܐ ܐܒܪܗܡ ܐܡܪܢܐ ܠܟܘܢ ܓܝܪ ܕܡܫܟܚ ܐܠܗܐ ܕܡܢ ܗܠܝܢ ܟܐܦܐ ܢܩܝܡ ܒܢ̈ܝܐ ܠܐܒܪܗܡ
03:09	ܘܗܐ ܡܛܝ ܠܗ ܢܪܓܐ ܠܘܬ ܥܩܪܗܘܢ ܕܐܝܠܢܐ ܘܟܠ ܐܝܠܢܐ ܗܟܝܠ ܕܠܐ ܥܒܕ ܦܐܪ̈ܐ ܛܒ̈ܐ ܡܬܦܣܩ ܘܒܢܘܪܐ ܢܦܠ܂
03:10	ܘܡܫܐܠܝܢ ܗܘܘ ܠܗ ܟܢܫܐ ܡܢܐ ܢܥܒܕ܂
03:11	ܐܡܪ ܠܗܘܢ܂ ܡܢ ܕܐܝܬ ܠܗ ܬܪ̈ܬܝܢ ܟܘܬܝܢܝܢ ܢܬܠ ܚܕܐ ܠܡܢ ܕܠܝܬ ܠܗ ܘܡܢ ܕܐܝܬ ܠܗ ܣܝܒܪܬܐ ܗܟܢܐ ܢܥܒܕ܂
03:12	ܘܐܬܘ ܐܦ ܡܟܣܐ ܠܡܥܡܕ܂ ܘܐܡܪ̈ܝܢ ܠܗ ܡܢܐ ܢܥܒܕ܂
03:13	ܐܡܪ ܠܗܘܢ ܠܐ ܬܓܢܒܘܢ ܡܕܡ ܝܬܝܪ ܥܠ ܡܕܡ ܕܦܣܝܩ ܠܟܘܢ
03:14	ܘܫܐܠܘܗܝ ܗܘܘ ܐܦ ܣܛܪ̈ܛܝܘܛܐ ܘܐܡܪ̈ܝܢ ܡܢܐ ܢܥܒܕ ܐܦ ܐܢܚܢܢ ܐܡܪ ܠܗܘܢ ܠܐܢܫ ܠܐ ܬܥܫܩܘܢ ܒܐܢܫ ܠܐ ܬܬܛܓܪܘܢ ܣܦܩܢ ܢܗܘܝܢ ܠܟܘܢ ܐܦܣܘܢܝܬܟܘܢ܂
03:15	ܘܐܢܫܐ ܕܫܡܥܝܢ ܗܘܘ ܠܗ ܡܬܪܥܝܢ ܗܘܘ ܒܢܦܫܗܘܢ ܥܠ ܝܘܚܢܢ ܘܐܡܪ̈ܝܢ ܕܠܡܐ ܗܘܝܘ ܟܝ ܡܫܝܚܐ܂
03:16	ܥܢܐ ܠܟܠ ܐܢܫ ܘܐܡܪ ܠܗܘܢ ܐܢܐ ܗܐ ܡܥܡܕܢܐ ܠܟܘܢ ܒܡ̈ܝܐ܂ ܐܬܐ ܕܝܢ ܒܬܪܝ ܕܡܢܝ ܚܝܠܬܢ ܗܘ ܕܠܐ ܫܘܢܐ ܕܐܫܪܐ ܥܪ̈ܩܐ ܕܡܣ̈ܢܘܗܝ܂ ܗܘ ܢܥܡܕܟܘܢ ܒܢܘܪܐ ܘܒܪܘܚܐ ܕܩܘܕܫܐ
03:17	ܗܘ ܕܐܚܝܕ ܪܦܫܐ ܒܐܝܕܗ ܘܡܕܟܐ ܐܕܪܗ ܘܟܢܫ ܚܛܐ ܠܐܘܨܪܗ܂ ܘܬܒܢܐ ܡܘܩܕ ܒܢܘܪܐ ܕܠܐ ܕܥܟܐ
03:18	ܐܦ ܐܚܪ̈ܢܝܬܐ ܣܓܝܐ̈ܬܐ܂ ܟܕ ܡܬܟܫܦ ܗܘܐ ܡܣܒܪ ܠܥܡܐ
03:19	ܗܪܘܕܣ ܕܝܢ ܛܝܛܪܟܐ ܡܛܠ ܕܡܟܣ ܗܘܐ ܠܗ ܝܘܚܢܢ ܡܛܘܠ ܗܪܘܕܝܐ ܐܢܬܬܗ ܕܐܚܘܗܝ ܕܗܪܘܕܣ܂ ܘܥܠ ܟܘ̈ܠܗܝܢ ܒܝܫ̈ܬܐ ܐܝܠܝܢ ܕܥܒܕ ܗܘܐ
03:20	ܐܘܣܦ ܗܘܐ ܗܪܘܕܣ ܐܦ ܗܕܐ ܥܠ ܟܘܠܗܝܢ܂ ܘܚܒܫܗ ܠܝܘܚܢܢ ܒܝܬ ܐܣܝܪ̈ܐ܀
03:21	ܘܟܕ ܥܡܕ ܗܘܐ ܟܠܗ ܥܡܐ ܐܦ ܝܫܘܥ ܥܡܕ ܘܟܕ ܡܨܠܐ ܗܘܐ ܐܬܦܬܚܘ ܫܡܝܐ
03:22	ܘܢܚܬܬ ܥܠܘܗܝ ܪܘܚܐ ܕܩܘܕܫܐ ܒܕܡܘܬ ܓܘܫܡܐ ܕܝܘܢܐ ܘܩܠܐ ܐܫܬܡܥ ܡܢ ܫܡܝܐ ܐܢܬ ܗܘ ܒܪܝ ܘܚܒܝܒܝ ܕܒܟ ܐܨܛܒܝܬ܀
03:23	ܝܫܘܥ ܕܝܢ ܟܕ ܗܘ ܐܝܟ ܒܪ ܫܢܝܢ ܬܠܬܝܢ ܗܘܐ ܡܣܬܒܪ ܒܪܗ ܗܘ ܕܝܘܣܦ ܒܪ ܗܠܝ
03:24	ܒܪ ܡܛܬܬ ܒܪ ܂܂܂ ܂܂܂ ܂܂܂ ܒܪ ܝܢܐ ܒܪ ܂܂܂
03:25	ܒܪ ܡܬܬܐ ܒܪ ܥܡܘܨ ܒܪ ܢܚܘܡ ܒܪ ܚܣܠܝ ܒܪ ܢ&܂܂܂
03:26	ܒܪ ܂܂܂ ܂܂܂ ܡܛܛ ܒܪ ܫܡܥܝ ܒܪ ܝܘܣܦ ܒܪ ܝܗܘܕܐ
03:27	ܒܪ ܝܘܚܢܢ ܒܪ ܟܫܐ ܒܪ ܙܘܪܒܒܠ ܒܪ ܫܐܠܬܐܝܠ ܒܪ ܢܪܝ
03:28	ܒܪ ܡܠܟܝ ܒܪ ܐܕܝ ܒܪ ܩܘܣܡ ܒܪ ܥܠܕܘܡ ܒܪ ܥܝܪ
03:29	ܒܪ ܝܫܘܥ ܒܪ ܐܠܝܥܙܪ ܒܪ ܝܘܪܡ ܒܪ ܡܬܝܬ ܒܪ ܠܘܝ
03:30	ܒܪ ܫܡܥܘܢ ܒܪ ܝܗܘܕܐ ܒܪ ܝܘܣܦ ܒܪ ܝܘܢܡ ܒܪ ܐܠܝܩܝܡ
03:31	ܒܪ ܡܠܝܐ ܒܪ ܡܢܢ ܒܪ ܡܛܬܐ ܒܪ ܢܬܢ ܒܪ ܕܘܝܕ
03:32	ܒܪ ܐܝܫܝ ܒܪ ܝܘܒܠ ܒܪ ܒܘܫ ܒܪ ܫܠܐ ܒܪ ܢܚܫܘܢ
03:33	ܒܪ ܐܕܡ ܒܪ ܐܪܡ ܒܪ ܚܨܪܘܢ ܒܪ ܦܪܨ ܒܪ ܝܗܘܕܐ
03:34	ܒܪ ܝܥܩܘܒ ܒܪ ܐܝܣܚܩ ܒܪ ܐܒܪܗܡ ܒܪ ܬܪܚ ܒܪ ܢܚܘܪ
03:35	ܒܪ ܣܪܘܓ ܒܪ ܐܪܥܘ ܒܪ ܦܠܓ ܒܪ ܥܒܪ ܒܪ ܫܠܚ
03:36	ܒܪ ܥܝܠܡ ܒܪ ܐܪܦܟܫܕ ܒܪ ܫܝܡ ܒܪ ܢܘܚ ܒܪ ܠܡܟ
03:37	ܒܪ ܡܬܘܫܠܚ ܒܪ ܚܢܘܟ ܒܪ ܝܪܝܕ ܒܪ ܡܗܠܠܐܝܠ ܒܪ ܩܝܢܢ
03:38	ܒܪ ܐܢܘܫ ܒܪ ܫܝܬ ܒܪ ܐܕܡ ܒܪ ܐܠܗܐ܀
04:01	ܝܫܘܥ ܕܝܢ ܟܕ ܡܠܐ ܒܪܘܚܐ ܕܩܘܕܫܐ ܗܦܟ ܡܢ ܝܘܪܕܢܢ ܘܕܒܪܬܗ ܪܘܚܐ ܕܩܘܕܫܐ ܘܐܦܩܬܗ ܠܡܕܒܪܐ
04:02	ܕܢܬܢܣܐ ܡܢ ܣܛܢܐ܂ ܘܗܘܐ ܬܡܢ ܝܘܡ̈ܬܐ ܐܪ̈ܒܥܝܢ ܘܡܢ ܒܬܪ ܐܪ̈ܒܥܝܢ ܝܘܡܬܐ ܕܨܐܡ ܗܘܐ ܟܦܢ
04:03	ܘܐܡܪ ܠܗ ܐܟܠ ܩܪܨܐ ܐܢ ܒܪܗ ܐܢܬ ܕܐܠܗܐ܂ ܐܡܪ ܠܗܕܐ ܟܐܦܐ ܕܬܗܘܐ ܠܚܡܐ܂
04:04	ܐܡܪ ܠܗ ܝܫܘܥ ܟܬܝܒ ܗܘ ܕܠܐ ܒܠܚܡܐ ܒܠܚܘܕ ܚܝܐ ܒܪ ܐܢܫܐ܂
04:05	ܘܕܒܪ ܐܣܩܗ ܣܛܢܐ܂ ܘܚܘܝܗ ܟܠܗ̈ܝܢ ܡܠܟܘܬܐ ܕܐܪܥܐ ܕܩܠܝܠ ܙܒܢܐ܂
04:06	ܘܐܡܪ ܠܗ ܗܠܝܢ ܟܘܠܗܝܢ ܡܠܟܘܬܐ ܘܫܘܒܚܗܝܢ ܕܠܝ ܡܫܠܡܢ ܠܟ ܝܗܒ ܐܢܐ ܫܘܠܛܢܐ ܗܢܐ ܟܘܠܗ ܘܫܘܒܚܐ ܡܛܠ ܕܠܝ ܝܗܒ ܘܠܡܢ ܕܨܒܢܐ ܝܗܒ ܐܢܐ ܠܗ܂
04:07	ܐܢܬ ܐܢ ܬܣܓܕ ܩܕܡܝ ܠܟ ܢܗܘܐ ܟܘܠܗ܂
04:08	ܥܢܐ ܝܫܘܥ ܘܐܡܪ ܠܗ ܟܬܝܒ ܠܡܣܓܕ ܠܡܪܝܐ ܐܠܗܟ ܘܠܗ ܒܠܚܘܕܘܗܝ ܬܦܠܚ܂
04:09	ܘܐܝܬܝܗܝ ܠܐܘܪܫܠܡ ܘܐܩܝܡܗ ܥܠ ܩܪܢܐ ܕܗܝܟܠܐ ܘܐܡܪ ܠܗ ܐܢ ܒܪܗ ܐܢܬ ܕܐܠܗܐ ܐܪܡܐ ܢܦܫܟ ܡܢ ܗܡܟܐ
04:10	ܟܬܝܒ ܗܘ ܓܝܪ ܕܠܡ̈ܠܐܟܘܗܝ ܢܦܩܕ ܥܠܝܟ ܕܢܢܛܪܘܢܟ
04:11	ܘܥܠ ܐܝܕܝܗܘܢ ܢܫܩܠܘܢܟ ܕܠܐ ܬܬܩܠ ܒܟܐܦܐ܂
04:12	ܥܢܐ ܝܫܘܥ ܘܐܡܪ ܠܗ ܠܐ ܬܢܣܐ ܠܡܪܝܐ ܐܠܗܟ܂
04:13	ܘܟܕ ܫܠܡ ܣܛܢܐ ܢܣܝܘܢܘܗܝ܂ ܦܪܩ ܡܢ ܠܘܬܗ ܥܕ ܙܒܢܐ
04:14	ܘܗܦܟ ܝܫܘܥ ܒܚܝܠܐ ܕܪܘܚܐ ܠܓܠܝܠܐ ܘܢܦܩ ܥܠܘܗܝ ܛܒܐ ܒܟܘܠܗ ܗܘ ܐܬܪܐ܂
04:15	ܘܗܘ ܡܠܦ ܗܘܐ ܠܗܘܢ ܒܟܢܘܫ̈ܬܗܘܢ ܘܡܫܬܒܚ ܗܘܐ ܡܢ ܟܘܠ ܐܢܫ܂
04:16	ܘܐܬܐ ܠܢܨܪܬ ܐܬܪ ܕܐܬܪܒܝ ܗܘܐ ܘܥܠ ܠܟܢܘܫܬܐ ܒܝܘܡܐ ܕܫܒܬܐ ܐܝܟܢܐ ܕܡܥܕ ܗܘܐ
04:17	ܘܝܗܒ ܠܗ ܟܬܒܐ ܕܐܫܥܝܐ ܢܒܝܐ ܘܩܡ ܠܡܩܪܐ ܟܕ ܦܬܚ ܟܬܒܐ ܐܫܟܚ ܕܘܟܬܐ ܕܟܬܝܒ
04:18	ܪܘܚܐ ܕܡܪܝܐ ܥܠܝܟ ܕܡܛܠܬܗ ܡܫܚܟ ܠܡܣܒܪܘ ܠܡܣ̈ܟܢܐ ܘܫܠܚܢܝ ܠܡܟܪܙܘ ܠܫ̈ܒܝܐ ܫܘܒܩܢܐ ܘܠܥܘܝܪ̈ܐ ܚܙܝܐ ܘܐܫܪܪ ܠܬܒܝܪ̈ܐ ܒܫܘܒܩܢܐ
04:19	ܘܠܡܟܪܙܘ ܫܢܬܐ ܕܡܪܝܐ ܡܩܒܠܬܐ܂
04:20	ܘܟܪܟ ܣܦܪܐ ܘܝܗܒܗ ܠܡܫܡܫܢܐ ܘܝܬܒ ܘܟܠܗܘܢ ܒܗ ܚܝܪܝܢ ܗܘܘ
04:21	ܘܫܪܝ ܠܡܐܡܪ ܠܗܘܢ܂ ܝܘܡܢܐ ܐܫܬܠܡ ܟܬܒܐ ܗܢܐ ܒܐܕܢܝ̈ܟܘܢ
04:22	ܘܣܗܕܝܢ ܗܘܘ ܠܗ ܟܠܗܘܢ ܘܡܬܕܡܪܝܢ ܗܘܘ ܒܡܠܐ ܦܐܝ̈ܬܐ ܕܢܦܩܢ ܗܘܝ ܡܢ ܦܘܡܗ܂ ܘܐܡܪܝܢ ܗܘܘ ܗܢܐ ܠܐ ܗܘܐ ܒܪܗ ܕܝܘܣܦ
04:23	ܐܡܪ ܠܗܘܢ ܟܒܪ ܬܐܡܪܘܢ ܠܝ ܡܬܠܐ ܗܢܐ ܐܣܝܐ ܐܣܐ ܢܦܫܟ ܘܐܝܠܝܢ ܕܫܡܥܬܘܢ ܕܥܒܕܬ ܒܟܦܪܢܚܡ ܬܐܡܪܘܢ ܠܝ ܥܒܕ ܐܦ ܗܪܟܐ ܒܡܕܝܢܬܟ
04:24	ܐܡܪ ܠܗܘܢ ܐܡܝܢ ܐܡܪܢܐ ܠܟܘܢ ܕܠܝܬ ܢܒܝܐ ܕܡܬܩܒܠ ܒܡܕܝܢܬܗ܂
04:25	ܫܪܪܐ ܐܡܪܢܐ ܠܟܘܢ ܕܣܓܝ ܐܪ̈ܡܠܬܐ ܐܝܬ ܗܘܝ ܒܝܬ ܐܝܣܪܐܝܠ ܒܝܘܡܝ ܐܠܝܐ ܢܒܝܐ ܟܕ ܐܬܚܕܘ ܫܡܝܐ ܫܢܝܢ ܬ̈ܠܬ ܘܝܪܚܐ ܫܬܐ ܟܕ ܗܘܐ ܟܦܢܐ ܪܒܐ ܒܟܠܗ ܐܪܥܐ
04:26	ܘܠܘܬ ܚܕܐ ܡܢܗܝܢ ܠܐ ܐܫܬܕܪ ܐܝܠܝܐ ܐܠܐ ܠܨܪܦܬ ܕܨܝܕܢ ܠܘܬ ܐܢܬܬܐ ܐܪܡܠܬܐ
04:27	ܘܣܓܝ ܓܪܒܐ ܐܝܬ ܗܘܘ ܒܝܬ ܐܝܣܪܝܠ ܒܝܘܡܘܗܝ ܕܐܠܝܫܥ ܢܒܝܐ ܘܚܕ ܡܢܗܘܢ ܠܐ ܐܬܕܟܝ ܐܠܐ ܐܪܡܝܐ
04:28	ܘܟܕ ܫܡܥܘ ܗܠܝܢ ܕܒܟܢܘܫܬܐ ܐܬܡܠܝܘ ܚܡܬܐ
04:29	ܘܐܦܩܘܗܝ ܠܒܪ ܡܢ ܡܕܝܢܬܐ ܘܐܝܬܝܘܗܝ ܥܕܡܐ ܠܦܪܣ ܛܘܪܐ ܗܘ ܕܡܕܝܢܬܗܘܢ ܒܢܝܐ ܗܘܬ ܥܠܘܗܝ ܐܝܟ ܕܢܬܠܘܢܗ܂
04:30	ܘܗܘ ܐܦ ܒܝܢܬܗܘܢ ܥܒܪ ܗܘܐ
04:31	ܘܢܚܬ ܠܟܦܪܢܚܘܡ ܡܕܝܢܬܐ ܕܓܠܝܠܐ ܘܡܠܦ ܗܘܐ ܠܗܘܢ ܒܫ̈ܒܐ
04:32	ܘܬܡܝܗܝܢ ܗܘܘ ܒܝܘܠܦܢܗ܂ ܕܡܫܠܛܐ ܗܘܬ ܡܠܬܗ
04:33	ܘܐܝܬ ܗܘܐ ܒܗ ܒܟܢܘܫܬܗܘܢ ܓܒܪܐ ܕܐܝܬ ܒܗ ܪܘܚܐ ܕܫܐܕܐ ܛܢܦܐ ܘܙܥܩ ܒܩܠܐ ܪܡܐ
04:34	ܡܐ ܠܢ ܘܠܟ ܝܫܘܥ ܢܨܪܝܐ ܐܬܝܬ ܠܡܘܒܕܘܬܢ ܝܕܥ ܐܢܐ ܠܟ ܡܢ ܐܢܬ ܩܕܝܫܗ ܕܐܠܗܐ
04:35	ܘܟܐܐ ܒܗ ܝܫܘܥ ܘܐܡܪ ܠܗ ܣܟܘܪ ܦܘܡܟ ܘܦܘܩ ܡܢܗ ܘܫܕܝܗܝ ܫܐܕܐ ܠܡܨܥܬܐ ܘܢܦܩ ܡܢܗ ܟܕ ܡܕܡ ܠܐ ܐܗܪܗ
04:36	ܘܬܡܗܐ ܐܚܕ ܗܘܐ ܠܟܘܠܗܘܢ ܘܡܡܠܠܝܢ ܗܘܘ ܚܕ ܥܡ ܚܕ ܘܐܡܪܝܢ ܐܝܕܐ ܗܝ ܟܝ ܡܠܬܐ ܗܕܐ ܕܒܫܠܛܢܐ ܘܒܚܝܠܐ ܦܩܕܐ ܠܪܘܚܐ ܗܠܝܢ ܛܢܦܬܐ ܘܢܦܩܢ
04:37	ܘܢܦܩ ܗܘܐ ܥܠܘܗܝ ܛܒܐ ܒܟܘܠܗ ܐܬܪܐ ܕܚܕܪܝܗܘܢ܂
04:38	ܘܟܕ ܩܡ ܡܢ ܟܢܘܫܬܐ ܥܠ ܠܒܝܬܐ ܕܫܡܥܘܢ ܘܠܚܡܬܗ ܕܫܡܥܘܢ ܐܚܝܕܐ ܗܘܬ ܠܗ ܐܫܬܐ ܪܒܬܐ
04:39	ܘܟܐܐ ܒܐܫܬܗ ܘܫܒܩܬܗ ܘܒܪ ܫܥܬܗ ܩܡܬ ܘܡܫܡܫܐ ܗܘܬ ܠܗܘܢ
04:40	ܡܥܪܒܐ ܫܡܫܐ ܕܝܢ ܟܘܠܗܘܢ ܐܝܠܝܢ ܕܐܝܬ ܗܘܘ ܠܗܘܢ ܕܟܪܝܗܝܢ ܟܘܪ̈ܗܢܐ ܥ̈ܛܠܐ ܐܝܬܝܘ ܐܢܘܢ ܠܘܬܗ ܘܥܠ ܚܕ ܚܕ ܡܢܗܘܢ ܐܝܕܗ ܣܐܡ ܗܘܐ ܘܠܟܠܗܘܢ ܡܐܣܐ ܗܘܐ܂
04:41	ܘܢܦܩܝܢ ܗܘܘ ܫܐ̈ܕܐ ܡܢ ܣܓܝܐܐ ܟܕ ܡܙܥܩܝܢ ܘܐܡܪܝܢ ܐܢܬ ܗܘ ܒܪܗ ܕܐܠܗܐ ܘܟܐܐ ܗܘܐ ܒܗܘܢ ܘܠܐ ܫܒܩ ܗܘܐ ܠܗܘܢ ܕܢܐܡܪܘܢ ܡܛܠ ܕܝܕܥܝܢ ܗܘܘ ܠܗ ܕܗܘܝܘ ܡܫܝܚܐ܀
04:42	ܘܠܨܦܪܗ ܕܝܘܡܐ ܢܦܩ ܗܘܐ ܘܐܙܠ ܠܗ ܠܐܬܪܐ ܚܘܪܒܐ ܘܟܢܫܐ ܣܓܝܐܐ ܒܥܝܢ ܗܘܘ ܠܗ ܘܐܬܘ ܠܘܬܗ ܘܐܚܕܘ ܠܗ ܕܠܐ ܢܐܙܠ ܠܗ ܡܢ ܠܘܬܗܘܢ
04:43	ܗܘ ܕܝܢ ܐܡܪ ܠܗܘܢ ܕܐܦ ܠܡܕܝܢܬܐ ܐܚܪܢܝܬܐ ܘܠܐ ܠܝ ܕܐܣܒܪ ܡܠܟܘܬܗ ܕܐܠܗܐ
04:44	ܘܡܟܪܙ ܗܘܐ ܒܟܢܘܫܬܐ ܕܝܗܘܕ
05:01	ܘܒܗܘ ܟܢܫܐ ܕܐܕܫ ܗܘܐ ܕܢܫܡܥ ܡܢܗ ܡܠܬܗ ܕܐܠܗܐ ܘܗܘ ܩܐܡ ܗܘܐ ܥܠ ܝܕ ܝܡܬܐ ܕܓܢܣܪ
05:02	ܘܚܙܐ ܬܪܬܝܢ ܣܦܝܢܐ ܕܩܝܡܢ ܥܠ ܓܢܒ ܝܡܬܐ ܘܨܝܕܝܗ ܕܣܠܩܘ ܡܢܗ̈ܝܢ ܘܡܫܝܓܝܢ ܗܘܘ ܡܨܝܕܬܗܘܢ
05:03	ܘܚܕܐ ܡܢܗܝܢ ܕܫܡܥܘܢ ܗܘܬ ܘܣܠܩ ܝܫܘܥ ܝܬܒ ܒܗ ܘܐܡܪ ܕܢܕܒܪܘܢܗ ܡܢ ܝܒܫܐ ܩܠܝܠ ܠܡ̈ܝܐ ܘܝܬܒ ܗܘܐ ܘܡܠܦ ܡܢ ܣܦܝܢܬܐ ܠܟܢܫܐ
05:04	ܘܟܕ ܫܠܐ ܡܢ ܡܠܠܗ ܥܢܐ ܘܐܡܪ ܠܫܡܥܘܢ ܕܒܪܘ ܠܥܘܡܩܐ ܘܐܪܡܘ ܡܨܝܕܬܟܘܢ ܠܨܝܕܐ܂
05:05	ܥܢܐ ܫܡܥܘܢ ܘܐܡܪ ܠܗ ܪܒܝ ܠܠܝܐ ܟܠܗ ܠܐܝܢ ܘܡܕܡ ܠܐ ܐܫܟܚܢ܂ ܗܫܐ ܕܝܢ ܥܠ ܡܠܬܟ ܢܕܒܪ ܡܨܝܕܬܐ
05:06	ܘܟܕ ܫܕܘ ܡܨܝ̈ܕܬܗܘܢ ܚܒܫܘ ܢܘܢ̈ܐ ܣܓ̈ܝܐܐ ܘܡܨܛܪ̈ܝܢ ܗܘܝ ܡܨܝܕܬ̈ܗܘܢ
05:07	ܘܐܪܡܙܘ ܠܚܒܪ̈ܝܗܘܢ ܕܒܣܦܝܢܐ ܐܚܪ̈ܢܝܬܐ ܕܢܐܬܘܢ ܢܥܕܪܘܢ ܐܢܘܢ܂ ܘܟܕ ܐܬܘ ܐܣܩܘ ܢܘܢܐ ܘܡܠܘ ܣܦ̈ܝܢܐ ܬܪ̈ܬܝܗܝܢ ܘܩܪ̈ܝܒܢ ܗܘܝ ܡܢ ܝܘܩܪܗܝܢ ܠܡܛܒܥ
05:08	ܘܟܕ ܚܙܐ ܫܡܥܘܢ ܢܦܠ ܥܠ ܐܦܘ̈ܗܝ ܩܕܡ ܪ̈ܓܠܘܗܝ ܕܝܫܘܥ ܘܐܡܪ ܠܗ ܡܪܝ ܦܪܘܩ ܠܟ ܡܢܝ ܡܛܠ ܕܓܒܪܐ ܐܢܐ ܚܛܝܐ
05:09	ܬܡܗܐ ܓܝܪ ܐܚܕܗ ܘܠܟܠܗܘܢ ܕܥܡܗ ܒܨܝܕܐ ܗܘ ܕܢܘ̈ܢܐ ܕܐܚܕܘ
05:10	ܘܗܟܢܐ ܐܦ ܝܥܩܘܒ ܘܝܘܚܢܢ ܒ̈ܢܝ ܙܒܕܝ ܡܛܠ ܕܫܘܬܦܘܗܝ ܗܘܘ ܕܫܡܥܘܢ܂ ܘܐܡܪ ܝܫܘܥ ܠܫܡܥܘܢ ܠܐ ܬܕܚܠ ܡܢ ܗܫܐ ܒ̈ܢܝ ܐܢܫܐ ܬܗܘܐ ܨܐܕ ܠܚ̈ܝܐ܂
05:11	ܘܩܪܒܘ ܐܢܝܢ ܣܦܝ̈ܢܐ ܠܐܪܥܐ ܘܫܒܩܘ ܟܘܠ ܡܕܡ ܘܐܬܘ ܒܬܪܗ܀
05:12	ܘܟܕ ܗܘܐ ܒܚܕܐ ܡܢ ܡܕܝ̈ܢܬܐ ܐܬܐ ܓܒܪܐ ܚܕ ܕܡܠܐ ܓܪܒܐ ܚܙܐ ܠܝܫܘܥ ܘܢܦܠ ܥܠ ܐܦ̈ܘܗܝ ܘܒܥܐ ܗܘܐ ܡܢܗ ܘܐܡܪ ܠܗ ܡܪܝ ܐܢ ܨܒܐ ܐܢܬ ܡܫܟܚ ܐܢܬ ܠܡܕܟܝܘܬܢܝ܂
05:13	ܘܐܘܫܛ ܐܝܕܗ ܩܪܒ ܠܗ ܘܐܡܪ ܠܗ܂ ܨܒܢܐ ܐܬܕܟܐ܂ ܘܒܪ ܫܥܬܗ ܦܪܩ ܡܢܗ ܓܪܒܗ܂
05:14	ܘܙܗܪܗ ܝܫܘܥ ܕܠܐܢܫ ܠܐ ܢܐܡܪ ܐܠܐ ܙܠ ܚܘܐ ܢܦܫܟ ܠܟܗ̈ܢܐ ܘܩܪܒ ܚܠܦ ܕܬܕܟܝܬܟ ܐܝܟܢܐ ܕܦܩܕ ܡܘܫܐ ܕܬܗܘܐ ܠܗܘܢ ܠܣܗܕܘܬܐ܂
05:15	ܘܢܦܩ ܗܘܐ ܥܠܘܗܝ ܛܒܐ ܝܬܝܪܐܝܬ ܘܡܬܟܢܫ ܗܘܐ ܟܢܫܐ ܣܓܝܐܐ ܠܡܫܡܥ ܡܢܗ ܘܠܡܬܐܣܝܘ ܡܢ ܟܘܪ̈ܗܢܝܗܘܢ܂
05:16	ܘܗܘ ܡܫܢܐ ܗܘܐ ܠܕܒܪܐ ܘܡܨܠܐ ܗܘܐ܀
05:17	ܘܗܘܐ ܒܚܕ ܡܢ ܝܘܡܬܐ ܟܕ ܡܠܦ ܗܘܐ ܝܬܒܝܢ ܗܘܘ ܦܪܝܫܐ ܘܡܠܦܝ ܢܡܘܣܐ ܘܟܕ ܐܬܘ ܡܢ ܟܠ ܩܪܐ ܕܓܠܝܠܐ ܕܝܗܘܕ ܘܕܐܘܪܫܠܡ ܘܚܝܠܐ ܗܘܐ ܒܝܫܘܥ ܕܗܘܐ ܡܐܣܐ
05:18	ܘܗܐ ܐܢܫܐ ܐܝܬܝܘ ܓܒܪܐ ܚܕ ܒܥܪܣܐ ܡܫܪܝܐ ܘܒܥܝܢ ܗܘܘ ܕܐܝܟܢܐ ܢܥܠܘܢܗ ܕܢܣܝܡܘܢܗ ܩܕܡܘܗܝ
05:19	ܘܠܐ ܐܫܟܚܘ ܕܢܥܠܘܢܝܗܝ ܡܛܠ ܥܡܐ ܣܠܩܘ ܠܗܘܢ ܠܐܓܪܐ ܘܫܒܘܗܝ ܥܡ ܥܪܣܗ ܠܡܨܥܬܐ ܩܕܡܘܗܝ ܕܝܫܘܥ
05:20	ܘܟܕ ܚܙܐ ܗܝܡܢܘܬܗܘܢ ܐܡܪ ܠܡܫܪܝܐ ܓܒܪܐ ܫܒܝܩܝܢ ܠܟ ܚܛܗܝܟ
05:21	ܘܣܦܪܐ ܘܦܪܝܫܐ ܡܬܚܫܒܝܢ ܗܘܘ ܘܐܡܪܝܢ ܡܢܘ ܗܢܐ ܕܡܡܠܠ ܓܘܕܦܐ ܡܢܘ ܡܫܟܚ ܠܡܫܒܩ ܚܛܗܐ ܐܠܐ ܐܢ ܐܠܗܐ ܒܠܚܘܕ
05:22	ܝܫܘܥ ܕܝܢ ܝܕܥ ܡܚܫܒܬܗܘܢ ܥܢܐ ܘܐܡܪ ܠܗܘܢ ܡܢܐ ܡܬܚܫܒܝܢ ܐܢܬܘܢ ܒܠܒܘܬܟܘܢ
05:23	ܐܝܢܐ ܦܫܝܩܐ ܠܡܐܡܪ ܕܫܒܝܩܝܢ ܠܟ ܚܛܗܝܟ ܐܘ ܠܡܐܡܪ ܕܩܘܡ ܗܠܟ
05:24	ܕܬܕܥܘܢ ܕܝܢ ܐܢܬܘܢ ܕܫܠܝܛ ܗܘ ܒܪܗ ܕܐܢܫܐ ܕܢܫܒܘܩ ܚܛܗܐ ܥܠ ܐܪܥܐ ܐܡܪ ܠܡܫܪܝܐ ܠܟ ܐܡܪ ܐܢܐ ܩܘܡ ܫܩܘܠ ܥܪܣܟ ܘܙܠ ܠܒܝܬܟ
05:25	ܘܒܗ ܒܫܥܬܐ ܩܡ ܩܕܡܝܗܘܢ ܘܫܩܠ ܡܕܡ ܕܪܡܐ ܗܘܐ ܥܠܘܗܝ ܘܐܙܠ ܠܒܝܬܗ ܟܕ ܡܫܒܚ ܠܐܠܗܐ
05:26	ܘܬܡܗܐ ܐܚܕ ܐܢܘܢ ܘܡܫܒܚܝܢ ܗܘܘ ܟܠܗܘܢ ܠܐܠܗܐ ܘܐܡܪܝܢ ܕܚܙܝܢ ܬܫܒܚܬܐ ܪܘܪܒܬܐ ܝܘܡܢܐ ܗܘ
05:27	ܒܬܪ ܗܠܝܢ ܢܦܩ ܝܫܘܥ ܘܚܙܐ ܡܟܣܐ ܕܝܬܒ ܒܝܬ ܡܟܣܐ ܕܫܡܗ ܠܘܝ ܘܐܡܪ ܠܗ ܬܐ ܒܬܪܝ
05:28	ܘܫܒܩ ܟܘܠ ܡܕܡ ܘܐܙܠ
06:12	ܘܒܗܘܢ ܒܗܢܘܢ ܝܘܡܬܐ ܢܦܩ ܗܘܐ ܠܛܘܪܐ ܠܡܨܠܝܘ ܘܬܡܢ ܡܓܗ ܗܘܐ ܠܠܝܐ ܟܘܠܗ ܒܨܠܘܬܗ ܕܐܠܗܐ
06:13	ܘܟܕ ܢܓܗܬ ܩܪܐ ܠܬܠܡܝܕܘܗܝ ܘܓܒܐ ܡܢܗܘܢ ܬܪܥܣܪ ܗܢܘܢ ܕܫܠܝܚܐ ܫܡܝ ܐܢܘܢ
06:14	ܫܡܥܘܢ ܗܘ ܕܟܐܦܐ ܫܡܝ ܠܗ ܘܐܢܕܪܐܘܣ ܐܚܘܗܝ ܘܝܥܩܘܒ ܘܝܘܚܢܢ ܒܢܝ ܙܒܕܝ ܘܦܝܠܝܦܘܣ ܘܒܪ ܬܘܠܡܝ
06:15	ܘܡܬܝ ܘܬܐܘܡܐ ܘܝܥܩܘܒ ܒܪ ܚܠܦܝ ܘܫܡܥܘܢ ܕܡܬܩܪܐ ܛܢܢܐ
06:16	ܘܝܗܘܕܐ ܒܪ ܝܥܩܘܒ ܘܝܗܘܕܐ ܣܟܪܝܘܛܐ ܗܘ ܕܗܘ ܗܘܐ ܡܫܠܡܢܐ
06:17	ܘܢܚܬ ܥܡܗܘܢ ܠܦܩܥܬܐ ܘܩܡ ܗܘ ܘܟܢܫܐ ܕܬܠܡܝܕܘܗܝ ܘܣܘܓܐܐ ܕܟܢܫܐ ܕܥܡܐ ܕܐܬܘ ܡܢ ܟܘܠܗ ܝܗܘܕ ܘܡܢ ܐܘܪܫܠܡ ܘܡܢ ܦܪܗܠܝ ܘܡܢ ܨܘܪ ܘܡܢ ܨܝܕܘܢ
06:18	ܕܐܬܘ ܕܢܫܡܥܘܢܗ ܘܢܬܐܣܘܢ ܡܢ ܟܠܗܘܢ ܟܪ̈ܗܢܝܗܘܢ ܘܡܬܐܠܨܝܢ ܗܘܘ ܡܢ ܪܘܚܐ ܛܢܦܬ̈ܐ ܕܢܬܐܣܘܢ
06:19	ܟܘܠܗ ܨܒܐ ܗܘܐ ܠܡܬܩܪܒܘ ܠܗ ܚܝܠܐ ܓܝܪ ܢܦܩ ܗܘܐ ܡܢܗ ܘܠܟܠܗܘܢ ܡܐܣܐ ܗܘܐ
06:20	ܘܗܘ ܐܪܝܡ ܥܝܢ̈ܘܗܝ ܥܠ ܬܠܡ̈ܝܕܘܗܝ ܘܐܡܪ܀ ܛܘܒܝܗܘܢ ܠܡܣܟܢܐ ܕܕܝܠܗܘܢ ܗܝ ܡܠܟܘܬܐ ܕܫܡܝܐ܀
06:21	ܛܘܒܝ̈ܗܘܢ ܠܕܟܦܢܝܢ ܗܫܐ ܕܢܣܒܥܘܢ܀ ܛܘܒܝܗܘܢ ܠܕܒܟܝܢ ܗܫܐ ܕܢܓܚܟܘܢ܀
06:22	ܛܘܒܝܟܘܢ ܡܐ ܕܣܢܝܢ ܠܟܘܢ ܒܢܝ ܐܢܫܐ܂ ܘܡܦܪܫܝܢ ܠܟܘܢ܂ ܘܡܚܣܕܝܢ ܘܡܦܩܝܢ ܥܠܝܟܘܢ ܫܡܐ ܕܒܝܫ ܡܛܠ ܒܪܗ ܕܐܢܫܐ
06:23	ܐܢܬܘܢ ܕܝܢ ܚܕܘ ܒܗܝ ܫܥܬܐ ܪܘܙܘ ܘܕܘܨܘ ܕܐܓܪܟܘܢ ܣܓܝ ܒܫܡܝܐ ܗܟܢܐ ܓܝܪ ܥܒܕܝܢ ܗܘܘ ܐܒܗܬܗܘܢ ܠܢܒܝܐ܀
06:24	ܒܪܡ ܘܝ ܠܟܘܢ ܥܬܝܪܐ ܕܩܒܠܬܘܢ ܒܥܘܬܟܘܢ
06:25	ܘܝ ܠܕܓܚܟܝܢ ܗܫܐ ܕܬܒܟܘܢ ܘܬܐܒܠܘܢ
06:26	ܘܝ ܠܟܘܢ ܟܕ ܢܗܘܘܢ ܐܡܪܝܢ ܥܠܝܟܘܢ ܒܢܝ ܐܢܫܐ ܕܫܦܝܪ܂ ܗܟܢܐ ܓܝܪ ܥܒܕܝܢ ܗܘܘ ܠܢܒܝܐ ܕܕܓܠܘܬܐ
06:27	ܠܟܘܢ ܕܝܢ ܐܡܪܢܐ ܕܫܡܥܝܢ ܐܚܒܘ ܠܒܥܠܕܒܒܝܟܘܢ ܘܥܒܕܘ ܕܫܦܝܪ ܠܐܝܠܝܢ ܕܣܢܝܢ ܠܟܘܢ
06:28	ܒܪܟܘ ܠܐܝܠܝܢ ܕܠܝ̈ܛܝܢ ܠܟܘܢ܂ ܘܨܠܘ ܥܠ ܐܝܠܝܢ ܕܥܫܩܝܢ ܠܟܘܢ
06:29	ܘܠܡܢ ܕܡܚܟ ܠܟ ܥܠ ܦܟܟ ܩܪܒ ܠܗ ܐܚܪܢܐ ܘܡܢ ܕܫܩܠ ܡܪܛܘܛܟ ܐܘ ܟܘܬܝܢܟ ܠܐ ܬܟܠܝܗܝ
06:30	ܘܠܡܢ ܕܫܐܠ ܠܟ ܗܒ ܠܗ ܘܠܡܢ ܕܨܒܐ ܕܢܫܩܘܠ ܕܝܠܟ ܠܐ ܬܬܒܥܗ
06:31	ܘܐܝܟܢܐ ܕܨܒܝܢ ܐܢܬܘܢ ܕܢܥܒܕܘܢ ܠܟܘܢ ܒ̈ܢܝ ܐܢܫܐ ܕܫܦܝܪ ܗܟܢܐ ܥܒܕܘ ܠܗܘܢ
06:32	ܘܐܢ ܡܚܒܝܢ ܐܢܬܘܢ ܠܐܝܠܝܢ ܕܡܚܒܝܢ ܠܟܘܢ ܡܢܐ ܗܝ ܛܝܒܘܬܟܘܢ
06:33	ܘܐܢ ܥܒܕܝܢ ܐܢܬܘܢ ܕܛܒ ܠܘܬ ܡܢ ܕܥܒܕ ܨܝܕܝܟܘܢ ܕܛܒ ܡܢܐ ܗܝ ܛܝܒܘܬܟܘܢ ܐܦ ܚܛܝܐ ܗܟܢܐ ܥܒܕܝܢ
06:34	ܘܐܢ ܡܘܙܦܝܢ ܐܢܬܘܢ ܠܡܢ ܕܣܒܪܝܢ ܐܢܬܘܢ ܕܬܬܦܪܥܘܢ ܡܢܗ ܡܢܐ ܗܝ ܛܝܒܘܬܟܘܢ ܗܐ ܓܝܪ ܐܦ ܚܛܝܐ ܠܚܛܝܐ ܡܘܙܦܝܢ ܕܢܬܦܪܥܘܢ
06:35	ܒܪܡ ܕܝܢ ܐܚܒܘ ܠܒܥ̈ܠܕܒܒܝܟܘܢ ܘܐܛܐܒܘ ܠܗܘܢ ܘܐܘܙܦܘ܂ ܘܠܐ ܬܦܣܩܘܢ ܣܒܪܐ ܕܐܢܫ ܕܢܗܘܐ ܐܓܪܟܘܢ ܣܓܝ ܒܫܡܝܐ ܘܬܗܘܘܢ ܒܢܘܗܝ ܕܪܡܐ ܗܘ ܕܗܘ ܒܣܝܡ ܥܠ ܒܝܫ̈ܐ ܘܥܠ ܟܦܘܪ̈ܝ ܛܝܒܘܬܐ
06:36	ܗܘܘ ܡܪܚܡܢܝܢ ܐܝܟܢܐ ܕܐܒܘܟܘܢ ܡܪܚܡܢܐ ܗܘ܂
06:37	ܠܐ ܬܕܘܢܘܢ ܕܠܐ ܬܬܕܝܢܘܢ ܠܐ ܬܚܝܒܘܢ ܕܠܐ ܬܬܚܝܒܘܢ܂ ܫܪܘ ܘܬܫܬܪܘܢ
06:38	ܗܒܘ ܘܡܬܝܗܒ ܠܟܘܢ ܒܟܝܠܬܐ ܛܒܬܐ ܘܡܫܦܥܬܐ ܢܪܡܘܢ ܒܥܘܒܝܟܘܢ ܒܗܝ ܒܟܝܠܬܐ ܕܡܟܝܠܝܢ ܐܢܬܘܢ ܡܬܟܝܠ ܠܟܘܢ
06:39	ܘܐܡܪ ܗܘܐ ܠܗܘܢ ܡܬܠܐ ܗܢܐ ܠܡܐ ܡܫܟܚ ܣܡܝܐ ܠܣܡܝܐ ܠܡܕܒܪܘ ܘܠܐ ܬܪܝܗܘܢ ܒܓܘܡܨܐ ܢܦܠܝܢ܂
06:40	ܠܝܬ ܬܠܡܝܕܐ ܕܓܡܝܪ ܐܝܟ ܪܒܗ ܒܡܠܦܢܘܬܐ
06:41	ܡܢܐ ܕܝܢ ܓܠܐ ܕܒܥܝܢܗ ܕܐܚܘܟ ܚܙܐ ܐܢܬ ܘܩܪܝܬܐ ܕܒܥܝܢܟ ܠܐ ܡܬܚܙܝܐ ܠܟ
06:42	ܐܝܟܢܐ ܡܫܟܚ ܐܢܬ ܕܬܐܡܪ ܠܐܚܘܟ ܐܚܝ ܫܒܘܩ ܐܦܩ ܓܠܐ ܡܢ ܥܝܢܟ ܘܗܐ ܒܥܝܢܟ ܕܝܠܟ ܩܪܝܬܐ ܣܝܡܐ ܢܣܒ ܒܐܦ̈ܐ܂ ܐܦܩ ܠܘܩܕܡ ܩܪܝܬܐ ܡܢ ܥܝܢܟ ܘܗܝܕܝܢ ܢܬܚܙܐ ܠܟ ܠܡܦܩܘ ܓܠܐ ܡܢ ܥܝܢܗ ܕܐܚܘܟ
06:43	ܠܐ ܓܝܪ ܐܝܬ ܐܝܠܢܐ ܛܒܐ ܕܥܒܕ ܦܐ̈ܪܐ ܒܝܫܐ ܐܦܠܐ ܐܝܠܢܐ ܒܝܫܐ ܕܥܒܕ ܦܐ̈ܪܐ ܛܒܐ
06:44	ܟܘܠ ܐܝܠܢ ܡܢ ܦܐܪܘܗܝ ܡܬܝܕܥ ܠܐ ܠܩܛܝܢ ܡܢ ܟܘܒ̈ܐ ܬܢܐ ܘܐܦܠܐ ܡܢ ܣܢܝܐ ܩܛܦܝܢ ܥܢܒܐ
06:45	ܓܒܪܐ ܛܒܐ ܡܢ ܣܝܡܬܐ ܛܒܬܐ ܕܒܠܒܗ܂ ܡܦܩ ܛܒܬܐ ܘܓܒܪܐ ܒܝܫܐ ܡܢ ܣܝܡܬܐ ܒܝܫܬܐ ܕܒܠܒܗ ܡܦܩ ܒܝܫܬܐ ܡܢ ܬܘܬܪܝ ܠܒܐ ܓܝܪ ܡܡܠܠ ܦܘܡܐ܂
06:46	ܡܢܐ ܕܝܢ ܩܪܝܢ ܐܢܬܘܢ ܠܝ ܡܪܝ ܡܪܝ ܘܡܕܡ ܕܐܡܪܢܐ ܠܟܘܢ ܠܐ ܥܒܕܝܢ ܐܢܬܘܢ܂
06:47	ܟܘܠ ܐܢܫ ܓܝܪ ܕܐܬܐ ܠܘܬܝ ܘܫܡܥ ܡܠܝ ܘܥܒܕ ܠܗܝܢ ܐܚܘܟܘܢ ܠܡܢܐ ܕܡܐ܂
06:48	ܠܓܒܪܐ ܕܒܢܐ ܒܝܬܐ܂ ܘܚܦܪ ܘܥܡܩ܂ ܘܣܡ ܫܬܐܣܬܐ ܥܠ ܫܘܥܐ ܘܟܕ ܗܘܘ ܡܠܐܐ ܘܡܠܐ ܢܗܪܐ ܐܬܛܪܝܘ ܒܗ ܒܒܝܬܐ ܗܘ ܘܠܐ ܐܫܟܚܘ ܕܢܙܝܥܘܢܗ܂
06:49	ܘܗܘ ܕܫܡܥ ܘܠܐ ܥܒܕ ܕܡܐ ܠܓܒܪܐ ܕܒܢܐ ܒܝܬܗ ܥܠ ܐܪܥܐ ܕܠܐ ܫܬܐܣܬܐ ܘܐܬܛܪܝ ܒܗ ܢܗܪܐ ܘܒܪܫܥܬܗ ܐܪܡܝܗ ܘܗܘܬ ܡܦܘܠܬܐ ܕܒܝܬܐ ܗܘ ܪܒܐ܀
07:01	ܘܟܕ ܐܬܡܠܝ ܡ̈ܠܐ ܟܘܠܗܝܢ ܠܡܫܡܥܬܗ ܕܥܡܐ܂ ܥܠ ܠܟܦܪ ܢܚܘܡ
07:02	ܘܥܒܕܗ ܕܩܢܛܪܘܢܐ ܚܕ ܥܒܝܕ ܗܘܐ ܒܝܫ ܒܝܫ܂ ܘܝܩܝܪ ܗܘܐ ܥܠ ܡܪܗ܂ ܘܩܪܝܒ ܗܘܐ ܠܡܡܬ
07:03	ܘܫܡܥ ܥܠ ܝܫܘܥ ܘܫܕܪ ܠܘܬܗ ܩܫ̈ܝܫܐ ܕܝܗܘܕܝܐ ܘܒܥܐ ܗܘܐ ܡܢܗ ܕܢܐܬܐ ܢܚܝܐ ܠܥܒܕܗ
07:04	ܘܐܬܘ ܠܘܬ ܝܫܘܥ ܘܒܥܝܢ ܗܘܘ ܡܢܗ ܒܛܝܠܐܝܬ܂ ܘܐܡܪ̈ܝܢ ܫܘܐ ܗܘ ܕܬܥܒܕ ܠܗ ܗܕܐ܂
07:05	ܪܚܡ ܗܘ ܓܝܪ ܥܡܢ ܘܐܦ ܒܝܬ ܟܢܘܫܬܐ ܗܘ ܒܢܐ ܠܢ܂
07:06	ܘܐܙܠ ܗܘܐ ܥܡܗܘܢ ܝܫܘܥ ܘܟܕ ܩܪܝܒ ܕܝܢ ܩܠܝܠ ܡܢ ܒܝܬܐ ܗܐ ܫܕܪ ܠܘܬܗ ܩܢܛܪܘܢܐ ܗܘ ܠܪ̈ܚܡܘܗܝ ܘܫܠܚ ܠܗ ܡܪܝ ܠܐ ܬܥܡܠ ܠܐ ܓܝܪ ܫܘܐ ܐܢܐ ܕܬܥܘܠ ܬܚܝܬ ܡܛܠܠܝ܂
07:07	ܐܠܐ ܐܡܪ ܒܡܠܬܐ ܘܢܬܐܣܐ ܛܠܝܝ܂
07:08	ܐܦ ܐܢܐ ܓܝܪ ܓܒܪܐ ܐܢܐ ܕܡܫܥܒܕܢܐ ܬܚܘܬ ܫܘܠܛܢܐ ܘܐܝܬ ܬܚܝܬ ܐܝܕܝ ܣܛܪܛܝܘܛܐ ܘܐܡܪ ܐܢܐ ܠܗܢܐ ܕܙܠ ܘܐܙܠ܂ ܘܠܐܚܪܢܐ ܕܬܐ ܘܐܬܐ܂ ܘܠܥܒܕܝ ܕܥܒܕ ܗܕܐ ܘܥܒܕ
07:09	ܘܟܕ ܫܡܥ ܝܫܘܥ ܐܬܕܡܪ ܒܗ ܘܐܬܦܢܝ ܘܐܡܪ ܠܟܢܫܐ ܗܘ ܕܐܬܐ ܒܬܪܗ ܐܡܪ ܐܢܐ ܠܟܘܢ ܕܐܦܠܐ ܒܝܬ ܐܝܣܪܐܝܠ ܐܫܟܚܬ ܐܝܟ ܗܕܐ ܗܝܡܢܘܬܐ
07:10	ܘܗܦܟܘ ܗܢܘܢ ܕܐܫܬܕܪܘ ܘܐܫܟܚܘ ܠܥܒܕܐ ܗܘ ܟܕ ܚܠܝܡ
07:11	ܘܡܢ ܒܬܪܟܢ ܐܙܠܘ ܠܡܕܝܢܬܐ ܕܫܡܗ ܢܐܝܢ ܘܬܠܡܝܕܘܗܝ ܐܙܠܝܢ ܗܘܘ ܥܡܗ ܘܟܢܫܐ ܣܓܝܐܐ
07:12	ܩܪܒ ܠܬܪܥܐ ܕܡܕܝܢܬܐ ܘܚܙܐ ܟܕ ܡܠܘܝܢ ܡܝܬܐ ܕܝܚܝܕܝܐ ܗܘܐ ܠܐܡܗ܂ ܘܗܝ ܐܪܡܠܬܐ ܗܘܬ܂ ܘܐܝܬ ܗܘܐ ܥܡܗ ܟܢܫܐ ܣܓܝܐܐ ܡܢ ܒ̈ܢܝ ܡܕܝܢܬܐ
07:13	ܚܙܗ ܝܫܘܥ ܘܐܬܪܚܡ ܥܠܝܗ ܘܐܡܪ ܠܗ ܠܐ ܬܒܟܝܢ
07:14	ܘܗܘ ܐܙܠ ܘܩܪܒ ܠܐܪܢܐ܂ ܘܗܢܘܢ ܕܫܩܝܠܝܢ ܗܘܘ ܩܡܘ ܐܡܪ ܥܠܝܡܐ ܠܟ ܐܡܪܢܐ ܩܘܡ
07:15	ܘܐܬܬܪܝܡ ܗܘ ܡܝܬܐ ܘܝܬܒ ܘܫܪܝ ܠܡܡܠܠܘ ܘܝܗܒܗ ܠܐܡܗ
07:16	ܘܐܚܕܬ ܐܢܘܢ ܕܚܠܬܐ ܠܟܘܠܗܘܢ ܘܫܒܚܘ ܠܐܠܗܐ ܘܐܡܪܝܢ ܕܢܒܝܐ ܪܒܐ ܩܡ ܒܢ ܘܣܥܪ ܐܠܗܐ ܠܥܡܗ
07:17	ܘܢܦܩܬ ܥܠܘܗܝ ܗܕܐ ܒܟܠܗ ܐܪܥܐ ܕܝܗܘܕ ܘܒܟܘܠܗ ܐܬܪܐ ܕܚܕܪܝܗܘܢ܀
07:18	ܘܐܫܬܥܝܘ ܠܝܘܚܢܢ ܬܠܡܝܕܘܗܝ ܗܠܝܢ ܟܠܗܝܢ
07:19	ܘܩܪܐ ܝܘܚܢܢ ܠܬܪܝܢ ܡܢ ܬܠܡ̈ܝܕܘܗܝ ܘܫܕܪ ܠܘܬ ܝܫܘܥ ܘܐܡܪ ܐܢܬ ܗܘ ܕܐܬܐ ܐܘ ܠܐܚܪܢ ܗܘ ܡܣܟܝܢ ܐܢܚܢܢ܂
07:20	ܘܐܬܘ ܠܘܬܗ ܘܐܡܪܝܢ ܠܗ ܝܘܚܢܢ ܡܥܡܕܢܐ ܫܕܪܢ ܠܘܬܟ ܘܐܡܪ ܐܢܬ ܗܘ ܕܐܬܐ ܐܘ ܠܐܚܪܝܢ ܡܣܟܝܢ ܚܢܢ
07:21	ܘܒܗ ܒܫܥܬܐ ܣܓܝܐܐ ܐܣܝ ܡܢ ܟܘܪܗܢܐ ܘܡܢ ܡܚܘܬܐ ܘܡܢ ܪܘܚܐ ܒܝܫܬܐ ܘܠܣ̈ܓܝܐܐ ܣܡ̈ܝܐ ܝܗܒ ܗܘܐ ܕܢܚܙܘܢ
07:22	ܘܥܢܐ ܘܐܡܪ ܠܗܘܢ ܐܙܠܘ ܘܐܡܪܘ ܠܝܘܚܢܢ ܟܠܡܕܡ ܕܚܙܝܬܘܢ ܘܡܕܡ ܕܫܡܥܬܘܢ ܕܣܡܝܐ ܚܙܝܢ ܘܚ̈ܓܝܪܐ ܡܗܠܟܝܢ ܘܓܪ̈ܒܐ ܡܬܕܟܝܢ ܘܚܪ̈ܫܐ ܫܡܥܝܢ ܘܡܣܟܢܐ ܡܣܬܒܪܝܢ ܘܡܝ̈ܬܐ ܩܝܡܝܢ
07:23	ܘܛܘܒܘܗܝ ܠܡܢ ܕܠܐ ܢܬܟܫܠ ܒܝ
07:24	ܘܟܕ ܐܙܠܘ ܬܠܡܝܕܘܗܝ ܕܝܘܚܢܢ ܫܪܝ ܠܡܐܡܪ ܠܟܢܫܐ ܥܠ ܝܘܚܢܢ ܡܢܐ ܢܦܩܬܘܢ ܠܡܚܙܐ ܩܢܝܐ ܕܡܢ ܪܘܚܐ ܡܬܙܝܥ
07:25	ܘܐܠܐ ܡܢܐ ܢܦܩܬܘܢ ܠܡܚܙܐ ܓܒܪܐ ܕܢܚ̈ܬܐ ܪܟܝܟܐ ܠܒܝܫ ܗܐ ܗܢܘܢ ܕܒܠܒܘ̈ܫܐ ܡܫܒܚܐ ܘܡܦܢܩ̈ܐ ܐܝܬܝܗܘܢ ܒܝܬ ܡ̈ܠܟܐ ܐܢܘܢ܂
07:26	ܘܐܠܐ ܡܢܐ ܢܦܩܬܘܢ ܠܡܚܙܐ ܢܒܝܐ ܐܝܢ܂ ܐܡܪܢܐ ܠܟܘܢ ܕܝܬܝܪ ܗܘ ܡܢ ܢܒܝܐ
07:27	ܗܢܘ ܕܥܠܘܗܝ ܟܬܝܒ ܕܗܐ ܡܫܕܪܢܐ ܡܠܐܟܝ ܩܕܡ ܦܪܨܘܦܟ ܘܢܬܩܢ ܐܘܪܚܐ ܩܕܡܝܟ
07:28	ܐܡܪܢܐ ܠܟܘܢ ܕܠܐ ܩܡ ܒܝܠܝܕܝ ܢܫܐ ܢܒܝܐ ܕܪܒ ܡܢ ܝܘܚܢܢ ܙܥܘܪܐ ܕܝܢ ܒܡܠܟܘܬܐ ܕܐܠܗܐ ܪܒ ܗܘ ܡܢܗ
07:29	ܘܟܠܗ ܥܡܐ ܘܡܟܣܐ ܕܫܡܥܘ ܙܕܩܘ ܢܦܫܗܘܢ ܠܐܠܗܐ ܕܥܡܕܘ ܒܡܥܡܕܝܬܗ ܕܝܘܚܢܢ
07:30	ܣܦܪ̈ܐ ܕܝܢ ܘܦܪ̈ܝܫܐ ܓܠܙܘ ܒܢܦܫܗܘܢ ܨܒܝܢܐ ܕܐܠܗܐ ܕܠܐ ܐܬܥܡܕܘ ܡܢܗ
07:31	ܠܡܢ ܗܟܝܠ ܐܕܡܐ ܐܢܘܢ ܐܢܫܐ ܕܫܪܒܬܐ ܗܕܐ ܘܠܡܢܐ ܕܡܝܢ
07:32	ܕܡܝܢ ܠܛܠܝܐ ܕܝܬܒܝܢ ܒܫܘܩܐ ܘܫܠܚܝܢ ܠܚܒܪܝܗܘܢ ܙܡܪܢ ܠܟܘܢ ܘܠܐ ܪܩܕܬܘܢ ܘܐܠܝܢ ܠܟܘܢ ܘܠܐ ܒܟܝܬܘܢ
07:33	ܐܬܐ ܓܝܪ ܠܘܬܟܘܢ܂ ܝܘܚܢܢ ܡܥܡܕܢܐ ܠܐ ܐܟܠ ܘܠܐ ܫܬܐ܂ ܐܡܪܝܢ ܐܢܬܘܢ ܫܐܕܐ ܐܝܬ ܒܗ
07:34	ܘܐܬܐ ܒܪܗ ܕܓܒܪܐ ܐܟܠ ܘܫܬܐ ܐܡܪܝܢ ܐܢܬܘܢ ܗܐ ܓܒܪܐ ܐܟܘܠܐ ܘܪܘܝܐ ܘܪܚܡܐ ܕܡܟܣܐ ܘܕܚܛܝܐ
07:35	ܘܐܙܕܕܩܬ ܚܟܡܬܐ ܡܢ ܟܠܗܘܢ ܒܢܝܗ܀
07:36	ܘܐܬܐ ܦܪܝܫܐ ܚܕ ܒܥܐ ܡܢܗ ܕܢܠܥܣ ܥܡܗ ܘܥܠ ܠܒܝܬܗ ܕܦܪܝܫܐ ܗܘ ܟܕ ܐܣܬܡܟ
07:37	ܐܢܬܬܐ ܚܕܐ ܚܛܝܬܐ܂ ܐܝܬ ܗܘܬ ܒܗܝ ܡܕܝܢܬܐ ܘܟܕ ܝܕܥܬ ܕܒܒܝܬܗ ܕܗܘ ܦܪܝܫܐ ܣܡܝܟ ܢܣܒܬ ܫܛܝܦܬܐ ܕܡܫܚܐ ܕܒܣܝܡܐ
07:38	ܘܩܡܬ ܡܢ ܒܣܬܪܗ ܠܘܬ ܪ̈ܓܠܘܗܝ ܘܒܟܝܐ ܗܘܬ ܘܒܕܡܥܝܗ ܪ̈ܓܠܘܗܝ ܨܒܥܬ ܘܒܣܥܪ̈ܐ ܕܪܝܫܗܿ ܡܫܘܝܐ ܗܘܬ ܠܗܝܢ ܘܡܢܫܩܐ ܗܘܬ ܪ̈ܓܠܘܗܝ ܘܡܫܚܐ ܗܘܬ ܡܢ ܗܘ ܡܫܚܐ
07:39	ܟܕ ܚܙܐ ܕܝܢ ܗܘ ܦܪܝܫܐ ܕܩܪܝܗܝ ܐܬܚܫܒ ܒܢܦܫܗ ܘܐܡܪ ܗܢܐ ܐܠܘ ܢܒܝܐ ܗܘܐ ܝܕܥ ܗܘܐ ܡܢܝ ܘܡܐ ܛܒܗ ܕܐܢܬܬܐ ܗܝ ܚܛܝܬܐ ܕܩܪܒܬ ܠܗ
07:40	ܐܡܪ ܠܗ ܝܫܘܥ ܫܡܥܘܢ ܐܝܬ ܠܝ ܡܕܡ ܕܐܡܪ ܠܟ ܐܡܪ ܠܗ ܐܡܪ ܪܒܢ ܐܡܪ ܠܗ ܝܫܘܥ
07:41	ܬܪ̈ܝܢ ܚܝ̈ܒܝܢ ܐܝܬ ܗܘܘ ܠܓܒܪܐ ܡܘܙܦܢܐ ܚܕ ܚܝܒ ܗܘܐ ܠܗ ܕܝܢܪ̈ܐ ܚܡܫ̈ܝܢ ܘܚܕ ܕܝܢܪ̈ܐ ܚܡܫܡܐܐ
07:42	ܘܟܕ ܠܝܬ ܗܘܐ ܠܗܘܢ ܠܡܦܪܥ ܠܬܪ̈ܝܗܘܢ ܫܒܩ܂ ܐܝܢܐ ܡܢܗܘܢ ܢܚܒܝܘܗܝ ܝܬܝܪܐܝܬ
07:43	ܐܡܪ ܠܗ ܫܡܥܘܢ ܣܒܪ ܐܢܐ ܕܗܘ ܕܐܫܬܒܩ ܠܗ ܣܓܝ܂ ܐܡܪ ܠܗ ܝܫܘܥ ܫܦܝܪ ܕܢܬ܂
07:44	ܘܐܬܦܢܝ ܠܘܬ ܐܢܬܬܐ ܘܐܡܪ ܠܫܡܥܘܢ ܚܙܬ ܐܢܬܬܐ ܗܕܐ܂ ܠܒܝܬܟ ܥܠܬ ܡܝ̈ܐ ܠܪܓܠܝ ܠܐ ܝܗܒܬ ܠܝ ܗܕܐ ܕܝܢ ܒܕܡܥܝܗ ܨܒܥܬ ܐܢܝܢ ܘܒܣܥܪ̈ܐ ܕܪܝܫܗ ܫܘܝܬ ܐܢ̈ܝܢ
07:45	ܐܢܬ ܠܐ ܢܫܩܬܢܝ ܗܝ ܕܝܢ ܡܢ ܕܥܠܬ ܠܐ ܫܠܝܬ ܪܓܠܝ ܠܡܢܫܩܘ܂
07:46	ܐܢܬ ܠܐ ܡܫܚܬܢܝ ܗܝ ܕܝܢ ܒܡܫܚܐ ܕܒܣܝܡܐ ܪ̈ܓܠܝ ܡܫܚܬ
07:47	ܡܛܠ ܗܢܐ ܐܡܪܢܐ ܫܒܝܩܝܢ ܠܗ ܚܛܗܝܗ ܣܓܝܐܐ ܡܛܠ ܕܣܓܝ ܐܚܒܬ܂ ܡܢ ܕܩܠܝܠ ܓܝܪ ܡܫܬܒܩ ܠܗ ܩܠܝܠ ܡܚܒ
07:48	ܘܐܡܪ ܠܗ ܕܫܒܝܩܝܢ ܠܟܝ ܚ̈ܛܗܝܟܝ܂
07:49	ܘܫܪܝܘ ܗܢܘܢ ܕܣܡܝܟܝܢ ܐܡܪܝܢ ܒܢܦܫܗܘܢ ܡܢܘ ܗܢܐ ܕܐܦ ܚܛܗܐ ܫܒܩ܂
07:50	ܘܐܡܪ ܠܐܢܬܬܐ ܗܝ ܗܝܡܢܘܬܟܝ ܐܚܝܬܟܝ ܙܠܝ ܒܫܠܡܐ܀
08:01	ܘܡܢ ܒܬܪ ܗܠܝܢ ܡܬܟܪܟ ܗܘܐ ܒܩܘܪ̈ܝܐ ܘܒܡܕܝܢܬܐ ܘܬܪܥܣܪ̈ܬܗ ܥܡܗ ܘܡܣܒܪ ܡܠܟܘܬܗ ܕܐܠܗܐ
08:02	ܘܢ̈ܫܐ ܗܠܝܢ ܕܐܬܐܣܝ ܗܘܝ ܡܢ ܪ̈ܘܚܐ ܒܝܫܬܐ ܘܡܢ ܟܘܪ̈ܗܢܐ܂ ܡܪܝܡ ܕܡܬܩܪܝܐ ܡܓܕܠܝܬܐ ܗܝ ܕܫܒܥܐ ܫܐܕܝܢ ܢܦܩܘ ܗܘܘ ܡܢܗ܂
08:03	ܘܝܘܚܢ ܐܢܬܬ ܟܘܙܐ ܐܦܛܪܘܦܗ ܕܗܪܘܕܣ ܘܫܘܫܢ܂ ܘܐܚܪܢܝܬܐ ܣܓܝܐܬܐ ܕܡܫܡܫܢ ܗܘܝ ܠܗܘܢ ܡܢ ܩܢܝܢܝܗܝܢ
08:04	ܘܟܕ ܡܬܟܢܫ ܟܢܫܐ ܣܓܝܐܐ܂ ܘܐܝܠܝܢ ܕܡܢ ܡܕܝܢܬܐ ܐܬܝܢ ܗܘܘ ܠܘܬܗ ܫܪܝ ܠܡܐܡܪ ܠܗܘܢ ܒܡܬܠܐ
08:05	ܗܐ ܢܦܩ ܙܪܘܥܐ ܠܡܙܪܥ ܘܟܕ ܙܪܥ ܗܘܐ܂ ܐܝܬ ܕܢܦܠ ܥܠ ܝܕ ܐܘܪܚܐ ܘܐܬܕܝܫ܂ ܘܐܟܠܬܗ ܦܪܚܬܐ
08:06	ܘܐܚܪܢܐ ܢܦܠ ܥܠ ܫܘܥܐ ܘܡܛܠ ܕܠܝܬ ܗܘܬ ܛܠܬܐ ܒܨ ܘܝܒܫ
08:07	ܘܐܚܪܢܐ ܢܦܠ ܒܝܬ ܟܘܒܐ ܘܚܢܩܘܗܝ܂
08:08	ܘܐܚܪܢܐ ܢܦܠ ܒܐܪܥܐ ܛܒܬܐ܂ ܘܝܥܐ ܘܝܗܒ ܦܐܪܐ ܚܕ ܒܡܐܐ ܘܟܕ ܐܡܪ ܗܠܝܢ ܒܩܠܐ ܪܡܐ ܐܡܪ ܗܘܐ ܕܡܢ ܕܐܝܬ ܠܗ ܐܕܢܐ ܕܢܫܡܥ ܢܫܡܥ
08:09	ܘܫܐܠܘܗܝ ܗܘܘ ܬܠܡܝܕܘܗܝ ܡܢܘ ܡܬܠܐ ܗܢܐ
08:10	ܐܡܪ ܠܗܘܢ ܠܟܘܢ ܗܘ ܝܗܝܒ ܠܡܕܥ ܐܪܙܐ ܕܡܠܟܘܬܗ ܕܐܠܗܐ ܠܗܢܘܢ ܕܝܢ ܒܪܝܐ ܠܐ ܝܗܝܒ ܠܗܘܢ ܠ܂܂܂ ܠܡܕܥ܂ ܡܛܠ ܗܢܐ ܒܦܠܐ̈ܬܐ ܡܬܐܡܪ ܠܗܘܢ ܕܟܕ ܚܙܝܢ ܠܐ ܢܚܙܘܢ ܘܟܕ ܫܡܥܝܢ ܠܐ ܢܣܬܟܠܘܢ
08:11	ܗܢܐ ܕܝܢ ܡܬܠܐ ܐܝܬܘܗܝ ܙܪܥܐ ܡܠܬܗ ܕܐܠܗܐ
08:12	ܘܗܢܘܢ ܕܥܠ ܝܕ ܐܘܪܚܐ ܗܠܝܢ ܐܢܘܢ ܕܫܡܥܝܢ ܡܠܬܐ ܘܐܬܐ ܒܥܠܕܒܒܐ ܫܩܠ ܠܗ ܡܠܬܐ ܡܢ ܠܒܗܘܢ ܕܠܐ ܢܗܝܡܢܘܢ ܘܢܚܘܢ
08:13	ܘܗܘ ܕܥܠ ܫܘܥܐ ܗܠܘܟ ܐܢܘܢ܂ ܕܡܐ ܕܫܡܥܝܢ ܡܠܬܐ ܥܓܠ ܒܚܕܘܬܐ ܡܩܒܠܝܢ ܠܗ ܘܥܩܪܐ ܠܝܬ ܠܗܘܢ ܒܗܿ ܘܒܙܒܢ ܡܗܝܡܢܝܢ ܘܒܙܒܢ ܢܣܝܘܢܐ ܡܬܟܫܠܝܢ
08:14	ܘܗܘ ܕܢܦܠ ܒܝܬ ܟܘ̈ܒܐ ܗ̈ܠܝܢ ܕܫܡܥܝܢ ܘܒܨܦܬܐ ܘܒܥܘܬܪܐ ܘܒܒܣܝܡܘܬܐ ܕܥܘܡܪܐ ܡܬܚܫܚܝܢ ܘܡܬܚܢܩܝܢ ܘܦܐܪܐ ܠܐ ܝܗܒܝܢ
08:15	ܗܘ ܕܝܢ ܒܐܪܥܐ ܛܒܬܐ ܗܢܘܢ ܐܢܘܢ ܕܒܠܒܐ ܫܦܝܐ ܘܛܒܐ ܫܡܥܘ ܡܠܬܐ ܘܐܚܕܘ ܘܝܗܒܝܢ ܦܐܪ̈ܐ ܒܡܣܝܒܪܢܘܬܐ
08:16	ܠܐ ܐܢܫ ܡܢܗܪ ܫܪܓܐ ܘܡܚܦܐ ܠܗ ܒܡܐܢܐ ܐܘ ܣܐܡ ܠܗ ܬܚܝܬ ܥܪܣܐ ܐܠܐ ܣܐܡ ܠܗ ܠܥܠ ܡܢ ܡܢܪܬܐ ܕܟܘܠ ܡܢ ܕܥܐܠ ܢܚܙܐ ܢܘܗܪܗ܂
08:17	ܠܝܬ ܓܝܪ ܡܕܡ ܕܟܣܐ ܕܠܐ ܢܬܓܠܐ ܘܠܐ ܕܡܛܫܝ ܕܠܐ ܢܬܝܕܥ ܘܢܐܬܐ ܠܓܠܝܐ܂
08:18	ܚܙܘ ܡܢܐ ܫܡܥܬܘܢ܂ ܡܢ ܕܐܝܬ ܠܗ ܓܝܪ ܢܬܝܗܒ ܠܗ ܘܡܢ ܕܠܝܬ ܠܗ ܐܦ ܗܘ ܡܕܡ ܕܣܒܪ ܕܐܝܬ ܠܗ ܢܫܬܩܠ ܡܢܗ܀
08:19	ܘܐܬܘ ܠܘܬܗ ܐܡܗ ܘܐܚܘ̈ܗܝ ܘܠܐ ܡܫܟܚܝܢ ܗܘܘ ܕܢܚܙܘܢ ܘܩܘܝܢ ܡܛܠ ܟܢܫܐ
08:20	ܘܐܡܪܘ ܠܗ ܐܡܟ ܘܐܚ̈ܝܟ ܩܝܡܝܢ ܠܒܪ ܘܨܒܝܢ ܠܡܚܙܝܟ
08:21	ܗܘ ܕܝܢ ܥܢܐ ܘܐܡܪ ܠܗܘܢ ܐܡܝ ܘܐܚ̈ܝ ܗܠܝܢ ܐܢܘܢ ܐܝܠܝܢ ܕܫܡܥܝܢ ܡܠܬܐ ܕܐܠܗܐ ܘܥܒܕܝܢ܂
08:22	ܘܗܘܐ ܒܚܕ ܡܢ ܝܘܡ̈ܬܐ ܣܠܩ ܝܬܒ ܒܣܦܝܢܬܐ ܗܘ ܘܬܠܡܝܕܘܗܝ ܥܡܗ܂ ܘܐܡܪ ܠܗܘܢ ܢܥܒܪ ܠܗܘ ܥܒܪܐ ܕܝܡܬܐ
08:23	ܘܟܕ ܪܕܝܢ ܕܡܟ ܘܗܘܬ ܥܠܥܠܐ ܕܪܘܚܐ ܒܝܡܬܐ ܘܐܬܡܠܝܬ ܣܦܝܢܬܗܘܢ ܘܩܪܝܒܝܢ ܗܘܘ ܠܡܛܒܥ
08:24	ܘܩܪܒܘ ܐܥܝܪܘܗܝ ܐܡܪܝܢ ܠܗ ܪܒܢ ܪܒܢ ܐܒܕܝܢ ܐܢܚܢܢ܂ ܘܩܡ ܘܟܐܐ ܒܪܘܚܐ ܘܒܡܚܫܘܠܐ ܕܝܡܬܐ ܘܗܘܐ ܫܠܝܐ
08:25	ܘܐܡܪ ܠܗܘܢ ܐܝܟܐ ܗܝ ܗܝܡܢܘܬܟܘܢ܂ ܗܢܘܢ ܕܝܢ ܟܕ ܕܚܝܠܝܢ ܡܬܕܡܪܝܢ ܗܘܘ ܘܐܡܪܝܢ ܚܕ ܠܚܕ ܡܢܘ ܟܝ ܗܢܐ ܕܐܦ ܠܪܘܚܐ ܦܩܕ ܘܠܝܡܐ ܘܡܫܬܡܥܝܢ ܠܗ܀
08:26	ܘܪܕܘ ܠܐܬܪܐ ܕܓܕܪܝܐ ܗܘ ܕܐܝܬܘܗܝ ܠܘܩܒܠ ܥܒܪܐ ܕܓܠܝܠܐ܂
08:27	ܟܕ ܣܠܩ ܕܝܢ ܠܐܪܥܐ ܦܓܥ ܒܗ ܓܒܪܐ ܚܕ ܡܢ ܡܕܝܢܬܐ ܕܐܝܬ ܗܘܐ ܥܠܘܗܝ ܫܐܕܐ ܡܢ ܙܒܢܐ ܣܓܝܐܐ܂ ܘܢܚܬܐ̈ ܠܐ ܠܒܫ ܗܘܐ ܘܒܒܝܬܐ ܠܐ ܥܡܪ ܗܘܐ܂ ܐܠܐ ܒܝܬ ܩܒܘܪ̈ܐ܂
08:28	ܟܕ ܚܙܐ ܠܝܫܘܥ ܩܥܐ ܘܢܦܠ ܣܓܕ ܠܗ ܘܒܩܠܐ ܪܡܐ ܐܡܪ ܡܐ ܠܝ ܘܠܟ ܝܫܘܥ ܒܪܗ ܕܐܠܗܐ ܪܡܐ ܒܥܢܐ ܡܢܟ ܠܐ ܬܫܢܩܢܝ܂
08:29	ܦܩܕ ܗܘܐ ܠܗ ܠܗܘ ܪܘܚܐ ܛܢܦܐ ܠܡܦܩ ܡܢ ܒܪ ܐܢܫܐ ܣܓܝ ܓܝܪ ܙܒܢܐ ܢܩܝܦ ܗܘܐ ܠܗ܂ ܘܡܬܐܣܪ ܗܘܐ ܒܫܝܫ̈ܠܬܐ ܘܒܟܒܠܐ ܕܢܬܢܛܪ ܘܡܬܒܪ ܗܘܐ ܐܣܘܪ̈ܘܗܝ ܘܡܦܣܩ ܘܡܬܕܒܪ ܗܘܐ ܡܢܗ ܡܢ ܫܐܕܐ ܠܚܘܪܒܐ
08:30	ܫܐܠܗ ܕܝܢ ܝܫܘܥ ܘܐܡܪ ܡܢ ܫܡܟ܂ ܐܡܪ ܠܗ ܠܓܝܘܢ ܡܛܠ ܕܣܓܝܐܐ ܐܢܚܢܢ ܒܗ܂
08:31	ܘܒܥܝܢ ܗܘܘ ܡܢܗ ܕܠܐ ܢܦܩܘܕ ܠܗܘܢ܂ ܠܡܐܙܠ ܠܬܗܘܡܐ܂
08:32	ܐܝܬ ܗܘܬ ܕܝܢ ܬܡܢ ܒܛܘܪܐ ܒܩܪܐ ܕܚܙܝܪ̈ܐ ܣܓܝ̈ܐܐ ܕܪܥܝܢ ܗܘܘ ܘܒܥܝܢ ܗܘܘ ܗܢܘܢ ܫܐ̈ܕܐ ܕܢܦܣ ܠܗܘܢ ܕܢܥܠܘܢ ܒܚܙܝܪ̈ܐ ܘܐܦܣ ܠܗܘܢ܂
08:33	ܘܢܦܩܘ ܫܐ̈ܕܐ ܡܢ ܓܒܪܐ ܗܘ ܘܥܠܘ ܒܚܙܝܪ̈ܐ܂ ܘܬܪܨܬ ܒܩܪܐ ܟܘܠܗ ܠܫܩܝܦܐ ܘܢܦܠܘ ܒܝܡܐ ܘܐܬܚܢܩܘ
08:34	ܟܕ ܚܙܘ ܕܝܢ ܗܢܘܢ ܪ̈ܥܘܬܐ ܡܕܡ ܕܗܘܐ ܥܪܩܘ ܘܐܫܬܥܝܘ ܒܡܕܝܢܬܐ ܘܒܩܘܪ̈ܝܐ
08:35	ܘܢܦܩܘ ܐܢܫܐ ܘܚܙܘ ܡܕܡ ܕܗܘܐ ܘܐܬܘ ܠܘܬ ܝܫܘܥ ܘܐܫܟܚܘ ܠܗܘ ܓܒܪܐ ܕܢܦܩܘ ܡܢܗ ܗܢܘܢ ܫܐ̈ܕܐ ܟܕ ܡܠܒܫ ܘܡܢܟܦ ܘܝܬܒ ܠܘܬ ܪ̈ܓܠܘܗܝ ܕܝܫܘܥ ܘܕܚܠܘ
08:36	ܘܐܫܬܥܝܘ ܠܗܘܢ ܐܝܟܢܐ ܚܝܐ ܓܒܪܐ ܗܘ
08:37	ܘܒܥܝܢ ܗܘܘ ܡܢܗ ܟܘܠܗ ܟܢܫܐ ܕܓܕܪܝܐ ܕܢܐܙܠ ܠܗ ܡܢ ܠܘܬܗܘܢ܂ ܡܛܠ ܕܕܚܠܬܐ ܐܚܕܬ ܗܘܬ ܐܢܘܢ ܗܘ ܕܝܢ ܣܠܩ ܠܣܦܝܢܬܐ ܘܐܙܠ ܡܢ ܠܘܬܗܘܢ
08:38	ܗܘ ܕܝܢ ܕܢܦܩܘ ܡܢܗ ܫܐ̈ܕܐ ܒܥܐ ܗܘܐ ܡܢܗ ܕܠܘܬܗ ܢܗܘܐ ܘܫܪܝܗܝ ܝܫܘܥ ܘܐܡܪ
08:39	ܗܦܘܟ ܠܒܝܬܟ ܘܐܫܬܥܐ ܐܝܠܝܢ ܕܥܒܕ ܠܟ ܐܠܗܐ ܘܐܙܠ ܗܘܐ ܘܡܟܪܙ ܒܟܘܠܗ ܡܕܝܢܬܐ ܡܕܡ ܕܥܒܕ ܠܗ ܝܫܘܥ܂
08:40	ܘܟܕ ܗܦܟ ܡܪܢ ܩܒܠܗ ܟܢܫܐ ܣܓܝܐܐ ܠܗ ܓܝܪ ܚܝܪ̈ܝܢ ܗܘܘ܀
08:41	ܘܐܬܐ ܓܒܪܐ ܚܕ ܝܘܪܝܫ ܫܡܗ ܘܪܝܫ ܟܢܘܫܬܐ ܗܘܐ ܘܢܦܠ ܥܠ ܪ̈ܓܠܘܗܝ ܕܝܫܘܥ ܘܒܥܐ ܗܘܐ ܕܢܥܘܠ ܠܒܝܬܗ
08:42	ܒܪܬܐ ܓܝܪ ܝܚܝܕܝܬܐ ܐܝܬ ܗܘܬ ܠܗ܂ ܘܐܝܬܝܗ ܗܘܬ ܐܝܟ ܒܪܬ ܫܢ̈ܝܢ ܬܪ̈ܬܥܣܪܐ ܘܩܪܝܒܐ ܗܘܬ ܠܡܡܬ ܘܟܕ ܐܙܠ ܟܢܫܐ ܚܒܨ ܗܘܐ ܠܗ
08:43	ܘܐܢܬܬܐ ܚܕܐ ܕܪܕܐ ܗܘܐ ܕܡܗ ܫܢ̈ܝܢ ܬܪܬܥܣܪ̈ܐ ܘܠܐ ܐܫܟܚܬ ܕܬܬܐܣܐ ܡܢ ܐܢܫ
08:44	ܘܩܪܒܬ ܡܢ ܒܣܬܪܗ ܘܐܚܕܬ ܒܟܢܦܐ ܕܠܒܘܫܗ܂ ܘܩܡܬ ܡܥܝܢܐ ܕܡܪܕܝܬܐ ܕܕܡܗ
08:45	ܘܐܡܪ ܝܫܘܥ ܡܢܘ ܩܪܒ ܠܝ܂ ܘܟܕ ܟܠܗܘܢ ܟܦܪܝܢ ܗܘܘ ܐܡܪ ܠܗ ܟܐܦܐ ܪܒܢ ܟܢܫܐ ܐܠܨܝ̈ܢ ܘܚ̈ܒܨܝܢ ܠܟ܂ ܘܐܡܪ ܐܢܬ ܡܢܘ ܩܪܒ ܠܝ
08:46	ܥܢܐ ܝܫܘܥ ܘܐܡܪ ܠܗ ܐܢܫ ܩܪܒ ܠܝ ܐܢܐ ܓܝܪ ܝܕܥ ܐܢܐ ܕܚܝܠܐ ܢܦܩ ܡܢܝ܂
08:47	ܟܕ ܚܙܬ ܕܝܢ ܗܝ ܐܢܬܬܐ ܕܐܦ ܗܝ ܗܕܐ ܠܐ ܛܥܬܗ܂ ܐܬܬ ܟܕ ܪܬܝܬܐ ܢܦܠܬ ܣܓܕܬ ܠܗ܂ ܘܐܡܪܬ ܠܥܝܢ ܥܡܐ ܗܘ ܟܘܠܗ ܡܛܠ ܐܝܕܐ ܨܒܘܬܐ ܩܪܒܬ ܘܐܝܟܢܐ ܒܪ ܫܥܬܗ ܐܬܐܣܝܬ܂
08:48	ܗܘ ܕܝܢ ܥܢܐ ܘܐܡܪ ܠܗ ܒܪܬܝ ܗܝܡܢܘܬܟܝ ܐܚܝܬܟܝ ܙܠܝ ܒܫܠܡܐ܀
08:49	ܘܟܕ ܡܡܠܠ ܐܬܘ ܡܢ ܒܝܬܗ ܕܪܒ ܟܢܘܫܬܐ ܕܐܡܪܝܢ ܠܗ ܡܝܬܬ ܠܗ ܒܪܬܟ ܠܐ ܬܥܡܠ ܠܡܠܦܢܐ
08:50	ܟܕ ܫܡܥ ܕܝܢ ܝܫܘܥ ܥܢܐ ܘܐܡܪ ܠܗ ܠܐ ܬܕܚܠ ܒܠܚܘܕ ܗܝܡܢ ܘܚܝܐ܂
08:51	ܘܟܕ ܐܬܐ ܠܒܝܬܗ ܕܗܘ ܓܒܪܐ܂ ܠܐ ܫܒܩ ܠܐܢܫ ܕܢܥܘܠ ܐܠܐ ܠܟܦܐ ܘܠܝܥܩܘܒ ܘܠܝܘܚܢܢ ܘܠܐܒܘܗ ܘܠܐܡܗ ܕܛܠܝܬܐ܂
08:52	ܘܟܘܠܗܘܢ ܐܢܫܐ ܒܟ̈ܝܢ ܗܘܘ ܘܡܪܩܕܝܢ ܥܠܝܗ܂ ܘܗܘ ܐܡܪ ܠܗܘܢ ܠܐ ܬܒܟܘܢ܂ ܠܐ ܓܝܪ ܡܝܬܬ ܕܡܟܐ ܗܝ܂
08:53	ܗܢܘܢ ܕܝܢ ܓܚܟܝܢ ܗܘܘ ܥܠܘܗܝ܂ ܕܝܕܥܝܢ ܗܘܘ ܕܡܝܬܬ ܠܗ܂
08:54	ܘܗܘ ܐܚܕܗ ܒܐܝܕܗ ܘܩܪܗ ܘܐܡܪ ܛܠܝܬܐ ܩܘܡܝ
08:55	ܘܗܦܟܬ ܪܘܚܗ܂ ܘܒܪܫܥܬܗ ܩܡܬ܂ ܘܦܩܕ ܕܢܬܠܘܢ ܠܗ ܠܡܐܟܠ
08:56	ܘܬܡܗܘ ܗܘܘ ܐܒܗ̈ܝܗ܂ ܘܗܘ ܦܩܕ ܐܢܘܢ ܕܠܐܢܫ ܠܐ ܢܐܡܪ̈ܘܢ ܡܐ ܕܗܘܐ܀
09:01	ܘܩܪܐ ܕܝܢ ܠܬܪܥܣܪܬܗ ܘܝܗܒ ܠܗܘܢ ܥܠܝܐ ܘܫܘܠܛܢܐ ܥܠ ܟܘܠܗܘܢ ܫܐܕܐ ܘܟܪ̈ܝܗܐ ܠܡܐܣܝܘ܂
09:02	ܘܫܕܪ ܐܢܘܢ ܠܡܟܪܙܘ ܡܠܟܘܬܗ ܕܐܠܗܐ ܘܠܡܐܣܝܘ
09:03	ܘܐܡܪ ܠܗܘܢ ܡܕܡ ܠܐ ܬܫܩܠܘܢ ܠܟܘܢ ܠܐܘܪܚܐ܂ ܠܐ ܚܘܛܪܐ ܘܠܐ ܬܪܡܠܐ܂ ܘܠܐ ܠܚܡܐ ܘܠܐ ܟܣܦܐ܂ ܘܐܦܠܐ ܬܪܬܝܢ ܟܘܬܝܢܝܢ ܢܗ̈ܘܝܢ ܠܟܘܢ܂
09:04	ܘܠܒܝܬܐ ܐܝܢܐ ܕܥܠܝܢ ܐܢܬܘܢ ܠܗ ܬܡܢ ܗܘܘ܂ ܘܡܢ ܬܡܢ ܦܘܩܘ
09:05	ܘܐܝܠܝܢ ܕܠܐ ܡܩܒܠܝܢ ܠܟܘܢ܂ ܡܐ ܕܢܦܩܝܢ ܐܢܬܘܢ ܡܢ ܡܕܝܢܬܐ ܗܝ ܐܦ ܚܠܐ ܕܪ̈ܓܠܝܟܘܢ ܐܢܬܘܢ ܗܘܘ ܢܦܨ̈ܝܢ ܕܬܗܘܐ ܠܟܘܢ ܣܗܕܘܬܐ܂
09:06	ܘܟܕ ܢܦܩܘ ܗܘܘ ܫܠܝܚ̈ܘܗܝ ܡܬܟܪܟܝܢ ܗܘܘ ܒܩܘܪܝܐ ܘܒܡܕܝܢܬܐ ܘܡܣܒܪܝܢ ܗܘܘ ܘܡܐܣܝܢ ܒܟܘܠ ܕܘܟܐ܀
09:07	ܘܫܡܥ ܗܪܘܕܣ ܛܝܛܪܟܐ ܟܘܠܗܝܢ ܗܠܝܢ ܕܗܘܝ ܘܡܬܕܡܪ ܗܘܐ ܡܛܠ ܕܐܡܪܝܢ ܗܘܘ ܕܝܘܚܢܢ ܩܡ ܡܢ ܒܝܬ ܡ̈ܝܬܐ
09:08	ܐܚܪܢܐ ܕܝܢ ܐܡܪܝܢ ܕܐܠܝܐ ܐܬܚܙܝ ܘܐܚܪܢܐ ܐܡܪܝܢ ܕܚܕ ܡܢ ܢܒ̈ܝܐ ܩܕܡܝܐ ܩܡ
09:09	ܘܐܡܪ ܗܪܘܕܣ ܪܫܗ ܕܝܘܚܢܢ ܐܢܐ ܦܣܩܬ ܡܢܘ ܗܢܐ ܕܗܠܝܢ ܫܡܥܢܐ ܥܠܘܗܝ ܘܨܒܐ ܗܘܐ ܕܢܚܙܝܘܗܝ
09:10	ܘܗܦܟܘ ܗܢܘܢ ܫܠܝܚ̈ܐ ܘܐܫܬܥܝܘ ܠܗ ܟܘܠ ܡܕܡ ܕܥܒܕܘ ܘܕܒܪ ܐܢܘܢ ܒܠܚܘܕܝܗܘܢ ܘܐܙܠ ܠܬܪܥܐ ܕܡܕܝܢܬܐ ܕܡܬܩܪܝܐ ܒܝܬ ܨܝܕܐ
09:11	ܘܟܕ ܝܕܥܘ ܟܢܫܐ ܐܙܠܘ ܒܬܪܗ ܘܩܒܠ ܐܢܘܢ ܘܡܡܠܠ ܗܘܐ ܥܠ ܡܠܟܘܬܐ ܕܐܠܗܐ ܘܠܐܝܠܝܢ ܕܣܢܝܩܝܢ ܗܘܘ ܐܣܝܘܬܐ ܡܐܣܐ ܗܘܐ ܠܗܘܢ
09:12	ܘܩܪܝܒ ܗܘܐ ܝܘܡܐ ܠܡܥܪܒ ܩܪܒܘ ܬܪܥܣܪܬܗ ܘܐܡܪܝܢ ܠܗ ܒܡܕܒܪܐ ܐܢܚܢܢ ܫܪܝ ܟܢܫܐ ܗܠܝܢ ܕܢܐܙܠܘܢ ܠܩܘܪ̈ܝܐ ܗܠܝܢ ܕܚܕܪܝܢ ܘܠܟܦܪ̈ܘܢܐ ܕܢܫܪܘܢ ܐܘ ܕܢܫܟܚܘܢ ܠܗܘܢ ܣܝܒܪܬܐ
09:13	ܐܡܪ ܠܗܘܢ ܗܘ ܗܒܘ ܠܗܘܢ ܐܢܬܘܢ ܠܡܠܥܣ ܐܡܪܝܢ ܠܗ ܠܝܬ ܠܢ ܝܬܝܪ ܡܢ ܚܡܫܐ ܠܚܡܝܢ ܘܬܪ̈ܝܢ ܢܘ̈ܢܝܢ ܐܠܐ ܐܢ ܕܢܐܙܠ ܢܙܒܢ ܐܢܚܢܢ ܣܝܒܪܬܐ ܠܗܢܐ ܟܢܫܐ ܟܘܠܗ
09:14	ܗܘܝܢ ܓܝܪ ܚܡܫܐ ܐܠܦܝܢ ܓܒܪܝܢ ܐܡܪ ܠܬܠܡܝܕܘܗܝ ܐܣܡܟܘ ܐܢܬܘܢ ܐܢܘܢ ܚܡܫܝܢ ܚܡܫܝܢ ܐܢܫ ܒܣܡܟܐ
09:15	ܘܥܒܕܘ ܗܟܘܬ ܘܐܣܡܟܘ ܟܘܠܗܘܢ
09:16	ܘܢܣܒ ܗܘ ܠܗܢܘܢ ܚܡܫܐ ܠܚܡܝܢ ܘܗܢܘܢ ܢܘܢܝܢ ܘܚܪ ܒܫܡܝܐ ܘܒܪܟ ܥܠܘܗܝ ܘܩܨܐ ܘܝܗܒ ܠܬܠܡܝܕܘܗܝ ܕܢܣܝܡܘܢ ܠܟܢܫܐ
09:17	ܘܐܟܠܘ ܟܠܗܘܢ ܘܫܩܠܘ ܡܢ ܡܕܡ ܕܐܘܬܪܘ ܩ̈ܨܝܐ ܡܠܐ ܬܪܥܣܪ ܩܘܦܝܢܝܢ
09:18	ܘܟܕ ܡܨܠܐ ܗܘܐ ܒܠܚܘܕܘܗܝ ܘܬܠܡܝܕܘܗܝ ܥܡܗ ܫܐܠ ܐܢܘܢ ܘܐܡܪ ܡܢܐ ܐܡܪܝܢ ܟܢܫܐ ܥܠܝ ܕܐܝܬܝ
09:19	ܘܐܡܪܝܢ ܠܗ ܐܝܬ ܕܐܡܪܝܢ ܕܝܘܚܢܢ ܗܘ ‍{‍ܒ‍}‍‍<‍ܡ‍>‍ܥܡܕܢܐ ܐܚܪܢܐ ܐܡܪܝܢ ܕܐܠܝܐ ܗܘ
09:20	ܐܡܪ ܠܗܘܢ ܡܢܐ ܐܢܬܘܢ ܐܡܪܝܢ ܕܐܝܬܝ ܥܢܐ ܫܡܥܘܢ ܟܐܦܐ ܘܐܡܪ ܠܗ ܐܢܬ ܗܘ ܡܫܝܚܐ
09:21	ܘܟܐܐ ܒܗܘܢ ܘܦܩܕ ܐܢܘܢ ܕܗܕܐ ܠܐܢܫ ܠܐ ܢܐܡܪܘܢ
09:22	ܘܐܡܪ ܕܥܬܝܕ ܗܘ ܠܗ ܠܒܪܗ ܕܐܢܫܐ ܕܣܓܝ ܢܚܫ ܘܢܣܬܠܐ ܡܢ ܩܫܝܫܐ ܘܟܗܢܐ ܘܣܦܪܐ ܘܕܢܬܩܛܠ ܘܒܬܠܬܐ ܝܘܡܝܢ ܢܩܘܡ
09:23	ܘܐܡܪ ܗܘܐ ܟܠ ܡܢ ܕܨܒܐ ܕܢܐܬܐ ܒܐܬܪܝ ܢܟܦܘܪ ܒܢܦܫܗ ܘܢܫܩܠ ܙܩܝܦܗ ܘܢܐܬܐ ܒܬܪܝ
09:24	ܡܢ ܕܨܒܐ ܓܝܪ ܕܢܚܐ ܢܦܫܗ ܢܘܒܕܝܗ ܘܡܢ ܕܢܘܒܕ ܢܦܫܗ ܡܛܠܬܝ ܢܚܝܗ
09:25	ܡܢܐ ܓܝܪ ܢܐܬܪ ܒܪ ܐܢܫܐ ܐܢ ܥܠܡܐ ܟܠܗ ܢܩܢܐ ܘܢܦܫܗ ܢܚܣܪ ܘܢܘܒܕ
09:26	ܕܡܢ ܕܢܒܗܬ ܒܝ ܘܒܡܠܝ ܩܕܡ ܒܢܝ ܢܫܐ ܢܒܗܬ ܒܗ ܒܪܗ ܕܓܒܪܐ ܡܐ ܕܐܬܐ ܒܬܫܒܘܚܬܐ ܥܡ ܡܠܐܟܐ ܩܕܝܫܐ
09:27	ܐܡܪܢܐ ܠܟܘܢ ܕܝܢ ܫܪܝܪܐܝܬ ܕܐܝܬ ܐܢܫܐ ܕܩܝܡܝܢ ܗܪܟܐ ܕܠܐ ܢܛܥܡܘܢ ܡܘܬܐ ܥܕܡܐ ܕܢܚܙܘܢ ܡܠܟܘܬܗ ܕܐܠܗܐ܀
09:28	ܘܗܘܐ ܒܬܪ ܡܠܐ ܗܠܝܢ ܐܝܟ ܬܡܢܝܐ ܝܘܡܝܢ ܘܕܒܪ ܠܟܐܦܐ ܘܠܝܥܩܘܒ ܘܠܝܘܚܢܢ ܘܣܠܩ ܠܛܘܪܐ ܠܡܨܠܝܘ
09:29	ܘܟܕ ܡܨܠܐ ܐܫܬܚܠܦ ܚܙܘܐ ܕܐܦܘ̈ܗܝ ܘܢܚ̈ܬܘܗܝ ܚܘܪ̈ܝܢ ܘܡܒܪܩܝܢ ܗܘܘ܂
09:30	ܘܗܐ ܬܪ̈ܝܢ ܓܒܪ̈ܝܢ ܡܡܠܠܝܢ ܥܡܗ ܡܘܫܐ ܘܐܠܝܐ
09:31	ܘܐܬܚܙܝܘ ܒܫܘܒܚܐ ܘܐܡܪ̈ܝܢ ܗܘܘ ܥܠ ܥܘܢܕܢܗ ܕܥܬܝܕ ܗܘܐ ܕܢܫܬܠܡ ܒܐܘܪܫܠܡ
09:32	ܘܟܐܦܐ ܘܗܢܘܢ ܕܥܡܗ܂ ܝܩܝܪܘ ܗܘܘ ܠܗܘܢ ܒܫܢܬܐ ܘܟܕ ܐܬܥܝܪܘ ܚܙܘ ܬܫܒܘܚܬܗ ܘܠܗܢܘܢ ܬܪܝܢ ܐܢܫ̈ܝܢ ܕܩܝܡܝܢ ܗܘܘ ܠܘܬܗ
09:33	ܘܟܕ ܫܪܝܘ ܠܡܦܪܫ ܡܢܗ ܐܡܪ ܟܐܦܐ܂ ܠܝܫܘܥ ܪܒܢ ܫܦܝܪ ܕܢܗܘܐ ܗܪܟܐ ܘܢܥܒܕ ܬ̈ܠܬ ܡ̈ܛܠܝܢ ܠܟ ܚܕܐ܂ ܘܠܡܘܫܐ ܚܕܐ܂ ܘܠܐܠܝܐ ܚܕܐ ܘܠܐ ܝܕܥ ܗܘܐ ܡܢܐ ܐܡܪ ܗܘܐ
09:34	ܘܟܕ ܐܡܪ ܗܠܝܢ ܗܘܬ ܥܢܢܐ ܘܛܠܠܬ ܥܠܝܗܘܢ ܘܟܕ ܚܙܘ ܠܗܠܝܢ ܕܥܠܝܢ ܒܥܢܢܐ ܕܚܠܘ
09:35	ܘܩܠܐ ܐܫܬܡܥ ܡܢ ܥܢܢܐ܂ ܕܗܢܘ ܒܪܝ ܓܒܝܐ ܠܗ ܫܡܥܘ
09:36	ܘܟܕ ܗܘܐ ܩܠܐ ܐܫܬܟܚ ܝܫܘܥ ܒܠܚܘܕܘܗܝ ܘܗܢܘܢ ܫܬܩܘ ܘܠܥܝܢ ܐܢܫ ܠܐ ܐܡܪܘ ܡܕܡ ܕܚܙܘ ܒܗܢܘܢ ܝܘܡܬܐ܀
09:37	ܘܒܗܘ ܝܘܡܐ ܟܕ ܢܚܬܝܢ ܡܢ ܛܘܪܐ ܦܓܥ ܒܗܘܢ ܟܢܫܐ ܣܓܝܐܐ܂
09:38	ܘܓܒܪܐ ܚܕ ܡܢ ܟܢܫܐ ܗܘ܂ ܩܥܐ ܘܐܡܪ ܡܠܦܢܐ܂ ܒܥܢܐ ܡܢܟ ܐܬܦܢܐ ܥܠܝ ܒܪܝ ܕܝܚܝܕܝܐ ܗܘ ܠܝ܂
09:39	ܘܪܘܚܐ ܗܘܝܐ ܠܗ ܡܢ ܬܚܝܬ ܫܠܝܐ ܘܪܡܝܐ ܠܗ ܘܡܥܣܐ ܠܗ ܘܡܪܥܬ ܘܠܡܚܣܢ ܦܪܩܐ ܡܢܗ ܡܐ ܕܫܚܩܬܗ
09:40	ܘܒܥܝܬ ܡܢ ܬܠܡܝܕܝܟ ܕܢܦܩܘܢܗ ܘܠܐ ܐܫܟܚܘ ܠܡܥܕܪܘܬܗ
09:41	ܥܢܐ ܝܫܘܥ ܘܐܡܪ ܐܘܢ ܫܪܒܬܐ ܡܥܩܠܬܐ ܕܠܐ ܡܗܝܡܢܐ ܥܕܡܐ ܠܐܡܬܝ ܐܗܘܐ ܠܘܬܟܘܢ ܘܐܣܝܒܪܟܘܢ ܩܪܒܝܗܝ ܠܟܐ ܠܒܪܟ
09:42	ܘܟܕ ܡܩܪܒ ܠܗ ܐܪܡܝܗ ܫܐܕܐ ܗܘ ܘܡܥܣ ܗܘܐ ܠܗ ܘܟܐܐ ܒܗ ܝܫܘܥ ܒܪܘܚܐ ܗܝ ܛܢܦܬܐ ܘܐܣܝܗ ܠܛܠܝܐ ܘܐܫܠܡܗ ܠܐܒܘܗܝ
09:43	ܘܐܬܕܡܪܘ ܟܠܗܘܢ ܥܠ ܪܒܘܬܗ ܕܐܠܗܐ ܘܟܕ ܟܘܠ ܐܢܫ ܡܬܕܡܪ ܗܘܐ ܥܠ ܟܘܠ ܕܥܒܕ ܗܘܐ ܐܡܪ ܠܬܠܡܝܕܘܗܝ
09:44	ܣܡܘ ܐܢܬܘܢ ܡܠܐ ܗܠܝܢ ܒܐܕ̈ܢܝܟܘܢ܂ ܒܪܗ ܓܝܪ ܕܐܢܫܐ ܥܬܝܕ ܗܘ ܕܢܫܬܠܡ ܒܐܝܕܝ ܒܢܝ ܐܢܫܐ
09:45	ܘܗܢܘܢ ܠܐ ܡܫܬܘܕܥܝܢ ܗܘܘ ܠܗ ܠܡܠܬܐ ܗܕܐ ܡܛܠ ܕܟܣܐ ܗܘܬ ܡܢܗܘܢ ܕܠܐ ܢܫܬܘܕܥܘܢܗ ܘܗܢܘܢ ܕܚܠܝܢ ܗܘܘ ܕܢܫܐܠܘܢܗ ܥܠܝܗ ܥܠ ܡܠܬܐ ܗܕܐ
09:46	ܘܥܠܬ ܗܘܬ ܒܗܘܢ ܡܚܫܒܬܐ ܕܡܢܘ ܢܗܘܐ ܪܒ ܒܗܘܢ܂
09:47	ܝܫܘܥ ܕܝܢ ܟܕ ܝܕܥ ܡܚܫܒܬܐ ܕܠܒܗܘܢ ܐܚܕ ܛܠܝܐ ܘܐܩܝܡܗ ܠܘܬܗܘܢ
09:48	ܘܐܡܪ ܡܢ ܕܡܩܒܠ ܛܠܝܐ ܗܢܐ ܒܫܡܝ ܠܝ ܗܘ ܡܩܒܠ ܘܡܢ ܕܠܝ ܡܩܒܠ ܠܡܢ ܕܫܕܪܢܝ ܡܩܒܠ܂ ܐܝܢܐ ܓܝܪ ܕܙܥܘܪ ܘܛܠܝܐ ܠܟܘܢ ܗܢܐ ܪܒ ܗܘ
09:49	ܥܢܐ ܝܘܚܢܢ ܘܐܡܪ ܠܗ ܪܒܢ ܚܙܝܢ ܚܕ ܕܡܦܩ ܫܐ̈ܕܐ ܒܫܡܟ ܘܟܠܝܢܝܗܝ ܡܛܠ ܕܠܐ ܐܬܐ ܥܡܢ
09:50	ܐܡܪ ܠܗܘܢ ܝܫܘܥ ܠܐ ܬܟܠܘܢ ܡܢ ܕܠܐ ܗܘܐ ܓܝܪ ܠܩܒܠܟܘܢ ܚܠܦܝܟܘܢ ܗܘ܀
09:51	ܘܟܕ ܡܬܡܠܝܢ ܗܘܘ ܝܘܡܬܐ ܕܡܣܩܢܗ ܐܬܩܢ ܦܪܨܘܦܗ ܕܢܙܠ ܠܐܘܪܫܠܡ
09:52	ܘܫܕܪ ܗܘܐ ܡܠܐܟܐ ܩܕܡ ܐܦܘܗܝ ܘܐܙܠܘ ܘܥܠܘ ܠܩܪܝܬܐ ܕܫܡܪ̈ܝܐ ܕܢܬܩܢܘܢ ܠܗ܂
09:53	ܘܠܐ ܩܒܠܘܗܝ ܡܛܠ ܕܦܪܨܘܦܗ ܠܐܘܪܫܠܡ ܣܝܡ ܗܘܐ ܠܡܐܙܠ
09:54	ܘܟܕ ܕܝܢ ܚܙܘ ܬܠܡܝܕܘܗܝ ܝܥܩܘܒ ܘܝܘܚܢܢ ܐܡܪܘ ܠܗ ܡܪܢ ܨܒܐ ܐܢܬ ܕܢܐܡܪ ܕܬܚܘܬ ܢܘܪܐ ܡܢ ܫܡܝܐ ܘܬܣܝܦ ܐܢܘܢ
09:55	ܘܟܐܐ ܒܗܘܢ
09:56	ܘܐܙܠܘ ܠܗܘܢ ܠܩܪܝܬܐ ܐܚܪܬܐ
09:57	ܘܟܕ ܐܙܠܝܢ ܒܐܘܪܚܐ ܐܡܪ ܠܗ ܐܢܫ ܐܬܐ ܒܬܪܟ ܠܐܬܪ ܕܐܙܠ ܐܢܬ
09:58	ܐܡܪ ܠܗ ܝܫܘܥ ܕܐܢ ܠܬܥܠܐ ܢܩܥܐ ܐܝܬ ܠܗܘܢ ܘܠܦܪܚܬܐ ܕܫܡܝܐ ܩܢܐ ܘܠܒܪܗ ܕܐܢܫܐ ܠܝܬ ܠܗ ܐܬܪ ܕܢܣܡܘܟ ܪܫܗ
09:59	ܘܐܡܪ ܠܐܚܪܢܐ ܐܬܐ ܒܬܪܝ܂ ܐܡܪ ܠܗ ܐܦܣ ܠܝ ܠܘܩܕܡ ܐܙܠ ܐܩܒܘܪ ܠܐܒܝ
09:60	ܐܡܪ ܠܗ ܫܒܘܩ ܡܝ̈ܬܐ ܩܒܪ̈ܝܢ ܡܝܬܝ̈ܗܘܢ ܘܐܢܬ ܙܠ ܣܒܪ ܡܠܟܘܬܗ ܕܐܠܗܐ
09:61	ܐܡܪ ܠܗ ܐܚܪܢܐ ܐܬܐ ܒܬܪܟ ܡܪܝ܂ ܠܘܩܕܡ ܕܝܢ ܐܦܣ ܠܝ ܐܙܠ ܐܚܘܐ ܠܒ̈ܢܝ ܒܝܬܝ ܘܐܬܐ
09:62	ܐܡܪ ܠܗ ܝܫܘܥ ܠܐ ܐܢܫ ܪܡܐ ܐܝܕܗ ܥܠ ܚܪܒܐ ܕܦܕܢܐ ܘܚܐܪ ܠܒܣܬܪܗ ܘܗܘܐ ܚܫܚ ܠܡܠܟܘܬܗ ܕܐܠܗܐ܀
10:01	ܘܡܢ ܒܬܪ ܗܠܝܢ ܦܪܫ ܡܢ ܬܠܡܝܕܘܗܝ ܐܚܪ̈ܢܐ ܫܒܥܝܢ ܘܬܪܝܢ ܘܫܕܪ ܐܢܘܢ ܬܪܝܢ ܬܪܝܢ ܩܕܡ ܐܦܘܗܝ ܠܟܠ ܐܬܪ ܘܡܕܝܢܐ ܕܥܬܝܕ ܗܘܐ ܠܡܐܙܠ
10:02	ܐܡܪ ܠܗܘܢ ܚܨܕܐ ܣܓܝ ܘܦܥܠܐ ܙܥܘܪܝܢ ܒܥܘ ܡܢ ‍{‍ܒ‍}‍‍<‍ܡ‍>‍ܪܗ ܕܚܨܕܐ ܐܝܟ ܕܢܦܩ ܦܥܠܐ ܠܚܨܕܗ
10:03	ܐܙܠܘ ܗܐ ܐܢܐ ܡܫܕܪܢܐ ܠܟܘܢ ܐܝܟ ܐܡܪ̈ܐ ܒܝܢܝ ܕܐܒܐ
10:04	ܠܐ ܬܫܩܠܘܢ ܠܟܘܢ ܟܝܣ̈ܐ ܘܠܐ ܬܪܡܠܐ ܘܠܐ ܡܣܢܐ ܘܒܫܠܡܐ ܕܒܢܝ ܐܢܫܐ ܒܐܘܪܚܐ ܠܐ ܬܫܐܠܘܢ
10:05	ܘܠܐܝܢܐ ܒܝܬܐ ܩܕܡܝܐ ܕܥܠܝܢ ܐܢܬܘܢ ܠܗ ܗܘܝܬܘܢ ܐܡܪܝܢ ܫܠܡܐ ܒܒܝܬܐ
10:06	ܐܢ ܐܝܬ ܬܡܢ ܒܪ ܫܠܡܐ ܢܬܢܝܚ ܥܠܘܗܝ ܫܠܡܟܘܢ ܐܢ ܕܠܐ ܐܝܬ ܥܠܝܟܘܢ ܢܗܦܘܟ
10:07	ܘܒܗ ܒܒܝܬܐ ܗܘܝܬܘܢ ܠܥܣܝܢ ܘܫܬܝܢ ܡܢ ܕܝܠܗܘܢ ܫܘܐ ܗܘ ܓܝܕ ܦܥܠܐ ܐܓܪܗ ܘܠܐ ܬܫܢܘܢ ܡܢ ܒܝܬܐ ܠܚܒܪܗ
10:08	ܘܠܐܝܕܐ ܡܕܝܢܬܐ ܕܥܠܝܢ ܐܢܬܘܢ ܘܡܩܒܠܝܢ ܠܟܘܢ ܠܥܣܘ ܟܘܠ ܡܕܡ ܕܡܬܣܝܡ ܩܕܡܝܟܘܢ
10:09	ܘܐܣܘ ܡܪܥܐ ܕܐܝܬ ܒܗ ܘܗܘܝܬܘܢ ܐܡܪܝܢ ܕܩܪܒܬ ܥܠܝܟܘܢ ܡܠܟܘܬܗ ܕܐܠܗܐ
10:10	ܠܐܝܕܐ ܡܕܝܢܬܐ ܕܥܠܝܢ ܐܢܬܘܢ ܠܗ ܘܠܐ ܢܩܒܠܘܢܟܘܢ ܒܗ ܦܘܩܘ ܒܫܘܩܝܗܘܢ ܘܐܡܪܘ
10:11	ܕܗܐ ܐܦ ܚܠܐ ܕܕܒܩ ܒܪ̈ܓܠܝܢ ܢܦܨܝܢ ܐܢܚܢܢ ܠܗ ܒܪܡ ܕܝܢ ܗܕܐ ܕܥܘ ܕܩܪܒܬ ܠܗ ܡܠܟܘܬܐ ܕܐܠܗܐ
10:12	ܐܡܪܢܐ ܠܟܘܢ ܕܠܣܕܘܡ ܢܗܘܐ ܦܫܝܚ ܒܝܘܡܐ ܕܕܝܢܐ ܛܒ ܡܢ ܕܠܡܕܝܢܬܐ ܗܝ܂
10:13	ܘܝ ܠܟܝ ܟܘܪܙܝܢ ܘܝ ܠܟܝ ܒܝܬ ܨܝܕܐ ܕܐܠܘ ܒܨܘܪ ܘܒܨܝܕܢ ܗܘܘ ܚܝ̈ܠܐ ܕܒܟܝܢ ܗܘܘ ܟܒܪ ܕܝܢ ܒܣ̈ܩܐ ܘܒܩܛܡܐ ܬܒܘ
10:14	ܒܪܡ ܠܨܘܪ ܘܠܨܝܕܢ ܢܗܘܐ ܦܫܝܚ ܒܝܘܡܐ ܗܘ ܝܬܝܪ ܡܢ ܕܠܟܝܢ
10:15	ܘܐܢܬܝ ܟܦܪܢܚܡ ܠܐ ܥܕܡܐ ܠܫܡܝܐ ܬܬܪܝܡܝܢ ܥܕܡܐ ܠܫܝܘܠ ܬܚܬܝܢ
10:16	ܡܢ ܕܫܡܥ ܠܟܘܢ ܠܝ ܗܘ ܫܡܥ ܘܡܢ ܕܠܟܘܢ ܓܠܙ ܠܡܢ ܕܫܕܪܢܝ ܓܠܙ ܘܡܢ ܕܠܝ ܫܡܥ ܠܡܢ ܕܫܕܪܢܝ ܫܡܥ
10:17	ܘܗܦܟܘ ܗܘܘ ܗܢܘܢ ܫܘܒܥܝܢ ܘܬܪܝܢ ܕܫܕܪ ܒܚܕܘܬܐ ܐܡܪܝܢ ܡܪܢ ܐܦ ܫܐܕܐ ܡܫܬܥܒܕܝܢ ܠܢ ܒܫܡܟ
10:18	ܐܡܪ ܠܗܘܢ ܚܙܐ ܗܘܝܬ ܠܣܛܢܐ ܕܢܦܠ ܐܝܟ ܒܪܩܐ ܡܢ ܫܡܝܐ
10:19	ܗܐ ܝܗܒܢܐ ܠܟܘܢ ܫܘܠܛܢܐ ܕܬܗܘܘܢ ܕܝܫܝܢ ܚܘܘ̈ܬܐ ܘܥܩܪ̈ܒܐ ܘܐܦ ܚܝܠܗ ܕܒܥܠܕܒܒܐ ܘܡܕܡ ܠܐ ܢܗܪܟܘܢ
10:20	ܒܪܡ ܕܝܢ ܒܗܕܐ ܠܐ ܬܚܕܘܢ ܕܫܐܕܐ ܡܫܬܥܒܕܝܢ ܠܟܘܢ ܐܠܐ ܚܕܘ ܒܫܡܗܝܟܘܢ ܕܐܬܟܬܒܘ ܒܫܡܝܐ
10:21	ܘܒܗ ܒܫܥܬܐ ܐܪܘܙ ܒܪܘܚܐ ܕܩܘܕܫܐ ܘܐܡܪ ܡܘܕܐ ܐܢܐ ܠܟ ܐܒܐ ܡܪܗ ܕܫܡܝܐ ܘܕܐܪܥܐ ܕܟܣܝܬ ܗܠܝܢ ܡܢ ܚܟܝܡܐ ܘܡܢ ܣܟܘܠܬܢܐ ܘܓܠܝܬ ܐܢܝܢ ܠܛܠܝܐ ܐܝܢ ܐܒܝ ܕܗܟܢܐ ܗܘܐ ܨܒܝܢܐ ܩܕܡܝܟ
10:22	ܟܘܠ ܡܕܡ ܐܫܬܠܡ ܠܝ ܡܢ ܐܒܐ ܘܡܢܘ ܝܕܥ ܠܒܪܐ ܐܠܐ ܐܒܐ ܘܡܢܘ ܝܕܥ ܠܐܒܐ ܐܠܐ ܐܢ ܒܪܐ ܘܠܡܢ ܕܢܨܒܐ ܒܪܐ ܕܢܓܠܐ ܠܗ܂
10:23	ܘܐܬܦܢܝ ܠܘܬ ܬܠܡ̈ܝܕܘܗܝ ܘܐܡܪ ܠܗܘܢ ܛܘܒܝܗ̈ܝܢ ܠܥܝ̈ܢܐ ܕܚܙܝܢ ܡܐ ܕܚܙܝܢ ܐܢܬܘܢ
10:24	ܐܡܪܢܐ ܠܟܘܢ ܓܝܪ ܕܣ̈ܓܝܐܐ ܢܒ̈ܝܐ ܘܡ̈ܠܟܐ ܨܒܘ ܕܢܚܙܘܢ ܡܕܡ ܕܚܙܝܢ ܐܢܬܘܢ ܘܠܐ ܚܙܘ ܘܠܡܫܡܥ ܡܕܡ ܕܐܢܬܘܢ ܫܡܥܝܢ ܘܠܐ ܫܡܥܘ܂
10:25	ܟܕ ܐܡܪ ܗܠܝܢ܂ ܩܪܒ ܡܠܦ ܢܡܘܣܐ ܚܕ ܕܩܐܡ ܗܘܐ ܕܢܢܣܝܘܗܝ ܐܡܪ ܠܗ ܡܠܦܢܐ ܡܢܐ ܐܥܒܕ ܕܐܪܬ ܚܝܐ ܕܠܥܠܡ
10:26	ܐܡܪ ܠܗ ܝܫܘܥ ܒܢܡܘܣܐ ܐܝܟܢܐ ܟܬܝܒ ܘܐܝܟܢܐ ܩܪܐ ܐܢܬ
10:27	ܗܘ ܕܝܢ ܥܢܐ ܘܐܡܪ ܠܗ ܕܬܪܚܡ ܠܡܪܝܐ ܐܠܗܟ ܡܢ ܟܘܠܗ ܠܒܟ ܘܡܢ ܟܘܠܗ ܢܦܫܟ ܘܡܢ ܟܠܗ ܚܝܠܟ ܘܡܢ ܟܠܗ ܪܥܝܢܟ ܘܠܩܪܝܒܟ ܐܝܟ ܢܦܫܟ
10:28	ܐܡܪ ܠܗ ܝܫܘܥ ܬܪܝܨܐܝܬ ܐܡܪܬ ܗܠܝܢ ܥܒܕ ܘܚܝܐ ܐܢܬ
10:29	ܗܘ ܕܝܢ ܨܒܐ ܗܘܐ ܠܡܙܕܩܘ ܢܦܫܗ ܐܡܪ ܠܝܫܘܥ ܘܡܢܘ ܩܪܝܒܝ
10:30	ܐܡܪ ܠܗ ܓܒܪܐ ܚܕ ܢܚܬ ܗܘܐ ܡܢ ܐܘܪܫܠܡ ܠܐܝܪܝܚܘ ܘܢܦܠܘ ܓܝܣܐ ܘܐܫܠܚܘܗܝ ܘܡܚܘܘܗܝ ܘܫܒܩܘܗܝ ܒܝܬ ܡܝܬ ܠܚܝ ܘܐܙܠܘ ܠܗܘܢ
10:31	ܘܓܕܫ ܟܗܢܐ ܚܕ ܢܚܬ ܒܐܘܪܚܐ ܗܝ ܘܚܙܝܗܝ ܘܥܒܪܗ
10:32	ܘܗܟܢܐ ܐܦ ܠܘܝܐ ܟܕ ܡܛܐ ܗܝ ܕܘܟܬܐ ܚܙܝܗܝ ܘܥܒܪܗ
10:33	ܫܡܪܝܐ ܕܝܢ ܚܕ ܟܕ ܪܕܐ ܗܘܐ ܒܐܘܪܚܗ ܡܛܝ ܠܘܬܗ ܚܙܝܗܝ ܘܐܬܪܚܡ ܥܠܘܗܝ
10:34	ܘܩܪܒ ܥܨܒ ܡܚܐܘ̈ܬܗ܂ ܘܐܪܡܝ ܥܠܝܗܝܢ ܡܫܚܐ ܘܚܡܪܐ ܘܐܪܟܒܗ ܥܠ ܚܡܪܗ ܘܐܝܬܝܗ ܠܦܘܬܩܐ܂ ܘܬܪܣܝܗ
10:35	ܘܠܨܦܪܗ ܕܝܘܡܐ ܐܦܩ ܬܪ̈ܝܢ ܕܝܢܪ̈ܝܢ ܘܝܗܒ ܠܦܘܬܩܝܐ ܘܐܡܪ ܬܪܣܝܗܝ ܘܡܐ ܕܗܦܟܬ ܬܘܒ ܡܕܡ ܕܢܦܩ ܠܟ ܥܠܘܗܝ ܦܪܥ ܐܢܐ ܠܟ
10:36	ܡܢܘ ܡܢ ܗܠܝܢ ܬܠܬܐ ܡܬܚܙܐ ܠܟ ܕܗܘܐ ܩܪܝܒܗ ܕܗܘ ܕܢܦܠ ܒܐܝܕܝ ܓܝܣܐ܂
10:37	ܐܡܪ ܠܗ ܗܘ ܕܐܬܪܚܡ ܥܠܘܗܝ ܐܡܪ ܠܗ ܝܫܘܥ ܙܠ ܘܐܦ ܐܢܬ ܗܟܢܐ ܗܘܝܬ ܥܒܕ܀
10:38	ܘܟܕ ܐܙܠܝܢ ܗܘܘ ܒܐܘܪܚܐ ܥܠ ܠܩܪܝܬܐ ܚܕܐ ܘܐܢܬܬܐ ܚܕܐ ܕܫܡܗ ܡܪܬܐ ܩܒܠܬܗ ܒܒܝܬܗ
10:39	ܘܐܝܬ ܗܘܬ ܠܗ ܚܬܐ ܕܫܡܗ ܡܪܝܡ ܘܐܬܬ ܝܬܒܬ ܠܘܬ ܪܓܠܘܗܝ ܕܝܫܘܥ ܘܫܡܥܐ ܗܘܬ ܡܠܬܗ
10:40	ܡܪܬܐ ܕܝܢ ܥܢܝܐ ܗܘܬ ܒܬܫܡܫܬܐ ܘܐܬܬ ܐܡܪܐ ܠܗ ܡܪܝ ܠܐ ܒܛܝܠ ܠܟ ܥܠܝ ܕܚܬܝ ܫܒܩܬܢܝ ܒܠܚܘܕܝ ܠܡܫܡܫܘ ܐܡܪ ܠܗ ܡܥܕܪܐ ܠܝ
10:41	ܥܢܐ ܝܫܘܥ܂ ܘܐܡܪ ܠܗ ܡܪܬܐ ܡܪܬܐ
10:42	ܡܪܝܡ ܡܢܬܐ ܛܒܬܐ ܓܒܬ ܠܗ ܕܠܐ ܬܫܬܩܠ ܡܢܗ
11:01	ܘܟܕ ܡܨܠܐ ܗܘܐ ܒܕܘܟܬܐ ܒܬܪ ܕܦܪܩ ܡܢ ܨܠܘܬܗ ܐܡܪ ܠܗ ܚܕ ܡܢ ܬܠܡܝܕܘܗܝ ܡܪܢ ܐܠܦܝܢ ܠܡܨܠܝܘ ܐܝܟܢܐ ܕܝܘܚܢܢ ܐܠܦ ܠܬܠܡܝܕܘܗܝ
11:02	ܘܐܡܪ ܠܗܘܢ ܐܡܬܝ ܕܡܨ̈ܠܝܢ ܐܢܬܘܢ ܗܘܝܬܘܢ ܐܡܪܝܢ ܐܒܐ ܢܬܩܕܫ ܫܡܟ ܘܬܐܬܐ ܡܠܟܘܬܟ
11:03	ܘܗܒ ܠܢ ܠܚܡܐ ܐܡܝܢܐ ܕܟܠܝܘܡ
11:04	ܘܫܒܩ ܠܢ ܚܛܗܝܢ ܘܐܦ ܐܢܚܢܢ ܫܒܩܝܢ ܐܢܚܢܢ ܠܟܠ ܕܚܝܒ ܠܢ ܘܠܐ ܬܥܠܢ ܠܢܣܝܘܢܐ
11:05	ܘܐܡܪ ܠܗܘܢ ܝܫܘܥ ܡܢܘ ܡܢܟܘܢ ܕܐܝܬ ܠܗ ܪܚܡܐ ܘܢܐܙܠ ܠܘܬܗ ܒܦܠܓܘܬ ܠܠܝܐ ܘܢܐܡܪ ܠܗ ܪܚܡܝ ܐܫܐܠܝܢܝ ܬܠܬ ܓܪܝܨܢ܂
11:06	ܡܛܠ ܕܪܚܡܐ ܥܕܝ ܠܝ ܡܢ ܐܘܪܚܐ ܘܠܝܬ ܠܝ ܡܕܡ ܕܐܣܝܡ ܩܕܡܘܗܝ
11:07	ܘܗܘ ܢܥܢܐ ܡܢ ܠܓܘ ܘܢܐܡܪ ܠܗ ܠܐ ܬܗܪܢܝ ܡܛܘܠ ܕܬܪܥܐ ܐܚܝܕ ܗܘ ܘܛܠܝ̈ܐ ܥܡܝ ܒܥܪܣܐ ܠܐ ܡܫܟܚ ܐܢܐ ܕܐܩܘܡ ܐܬܠ ܠܟ
11:08	ܐܡܪܢܐ ܠܟܘܢ ܕܐܢ ܡܛܠ ܪܚܡܘܬܐ ܠܐ ܢܬܠ ܠܗ ܡܛܠ ܚܨܝܦܬܐ ܢܩܘܡ ܘܢܬܠ ܠܗ܂ ܟܡܐ ܕܡܬܒܥܐ ܠܗ
11:09	ܘܐܦ ܐܢܐ ܐܡܪܢܐ ܠܟܘܢ ܫܐܠܘ ܘܢܬܝܗܒ ܠܟܘܢ ܒܥܘ ܘܬܫܟܚܘܢ ܩܘܫܘ ܘܢܬܦܬܚ ܠܟܘܢ
11:10	ܟܘܠ ܐܢܫ ܓܝܪ ܕܫܐܠ ܢܣܒ ܘܟܘܠ ܕܒܥܐ ܡܫܟܚ ܘܟܠ ܕܡܩܫ ܡܬܦܬܚ ܠܗ܂
11:11	ܐܝܢܐ ܕܝܢ ܡܢܟܘܢ ܕܢܫܐܠܝܘܗܝ ܒܪܗ ܢܘܢܐ ܕܠܡܐ ܚܠܦ ܢܘܢܐ ܚܘܝܐ ܝܗܒ
11:12	ܐܢ ܒܪܬܐ ܢܫܐܠܝܘܗܝ ܕܠܡܐ ܥܩܪܒܐ ܡܘܫܛ ܠܗ
11:13	ܘܐܢ ܐܢܬܘܢ ܕܒܝܫܐ ܐܢܬܘܢ ܝܕܥܝܢ ܐܢܬܘܢ ܡܘܗܒ̈ܬܐ ܛܒܬܐ ܠܡܬܠ ܠܒܢܝܟܘܢ ܟܡܐ ܝܬܝܪ ܐܒܐ ܕܒܫܡܝܐ ܕܢܬܠ ܛܒܬܐ ܠܐܝܠܝܢ ܕܫܐܠܝܢ ܠܗ܀
11:14	ܘܗܘܐ ܟܕ ܡܦܩ ܗܘܐ ܫܐܕܐ ܡܢ ܚܪܫܐ ܘܟܕ ܢܦܩ ܫܐܕܐ ܡܠܠ ܗܘ ܚܪܫܐ ܘܐܬܕܡܪܘ ܗܘܘ ܟܢܫܐ
11:15	ܘܐܢܫܝܢ ܡܢ ܦܪܝܫܐ ܐܡܪܘ ܒܒܥܠܙܒܘܒ ܪܫܐ ܕܕܝܘܐ ܫܐܕܐ ܡܦܩ
11:16	ܐܚܪܢܐ ܕܝܢ ܟܕ ܡܢܣܝܢ ܗܘܘ ܠܗ ܫܐܠܝܢ ܗܘܘ ܠܗ ܐܬܐ ܡܢ ܫܡܝܐ
11:17	ܗܘ ܕܝܢ ܟܕ ܝܕܥ ܬܪܥܝܬܗܘܢ ܐܡܪ ܠܗܘܢ ܟܘܠ ܡܠܟܘ ܕܬܬܦܠܓ ܥܠ ܢܦܫܗ ܬܚܪܒ ܘܟܘܠ ܒܝܬܐ ܕܥܠ ܒܝܬܐ ܡܬܦܠܓ ܢܦܠ ܠܗ
11:18	ܘܐܢ ܣܛܢܐ ܥܠ ܢܦܫܗ ܢܬܦܠܓ ܐܝܟܢܐ ܬܩܘܡ ܡܠܟܘܬܗ ܕܐܡܪܝܢ ܐܢܬܘܢ ܕܒܒܥܠܙܒܘܒ ܡܦܩ ܐܢܐ ܫܐܕܐ
11:19	ܘܐܢ ܒܒܥܠܙܒܘܒ ܡܦܩ ܐܢܐ ܪ̈ܘܚܐ ܛܢܦܬܐ ܡܢ ܒܢ̈ܝܟܘܢ ܒܢ̈ܝܟܘܢ ܒܡܢܐ ܡܦܩܝܢ ܠܗܘܢ ܡܛܠ ܗܢܐ ܗܢܘܢ ܢܗܘܘܢ ܠܟܘܢ ܕܝܢܐ
11:20	ܐܢ ܕܝܢ ܒܨܒܥܐ ܕܐܠܗܐ ܡܦܩ ܐܢܐ ܫܐܕܐ ܡܟܝܠ ܩܪܒܬ ܥܠܝܟܘܢ ܡܠܟܘܬܐ ܕܐܠܗܐ
11:21	ܐܡܬܝ ܕܝܢ ܕܚܣܝܢܐ ܟܕ ܡܙܝܢ ܢܛܪ ܕܪܬܗ ܒܫܝܢܐ ܗܘ ܩܢܝܢܗ
11:22	ܐܢ ܕܝܢ ܢܐܬܐ ܡܢ ܕܚܣܝܢ ܡܢܗ ܘܢܙܟܝܘܗܝ ܘܢܫܩܘܠ ܙܝܢܗ ܗܘ ܕܬܟܝܠ ܗܘܐ ܥܠܘܗܝ ܘܐܦ ܬܚܠܘܨܗ ܡܦܠܓ ܠܗ
11:23	ܡܢ ܕܠܐ ܗܘܐ ܥܡܝ ܠܘܩܒܠܝ ܗܘ ܘܡܢ ܕܠܐ ܟܢܫ ܥܡܝ ܡܒܕܪܘ ܡܒܕܪ ܠܝ
11:24	ܪܘܚܐ ܛܢܦܬܐ ܡܐ ܕܢܦܩܬ ܡܢ ܒܪ ܐܢܫܐ ܐܙܠܐ ܡܬܟܪܟܐ ܡܢ ܫܠܝܐ ܒܐܬܪܘܬܐ ܕܡܝܐ ܠܝܬ ܒܗܝܢ ܕܬܫܟܚ ܠܗ ܢܝܚܐ ܘܡܐ ܕܠܐ ܐܫܟܚܬ ܐܡܪܐ ܐܗܦܘܟ ܐܙܠ ܠܒܝܬܝ ܐܝܡܟܐ ܕܢܦܩܬ
11:25	ܡܐ ܕܐܬܬ ܐܫܟܚܬ ܕܚܡܝܡ ܘܡܨܒܬ
11:26	ܗܝܕܝܢ ܐܙܠܐ ܕܒܪܐ ܫܒܥ ܐܚܪܢܝܢ ܕܒܝܫܢ ܡܢܗ ܘܥܠܢ ܘܥܡܪܢ ܒܗ ܘܗܘܝܐ ܐܚܪܝܬܗ ܕܗܘ ܒܪ ܐܢܫܐ ܒܝܫܐ ܡܢ ܩܕܡܝܬܗ
11:27	ܘܟܕ ܐܡܪ ܗܠܝܢ ܐܢܬܬܐ ܚܕܐ ܡܢ ܓܘ ܟܢܫܐ ܒܩܠܐ ܪܡܐ ܐܡܪܬ ܠܗ ܛܘܒܝܗ ܠܟܪܣܐ ܕܫܩܠܬܟ ܘܠܬܕܝܐ ܕܐܝܢܩܘܟ
11:28	ܐܡܪ ܠܗ ܝܫܘܥ ܛܘܒܝܗܘܢ ܠܐܝܠܝܢ ܕܫܡܥܘ ܡܠܬܗ ܕܐܠܗܐ ܘܢܛܪܝܢ ܠܗ
11:29	ܘܟܕ ܡܬܟܢܫܝܢ ܗܘܘ ܟܢ̈ܫܐ ܫܪܝ ܠܡܐܡܪ ܫܪܒܬܐ ܗܕܐ ܫܪܒܬܐ ܗܝ ܒܝܫܬܐ ܐܬܐ ܒܥܝܐ܂ ܐܬܐ ܠܐ ܬܬܝܗܒ ܠܗܘܢ ܕܫܡܝܐ ܐܠܐ ܐܬܐ ܕܝܘܢܢ ܢܒܝܐ
11:30	ܐܝܟܢܐ ܓܝܪ ܕܗܘܐ ܝܘܢܢ ܐܬܐ ܠܢܝ̈ܢܘܝܐ ܗܟܢܐ ܘܐܦ ܒܪܗ ܕܐܢܫܐ ܠܫܪܒܬܐ ܗܕܐ
11:31	ܡܠܟܬܐ ܕܬܝܡܢܐ ܬܩܘܡ ܒܕܝܢܐ ܥܡ ܫܪܒܬܐ ܗܕܐ ܘܬܚܝܒ ܐܢܘܢ ܕܐܬܬ ܡܢ ܥܒܪܝܗ ܕܐܪܥܐ ܕܬܫܡܥ ܚܟܡܬܗ ܕܫܠܝܡܘܢ ܘܗܐ ܕܪܒ ܡܢ ܫܠܝܡܘܢ ܗܪܟܐ
11:32	ܓܒܪܐ ܒܢܝ ܢܝܢܘܝ ܢܩܘܡܘܢ ܒܕܝܢܐ ܥܡ ܫܪܒܬܐ ܗܕܐ ܘܢܚܝܒܘܢܗ ܕܗܢܘܢ ܬܒܘ ܒܟܪܘܙܘܬܗ ܕܝܘܢܢ ܘܗܐ ܕܪܒ ܡܢ ܝܘܢܢ ܗܪܟܐ܀
11:33	ܠܐ ܐܢܫ ܡܢܗܪ ܫܪܓܐ ܘܣܐܡ ܠܗ ܒܛܫܝܐ ܐܠܐ ܣܐܡ ܠܗ ܠܥܠ ܡܢ ܡܢܪܬܐ܂ ܕܐܝܠܝܢ ܕܥܠܝܢ ܢܚܙܘܢ ܢܘܗܪܗ
11:34	ܫܪܓܗ ܓܝܪ ܕܦܓܪܐ ܥܝܢܐ ܗܝ ܐܡܬܝ ܕܥܝܢܟ ܗܟܝܠ ܬܗܘܐ ܦܫܝܛܐ ܐܦ ܦܓܪܟ ܟܘܠܗ ܢܗܝܪ ܗܘ ܐܢ ܕܝܢ ܥܝܢܟ ܬܗܘܐ ܒܝܫܐ ܐܦ ܦܓܪܟ ܚܫܘܟ ܗܘ
11:35	ܬܗܘܐ ܗܟܝܠ ܙܗܝܪ ܕܠܡܐ ܢܘܗܪܐ ܕܒܟ ܚܫܘܟ ܗܘ
11:36	ܐܦ ܦܓܪܟ ܗܟܝܠ ܡܐ ܕܠܝܬ ܒܗ ܫܪܓܐ ܕܡܢܗܪ ܗܘܐ ܚܫܘܟ܂ ܗܟܢܐ ܡܐ ܕܫܪܓܟ ܗܘܐ ܢܗܝܪ ܡܢܗܪ ܠܟ܀
11:37	ܘܒܥܐ ܗܘܐ ܡܢܗ ܦܪܝܫܐ ܚܕ ܕܢܫܬܪܐ ܠܘܬܗ ܘܥܠ ܐܣܬܡܟ
11:38	ܐܬܕܡܪܘ ܕܠܡܢܐ ܠܐ ܥܡܕ ܩܕܡ ܫܪܘܬܗ
11:39	ܐܡܪ ܠܗ ܝܫܘܥ ܐܢܬܘܢ ܦܪܝܫܐ ܒܪܗ ܗܘ ܓܝܪ ܕܟܣܐ ܘܕܦܝܢܟܐ ܡܕܟܝܢ ܐܢܬܘܢ ܘܓܘܟܘܢ ܡܠܐ ܚܛܘܦܝܐ ܘܒܝܫܬܐ
11:40	ܚܣܝܪ̈ܝ ܪܥܝܢܐ ܠܐ ܗܘܐ ܡܢ ܕܥܒܕ ܕܠܒܪ܂ ܐܦ ܕܠܓܘ ܗܘ ܥܒܕ
11:41	ܐܠܐ ܡܕܡ ܕܐܝܬ ܠܓܘ ܡܢܟܘܢ ܗܒܘܗܝ ܒܙܕܩܬܐ ܘܗܐ ܟܘܠ ܡܕܡ ܕܟܐ ܗܘ ܠܟܘܢ܂
11:42	ܐܠܐ ܘܝܠܟܘܢ ܦܪ̈ܝܫܐ ܕܡܥܣܪ̈ܝܢ ܐܢܬܘܢ ܢܢܥܐ ܘܦܓܢܐ ܘܟܠܗܘܢ ܝܪ̈ܩܘܢܐ܂ ܘܥܒܪ̈ܝܢ ܐܢܬܘܢ ܥܠ ܕܝܢܐ ܘܥܠ ܚܘܒܐ ܕܐܠܗܐ ܗܠܝܢ ܘܠܐ ܗܘܐ ܕܢܬܥܒܕܘܢ ܘܐܦ ܗܠܝܢ ܠܐ ܢܫܬܒܩܢ܀
11:43	ܘܝ ܠܟܘܢ ܦܪܝܫܐ ܕܪܚܡܝܢ ܐܢܬܘܢ ܡܘܬܒܐ ܡܝܩܪܐ ܒܟܢܘܫܬܐ ܘܫܠܡܐ ܒܫܘܩܐ
11:44	ܘܝ ܠܟܘܢ ܕܐܝܬܝܟܘܢ ܩܒܪܐ ܕܠܐ ܚܙܝܢ ܐܢܬܘܢ ܘܒ̈ܢܝ ܐܢܫܐ ܡܗܠܟܝܢ ܠܥܠ ܡܢܗܘܢ ܘܠܐ ܝܕܥܝܢ ܐܢܬܘܢ
11:45	ܘܥܢܐ ܚܕ ܡܢ ܣܦܪܐ ܘܐܡܪ ܠܗ ܡܠܦܢܐ܂ ܟܕ ܗܠܝܢ ܐܡܪ ܐܢܬ ܐܦ ܠܢ ܡܨܥܪ ܐܢܬ
11:46	ܐܡܪ ܠܗ ܐܦ ܠܟܘܢ ܘܝ ܠܟܘܢ ܣܦܪܐ ܕܛܥܢܝܢ ܐܢܬܘܢ ܠܒܢܝ ܐܢܫܐ ܡܘܒܠܐ ܝܩܝܪ̈ܬܐ ܘܐܢܬܘܢ ܒܚܕܐ ܡܢ ܨܒܥܬܟܘܢ ܠܐ ܡܬܩܪܒܝܢ ܐܢܬܘܢ ܠܗܝܢ
11:47	ܘܝܠܟܘܢ ܕܒܢܝܢ ܐܢܬܘܢ ܩܒܪܐ ܕܢܒ̈ܝܐ ܕܐܒܗܝܟܘܢ ܩܛܠܘ ܐܢܘܢ܂
11:48	ܡܟܝܠ ܣܗܕܝܢ ܐܢܬܘܢ ܘܡܫܬܘܕܝܢ ܐܢܬܘܢ ܒܥܒ̈ܕܐ ܕܐܒܗܝܟܘܢ ܕܗܢܘܢ ܩܛܠܘ ܐܢܘܢ ܘܐܢܬܘܢ ܒܢܝܢ ܐܢܬܘܢ
11:49	ܡܛܠ ܗܢܐ ܚܟܡܬܐ ܕܐܠܗܐ ܐܡܪܬ ܕܐܫܕܪ ܒܗܘܢ ܢܒ̈ܝܐ ܘܫܠܝܚܐ ܡܢܗܘܢ ܢܩܛܠܘܢ ܘܢܪܕܦܘܢ
11:50	ܕܢܬܒܥ ܕܡܐ ܕܟܠܗܘܢ ܢܒܝ̈ܐ ܕܐܬܐܫܕ ܗܐ ܡܢ ܕܐܬܒܪܝ ܥܠܡܐ ܥܕܡܐ ܠܗܕܐ ܫܪܒܬܐ܂
11:51	ܡܢ ܕܡܗ ܕܗܒܝܠ ܥܕܡܐ ܠܕܡܗ ܕܙܟܪܝܐ ܗܘ ܕܐܬܩܛܠ ܒܝ̈ܢܝ ܡܕܒܚܐ ܠܗܝܟܠܐ ܐܡܝܢ ܐܡܪ ܐܢܐ ܠܟܘܢ ܕܢܬܒܥ ܡܢ ܐܝ̈ܕܝ ܫܪܒܬܐ ܗܕܐ܂
11:52	ܘܝܠܟܘܢ ܣܦܪ̈ܐ ܕܛܫܝܬܘܢ ܐܩ̈ܠܝܕܐ ܕܝܕܥܬܐ ܐܢܬܘܢ ܠܐ ܥܠܬܘܢ ܘܠܐܝܠܝܢ ܕܥܠܝܢ ܟܠܝܬܘܢ
11:53	ܘܟܕ ܐܡܪ ܗܘܐ ܗܠܝܢ܂ ܠܩܒܠܗܘܢ ܠܥܝܢ ܟܠܗ ܥܡܐ ܫܪܝ ܡܬܒܐܫ ܗܘܐ ܠܣܦܪ̈ܐ ܘܠܦܪ̈ܝܫܐ
11:54	ܘܕܪܫܝܢ ܗܘܘ ܥܡܗ ܥܠ ܣܓܝܐ̈ܬܐ ܘܒܥܝܢ ܗܘܘ ܠܡܐܚܕ ܥܠܘܗܝ ܥܠܬܐ܂
12:01	ܘܟܕ ܟܢܫ ܥܠܘܗܝ ܟܢܫܐ ܣܓܝܐܐ܂ ܐܝܟܢܐ ܕܢܕܫܘܢ ܚܕ ܠܚܕ ܫܪܝ ܗܘܐ ܠܡܐܡܪ ܠܬܠܡ̈ܝܕܘܗܝ܂ ܐܙܕܗܪܘ ܡܢ ܚܡܝܪܐ ܕܦܪܝܫ̈ܐ ܕܐܝܬܘܗܝ ܡܣܒ ܒܐ̈ܦܐ
12:02	ܠܝܬ ܓܝܪ ܡܕܡ ܕܟܣܐ ܕܠܐ ܢܬܓܠܐ ܘܠܐ ܕܡܛܫܝ ܕܠܐ ܢܬܝܕܥ܂
12:03	ܐܝܠܝܢ ܓܝܪ ܕܒܚܫܘܟܐ ܐܡܪܬܘܢ ܒܢܗܝܪܐ ܢܫܬܡܥܢ܂ ܘܡܕܡ ܕܒܬܘܢܐ ܒܐܕܢܐ ܠܚܫܬܘܢ ܥܠ ܐܓܪܐ ܢܬܟܪܙܢ܂
12:04	ܐܡܪ ܐܢܐ ܠܟܘܢ ܕܝܢ ܪܚܡܝ ܠܐ ܬܕܚܠܘܢ ܡܢ ܐܝܠܝܢ ܕܩܛܠܝܢ ܦܓܪܐ܂ ܘܡܢ ܒܬܪܟܢ ܡܕܡ ܠܐ ܡܫܟܚܝܢ ܠܡܥܒܕ
12:05	ܐܚܘܟܘܢ ܕܝܢ ܡܢ ܡܢ ܬܕܚܠܘܢ܂ ܕܚܠܘ ܡܢ ܗܘ ܕܡܢ ܒܬܪ ܕܩܛܠ ܫܠܝܛ ܠܗ ܠܡܪܡܝܘ ܒܓܗܢܐ܂ ܐܢ ܐܡܪܢܐ ܠܟܘܢ ܕܡܢ ܗܢܐ ܠܡܕܚܠ
12:06	ܚܡܫ ܓܝܪ ܨܦܪܝܢ ܡܙܕܒܢܢ ܒܬܪܝܢ ܐܣܪܝܢ ܘܚܕܐ ܡܢܗܝܢ ܠܐ ܛܥܝܐ ܩܕܡ ܐܠܗܐ
12:07	ܐܦ ܡܢܐ ܓܝܪ ܕܣܥܪܐ ܕܪܫܟܘܢ ܡܢܝܢ ܐܢܝܢ ܠܐ ܗܟܝܠ ܬܕܚܠܘܢ ܡܛܠ ܕܡܢ ܨܦܪܐ ܣܘܓܐ ܛܒܝܢ ܐܢܬܘܢ
12:08	ܐܡܪܢܐ ܠܟܘܢ ܓܝܪ ܕܟܠ ܕܢܘܕܐ ܒܝ ܩܕܡ ܒ̈ܢܝ ܐܢܫܐ܂ ܐܦ ܒܪܗ ܕܐܢܫܐ ܢܘܕܐ ܒܗ ܩܕܡ ܡܠܐܟ̈ܘܗܝ ܕܐܠܗܐ
12:10	ܘܟܠ ܕܢܐܡܪ ܡܠܬܐ ܥܠ ܒܪܗ ܕܐܢܫܐ ܢܫܬܒܩ ܠܗ ܡܢ ܕܥܠ ܪܘܚܐ ܕܝܢ ܕܩܘܕܫܐ ܢܓܕܦ ܠܐ ܢܫܬܒܩ ܠܗ
12:11	ܡܐ ܕܡܩܪܒܝܢ ܠܟܘܢ ܕܝܢ ܠܟܢܘܫܬܐ ܩܕܡ ܐܪ̈ܟܣ ܘܫ̈ܠܝܛܐ ܠܐ ܬܐܨܦܘܢ ܡܢܐ ܬܦܩܘܢ ܪܘܚܐ܂ ܐܘ ܡܢܐ ܬܐܡܪܘܢ
12:12	ܪܘܚܐ ܕܝܢ ܕܩܘܕܫܐ ܬܠܦܟܘܢ ܒܗܝ ܫܥܬܐ ܡܕܡ ܕܬܐܡܪܘܢ܀
12:13	ܘܐܡܪ ܠܗ ܓܒܪܐ ܚܕ ܡܢ ܗܘ ܟܢܫܐ܂ ܡܠܦܢܐ ܐܡܪ ܠܐܚܝ ܦܠܓ ܥܡܝ ܝܪܬܘܬܐ
12:14	ܗܘ ܕܝܢ ܐܡܪ ܠܗ ܓܒܪܐ ܡܢܘ ܐܩܝܡܢܝ ܥܠܝܟܘܢ ܕܝܢܐ
12:15	ܘܐܡܪ ܠܟܢܫܐ ܐܙܕܗܪܘ ܡܢ ܟܘܠܗ ܝܥܢܘܬܐ ܡܛܠ ܕܠܐ ܗܘܐ ܒܝܘܬܪܢܐ ܕܢܟܣܐ ܗܘܝܢ ܚ̈ܝܐ ܠܒ̈ܢܝ ܐܢܫܐ܀
12:16	ܘܐܡܪ ܠܗܘܢ ܡܬܠܐ ܗܢܐ܂ ܓܒܪܐ ܚܕ ܥܬܝܪܐ ܐܥܠܬ ܗܘܬ ܠܗ ܐܪܥܗ ܥܠܠܬܐ ܣܓܝܐ̈ܬܐ
12:17	ܘܡܬܚܫܒ ܗܘܐ ܒܢܦܫܗ ܘܐܡܪ ܡܢܐ ܐܥܒܕ ܕܠܝܬ ܠܝ ܐܝܟܐ ܕܐܚܡܘܠ ܥܠܠܬܝ
12:18	ܐܠܐ ܘܠܐ ܠܝ ܕܐܣܬܘܪ ܒܝܬ ܩܦܣܝ ܘܐܒܢܐ ܘܐܘܪܒ ܐܢܘܢ ܘܐܟܢܫ ܒܗܘܢ ܥܠܠܬܝ܂
12:19	ܘܐܡܪ ܠܢܦܫܝ ܕܗܐ ܛܒ̈ܬܐ ܣܓܝܐܬܐ ܚܡܝܠܢ ܠܟܝ ܠܫ̈ܢܝܐ ܣܓܝܐܬܐ ܐܬܢܝܚܝ ܘܠܥܣܝ ܘܐܫܬܝ ܘܐܬܒܣܡܝ
12:20	ܐܡܪ ܠܗ ܐܠܗܐ ܚܣܝܪ ܪܥܝܢܐ ܒܗܢܐ ܠܠܝܐ ܢܦܫܟ ܬܒܥܝܢ ܠܗ ܡܢܟ ܗܠܝܢ ܕܛܝܒܬ ܠܡܢ ܢܗܘܝܢ
12:21	ܗܟܢܐ ܡܢ ܕܣܐܡ ܠܗ ܣܝܡ̈ܬܐ ܘܒܐܠܗܐ ܠܐ ܥܬܝܪ܀
12:22	ܘܐܡܪ ܠܬܠܡ̈ܝܕܘܗܝ ܡܛܠ ܗܢܐ ܐܡܪܢܐ ܠܟܘܢ ܠܐ ܬܐܨܦܘܢ ܕܢܦܫܐ ܡܢܐ ܬܐܟܠܘܢ ܘܐܦܠܐ ܕܦܓܪܐ ܡܢܐ ܬܠܒܫܘܢ܂
12:23	ܢܦܫܐ ܓܝܪ ܝܬܝܪܐ ܗܝ ܡܢ ܣܝܒܪܬܐ ܘܦܓܪܐ ܡܢ ܠܒܘܫܐ܂
12:24	ܐܬܒܩܘ ܒܢܥܒ̈ܐ ܕܠܐ ܙܪܥܝܢ ܘܠܐ ܚܨܕܝܢ܂ ܘܠܝܬ ܠܗܘܢ ܬܘܢ̈ܐ ܘܐܦ ܠܐ ܒܝܬ ܩܦܣ̈ܐ ܘܐܠܗܐ ܡܣܝܒܪ ܠܗܘܢ ܟܡܐ ܗܟܝܠ ܐܢܬܘܢ ܡܝܬܪܝܢ ܡܢ ܦܪܚܬܐ
12:25	ܐܝܢܐ ܓܝܪ ܡܢܟܘܢ ܟܕ ܝܨܦ ܡܫܟܚ ܠܡܘܣܦܘ ܥܠ ܩܘܡܬܗ ܐܡܬܐ ܚܕܐ
12:26	ܐܢ ܕܝܢ ܐܦ ܠܐ ܙܥܘܪܬܐ ܡܫܟܚܝܢ ܐܢܬܘܢ ܠܡܥܒܕ ܡܢܐ ܝܨܦܝܢ ܐܢܬܘܢ ܥܠ ܫܪܟܐ܂
12:27	ܐܬܒܩܘ ܒܫ̈ܘܫܢܐ ܐܝܟܢܐ ܕܠܐ ܥܙܠܢ ܘܠܐ ܙܩܪ̈ܢ܂ ܘܐܡܪܢܐ ܠܟܘܢ ܕܐܦ ܠܐ ܫܠܝܡܘܢ ܒܟܠܗ ܬܫܒܘܚܬܗ ܠܒܝܫ ܐܟܘܬܗܝܢ
12:28	ܐܢ ܕܝܢ ܥܡܝܪܐ ܕܝܘܡܢܐ ܐܝܬܘܗܝ ܒܛܘܪ̈ܐ ܘܡܚܪ ܢܦܠ ܒܬܢܘܪܐ ܐܠܗܐ ܡܠܒܫ ܟܡܐ ܝܬܝܪܐܝܬ ܠܟܘܢ ܚܣܝܪ̈ܝ ܗܝܡܢܘܬܐ
12:29	ܠܐ ܗܟܝܠ ܬܒܥܘܢ ܡܢܐ ܬܠܥܣܘܢ ܘܡܢܐ ܬܫܬܘܢ ܘܡܢܐ ܬܬܟܣܘܢ
12:30	ܗܠܝܢ ܓܝܪ ܟܘܠܗܝܢ ܥܡܡܐ ܗܘ ܕܥܠܡܐ ܒܥܝܢ ܠܗܝܢ ܐܒܘܟܘܢ ܕܝܢ ܝܕܥ ܕܐܦ ܠܟܘܢ ܡܬܒܥܝܢ
12:31	ܐܢܬܘܢ ܗܟܝܠ ܒܥܘ ܡܠܟܘܬܗ ܕܐܠܗܐ ܘܗܠܝܢ ܢܬܘܣܦܢ ܠܟܘܢ
12:32	ܠܐ ܬܕܚܠ ܓܙܪܐ ܙܥܘܪܐ ܕܐܨܛܒܝ ܐܒܘܟܘܢ ܕܢܬܠ ܠܟܘܢ ܡܠܟܘܬܐ
12:33	ܙܒܢܘ ܟܠܡܕܡ ܕܐܝܬ ܠܟܘܢ ܘܗܒܘ ܙܕܩܬܐ܂ ܘܥܒܕܘ ܠܟܘܢ ܟܝ̈ܣܐ ܕܠܐ ܒ̈ܠܝܢ ܘܣܝܡܬܐ ܕܠܐ ܓܡܪܐ ܒܫܡܝܐ ܐܬܪ ܕܠܐ ܓܢܒ̈ܐ ܓܢܒ̈ܝܢ ܐܦ ܠܐ ܣܣܐ ܡܚܒܠ
12:34	ܘܐܬܪ ܕܣܝܡܬܟܘܢ ܐܦ ܠܒܟܘܢ ܬܡܢ ܢܗܘܐ܂
12:35	ܢܗܘܘܢ ܐܣܝܪܝܢ ܚܨ̈ܝܟܘܢ ܘܡܢܗܪ̈ܝܢ ܫܪ̈ܓܝܟܘܢ
12:36	ܘܬܗܘܘܢ ܕܡܝܢ ܠܐܢܫܐ ܕܡܣܟܝܢ ܠܡܪܗܘܢ ܕܐܡܬܝ ܢܦܛܪ ܡܢ ܒܝܬ ܡܫܬܘܬܐ ܕܡܐ ܕܐܬܐ ܘܢܩܫ ܡܚܕܐ ܢܦܬܚܘܢ ܠܗ
12:37	ܛܘܒܝ̈ܗܘܢ ܠܥܒܕ̈ܐ ܗܢܘܢ ܕܢܐܬܐ ܢܫܟܚ ܐܢܘܢ ܡܪܗܘܢ ܟܕ ܥܝܪܝܢ ܐܡܝܢ ܐܡܪܢܐ ܠܟܘܢ ܕܢܚܙܘܩ ܚܨ̈ܘܗܝ ܘܢܣܡܟ ܐܢܘܢ ܘܢܥܒܪ ܢܫܡܫ ܐܢܘܢ
12:38	ܘܐܢ ܒܡܛܪܬܐ ܕܬܪܬܝܢ ܐܘ ܕܬܠܬ ܢܐܬܐ ܢܫܟܚ ܐܢܘܢ ܗܟܢܐ ܛܘܒܝܗܘܢ ܠܗܢܘܢ
12:39	ܗܕܐ ܕܝܢ ܕܥܘ ܕܐܠܘ ܝܕܥ ܗܘܐ ܡܪܐ ܒܝܬܐ ܒܐܝܕܐ ܫܥܬܐ ܐܬܐ ܗܘܐ ܓܢܒܐ ܠܐ ܫܒܩ ܗܘܐ ܕܢܬܦܠܫ ܒܝܬܗ܂
12:40	ܘܐܦ ܐܢܬܘܢ ܗܘܝܬܘܢ ܡܛܝܒܝܢ ܕܒܫܥܬܐ ܕܠܐ ܝܕܥܝܢ ܐܢܬܘܢ ܢܐܬܐ ܒܪܗ ܕܐܢܫܐ܂
12:41	ܐܡܪ ܠܗ ܟܐܦܐ ܡܪܝ ܠܢ ܗܘ ܐܡܪ ܐܢܬ ܠܗ ܡܬܠܐ ܗܢܐ ܐܘ ܐܦ ܠܟܠ ܐܢܫ܂
12:42	ܐܡܪ ܠܗ ܝܫܘܥ ܐܝܢܐ ܗܘ ܫܠܝܛܐ ܡܗܝܡܢܐ ܕܢܩܝܡܝܘܗܝ ܡܪܗ ܥܠ ܟܢ̈ܘܬܗ ܕܢܬܠ ܠܗܘܢ ܦܪܣܐ ܒܙܒܢܗ܂
12:43	ܛܘܒܘܗܝ ܠܗܘ ܟܕ ܢܐܬܐ ܡܪܗ ܢܫܟܚܝܘܗܝ ܕܥܒܕ ܗܟܢܐ
12:44	ܫܪܝܪܐܝܬ ܐܡܪܢܐ ܠܟܘܢ ܕܢܫܠܛܝܗܝ ܥܠ ܟܠ ܕܐܝܬ ܠܗ
12:45	ܐܢ ܕܝܢ ܢܐܡܪ ܗܘ ܥܒܕܐ ܒܠܒܗ ܕܡܪܝ ܡܘܚܪ ܠܡܐܬܐ ܘܢܫܪܐ ܠܡܡܚܐ ܠܥܒ̈ܕܐ ܘܠܐܡܗܬܐ ܘܠܡܠܥܣ ܘܠܡܫܬܐ ܘܠܡܪܘܐ
12:46	ܘܢܐܬܐ ܡܪܗ ܕܥܒܕܐ ܗܘ ܒܝܘܡܐ ܕܠܐ ܣܒܪ ܘܒܫܥܬܐ ܕܠܐ ܡܪܓܫ܂ ܘܢܦܠܓܝܗܝ ܡܢܬܗ ܘܢܣܝܡܝܗܝ ܥܡ ܗܢܘܢ ܕܠܐ ܡܗܝܡܢܝܢ܂
12:47	ܥܒܕܐ ܕܝܕܥ ܨܒܝܢܐ ܕܡܪܗ ܘܠܐ ܬܩܢ ܠܗ ܐܝܟ ܨܒܝܢܗ ܢܒܠܥ ܡܚ̈ܘܬܐ ܣܓ̈ܝܐܬܐ
12:48	ܘܗܘ ܕܠܐ ܝܕܥ ܘܥܒܕ ܡܕܡ ܕܫܘܐ ܠܡܚ̈ܘܬܐ ܢܒܠܥ ܡܚܘ̈ܬܐ ܙܥܘܪ̈ܝܬܐ ܟܠ ܕܢܬܝܗܒ ܠܗ ܓܝܪ ܣܓܝ܂ ܣܓܝ ܢܬܒܥ ܒܐܝܕܗ܂ ܘܠܗ ܕܐܓܥܠܘ ܠܗ ܣܓܝ ܝܬܝܪܐܝܬ ܢܬܒܥܘܢܗ܂
12:49	ܢܘܪܐ ܗܘ ܓܝܪ ܐܬܝܬ ܕܐܪܡܐ ܒܐܪܥܐ܂ ܘܡܐ ܕܨܒܐ ܐܠܘ ܡܢ ܟܕܘ ܚܒܬ܂
12:50	ܡܥܡܘܕܝܬܐ ܐܝܬ ܠܝ ܕܐܥܡܕ ܘܟܡܐ ܐܠܝܨܢܐ ܥܕܡܐ ܕܬܬܛܠܩ
12:51	ܣܒܪܝܢ ܐܢܬܘܢ ܕܫܝܢܐ ܐܬܝܬ ܕܐܪܡܐ ܒܐܪܥܐ܂ ܐܡܪ ܐܢܐ ܠܟܘܢ ܕܠܐ܂ ܐܠܐ ܦܠܓܘ̈ܬܐ܂
12:52	ܡܢ ܗܫܐ ܓܝܪ ܢܗܘܘܢ ܚܡܫ̈ܐ ܒܚܕ ܒܝܬܐ ܢܬܦܠܓܘܢ ܬܠܬ̈ܐ ܥܠ ܬܪ̈ܝܢ܂ ܘܬܪ̈ܝܢ ܥܠ ܬܠܬ̈ܐ
12:53	ܐܒܐ ܥܠ ܒܪܗ ܘܒܪܐ ܥܠ ܐܒܘܗܝ ܐܡܐ ܥܠ ܒܪܬܗ ܘܒܪܬܐ ܥܠ ܐܡܗ ܘܚܡܬܐ ܥܠ ܟܠܬܗ ܘܟܠܬܐ ܥܠ ܚܡܬܗ
12:54	ܐܡܪ ܗܘܐ ܠܟܢܫܐ ܡܐ ܕܚܙܝܬܘܢ ܥܢܢܐ ܕܣܠܩܐ ܡܢ ܡܥܪܒܐ ܒܪܫܥܬܗ ܐܡܪ̈ܝܢ ܐܢܬܘܢ ܕܡܛܪܐ ܗܘܐ ܘܗܘܐ ܗܟܢܐ
12:55	ܘܡܐ ܕܢܫܒܐ ܬܝܡܢܐ ܐܡܪܝܢ ܐܢܬܘܢ ܕܟܘܪܢܐ ܗܘܐ ܘܗܘܐ
12:56	ܢܣܒܝ ܒܐܦܐ ܦܪܨܘܦܐ ܕܫܡܝܐ ܘܕܐܪܥܐ ܝܕܥܝܢ ܐܢܬܘܢ ܠܡܢܣܝܘ ܙܒܢܐ ܗܢܐ ܘܐܬܘ̈ܬܗ ܠܐ ܨܒܝܢ ܐܢܬܘܢ ܕܬܢܣܘܢ
12:57	ܠܡܢܐ ܡܢ ܢܦܫܟܘܢ ܠܐ ܕܝܢܝܢ ܐܢܬܘܢ ܩܘܫܬܐ
12:58	ܥܕ ܐܙܠ ܐܢܬ ܥܡ ܒܥܠܕܝܢܟ ܠܘܬ ܐܪܟܘܢܐ ܥܕ ܒܐܘܪܚܐ ܐܢܬ ܗܒ ܠܗ ܥܒܕܗ ܕܬܬܦܪܩ ܡܢܗ ܕܠܡܐ ܢܚܝܒܟ ܩܕܡ ܕܝܢܐ ܘܢܫܠܡܟ ܠܓܒܝܐ ܘܓܒܝܐ ܢܪܡܝܟ ܒܝܬ ܐܣܝܪ̈ܐ
12:59	ܐܡܪܢܐ ܠܟ ܕܠܐ ܬܦܘܩ ܡܢ ܬܡܢ ܥܕܡܐ ܕܬܦܪܥ ܫܡܘܢܐ ܐܚܪܝܐ
13:01	ܘܒܗ ܒܗܘ ܙܒܢܐ ܐܬܘ ܐܢܫܐ ܐܡܪܘ ܠܗ ܥܠ ܓܠܠܝܐ ܗܢܘܢ ܕܦܝܠܛܘܣ ܚܠܛ ܕܡܗܘܢ ܥܡ ܕܒܚܝܗܘܢ
13:02	ܥܢܐ ܝܫܘܥ ܘܐܡܪ ܠܗܘܢ ܣܒܪܝܢ ܐܢܬܘܢ ܕܗܠܝܢ ܓܠܠܝܐ ܚܛܝܝܢ ܗܘܘ ܝܬܝܪ ܡܢ ܟܘܠܗܘܢ ܓܠܠܝܐ ܕܗܟܢܐ ܗܘܐ ܐܢܘܢ
13:03	ܐܡܪܢܐ ܠܟܘܢ ܕܠܐ ܐܠܐ ܐܦ ܐܢܬܘܢ ܐܠܐ ܬܬܒܘܢ ܐܢܬܘܢ ܗܟܢܐ ܬܐܒܕܘܢ ܟܠܟܘܢ
13:04	ܘܗܢܘܢ ܬܡܢܬܥܣܪ ܕܢܦܠ ܥܠܝܗܘܢ ܡܓܕܠܐ ܒܫܝܠܘܚܐ ܘܩܛܠ ܐܢܘܢ ܣܒܪܝܢ ܐܢܬܘܢ ܕܚ̈ܛܝܝܢ ܗܘܘ ܝܬܝܪ ܡܢ ܟܘܠܗܘܢ ܒܢܝ ܐܢܫܐ܂ ܕܥܡܪܝܢ ܒܐܘܪܫܠܡ܂
13:05	ܐܡܪܢܐ ܠܟܘܢ ܕܠܐ ܐܠܐ ܐܦ ܐܢܬܘܢ ܐܠܐ ܬܬܘܒܘܢ ܐܢܬܘܢ ܗܟܢܐ ܬܐܒܕܘܢ
13:06	ܘܐܡܪ ܗܘܐ ܡܬܠܐ ܗܢܐ ܓܒܪܐ ܚܕ ܐܝܬ ܗܘܬ ܠܗ ܬܬܐ ܕܢܨܝܒܐ ܒܟܪܡܗ ܘܐܬܐ ܒܥܐ ܒܗ ܦܐܪܐ ܘܠܐ ܐܫܟܚ
13:07	ܐܡܪ ܠܦܠܚܐ ܗܐ ܬܠܬ ܫܢܝܢ ܐܬܐ ܒܥܢܐ ܦܐܪ̈ܐ ܒܬܬܐ ܗܕܐ ܘܠܐ ܡܫܟܚܢܐ ܐܠܐ ܦܣܘܩܝܗ ܠܡܢܐ ܡܒܛܠܐ ܐܪܥܐ
13:08	ܥܢܐ ܘܐܡܪ ܠܗ ܗܘ ܦܠܚܐ ܡܪܝ ܫܒܘܩܝܗ ܐܦ ܗܕܐ ܫܢܬܐ ܥܕ ܐܦܠܚܝܗ ܐܙܒܠܝܗ
13:09	ܘܐܢ ܥܒܕܬ ܦܐܪܐ ܘܐܠܐ ܠܡܢܚܝ ܬܦܣܩܝܗ܀
13:10	ܘܟܕ ܡܠܦ ܒܫܒܐ ܒܚܕܐ ܡܢ ܟܢܘܫ̈ܬܐ
13:11	ܘܐܝܬ ܗܘܬ ܐܢܬܬܐ ܚܕܐ ܕܐܝܬ ܗܘܬ ܠܗ ܪܘܚܐ ܫܢܝܢ ܬܡܢܥܣܪܐ ܘܟܦܝܦܐ ܗܘܬ ܘܠܐ ܡܫܟܚܐ ܗܘܬ ܕܬܬܦܫܛ ܠܓܡܪ
13:12	ܘܚܙܗ ܝܫܘܥ ܘܩܪܗ ܘܐܡܪ ܠܗ ܐܢܬܬܐ ܫܪܝܬܝ ܡܢ ܟܘܪܗܢܟܝ
13:13	ܘܣܡ ܐܝܕܘܗܝ ܥܠܝܗ ܘܒܪ ܫܥܬܗ ܐܬܦܫܛܬ ܩܘܡܬܗ ܘܡܫܒܚܐ ܗܘܬ ܠܐܠܗܐ
13:14	ܘܥܢܐ ܪܒ ܟܢܘܫܬܐ ܟܕ ܡܬܚܡܬ ܗܘܐ ܥܠ ܕܡܐܣܐ ܗܘܐ ܝܫܘܥ ܒܫܘܒܬܐ ܘܐܡܪ ܠܟܢܫܐ ܫܬܐ ܐܢܘܢ ܝܘܡܝܢ ܕܒܗܘܢ ܘܠܐ ܠܡܦܠܚ ܒܗܘܢ ܗܘܝܬܘܢ ܐܬܝܢ ܘܡܬܐܣܝܢ ܘܠܐ ܒܝܘܡܐ ܕܫܘܒܬܐ
13:15	ܥܢܐ ܝܫܘܥ ܘܐܡܪ ܠܗ ܢܣܒ ܒܐܦܐ ܚܕ ܚܕ ܡܢܟܘܢ ܠܐ ܫܪܐ ܬܘܪܗ ܐܘ ܚܡܪܗ ܡܢ ܐܘܪܝܐ ܘܐܙܠ ܡܫܩܐ ܠܗ ܒܝܘܡܐ ܕܫܒܬܐ
13:16	ܘܒܪܬܗ ܗܝ ܕܐܒܪܗܡ ܕܐܣܪܗ ܣܛܢܐ ܗܐ ܬܡܢܥܣܪܐ ܫܢܝܢ ܠܐ ܘܠܐ ܗܘܐ ܕܬܫܬܪܐ ܡܢ ܗܢܐ ܐܣܘܪܝܐ ܒܝܘܡܐ ܕܫܒܬܐ
13:17	ܘܟܕ ܐܡܪ ܗܘܐ ܗܠܝܢ ܂܂܂ ܒܗܬܝܢ ܗܘܘ ܟܠܗܘܢ ܐܝܠܝܢ ܕܩܝܡܝܢ ܗܘܘ ܠܩܘܒܠܗ ܘܟܠܗ ܥܡܐ ܚܕܐ ܗܘܐ ܒܟܠܗܝܢ ܬܡܝܗܬܐ ܕܗܘܝܢ ܗܘܝ ܒܐܝܕܗ܀
13:18	ܐܡܪ ܗܘܐ ܠܡܢܐ ܕܡܝܐ ܡܠܟܘܬܐ ܕܐܠܗܐ ܘܠܡܢܐ ܐܕܡܝܗ
13:19	ܕܡܝܐ ܠܦܪܕܬܐ ܕܚܪܕܠܐ ܕܢܣܒ ܓܒܪܐ ܐܪܡܝܗ ܒܓܢܬܗ ܘܪܒܬ ܘܗܘܬ ܐܝܠܢܐ ܘܐܩܢܬ ܦܪܚܬܐ ܕܫܡܝܐ ܒܣܘܟܝܗ
13:20	ܬܘܒ ܐܡܪ ܠܡܢܐ ܐܕܡܝܗ ܡܠܟܘܬܐ ܕܐܠܗܐ
13:21	ܕܡܝܐ ܠܚܡܝܪܐ ܕܢܣܒܬ ܐܢܬܬܐ ܘܛܡܪܬ ܒܬܠܬ ܣܐܝܢ ܩܡܚܐ ܥܕܡܐ ܕܟܠܗ ܢܚܡܥ
13:22	ܘܪܕܐ ܗܘܐ ܒܩܘܪ̈ܝܐ ܘܒܡ̈ܕܝܢܬܐ ܘܡܠܦ ܗܘܐ܀ ܘܟܕ ܐܙܠ ܠܐܘܪܫܠܡ
13:23	ܐܬܐ ܓܒܪܐ ܚܕ ܡܫܐܠ ܗܘܐ ܠܗ ܘܐܡܪ ܠܗ ܡܪܝ ܙܥܘܪ̈ܝܢ ܐܢܘܢ ܕܚܝܝܢ
13:24	ܐܡܪ ܠܗ ܝܫܘܥ ܐܬܟܬܫ ܠܡܥܠ ܒܬܪܥܐ ܐܠܝܨܐ ܐܡܪܢܐ ܠܟܘܢ ܓܝܪ ܕܣܓܝܐܐ ܢܒܥܘܢ ܠܡܥܠ ܒܗ ܘܠܐ ܢܫܟܚܘܢ
13:25	ܡܢ ܫܥܬܐ ܓܝܪ ܕܢܩܘܡ ܡܪܗ ܕܒܝܬܐ ܘܢܐܚܘܕ ܬܪܥܐ ܘܬܗܘܘܢ ܩܝܡܝܢ ܠܒܪ ܘܡܩܫܝܢ ܒܬܪܥܐ ܘܐܡܪܝܢ ܡܪܢ ܦܬܚ ܠܢ ܘܢܥܢܐ ܘܢܐܡܪ ܠܟܘܢ ܠܐ ܝܕܥܢܐ ܠܟܘܢ ܡܢ ܐܝܡܟܐ ܐܢܬܘܢ
13:26	ܗܝܕܝܢ ܬܫܪܘܢ ܠܡܐܡܪ ܩܕܡܝܟ ܠܥܣܢ܂ ܘܐܫܬܝܢ ܘܒܫܘ̈ܩܝܢ ܐܠܦܬ
13:27	ܘܢܐܡܪ ܐܡܝܢ ܐܡܪܢܐ ܠܟܘܢ ܕܠܐ ܝܕܥܢܐ ܠܟܘܢ ܡܢ ܐܝܡܟܐ ܐܢܬܘܢ ܦܪܘܩܘ ܠܟܘܢ ܡܢܝ ܟܠܟܘܢ ܓܝܪ ܐܝܬܝܟܘܢ ܦܥ̈ܠܐ ܕܫܘܩܪܐ܂
13:28	ܬܡܢ ܢܗܘܐ ܒܟܝܐ ܘܚܘܪܩ ܫ̈ܢܐ ܟܕ ܬܚܙܘܢ ܠܐܒܪܗܡ ܘܠܐܝܣܚܩ ܘܠܝܥܩܘܒ ܘܠܟܘܠܗܘܢ ܢܒܝܐ ܒܡܠܟܘܬܗ ܕܐܠܗܐ܂
13:29	ܘܢܐܬܘܢ ܡܢ ܡܕܢܚܐ ܘܡܢ ܡܥܪܒܐ ܘܡܢ ܓܪܒܝܐ ܘܡܢ ܬܝܡܢܐ ܘܢܣܬܡܟܘܢ ܒܡܠܟܘܬܗ ܕܐܠܗܐ
13:30	ܘܗܐ ܐܝܬ ܐܚܪ̈ܝܐ ܕܢܗܘܘܢ ܩܕܡܝܐ ܘܩܕܡܝܐ ܐܚܪ̈ܝܐ܀
13:31	ܘܒܗܘܢ ܒܝܘ̈ܡܬܐ ܗܢܘܢ ܩܪܒܘ ܐܢܫܐ ܡܢ ܦܪ̈ܝܫܐ ܘܐܡܪ̈ܝܢ ܠܗ ܦܘܩ ܐܙܠ ܠܟ ܡܟܐ ܡܛܠ ܕܗܪܘܕܣ ܒܥܐ ܠܡܩܛܠܟ܂
13:32	ܐܡܪ ܠܗܘܢ ܙܠܘ ܐܡܪܘ ܠܗ ܠܬܥܠܬܐ ܗܝ ܗܕܐ ܡܦܩ ܐܢܐ ܫܐܕܐ ܘܐܣܝܘܬܝ ܡܫܠܡ ܐܢܐ ܝܘܡܢܐ ܘܡܚܪ ܘܠܝܘܡܐ ܕܬܠܬܐ ܡܫܬܠܡ ܐܢܐ
13:33	ܒܪܡ ܘܠܐ ܗܘ ܠܝ ܕܝܘܡܢܐ ܘܡܚܪ ܘܒܬܪ ܡܚܪ ܐܙܠ ܡܛܠ ܕܠܐ ܡܫܟܚܐ ܕܢܒܝܐ ܢܐܒܕ ܠܒܪ ܡܢ ܐܘܪܫܠܡ܀
13:34	ܐܘܪܫܠܡ ܐܘܪܫܠܡ ܕܩܛܠܬܝ ܢܒܝܐ ܘܪܓܡܬܝ ܠܐܝܠܝܢ ܕܐܫܬܠܚܘ ܠܘܬܟܝ ܟܡܐ ܙܒܢܝܢ ܨܒܝܬ ܠܡܟܢܫ ܒܢܝܟܝ ܐܝܟ ܬܪܢܓܠܬܐ ܕܟܢܫܐ ܦܪ̈ܘܓܝܗ ܬܚܝܬ ܟܢܦܝܗ ܘܠܐ ܨܒܝܬܘܢ
13:35	ܗܐ ܫܒܝܩ ܒܝܬܟܘܢ ܘܐܡܪܢܐ ܠܟܘܢ ܕܠܐ ܬܚܙܘܢܢܝ ܥܕܡܐ ܕܢܐܬܐ ܕܬܐܡܪܘܢ ܒܪܝܟ ܗܘ ܕܐܬܐ ܒܫܡܗ ܕܡܪܝܐ
14:01	ܘܟܕ ܥܠ ܠܒܝܬܐ ܕܚܕ ܡܢ ܪ̈ܫܐ ܕܦܪ̈ܝܫܐ ܕܢܐܟܘܠ ܠܚܡܐ ܒܝܘܡܐ ܕܫܒܬܐ ܘܢܛܪܝܢ ܗܘܘ ܕܢܚܙܘܢ ܡܢܐ ܢܥܒܕ
14:02	ܘܓܒܪܐ ܗܕܪܘܦܝܩܘܣ ܐܝܬ ܗܘܐ ܩܕܡܘܗܝ
14:03	ܥܢܐ ܝܫܘܥ ܘܐܡܪ ܠܣܦܪ̈ܐ ܘܠܦܪ̈ܝܫܐ ܐܢ ܫܠܝܛ ܒܫܒܬܐ ܠܡܐܣܝܘ
14:04	ܘܗܢܘܢ ܫܬܝܩܝܢ ܗܘܘ ܘܗܘ ܐܚܕܗ ܘܐܣܝܗ ܘܫܪܝܗܝ
14:05	ܘܐܡܪ ܠܗܘܢ ܡܢܘ ܡܢܟܘܢ ܕܢܦܠ ܬܘܪܗ ܐܘ ܚܡܪܗ ܒܒܪܐ܂ ܒܝܘܡܐ ܕܫܒܬܐ ܘܠܐ ܢܓܕ ܡܣܩ ܠܗ
14:06	ܘܠܐ ܐܫܟܚܘ ܠܡܬܠ ܠܗ ܦܬܓܡܐ ܥܠ ܗܠܝܢ܂
14:07	ܘܐܡܪ ܗܘܐ ܡܬܠܐ ܗܢܐ ܠܘܬ ܗܢܘܢ ܕܡܙܡܢܝܢ ܗܘܘ ܘܓܒܝܢ ܗܘܘ ܪ̈ܫ ܣܡܟܐ
14:08	ܐܡܪ ܠܗܘܢ ܐܡܬܝ ܕܡܙܡܢ ܐܢܬ ܠܡܫܬܘܬܐ ܠܐ ܬܣܬܡܟ ܠܟ ܒܕܘܟܬܐ ܡܝܩܪܬܐ ܕܠܡܐ ܢܗܘܐ ܡܙܡܢ ܬܡܢ ܡܢ ܕܡܝܩܪ ܡܢܟ܂
14:09	ܘܢܐܬܐ ܗܘ ܡܢ ܕܠܟ ܘܠܗ ܙܡܢ ܘܢܐܡܪ ܠܟ ܗܒ ܐܬܪܐ ܠܗܢܐ ܘܗܝܕܝܢ ܟܕ ܒܗܝܬ ܐܢܬ ܬܣܬܡܟ ܒܕܘܟܬܐ ܐܚܪܝܬܐ
14:10	ܐܠܐ ܡܐ ܕܐܙܕܡܢܬ ܙܠ ܐܣܬܡܟ ܠܟ ܒܕܘܟܬܐ ܐܚܪܬܐ ܕܡܐ ܕܐܬܐ ܗܘ ܕܙܡܢܟ ܢܐܡܪ ܠܟ ܪܚܡܝ ܐܬܥܠܐ ܠܥܠ ܘܬܗܘܐ ܠܟ ܬܫܒܚܬܐ ܒܥܝ̈ܢܝ ܣܡ̈ܝܟܐ܂
14:11	ܟܠ ܕܢܪܝܡ ܓܝܪ ܢܦܫܗ ܢܬܡܟܟ ܘܟܠ ܕܢܡܟ ܢܦܫܗ ܢܬܪܝܡ܂
14:12	ܘܐܡܪ ܗܘܐ ܐܦ ܠܡܪܐ ܐܚܫܡܝܬܐ܂ ܡܐ ܕܥܒܕ ܐܢܬ ܐܢܬ ܐܚܫܡܝܬܐ ܠܐ ܬܩܪܐ ܠܪ̈ܚܡܝܟ ܘܐܦܠܐ ܠܐܚ̈ܝܟ ܘܠܐ ܠܐܚܝ̈ܢܝܟ ܘܠܐ ܠܫܒܒ̈ܝܟ ܥܬܝܪ̈ܐ ܕܕܠܡܐ ܐܦ ܗܢܘܢ ܢܩܪܘܢܟ ܘܢܗܘܐ ܠܟ ܦܪܥܢܐ ܗܢܐ
14:13	ܐܠܐ ܡܐ ܕܥܒܕ ܐܢܬ ܐܚܫܡܝܬܐ ܩܪܝ ܠܡܣܟܢܐ ܘܠܡܥܘܪ̈ܐ ܘܠܡܚܓܪ̈ܐ ܘܠܡܟ̈ܒܐ ܘܠܡܣ̈ܠܝܐ ܘܐܚܪ̈ܢܐ ܣܓܝܐܐ
14:14	ܘܛܘܒܝܟ ܕܠܝܬ ܠܗܘܢ ܕܢܦܪܥܘܢܟ ܘܢܗܘܐ ܦܘܪܥܢܟ ܒܩܝܡܐ ܕܙܕܝܩ̈ܐ܀
14:15	ܘܟܕ ܫܡܥ ܗܘܐ ܚܕ ܡܢ ܗܢܘܢ ܕܣܡܝܟܝܢ ܗܘܘ ܐܡܪ ܠܗܘܢ ܛܘܒܘܗܝ ܠܡܢ ܕܢܐܟܘܠ ܫܪܘܬܐ ܒܡܠܟܘܬܗ ܕܐܠܗܐ܂
14:16	ܐܡܪ ܠܗ ܝܫܘܥ ܓܒܪܐ ܚܕ ܥܒܕ ܗܘܐ ܐܚܫܡܝܬܐ ܪܒܬܐ ܘܩܪܐ ܗܘܐ ܠܣܓܝܐܐ
14:17	ܘܫܕܪ ܥܒܕܗ ܒܥܕܢܐ ܕܣܡܟܐ ܕܢܐܡܪ ܠܗܢܘܢ ܕܡܙܡܢܝܢ ܕܢܐܬܘܢ ܗܐ ܠܡ ܟܠ ܡܕܡ ܡܛܝܒ ܗܘ
14:18	ܘܫܪܝܘ ܗܘܘ ܡܚܕܐ ܠܡܫܬܐܠܘ ܐܡܪ ܠܗ ܩܕܡܝܐ ܩܪܝܬܐ ܙܒܢܬ ܘܐܠܨܐ ܠܝ ܕܐܦܘܩ ܐܚܙܝܗܝ ܒܥܢܐ ܡܢܟ ܐܫܐܠܝܢܝ
14:19	ܘܐܚܪܢܐ ܐܡܪ ܚܡܫܐ ܙܘܓ̈ܝܢ ܬܘܪܐ ܙܒܢܬ ܘܐܙܠܢܐ ܕܐܒܩܐ ܐܢܘܢ ܒܥܢܐ ܡܢܟ ܐܫܐܠܝܢܝ܂
14:20	ܐܚܪܢܐ ܐܡܪ ܐܢܬܬܐ ܢܣܒܬ ܠܐ ܡܫܟܚܢܐ ܕܐܬܐ
14:21	ܘܐܬܐ ܗܘ ܥܒܕܐ ܐܡܪ ܗܠܝܢ ܠܡܪܗ ܗܝܕܝܢ ܪܓܙ ܗܘ ܡܪܐ ܒܝܬܐ ܘܐܡܪ ܠܥܒܕܗ ܕܦܘܩ ܒܥܓܠ ܠܫܘܩ̈ܐ ܘܠܫܩܩܐ ܕܡܕܝܢܬܐ ܘܐܥܠ ܠܟܐ ܠܡܣ̈ܟܢܐ ܘܠܡܣ̈ܠܝܐ ܘܠܡܚܓܪܐ ܘܠܡܟܐ̈ܒܐ ܘܠܡܥܘܪܐ
14:22	ܘܐܡܪ ܥܒܕܐ ܡܪܝ ܗܐ ܗܘܐ ܗܘ ܡܕܡ ܕܦܩܕܬ ܘܬܘܒ ܐܝܬ ܐܬܪܐ ܒܣܡܟܐ
14:23	ܐܡܪ ܠܥܒܕܗ ܦܘܩ ܠܐܘܪ̈ܚܬܐ ܘܠܒܝܬ ܣܝܓܐ ܘܥܒܕ ܕܢܥܠܘܢ ܕܢܬܡܠܐ ܒܝܬܝ
14:24	ܐܡܪܢܐ ܠܟܘܢ ܓܝܪ ܕܚܕ ܡܢ ܗܢܘܢ ܐܢܫܐ ܕܩܪܝܢ ܗܘܘ ܠܐ ܢܛܥܡܘܢ ܡܢ ܐܚܫܡܝܬܐ܀
14:25	ܘܟܕ ܐܙܠܝܢ ܗܘܘ ܥܡܗ ܟܢܫܐ ܣܓܝܐܐ ܐܬܗܦܟ ܘܐܡܪ ܠܗܘܢ
14:26	ܡܢ ܕܐܬܐ ܠܘܬܝ ܘܠܐ ܣܢܐ ܠܐܒܘܗܝ ܘܠܐܡܗ ܘܠܐܚܘܗܝ ܘܠܐܚܘܬܗ ܘܠܐܢܬܬܗ ܘܠܒܢܘܗܝ ܘܐܦ ܠܢܦܫܗ ܬܠܡܝܕܝ ܠܐ ܡܫܟܚ ܕܢܗܘܐ
14:28	ܡܢܘ ܓܝܪ ܡܢܟܘܢ ܕܨܒܐ ܕܢܒܢܐ ܡܓܕܠܐ ܘܠܐ ܠܘܩܕܡ ܝܬܒ ܡܬܚܫܒ ܢܦܩܬܗ ܕܐܢ ܐܝܬ ܠܗ ܠܡܫܠܡܘܬܗ
14:29	ܕܠܐ ܐܢ ܣܡ ܫܬܐܣܬܐ ܘܠܐ ܐܫܟܚ ܕܢܫܠܡ ܟܠ ܕܚܙܝܢ ܢܗܘܘܢ ܡܒܙܚܝܢ ܒܗ
14:30	ܘܐܡܪܝܢ ܗܢܐ ܓܒܪܐ ܫܪܝ ܕܢܒܢܐ ܘܠܐ ܐܫܟܚ ܕܢܫܠܡ
14:31	ܐܘ ܡܢܘ ܡܠܟܐ ܕܐܙܠ ܠܡܬܟܬܫܘ ܥܡ ܡܠܟܐ ܐܚܪܢܐ ܘܠܐ ܠܘܩܕܡ ܡܬܪܥܐ ܕܐܢ ܡܫܟܚ ܒܥܣܪ̈ܐ ܐܠܦܝܢ ܠܡܐܪܥ ܠܗܘ ܕܐܬܐ ܥܠܘܗܝ ܒܥܣܪ̈ܝܢ ܐܠܦܝܢ
14:32	ܘܐܠܐ ܥܕ ܪܚܝܩ ܡܫܕܪ ܐܝܙܓܕܐ ܘܒܥܐ ܡܢܗ ܥܠ ܫܠܡܐ܂
14:33	ܗܟܢܐ ܟܘܠ ܐܢܫ ܡܢܟܘܢ ܕܠܐ ܫܒܩ ܟܘܠܗ ܩܢܝܢܗ ܬܠܡܝܕܝ ܠܐ ܡܫܟܚ ܕܢܗܘܐ
14:34	ܫܦܝܪܐ ܗܝ ܡܠܚܐ ܐܢ ܕܝܢ ܡܠܚܐ ܬܦܟܗ܂ ܒܡܢܐ ܬܬܡܠܚ
14:35	ܠܐ ܠܐܪܥܐ ܘܠܐ ܠܙܒܠܐ ܐܙܠܐ ܐܠܐ ܡܫܬܕܝܐ ܠܒܪ ܡܢ ܕܐܝܬ ܠܗ ܐܕܢܐ ܕܢܫܡܥ ܢܫܡܥ
15:01	ܘܡܟܣܐ ܘܚܛܝܐ ܡܬܩܪܒܝܢ ܗܘܘ ܠܘܬܗ ܕܢܫܡܥܘܢܗ
15:02	ܘܣܦܪ̈ܐ ܘܦܪ̈ܝܫܐ ܪܛܢܝܢ ܗܘܘ ܘܐܡܪ̈ܝܢ ܗܢܐ ܠܚܛܝܐ ܡܩܒܠ ܘܐܟܠ ܥܡܗܘܢ
15:03	ܐܡܪ ܠܗܘܢ ܡܬܠܐ ܗܢܐ
15:04	ܡܢܘ ܡܢܟܘܢ ܕܐܝܬ ܠܗ ܡܐܐ ܥܪ̈ܒܝܢ ܘܢܐܒܕ ܚܕ ܡܢܗܘܢ ܠܐ ܫܒܩ ܬܫ̈ܥܝܢ ܘܬܫܥܐ ܒܡܕܒܪܐ ܘܐܙܠ ܒܥܐ ܠܗܘ ܕܐܒܝܕ ܥܕܡܐ ܕܢܫܟܚܝܘܗܝ
15:05	ܘܡܐ ܕܐܫܟܚܗ ܫܩܠ ܠܗ ܥܠ ܟܬܦܬܗ ܘܚܕܐ
15:06	ܘܐܬܐ ܠܒܝܬܗ ܘܩܪܐ ܠܪܚܡܘܗܝ ܘܠܫܒܒܘܗܝ ܘܐܡܪ ܚܕܘ ܥܡܝ ܕܐܫܟܚܬ ܥܪܒܝ ܕܐܒܝܕ ܗܘܐ
15:07	ܐܡܪܢܐ ܠܟܘܢ ܕܗܟܢܐ ܬܗܘܐ ܚܕܘܬܐ ܒܫܡܝܐ ܥܠ ܚܕ ܚܛܝܐ ܕܬܐܒ ܐܘ ܥܠ ܬܫ̈ܥܝܢ ܘܬܫ̈ܥܐ ܙܕܝܩܝܢ ܕܠܐ ܣܢܝܩܝܢ ܥܠ ܬܝܒܘܬܐ
15:08	ܐܘ ܐܝܕܐ ܗܝ ܐܢܬܬܐ ܕܐܝܬ ܠܗ ܥܣܪܐ ܙܘܙܝܢ ܘܬܐܒܕ ܚܕ ܡܢܗܘܢ ܠܐ ܡܢܗܪܐ ܫܪܓܐ ܘܚܡܐ ܒܝܬܐ ܘܒܥܝܐ ܠܗ ܚܦܝܛܐܝܬ ܥܕܡܐ ܕܬܫܟܚܝܘܗܝ
15:09	ܘܡܐ ܕܐܫܟܚܬܗ ܩܪܝܐ ܠܪܚܡܬܗ ܘܠܫܒܒܬܗ ܘܐܡܪܐ ܠܗܝܢ ܚܕܝܝܢ ܥܡܝ ܕܐܫܟܚܬ ܙܘܙܝ ܕܐܒܝܕ ܗܘܐ
15:10	ܐܡܪܢܐ ܕܗܟܢܐ ܬܗܘܐ ܚܕܘܬܐ ܩܕܡ ܟܠܗܘܢ ܡܠܐ̈ܟܐ ܕܐܠܗܐ ܥܠ ܚܕ ܚܛܝܐ ܕܬܐܒ
15:11	ܐܡܪ ܠܗܘܢ ܓܒܪܐ ܚܕ ܐܝܬ ܗܘܘ ܠܗ ܬܪ̈ܝܢ ܒܢܝܢ
15:12	ܐܡܪ ܗܘ ܙܥܘܪܐ ܠܐܒܘܗܝ܂ ܗܒ ܠܝ ܡܢܬܐ ܕܡܛܝܐ ܠܝ ܡܢ ܩܢܝܢܟ ܘܦܠܓ ܠܗܘܢ ܟܠܗ ܩܢܝܢܗ
15:13	ܘܒܬܪ ܝܘܡܬܐ ܩܠܝܠ ܟܢܫ ܗܘ ܒܪܗ ܙܥܘܪܐ ܟܘܠ ܡܕܡ ܕܡܛܝܗܝ ܘܐܙܠ ܠܐܬܪܐ ܪܚܝܩܐ ܘܬܡܢ ܒܕܪ ܩܢܝܢܗ ܡܛܠ ܕܚܝܐ ܗܘܐ ܦܪܚܐܝܬ ܥܡ ܙܢ̈ܝܬܐ܂
15:14	ܘܟܕ ܓܡܪ ܟܘܠ ܡܕܡ ܕܐܝܬ ܠܗ܂ ܘܗܘܐ ܟܦܢܐ ܒܐܬܪܐ ܗܘ
15:15	ܐܙܠ ܢܩܦ ܠܗ ܠܚܕ ܡܢ ܒܢ̈ܝ ܗܘ ܐܬܪܐ ܘܫܕܪܗ ܠܩܪܝܬܐ ܠܡܪܥܐ ܚܙܝܪ̈ܐ
15:16	ܡܬܪܓܪܓ ܗܘܐ ܡܢ ܗܢܘܢ ܩܪ̈ܛܐ ܕܐܟܠܝܢ ܗܘܘ ܚܙܝܪ̈ܐ ܕܢܡܠܐ ܟܪܣܗ ܘܠܐ ܐܢܫ ܝܗܒ ܗܘܐ ܠܗ
15:17	ܟܕ ܐܬܐ ܠܘܬ ܢܦܫܗ ܐܡܪ ܟܡܐ ܐܓܝܪ̈ܝܢ ܐܝܬ ܗܫܐ ܒܝܬ ܐܒܝ ܕܝܬܝܪ ܠܗܘܢ ܠܚܡܐ ܘܐܢܐ ܐܒܕܢܐ ܗܪܟܐ ܡܢ ܟܦܢܝ܂
15:18	ܐܠܐ ܐܩܘܡ ܐܙܠ ܠܘܬ ܐܒܝ ܘܐܡܪ ܠܗ ܐܒܝ ܚܛܝܬ ܒܫܡܝܐ ܘܩܕܡܝܟ
15:19	ܘܠܐ ܫܘܢܐ ܡܟܝܠ ܕܒܪܟ ܐܬܩܪܐ ܥܒܕܝܢܝ ܐܝܟ ܚܕ ܡܢ ܐܓܝܪ̈ܝܟ܂
15:20	ܘܩܡ ܐܬܐ ܠܘܬ ܐܒܘܗܝ ܘܥܕ ܗܘ ܪܚܝܩ ܚܙܝܗܝ ܐܒܘܗܝ ܘܐܬܪܚܡ ܥܠܘܗܝ ܘܪܗܛ ܢܦܠ ܥܠ ܨܘܪܗ ܘܢܫܩܗ
15:21	ܘܐܡܪ ܠܗ ܒܪܗ ܐܒܝ ܚܛܝܬ ܒܫܡܝܐ ܘܩܕܡܝܟ ܡܟܝܠ ܠܐ ܫܘܐ ܐܢܐ ܕܒܪܟ ܐܬܩܪܐ
15:22	ܐܡܪ ܐܒܘܗܝ ܠܥܒ̈ܕܘܗܝ܂ ܐܦܩܘ ܥܓܠ ܐܣܛܠܐ ܪܫܝܬܐ ܐܠܒܫܘܗܝ ܘܣܝܡܘ ܥܙܩܬܐ ܒܐܝܕܗ܂ ܘܐܣܐܢܘܗܝ ܡܣ̈ܢܐ
15:23	ܘܐܝܬܝܘ ܩܛܘܠܘ ܥܓܠܐ ܗܘ ܕܦܛܡܐ ܢܐܟܘܠ ܘܢܬܒܣܡ
15:24	ܕܗܢܐ ܒܪܝ ܡܝܬܐ ܗܘܐ ܘܚܝܐ܂ ܘܐܒܝܕܐ ܗܘܐ ܘܐܫܬܟܚ ܘܫܪܝܘ ܠܡܬܒܣܡܘ
15:25	ܘܗܘ ܒܪܗ ܩܫܝܫܐ ܒܩܪܝܬܐ ܗܘܐ ܘܟܕ ܐܬܐ ܩܪܒ ܠܘܬ ܒܝܬܐ ܫܡܥ ܩܠ ܙܡܪܐ ܘܨܦܘܢܝܐ
15:26	ܘܩܪܐ ܠܚܕ ܡܢ ܛܠܝܐ ܘܫܐܠܗ ܡܢܘ ܗܢܐ
15:27	ܐܡܪ ܠܗ ܐܚܘܟ ܐܬܐ ܘܩܛܠ ܐܒܘܟ ܥܓܠܐ ܕܦܛܡܐ ܕܟܕ ܚܠܝܡ ܐܩܒܠܗ܂
15:28	ܘܪܓܙ ܘܠܐ ܨܒܐ ܗܘܐ ܠܡܥܠ܂ ܘܢܦܩ ܐܒܘܗܝ ܘܒܥܐ ܗܘܐ ܡܢܗ
15:29	ܥܢܐ ܘܐܡܪ ܠܗ ܠܐܒܘܗܝ ܗܐ ܟܡܐ ܫ̈ܢܝܢ ܦܠܚܢܐ ܠܟ ܥܒܕܘܬܐ ܘܠܐ ܥܒܪܬ ܥܠ ܦܘܩ̈ܕܢܝܟ ܘܡܡܬܘܡ ܓܕܝܐ ܚܕ ܠܐ ܝܗܒܬ ܠܝ ܕܐܬܒܣܡ ܥܡ ܪ̈ܚܡܝ܂
15:30	ܘܗܢܐ ܒܪܟ ܟܕ ܦܪܚ ܩܢܝܢܟ ܥܡ ܙܢܝ̈ܬܐ܂ ܢܟܣܬ ܠܗ ܥܓܠܐ ܗܘ ܕܦܛܡܐ
15:31	ܐܡܪ ܠܗ ܒܪܝ ܒܟܠܙܒܢ ܥܡܝ ܐܢܬ܂ ܘܟܘܠ ܡܕܡ ܕܝܠܝ ܕܝܠܟ ܗܘ܂
15:32	ܠܡܒܣܡ ܕܝܢ ܘܠܐ ܗܘܐ ܘܠܡܚܕܐ ܕܗܢܐ ܐܚܘܟ ܡܝܬܐ ܗܘܐ ܘܚܝܐ ܘܐܒܝܕܐ ܗܘܐ ܘܐܚܬܟܚ܀
16:01	ܘܐܡܪ ܗܘܐ ܬܘܒ ܠܬܠܡ̈ܝܕܘܗܝ ܓܒܪܐ ܚܕ ܥܬܝܪܐ ܐܝܬ ܗܘܐ ܘܐܝܬ ܗܘܐ ܠܗ ܪܒ ܒܝܬܐ ܘܐܬܐܟܠܘ ܩܪܨܘܗܝ ܩܕܡܘܗܝ ܐܝܟܢܐ ܕܩܢܝܢܗ ܫܚܛ܂
16:02	ܘܩܪܝܗܝ ܡܪܗ ܘܐܡܪ ܠܗ ܡܢܘ ܗܢܐ ܕܫܡܥܢܐ ܥܠܝܟ ܐܬܐ ܗܒ ܚܫܒܢܐ ܕܫܘܠܛܢܟ ܠܐ ܓܝܪ ܡܫܟܚ ܐܢܬ ܬܘܒ ܪܒܝܬܐ ܕܬܗܘܐ ܠܝ
16:03	ܐܡܪ ܗܘ ܪܒ ܒܝܬܐ ܒܢܦܫܗ ܡܢܐ ܐܥܒܕ ܕܡܪܝ ܫܩܠ ܠܗ ܡܢܝ ܪܒܬ ܒܝܬܘܬܐ ܘܕܐܚܦܪ ܠܐ ܡܫܟܚ ܐܢܐ ܘܠܡܚܕܪ ܒܗܬ ܐܢܐ
16:04	ܝܕܥܬ ܡܢܐ ܐܥܒܕ ܕܡܐ ܕܢܦܩܬ ܡܢ ܪܒܬ ܒܝܬܘܬܐ ܢܩܒܠܘܢܢܝ ܒܒܬܝܗܘܢ
16:05	ܘܩܪܐ ܠܚܕ ܡܢ ܚܝܒܐ ܕܡܪܗ ܘܐܡܪ ܠܩܕܡܝܐ ܟܡܐ ܚܝܒ ܐܢܬ ܠܡܪܝ
16:06	ܐܡܪ ܠܗ ܡܐܐ ܡܬܪܝܢ ܡܫܚܐ ܘܝܬܒ ܥܓܠ ܘܟܬܒ ܐܢܝܢ ܚܡܫܝܢ
16:07	ܘܒܬܪܟܢ ܐܡܪ ܠܐܚܪܢܐ ܘܐܢܬ ܟܡܐ ܚܝܒ ܐܢܬ ܠܗ ܐܡܪ ܠܗ ܡܐܐ ܟܘܪܝܢ ܚܛܐ ܘܝܬܒ ܡܚܕܐ ܟܬܒ ܐܢܘܢ ܬܡܢܐܝܢ
16:08	ܘܫܒܚ ܡܪܐ ܠܪܒ ܒܝܬܐ ܕܥܘܠܐ ܕܚܟܝܡܐܝܬ ܥܒܕ ܘܚܟܝܡܝܢ ܐܢܘܢ ܒܢܘܗܝ ܕܥܠܡܐ ܗܢܐ ܒܫܪܒܬܗܘܢ ܗܕܐ ܡܢ ܒܢܘܗܝ ܕܢܘܗܪܐ
16:09	ܘܐܦ ܐܢܐ ܐܡܪܢܐ ܠܟܘܢ ܥܒܕܘ ܠܟܘܢ ܪܚܡܐ ܡܢ ܡܡܘܢܐ ܕܥܘܠܐ ܕܡܐ ܕܓܡܪ ܢܩܒܠܘܢܟܘܢ ܒܡ̈ܛܠܝܗܘܢ ܕܠܥܠܡ
16:10	ܡܢ ܕܒܩܠܝܠ ܓܝܪ ܡܗܝܡܢ ܐܦ ܒܣܓܝ ܡܗܝܡܢ ܘܡܢ ܕܒܩܠܝܠ ܥܘܠ ܐܦ ܒܣܓܝ ܥܘܠ ܗܘ܂
16:11	ܐܢ ܥܘܕ ܒܡܡܘܢܐ ܕܥܘܠܐ ܠܐ ܗܘܝܬܘܢ ܡܗܝܡܢܝܢ ܠܫܪܪܐ ܡܢܘ ܡܗܝܡܢ ܠܟܘܢ
16:12	ܘܐܢ ܒܕܠܐ ܕܝܠܟܘܢ ܠܐ ܐܫܬܟܚܬܘܢ ܡܗܝܡܢܝܢ ܕܝܠܟܘܢ ܡܢܐ ܢܬܠ ܠܟܘܢ
16:13	ܠܝܬ ܓܝܪ ܥܒܕܐ ܕܡܫܟܚ ܠܡܦܠܚ ܬܪܝܢ ܡܪܘܢ ܕܠܐ ܠܚܕ ܢܣܢܐ ܘܠܐܚܪܢܐ ܢܪܚܡ ܐܘ ܠܚܕ ܢܣܝܒܪ ܘܠܐܚܪܢܐ ܢܫܘܛ ܠܐ ܡܫܟܚܝܢ ܐܢܬܘܢ ܠܐܠܗܐ ܠܡܦܠܚ ܘܠܡܡܘܢܐ܀
16:14	ܘܗܘܐ ܟܕ ܫܡܥܘ ܦܪ̈ܝܫܐ ܗܠܝܢ ܟܠܗܝܢ ܡܡܝܩܝܢ ܗܘܘ ܒܗ ܡܛܠ ܕܪܚܡܝܢ ܗܘܘ ܟܣܦܐ
16:15	ܐܡܪ ܠܗܘܢ ܐܢܬܘܢ ܐܢܘܢ ܕܡܙܕܩܝܢ ܢܦܫܗܘܢ ܒܥܝܢܝ ܒܢܝ ܐܢܫܐ ܐܠܗܐ ܕܝܢ ܝܕܥ ܠܒܘܬܟܘܢ ܕܡܕܡ ܕܪܡ ܒܝܬ ܒܢܝ ܐܢܫܐ ܩܕܡ ܐܠܗܐ ܢܕܝܕ ܗܘ܀
16:16	ܢܡܘܣܐ ܘܢܒܝܐ ܥܕܡܐ ܠܝܘܚܢܢ ܡܟܝܠ ܡܠܟܘܬܗ ܕܐܠܗܐ ܡܣܬܒܪܐ ܘܟܘܠ ܐܢܫ ܠܗ ܡܬܚܒܨܝܢ
16:17	ܦܫܝܩ ܗܘ ܕܝܢ ܕܫܡܝܐ ܘܐܪܥܐ ܢܥܒܪܘܢ ܐܘ ܐܬܘܬܐ ܚܕܐ ܡܢ ܢܡܘܣܐ ܬܥܒܪ
16:18	ܟܘܠ ܐܢܫ ܕܢܫܪܐ ܐܢܬܬܗ ܘܢܣܒ ܐܚܪܬܐ ܡܓܪ ܓܐܪ ܘܗܘ ܕܢܣܒ ܫܒܝܩܬܐ ܡܓܐܪ ܓܐܪ܀
16:19	ܓܒܪܐ ܚܕ ܕܥܬܝܪܐ ܐܝܬ ܗܘܐ ܡܬܠܒܫ ܗܘܐ ܐܪܓܘܢܐ ܘܢܚܬܐ ܛܒܐ ܘܟܠܝܘܡ ܡܬܒܣܡ ܗܘܐ
16:20	ܘܡܣܟܢܐ ܚܕ ܐܝܬ ܗܘܐ ܕܫܡܗ ܠܥܙܪ ܘܪܡܐ ܗܘܐ ܠܘܬ ܬܪܥܗ
16:21	ܘܡܬܪܓܪܓ ܗܘܐ ܕܢܡܠܐ ܟܪܣܗ ܡܢ ܡܕܡ ܕܢܦܠ ܗܘܐ ܡܢ ܦܬܘܪܗ ܕܗܘ ܥܬܝܪܐ ܘܐܦ ܟܠܒ̈ܐ ܐܬܝܢ ܗܘܘ ܡܠܚܟܝܢ ܫܚ̈ܢܘܗܝ
16:22	ܘܗܘܐ ܘܡܝܬ ܗܘ ܡܣܟܢܐ ܘܐܘܒܠܘܗܝ ܡܠܐܟܐ ܠܥܘܒܗ ܕܐܒܪܗܡ ܘܡܝܬ ܗܘ ܥܬܝܪܐ ܘܐܬܩܒܪ
16:23	ܘܪܡܐ ܒܫܝܘܠ ܐܪܝܡ ܥܝܢܘܗܝ ܟܕ ܡܫܬܢܩ ܘܚܙܐ ܗܘܐ ܠܐܒܪܗܡ ܡܢ ܪܘܚܩ ܘܠܠܥܙܪ ܒܥܘܒܗ܂
16:24	ܘܩܪܐ ܘܐܡܪ ܐܒܝ ܐܒܪܗܡ ܐܬܪܚܡ ܥܠܝ܂ ܘܫܕܪ ܠܠܥܙܪ ܕܢܨܒܥ ܪܝܫ ܨܒܥܗ ܒܡܝܐ ܢܩܘܪܪ ܠܝ ܠܫܢܝ ܕܗܐ ܡܫܬܢܩ ܐܢܐ ܒܫܠܗܒܝܬܐ ܗܕܐ
16:25	ܐܡܪ ܠܗ ܐܒܪܗܡ ܒܪܡ ܐܬܕܟܪ ܕܩܒܠܬ ܛܒܬܟ ܒܚܝܝܟ ܘܗܟܘܬ ܐܦ ܠܥܙܪ ܒܝܫܬܗ ܘܗܫܐ ܗܪܟܐ ܡܬܢܝܚ ܘܐܢܬ ܡܫܬܢܩ ܐܢܬ
16:26	ܘܥܡܗܝ̈ܢ ܥܡ ܗܠܝܢ ܟܘܠܗܝܢ ܗܘܬܐ ܪܒܬܐ ܣܝܡܐ ܒܝܢܝܢ ܘܠܟܘܢ ܕܐܝܠܝܢ ܕܨܒܝܢ ܕܢܥܒܪܘܢ ܡܟܐ ܠܘܬܟܘܢ ܠܐ ܢܫܟܚܘܢ ܘܐܦܠܐ ܕܡܢ ܬܡܢ ܢܥܒܪܘܢ ܠܘܬܢ
16:27	ܐܡܪ ܡܕܝܢ ܒܥܢܐ ܡܢܟ ܐܒܝ ܕܬܫܕܪܘܗܝ ܠܒܝܬ ܐܒܝ
16:28	ܚܡܫܐ ܓܝܪ ܐܚܝܢ ܐܝܬ ܠܝ܂ ܕܢܣܗܕ ܐܢܘܢ ܕܠܡܐ ܐܦ ܗܢܘܢ ܢܐܬܘܢ ܠܕܘܟܬܐ ܗܕܐ ܕܬܫܢܝܩܐ
16:29	ܐܡܪ ܐܒܪܗܡ ܐܝܬ ܠܗܘܢ ܡܘܫܐ ܘܢܒܝܐ ܢܫܡܥܘܢ ܐܢܘܢ
16:30	ܐܡܪ ܠܗ ܠܐ ܐܒܝ ܐܒܪܗܡ ܐܠܐ ܐܢ ܐܢܫ ܡܢ ܡܝܬܐ ܢܐܙܠ ܠܘܬܗܘܢ ܬܝܒܝܢ
16:31	ܐܡܪ ܠܗ ܐܢ ܠܡܘܫܐ ܘܠܢ̈ܒܝܐ ܠܐ ܫܡܥܝܢ ܐܦܠܐ ܐܢ ܐܢܫ ܡܢ ܡܝܬ̈ܐ ܢܐܙܠ ܡܗܝܡܢܝܢ ܠܗ܀
17:01	ܘܐܡܪ ܗܘܐ ܠܬܠܡܝܕܘܗܝ ܠܐ ܡܫܟܚܐ ܕܠܐ ܢܐܬܘܢ ܡܟܫ̈ܘܠܐ܂ ܒܪܡ ܘܝ ܠܗܘ ܕܒܐܝܕܗ ܢܐܬܘܢ
17:02	ܦܩܚ ܗܘܐ ܠܗ ܐܠܘ ܪܚܝܐ ܕܚܡܪܐ ܬܠܝܐ ܒܨܘܪܗ ܘܫܕܐ ܒܝܡܐ ܐܘ ܢܟܫܠ ܠܚܕ ܡܢ ܗܠܝܢ ܙܥܘܪ̈ܐ
17:03	ܐܙܕܗܪܘ ܒܢܦܫܟܘܢ ܐܢ ܢܚܛܐ ܐܚܘܟ ܟܐܐ ܒܗ ܐܢ ܬܒ ܫܒܘܩ ܠܗ
17:04	ܘܐܢ ܫܒܥ ܙܒܢܝܢ ܒܝܘܡܐ ܢܚܛܐ ܘܗܠܝܢ ܫܒܥ ܙܒܢܝܢ ܢܬܦܢܐ ܠܘܬܟ ܘܢܐܡܪ ܕܬܐܒܢܐ ܫܒܘܩ ܠܗ܀
17:05	ܐܡܪ̈ܝܢ ܠܗ ܫܠܝܚܘܗܝ ܠܝܫܘܥ ܐܘܣܦ ܠܢ ܗܝܡܢܘܬܐ܂
17:06	ܥܢܐ ܘܐܡܪ ܠܗܘܢ ܐܠܘ ܐܝܬ ܒܟܘܢ ܗܝܡܢܘܬܐ ܐܝܟ ܦܪܕܬܐ ܕܚܪܕܠܐ ܐܡܪܬܘܢ ܗܘܝܬܘܢ ܠܬܘܬܐ ܗܢܐ ܕܐܬܥܩܪ ܡܢ ܣܡܟܐ ܘܐܬܢܨܒ ܒܝܡܐ܂ ܡܫܬܡܥ ܗܘܐ ܠܟܘܢ܂
17:07	ܘܡܢܘ ܡܢܟܘܢ ܕܐܝܬ ܠܗ ܥܒܕܐ ܕܕܒܪ ܦܕܢܐ ܐܘ ܕܪܥܐ ܥܢܐ܂ ܘܡܐ ܕܥܐܠ ܡܢ ܚܩܠܐ ܠܡܐ ܐܡܪ ܠܗ ܡܚܕܐ ܥܒܪ ܐܣܬܡܟ
17:08	ܐܠܐ ܐܡܪ ܠܗ ܛܝܒ ܠܝ ܡܕܡ ܕܐܚܫܡ ܘܐܣܘܪ ܚܨ̈ܝܟ ܫܡܫܝܢܝ ܥܕܡܐ ܕܐܠܥܣ ܘܐܫܬܐ܂ ܘܒܬܪܟܢ ܐܦ ܐܢܬ ܬܠܥܣ ܘܬܫܬܐ
17:09	ܠܡܐ ܛܝܒܘܬܐ ܕܢܦܫܗ ܐܚܝܕ ܥܒܕܐ ܗܘ ܕܥܒܕ ܐܝܠܝܢ ܕܦܩܝܕ ܠܗ܂
17:10	ܗܟܢܐ ܐܦ ܐܢܬܘܢ ܡܐ ܕܥܒܕܬܘܢ ܐܝܠܝܢ ܕܦܩܝܕܢ ܠܟܘܢ ܐܡܪ̈ܝܢ ܐܢܬܘܢ ܐܢܚܢܢ ܥܒ̈ܕܐ ܡܕܡ ܕܚܝܒܝܢ ܗܘܝܢ ܠܡܥܒܕ ܥܒܕܢ܀
17:11	ܘܟܕ ܐܙܠ ܗܘܐ ܠܐܘܪܫܠܡ ܘܥܒܪ ܒܝܬ ܫܡܪܝܐ ܠܓܠܠܝ̈ܐ
17:12	ܘܟܕ ܥܐܠ ܗܘܐ ܠܩܪܝܬܐ ܚܕܐ ܘܗܐ ܥܣܪܐ ܐܢܫܝܢ ܓܪܒܐ ܩܝܡܝܢ ܗܘܘ ܡܢ ܪܘܚܩܐ܂
17:13	ܘܐܪܝܡܘ ܩܠܗܘܢ ܘܐܡܪܝܢ ܠܗ ܝܫܘܥ ܪܒܢ ܐܬܪܚܡ ܥܠܝܢ܂
17:14	ܘܟܕ ܚܙܐ ܐܢܘܢ ܐܡܪ ܠܗܘܢ ܙܠܘ ܚܘܘ ܢܦܫܟܘܢ ܠܟܗ̈ܢܐ ܘܟܕ ܐܙܠܝܢ ܐܬܕܟܝܘ
17:15	ܘܚܕ ܡܢܗܘܢ ܟܕ ܚܙܐ ܕܐܬܕܟܝ ܗܦܟ ܗܘܐ ܠܗ ܘܒܩܠܐ ܪܡܐ ܡܫܒܚ ܗܘܐ ܠܐܠܗܐ܂
17:16	ܘܢܦܠ ܥܠ ܐܦܘܗܝ ܩܕܡ ܪ̈ܓܠܘܗܝ ܕܝܫܘܥ ܘܡܘܕܐ ܗܘܐ ܠܗ ܘܗܘ ܗܢܐ ܫܡܪܝܐ ܗܘܐ
17:17	ܥܢܐ ܝܫܘܥ ܘܐܡܪ ܗܠܝܢ ܥܣܪܐ ܗܘܝܢ ܗܘܘ ܕܐܬܕܟܝܘ ܐܝܠܟܐ ܐܢܘܢ ܬܫܥܐ
17:18	ܚܕ ܡܢܗܘܢ ܠܐ ܗܦܟ ܠܡܬܠ ܬܫܒܘܚܬܐ ܠܐܠܗܐ ܐܠܐ ܗܢܐ ܕܡܢ ܥܡܐ ܗܘ ܢܘܟܪܝܐ
17:19	ܐܡܪ ܠܗ ܙܠ ܗܝܡܢܘܬܟ ܐܚܝܬܟ܀
17:20	ܘܫܐܠܘܗܝ ܦܪܝܫܐ ܘܐܡܪܝܢ ܠܗ ܐܡܬܝ ܐܬܝܐ ܡܠܟܘܬܗ ܕܐܠܗܐ ܥܢܐ ܘܐܡܪ ܠܗܘܢ ܠܐ ܐܬܝܐ ܡܠܟܘܬܗ ܕܐܠܗܐ ܒܢܛܘܪܬܐ܂
17:21	ܘܠܐ ܐܡܪܝܢ ܗܪܟܐ ܗܝ ܐܘ ܗܪܬܡܢ ܗܝ ܗܐ ܓܝܪ ܡܠܟܘܬܗ ܕܐܠܗܐ ܒܝܢܬܟܘܢ܂
17:22	ܘܐܡܪ ܗܘܐ ܠܬܠܡ̈ܝܕܘܗܝ ܢܐܬܘܢ ܝܘܡ̈ܬܐ ܕܬܬܪܓܪܓܘܢ ܕܬܚܙܘܢ ܚܕ ܡܢ ܝܘܡ̈ܬܗ ܕܒܪܗ ܕܐܢܫܐ ܘܠܐ ܬܚܙܘܢ܂
17:23	ܘܐܢ ܢܐܡܪܘܢ ܠܟܘܢ ܗܐ ܗܪܬܡܢ ܗܘ ܘܗܐ ܗܪܟܐ ܠܐ ܬܪܗܛܘܢ ܘܠܐ ܬܐܙܠܘܢ
17:24	ܐܝܟܢܐ ܓܝܪ ܕܒܪܩܐ ܒܪܩ ܡܢ ܪܫܘܗܝ ܕܫܡܝܐ ܥܕܡܐ ܠܪܫܗ ܗܟܢܐ ܢܗܘܐ ܝܘܡܗ ܕܒܪܗ ܕܐܢܫܐ
17:25	ܡܢ ܠܘܩܕܡ ܕܝܢ ܥܬܝܕ ܗܘ ܕܢܚܫ ܒܣܓܝܐܬܐ ܘܕܢܣܬܠܐ ܡܢ ܫܪܒܬܐ ܗܕܐ܂
17:26	ܘܐܝܟܢܐ ܕܗܘܐ ܒܝܘܡܬ̈ܐ ܕܢܘܚ ܗܟܢܐ ܢܗܘܐ ܒܝܘܡ̈ܬܐ ܕܒܪܗ ܕܐܢܫܐ
17:27	ܕܐܟܠܝܢ ܗܘܘ ܘܫܬܝܢ ܘܢܣܒܝܢ ܗܘܘ ܢܫ̈ܐ ܘܝܗܒܝܢ ܠܓܒܪܐ ܥܕܡܐ ܠܝܘܡܐ ܕܥܠ ܢܘܚ ܠܩܒܘܬܐ܂ ܘܐܬܐ ܛܘܦܢܐ ܘܫܩܠ ܐܢܘܢ ܠܟܘܠܗܘܢ
17:28	ܘܐܝܟܢܐ ܕܗܘܐ ܒܝܘܡ̈ܬܗ ܕܠܘܛ ܕܐܟܠܝܢ ܗܘܘ ܘܫܬܝܢ ܘܙܒܢܝܢ ܗܘܘ ܘܡܙܒܢܝܢ
17:29	ܘܒܝܘܡܐ ܕܢܦܩ ܠܘܛ ܡܢ ܣܕܘܡ ܐܡܛܪ ܢܘܪܐ ܘܟܒܪܝܬܐ ܡܢ ܫܡܝܐ ܘܐܘܒܕ ܐܢܘܢ ܠܟܠܗܘܢ
17:30	ܗܟܢܐ ܢܗܘܐ ܒܝܘܡܐ ܕܡܬܓܠܐ ܒܪܗ ܕܐܢܫܐ
17:31	ܒܗܝ ܕܝܢ ܫܥܬܐ ܡܢ ܕܥܠ ܐܓܪܐ ܗܘ ܠܐ ܢܚܘܬ ܠܡܫܩܠ ܡܐܢܘܗܝ ܡܢ ܒܝܬܐ ܘܡܢ ܕܒܩܪܝܬܐ ܗܘ ܠܐ ܢܬܗܦܟ ܠܒܣܬܪܗ܂
17:32	ܘܐܬܕܟܪܘ ܠܐܢܬܬܗ ܕܠܘܛ
17:33	ܡܢ ܕܨܒܐ ܕܢܚܐ ܢܦܫܗ ܢܘܒܕܝܗ܂ ܘܡܢ ܕܢܘܒܕ ܢܦܫܗ ܢܚܝܗ܂
17:34	ܐܡܪܢܐ ܠܟܘܢ ܕܒܗܘ ܠܠܝܐ ܢܗܘܘܢ ܬܪ̈ܝܢ ܒܚܕܐ ܥܪܣܐ܂ ܚܕ ܢܬܕܒܪ ܘܚܕ ܢܫܬܒܩ܂
17:35	ܘܢܗܘ̈ܝܢ ܬܪ̈ܬܝܢ ܛܚܢܢ ܒܚܕܐ ܪܚܝܐ܂ ܚܕܐ ܬܬܕܒܪ ܘܚܕܐ ܬܫܬܒܩ܂
17:36	ܘܢܗܘܘܢ ܬܪ̈ܝܢ ܒܩܪܝܬܐ ܚܕ ܢܬܕܒܪ ܘܚܕ ܢܫܬܒܩ
17:37	ܐܡܪܝܢ ܠܗ ܠܐܝܠܟܐ ܡܪܢ܂ ܐܡܪ ܠܗܘܢ ܐܝܟܐ ܕܦܓܪܐ ܬܡܢ ܢܬܟܢܫܘܢ ܢܫܪ̈ܐ
18:01	ܐܡܪ ܠܗܘܢ ܬܘܒ ܐܦ ܡܬܠܐ ܗܢܐ ܕܢܗܘܘܢ ܡܨܠܝܢ ܒܟܘܠ ܥܕܢ ܘܠܐ ܗܘܬ ܡܐܢܐ ܠܗܘܢ܂
18:02	ܕܝܢܐ ܚܕ ܐܝܬ ܗܘܐ ܒܡܕܝܢܬܐ܂ ܕܡܢ ܐܠܗܐ ܠܐ ܕܚܠ ܗܘܐ ܘܡܢ ܒܪ ܐܢܫܐ ܠܐ ܡܬܟܚܕ ܗܘܐ
18:03	ܘܐܪܡܠܬܐ ܐܝܬ ܗܘܐ ܒܗ ܒܗܝ ܡܕܝܢܬܐ܂ ܘܐܬܝܐ ܗܘܬ ܠܘܬܗ ܘܐܡܪܐ ܠܗ ܬܒܥܝܢܝ ܡܢ ܒܥܠܕܝܢܝ
18:04	ܘܠܐ ܨܒܐ ܗܘܐ ܒܬܪܟܢ ܐܡܪ ܒܢܦܫܗ܂ ܐܢ ܡܢ ܐܠܗܐ ܠܐ ܕܚܠ ܐܢܐ ܘܡܢ ܒܪ ܐܢܫܐ ܠܐ ܡܬܟܚܕ ܐܢܐ
18:05	ܘܗܕܐ ܐܪܡܠܬܐ ܕܗܟܢܐ ܡܠܐܝܐ ܠܝ ܐܬܒܥܝܗ ܕܠܐ ܒܚܪܬܐ ܬܐܬܐ ܬܐܚܕܢܝ
18:06	ܐܡܪ ܝܫܘܥ ܫܡܥܘ ܡܢܐ ܐܡܪ ܕܝܢܐ ܕܥܘܠܐ܂
18:07	ܐܠܗܐ ܗܟܝܠ ܠܐ ܝܬܝܪܐܝܬ ܢܥܒܕ ܬܒܥܬܐ ܠܓܒ̈ܘܗܝ ܕܩܪܝܢ ܠܗ ܒܐܝܡܡܐ ܘܒܠܠܝܐ ܘܡܓܪ ܪܘܚܗ ܥܡܗܘܢ
18:08	ܐܡܪ ܐܢܐ ܠܟܘܢ ܕܢܥܒܕ ܬܒܥܬܗܘܢ ܒܥܓܠ ܒܪܡ ܢܐܬܐ ܟܝ ܒܪܗ ܕܐܢܫܐ ܢܫܟܚ ܗܝܡܢܘܬܐ ܥܠ ܐܪܥܐ܂
18:09	ܘܐܡܪ ܗܘܐ ܡܬܠܐ ܗܢܐ ܠܩܒܠ ܐܢܫܐ ܕܬܟܝܠܝܢ ܥܠ ܢܦܫܗܘܢ܂ ܕܙܕܝܩܝܢ ܐܢܘܢ ܘܒܣܝܢ ܗܘܘ ܥܠ ܣܓܝܐܐ
18:10	ܬܪܝܢ ܐܢܫܝܢ ܣܠܩܘ ܠܗܝܟܠܐ ܠܡܨܠܝܘ ܚܕ ܦܪܝܫܐ ܘܐܚܪܢܐ ܡܟܣܐ
18:11	ܗܘ ܦܪܝܫܐ ܩܐܡ ܒܝܢܘܗܝ ܠܢܦܫܗ ܡܨܠܐ ܡܘܕܢܐ ܠܟ ܐܠܗܐ ܕܠܐ ܗܘܝܬ ܐܝܟ ܫܪܟܐ ܕܐܢܫܐ ܚ̈ܛܘܦܐ ܐܘ ܥܠܘ̈ܒܐ ܐܘ ܓܝܪܐ ܘܠܐ ܐܝܟ ܗܢܐ ܡܟܣܐ
18:12	ܐܠܐ ܨܐܡ ܐܢܐ ܬܪܝܢ ܒܫܒܬܐ ܘܡܥܣܪ ܐܢܐ ܟܠܡܕܡ ܕܩܢܐ ܐܢܐ܂
18:13	ܗܘ ܕܝܢ ܡܟܣܐ ܩܐܡ ܗܘܐ ܡܢ ܪܘܚܩܐ ܘܠܐ ܨܒܐ ܗܘܐ ܕܐܦܠܐ ܥܝܢ̈ܘܗܝ ܢܪܝܡ ܠܫܡܝܐ܂ ܐܠܐ ܛܪܦ ܗܘܐ ܥܠ ܚܕܝܗ܂ ܘܐܡܪ ܐܠܗܐ ܐܬܪܚܡ ܥܠܝ ܚܛܝܐ
18:14	ܐܡܪܢܐ ܠܟܘܢ ܕܢܚܬ ܗܢܐ ܠܒܝܬܗ ܡܙܕܩ ܝܬܝܪ ܡܢ ܗܘ ܟܠ ܐܢܫ ܓܝܪ ܕܢܪܝܡ ܢܦܫܗ ܢܬܡܟܟ ܘܕܢܡܟ ܢܦܫܗ ܢܬܪܝܡ܂
18:15	ܘܩܪܒܘ ܗܘܘ ܠܗ ܐܦ ܝܠܘ̈ܕܐ ܕܢܣܝܡ ܐܝܕܗ ܥܠܝܗܘܢ ܘܟܐܘ ܒܗܘܢ ܬܠܡ̈ܝܕܘܗܝ܂
18:16	ܐܡܪ ܠܗܘܢ ܝܫܘܥ ܫܒܘܩܘ ܛ̈ܠܝܐ ܐܬܝܢ ܠܘܬܝ ܘܠܐ ܬܟܠܘܢ ܐܢܘܢ܂ ܕܐܝܠܝܢ ܓܝܪ ܕܐܝܟ ܗܠܝܢ ܐܢܘܢ ܕܝܠܗܘܢ ܗܝ ܡܠܟܘܬܐ ܕܫܡܝܐ
18:17	ܐܡܝܢ ܐܡܪܢܐ ܠܟܘܢ ܕܡܢ ܕܠܐ ܡܩܒܠ ܡܠܟܘܬܐ ܕܫܡܝܐ ܐܝܟ ܛܠܝܐ ܠܐ ܢܥܘܠ ܠܗ܀
18:18	ܘܫܐܠܗ ܗܘܐ ܚܕ ܡܢ ܪ̈ܫܐ ܘܐܡܪ ܠܗ ܡܠܦܢܐ ܛܒܐ ܡܢܐ ܐܥܒܕ ܕܐܪܬ ܚܝ̈ܐ ܕܠܥܠܡ
18:19	ܐܡܪ ܠܗ ܝܫܘܥ ܡܢܐ ܩܪܐ ܐܢܬ ܠܝ ܛܒܐ ܠܝܬ ܛܒܐ ܐܠܐ ܐܢ ܚܕ ܐܠܗܐ܂
18:20	ܦܘܩܕܢܐ ܕܝܢ ܝܕܥ ܐܢܬ ܠܗܘܢ ܠܐ ܬܩܛܘܠ ܘܠܐ ܬܓܘܪ ܠܐ ܬܓܢܘܒ ܘܠܐ ܬܣܗܕ ܣܗܕܘܬܐ ܕܫܘܩܪܐ ܝܩܪ ܠܐܒܘܟ ܘܠܐܡܟ
18:21	ܐܡܪ ܗܠܝܢ ܗܐ ܡܢ ܕܛܠܐ ܐܢܐ ܢܛܪܬ ܐܢܝܢ
18:22	ܟܕ ܫܡܥ ܝܫܘܥ ܐܡܪ ܠܗ ܚܕܐ ܬܘܒ ܚܣܝܪܐ ܠܟ ܙܒܢܢ ܟܘܠ ܡܕܡ ܕܐܝܬ ܠܟ ܘܗܒ ܠܡܣܟܢܐ܂ ܘܬܗܘܐ ܠܟ ܣܝܡܬܐ ܒܫܡܝܐ܂ ܘܬܐ ܒܬܪܝ܂
18:23	ܗܘ ܕܝܢ ܟܕ ܫܡܥ ܗܠܝܢ܂ ܟܪܝܬ ܠܗ ܛܒ܂ ܥܬܝܪ ܗܘܐ ܓܝܪ ܛܒ܂
18:24	ܟܕ ܚܙܐ ܝܫܘܥ ܕܟܪܝܬ ܠܗ܂ ܐܡܪ ܐܝܟܢܐ ܥܛܠܐ ܠܐܝܠܝܢ ܕܐܝܬ ܠܗܘܢ ܢܟܣܐ ܕܢܥܠܘܢ ܠܡܠܟܘܬܐ ܕܐܠܗܐ
18:25	ܕܠܝܠܐ ܗܝ ܓܪ ܠܓܡܠܐ ܕܢܥܒܪ ܒܚܪܘܪܐ ܕܡܚܛܐ ܐܘ ܥܬܝܪܐ ܠܡܠܟܘܬܗ ܕܐܠܗܐ
18:26	ܘܐܡܪܝܢ ܗܘܘ ܐܝܠܝܢ ܕܫܡܥܘ ܡܢܘ ܡܫܟܚ ܠܡܚܐ܂
18:27	ܐܡܪ ܠܗܘܢ ܐܝܠܝܢ ܕܠܘܬ ܒܢ̈ܝ ܐܢܫܐ ܠܐ ܡܫܟܚܢ ܠܡܗܘܐ ܠܘܬ ܐܠܗܐ ܡܫܟܚܢ ܕܢܗܘܝܢ
18:28	ܐܡܪ ܠܗ ܟܐܦܐ ܗܐ ܐܢܚܢܢ ܫܒܩܢ ܟܘܠ ܡܕܡ ܕܐܝܬ ܠܢ ܘܐܬܝܢ ܒܬܪܟ
18:29	ܐܡܪ ܠܗ ܝܫܘܥ ܐܡܝܢ ܐܡܪܢܐ ܠܟ ܕܠܝܬ ܕܫܒܩ ܒܝܬܐ ܐܘ ܐܒܗ̈ܐ ܐܘ ܐܚܐ ܐܘ ܐܢܬܬܐ ܐܘ ܒܢ̈ܝܐ ܡܛܠ ܡܠܟܘܬܐ ܕܐܠܗܐ
18:30	ܕܠܐ ܢܣܒ ܚܕ ܒܡܐܐ ܒܗܢܐ ܙܒܢܐ ܘܒܥܠܡܐ ܕܥܬܝܕ ܢܐܪܬ ܚܝܐ ܕܠܥܠܡ
18:31	ܘܕܒܪ ܠܬܪܥܣܪ̈ܬܗ ܘܐܡܪ ܠܗܘܢ ܗܐ ܣܠܩܝܢ ܐܢܚܢܢ ܠܐܘܪܫܠܡ ܘܡܫܬܠܡܢ ܟܠܗ̈ܝܢ ܐܝܠܝܢ ܕܟܬܝܒܢ ܒܢܒܝܐ ܥܠ ܒܪܗ ܕܐܢܫܐ
18:32	ܡܫܬܠܡ ܓܝܪ ܠܥܡܡܐ ܘܢܒܙܚܘܢ ܒܗ ܘܢܨܥܪܘܢܗ ܘܢܪܩܘܢ ܒܐ̈ܦܘܗܝ
18:33	ܘܢܢܓܕܘܢܗ ܘܢܩܛܠܘܢܗ ܘܠܝܘܡܐ ܕܬܠܬܐ ܢܩܘܡ
18:34	ܘܗܢܘܢ ܚܕܐ ܡܢ ܗܠܝܢ ܠܐ ܐܣܬܟܠܘ ܐܠܐ ܡܟܣܝܐ ܗܘܬ ܡܢܗܘܢ ܡܠܬܐ ܘܠܐ ܐܫܬܘܕܥܘ ܐܝܠܝܢ ܕܐܬܡܠܠ ܥܡܗܘܢ
18:35	ܘܟܕ ܩܪܝܒ ܗܘܐ ܕܝܢ ܠܐܝܪܝܚܘ ܓܒܪܐ ܚܕ ܣܡܝܐ ܝܬܒ ܗܘܐ ܥܠ ܝܕ ܐܘܪܚܐ ܘܚܕܪ
18:36	ܘܟܕ ܫܡܥ ܩܠ ܟܢܫܐ ܕܥܒܪ ܡܫܐܠ ܗܘܐ ܕܡܢܘ ܗܢܐ
18:37	ܐܡܪܝܢ ܠܗ ܝܫܘܥ ܢܨܪܝܐ ܥܒܪ
18:38	ܘܩܥܐ ܘܐܡܪ ܝܫܘܥ ܒܪܗ ܕܕܘܝܕ ܐܬܪܚܡ ܥܠܝ
18:39	ܘܐܝܠܝܢ ܕܐܙܠܝܢ ܗܘܘ ܩܕܡܘܗܝ ܕܝܫܘܥ ܟܐܝܢ ܗܘܘ ܒܗ ܕܢܫܬܘܩ ܠܗ ܘܗܘ ܝܬܝܪܐܝܬ ܩܥܐ ܗܘܐ ܘܐܡܪ ܒܪܗ ܕܕܘܝܕ ܐܬܪܚܡ ܥܠܝ
18:40	ܘܩܡ ܗܘ ܝܫܘܥ ܘܦܩܕ ܕܢܝܬܘܢܗ ܘܟܕ ܩܪܒ ܠܘܬܗ ܫܐܠܗ
18:41	ܘܐܡܪ ܠܗ ܡܢܐ ܨܒܐ ܐܢܬ ܕܐܥܒܕ ܠܟ ܐܡܪ ܠܗ ܡܪܝ ܕܐܚܙܐ
18:42	ܐܡܪ ܠܗ ܝܫܘܥ ܚܙܝ ܗܝܡܢܘܬܟ ܐܚܝܬܟ
18:43	ܘܒܪܫܥܬܗ ܚܙܐ ܘܐܬܐ ܗܘܐ ܒܬܪܗ ܘܡܫܒܚ ܗܘܐ ܠܐܠܗܐ ܘܟܠܗ ܥܡܐ ܚܙܐ ܘܝܗܒ ܫܘܒܚܐ ܠܐܠܗܐ܀
19:01	ܘܟܕ ܥܠ ܘܥܒܪ ܒܐܝܪܝܚܘ
19:02	ܘܓܒܪܐ ܚܕ ܕܫܡܗ ܗܘܐ ܙܟܝ ܘܪܒ ܡܟܣܐ ܗܘܐ ܘܥܬܝܪ ܗܘܐ
19:03	ܘܨܒܐ ܗܘܐ ܠܡܚܙܝܗ ܠܝܫܘܥ ܡܢܘ ܘܠܐ ܡܫܟܚ ܗܘܐ ܡܛܠ ܟܢܫܐ ܡܛܠ ܕܒܩܘܡܬܗ ܙܥܘܪ ܗܘܐ
19:04	ܘܪܗܛ ܠܩܕܡܘܗܝ ܘܣܠܩ ܠܬܬܐ ܦܟܝܗܬܐ ܕܢܚܙܝܘܗܝ ܡܛܘܠ ܕܗܟܘܬ ܥܒܪ ܗܘܐ ܝܫܘܥ
19:05	ܘܟܕ ܚܙܝܗܝ ܐܡܪ ܠܗ ܐܣܬܪܗܒ ܚܘܬ ܙܟܝ ܝܘܡܢܐ ܓܝܪ ܒܒܝܬܟ ܘܠܐ ܠܝ ܕܐܗܘܐ
19:06	ܘܐܣܬܪܗܒ ܢܚܬ ܙܟܝ ܘܩܒܠܗ ܚܕܝܐܝܬ܂
19:07	ܘܟܕ ܚܙܘ ܗܘܘ ܪܛܢܝܢ ܗܘܘ ܘܐܡܪܝܢ ܕܠܘܬ ܓܒܪܐ ܚܛܝܐ ܥܠ ܕܢܫܪܐ
19:08	ܘܩܡ ܙܟܝ ܘܐܡܪ ܠܝܫܘܥ ܗܐ ܡܪܝ ܦܠܓܘܬ ܢܟܣ̈ܝ ܝܗܒܢܐ ܠܡܣܟܢܐ܂ ܘܟܠ ܕܓܠܙܬ ܚܕ ܒܐܪܒܥܐ ܦܪܥܢܐ܂
19:09	ܐܡܪ ܠܗ ܝܫܘܥ ܝܘܡܢܐ ܗܘܘ ܚܝܐ ܒܒܝܬܐ ܗܢܐ ܡܛܠ ܕܐܦ ܗܢܐ ܒܪܗ ܗܘ ܕܐܒܪܗܡ
19:10	ܘܕܐܬܐ ܒܪܗ ܕܐܢܫܐ ܕܢܒܥܐ ܘܢܚܐ ܡܕܡ ܕܐܒܕ܀
19:11	ܘܟܕ ܫܡܥܝܢ ܗܘܘ ܗܠܝܢ ܐܘܣܦ ܠܡܐܡܪ ܡܬܠܐ܂ ܡܛܠ ܕܩܪܝܒ ܗܘܐ ܠܐܘܪܫܠܡ ܘܣܒܪܝܢ ܗܘܘ ܕܒܫܥܬܐ ܗܝ ܥܬܝܕܐ ܗܘܬ ܕܬܬܓܠܐ ܡܠܟܘܬܗ ܕܐܠܗܐ
19:12	ܐܡܪ ܠܗܘܢ ܓܒܪܐ ܚܕ ܕܒܪ ܛܘܗܡܐ ܪܒܐ܂ ܐܙܠ ܠܐܬܪܐ ܪܚܝܩܐ ܠܡܣܒ ܡܠܟܘܬܐ ܘܠܡܗܦܟ
19:13	ܘܩܪܐ ܥܣܪܐ ܥܒ̈ܕܘܗܝ ܘܝܗܒ ܠܗܘܢ ܥܣܪ̈ܐ ܡܢ̈ܝܢ ܘܐܡܪ ܠܗܘܢ ܐܬܗܦܟܘ ܒܗܘܢ ܥܕ ܐܬܢܐ
19:14	ܘܒܢܝ ܡܕܝܢܬܐ ܣܢܝܢ ܗܘܘ ܠܗ ܘܫܕܪܘ ܐܝܙܓܕܐ ܒܬܪܗ ܘܐܡܪܝܢ ܠܗ ܠܐ ܨܒܝܢ ܚܢܢ ܕܢܡܠܟ ܥܠܝܢ ܗܢܐ
19:15	ܘܗܦܟ ܐܡܪ ܕܢܩܪܘܢ ܠܗ ܗܢܘܢ ܥܒܕܘܗܝ ܕܝܗܒ ܗܘܐ ܠܗܘܢ ܟܣܦܐ ܕܢܕܥ ܡܢܐ ܐܬܬܓܪܘ
19:16	ܘܐܬܐ ܩܕܡܝܐ ܘܐܡܪ ܡܪܝ ܡܢܝܟ ܥܣܪ̈ܐ ܡܢܝܢ ܐܘܬܪ܂
19:17	ܐܡܪ ܠܗ ܐܘ ܥܒܕܐ ܛܒܐ܂ ܕܒܩܠܝܠ ܐܫܬܟܚܬ ܡܗܝܡܢ ܬܗܘܐ ܫܠܝܛ ܥܠ ܥܣܪ̈ܐ ܟܪ̈ܟܝܢ܂
19:18	ܘܐܬܐ ܐܚܪܢܐ ܘܐܡܪ ܠܗ ܡܪܝ ܡܢܝܟ ܚܡܫܐ ܡܢܝܢ ܥܒܕ
19:19	ܐܡܪ ܠܗ ܐܦ ܠܗ ܐܦ ܐܢܬ ܬܗܘܐ ܫܠܝܛ ܥܠ ܚܡܫܐ ܟܪ̈ܟܝܢ
19:20	ܘܐܬܐ ܗܘ ܐܚܪܢܐ ܘܐܡܪ ܡܪܝ ܗܐ ܡܢܝܟ ܗܘ ܕܐܝܬ ܗܘܐ ܠܘܬܝ ܟܕ ܣܝܡ ܒܣܕܘܢܐ
19:21	ܕܚܠܬ ܓܝܪ ܡܢܟ ܕܓܒܪܐ ܐܢܬ ܩܫܝܐ ܕܫܩܠ ܐܢܬ ܡܕܡ ܕܠܐ ܣܡܬ ܘܚܨܕ ܐܢܬ ܡܕܡ ܕܠܐ ܙܪܥܬ
19:22	ܐܡܪ ܠܗ ܡܢ ܦܘܡܟ ܐܕܘܢܟ ܥܒܕܐ ܕܠܐ ܡܗܝܡܢ܂ ܝܕܥ ܗܘܝܬ ܠܝ ܕܓܒܪܐ ܐܢܐ ܩܫܝܐ ܘܫܩܠ ܐܢܐ ܡܕܡ ܕܠܐ ܣܡܬ ܘܚܨܕܢܐ ܡܕܡ ܕܠܐ ܙܪܥܬ
19:23	ܠܡܢܐ ܠܐ ܐܪܡܝܬ ܟܣܦܝ ܥܠ ܦܬܘܪܐ ܘܐܢܐ ܕܝܢ ܐܬܝܬ ܬܒܥܬ ܕܝܠܝ ܒܪܒܝܬܗ
19:24	ܘܐܡܪ ܠܗܢܘܢ ܕܩܝܡܝܢ ܠܘܬܗ ܣܒܘ ܡܢܗ ܡܢܝܐ ܘܗܒܘܗܝ ܠܗܘ ܕܐܝܬ ܠܘܬܗ ܥܣܪ̈ܐ ܡܢ̈ܝܢ
19:26	ܐܡܪܢܐ ܠܟܘܢ ܓܝܪ ܕܟܠ ܐܢܫ ܕܐܝܬ ܠܗ ܢܬܬܘܣܦ ܠܗ܂ ܘܡܢ ܕܠܝܬ ܠܗ ܐܦ ܗܘ ܡܕܡ ܕܐܝܬ ܠܗ ܢܬܢܣܒ ܡܢܗ
19:27	ܒܪܡ ܕܝܢ ܐܝܬܘ ܠܗܪܟܐ ܠܗܢܘܢ ܒܥܠܕܒ̈ܒܝ ܐܝܠܝܢ ܕܠܐ ܨܒܘ ܕܐܗܘܐ ܥܠܝܗܘܢ ܡܠܟܐ ܘܩܛܠܘ ܐܢܘܢ ܩܕܡܝ
19:28	ܘܟܕ ܐܡܪ ܗܠܝܢ ܢܦܩܘ ܡܢ ܬܡܢ ܘܟܕ ܣܠܩ ܗܘܐ ܠܐܘܪܫܠܡ
19:29	ܘܡܛܝ ܠܒܝܬ ܦܓܐ ܘܠܒܝܬ ܥܢܝܐ܂ ܘܡܛܝ ܠܘܬ ܛܘܪ ܙܝܬܐ܂ ܫܕܪ ܬܪܝܢ ܡܢ ܬܠܡܝܕܘܗܝ
19:30	ܘܐܡܪ ܠܗܘܢ ܙܠܘ ܠܩܪܝܬܐ ܗܝ ܕܠܩܒܠܢ ܘܟܕ ܥܠܝܢ ܐܢܬܘܢ ܗܐ ܡܫܟܚܝܢ ܐܢܬܘܢ ܥܝܠܐ ܟܕ ܐܣܝܪ ܕܐܢܫ ܠܐ ܪܟܒ ܥܠܘܗܝ ܫܪܘ ܐܝܬܘܘܗܝ ܠܟܐ
19:31	ܘܐܢ ܐܢܫ ܡܫܐܠ ܠܟܘܢ ܠܡܢܐ ܫܪܝܢ ܐܢܬܘܢ ܠܗ ܗܟܢܐ ܐܡܪܘ ܠܗ ܠܡܪܗ ܡܬܒܥܐ
19:32	ܘܐܙܠܘ ܐܫܟܚܘ ܗܟܢܐ ܗܢܘܢ ܕܐܫܬܕܪܘ ܐܝܟ ܕܐܡܪ ܠܗܘܢ
19:33	ܘܟܕ ܫܪ̈ܝܢ ܠܗ܂ ܠܥܝܠܐ
19:34	ܐܡܪܘ ܠܗܘܢ ܠܡܪܗ ܡܬܒܥܐ܂
19:35	ܘܐܝܬܝܘ ܠܥܝܠܐ ܠܘܬ ܝܫܘܥ ܘܐܪܡܝܘ ܥܠܘܗܝ ܡܪܛܘܛܝܗܘܢ ܘܐܪܟܒܘܗܝ ܠܝܫܘܥ ܥܠܘܗܝ
19:36	ܘܟܕ ܪܕܐ ܗܘܐ ܘܐܬܐ ܘܦܪܣܝܢ ܗܘܘ ܡܪ̈ܛܘܛܝܗܘܢ ܒܐܪܚܐ
19:37	ܟܕ ܩܪܒܘ ܠܡܚܬܬܐ ܕܛܘܪ ܙܝ̈ܬܐ ܫܪܝܘ ܟܘܠܗ ܟܢܫܐ ܕܬܠܡ̈ܝܕܘܗܝ ܚܕܝܢ ܘܡܫܒܚܝܢ ܠܐܠܗܐ ܒܩܠܐ ܪܡܐ ܥܠ ܟܠ ܡܕܡ ܕܚܙܘ
19:38	ܘܐܡܪ̈ܝܢ ܗܘܘ ܒܪܝܟ ܗܘ ܡܠܟܐ ܕܐܬܐ ܒܫܡܗ ܕܡܪܝܐ܂ ܫܠܡܐ ܒܫܡܝܐ ܘܫܘܒܚܐ ܒܡܪܘܡܐ܂
19:39	ܐܡܪ̈ܝܢ ܠܗ ܐܢܫܐ ܡܢ ܥܡܐ ܡܢ ܒܝܢܝ ܗܘ ܟܢܫܐ ܡܠܦܢܐ ܫܦܝܪܐ ܟܐܝ ܒܬܠܡ̈ܝܕܝܟ ܕܠܐ ܢܩܥܘܢ
19:40	ܥܢܐ ܘܐܡܪ ܠܗܘܢ ܐܡܝܢ ܐܡܪܢܐ ܠܟܘܢ ܕܐܢ ܗܠܝܢ ܢܫܬܩܘܢ ܟܐܦ̈ܐ ܢܩܥܝܢ
19:41	ܘܟܕ ܩܪܒ ܘܚܙܐ ܡܕܝܢܬܐ ܒܟܐ ܥܠܝܗ
19:42	ܘܐܡܪ ܕܐܦܢ ܒܗܢܐ ܝܘܡܢܐ ܕܝܢ ܝܕܥܬܝ ܫܠܡܟܝ ܐܠܐ ܐܬܟܣܝ ܠܗ ܡܢ ܥܝܢܝܟܝ
19:43	ܢܐܬܘܢ ܕܝܢ ܝܘܡܬܐ ܕܢܚܕܪܘܢܟܝ ܒܥܠܕܒܒ̈ܝܟܝ ܘܢܐܠܨܘܢܟܝ ܡܢ ܟܘܠ ܕܘܟܐ
19:44	ܘܢܣܚܦܢܟܝ ܥܠ ܐܪܥܐ܂ ܘܠܒܢ̈ܝܟܝ ܒܓܘܟܝ ܘܠܐ ܢܫܒܩܘܢ ܒܟܝ ܟܐܦ ܥܠ ܟܐܦ ܚܠܦ ܕܠܐ ܝܕܥܬܝ ܝܘܡܐ ܕܣܥܘܪܢܟܝ܀
19:45	ܘܟܕ ܥܠ ܠܗܝܟܠܐ ܫܪܝ ܠܡܦܩܘ ܠܐܝܠܝܢ ܕܡܙܒܢܝܢ ܒܗ ܙܒܢܐ
19:46	ܘܐܡܪ ܟܬܝܒ ܗܘ ܕܒܝܬܝ ܒܝܬ ܨܠܘܬܐ ܗܘ ܐܢܬܘܢ ܥܒܕܬܘܢܝܗܝ ܡܥܪܬܐ ܕܓܝܣܐ
19:47	ܘܡܠܦ ܗܘܐ ܟܠܝܘܡ ܒܗܝܟܠܐ ܘܪܒܝ ܟܗܢܐ ܘܣܦܪܐ ܘܪ̈ܫܐ ܕܥܡܐ ܒܥܝܢ ܗܘܘ ܠܡܘܒܕܘܬܗ
19:48	ܘܠܐ ܡܫܟܚܝܢ ܗܘܘ ܡܢܐ ܢܥܒܕܘܢ ܠܗ ܟܠܗ ܓܝܪ ܥܡܐ ܬܠܐ ܗܘܐ ܒܗ ܠܡܫܡܥܗ܀
20:01	ܘܗܘܐ ܒܚܕ ܡܢ ܝܘܡܬܐ ܟܕ ܡܠܦ ܗܘܐ ܒܗܝܟܠܐ ܠܥܡܐ ܘܡܣܒܪ ܗܘܐ ܘܩܡܘ ܥܠܘܗܝ ܪܒܝ ܟܗܢ̈ܐ ܘܣܦܪ̈ܐ ܘܩܫܝ̈ܫܐ
20:02	ܘܐܡܪ̈ܝܢ ܠܗ ܒܐܝܢܐ ܫܘܠܛܢܐ ܗܠܝܢ ܥܒܕ ܐܢܬ ܐܘ ܡܢܘ ܝܗܒ ܠܟ ܗܢܐ ܫܘܠܛܢܐ
20:03	ܥܢܐ ܘܐܡܪ ܠܗܘܢ ܐܦ ܐܢܐ ܐܫܐܠܟܘܢ ܡܠܬܐ܂ ܐܡܪܘ ܠܝ
20:04	ܡܥܡܘܕܝܬܗ ܕܝܘܚܢܢ ܡܢ ܫܡܝܐ ܗܝ ܐܘ ܡܢ ܒܢܝ ܐܢܫܐ
20:05	ܘܗܢܘܢ ܡܬܚܫܒܝܢ ܗܘܘ ܘܐܡܪܝܢ ܕܐܢ ܢܐܡܪ ܕܡܢ ܫܡܝܐ ܗܝ ܢܐܡܪ ܠܢ ܐܝܟܘ ܠܐ ܗܝܡܢܬܘܢܝܗܝ
20:06	ܘܐܢ ܢܐܡܪ ܕܡܢ ܒܢܝ ܐܢܫܐ ܗܝ ܪܓܡܝܢ ܠܢ ܟܠܗ ܓܝܪ ܥܡܐ ܡܦܣܝܢ ܗܘܘ ܥܠ ܝܘܚܢܢ ܕܢܒܝܐ ܗܘ
20:07	ܐܡܪܝܢ ܠܗ ܠܐ ܝܕܥܝܢ ܐܢܚܢܢ ܡܢ ܐܝܡܟܐ ܗܝ
20:08	ܐܡܪ ܠܗܘܢ ܝܫܘܥ ܐܦܠܐ ܐܢܐ ܐܡܪ ܐܢܐ ܠܟܘܢ ܒܐܝܢܐ ܫܘܠܛܢܐ ܥܒܕ ܐܢܐ ܗܠܝܢ܀
20:09	ܘܫܪܝ ܕܢܐܡܪ ܠܗܘܢ ܡܬܠܐ ܗܢܐ ܓܒܪܐ ܚܕ ܢܨܒ ܟܪܡܐ ܘܐܚܕܪܗ ܣܝܓܐ ܘܐܘܚܕܗ ܠܦܠܚܐ ܘܥܢܕ ܙܒܢܐ ܣܓܝܐܐ
20:10	ܘܒܚܕ ܡܢ ܙܒܢܐ ܫܕܪ ܥܒܕܗ ܠܘܬ ܦܠܚܐ ܕܢܬܠܘܢ ܠܗ ܡܢ ܦܐܪܐ ܕܟܪܡܐ ܘܡܚܘܘܗܝ ܘܫܕܪܘܗܝ ܟܕ ܣܪܝܩ
20:11	ܘܐܘܣܦ ܘܫܕܪ ܠܥܒܕܗ ܐܚܪܢܐ ܘܐܦ ܠܗܘ ܨܠܦܘܗܝ
20:12	ܘܫܕܪ ܐܚܪܢܐ ܕܬܠܬܐ ܘܐܦ ܠܗܘ ܒܫܘܡܬܐ ܐܦܩܘܗܝ
20:13	ܐܡܪ ܡܪܐ ܟܪܡܐ ܡܢܐ ܐܥܒܕ ܐܫܕܪ ܠܒܪܝ ܚܒܝܒܝ ܟܒܪ ܢܬܟܚܕܘܢ ܡܢܗ
20:14	ܟܕ ܚܙܘܘܗܝ ܕܝܢ ܦܠܚܐ ܡܬܚܫܒܝܢ ܗܘܘ ܘܐܡܪܝܢ ܗܢܘ ܝܪܬܐ ܬܘ ܢܩܛܠܝܘܗܝ ܘܬܗܘܐ ܝܪܬܘܬܐ ܕܝܠܢ
20:15	ܘܐܦܩܘܗܝ ܠܒܪ ܡܢ ܟܪܡܐ ܘܩܛܠܘܗܝ ܡܢܐ ܢܥܒܕ ܠܗܘܢ ܡܪܐ ܟܪܡܐ܂
20:16	ܐܡܪܝܢ ܢܘܒܕ ܐܢܘܢ ܠܦܠܚܐ ܘܢܬܠ ܟܪܡܐ ܠܐܚܪ̈ܢܐ ܟܕ ܫܡܥܘ ܗܠܝܢ ܝܕܥܘ ܓܝܪ ܕܥܠܝܗܘܢ ܐܡܪ ܡܬܠܐ ܗܢܐ܂
20:17	ܗܘ ܕܝܢ ܚܪ ܒܗܘܢ ܘܐܡܪ ܡܢܐ ܗܘ ܥܘܕ ܗܢܐ ܕܟܬܝܒ ܕܟܐܦܐ ܕܐܣܠܝܘ ܒܢ̈ܝܐ ܗܝ ܗܘܬ ܠܪܝܫ ܩܪܢܐ܂
20:18	ܟܠ ܐܢܫ ܓܝܪ ܕܢܦܠ ܥܠ ܗܝ ܟܦܐ ܢܬܬܪܥ ܘܟܠ ܡܢ ܕܬܦܠ ܥܠܘܗܝ ܬܫܚܩܝܗܝ
20:19	ܘܒܥܘ ܗܘܘ ܪ̈ܒܝ ܟܗܢ̈ܐ ܘܣܦܪ̈ܐ ܕܢܪܡܘܢ ܥܠܘܗܝ ܐܝܕܝܐ ܒܗ ܒܗܝ ܫܥܬܐ ܘܕܚܠܘ ܗܘܘ ܡܢ ܥܡܐ
20:20	ܘܒܬܪܟܢ ܫܕܪܘ ܓܫܘܫܐ ܕܢܬܕܡܘܢ ܒܙܕܝܩܐ ܕܢܐܚܕܘܢܗ ܒܡܠܬܐ ܘܢܫܠܡܘܢܗ ܠܕܝܢܐ ܘܠܫܘܠܛܢܐ ܕܗܓܡܢܐ
20:21	ܘܫܐܠܘܗܝ ܘܐܡܪ̈ܝܢ ܠܗ ܡܠܦܢܐ ܝܕܥܝܢ ܐܢܚܢܢ ܕܬܪܝܨܐܝܬ ܡܡܠܠ ܐܢܬ ܘܡܠܦ ܐܢܬ ܘܠܐ ܢܣܒ ܐܢܬ ܒܐܦ̈ܐ ܕܐܢܫ ܐܠܐ ܒܩܘܫܬܐ ܡܠܬܐ ܕܐܠܗܐ ܡܠܦ ܐܢܬ
20:22	ܫܠܝܛ ܠܢ ܠܡܬܠ ܟܣܦ ܪܫܐ ܠܩܣܪ ܐܘ ܠܐ܂
20:23	ܘܗܘ ܐܣܬܟܠ ܒܝܫܘܬܗܘܢ ܘܐܡܪ ܠܗܘܢ ܡܢܐ ܡܢܣܝܢ ܐܢܬܘܢ ܠܝ
20:24	ܚܘܘܢܢܝ ܕܝܢܪܐ ܨܠܡܐ ܒܟܬܝܒܬܐ ܕܡܢܘ ܐܝܬ ܥܠܘܗܝ ܘܚܘܝܘܗܝ ܘܐܡܪ̈ܝܢ ܠܗ ܕܩܣܪ
20:25	ܐܡܪ ܠܗܘܢ ܗܒܘ ܕܩܣܪ ܠܩܣܪ ܘܕܐܠܗܐ ܠܐܠܗܐ
20:26	ܘܠܐ ܐܫܟܚܘ ܡܠܬܗ ܠܡܐܚܕ ܩܕܡ ܥܡܐ ܘܐܬܕܡܪܘ ܥܠ ܦܬܓܡܗ ܘܫܬܩܘ ܠܗܘܢ܀
20:27	ܘܩܪܒܘ ܐܢܫܐ ܡܢ ܙܕܘܩ̈ܝܐ ܗܢܘܢ ܕܐܡܪ̈ܝܢ ܕܠܝܬ ܩܝܡܬܐ ܘܫܐܠܘܗܝ
20:28	ܘܐܡܪܝܢ ܠܗ ܡܠܦܢܐ ܡܘܫܐ ܟܬܒ ܠܢ ܕܐܢ ܢܡܘܬ ܐܚܘܗܝ ܕܐܢܫ ܘܠܝܬ ܠܗ ܒܢ̈ܝܐ ܘܢܫܒܘܩ ܐܢܬܬܐ ܢܣܒ ܐܢܬܬܗ ܐܚܘܗܝ ܕܢܩܝܡ ܙܪܥܐ ܠܐܚܘܗܝ
20:29	ܫܘܒ̈ܥܐ ܐܚܝܢ ܐܝܬ ܗܘܘ ܠܘܬܢ ܩܕܡܝܐ ܢܣܒ ܐܢܬܬܐ ܘܡܝܬ ܕܠܐ ܒܢܝܢ܂
20:30	ܘܢܣܒܗ ܕܬܪܝܢ ܠܐܢܬܬܐ ܗܝ ܘܐܦ ܗܘ ܡܝܬ ܕܠܐ ܒܢܝܢ܂
20:31	ܘܐܦ ܕܬܠܬܐ ܢܣܒܗ܂ ܘܗܟܢܐ ܫܒܥܬܝܗܘܢ ܢܣܒܘܗ ܘܡܝܬܘ ܟܕ ܠܐ ܫܒܩܘ ܒܢ̈ܝܐ
20:32	ܘܡܝܬܬ ܐܦ ܗܝ ܐܢܬܬܐ
20:33	ܒܩܝܡܬܐ ܠܐܝܢܐ ܡܢܗܘܢ ܬܗܘܐ܂ ܗܐ ܓܝܪ ܐܢܬܬܐ ܠܫܒܥ̈ܬܝܗܘܢ ܗܘܬ
20:34	ܥܢܐ ܝܫܘܥ ܘܐܡܪ ܒܢܘ̈ܗܝ ܕܥܠܡܐ ܗܢܐ ܝܠܕܝܢ ܘܡܘܠܕܝܢ ܘܢܣܒܝܢ ܢܫܐ ܘܗܘܝܢ ܢܫ̈ܐ ܠܓܒܪ̈ܐ
20:35	ܐܝܠܝܢ ܕܝܢ ܕܠܗܘ ܥܠܡܐ ܫܘܘ ܘܠܗܝ ܩܝܡܬܐ ܕܡܢ ܒܝܬ ܡܝܬܐ ܠܐ ܢܫ̈ܐ ܗܘܝܢ ܠܓܒܪ̈ܐ
20:36	ܐܦܠܐ ܠܡܡܬ ܡܫܟܚܝܢ ܐܫܬܘܝܘ ܠܗܘܢ ܓܝܪ ܥܡ ܡܠܐ̈ܟܐ ܐܝܟ ܒܢܝܐ ܕܩܝܡܬܐ܂
20:37	ܥܠ ܡܝܬܐ ܕܝܢ ܕܢܩܘܡܘܢ ܐܦ ܡܘܫܐ ܒܕܩ ܟܕ ܡܠܠ ܐܠܗܐ ܥܡܗ ܡܢ ܣܢܝܐ ܘܐܡܪ ܡܪܝܐ ܐܠܗܗ ܕܐܒܪܗܡ ܘܐܠܗܗ ܕܐܝܣܚܩ ܘܐܠܗܗ ܕܝܥܩܘܒ
20:38	ܘܗܐ ܐܠܗܐ ܠܐ ܗܘܐ ܕܡܝܬ̈ܐ ܐܠܐ ܕܚ̈ܝܐ ܟܠܗܘܢ ܓܝܪ ܚܝ̈ܝܢ ܐܢܘܢ ܠܗ܂
20:39	ܐܡܪ̈ܝܢ ܠܗ ܐܢܫܐ ܡܢ ܣܦܪ̈ܐ܂ ܡܠܦܢܐ ܫܦܝܪ ܐܡܪܬ܂
20:40	ܘܬܘܒ ܠܐ ܐܡܪܚܘ ܠܡܫܐܠܘܬܗ ܡܕܡ܀
20:41	ܘܐܡܪ ܗܘܐ ܠܗܘܢ ܐܝܟܢܐ ܐܡܪܝܢ ܣܦܪܐ ܥܠ ܡܫܝܚܐ ܕܒܪܗ ܗܘ ܕܕܘܝܕ
20:42	ܘܗܘ ܕܘܝܕ ܐܡܪ ܒܟܬܒܐ ܕܡܙܡܘܪܘܗܝ ܕܐܡܪ ܡܪܝܐ ܠܡܪܝ ܕܬܒ ܠܟ ܡܢ ܝܡܝܢܝ܂
20:43	ܥܕܡܐ ܕܐܣܝܡ ܒܥܠܕܒܒܝܟ ܟܘܒܫܐ ܬܚܝܬ ܪ̈ܓܠܝܟ
20:44	ܐܢ ܗܟܝܠ ܕܘܝܕ ܡܪܝ ܩܪܐ ܠܗ ܐܝܟܢܐ ܒܪܗ ܗܘ܀
20:45	ܘܟܕ ܫܡܥ ܗܘܐ ܟܠܗ ܥܡܐ ܐܡܪ ܠܬܠܡ̈ܝܕܘܗܝ
20:46	ܐܙܕܗܪܘ ܡܢ ܣܦܪ̈ܐ ܕܨܒܝܢ ܠܡܗܠܟܘ ܒܐܣܛܘܐ ܘܪܚܡܝܢ ܫܠܡܐ ܒܫܘܩ̈ܐ ܘܡܘܬܒܐ ܡܝܩܪ̈ܐ ܒܟܢܘܫܬܐ ܘܪܝܫ ܣܡ̈ܟܐ ܒܐܚܫ̈ܡܝܬܐ
20:47	ܘܐܟܠܝܢ ܒܬܐ ܕܐܪ̈ܡܠܬܐ ܒܥܠܬܐ ܕܡܘܪ̈ܟܝܢ ܨܠܘܬܗܘܢ ܗܢܘܢ ܢܩܒܠܘܢ ܕܝܢܐ ܝܬܝܪܐ܀
21:01	ܘܐܪܝܡ ܥܝܢܘܗܝ ܘܚܙܐ ܠܥܬܝܪܐ ܕܪܡܝܢ ܩܪ̈ܒܢܝܗܘܢ ܒܝܬ ܓܙܐ
21:02	ܘܚܙܐ ܐܦ ܐܢܬܬܐ ܚܕܐ ܡܣܟܢܬܐ ܘܐܪܡܝܬ ܫܡܘܢܐ ܬܪܝܢ
21:03	ܐܡܪ ܒܩܘܫܬܐ ܐܡܪܢܐ ܠܟܘܢ ܕܗܕܐ ܐܪܡܠܬܐ ܡܣܟܢܬܐ ܐܪܡܝܬ ܝܬܝܪ ܡܢ ܟܘܠܗܘܢ
21:04	ܗܠܝܢ ܓܝܪ ܡܢ ܡܐ ܕܝܬܝܪ ܠܗܘܢ ܐܪܡܝܘ ܒܝܬ ܩܘܪܒܢܐ܂ ܗܕܐ ܕܝܢ ܡܢ ܡܐ ܕܚܣܝܪ ܠܗ ܟܠ ܕܩܢܝܐ ܗܘܬ ܐܪܡܝܬܗ܀
21:05	ܘܟܕ ܐܡܪܘ ܐܢܫܝܢ ܥܠ ܗܝܟܠܐ ܕܒܟܐ̈ܦܐ ܫܦܝܪ̈ܬܐ ܘܒܩܘܪ̈ܒܢܐ ܡܨܒܬ܂ ܐܡܪ ܠܗܘܢ
21:06	ܚܙܝܢ ܐܢܬܘܢ ܗܠܝܢ ܟ̈ܐܦܐ ܢܐܬܘܢ ܝܘܡ̈ܬܐ ܕܠܐ ܬܫܬܒܩ ܒܗ ܟܐܦ ܥܠ ܟܐܦ ܕܠܐ ܬܣܬܬܪ܂
21:07	ܘܫܐܠܘܗܝ ܘܐܡܪ̈ܝܢ ܠܗ ܡܠܦܢܐ ܐܡܬܝ ܗܠܝܢ ܢܗܘܝܢ ܘܡܢܐ ܐܬܐ ܡܐ ܕܡܫܪܝܢ ܗܠܝܢ ܕܢܗܘܝܢ
21:08	ܗܘ ܕܝܢ ܐܡܪ ܠܗܘܢ ܚܙܘ ܕܠܡܐ ܬܛܥܘܢ ܣܓܝܐܐ ܓܝܪ ܢܐܬܘܢ ܒܫܡܝ ܘܢܐܡܪܘܢ ܕܐܢܐ ܐܢܐ܂ ܘܙܒܢܐ ܩܪܒ ܠܐ ܬܐܙܠܘܢ ܒܬܪܗܘܢ܂
21:09	ܘܡܐ ܕܫܡܥܝܢ ܐܢܬܘܢ ܩܪܒܐ ܘܫܓܘܫܝܐ ܠܐ ܬܕܚܠܘܢ ܥܬܝܕܢ ܐܢܝܢ ܓܝܪ ܠܘܩܕܡ ܗܠܝܢ ܠܡܗܘܐ ܐܠܐ ܠܐ ܥܕܟܝܠ ܡܛܬ ܚܪܬܐ܂
21:10	ܢܩܘܡ ܓܝܪ ܥܡܐ ܥܠ ܥܡܐ ܘܡܠܟܘ ܥܠ ܡܠܟܘ܂
21:11	ܘܙܘܥ̈ܐ ܪܘܪ̈ܒܐ ܒܕܘܟܐ ܕܘܟܐ ܘܡܘܬܢܐ ܒܕܘܟܐ ܕܘܟܐ ܘܟܦ̈ܢܐ ܘܢܗܘܝܢ ܕܚ̈ܠܬܐ ܡܢ ܫܡܝܐ ܘܢܬܚܙܝܢ ܐܬܘ̈ܬܐ ܪܘܪܒܬܐ
21:12	ܩܕܡ ܗܠܝܢ ܕܝܢ ܟܠܗܝܢ ܢܪܡܘܢ ܥܠܝܟܘܢ ܐܝܕ̈ܝܐ ܘܢܪܕܦܘܢܟܘܢ ܘܢܫܠܡܘܢܟܘܢ ܠܟܢܘ̈ܫܬܐ ܘܠܒܝܬ ܐܣܝܪ̈ܐ ܘܢܩܪܒܘܢܟܘܢ ܩܕܡ ܡܠܟܐ ܘܗܓܡܘܢܐ ܡܛܠ ܫܡܝ
21:13	ܬܗܘܐ ܠܟܘܢ ܕܝܢ ܣܗܕܘܬܐ
21:14	ܘܣܝܡܘ ܒܠܒ̈ܝܟܘܢ ܕܠܐ ܗܘܝܬܘܢ ܡܬܝܠܦܝܢ ܠܡܦܩ ܪܘܚܐ
21:15	ܐܢܐ ܓܝܪ ܐܬܠ ܠܟܘܢ ܦܘܡܐ ܘܚܟܡܬܐ ܐܝܕܐ ܕܠܐ ܡܫܟܚܝܢ ܕܢܩܘܡܘܢ ܠܩܘܒܠܟܘܢ ܟܠܗܘܢ ܒܥܠܕܒܒ̈ܝܟܘܢ
21:16	ܢܫܠܡܘܢܟܘܢ ܓܝܪ ܐܚܝܟܘܢ ܘܐܢܫܝܟܘܢ ܘܐܚܝܢܝܟܘܢ ܘܪ̈ܚܡܝܟܘܢ ܘܢܡܝܬܘܢ ܡܢܟܘܢ
21:17	ܘܬܗܘܘܢ ܣܢܝܐܝܢ ܡܢ ܟܠܐܢܫ ܡܛܘܠ ܫܡܝ
21:18	ܘܡܢܬܐ ܚܕܐ ܡܢ ܣܥܪܐ ܕܪܝܫܟܘܢ ܠܐ ܬܐܒܕ
21:19	ܒܡܣܝܒܪܢܘܬܐ ܓܝܪ ܬܩܢܘܢ ܢܦܫܬܟܘܢ
21:20	ܡܐ ܕܚܙܝܬܘܢ ܕܝܢ ܠܐܘܪܫܠܡ ܕܚܕܝܪ ܠܗ ܚܝܠܐ ܕܥܘ ܕܩܪܒ ܠܗ ܚܘܪܒܗ
21:21	ܘܐܝܠܝܢ ܕܒܝܗܘܕ ܐܢܘܢ ܢܥܪܩܘܢ ܠܛܘܪܐ ܘܕܒܓܘܗ ܢܦܩܘܢ ܡܢܗ ܘܐܝܠܝܢ ܕܒܩܘܪ̈ܝܐ ܠܐ ܢܥܠܘܢ ܠܗ
21:22	ܡܛܠ ܕܝܘܡ̈ܬܐ ܐܢܘܢ ܕܬܒܥܬܐ ܕܢܫܠܡ ܟܠ ܡܕܡ ܕܟܬܝܒ܀
21:23	ܘܝ ܕܝܢ ܠܐܝܠܝܢ ܕܒܛܢܢ ܘܠܐܝܠܝܢ ܕܡܝܢܩܢ ܒܝܘܡܬܐ ܗܢܘܢ܂ ܢܗܘܐ ܓܝܪ ܐܘܠܨܢܐ ܪܒܐ ܘܪܘܓܙܐ ܥܠ ܥܡܐ ܗܢܐ܂
21:24	ܘܢܦܠܘܢ ܒܦܘܡܐ ܕܚܘܿܪܒܐ ܘܢܫܬܒܘܢ ܠܟܠ ܐܬܪ ܘܐܘܪܫܠܡ ܬܗܘܐ ܡܬܕܝܫܐ ܡܢ ܟܠܗܘܢ ܥܡܡ̈ܐ ܥܕܡܐ ܕܢܫܬܠܡܘܢ ܙܒܢܐ ܕܥܡܡܐ
21:25	ܘܢܗܘܝܢ ܐܬܘ̈ܬܐ ܒܫܡܫܐ ܘܒܣܗܪܐ ܘܒܟܘܟܒܐ ܘܐܘܠܨܢܐ ܒܐܪܥܐ ܘܪܘܫܠ ܐܝܕܝܐ ܕܥܡܡܐ ܘܩܠܐ ܕܝܡܐ܂
21:26	ܘܙܘܥܐ ܘܢܦܩܢ ܢܦܫܬܐ ܕܒܢܝ ܐܢܫܐ ܡܢ ܕܚܠܬܐ ܕܡܕܡ ܕܥܬܝܕ ܠܡܐܬܐ ܥܠ ܐܪܥܐ ܘܢܙܘܥܘܢ ܚܝܠܐ̈ ܕܫܡܝܐ
21:27	ܘܗܝܕܝܢ ܢܚܙܘܢܗ ܠܒܪܗ ܕܐܢܫܐ ܟܕ ܐܬܐ ܒܥܢܢܐ ܒܚܝܠܐ ܣܓܝܐܐ ܘܒܫܘܒܚܐ
21:28	ܡܐ ܕܫܪܝ ܕܝܢ ܗܠܝܢ ܕܢܗܘܝܢ ܐܕܝܩܘ ܘܐܪܝܡܘ ܪܫܝܟܘܢ ܡܛܠ ܕܩܪܒ ܠܗ ܦܘܪܩܢܟܘܢ܀
21:29	ܘܐܡܪ ܗܘܐ ܠܗܘܢ ܡܬܠܐ ܗܢܐ ܚܙܘ ܠܬܬܐ ܘܠܟܠܗܘܢ ܐܝ̈ܠܢܐ
21:30	ܕܡܐ ܕܫܪܝܘ ܦܪܥܝܢ ܘܝܗܒܝܢ ܦܐܪܝܗܘܢ ܡܣܬܟܠܝܢ ܐܢܬܘܢ ܕܩܪܒ ܠܗ ܩܝܛܐ
21:31	ܗܟܢܐ ܐܦ ܐܢܬܘܢ ܡܐ ܕܚܙܝܬܘܢ ܗܠܝܢ ܕܗܘܝܢ ܕܥܘ ܕܩܪܝܒܐ ܗܝ ܡܠܟܘܬܐ ܕܫܡܝܐ
21:32	ܐܡܝܢ ܐܡܪܢܐ ܠܟܘܢ ܕܠܐ ܬܥܒܪ ܫܪܒܬܐ ܗܕܐ ܥܕܡܐ ܕܗܠܝܢ ܟ̈ܠܗܝܢ ܢܗܘܝܢ
21:33	ܫܡܝܐ ܘܐܪܥܐ ܢܥܒܪܘܢ ܘܡܠܝ ܠܐ ܢܥܒܪܢ܀
21:34	ܐܙܕܗܪܘ ܕܝܢ ܒܢܦܫܬܟܘܢ ܕܠܐ ܡܬܘܡ ܢܐܩܪܘܢ ܠܒܘ̈ܬܟܘܢ ܒܡܟܘܠܬܐ ܕܒܣܪܐ ܘܒܪܘܝܘܬܐ ܕܚܡܪܐ ܘܒܨܦܬܐ ܕܥܠܡܐ ܘܢܩܘܡ ܥܠܝܟܘܢ ܝܘܡܐ ܗܘ ܡܢ ܬܚܝܬ ܫܠܝܐ
21:35	ܐܝܟ ܦܚܐ ܓܝܪ ܢܐܬܐ ܥܠ ܟܠܗܘܢ ܐܝܠܝܢ ܕܥܠ ܐ̈ܦܝܗ ܕܐܪܥܐ
21:36	ܫܗܪܘ ܗܟܝܠ ܒܟܠܙܒܢ ܘܬܗܘܘܢ ܒܥܝܢ ܕܬܫܘܘܢ ܠܡܥܪܩ ܡܢ ܗܠܝܢ ܕܥܬܝܕܢ ܠܡܗܘܐ ܘܕܬܩܘܡܘܢ ܩܕܡ ܒܪܗ ܕܐܢܫܐ
21:37	ܘܒܐܝܡܡܐ ܡܠܦ ܗܘܐ ܒܗܝܟܠܐ ܘܒܠܠܝܐ ܢܦܩ ܗܘܐ ܘܒܐܬ ܒܛܘܪܐ ܕܡܬܩܪܐ ܕܒܝܬ ܙܝܬܐ
21:38	ܘܟܘܠܗ ܥܡܐ ܡܩܕܡܝܢ ܗܘܘ ܠܘܬܗ ܠܗܝܟܠܐ ܕܢܫܡܥܘܢܗ
22:01	ܘܩܪܒ ܗܘܐ ܥܕܥܕܐ ܕܦܛܝܪܐ ܕܡܬܩܪܐ ܦܨܚܐ
22:02	ܘܒܥܝܢ ܗܘܘ ܪ̈ܒܝ ܟܗܢܐ ܘܣܦܪ̈ܐ ܐܝܟܢܐ ܢܩܛܠܘܢܝܗܝ܂ ܕܚܠܝܢ ܗܘܘ ܓܝܪ ܡܢ ܥܡܐ܂
22:03	ܥܠ ܗܘܐ ܕܝܢ ܣܛܢܐ ܒܝܗܘܕܐ ܕܡܬܩܪܐ ܣܟܪܝܘܛܐ ܕܐܝܬܘܗܝ ܗܘܐ ܡܢ ܡܢܝܢܐ ܕܬܪܥܣܪ
22:04	ܘܐܙܠ ܡܠܠ ܥܡ ܪܒܝ ܟܗܢܐ ܘܣܦܪܐ ܐܝܟ ܕܢܫܠܡܝܘܗܝ ܠܗܘܢ
22:05	ܘܚܕܝܘ ܘܐܫܬܘܕܝܘ ܕܢܬܠܘܢ ܠܗ ܟܣܦܐ
22:06	ܘܒܥܝܢ ܗܘܘ ܠܗ ܦܠܥܐ ܐܝܟܢܐ ܕܢܫܠܡܝܘܗܝ ܠܗܘܢ ܒܠܥܕܝ ܟܢܫܐ܀
22:07	ܘܟܕ ܡܛܝ ܝܘܡܐ ܕܦܨܚܐ ܕܒܗ ܐܝܬ ܗܘܐ ܥܝܕܐ ܕܢܬܢܟܣ ܦܨܚܐ܂
22:08	ܫܕܪ ܠܟܐܦܐ ܘܠܝܘܚܢܢ ܘܐܡܪ ܠܗܘܢ ܙܠܘ ܛܝܒܘ ܠܢ ܦܨܚܐ ܕܢܠܥܣ
22:09	ܐܡܪ̈ܝܢ ܠܗ ܐܝܠܟܐ ܨܒܐ ܐܢܬ ܕܢܛܝܒ܂
22:10	ܐܡܪ ܠܗܘܢ ܗܐ ܡܐ ܕܥܠܝܢ ܐܢܬܘܢ ܠܡܕܝܢܬܐ ܦܓܥ ܒܟܘܢ ܓܒܪܐ ܕܫܩܝܠ ܓܪܒܐ ܕܡܝܐ܂ ܐܙܠܘ ܒܬܪܗ
22:11	ܠܒܝܬܐ ܐܝܢܐ ܕܥܐܠ܂ ܘܐܡܪܘ ܠܡܪܗ ܕܒܝܬܐ ܪܒܢ ܐܡܪ ܐܝܠܟܐ ܗܘ ܒܝܬ ܡܫܪܝܐ ܐܝܟܐ ܕܐܟܘܠ ܦܨܚܐ ܐܢܐ ܘܬܠܡ̈ܝܕܝ
22:12	ܗܐ ܡܚܘܐ ܠܟܘܢ ܥܠܝܬܐ ܚܕܐ ܪܒܬܐ ܕܡܫܘܝܐ ܬܡܢ ܛܝܒܘ ܠܢ܂
22:13	ܘܐܙܠܘ ܘܐܫܟܚܘ ܐܝܟ ܕܐܡܪ ܠܗܘܢ ܘܛܝܒܘ ܦܨܚܐ܂
22:14	ܘܟܕ ܗܘܬ ܫܥܬܐ ܐܣܬܡܟܘ ܗܘ ܘܬܠܡ̈ܝܕܘܗܝ ܥܡܗ
22:15	ܐܡܪ ܠܗܘܢ ܡܪܓ ܪܓܬ ܠܝ ܕܐܟܘܠ ܥܡܟܘܢ ܦܨܚܐ܂ ܥܕܠܐ ܐܚܫ܂
22:16	ܐܡܪܢܐ ܠܟܘܢ ܓܝܪ ܕܡܟܝܠ ܠܐ ܐܟܠܝܘܗܝ ܥܕܡܐ ܕܬܫܬܠܡ ܡܠܟܘܬܐ ܕܐܠܗܐ
22:19	ܘܢܣܒ ܠܚܡܐ ܘܐܘܕܝ ܥܠܘܗܝ܂ ܘܩܨܐ ܘܝܗܒ ܠܗܘܢ܂ ܘܐܡܪ ܕܗܢܘ ܦܓܪܝ ܕܥܠ ܐܦ̈ܝܟܘܢ ܝܗܒܢܐ ܗܟܢܐ ܗܘܝܬܘܢ ܥܒܕܝܢ ܠܕܘܟܪܢܝ
22:17	ܢܣܒ ܟܣܐ ܘܐܘܕܝ ܥܠܘܗܝ ܘܐܡܪ ܣܒܘ ܗܢܐ ܦܠܓܘ ܒܝܢܬܟܘܢ
22:20	ܘܡܢ ܒܬܪ ܕܐܚܫܡܘ ܗܢܘ ܕܡܝ ܕܝܬܩܐ ܚܕܬܐ
22:18	ܐܡܪܢܐ ܠܟܘܢ ܓܝܪ ܕܡܢ ܗܫܐ ܠܐ ܐܫܬܐ ܡܢ ܦܐܪܐ ܗܢܐ ܥܕܡܐ ܕܬܐܬܐ ܡܠܟܘܬܗ ܕܐܠܗܐ܂
22:21	ܒܪܡ ܕܝܢ ܗܐ ܐܝܕܗ ܕܡܫܠܡܢܝ ܥܡܝ ܥܠ ܦܬܘܪܐ
22:22	ܘܒܪܗ ܕܐܢܫܐ ܐܙܠ ܐܝܟ ܕܣܝܡ ܗܘܐ ܒܪܡ ܕܝܢ ܘܝ ܠܗܘ ܕܒܐܝܕܗ ܡܫܬܠܡ
22:23	ܘܫܪܝܘ ܗܘܘ ܕܢܥܩܒܘܢ ܒܝܢ̈ܬܗܘܢ ܕܡܢܘ ܗܘ ܟܝ ܕܗܕܐ ܥܬܝܕ ܠܡܣܥܪ܀
22:24	ܘܗܘܐ ܚܪܝܢܐ ܒܝ̈ܢܬܗܘܢ ܕܡܢܘ ܐܝܬ ܒܗܘܢ ܕܪܒ
22:25	ܐܡܪ ܠܗܘܢ ܡ̈ܠܟܝܗܘܢ ܕܥܡܡ̈ܐ ܡܪ̈ܝܗܘܢ ܐܢܘܢ ܘܐܝܠܝܢ ܕܫܠܝܛܝܢ ܐܢܘܢ ܘܕܫܦܝܪ ܥܒܕܝܢ ܥܒܕܝ ܛܒܬ̈ܐ ܡܬܩܪܝܢ܂
22:26	ܐܢܬܘܢ ܕܝܢ ܠܐ ܗܟܢܐ ܐܠܐ ܐܝܢܐ ܕܪܒ ܒܟܘܢ ܢܗܘܐ ܐܝܟ ܙܥܘܪܐ ܘܐܝܢܐ ܕܪܫܐ ܗܘ ܐܝܟ ܡܫܡܫܢܐ܂
22:27	ܡܢܘ ܓܝܪ ܪܒ ܕܣܡܝܟ ܐܘ ܕܡܫܡܫ ܠܐ ܗܘ ܕܣܡܝܟ ܐܢܐ ܐܝܟ ܡܫܡܫܢܐ ܒܝܢ̈ܬܟܘܢ
22:28	ܐܢܬܘܢ ܕܝܢ ܕܟܬܪܬܘܢ ܥܡܝ ܒܢܣ̈ܝܘܢܝ܂
22:29	ܘܐܢܐ ܡܫܬܘܕܐ ܠܟܘܢ ܐܝܟ ܕܐܫܬܘܕܝ ܠܝ ܐܒܝ ܡܠܟܘܬܐ
22:30	ܕܬܐܟܠܘܢ ܘܬܫܬܘܢ ܥܡܝ ܥܠ ܦܬܘܪܐ ܕܝܠܝ ܒܡܠܟܘܬܝ ܘܬܬܒܘܢ ܥܠ ܬܪܥܣܪ ܟܘܪ̈ܣܘܢ ܘܬܕܘܢܘܢ ܬܪܥܣܪ ܫܒ̈ܛܐ ܕܒܝܬ ܐܝܣܪܐܝܠ܀
22:31	ܫܡܥܘܢ ܫܡܥܘܢ ܗܐ ܣܛܢܐ ܒܥܐ ܕܢܥܪܒܠܟܘܢ ܐܝܟ ܕܠܚ̈ܛܐ
22:32	ܐܢܐ ܕܝܢ ܒܥܝܬ ܥܠܝܟ ܕܠܐ ܬܚܣܪ ܗܝܡܢܘܬܟ܂ ܘܐܦ ܐܢܬ ܒܙܒܢ ܐܬܗܦܟ ܘܫܪܪ ܠܐܚܝܟ܂
22:33	ܐܡܪ ܠܗ ܡܪܝ ܥܡܟ ܡܛܝܒ ܐܢܐ܂ ܐܦ ܠܒܝܬ ܐܣܝܪܐ܂ ܐܦ ܠܡܘܬܐ ܠܡܐܙܠ܂
22:34	ܐܡܪ ܠܗ ܐܡܪܢܐ ܠܟ ܟܐܦܐ ܕܥܕܠܐ ܢܩܪܐ ܬܪܢܓܠܐ ܝܘܡܢܐ ܬ̈ܠܬ ܙܒ̈ܢܝܢ ܬܟܦܘܪ ܒܝ ܕܝܕܥ ܐܢܬ ܠܝ܀
22:35	ܐܡܪ ܠܗܘܢ ܟܕ ܫܕܪܬܟܘܢ ܕܠܐ ܟܝܣܐ ܘܕܠܐ ܬܪܡܠܐ ܘܕܠܐ ܡܣܢ̈ܐ ܕܠܡܐ ܡܕܡ ܚܣܪ ܠܟܘܢ܂ ܐܡܪܝܢ ܠܗ ܐܦܠܐ ܡܕܡ
22:36	ܐܡܪ ܠܗܘܢ ܡܢ ܗܫܐ ܕܐܝܬ ܠܗ ܟܝܣܐ ܐܘ ܬܪܡܠܐ ܢܫܩܘܠ ܘܡܢ ܕܠܝܬ ܠܗ ܢܙܒܢ ܢܚܬܗ ܘܢܙܒܢ ܠܗ ܣܝܦܐ
22:37	ܐܡܪܢܐ ܠܟܘܢ ܓܝܪ ܕܐܦ ܗܕܐ ܕܟܬܝܒܐ ܕܥܬܝܕܐ ܕܬܬܡܠܐ ܒܝ ܕܥܡ ܥܘ̈ܠܐ ܐܬܡܢܝ ܘܡܕܡ ܕܥܠܝ ܗܘ ܠܡܫܠܡܘ ܠܗ
22:38	ܘܗܢܘܢ ܐܡܪ̈ܝܢ ܠܗ ܠܝܫܘܥ ܗܐ ܗܪܟܐ ܐܝܬ ܬܪ̈ܝܢ ܣܝ̈ܦܝܢ܂ ܐܡܪ ܠܗܘܢ ܣܦܩܝܢ ܠܟܘܢ܀
22:39	ܘܢܦܩ ܗܘܐ ܘܐܙܠ ܐܝܟ ܕܡܥܕ ܗܘܐ ܠܛܘܪܐ ܕܡܬܩܪܐ ܕܒܝܬ ܙܝܬܐ ܘܬܠܡܝܕܘܗܝ ܥܡܗ
22:40	ܘܟܕ ܡܛܝ ܠܗ ܠܕܘܟܬܐ ܐܡܪ ܠܗܘܢ ܨܠܘ ܕܠܐ ܬܥܠܘܢ ܠܢܣܝܘܢܐ܂
22:41	ܘܦܪܩ ܡܢܗܘܢ ܐܝܟ ܡܫܕܐ ܒܟܐܦܐ܂ ܘܣܡ ܒܘܪܟܘܗܝ ܘܡܨܠܐ ܗܘܐ
22:42	ܘܐܡܪ ܐܒܐ ܐܢ ܨܒܐ ܐܢܬ ܢܥܒܪܢܝ ܟܣܐ ܗܢܐ܂ ܐܠܐ ܠܐ ܨܒܝܢܝ ܕܝܠܝ ܢܗܘܐ ܐܠܐ ܐܢ ܕܝܠܟ܂
22:45	ܘܩܡ ܡܢ ܨܠܘܬܗ ܘܐܬܐ ܠܘܬ ܬܠܡܝܕܘܗܝ ܐܫܟܚ ܐܢܘܢ ܟܕ ܕܡܟܝܢ ܡܢ ܥܩܬܗܘܢ
22:46	ܘܐܡܪ ܠܗܘܢ ܡܢܐ ܕܡܟܝܢ ܐܢܬܘܢ ܩܘܡܘ ܨܠܘ ܕܠܐ ܬܥܠܘܢ ܠܢܣܝܘܢܐ܀
22:47	ܘܥܕ ܗܘ ܡܡܠܠ ܗܘܐ ܐܬܚܙܝ ܟܢܫܐ ܣܓܝܐܐ܂ ܘܗܘ ܕܡܬܩܪܐ ܗܘܐ ܝܗܘܕܐ ܚܕ ܡܢ ܬܪܥܣܪ̈ ܐܬܐ ܗܘܐ ܩܕܡܝܗܘܢ ܘܩܪܒ ܢܫܩܗ ܠܝܫܘܥ܂
22:48	ܐܡܪ ܠܗ ܝܫܘܥ ܝܗܘܕܐ ܒܢܘܫܩܬܐ ܡܫܠܡ ܐܢܬ ܠܗ ܠܒܪ ܕܐܢܫܐ܂
22:49	ܟܕ ܚܙܘ ܕܝܢ ܬܠܡܝܕܘܗܝ ܡܕܡ ܕܥܬܝܕ ܠܡܗܘܐ ܐܡܪ̈ܝܢ ܠܗ ܡܪܢ ܢܡܚܐ ܐܢܘܢ ܒܣܝܦܐ܂
22:50	ܘܡܚܐ ܚܕ ܡܢܗܘܢ ܠܥܒܕܗ ܕܪܒ ܟܗܢܐ ܘܢܣܒܗ ܐܕܢܗ ܕܝܡܝܢܐ܂
22:51	ܥܢܐ ܝܫܘܥ ܘܐܡܪ ܟܕܘ ܥܕܡܐ ܠܗܢܐ܂ ܘܩܪܒ ܠܐܕܢܗ ܘܐܣܝܗ܂
22:52	ܘܐܡܪ ܠܗܢܘܢ ܕܐܬܘ ܥܠܘܗܝ ܪ̈ܒܝ ܟܗ̈ܢܐ ܘܣܛܪ̈ܛܝܘܛܐ ܘܩܫ̈ܝܫܐ܂ ܐܝܟ ܕܥܠ ܓܝܣܐ ܢܦܩܬܘܢ ܥܠܝ܂ ܒܣ̈ܝܦܐ ܘܒܚܘܛܪ̈ܐ
22:53	ܟܠܝܘܡ ܕܥܡܟܘܢ ܗܘܝܬ ܒܗܝܟܠܐ ܠܐ ܡܘܫܛܝܢ ܗܘܝܬܘܢ ܥܠܝ ܐܝ̈ܕܝܐ ܐܠܐ ܗܕܐ ܗܝ ܫܥܬܟܘܢ ܘܫܘܠܛܢܟܘܢ ܕܚܫܘܟܐ܂
22:54	ܘܐܚܕܘܗܝ ܘܐܝܬܝܘܗܝ ܠܒܝܬܗ ܕܪܒ ܟܗܢܐ܀ ܟܐܦܐ ܕܝܢ ܐܬܐ ܗܘܐ ܒܬܪܗ ܡܢ ܪܘܚܩܐ܂
22:55	ܘܢܘܪܐ ܣܝܡܐ ܗܘܬ ܡܨܥܬ ܕܪܬܐ ܘܝܬܒܝܢ ܗܘܘ ܚܕܪ̈ܝܗ܂ ܘܝܬܒ ܗܘܐ ܟܐܦܐ ܒܝܢܬ̈ܗܘܢ
22:56	ܘܚܙܬܗ ܐܡܬܐ ܚܕܐ ܕܝܬܒ ܠܘܬ ܢܘܪܐ ܘܚܪܬ ܒܗ ܘܐܡܪܐ ܕܐܦ ܗܢܐ ܥܡܗ ܗܘܐ
22:57	ܘܗܘ ܟܦܪ ܘܐܡܪ ܐܢܬܬܐ ܠܐ ܝܕܥܢܐ ܠܗ܂
22:58	ܘܒܬܪ ܩܠܝܠ ܚܙܝܗܝ ܐܦ ܐܚܪܢܐ ܘܐܡܪ ܠܗ ܐܦ ܐܢܬ ܡܢܗܘܢ ܐܢܬ܂ ܗܘ ܕܝܢ ܐܡܪ ܠܗ ܫܒܘܩ ܓܒܪܐ ܠܐ ܝܕܥܢܐ܂
22:59	ܘܗܘܐ ܐܝܟ ܫܥܬܐ ܚܕܐ ܡܬܥܙܙ ܗܘܐ ܐܚܪܢܐ ܘܐܡܪ ܐܦ ܗܢܐ ܫܪܝܪܐܝܬ ܥܡܗ ܗܘܐ ܘܐܦ ܓܠܝܠܝܐ
22:60	ܗܘ ܓܝܪ ܐܡܪ ܟܐܦܐ ܓܒܪܐ ܠܐ ܚܟܡܢܐ ܡܢܐ ܐܡܪܬ ܘܒܗ ܒܫܥܬܐ ܩܪܐ ܬܪܢܓܠܐ
22:61	ܘܐܬܦܢܝ ܝܫܘܥ ܚܪ ܒܗ ܒܟܐܦܐ ܘܐܬܕܟܪ ܟܦܐ ܡܠܬܗ ܕܝܫܘܥ ܕܐܡܪ ܠܗ ܕܥܕ ܠܐ ܢܩܪܐ ܬܪܢܓܠܐ ܝܘܡܢܐ ܬ̈ܠܬ ܙܒ̈ܢܝܢ ܬܟܦܘܪ ܒܝ܂
22:62	ܘܢܦܩ ܠܒܪ ܘܒܟܐ ܡܪܝܪܐܝܬ
22:63	ܘܓܒܪ̈ܐ ܕܐܚܝܕܝܢ ܗܘܘ ܠܗ܂ ܡܒܙܚܝܢ ܗܘܘ ܒܗ܂ ܘܡܚܝܢ ܗܘܘ ܠܗ܂
22:64	ܘܚܦܝܘ ܐܦܘܗܝ ܘܐܡܪ̈ܝܢ ܠܗ ܐܬܢܒܐ ܡܢܘ ܡܚܟ܂
22:65	ܘܬܘܒ ܐܚܪ̈ܢܝܬܐ ܣܓܝܐ̈ܝܬܐ ܡܓܕܦܝܢ ܗܘܘ ܘܐܡܪ̈ܝܢ ܥܠܘܗܝ܂
22:66	ܘܟܕ ܢܓܗܬ܂ ܐܬܟܢܫܘ ܩܫܝܫܐ ܕܥܡܐ܂ ܘܪ̈ܒܝ ܟܗܢܐ ܘܣܦܪ̈ܐ܂ ܘܐܣܩܘܗܝ ܠܒܝܬ ܟܢܘܫܬܗܘܢ
22:67	ܘܐܡܪ̈ܝܢ ܐܢ ܐܢܬ ܗܘ ܡܫܝܚܐ ܐܡܪ ܠܢ ܐܡܪ ܠܗܘܢ ܐܢ ܐܡܪ ܠܟܘܢ ܠܐ ܬܗܝܡܢܘܢܢܝ
22:68	ܘܐܢ ܐܫܐܠܟܘܢ ܠܐ ܝܗܒܝܢ ܐܢܬܘܢ ܠܝ ܦܬܓܡܐ܂ ܘܐܦܠܐ ܫܪ̈ܝܢ ܐܢܬܘܢ ܠܝ܂
22:69	ܡܢ ܗܫܐ ܓܝܪ ܢܗܘܐ ܒܪܗ ܕܐܢܫܐ ܝܬܒ ܡܢ ܝܡܝܢܐ ܕܐܠܗܐ܂
22:70	ܐܡܪ̈ܝܢ ܟܠܗܘܢ ܐܢܬ ܗܘ ܥܘܕ ܒܪܗ ܕܐܠܗܐ ܐܡܪ ܠܗܘܢ ܐܢܬܘܢ ܐܡܪܝܢ ܕܐܢܐ ܐܢܐ܂
22:71	ܐܡܪܝܢ ܡܢܐ ܡܬܒܥܝܐ ܠܢ ܣܗܕܘܬܐ ܗܐ ܓܝܪ ܐܢܚܢܢ ܫܡܥܢ ܡܢ ܦܘܡܗ
23:01	ܘܩܡܘ ܟܠܗ ܟܢܫܐ ܘܐܝܬܝܘܗܝ ܠܘܬ ܦܝܠܛܘܣ
23:02	ܘܫܪܝܘ ܐܟܠܝܢ ܩܪܨܘܗܝ܂ ܘܐܡܪܝܢ ܐܫܟܚܢ ܠܗܢܐ ܕܡܗܦܟ ܥܡܢ ܘܟܠܐ ܠܢ ܕܟܣܦ ܪܫܐ ܠܩܣܪ ܠܐ ܢܬܠ܂ ܘܐܡܪ ܥܠ ܢܦܫܗ ܕܗܘܝܘ ܡܠܟܐ ܡܫܝܚܐ܂
23:03	ܐܡܪ ܠܗ ܦܝܠܛܘܣ ܐܢܬ ܗܘ ܥܘܕ ܡܠܟܐ ܕܝܗܘܕܝܐ ܥܢܐ ܘܐܡܪ ܠܗ ܐܢܬ ܐܡܪܬ ܕܐܢܐ ܐܢܐ
23:04	ܐܡܪ ܦܝܠܛܘܣ ܠܪ̈ܒܝ ܟܗܢ̈ܐ ܘܠܟܢܫܐ ܗܘ ܐܢܐ ܡܕܡ ܥܠܬܐ ܠܐ ܡܫܟܚܢܐ ܥܠ ܓܒܪܐ ܗܢܐ܂
23:05	ܗܢܘܢ ܕܝܢ ܩܥܝܢ ܗܘܘ ܘܐܡܪ̈ܝܢ ܐܙܝܥܗ ܥܡܐ ܟܕ ܡܠܦ ܒܟܠܗ ܝܗܘܕ ܘܫܪܝ ܡܢ ܓܠܝܠܝܐ ܥܕܡܐ ܠܗܪܟܐ܂
23:06	ܦܝܠܛܘܣ ܕܝܢ ܟܕ ܫܡܥ ܕܐܡܪ̈ܝܢ ܕܡܢ ܓܠܝܠܝܐ ܗܘ܂
23:07	ܘܟܕ ܫܡܥ ܕܡܢ ܬܚܝܬ ܫܘܠܛܢܐ ܗܘ ܕܗܪܘܕܣ ܫܕܪܗ ܠܘܬ ܗܪܘܕܣ ܡܛܠ ܕܐܦ ܗܘ ܗܪܘܕܣ ܒܐܘܪܫܠܡ ܗܘܐ ܒܗܢܘܢ ܝܘܡ̈ܬܐ܂
23:08	ܗܪܘܕܣ ܕܝܢ ܟܕ ܚܙܐ ܠܝܫܘܥ ܣܓܝ ܚܕܝ ܛܒ ܨܒܐ ܗܘܐ ܓܝܪ ܠܡܚܙܝܗܝ ܡܢ ܙܒܢܐ ܣܓܝܐܐ܂ ܡܛܠ ܕܫܡܥ ܗܘܐ ܥܠܘܗܝ܂ ܘܣܒܪ ܗܘܐ ܕܡܕܡ ܐܬܐ ܢܚܙܐ ܡܢܗ ܕܗܘܝܐ
23:09	ܘܒܡ̈ܠܐ ܚܟܝܡ̈ܬܐ ܡܫܐܠ ܗܘܐ ܠܗ܂ ܝܫܘܥ ܕܝܢ ܡܕܡ ܦܬܓܡܐ ܠܐ ܐܬܝܒܗ
23:13	ܦܝܠܛܘܣ ܕܝܢ ܩܪܐ ܠܪ̈ܒܝ ܟܗ̈ܢܐ ܘܠܐܪ̈ܟܘܢܐ ܘܠܥܡܐ ܟܠܗ
23:14	ܘܐܡܪ ܠܗܘܢ ܩܪܒܬܘܢ ܠܝ ܓܒܪܐ ܗܢܐ܂ ܘܐܡܪܬܘܢ ܕܡܙܝܥ ܥܡܟܘܢ܂ ܘܐܢܐ ܥܩܒܬܗ ܠܥܝܢܝܟܘܢ ܘܡܕܡ ܠܐ ܐܫܟܚܬ ܒܬܪܗ ܡܢ ܐܝܠܝܢ ܕܡܪ̈ܫܝܢ ܐܢܬܘܢ ܒܗ܂
23:15	ܘܐܦܠܐ ܗܪܘܕܣ ܕܫܕܪܬܗ ܓܝܪ ܠܘܬܗ ܘܡܕܡ ܕܫܘܐ ܠܡܘܬܐ ܠܐ ܐܫܟܚ ܒܬܪܗ܂ ܐܦܠܐ ܣܥܝܪ ܠܗ ܡܕܡ ܕܡܘܬܐ܂
23:16	ܐܪܕܘܗܝ ܗܟܝܠ ܘܐܫܒܩܘܗܝ
23:18	ܘܝܗܒܘ ܟܠܗ ܥܡܐ ܩܠܐ ܘܐܡܪܝܢ ܫܩܘܠܝܗܝ ܠܗܢܐ ܘܫܪܝ ܠܒܪ ܐܒܐ܂
23:19	ܗܘ ܕܡܛܠ ܒܝܫ̈ܬܐ ܘܩ̈ܛܠܐ ܐܪܡܐ ܗܘܐ ܒܝܬ ܐܣܝܪ̈ܐ܂
23:17	ܘܡܥܕ ܗܘܐ ܦܝܠܛܘܣ ܕܢܗܘܐ ܫܪܐ ܠܗܘܢ ܐܣܝܪܐ ܚܕ ܒܥܕܥܝܕܐ
23:20	ܘܬܘܒ ܩܪܐ ܐܢܘܢ ܦܝܠܛܘܣ ܘܐܡܪ ܠܗܘܢ܂ ܡܛܠ ܕܨܒܐ ܗܘܐ ܕܢܫܪܝܗܝ ܠܝܫܘܥ܂ ܕܠܡܢ ܨܒܝܢ ܐܢܬܘܢ ܕܐܫܪܐ ܠܟܘܢ
23:21	ܗܢܘܢ ܕܝܢ ܩܥ̈ܝܢ ܗܘܘ ܙܩܦܘܗܝ ܙܩܦܝܗܝ
23:22	ܗܘ ܕܝܢ ܕܬܠܬ ܙܒܢܝܢ ܐܡܪ ܠܗܘܢ ܡܢܐ ܓܝܪ ܕܒܝܫ ܥܒܕ ܗܢܐ܂ ܡܕܡ ܓܝܪ ܕܫܘܐ ܠܡܘܬܐ ܠܐ ܡܫܟܚ ܐܢܐ ܒܬܪܗ ܐܪܕܝܗܝ ܗܟܝܠ ܘܐܫܒܩܘܗܝ
23:23	ܘܗܢܘܢ ܬܟܒܝܢ ܗܘܘ ܒܩܠܐ ܪܡܐ ܘܐܡܪ̈ܝܢ ܠܗ ܢܙܕܩܦ ܘܚܣܝܢ ܗܘܐ ܩܠܗܘܢ ܘܪ̈ܒܝ ܟܗܢܐ ܥܡܗܘܢ
23:24	ܘܦܩܕ ܗܘܐ ܦܝܠܛܘܣ ܕܢܗܘܐ ܨܒܝܢܗܘܢ
23:25	ܘܫܪܐ ܠܗܘܢ ܠܗܘ ܕܡܛܠ ܩ̈ܛܠܐ ܘܒܝܫܬ̈ܐ ܐܪܡܐ ܗܘܐ ܒܝܬ ܐܣܝܪ̈ܐ ܐܝܟ ܕܫܐܠܘ܂ ܘܠܝܫܘܥ ܐܫܠܡ ܠܨܒܝܢܗܘܢ܂
23:26	ܘܟܕ ܡܘܒܠܝܢ ܠܗ ܐܚܕܘ ܠܫܡܥܘܢ ܩܝܪܝܢܝܐ ܕܐܬܐ ܗܘܐ ܡܢ ܩܪܝܬܐ ܕܢܫܩܘܠ ܙܩܝܦܐ ܘܢܐܬܐ ܒܬܪܗ ܕܝܫܘܥ܂
23:27	ܘܐܬܐ ܗܘܐ ܒܬܪܗ ܣܘܓܐܐ ܕܥܡܐ ܘܢܫܐ ܕܡܪܩܕܢ ܗܘܝ ܥܠܘܗܝ ܘܐܠܝܢ܀
23:28	ܘܐܬܦܢܝ ܝܫܘܥ ܘܐܡܪ ܠܗܝܢ ܒ̈ܢܬ ܐܘܪܫܠܡ ܠܐ ܬܒܟܝܢ ܥܠܝ ܐܠܐ ܒܟܝܝܢ ܥܠ ܢܦܫܟܝܢ ܘܥܠ ܒܢܝ̈ܟܝܢ܂
23:29	ܢܐܬܘܢ ܓܝܪ ܝܘܡ̈ܬܐ ܕܒܗܘܢ ܬܐܡܪܢ ܛܘܒܝܗܝܢ ܠܥܩܪ̈ܬܐ ܘܠܟܪ̈ܣܬܐ ܕܠܐ ܝܠܕ ܘܠܬܕ̈ܝܐ ܕܠܐ ܐܝܢܩܘ܂
23:30	ܘܗܝܕܝܢ ܬܫܪ̈ܝܢ ܠܡܐܡܪ ܠܛܘܪܐ ܕܦܠܘ ܥܠܝܢ ܘܠܪ̈ܡܬܐ ܕܟܣܝܢܢ܂
23:31	ܕܒܩܝܣܐ ܪܛܝܒܐ ܗܠܝܢ ܥܒܕܝܢ܂ ܒܝܒܝܫܐ ܡܢܐ ܢܥܒܕܘܢ܂
23:32	ܘܐܬܝܢ ܗܘܘ ܥܡܗ ܬܪ̈ܝܢ ܥܒ̈ܕܝ ܒܝܫ̈ܬܐ ܕܢܬܩܛܠܘܢ
23:33	ܘܟܕ ܐܬܘ ܠܕܘܟܬܐ ܕܡܬܩܪܝܐ ܩܪܩܦܬܐ ܙܩܦܘܗܝ ܬܡܢ܂ ܘܠܗܢܘܢ ܥܒܕܝ ܒܝܫ̈ܬܐ ܚܕ ܡܢ ܝܡܝܢܗ ܘܚܕ ܡܢ ܣܡܠܗ܂
23:34	ܘܦܠܓܘ ܢܚ̈ܬܘܗܝ ܘܢܦܣܘ ܥܠܝܗܘܢ܂
23:35	ܘܩܐܡ ܗܘܐ ܥܡܐ ܘܚܙܐ܂ ܘܡܡ̈ܝܩܝܢ ܗܘܘ ܒܗ ܥܡܗܘܢ ܐܪ̈ܟܘܢܐ ܘܐܡܪ̈ܝܢ ܠܐܚܪ̈ܢܐ ܐܚܝ ܢܚܐ ܢܦܫܗ ܐܢ ܗܘܝܘ ܡܫܝܚܐ ܓܒܝܗ ܕܐܠܗܐ܂
23:36	ܘܡܒܙܚܝܢ ܗܘܘ ܒܗ ܐܦ ܣܛܪ̈ܛܝܘܛܐ ܘܡܬܩܪ̈ܒܝܢ ܗܘܘ ܠܘܬܗ
23:37	ܘܐܡܪ̈ܝܢ ܫܠܡ ܠܟ ܐܢ ܐܢܬ ܗܘ ܡܠܟܐ ܕܝܗܘܕܝܐ ܐܚܐ ܢܦܫܟ܂ ܘܣܡܘ ܗܘܘ ܐܦ ܒܪܫܗ ܟܠܝܠܐ ܕܥܘܙ̈ܢܝܐ
23:38	ܘܟܬܝܒ ܗܘܐ ܦܛܩܐ ܘܣܝܡ ܠܥܠ ܡܢܗ ܗܢܐ ܗܘ ܡܠܟܐ ܕܝܗܘ̈ܕܝܐ
23:39	ܚܕ ܡܢ ܗܢܘܢ ܕܝܢ ܥܒ̈ܕܝ ܒܝܫܬܐ ܕܨܠܝܒܝܢ ܗܘܘ ܡܓܕܦ ܗܘܐ ܥܠܘܗܝ ܘܐܡܪ ܠܗ ܠܐ ܗܘܝܬ ܡܚܝܢܐ ܐܚܐ ܢܦܫܟ ܝܘܡܢ ܘܐܦ ܠܢ܂
23:40	ܘܟܐܐ ܒܗ ܚܒܪܗ ܐܚܪܢܐ ܘܐܡܪ ܠܗ ܐܦܠܐ ܡܢ ܐܠܗܐ ܕܚܠܬ ܕܗܐ ܐܦ ܐܢܚܢܢ ܒܗ ܐܢܚܢܢ ܒܕܝܢܐ܂
23:41	ܘܗܐ ܐܢܚܢܢ ܐܝܟ ܕܫܘܝܢ ܗܘܝܢ ܘܐܝܟ ܕܥܒܕܢ ܐܬܦܪܥܢ ܗܢܐ ܕܝܢ ܐܦܠܐ ܡܕܡ ܕܣܢܐ ܥܒܝܕ ܠܗ
23:42	ܘܐܡܪ ܠܝܫܘܥ ܡܪܝ ܐܬܕܟܪܝܢܝ ܡܐ ܕܐܬܝܬ ܒܡܠܟܘܬܟ
23:43	ܐܡܪ ܠܗ ܝܫܘܥ ܐܡܝܢ ܐܡܪܢܐ ܠܟ ܕܝܘܡܢܐ ܥܡܝ ܬܗܘܐ ܒܦܪܕܝܣܐ
23:44	ܘܐܝܬ ܗܘܝ ܐܝܟ ܫܬ ܫܥܝܢ ܘܗܘܐ ܚܫܘܟܐ ܥܠ ܟܘܠܗ ܐܪܥܐ ܥܕܡܐ ܠܬܫܥ ܫܥܝܢ
23:45	ܘܫܡܫܐ ܚܫܟ܂ ܘܐܨܛܪܝ ܐ̈ܦܝ ܬܪܥܐ ܕܗܝܟܠܐ ܡܢ ܡܨܥܬܗ܀
23:46	ܘܩܪܐ ܝܫܘܥ ܒܩܠܐ ܪܡܐ ܘܐܡܪ ܐܒܐ ܒܐܝܕܝܟ ܣܐܡ ܐܢܐ ܠܗ ܠܪܘܚܝ ܘܫܠܡ
23:47	ܘܟܕ ܚܙܐ ܩܢܛܪܘܢܐ ܡܕܡ ܕܗܘܐ ܫܒܚ ܠܐܠܗܐ ܘܐܡܪ ܫܪܝܪܐܝܬ ܗܢܐ ܓܒܪܐ ܙܕܝܩܐ ܗܘܐ
23:48	ܘܟܘܠܗܘܢ ܐܝܠܝܢ ܕܐܫܬܘܪܝܘ ܬܡܢ ܘܚܙܘ ܡܕܡ ܕܗܘܐ ܛܪܦܝܢ ܗܘܘ ܥܠ ܚܕܝܗܘܢ ܘܐܡܪ̈ܝܢ ܘܝ ܠܢ ܡܢܐ ܗܘܢ ܘܝ ܠܢ ܡܢ ܚܛܗܝܢ
23:49	ܘܩܝܡܝܢ ܗܘܘ ܡܢ ܪܘܚܩܐ ܟܘܠܗܘܢ ܡܚܟܡܬܗ ܕܝܫܘܥ܂ ܘܢܫ̈ܐ ܐܝܠܝܢ ܕܐܬܝ ܥܡܗ ܡܢ ܓܠܝܠܝܐ ܘܚܙܝܢ ܗܠܝܢ܂
23:50	ܘܓܒܪܐ ܚܕ ܕܫܡܗ ܗܘܐ ܝܘܣܦ ܒܠܘܛܐ ܗܘܐ ܓܒܪܐ ܙܕܝܩܐ ܘܛܒܐ ܡܢ ܪܡܬܐ ܟܪܟܐ ܕܝܗܘܕ
23:51	ܘܚܐܪ ܗܘܐ ܠܡܠܟܘܬܐ ܕܫܡܝܐ ܗܢܐ ܓܒܪܐ ܕܠܐ ܐܫܘܝ ܪܥܝܢܗ ܥܡ ܐܟܠܝ ܩܪܨܐ
23:52	ܗܘ ܗܢܐ ܩܪܒ ܠܘܬ ܦܝܠܛܘܣ ܘܫܐܠ ܦܓܪܗ ܕܝܫܘܥ
23:53	ܘܐܚܬܗ ܘܟܪܟܗ ܒܚܨܐ ܘܣܡܗ ܒܒܝܬ ܩܒܘܪܐ ܢܩܝܪܐ ܐܝܢܐ ܕܐܢܫ ܥܕܟܝܠ ܠܝܬ ܐܬܣܝܡ ܗܘܐ ܒܗ
23:54	ܘܗܘ ܗܘ ܝܘܡܐ ܥܪܘܒܬܐ ܗܘܬ ܘܫܒܬܐ ܢܓܗܐ ܗܘܬ
23:55	ܘܢܫܐ ܗܢ̈ܝܢ ܕܐܬܝ ܥܡܗ ܡܢ ܓܠܝܠܝܐ ܐܬܝ ܠܒܝܬ ܩܒܘܪܐ ܒܥܩܒܗܘܢ ܘܚܙܝ ܠܫܠܕܐ ܟܕ ܐܥܠܘܗ ܠܬܡܢ
23:56	ܘܗܦܟ ܛܝܒ ܗܪ̈ܘܡܐ ܘܡܫܚܐ ܕܒܣܝܡܐ ܘܒܫܒܬܐ ܫܠܝ ܐܝܟ ܕܦܩܝܕ܀
24:01	ܒܚܕ ܒܫܒܐ ܕܝܢ ܒܫܦܪܐ ܪܒܐ ܐܬܝ ܗܘܝ ܠܒܝܬ ܩܒܘܪܐ ܘܐܝܬܝ ܗܘܝ ܡܕܡ ܕܛܝܒ ܘܐܬܝ ܗܘܝ ܥܡܗ̈ܝܢ ܢܫ̈ܐ ܐܚܪ̈ܢܝܬܐ
24:02	ܘܐܫܟܚ ܠܟܐܦܐ ܕܡܥܓܠܐ ܡܢ ܒܝܬ ܩܒܘܪܐ܂
24:03	ܘܥܠ ܘܠܐ ܐܫܟܚܝܗܝ ܠܦܓܪܐ ܕܝܫܘܥ
24:04	ܘܟܕ ܟܪܝܐ ܗܘܬ ܠܗܝܢ ܥܠ ܗܕܐ܂ ܐܬܚܙܝܘ ܬܪܝܢ ܐܢܫܝܢ ܕܩܝܡܝܢ ܠܥܠ ܡܢܗܝܢ ܘܡܒܪܩ ܗܘܐ ܠܒܘܫܗܘܢ
24:05	ܘܕܚܠ ܘܟܦܝ ܪ̈ܫܝܗܝܢ ܘܚܝܪܢ ܗܘܝ ܒܐܪܥܐ܂ ܡܢ ܕܚܠܬܗܝܢ ܐܡܪܝܢ ܠܗ̈ܝܢ ܗܢܘܢ ܓܒܪܐ ܡܢܐ ܒܥܝܢ ܐܢܬܝܢ ܚܝܐ ܒܝܬ ܡܝܬ̈ܐ
24:06	ܠܐ ܗܘܐ ܗܪܟܐ ܐܠܐ ܩܡ ܠܗ ܥܗܕܝܢ ܡܕܡ ܕܡܠܠ ܥܡ̈ܟܝܢ ܥܕ ܗܘ ܒܓܠܝܠܐ
24:07	ܘܐܡܪ ܗܘܐ ܠܟܝܢ ܕܥܬܝܕ ܗܘ ܒܪܗ ܕܐܢܫܐ ܕܢܫܬܠܡ ܒܐܝ̈ܕܝ ܒܢܝ ܐܢܫܐ ܚܛܝܐ ܘܢܨܛܠܒ ܘܠܬܠܬܐ ܝܘܡܝܢ ܢܩܘܡ
24:08	ܘܐܬܕܟܪ ܐܢܝܢ ܠܡܠܐ ܗܠܝܢ
24:09	ܘܗܦܟ ܡܢ ܒܝܬ ܩܒܘܪܐ ܘܐܡܪ ܐܢܝܢ ܡ̈ܠܐ ܗܠܝܢ ܠܚܕܥܣܪ ܘܫܪܟܐ ܕܬܠܡ̈ܝܕܐ܂
24:10	ܡܪܝܡ ܡܓܕܠܝܬܐ ܘܝܘܚܢ ܘܡܪܝܡ ܒܪܬ ܝܥܩܘܒ ܘܫܪܟܐ ܕܥܡܗܝܢ ܗܠܝܢ ܐܡܪ̈ܢ ܗܘܝ ܠܫܠܝܚ̈ܐ
24:11	ܘܡܬܚܙܝܢ ܗܘܝ ܒܥܝܢܝܗܘܢ ܐܝܟ ܕܡܢ ܬܘܝܪܘܬܗܝܢ ܐܡܪܢ ܡ̈ܠܐ ܗ̈ܠܝܢ܂ ܘܠܐ ܡܗܝܡ̈ܢܝܢ ܗܘܘ ܠܗ̈ܝܢ܂
24:12	ܫܡܥܘܢ ܕܝܢ ܩܡ ܘܪܗܛ ܠܩܒܪܐ܂ ܘܐܕܝܩ ܘܚܙܐ ܟܬ̈ܢܐ ܒܠܚܘܕ ܘܐܙܠ ܠܘܬܗ ܘܡܬܕܡܪ ܗܘܐ ܡܕܡ ܕܗܘܐ܀
24:13	ܘܐܬܚܙܝ ܠܬܪܝܢ ܡܢܗܘܢ ܒܗ ܒܝܘܡܐ ܟܕ ܐܙܠܝܢ ܗܘܘ ܠܩܪܝܬܐ ܕܫܡܗ ܥܡܐܘܣ܂ ܘܦܪܝܩܐ ܡܢ ܐܘܪܫܠܡ ܐܣܛܕܘܬܐ ܫ̈ܬܝܢ܂
24:14	ܘܡܡܠܠܝܢ ܗܘܘ ܚܕ ܥܡ ܚܕ ܥܠ ܗ̈ܠܝܢ ܟܘܠܗܝܢ ܐܝܠܝܢ ܕܓܕܫ܂
24:15	ܘܟܕ ܗܢܘܢ ܡܡܠܠܝܢ ܘܡܥܩܒܝܢ ܐܬܐ ܝܫܘܥ ܘܡܛܝ ܐܢܘܢ ܘܡܗܠܟ ܗܘܐ ܥܡܗܘܢ
24:16	ܘܥܝܢܝܗܘܢ ܐܚܝܕܝܢ ܗܘܝ ܕܠܐ ܢܣܬܟܠܘܢܗܝ
24:17	ܐܡܪ ܠܗܘܢ ܡܢܐ ܐܢܝܢ ܡܠܐ ܗܠܝܢ ܕܡܡܠܠܝܢ ܐܢܬܘܢ ܟܕ ܟܡܝܪܝܢ ܐܢܬܘܢ
24:18	ܐܡܪ ܠܗ ܚܕ ܡܢܗܘܢ ܕܫܡܗ ܗܘܐ ܩܠܝܘܦܐ ܐܢܬ ܗܘ ܟܝ ܢܘܟܪܝܐ ܡܢ ܐܘܪܫܠܡ ܕܡܕܡ ܕܗܘܐ ܒܗ ܠܐ ܚܟܡܬ܂
24:19	ܐܡܪ ܠܗܘܢ ܡܢܐ ܐܡܪܝܢ ܠܗ ܥܠ ܝܫܘܥ ܢܨܪܝܐ ܗܘ ܕܗܘܐ ܓܒܪܐ ܢܒܝܐ ܘܐܫܬܟܚ ܒܚܝܠܐ ܘܒܥܒܕܐ ܘܒܡܠܬܐ ܩܕܡ ܐܠܗܐ ܘܩܕܡ ܟܠܗ ܥܡܐ
24:20	ܘܐܫܠܡܘܗܝ ܪܒܝ ܟܗܢܐ ܘܩܫܝܫܐ ܠܕܝܢܐ ܕܡܘܬܐ ܘܙܩܦܘܗܝ
24:21	ܘܐܢܚܢܢ ܣܒܪܝܢ ܗܘܝܢ ܕܗܘܝܘ ܥܬܝܕ ܗܘܐ ܕܢܦܪܩܝܗܝ ܠܐܝܣܪܝܠ ܘܗܐ ܬܠܬܐ ܝܘܡܝܢ ܗܐ ܡܢ ܕܗܠܝܢ ܟܠܗܝܢ ܗܘܝ
24:22	ܘܐܦ ܢܫܐ ܡܢܢ ܐܙܠ ܗܘܝ ܠܒܝܬ ܩܒܘܪܐ܂ ܐܬܪ ܕܣܝܡ ܗܘܐ܂
24:23	ܘܟܕ ܠܐ ܐܫܟܚ ܦܓܪܗ ܐܬܝ ܐܡܪܢ ܠܢ ܕܡܠܐܟܐ ܚܙܝܢ ܬܡܢ ܘܬܡܗܢ ܘܐܡܪܝܢ ܥܠܘܗܝ ܕܚܝ ܗܘ
24:24	ܘܐܦ ܐܢܫܐ ܡܢܢ ܐܙܠܘ ܠܒܝܬ ܩܒܘܪܐ ܘܐܫܟܚܘ ܗܟܢܐ ܐܝܟ ܡܐ ܕܐܡܪ ܢܫ̈ܐ ܐܠܐ ܠܗ ܠܐ ܚܙܘ܀
24:25	ܗܝܕܝܢ ܐܡܪ ܠܗܘܢ ܝܫܘܥ ܐܘ ܚܣܝܪ̈ܝ ܪܥܝܢܐ ܘܝܩܝܪ̈ܝ ܠܒܐ ܠܡܗܝܡܢܘ ܡܢ ܗܠܝܢ ܟܠܗܝܢ ܐܝܠܝܢ ܕܡܠܠܘ ܢܒ̈ܝܐ܂
24:26	ܠܐ ܗܘܐ ܗܠܝܢ ܥܬܝܕ ܗܘܐ ܕܢܣܝܒܪ ܡܫܝܚܐ ܘܕܢܥܘܠ ܠܬܫܒܚܬܗ
24:27	ܘܫܪܝ ܗܘܐ ܠܡܐܡܪ ܠܗܘܢ ܡܢ ܡܘܫܐ ܘܡܢ ܟܠܗܘܢ ܢܒ̈ܝܐ ܘܡܦܫܩ ܗܘܐ ܠܗܘܢ ܥܠ ܢܦܫܗ ܡܢ ܟܠܗܘܢ ܟ̈ܬܒܐ
24:28	ܘܩܪܒܘ ܠܩܪܝܬܐ ܗܝ ܕܐܙܠܝܢ ܗܘܘ ܠܗ܂ ܘܗܘ ܐܬܚܙܝ ܠܗܘܢ ܐܝܟ ܕܠܕܘܟܐ ܪܚܝܩܐ ܐܙܠ ܗܘܐ܂
24:29	ܘܫܪܝܘ ܗܢܘܢ ܒܥܝܢ ܗܘܘ ܡܢܗ ܐܝܟ ܕܠܘܬܗܘܢ ܢܗܘܐ ܡܛܠ ܕܩܪܝܒܐ ܗܘܬ ܠܡܚܫܟ ܘܥܠ ܥܡܗܘܢ ܐܝܟ ܕܠܘܬܗܘܢ ܢܗܘܐ܂
24:30	ܘܟܕ ܐܣܬܡܟ ܢܣܒ ܠܚܡܐ ܘܒܪܟ ܘܩܨܐ ܘܝܗܒ ܠܗܘܢ
24:31	ܘܒܚܕܐ ܐܬܦܬܚ ܥܝܢ̈ܝܗܘܢ ܘܐܫܬܘܕܥܘܗܝ܂ ܘܗܘ ܐܫܬܩܠ ܠܗ ܡܢܗܘܢ
24:32	ܘܐܡܪܝܢ ܗܘܘ ܚܕ ܠܚܕ ܠܐ ܗܘܐ ܠܒܢ ܝܩܝܪ ܗܘܐ ܒܐܘܪܚܐ ܟܕ ܡܦܫܩ ܠܢ ܟܬܒ̈ܐ
24:33	ܘܩܡܘ ܒܗ ܒܫܥܬܐ ܘܗܦܟܘ ܠܐܘܪܫܠܡ ܘܐܫܟܚܘ ܠܚܕܥܣܪ ܟܕ ܟܢܝܫܝܢ܂ ܘܠܐܝܠܝܢ ܕܥܡܗܘܢ ܘܐܬܚܙܝ
24:34	ܟܕ ܐܡܪܝܢ ܫܪܝܪܐܝܬ ܩܡ ܡܪܢ ܘܐܬܚܙܝ ܠܫܡܥܘܢ܂
24:35	ܘܐܦ ܗܢܘܢ ܐܫܬܥܝܘ ܠܗܘܢ ܐܝܠܝܢ ܕܗܘܝ ܒܐܘܪܚܐ ܘܐܝܟܢܐ ܐܬܝܕܥ ܟܕ ܩܨܐ ܠܚܡܐ܀
24:36	ܘܟܕ ܗܢܘܢ ܡܡܠܠܝܢ ܗܘܘ ܐܫܬܟܚ ܩܐܡ ܒܝܢܬܗܘܢ ܘܐܡܪ ܠܗܘܢ ܫܠܡܐ ܥܡܟܘܢ܂
24:37	ܘܗܢܘܢ ܐܬܙܝܥܘ ܘܐܬܪܗܒܘ ܘܣܒܪܝܢ ܗܘܘ ܕܪܘܚܐ ܚܙܝܢ
24:38	ܗܝܕܝܢ ܐܡܪ ܠܗܘܢ ܝܫܘܥ܂ ܡܢܐ ܡܬܙܝܥܝܢ ܐܢܬܘܢ܂ ܘܠܡܢܐ ܣ̈ܠܩܢ ܡܚܫܒܬܐ ܥܠ ܠܒܘܬܟܘܢ܂
24:39	ܗܐ ܚܙܘ ܐܝ̈ܕܝ ܘܪ̈ܓܠܝ ܘܓܘܫܘ ܘܚܙܘ ܕܐܢܐ ܐܢܐ܂ ܠܪܘܚܐ ܓܝܪ ܒܣܪܐ ܘܓܪܡܐ ܠܝܬ ܠܗ ܐܝܟ ܕܚܙܝܢ ܐܢܬܘܢ ܕܐܝܬ ܠܝ
24:41	ܘܟܕ ܥܕܡܐ ܠܗܫܐ ܠܐ ܗܝܡܢܘ ܡܢ ܚܕܘܬܗܘܢ ܘܡܢ ܕܚܠܬܗܘܢ ܘܡܬܬܡܗܝܢ ܗܘܘ ܬܘܒ ܐܡܪ ܠܗܘܢ ܐܝܬ ܠܟܘܢ ܬܢܢ ܡܕܡ ܠܡܐܟܠ܂
24:42	ܘܗܢܘܢ ܝܗܒܘ ܠܗ ܡܢܬܐ ܡܢ ܢܘܢܐ ܕܛܘܝܐ
24:43	ܘܟܕ ܢܣܒ ܐܟܠ ܠܥܝܢܝܗܘܢ
24:44	ܐܡܪ ܠܗܘܢ ܗܠܝܢ ܡܠܐ ܡܡܠܠ ܗܘܝܬ ܥܡܟܘܢ ܟܕ ܠܘܬܟܘܢ ܕܢܫܬܠܡ ܟܘܠ ܡܕܡ ܕܟܬܝܒ ܥܠܝ ܒܐܘܪܝܬܐ ܕܡܘܫܐ ܘܒܢܒܝܐ ܘܒܡܙܡܘܪ̈ܐ
24:45	ܘܗܝܕܝܢ ܦܬܚ ܪܥܝܢܗܘܢ ܠܡܣܬܟܠܘ ܟܬܒܐ
24:46	ܘܐܡܪ ܠܗܘܢ ܕܗܟܢܐ ܗܘ ܘܠܐ ܕܢܚܫ ܡܫܝܚܐ ܘܕܢܩܘܡ ܡܢ ܒܝܬ ܡܝܬܐ ܠܬܠܬܐ ܝܘܡ̈ܝܢ
24:47	ܘܢܬܟܪܙ ܒܫܡܝ ܬܝܒܘܬܐ ܘܫܘܒܩܢܐ ܕܚ̈ܛܗܐ ܒܟܘܠܗܘܢ ܥܡ̈ܡܐ ܘܫܘܪܝܐ ܡܢ ܐܘܪܫܠܡ
24:48	ܘܐܢܬܘܢ ܐܢܘܢ ܣܗ̈ܕܐ ܕܗܠܝܢ
24:49	ܘܐܢܐ ܐܫܕܪ ܥܠܝܟܘܢ ܡܘܠܟܢܗ ܕܐܒܝ ܩܘܘ ܐܢܬܘܢ ܒܡܕܝܢܬܐ ܥܕܡܐ ܕܬܠܒܫܘܢ ܚܝܠܐ ܡܢ ܪܘܡܐ
24:50	ܘܐܦܩ ܐܢܘܢ ܥܕܡܐ ܠܒܝܬ ܥܢܝܐ ܘܐܪܝܡ ܐܝ̈ܕܘܗܝ ܘܒܪܟ ܐܢܘܢ܂
24:51	ܘܟܕ ܒܪܟ ܐܢܘܢ ܐܬܪܝܡ ܡܢܗܘܢ
24:52	ܘܗܢܘܢ ܗܦܟܘ ܠܐܘܪܫܠܡ ܒܚܕܘܬܐ ܪܒܬܐ
24:53	ܘܡܒܪܟܝܢ ܗܘܘ ܒܟܠ ܙܒܢ ܒܗܝܟܠܐ ܠܐܠܗܐ܀
99:98	ܫܠܡ ܐܘܢܓܠܝܘܢ ܕܠܘܩܐ܀