The Comprehensive Aramaic Lexicon

16:01 [ai]	ܘܰܩܪܶܒܼܘ ܦܿܪ̈ܺܝܫܶܐ ܘܙܰܕܿܽܘܩܳܝܶܐ̈܂ ܡܢܰܣܶܝܢ ܠܶܗ܃ ܘܫܳܐܠܺܝܢ ܠܶܗ ܐܳܬܼܳܐ ܡܶܢ ܫܡܰܝܳܐ܂ ܕܰܢܚܰܘܶܐ ܐܶܢܽܘܢ܀
16:02 [ai]	ܗܽܘ ܕܶܝܢ ܥܢܳܐ܂ ܘܶܐܡܰܪ ܠܗܽܘܢ܂ ܡܳܐ ܕܰܗܘܳܐ ܪܰܡܫܳܐ܂ ܐܳܡܪܺܝܢ ܐܢ̱ܬܿܽܘܢ܂ ܨܰܚܘܳܐ ܗܽܘ܂ ܣܶܡܩܰܬܼ ܓܶܝܪ ܫܡܰܝܳܐ܂
16:03 [ai]	ܘܰܒܨܰܦܼܪܳܐ ܐܳܡܪܺܝܢ ܐܢ̱ܬܿܽܘܢ܂ ܝܰܘܡܳܢܳܐ܂ ܣܰܬܼܘܳܐ ܗܽܘ܂ ܣܶܡܩܰܬܼ ܓܶܝܪ ܫܡܰܝܳܐ܂ ܟܡܺܝܪܳܐܺܝܬܼ܂ ܢܳܣܒܰܝ̈ ܒܰܐܦܿܶܐ̈܃ ܦܰܪܨܽܘܦܿܳܐ ܕܰܫܡܰܝܳܐ ܝܳܕܼܥܺܝܢ ܐܢ̱ܬܿܽܘܢ ܕܬܶܒܼܩܽܘܢ܂ ܐܳܬܼܘܳܬܼܳܐ̈ ܕܙܰܒܼܢܳܐ ܗܳܢܳܐ܃ ܠܳܐ ܝܳܕܼܥܺܝܢ ܐܢ̱ܬܿܽܘܢ ܕܬܶܦܼܪܫܽܘܢ܂
16:04 [ai]	ܫܰܪܒܿܬܼܳܐ ܒܺܝܫܬܳܐ ܘܓܼܰܝܳܪܬܼܳܐ܂ ܐܳܬܼܳܐ ܒܿܳܥܝܳܐ܂ ܘܳܐܬܼܳܐ ܠܳܐ ܡܶܬܼܝܰܗ̱ܒܼܳܐ ܠܳܗ܃ ܐܶܠܳܐ ܐܳܬܼܶܗ ܕܝܰܘܢܳܢ ܢܒܼܺܝܳܐ܂ ܘܰܫܒܼܰܩ ܐܶܢܽܘܢ ܘܶܐܙܰܠ܂
16:05 [ai]	ܘܟܼܰܕܼ ܐܶܬܼܰܘ ܬܰܠܡܺܝܕܼܰܘܗ̱ܝ̈ ܠܥܶܒܼܪܳܐ܃ ܛܥܰܘ ܕܢܶܣܒܼܽܘܢ ܥܰܡܗܽܘܢ ܠܰܚܡܳܐ܂
16:06 [ai]	ܗܽܘ ܕܶܝܢ ܐܶܡܰܪ ܠܗܽܘܢ܂ ܚܙܰܘ܂ ܐܶܙܕܿܰܗ̱ܪܘ ܡܶܢ ܚܡܺܝܪܳܐ ܕܿܰܦܼܪ̈ܺܝܫܶܐ܂ ܘܰܕܼܙܰܕܿܽܘܩܳܝܶܐ̈܂
16:07 [ai]	ܗܶܢܽܘܢ ܕܶܝܢ ܡܶܬܼܪܰܥܶܝܢ ܗ̱ܘܰܘ ܒܢܰܦܼܫܗܽܘܢ܂ ܘܳܐܡܪܺܝܢ܂ ܕܠܰܚܡܳܐ܂ ܠܳܐ ܢܣܰܒܼܘ܂
16:08 [ai]	ܝܶܫܽܘܥ ܕܶܝܢ ܺܝܕܼܰܥ܂ ܘܶܐܡܰܪ ܠܗܽܘܢ܂ ܡܳܢܳܐ ܡܶܬܼܚܰܫܒܼܺܝܢ ܐܢ̱ܬܿܽܘܢ ܒܢܰܦܼܫܟܼܽܘܢ܂ ܙܥܽܘܪ̈ܰܝ ܗܰܝܡܳܢܽܘܬܼܳܐ܃ ܕܠܰܚܡܳܐ ܠܳܐ ܫܩܰܠܬܿܽܘܢ܂
16:09 [ai]	ܠܳܐ ܥܕܼܰܡܳܐ ܠܗܳܫܳܐ܃ ܐܶܣܬܿܰܟܿܰܠܬܿܽܘܢ܃ ܠܳܐ ܥܳܗܕܺܝܢ ܐܢ̱ܬܿܽܘܢ ܠܗܳܢܽܘܢ ܚܰܡܫܳܐ ܠܰܚܡܺܝܢ̈ ܕܚܰܡܫܳܐ ܐܰܠܦܼܺܝܢ̈܃ ܘܰܟܼܡܳܐ ܩܽܘܦܼܺܝܢܺܝܢ̈ ܫܩܰܠܬܿܽܘܢ܂
16:10 [ai]	ܘܠܳܐ ܠܗܳܢܽܘܢ ܫܰܒܼܥܳܐ ܠܰܚܡܺܝܢ̈܂ ܕܿܰܐܪܒܥܳܐ ܐܰܠܦܼܺܝܢ̈܃ ܘܰܟܼܡܳܐ ܐܶܣܦܿܪ̈ܺܝܕܼܺܝܢ ܫܩܰܠܬܿܽܘܢ܂
16:11 [ai]	ܐܰܝܟܿܰܢ ܠܳܐ ܐܶܣܬܿܰܟܿܰܠܬܿܽܘܢ܂ ܕܠܳܐ ܗ̱ܘܳܐ ܥܰܠ ܠܰܚܡܳܐ ܐܶܡܪܶܬܼ ܠܟܼܽܘܢ܂ ܐܶܠܳܐ ܕܬܶܙܕܿܰܗܪܽܘܢ ܡܶܢ ܚܡܺܝܪܳܐ ܕܿܰܦܼܪ̈ܺܝܫܶܐ ܘܰܕܼܙܰܕܿܽܘܩܳܝܶܐ̈܀
16:12 [ai]	ܗܳܝܕܶܝܢ ܐܶܣܬܿܰܟܿܰܠܘ܂ ܕܠܳܐ ܐܶܡܰܪ ܕܢܶܙܕܿܰܗܪܽܘܢ ܡܶܢ ܚܡܺܝܪܳܐ ܕܠܰܚܡܳܐ܂ ܐܶܠܳܐ ܡܶܢ ܝܽܘܠܦܿܳܢܳܐ ܕܿܰܦܼܪ̈ܺܝܫܶܐ ܘܰܕܼܙܰܕܿܽܘܩܳܝܶܐ̈܀܀
16:13 [ai]	ܟܰܕܼ ܕܶܝܢ ܐܶܬܼܳܐ ܝܶܫܽܘܥ ܠܰܐܬܼܪܳܐ ܕܩܶܣܰܪܺܝܰܐ ܕܼܦܼܺܝܠܺܝܦܿܳܘܣ܃ ܡܫܰܐܶܠ ܗ̱ܘܳܐ ܠܬܼܰܠܡܺܝܕܼܰܘܗ̱ܝ̈܂ ܘܳܐܡܰܪ܂ ܡܰܢܽܘ ܐܳܡܪܺܝܢ ܥܠܰܝ ܐ̱ܢܳܫܳܐ̈ ܕܺܐܝܬܼܰܝ ܒܪܶܗ ܕܐ̱ܢܳܫܳܐ܂
16:14 [ai]	ܗܶܢܽܘܢ ܕܶܝܢ ܐܶܡܰܪܘ܂ ܐܺܝܬܼ ܕܳܐܡܪܺܝܢ܂ ܝܽܘܚܰܢܳܢ ܡܰܥܡܕܼܳܢܳܐ܂ ܐ̱ܚܪ̈ܳܢܶܐ ܕܶܝܢ ܐܶܠܺܝܳܐ܂ ܘܰܐ̱ܚܪ̈ܳܢܶܐ ܐܶܪܰܡܝܳܐ܂ ܐܰܘ ܚܰܕܼ ܡܶܢ ܢܒܼܺܝܶܐ̈܂
16:15 [ai]	ܐܳܡܰܪ ܠܗܽܘܢ܂ ܐܰܢ̱ܬܿܽܘܢ ܕܶܝܢ܂ ܡܰܢܽܘ ܐܳܡܪܺܝܢ ܐܢ̱ܬܿܽܘܢ ܕܺܐܝܬܼܰܝ܀
16:16 [ai]	ܥܢܳܐ ܫܶܡܥܽܘܢ ܟܺܐܦܼܳܐ܂ ܘܶܐܡܰܪ܂ ܐܰܢ̱ܬܿ ܗ̱ܽܘ ܡܫܺܝܚܳܐ ܒܪܶܗ ܕܰܐܠܳܗܳܐ ܚܰܝܳܐ܀
16:17 [ai]	ܥܢܳܐ ܝܶܫܽܘܥ܂ ܘܶܐܡܰܪ ܠܶܗ܂ ܛܽܘܒܼܰܝܟܿ ܫܶܡܥܽܘܢ ܒܪܶܗ ܕܝܰܘܢܳܐ܃ ܕܒܶܣܪܳܐ ܘܰܕܼܡܳܐ܂ ܠܳܐ ܓܠܳܐ ܠܳܟܼ܃ ܐܶܠܳܐ ܐܳܒܼܝ ܕܒܰܫܡܰܝܳܐ܂
16:18 [ai]	ܐܳܦܼ ܐܶܢܳܐ ܐܳܡܰܪ ܐ̱ܢܳܐ ܠܳܟܼ܂ ܕܰܐܢ̱ܬܿ ܗ̱ܽܘ ܟܺܐܦܼܳܐ܂ ܘܥܰܠ ܗܳܕܼܶܐ ܟܺܐܦܼܳܐ ܐܶܒܼܢܶܝܗ ܠܥܺܕ̱ܿܬܿܝ܂ ܘܬܼܰܪ̈ܥܶܐ ܕܰܫܝܽܘܠ܂ ܠܳܐ ܢܶܚܣܢܽܘܢܳܗ܂
16:19 [ai]	ܠܳܟܼ ܐܶܬܿܶܠ ܩܠܺܝܕܼܶܐ̈ ܕܡܰܠܟܿܽܘܬܼܳܐ ܕܰܫܡܰܝܳܐ܂ ܘܟܼܽܠ ܡܶܕܶܡ ܕܬܶܐܣܽܘܪ ܒܰܐܪܥܳܐ܂ ܢܶܗܘܶܐ ܐܰܣܺܝܪ ܒܰܫܡܰܝܳܐ܂ ܘܡܶܕܶܡ ܕܬܶܫܪܶܐ ܒܰܐܪܥܳܐ܂ ܢܶܗܘܶܐ ܫܪܶܐ ܒܰܫܡܰܝܳܐ܀
16:20 [ai]	ܗܳܝܕܶܝܢ ܦܰܩܶܕܼ ܠܬܼܰܠܡܺܝܕܼܰܘܗ̱ܝ̈܃ ܕܰܠܐ̱ܢܳܫ ܠܳܐ ܢܺܐܡܪܽܘܢ܂ ܕܗܽܘܝܽܘ ܡܫܺܝܚܳܐ܂
16:21 [ai]	ܘܡܶܢ ܗܳܝܕܶܝܢ ܫܰܪܺܝ ܝܶܫܽܘܥ ܠܰܡܚܰܘܳܝܽܘ ܠܬܼܰܠܡܺܝܕܼܰܘܗ̱ܝ̈܃ ܕܰܥܬܼܺܝܕܼ ܗ̱ܽܘ ܕܢܺܐܙܰܠ ܠܽܐܘܪܺܫܠܶܡ܂ ܘܣܰܓܿܺܝ ܢܶܚܰܫ ܡܶܢ ܩܰܫܺܝܫܶܐ̈܂ ܘܡܶܢ ܪ̈ܰܒܰܝ ܟܳܗܢܶܐ̈܂ ܘܣܳܦܼܪ̈ܶܐ܂ ܘܢܶܬܼܩܛܶܠ܂ ܘܰܠܝܰܘܡܳܐ ܕܰܬܼܠܳܬܼܳܐ܂ ܢܩܽܘܡ܀
16:22 [ai]	ܘܕܼܰܒܼܪܶܗ ܟܺܐܦܼܳܐ܂ ܘܫܰܪܺܝ ܠܡܶܟܼܳܐܐ ܒܶܗ܂ ܘܶܐܡܰܪ܂ ܚܳܣ ܠܳܟܼ ܡܳܪܝ܂ ܕܬܶܗܘܶܐ ܠܳܟܼ ܗܳܕܼܶܐ܂
16:23 [ai]	ܗܽܘ ܕܶܝܢ ܐܶܬܼܦܿܢܺܝ܂ ܘܶܐܡܰܪ ܠܟܼܺܐܦܼܳܐ܂ ܙܶܠ ܠܳܟܼ ܠܒܼܶܣܬܿܰܪܝ܂ ܣܳܛܳܢܳܐ܃ ܬܿܽܘܩܰܠܬܳܐ ܐܰܢ̱ܬܿ ܠܺܝ܂ ܕܠܳܐ ܡܶܬܼܪܰܥܶܐ ܐܰܢ̱ܬܿ ܕܰܐܠܳܗܳܐ܂ ܐܶܠܳܐ ܕܿܰܒܼܢܰܝ ܐ̱ܢܳܫܳܐ̈܀
16:24 [ai]	ܗܳܝܕܶܝܢ ܐܶܡܰܪ ܝܶܫܽܘܥ ܠܬܼܰܠܡܺܝܕܼܰܘܗ̱ܝ̈܂ ܡܰܢ ܕܨܳܒܼܶܐ ܕܢܺܐܬܼܶܐ ܒܳܬܼܰܪܝ܂ ܢܶܟܼܦܿܽܘܪ ܒܢܰܦܼܫܶܗ܂ ܘܢܶܫܩܽܘܠ ܙܩܺܝܦܼܶܗ܂ ܘܢܺܐܬܼܶܐ ܒܳܬܼܰܪܝ܂
16:25 [ai]	ܡܰܢ ܕܨܳܒܼܶܐ ܓܶܝܪ ܕܢܰܚܶܐ ܢܰܦܼܫܶܗ܂ ܢܰܘܒܿܕܼܺܝܗ܂ ܘܡܰܢ ܕܢܰܘܒܿܶܕܼ ܢܰܦܼܫܶܗ ܡܶܛܽܠܳܬܼܝ܂ ܢܶܫܟܿܚܺܝܗ
16:26 [ai]	ܡܳܢܳܐ ܓܶܝܪ ܡܶܬܼܗܰܢܶܐ ܒܰܪܢܳܫܳܐ܃ ܐܶܢ ܟܽܠܶܗ ܥܳܠܡܳܐ ܢܶܩܢܶܐ܂ ܘܢܰܦܼܫܶܗ ܢܶܚܣܰܪ܂ ܐܰܘ ܡܳܢܳܐ ܢܶܬܿܶܠ ܒܰܪܢܳܫܳܐ ܬܰܚܠܽܘܦܼܳܐ ܕܢܰܦܼܫܶܗ܀
16:27 [ai]	ܥܬܼܺܝܕܼ ܗ̱ܽܘ ܓܶܝܪ ܒܪܶܗ ܕܐ̱ܢܳܫܳܐ ܕܢܺܐܬܼܶܐ ܒܬܶܫܒܿܽܘܚܬܳܐ ܕܰܐܒܼܽܘܗ̱ܝ܂ ܥܰܡ ܡܰܠܰܐܟܼܰܘܗ̱ܝ̈ ܩܰܕܿܺܝܫܶܐ̈܃ ܘܗܳܝܕܶܝܢ ܢܶܦܼܪܽܘܥ ܠܐ̱ܢܳܫ ܐ̱ܢܳܫ ܐܰܝܟܼ ܥܒܼܳܕܼܰܘܗ̱ܝ̈܀
16:28 [ai]	ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܂ ܕܺܐܝܬܼ ܐ̱ܢܳܫܳܐ̈ ܕܩܳܝܡܺܝܢ ܬܢܳܢ܃ ܕܠܳܐ ܢܶܛܥܡܽܘܢ ܡܰܘܬܳܐ܃ ܥܕܼܰܡܳܐ ܕܢܶܚܙܽܘܢ ܠܰܒܼܪܶܗ ܕܐ̱ܢܳܫܳܐ܂ ܕܳܐܬܼܶܐ ܒܡܰܠܟܿܽܘܬܼܶܗ܀

next chapter