The Comprehensive Aramaic Lexicon

034:01	ܕܠܡܡܠܐ ܥܝܢܝ̈ܗܘܢ ܡܼܢ ܬܫܒܘܚܬܗ ܠܐ ܣܦܩܝܢ ܗܘܘ܀ ܐܦܢ
034:02	ܟܝܬ ܥܪܝܡ ܗܘܼܐ ܡܼܢ ܚܝ̈ܘܬܐ܂ ܨܝܕ ܐܕܡ ܘܚܘܐ ܫܠܝ̈ܛܝ
034:03	ܚܝ̈ܘܬܐ ܠܠܐ ܗܘܐ܀
034:04	ܒܬܪ ܕܐܡܼܪ ܥܠ ܥܪܝܡܘܬܗ ܕܚܘܝܐܼ܂ ܦܢܼܐ ܕܢܟܬܘܒ
034:05	ܥܠ ܡܐܬܝܬܗ ܕܢܟܠܐ ܕܠܘܬ ܚܘܐ܂ ܟܕ ܐܡܿܪ ܗܟܢܐ܀ ܘܐܡܼܪ
034:06	ܠܡ ܚܘܝܐ ܠܐܢܬܬܐ܂ ܫܪܝܪܐܝܬ ܐܡܼܪ ܐܠܗܐ ܕܠܐ ܬܐܟܠܘܢ
034:07	ܡܼܢ ܟܠ ܐܝ̈ܠܢܝ ܦܪܕܝܣܐ܂ ܡܠܬ ܚܘܝܐ ܕܝܢ܂ ܐܘ ܠܥܙܐ ܗܼܘ
034:08	ܕܝܠܗ ܕܚܘܝܐ ܝܕܥ ܗܘܼܐ ܐܕܡܼ܂ ܐܘ ܣܛܢܐ ܡܠܠ ܒܗ܂ ܐܘ
034:09	ܗܘ ܚܘܝܐ ܫܐܼܠ ܒܪܥܝܢܗ ܘܐܬܝܗܒܬ ܠܗ ܡܠܬܐܼ܂ ܐܘ ܣܛܢܐ
034:10	ܒܥܼܐ ܡܼܢ ܐܠܗܐ ܕܠܡܠܐ ܥܕܢܐ ܬܬܝܗܒ ܡܠܬܐ ܠܚܘܝܐ܂
034:11	ܡܠܬ ܡܢܣܝܢܐ ܕܝܢ ܠܡ̈ܬܢܣܝܢܐ ܠܐ ܡܚܛܝܐ ܗܘܬ܂ ܐܠܘ
034:12	ܝܥܢܘܬܗܘܢ ܐܠܝܠܐ ܠܡܢܣܝܢܐ ܠܐ ܗܘܬ܂ ܐܦ ܐܠܘ ܠܐ
034:13	ܓܝܪ ܐܬܼܐ ܡܢܣܝܢܐܼ܂ ܗܼܘ ܐܝܠܢܐ ܒܝܕ ܫܘܦܪܗܼ܂ ܐܓܘܢܐ
034:14	ܥܡ ܝܥܢܘܬܗܘܢ ܥܒܿܕ ܗܘܐ܂ ܥܠܬܐ ܗܘ ܟܝܬ ܐܚܝܕܝܢ
034:15	ܒܡܼܠܟܗ ‍[‍܂܂܂‍]‍ ܕܚܘܝܐ܂ ܗܿܢܘܢ ܕܐܝܟ ܡܠܟܗ ܕܚܘܝܐ܂ ܘܝܬܝܪ
034:16	ܡܢ ܡܼܠܟܗܼ܂ ܝܥܢܘܬܗܘܢ ܗܘܬ ܠܗܘܢ ܡܣܓܦܢܝܬܐ܀
034:17	ܐܡܼܪ ܓܝܪ ܕܚܙܬ ܐܢܬܬܐ ܕܫܦܝܪ ܐܝܠܢܐ ܠܡܐܟܠ
034:18	ܘܪܓܬܐ ܗܼܘ ܠܥܝ̈ܢܐ܂ ܘܪܓܝܓ ܐܝܠܢܐ ܠܡܚܪ ܒܗ܂ ܘܢܣܒܼܬ
034:19	ܡܢ ܦܐܪ̈ܘܗܝ ܘܐܟܠܬ܂ ܐܢ ܟܝܬ ܒܫܘܦܪܗ ܗܼܘ ܕܐܝܠܢܐ
034:20	ܘܒܪܓܬ ܦܐܪܗ ܐܙܕܟܝܬܼ܂ ܠܐ ܗܘܼܐ ܒܝܕ ܡܼܠܟܐ ܕܥܠ ܠܐܕܢܗܿ
034:21	ܐܙܕܟܝܬ܂ ܕܡܼܢ ܝܥܢܘܬܐ ܗܼܘ ܕܢܦܩܬ ܡܼܢ ܓܘܗܿ ܚܒܬ ܗܘܬ܀
034:22	ܡܛܠ ܓܝܪ ܕܐܬܬܣܝܡ ܗܘܼܐ ܦܘܩܕܢܐ ܠܡܬܢܣ̈ܝܢܐ܂ ܘܠܿܐ
034:23	ܗܘܼܐ ܕܢܐܿܬܐ ܠܡܠܐ ܥܕܢܐ ܡܢܣܝܢܐ܂ ܡܛܠ ܓܝܪ ܕܟܠ
034:24	ܕܒܦܪܕܝܣܐ ܘܕܠܒܪ ܡܢ ܦܪܕܝܣܐܼ܂ ܒܛܝܒܘܬܐ ܝܗܼܒ ܗܘܐ ܠܗ
034:25	ܠܐܕܡ܂ ܘܠܐ ܬܒܥܗ܃ ܠܐ ܕܒܪܝܬܗܼ܂ ܘܐܦܠܐ ܕܫܘܒܚܐ
034:26	ܕܐܠܒܫܗ܀ ܟܠܼܐ ܡܢܗ ܚܕ ܐܝܠܢܐ ܒܟܐܢܘܬܐ܂ ܡܼܢ ܗܿܘ ܐܝܢܐ
034:27	ܕܟܠ ܕܐܝܬ ܒܦܪܕܝܣܐ ܘܒܐܪܥܐ܂ ܘܒܐܐܪ ܘܒܝܡ̈ܡܐ ܝܗܼܒ
034:28	ܗܘܼܐ ܠܗ ܒܛܝܒܘܬܐ܂ ܡܛܠ ܓܝܪ ܕܟܕ ܒܪܐ ܠܗ̈ ܠܐ ܡܝܘܬܐ
034:29	ܥܒܕܗ ܗܘܼܐ܂ ܘܠܐ ܕܠܐ ܡܘܬܐ ܓܒܠܗ ܗܘܼܐ܂ ܕܗܼܘ ܐܕܡ
034:30	ܒܢܛܪ ܦܘܩܕܢܐ ܐܘ ܒܥܒܪ ܦܘܩܕܢܐ܂ ܢܩܢܐ ܡܼܢ ܚܕ ܡܼܢ ܐܝ̈ܠܢܐ
034:31	ܐܝܕܐ ܕܨܒܿܐ ܗܘܐ܀