← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62040: P Mt

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


09:01 [ai]ܘܰܣܠܶܩ ܠܶܐܠܦܼܳܐ܃ ܘܰܥܒܼܰܪ ܐܶܬܼܳܐ ܠܰܡܕܼܺܝܢ̱ܬܿܶܗ܀
09:02 [ai]ܘܩܰܪܶܒܼܘ ܠܶܗ ܡܫܰܪܝܳܐ ܟܰܕܼ ܪܡܶܐ ܒܥܰܪܣܳܐ܂ ܘܰܚܙܳܐ ܝܶܫܽܘܥ ܗܰܝܡܳܢܽܘܬܼܗܽܘܢ܃ ܘܶܐܡܰܪ ܠܗܰܘ ܡܫܰܪܝܳܐ܂ ܐܶܬܼܠܰܒ̱ܿܒܼ ܒܶܪܝ܃ ܫܒܼܺܝܩܺܝܢ ܠܳܟܼ ܚܛܳܗܰܝܟܿ̈܂
09:03 [ai]ܐ̱ܢܳܫܳܐ̈ ܕܶܝܢ ܡܶܢ ܣܳܦܼܪ̈ܶܐ܂ ܐܶܡܰܪܘ ܒܢܰܦܼܫܗܽܘܢ܃ ܗܳܢܳܐ ܡܓܼܰܕܿܶܦܼ܂
09:04 [ai]ܝܶܫܽܘܥ ܕܶܝܢ ܺܝܕܼܰܥ ܡܰܚܫܒܼܳܬܼܗܽܘܢ̈܃ ܘܶܐܡܰܪ ܠܗܽܘܢ܂ ܡܳܢܳܐ ܡܶܬܼܚܰܫܒܼܺܝܢ ܐܢ̱ܬܿܽܘܢ ܒܺܝܫܬܳܐ ܒܿܠܶܒܟܽܘܢ܂
09:05 [ai]ܡܳܢܳܐ ܓܶܝܪ ܦܫܺܝܩ ܠܡܺܐܡܰܪ܃ ܕܰܫܒܼܺܝܩܺܝܢ ܠܳܟܼ ܚܛܳܗܰܝܟܿ̈܃ ܐܰܘ ܠܡܺܐܡܰܪ܃ ܩܽܘܡ ܗܰܠܶܟܼ܂
09:06 [ai]ܕܬܶܕܿܥܽܘܢ ܕܶܝܢ ܕܫܽܘܠܛܳܢܳܐ ܐܺܝܬܼ ܠܰܒܼܪܶܗ ܕܐ̱ܢܳܫܳܐ ܒܰܐܪܥܳܐ ܠܡܶܫܒܿܰܩ ܚܛܳܗܶܐ̈܃ ܐܶܡܰܪ ܠܗܰܘ ܡܫܰܪܝܳܐ܃ ܩܽܘܡ ܫܩܽܘܠ ܥܰܪܣܳܟܼ܂ ܘܙܶܠ ܠܒܼܰܝܬܿܳܟܼ܂
09:07 [ai]ܘܩܳܡ ܐܶܙܰܠ ܠܒܼܰܝܬܿܶܗ܀
09:08 [ai]ܟܰܕܼ ܚܙܰܘ ܕܶܝܢ ܟܶܢܫܶܐ̈ ܗܳܢܽܘܢ܃ ܕܚܶܠܘ܂ ܘܫܰܒܿܰܚܘ ܠܰܐܠܳܗܳܐ ܕܝܰܗ̱ܒܼ ܫܽܘܠܛܳܢܳܐ ܕܰܐܝܟܼ ܗܳܢܳܐ ܠܰܒܼܢܰܝܢܳܫܳܐ܀܀
09:09 [ai]ܘܟܼܰܕܼ ܥܒܼܰܪ ܝܶܫܽܘܥ ܡܶܢ ܬܰܡܳܢ܃ ܚܙܳܐ ܓܰܒܼܪܳܐ ܕܝܳܬܼܶܒܼ ܒܶܝܬܼ ܡܳܟܼܣܶܐ̈ ܕܰܫܡܶܗ ܡܰܬܿܰܝ܂ ܘܶܐܡܰܪ ܠܶܗ܃ ܬܳܐ ܒܳܬܼܰܪܝ܂ ܘܩܳܡ ܐܶܙܰܠ ܒܳܬܼܪܶܗ܀
09:10 [ai]ܘܟܼܰܕܼ ܣܡܺܝܟܼܺܝܢ ܒܒܼܰܝܬܳܐ܃ ܐܶܬܼܰܘ ܡܳܟܼܣܶܐ̈ ܘܚܰܛܳܝܶܐ̈ ܣܰܓܿܺܝܶܐܐ̈܂ ܐܶܣܬܿܡܶܟܼܘ ܥܰܡ ܝܶܫܽܘܥ܂ ܘܥܰܡ ܬܰܠܡܺܝܕܼܰܘܗ̱ܝ̈܂
09:11 [ai]ܘܟܼܰܕܼ ܚܙܰܘ ܦܿܪ̈ܺܝܫܶܐ܃ ܐܳܡܪܺܝܢ ܠܬܼܰܠܡܺܝܕܼܰܘܗ̱ܝ̈܂ ܠܡܳܢܳܐ ܥܰܡ ܡܳܟܼܣܶܐ̈ ܘܚܰܛܳܝܶܐ̈ ܠܳܥܶܣ ܪܰܒܟܽܘܢ܀
09:12 [ai]ܝܶܫܽܘܥ ܕܶܝܢ ܟܰܕܼ ܫܡܰܥ ܐܶܡܰܪ ܠܗܽܘܢ܂ ܠܳܐ ܣܢܺܝܩܺܝܢ ܚܠܺܝܡܶܐ̈ ܥܰܠ ܐܳܣܝܳܐ܃ ܐܶܠܳܐ ܐܰܝܠܶܝܢ ܕܒܺܝܫܳܐܺܝܬܼ ܥܒܼܺܝܕܼܺܝܢ܂
09:13 [ai]ܙܶܠܘ ܺܝܠܰܦܼܘ ܡܳܢܰܘ܃ ܚܢܳܢܳܐ ܒܿܳܥܶܐ ܐ̱ܢܳܐ܂ ܘܠܳܐ ܕܶܒܼܚܬܼܳܐ܂ ܠܳܐ ܓܶܝܪ ܐܶܬܼܺܝܬܼ ܕܶܐܩܪܶܐ ܠܙܰܕܿܺܝܩܶܐ̈܂ ܐܶܠܳܐ ܠܚܰܛܳܝܶܐ̈܀
09:14 [ai]ܗܳܝܕܶܝܢ ܩܪܶܒܼܘ ܠܶܗ ܬܰܠܡܺܝܕܼܰܘܗ̱ܝ̈ ܕܝܽܘܚܰܢܳܢ܂ ܘܳܐܡܪܺܝܢ܂ ܠܡܳܢܳܐ ܚܢܰܢ ܘܰܦܼܪ̈ܺܝܫܶܐ ܨܳܝܡܺܝܢ ܚ̱ܢܰܢ ܣܰܓܿܺܝ܃ ܘܬܼܰܠܡܺܝܕܼܰܝܟܿ̈ ܠܳܐ ܨܳܝܡܺܝܢ܂
09:15 [ai]ܐܳܡܰܪ ܠܗܽܘܢ ܝܶܫܽܘܥ܂ ܕܰܠܡܳܐ ܡܶܫܟܿܚܺܝܢ ܒܢܰܘܗ̱ܝ ܕܰܓܼܢܽܘܢܳܐ ܠܰܡܨܳܡ ܟܡܳܐ ܕܚܰܬܼܢܳܐ ܥܰܡܗܽܘܢ܃ ܐܳܬܼܶܝܢ ܕܶܝܢ ܝܰܘܡܳܬܼܳܐ̈܃ ܟܰܕܼ ܢܶܫܬܿܩܶܠ ܡܶܢܗܽܘܢ ܚܰܬܼܢܳܐ܃ ܘܗܳܝܕܶܝܢ ܢܨܽܘܡܽܘܢ܂
09:16 [ai]ܠܳܐ ܐ̱ܢܳܫ ܪܳܡܶܐ ܐܽܘܪܩܰܥܬܼܳܐ ܚܕܼܰܬܼܳܐ ܥܰܠ ܢܰܚܬܳܐ ܒܠܳܝܳܐ܂ ܕܠܳܐ ܬܶܬܿܽܘܦܼ ܡܰܠܝܽܘܬܼܳܗ ܡܶܢ ܗܰܘ ܢܰܚܬܳܐ܃ ܘܢܶܗܘܶܐ ܒܶܙܥܳܐ ܝܰܬܿܺܝܪܳܐ܂
09:17 [ai]ܘܠܳܐ ܪܳܡܶܝܢ ܚܰܡܪܳܐ ܚܰܕܼ̱ܬܼܳܐ ܒܙܶܩܶܐ̈ ܒܠܳܝܳܬܼܳܐ̈܂ ܕܠܳܐ ܡܶܨܛܰܪ̈ܝܳܢ ܙܶܩܶܐ̈܃ ܘܚܰܡܪܳܐ ܡܶܬܼܶܐܫܶܕܼ܃ ܘܙܶܩܶܐ̈ ܐܳܒܼܕܳܢ̈܂ ܐܶܠܳܐ ܪܳܡܶܝܢ ܚܰܡܪܳܐ ܚܰܕܼ̱ܬܼܳܐ ܒܙܶܩܶܐ̈ ܚܰܕܼ̱ܬܿܳܬܼܳܐ̈܃ ܘܰܬܼܪ̈ܰܝܗܽܘܢ ܡܶܬܼܢܰܛܪܺܝܢ܀
09:18 [ai]ܟܰܕܼ ܕܶܝܢ ܗܳܠܶܝܢ ܡܡܰܠܶܠ ܗ̱ܘܳܐ ܥܰܡܗܽܘܢ܃ ܐܶܬܼܳܐ ܐܰܪܟܼܽܘܢܳܐ ܚܰܕܼ ܩܪܶܒܼ ܣܓܼܶܕܼ ܠܶܗ܂ ܘܶܐܡܰܪ܂ ܒܪ̱ܰܬܼܝ ܗܳܫܳܐ ܡܺܝܬܼܰܬܼ܃ ܐܶܠܳܐ ܬܳܐ ܣܺܝܡ ܐܺܝܕܼܳܟܼ ܥܠܶܝܗ܂ ܘܬܼܺܚܶܐ܂
09:19 [ai]ܘܩܳܡ ܝܶܫܽܘܥ ܘܬܼܰܠܡܺܝܕܼܰܘܗ̱ܝ̈ ܘܶܐܙܰܠܘ ܒܳܬܼܪܶܗ܀
09:20 [ai]ܘܗܳܐ ܐܰܢ̱ܬܿܬܼܳܐ ܕܪܳܕܼܶܐ ܗ̱ܘܳܐ ܕܡܳܗ ܫܢܺܝܢ̈ ܬܿܰܪ̈ܬܿܰܥܶܣܪܶܐ܃ ܐܶܬܼܳܬܼ ܡܶܢ ܒܶܣܬܿܪܶܗ܃ ܘܩܶܪܒܿܰܬܼ ܠܩܰܪܢܳܐ ܕܰܠܒܼܽܘܫܶܗ܂
09:21 [ai]ܐܳܡܪܳܐ ܗ̱ܘܳܬܼ ܓܶܝܪ ܒܢܰܦܼܫܳܗ܃ ܐܳܦܼܶܢ ܒܰܠܚܽܘܕܼ ܠܡܳܐܢܶܗ ܩܳܪܒܿܳܐ ܐ̱ܢܳܐ܂ ܡܶܬܼܰܐܣܝܳܐ ܐ̱ܢܳܐ܂
09:22 [ai]ܝܶܫܽܘܥ ܕܶܝܢ ܐܶܬܼܦܿܢܺܝ ܚܙܳܗ܂ ܘܶܐܡܰܪ ܠܳܗ܃ ܐܶܬܼܠܰܒ̱ܿܒܼܝ ܒܪ̱ܰܬܼܝ܃ ܗܰܝܡܳܢܽܘܬܼܶܟܼܝ ܐܰܚܝܰܬܼܶܟܼܝ܂ ܘܶܐܬܼܰܐܣܝܰܬܼ ܐܰܢ̱ܬܿܬܼܳܐ ܗܳܝ ܡܶܢ ܗܳܝ ܫܳܥܬܼܳܐ܀܀
09:23 [ai]ܘܶܐܬܼܳܐ ܝܶܫܽܘܥ ܠܒܼܰܝܬܿܶܗ ܕܰܐܪܟܼܽܘܢܳܐ܃ ܘܰܚܙܳܐ ܙܰܡܳܪ̈ܶܐ ܘܟܼܶܢܫܶܐ̈ ܕܡܶܫܬܿܰܓܼܫܺܝܢ܂
09:24 [ai]ܘܶܐܡܰܪ ܠܗܽܘܢ܃ ܦܪܽܘܩܘ ܠܟܼܽܘܢ܂ ܛܠܺܝܬܼܳܐ ܓܶܝܪ ܠܳܐ ܡܺܝܬܼܰܬܼ܂ ܐܶܠܳܐ ܕܰܡܟܿܳܐ ܗ̱ܝ܂ ܘܓܼܳܚܟܿܺܝܢ ܗ̱ܘܰܘ ܥܠܰܘܗ̱ܝ܂
09:25 [ai]ܘܟܼܰܕܼ ܐܰܦܿܶܩ ܠܟܼܶܢܫܶܐ̈܃ ܥܰܠ܂ ܐܰܚܕܿܳܗ ܒܺܐܝܕܼܳܗ܃ ܘܩܳܡܰܬܼ ܛܠܺܝܬܼܳܐ܂
09:26 [ai]ܘܰܢܦܼܰܩ ܛܶܒܿܳܐ ܗܳܢܳܐ ܒܟܽܠܳܗ ܐܰܪܥܳܐ ܗܳܝ܀܀
09:27 [ai]ܘܟܼܰܕܼ ܥܒܼܰܪ ܝܶܫܽܘܥ ܡܶܢ ܬܰܡܳܢ܃ ܕܰܒܼܩܽܘܗ̱ܝ ܣܡܰܝܳܐ̈ ܬܪܶܝܢ܂ ܕܩܳܥܶܝܢ ܘܳܐܡܪܺܝܢ܃ ܐܶܬܼܪܰܚܰܡ ܥܠܰܝܢ܂ ܒܪܶܗ܃ ܕܕܼܰܘܺܝܕܼ܂
09:28 [ai]ܘܟܼܰܕܼ ܐܶܬܼܳܐ ܠܒܼܰܝܬܳܐ܃ ܩܪܶܒܼܘ ܠܶܗ ܗܳܢܽܘܢ ܣܡܰܝܳܐ̈܂ ܐܳܡܰܪ ܠܗܽܘܢ ܝܶܫܽܘܥ܂ ܡܗܰܝܡܢܺܝܢ ܐܢ̱ܬܿܽܘܢ܃ ܕܡܶܫܟܿܰܚ ܐ̱ܢܳܐ ܗܳܕܼܶܐ ܠܡܶܥܒܿܰܕܼ܂ ܐܳܡܪܺܝܢ ܠܶܗ܂ ܐܺܝܢ ܡܳܪܰܢ܂
09:29 [ai]ܗܳܝܕܶܝܢ ܩܪܶܒܼ ܠܥܰܝܢܰܝܗܽܘܢ̈܂ ܘܶܐܡܰܪ܃ ܐܰܝܟܿܰܢܳܐ ܕܗܰܝܡܶܢܬܿܽܘܢ ܢܶܗܘܶܐ ܠܟܼܽܘܢ܂
09:30 [ai]ܘܡܶܚܕܼܳܐ ܐܶܬܼܦܰܬܿܰܚ ܥܰܝܢܰܝܗܽܘܢ̈܂ ܘܰܟܼܐܳܐ ܒܗܽܘܢ ܝܶܫܽܘܥ ܘܶܐܡܰܪ܃ ܚܙܰܘ ܠܳܐ ܐ̱ܢܳܫ ܢܶܕܿܰܥ܂
09:31 [ai]ܗܶܢܽܘܢ ܕܶܝܢ ܢܦܼܰܩܘ ܐܰܛܒܿܽܘܗ̱ܝ ܒܟܽܠܳܗ ܐܰܪܥܳܐ ܗܳܝ܀܀
09:32 [ai]ܘܟܼܰܕܼ ܢܦܼܰܩ ܝܶܫܽܘܥ܃ ܩܰܪܶܒܼܘ ܠܶܗ ܚܰܪܫܳܐ ܕܺܐܝܬܼ ܥܠܰܘܗ̱ܝ ܕܰܝܘܳܐ܂
09:33 [ai]ܘܡܶܢ ܕܰܢܦܼܰܩ ܕܰܝܘܳܐ܂ ܡܰܠܶܠ ܗܰܘ ܚܰܪܫܳܐ܂ ܘܶܐܬܿܕܰܡܰܪܘ ܟܶܢܫܶܐ̈܂ ܘܳܐܡܪܺܝܢ܃ ܠܳܐ ܡܬܼܽܘܡ ܐܶܬܼܚܙܺܝ ܗܳܟܼܰܢܳܐ ܒܐܺܝܣܪܳܐܝܶܠ܂
09:34 [ai]ܦܿܪ̈ܺܝܫܶܐ ܕܶܝܢ ܐܳܡܪܺܝܢ ܗ̱ܘܰܘ܃ ܒܪܺܫܳܐ ܕܕܼܰܝܘܶܐ̈ ܡܰܦܿܶܩ ܕܰܝܘܶܐ̈܀܀
09:35 [ai]ܘܡܶܬܼܟܿܪܶܟܼ ܗ̱ܘܳܐ ܝܶܫܽܘܥ ܒܰܡܕܼܺܝܢܳܬܼܳܐ̈ ܟܽܠܗܶܝܢ ܘܰܒܩܽܘܪ̈ܝܳܐ܃ ܘܡܰܠܶܦܼ ܗ̱ܘܳܐ ܒܰܟܼܢܽܘܫܳܬܼܗܽܘܢ̈܃ ܘܡܰܟܼܪܶܙ ܣܒܼܰܪܬܼܳܐ ܕܡܰܠܟܿܽܘܬܼܳܐ܃ ܘܡܰܐܣܶܐ ܟܽܠ ܟܿܽܘܪ̈ܗܳܢܺܝܢ ܘܟܼܽܠ ܟܺܐܒܼܺܝܢ̈܀
09:36 [ai]ܟܰܕܼ ܚܙܳܐ ܕܶܝܢ ܝܶܫܽܘܥ ܠܟܼܶܢܫܶܐ̈܃ ܐܶܬܼܪܰܚܰܡ ܥܠܰܝܗܽܘܢ܂ ܕܰܠܐܶܝܢ ܗ̱ܘܰܘ ܘܰܫܪܶܝܢ܃ ܐܰܝܟܼ ܥܶܪ̈ܒܿܶܐ ܕܠܰܝܬܿ ܠܗܽܘܢ ܪܳܥܝܳܐ܂
09:37 [ai]ܘܶܐܡܰܪ ܠܬܼܰܠܡܺܝܕܼܰܘܗ̱ܝ̈܃ ܚܨܳܕܼܳܐ ܣܰܓܿܺܝ܂ ܘܦܼܳܥܠܶܐ̈ ܙܥܽܘܪ̈ܺܝܢ܂
09:38 [ai]ܒܥܰܘ ܗܳܟܼܺܝܠ ܡܶܢ ܡܳܪܶܐ ܚܨܳܕܼܳܐ܃ ܕܢܰܦܿܶܩ ܦܳܥܠܶܐ̈ ܠܰܚܨܳܕܼܶܗ܀

next chapter