The Comprehensive Aramaic Lexicon

02:01 [ai]	ܘܗܘܼܐ ܥܠܝ ܦܬܓܡܗ ܕܡܪܝܐ ܠܡܐܡܪ܂
02:02 [ai]	ܙܠ ܘܐܿܟܪܙ ܒܐ̈ܕܢܝ ܐܘܪܫܠܡ ܘܐܡܼܪ܂ ܗܟܢܐ ܐܡܿܪ ܡܪܝܐ܂ ܐܬܿܕܟܪܬ ܠܟܝ ܛܝܒܘܬܐ ܕܛܠܝܘܬܟܝ ܪܚܡܬܐ ܕܡܣܝܒܪܢܘܬܟܝܿ܂ ܟܕ ܗܠܟܬܝ ܒܬܪܝ ܒܡܕܒܪܐ ܒܐܪܥܐ ܕܠܐ ܡܙܕܪܥܐ܂
02:03 [ai]	ܩܕܿܫ ܐܝܣܪܝܠ ܠܡܪܝܐ ܪܝܫ ܥ̈ܠܠܬܗ܂ ܟܘܠ ܐ̈ܟܘܠܝܗܘܢ ܢܬܚܿܝܒܘܢ ܒܝܫܼܬܐ ܬܐܬܐ ܥܠܝܗܘܢ ܐܡܿܪ ܡܪܝܐ܀
02:04 [ai]	ܫܡܼܥܘ ܦܬܓܡܗ ܕܡܪܝܐ ܒܝܬܗ ܕܝܥܩܘܒ܂܂ ܘܟܠܗܝܢ ܫܪ̈ܒܬܐ ܕܒܝܬ ܐܝܣܪܝܠ܂
02:05 [ai]	ܗܟܢܐ ܐܡܿܪ ܡܪܝܐ܂ ܡܢܐ ܗܘ ܥܘܼܠܐ ܐܫܼܟܚܘ ܒܝ ܐܒ̈ܗܝܟܘܢ ܕܐܪܚܩܘ ܡܢܝ܂ ܘܐܙܼܠܘ ܒܬܪ ܠܐ ܡܕܡ܂ ܘܡܕܡ ܠܐ ܝܬܪܘ܂
02:06 [ai]	ܘܠܐ ܐܡܼܪܘ ܕܐܝܟܐ ܗܿܘ ܡܪܝܐ ܕܐܣܩܢ ܡܢ ܐܪܥܐ ܕܡܨܪܝܢ܂ ܘܕܒܿܪܢ ܒܡܕܒܪܐ ܒܐܪܥܐ ܚܪܒܬܐ ܘܫܗܝܬܐ܂ ܒܐܪܥܐ ܨܕܝܬܐ ܕ̈ܛܠܠܝ ܡܘܬܐ܂ ܒܐܪܥܐ ܕܠܐ ܥܒܼܪ ܒܗܿ ܓܒܪ ܘܠܐ ܝܬܼܒ ܒܪ ܐܢܫ ܬܡܿܢ܂
02:07 [ai]	ܘܐܝܬܿܝܬܟܘܢ ܠܐܪܥܐ ܕܟܪܡܠܐ܃ ܠܡܐܼܟܠ ܦܐܪ̈ܝܗܿ ܘܛܒ̈ܬܗ܃ ܘܐܬܝܬܘܢ ܘܛܡܿܐܬܘܢ ܐܪܥܝ܂ ܘܝܪܬܘܬܝ ܣܡܬܘܢ ܠܛܢܦܘܬܐ܂
02:08 [ai]	ܟܗ̈ܢܐ ܠܐ ܐܡܼܪܘ ܐܝܟܐ ܗܿܘ ܡܪܝܐ܂ ܘܐܚ̈ܝܕܝ ܢܡܘܣܐ ܠܐ ܝܕܥܘܢܝ܂ ܘܪ̈ܥܘܬܐ ܕܓܠܘ ܒܝ܂ ܘܢܒܝ̈ܐ ܐܬܢܒܿܝܘ ܒܒܥܠܐ܂ ܘܒܬܪ ܡܕܡ ܕܠܝܬ ܒܗ ܝܘܬܪܢ ܐܙܠܘ܂
02:09 [ai]	ܡܛܠ ܗܢܐ܂ ܐܬܕܝܢ ܥܡܟܘܢ ܐܡܿܪ ܡܪܝܐ܂ ܘܥܡ ܒܢ̈ܝ ܒܢܝܟܘܢ ܐܬܕܝܢ܀
02:10 [ai]	ܥܒܼܪܘ ܠܓܙܪ̈ܬܐ ܕܟܬ̈ܝܐ ܘܚܙܘ܂ ܘܠܩܕܪ ܫܕܪܘ ܘܛܒ ܐܣܬܿܟܠܘ܂ ܘܚܙܼܘ ܐܢ ܗܘܼܬ ܐܝܟ ܗܕܐ܂
02:11 [ai]	ܐܢ ܡܚܿܠܦܝܢ ܥܡ̈ܡܐ ܐ̈ܠܗܝܗܘܢ܂ ܐܝܠܝܢ ܕܠܐ ܗܘܘ ܐ̈ܠܗܐ܂ ܘܥܡܝ ܚܠܿܦܘ ܐܝܩܪܗ ܒܕܠܐ ܝܘܬܪܢ܀
02:12 [ai]	ܬܡܗܘܿ ܫܡܝܐ ܥܠ ܗܕܐ܂ ܘܙܘܥܘܿ ܘܕܚܠܘܼ ܛܒ ܐܡܿܪ ܡܪܝܐ܂
02:13 [ai]	ܡܛܠ ܕܬܪ̈ܬܝܢ ܒܝܫ̈ܢ ܥܒܼܕܘ ܥܡܝ܂ ܠܝ ܫܒܼܩܘ ܡܒܘܥܐ ܕܡ̈ܝܐ ܚ̈ܝܐ܂ ܘܐܙܼܠܘ ܚܦܼܪܘ ܠܗܘܢ ܓܘܒ̈ܐ܂ ܓܘܒ̈ܐ ܐܪ̈ܥܝܥܐ ܕܠܐ ܡܫܟܿܚܝܢ ܠܡܩܼܒܐ ܒܗܘܢ ܡ̈ܝܐ܀
02:14 [ai]	ܕܠܡܐ ܥܒܼܕܐ ܗܘ ܐܝܣܪܝܠ܂ ܐܢ ܝܠܝܼܕ ܒܝܬܐ ܗܘܼ ܡܛܠ ܡܢܐ ܗܘܼܐ ܠܒܙܬܐ܂
02:15 [ai]	ܥܠܘܗܝ ܢܢܗܿܡܘܢ ܐܪ̈ܝܘܬܐ܂ ܘܢܪܝܡܘܢ ܩܠܗܘܢ܂ ܘܢܥܒܕܘܢ ܐܪܥܗ ܠܚܘܪܒܐ܂ ܘܩܘܪ̈ܝܗ ܢܨܿܕܝܢ ܡܢ ܒܠܼܝ ܕܝܬܿܒ܂
02:16 [ai]	ܐܦ ܒܢ̈ܝ ܡܦܼܣ ܘܬܚܦܝܣ܂ ܢܪܥܘܢܟܝ ܪܝܫܐ ܪܝܫܐ܂
02:17 [ai]	ܗܐ ܗܟܢܐ ܢܬܥܒܕ ܠܟܝ܂ ܥܠ ܕܫܒܩܬܝ ܠܡܪܝܐ ܐܠܗܟܝ܂ ܒܙܒܢܐ ܕܡܿܕܒܪ ܗܘܼܐ ܠܟܝ ܒܐܘܪܚܐ܂
02:18 [ai]	ܘܗܫܐ ܡܐ ܠܟܝ ܠܡܐܼܙܠ ܠܐܘܪܚܐ ܕܡܨܪܝܢ܂ ܠܡܫܬܐ ܡ̈ܝܐ ܕܫܝܚܘܪ܂ ܘܡܐ ܠܟܝ ܠܡܐܼܙܠ ܠܐܘܪܚܐ ܕܐܬܘܿܪ܂ ܠܡܫܬܐ ܡ̈ܝܐ ܕܢܗܪܐ܂
02:19 [ai]	ܬܪܕܝܟܝ ܒܝܫܬܟܝ ܘܬܝܒܘܬܟܝ ܬܿܟܣܟܝ܂ ܘܕܥܝ ܘܚܙܝܿ ܕܒܝܫ ܘܡܪܝܪ ܥܠ ܕܫܒܩܬܝ ܠܡܪܝܐ ܐܠܗܟܝ܂ ܘܠܐ ܕܚܠܬܝ ܡܢܝ܂ ܐܡܿܪ ܡܪܝܐ ܐܠܗܐ ܚܝܠܬܢܐ܂
02:20 [ai]	ܡܛܠ ܕܡܢ ܥܠܡ ܬܒܿܪܬ ܢܝܪܟܝ ܘܦܣܩܬ ܚܢܩ̈ܝܟܝ ܘܐܡܪܬܝ ܕܬܘܒ ܠܐܠܗ ܐܚܪܝܢ ܠܐ ܐܿܦܠܘܚ܂ ܘܗܐ ܥܠ ܟܘܠ ܪܡܬܐ ܕܪܡܐ ܘܬܚܝܬ ܟܠ ܐܝܠܢ ܕܥܒܿܝܛ܂ ܐܢܬܝ ܛܿܥܝܿܐ ܘܡܙܢܝܐ܂
02:21 [ai]	ܘܐܢܐ ܢܨܒܬܟܝ ܫܒܘܩܐ ܕܟܠܗ ܙܪܥܐ ܕܩܘܫܬܐ܂ ܘܐܝܟܢܐ ܐܬܗܦܼܟܬܝ ܥܠܝ܂ ܘܡܪܼܕܬܝ ܐܝܟ ܓܦܬܐ ܢܘܟܪܝܬܐ܂
02:22 [ai]	ܘܐܢ ܬܬܚܿܘܪܝܢ ܒܢܬܪܐ ܘܬܿܣܓܝܢ ܠܟܝ ܟܒܪܝܬܐ܂ ܟܬܼܡܘ ܠܗܘܢ ܒܟܝ ܚ̈ܛܗܝܟܝ ܩܕܡܝ ܐܡܿܪ ܡܪܝܐ ܐܠܗܐ܂
02:23 [ai]	ܐܝܿܟܢܐ ܬܐܡܪܝܢ ܕܠܐ ܐܬܛܡܐܬ܃ ܘܒܬܪ ܒܥܠܐ ܠܐ ܐܿܙܠܬ܂ ܚܙܝ ܐܘܪ̈ܚܬܟܝ ܒܢܚ̈ܠܐ܂ ܘܕܥܼܝ ܡܢܐ ܥܒܼܕܬܝ܂ ܐܪܝܡܼܬܝ ܒܩܠܟܝ ܡܥܩܿܡܬ ܐܘܪ̈ܚܬܐ܂
02:24 [ai]	ܐܝܟ ܥܪܕܐ ܕܡܬܿܝܠܦ ܒܡܕܒܪܐ ܒܨܒܝܢ̈ܝ ܢܦܫܗ܂ ܣܩܬܝ ܪܘܚܐ ܐܝܟ ܝܪܘܪܐ ܡܿܢ ܢܗܦܟܝܗܿ܂ ܟܠ ܡܿܢ ܕܒܥܿܐ ܠܗܿ ܠܐ ܢܬܛܪܦ܂ ܒܐܘܪ̈ܚܬܗܿ ܢܫܟܚܝܗ܂
02:25 [ai]	ܟܠܝ ܪ̈ܓܠܝܟܝ ܡܢ ܚܦܝܝܘܬܐ ܘܓܓܪܬܟܝ ܡܢ ܨܗܝܐ܂ ܘܐܡܼܪܬܝ ܐܬܚܝܿܠܬ ܠܐ ܨܒܝܿܐ ܐܢܐ܂ ܡܛܠ ܕܪܚܿܡܬ ܢܘܟܪ̈ܝܐ ܘܒܬܪܗܘܢ ܐܿܙܠ܂
02:26 [ai]	ܐܝܟ ܒܗܬܬ ܓܢܒܐ ܟܪ ܕܡܫܬܟܚ܂ ܗܟܢܐ ܒܗܬܘ ܒܢ̈ܝ ܐܝܣܪܝܠ܂ ܗܼܢܘܢ ܘܪ̈ܘܪܒܢܝܗܘܢ ܘܡ̈ܠܟܝܗܘܢ܂ ܘܟܗ̈ܢܝܗܘܢ܂ ܘܢܒܝ̈ܝܗܘܢ܂
02:27 [ai]	ܕܐܡܿܪܝܢ ܠܩܝܣܐ ܐܒܘܢ ܐܢܬ܂ ܘܠܟܐܦܐ ܕܐܢܬܝ ܝܠܕܬܝܢ܂ ܡܛܠ ܕܐܿܦܢܝܘ ܠܝ ܩܕܠܗܘܢ ܘܠܐ ܐ̈ܦܝܗܘܢ܂ ܘܒܙܒܢܐ ܕܒܝܫܬܗܘܢ ܐܡܿܪ̈ܝܢ܂ ܩܘܡ ܥܕܪܝܢ ܘܦܪܘܩܝܢ܂
02:28 [ai]	ܘܐܿܝܟܐ ܐܢܘܢ ܐ̈ܠܗܝܟ ܕܥܒܼܕܬ ܠܟ܂ ܢܩܘܡܘܢ ܢܦܪܩܘܢܟ ܒܙܒܢ ܒܝܫܬܟ܂ ܡܛܠ ܕܐܝܟ ܡܢܝܢܐ ܕܩܘܪ̈ܝܟ ܗܘܘ ܐ̈ܠܗܝܟ ܝܗܘܕܐ܂
02:29 [ai]	ܠܡܢܐ ܕܝܢܝܢ ܐܢܬܘܢ ܥܡܝ܂ ܟܠܟܘܢ ܕܓܠܬܘܢ ܒܝ ܐܡܿܪ ܡܪܝܐ܂
02:30 [ai]	ܣܪܝܩܐܝܬ ܡܿܚܝܬ ܠܒ̈ܢܝܟܘܢ܂ ܘܡܪܕܘܬܐ ܠܐ ܩܒܠܘ܂ ܐܟܠܼܬ ܚܪܒܐ ܠܢܒܝ̈ܝܟܘܢ ܐܝܟ ܐܪܝܐ ܡܚܿܒܠܢܐ܀
02:31 [ai]	ܐܢܬܘܢ ܕܪܐ ܫܡܥܼܘ ܦܬܓܡܗ ܕܡܪܝܐ܂ ܕܠܡܐ ܡܕܒܪܐ ܗܿܘܝܬ ܠܐܝܣܪܝܠ܂ ܐܘ ܐܝܟ ܐܪܥܐ ܚܪܒܬܐ܂ ܡܛܠ ܡܢܐ ܐܡܼܪܘ ܥܡܝ܃ ܢܚܬܢ ܠܐ ܢܐܬܐ ܬܘܒ ܠܘܬܟ܂
02:32 [ai]	ܕܠܡܐ ܛܥܝܐ ܒܬܘܠܬܐ ܥܘܕܢܗܿ ܘܟܠܬܐ ܬܨܒܝܬܗܿ܂ ܥܡܝ ܕܝܢ ܛܥܐܘܢܝ ܝܘܡ̈ܬܐ ܕܠܝܬ ܠܗܘܢ ܡܢܝܢ܂
02:33 [ai]	ܡܢܐ ܬܘܒ ܡܬܩܢܬܝ ܐܘܪ̈ܚܬܟܝ ܠܡܒܥܐ ܪܚܡܬܐ܂ ܕܗܐ ܐܦ ܒܝܫܬܐ ܝܠܦܼܬܝ ܒܐܘܪ̈ܚܬܟܝ܂
02:34 [ai]	ܘܐܦ ܒܐ̈ܝܕܝܟܝ ܐܫܬܟܚ ܕܡܐ ܕܢܦܫ̈ܬܐ ܕܡܣ̈ܟܢܐ ܙܟ̈ܝܐ܂ ܠܐ ܗܘܐ ‍{‍ܒܦܘܫܠܬܐ‍}‍‍<‍ܒܦܘܠܫܬܐ‍>‍ ܐܫܿܟܚܬ ܐܢܘܢ܂ ܐܠܐ ܬܚܝܬ ܟܠ ܐܝܠܢ܂
02:35 [ai]	ܘܐܡܼܪܬܝ ܕܡܚܿܣܝܐ ܐܢܐ܂ ܡܛܠ ܗܢܐ ܐܗܦܟ ܪܘܓܙܗ ܡܢܝ܂ ܗܐ ܕܐܿܢ ܐܢܐ ܠܟܝ ܥܠ ܕܐܡܼܪܬܝ ܠܐ ܚܿܛܝܬ܂
02:36 [ai]	ܡܢܐ ܡܙܕܠܠܐ ܐܢܬܝ ܛܒ ܠܡܬܢܐ ܐܘܪ̈ܚܬܟܝ܂ ܐܦ ܡܢ ܡܨܪܝܢ ܬܒܗܬܝܢ ܐܝܟ ܕܒܗܼܬܬܝ ܡܢ ܐܬܘܪ܂
02:37 [ai]	ܐܦ ܡܢ ܠܘܬ ܗܢܐ ܬܦܼܩܝܼܢ ܟܕ ܐ̈ܝܕܝܟܝ ܥܠ ܪܝܫܟܝ܂ ܕܪܓܙ ܡܪܝܐ ܥܠ ܡܬܟܠܢܝܟܝ܂ ܘܠܐ ܬܨܠܿܚܝܢ ܒܗܘܢ܂

next chapter