← Back
The Comprehensive Aramaic Lexicon
← Return to the Text Browser
click on the file description for more information
60101: ADiatess1990 p.44

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous


044:001 ܘܢܝܬܐ ܥܡܗ ܚܡܪܗ ܛܒܐ܂ ܐܙܕܡܢ ܥܡܗܘܢ ܟܕ ܠܐ ܦܪܝܫ
044:002 ܡܢܗܘܢ ܒܚܙܘܗ ܥܒܕ ܬܡܢ ܐܬܐ ܬܡܝܗܬܐ܂ ܕܢܬܦܪܫ ܠܗܘܢ
044:003 ܕܠܐ ܫܘܐ ܥܡܗܘܢ ܒܟܝܢܗ܂ ܦܪܫܬܗ ܬܕܡܘܪܬܗ ܠܗܿܘ ܕܠܐ
044:004 ܦܪܝܫ ܗܘܐ ܡܢܗܘܢ ܒܚܙܬܗ܂ ܕܡܐ ܕܐܣܒܪܬ ܐܢܘܢ ܚܙܬܗ
044:005 ܕܐܟܘܬܗܘܢ ܗܘ܂ ܬܠܦ ܐܢܘܢ ܬܕܡܘܪܬܗ ܕܪܒ ܗܘ ܡܢܗܘܢ܂
044:006 ܟܕ ܫܬܝܩ ܥܒܕ ܡ̈ܝܐ ܚܡܪܐ܂ ܕܫܬܩܗ ܐܠܗܝܐ ܢܥܒܕ ܠܗ ܟܪ̈ܘܙܐ
044:007 ܚܕ̈ܝܐ܂ ܕܒܚܕܘܬܐ ܢܬܠ ܣܒܪܬܗ ܡܚܕܝܢܝܬܐ ܠܣܡ̈ܝܟܐ܂ ܚܡܪܐ
044:008 ܒܟܝܢܗ ܡܚܕܝܢܐ ܗܘ܂ ܘܡܛܠ ܕܦܘܩܕܢܐ ܩܠܝܠܐ ܥܒܕܗ܂ ܬܘܒ
044:009 ܒܛܥܡܗ ܡܢ ܟܠ ܚܡܪ̈ܢܝܢ ܡܝܬܪ ܗܘܐ܂ ܡܛܠ ܗܟܝܠ ܡܝܬܪܘܬܗ
044:010 ܡܥܩܒܝܢ ܗܘܘ ܥܠ ܡܪܗ܂ ܘܡܛܠ ܚܕܘܬܗ܂܀
044:011 ‍[‍11܂‍]‍ ܢܚܬ ܡܢ ܬܟܬܘܫܐ ܟܕ ܙܟܝ ܩܒܠܗ ܚܠܘܠܐ ܟܕ ܪܘܙ
044:012 ܒܬܠܝܬܝܐ܂ ܕܢܚܘܐ ܕܒܬܪ ܬܟܬܘܫܐ ܠܙܟ̈ܝܐ ܒܣܡܐ ܗܘ
044:013 ܘܕܢܚܘܐ ܕܐܦܢ ܐܝܟ ܢܘܟܪܝܐ ܐܙܕܡܢ܂ ܐܠܐ ܐܬܚܙܝ ܕܗܘܝܘ
044:014 ܡܪܗܿ ܕܡܫܬܘܬܐ܂ ܒܗܝ ܕܡܠܝ ܚܘܣܪܢܗ ܕܚܠܘܠܐ܂ ܒܡܠܬܗ
044:015 ܡܡܠܝܬ ܟܠ ܚܘܣܪܢ ܘܕܢܚܘܐ ܕܠܘ ܒܪܝܬܐ ܐܚܪܬܐ ܚܘܝ܂ ܘܠܘ
044:016 ܒܗܝ ܥܬܝܩܬܐ܂ ܐܝܟ ܕܐܝܬܝܗܿ ܐܬܚܫܚ ܠܘ ܓܝܪ ܡ̈ܝܐ ܚܠܦ
044:017 ܚܡܪܐ܂ ܐܫܩܝ ܐܢܘܢ܂ ܐܠܐ ܐܦܠܐ ܠܒܪ ܡܢܗܿ ܕܒܪܝܬܐ ܢܦܩ
044:018 ܗܘܐ܂ ܐܠܐ ܟܕ ܚܡܪܐ ܒܪܐ ܗܘܐ܂ ܡܢ ܡ̈ܝܐ ܕܒܪܝܢ ܒܪܐ ܗܘܐ܂
044:019 ‍[‍12܂‍]‍ ܠܐ ܗܘܐ ܗܟܝܠ ܒܪܝܬܐ ܢܘܟܪܝܬܐ ܐܥܠ ܗܘܐ܂ ܐܠܐ
044:020 ܠܗܿ ܠܒܪܝܬܐ ܩܕܡܝܬܐ ܫܚܠܦ ܗܘܐ܂ ܕܒܗܿܝ ܕܫܚܠܦܗܿ ܢܘܕܥ
044:021 ܕܗܘܝܘ ܡܪܗܿ܂ ܘܒܗܿܝ ܕܠܐ ܢܟܪܝܗܿ ܢܕܥ ܕܠܐ ܡܣܬܠܝܐ܂ ܐܦ
044:022 ܠܚܪܬܐ ܓܝܪ ܗܢܝܢ ܐܢܝܢ ܒܪ̈ܝܬܐ ܟܕ ܗܢܝܢ ܡܬܚܕܬܢ܂ ܗܿܘ ܓܝܪ
044:023 ܨܒܝܢܐ ܕܗܿܦܟ ܩܠܝܠܐܝܬ ܡ̈ܝܐ ܫܚܝ̈ܡܐ ܠܚܡܪܐ ܛܪܩܐ܂
044:024 ܡܫܟܚ ܗܘ ܕܢܗܦܘܟ ܐܢܝܢ ܠܚܪܬܐ ܠܟܠܗܝܢ ܒܪ̈ܝܬܐ ܠܛܥܡ̈ܬܐ
044:025 ܕܠܐ ܡܬܡܠܠܢ܂ ܘܕܢܚܘܐ ܟܕ ܗܦܟ ܒܝܫܘܬܗܝܢ ܠܒܘܣܡܐ܂ ܕܠܘ
044:026 ܒܟܝܢܗܝܢ ܒܝܫܢ ܗܘܝ܂ ܐܠܐ ܒܟܝܢܗ ܗܘ ܚܟܝܡ ܗܘܐ ܥܒܘܕܐ܂
044:027 ܕܝܕܥ ܕܡܬܒܥܝܢ ܐܢܝܢ ܕܢܬܒܪܝܢ܂ ܗܢܘ ܕܝܢ ܠܒܘܚܪܢܐ
044:028 ܘܠܡܪܕܘܬܐ܂ ܕܒܗܝܢ ܢܬܒܚܪܘܢ ܙܟܝ̈ܐ ܘܢܬܟܠܠܘܢ܂ ܘܒܗܝܢ
044:029 ܢܬܪܕܘܢ ܡܣ̈ܟܠܢܐ ܘܢܬܥܕܪܘܢ܃ ܗܿܘ ܓܝܪ ܕܦܩܕ ܠܢܘܪܐ
044:030 ܡܚܒܠܢܝܬܐ܂ ܘܚܠܦ ܡܚܒܠܢܝܬܐ ܗܘܬ ܠܗܿ ܡܚܒܒܢܝܬܐ܂ ܗܘ ܦܩܕ
044:031 ܠܚܪܬܐ ܠܡܘܒ̈ܕܢܝܬܐ ܘܗܘܝܢ ܠܗܝܢ ܡܥܕܪ̈ܢܝܬܐ܂ ܘܠܡܚܫ̈ܢܝܬܐ
044:032 ܕܢܗܘܝܢ ܠܗܝܢ ܡܦܨܚ̈ܢܝܬܐ܀

next