← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62040: P Mt

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


23:01 [ai]ܗܳܝܕܶܝܢ ܝܶܫܽܘܥ ܡܰܠܶܠ܂ ܥܰܡ ܟܶܢܫܶܐ̈܂ ܘܥܰܡ ܬܰܠܡܺܝܕܼܰܘܗ̱ܝ̈܂
23:02 [ai]ܘܶܐܡܰܪ ܠܗܽܘܢ܂ ܥܰܠ ܟܽܘܪܣܝܳܐ ܕܡܽܘܫܶܐ ܺܝܬܼܶܒܼܘ ܣܳܦܼܪ̈ܶܐ ܘܰܦܼܪ̈ܺܝܫܶܐ܃
23:03 [ai]ܟܽܠ ܡܶܕܶܡ ܗܳܟܼܺܝܠ ܕܢܺܐܡܪܽܘܢ ܠܟܼܽܘܢ ܕܬܶܛܪܽܘܢ܃ ܛܰܪܘ ܘܰܥܒܼܶܕܼܘ܂ ܐܰܝܟܼ ܥܒܼܳܕܼܰܝܗܽܘܢ̈ ܕܶܝܢ ܠܳܐ ܬܶܥܒܿܕܼܽܘܢ܂ ܐܳܡܪܺܝܢ ܓܶܝܪ܂ ܘܠܳܐ ܥܳܒܼܕܺܝܢ܀
23:04 [ai]ܘܳܐܣܪܺܝܢ ܡܰܘܒܿܠܶܐ̈ ܝܰܩܺܝܪ̈ܳܬܼܳܐ܃ ܘܣܳܝܡܺܝܢ ܥܰܠ ܟܰܬܼܦܿܳܬܼܳܐ̈ ܕܿܰܒܼܢܰܝ ܐ̱ܢܳܫܳܐ̈܂ ܗܶܢܽܘܢ ܕܶܝܢ ܒܨܶܒܼܥܗܽܘܢ܂ ܠܳܐ ܨܳܒܼܶܝܢ ܕܢܶܩܪܒܼܽܘܢ ܠܗܶܝܢ܀
23:05 [ai]ܘܟܼܽܠܗܽܘܢ ܥܒܼܳܕܼܰܝܗܽܘܢ̈ ܥܳܒܼܕܺܝܢ܂ ܕܢܶܬܼܚܙܽܘܢ ܠܰܒܼܢܰܝ ܐ̱ܢܳܫܳܐ̈܂ ܡܰܦܼܬܿܶܝܢ ܓܶܝܪ ܬܶܦܼܠܰܝܗܽܘܢ̈܂ ܘܡܰܘܪܟܼܺܝܢ ܬܶܟܼܠܳܬܼܳܐ̈ ܕܿܡܰܪ̈ܛܽܘܛܰܝܗܽܘܢ܂
23:06 [ai]ܘܪܳܚܡܺܝܢ ܪܺܫ ܣܡܳܟܼܶܐ̈ ܒܰܚܫܳܡܝܳܬܼܳܐ̈܃ ܘܪܺܫ ܡܰܘܬܿܒܼܶܐ̈ ܒܰܟܼܢܽܘܫܳܬܼܳܐ̈܂
23:07 [ai]ܘܰܫܠܳܡܳܐ ܒܫܽܘܩܶܐ̈܂ ܘܰܕܼܢܶܗܘܽܘܢ ܡܶܬܼܩܪܶܝܢ ܡܶܢ ܐ̱ܢܳܫܳܐ̈ ܪܰܒܺܝ܂
23:08 [ai]ܐܰܢ̱ܬܿܽܘܢ ܕܶܝܢ܂ ܠܳܐ ܬܶܬܼܩܪܽܘܢ ܪܰܒܺܝ܂ ܚܰܕܼ ܗ̱ܽܘ ܓܶܝܪ ܪܰܒܟܽܘܢ܂ ܐܰܢ̱ܬܿܽܘܢ ܕܶܝܢ ܟܽܠܟܼܽܘܢ܂ ܐܰܚܶܐ̈ ܐܰܢ̱ܬܿܽܘܢ܂
23:09 [ai]ܘܰܐܒܼܳܐ ܠܳܐ ܬܶܩܪܽܘܢ ܠܟܼܽܘܢ ܒܰܐܪܥܳܐ܂ ܚܰܕܼ ܗ̱ܽܘ ܓܶܝܪ ܐܰܒܼܽܘܟܼܽܘܢ ܕܒܰܫܡܰܝܳܐ܂
23:10 [ai]ܘܠܳܐ ܬܶܬܼܩܪܽܘܢ ܡܕܼܰܒܿܪ̈ܳܢܶܐ܂ ܡܶܛܽܠ ܕܚܰܕܼ ܗ̱ܽܘ ܡܕܼܰܒܿܪܳܢܟܼܽܘܢ܂ ܡܫܺܝܚܳܐ܂
23:11 [ai]ܗܰܘ ܕܶܝܢ ܕܪܰܒܿ ܒܟܽܘܢ܃ ܢܶܗܘܶܐ ܠܟܼܽܘܢ ܡܫܰܡܫܳܢܳܐ܀
23:12 [ai]ܡܰܢ ܓܶܝܪ ܕܰܢܪܺܝܡ ܢܰܦܼܫܶܗ܂ ܢܶܬܼܡܰܟܿܰܟܼ܂ ܘܡܰܢ ܕܢܰܡܶܟܼ ܢܰܦܼܫܶܗ܂ ܢܶܬܿܬܿܪܺܝܡ܀
23:13 [ai]ܘܳܝ܂ ܠܟܼܽܘܢ܂ ܣܳܦܼܪ̈ܶܐ ܘܰܦܼܪ̈ܺܝܫܶܐ܂ ܢܳܣܒܰܝ̈ ܒܰܐܦܿܶܐ̈܃ ܕܳܐܟܼܠܺܝܢ ܐܢ̱ܬܿܽܘܢ ܒܳܬܿܶܐ̈ ܕܿܰܐܪ̈ܡܠܳܬܼܳܐ܂ ܒܥܶܠܬܼܳܐ ܕܡܰܘܪܟܼܺܝܢ ܐܢ̱ܬܿܽܘܢ ܨܠܰܘܳܬܼܟܼܽܘܢ̈܂ ܡܶܛܽܠ ܗܳܢܳܐ ܬܩܰܒܿܠܽܘܢ ܕܺܝܢܳܐ ܝܰܬܿܺܝܪܳܐ܀
23:14 [ai]ܘܳܝ܂ ܠܟܼܽܘܢ܂ ܣܳܦܼܪ̈ܶܐ ܘܰܦܼܪ̈ܺܝܫܶܐ܂ ܢܳܣܒܰܝ̈ ܒܰܐܦܿܶܐ̈܃ ܕܰܐܚܺܝܕܼܺܝܢ ܐܢ̱ܬܿܽܘܢ ܡܰܠܟܿܽܘܬܼܳܐ ܕܰܫܡܰܝܳܐ ܩܕܼܳܡ ܒܢܰܝ ܐ̱ܢܳܫܳܐ̈܂ ܐܰܢ̱ܬܿܽܘܢ ܓܶܝܪ ܠܳܐ ܥܳܐܠܺܝܢ ܐܢ̱ܬܿܽܘܢ܃ ܘܠܰܐܝܠܶܝܢ ܕܥܳܐܠܺܝܢ܂ ܠܳܐ ܫܳܒܼܩܺܝܢ ܐܢ̱ܬܿܽܘܢ ܠܡܶܥܰܠ܀
23:15 [ai]ܘܳܝ܂ ܠܟܼܽܘܢ܂ ܣܳܦܼܪ̈ܶܐ ܘܰܦܼܪ̈ܺܝܫܶܐ܂ ܢܳܣܒܰܝ̈ ܒܰܐܦܿܶܐ̈܃ ܕܡܶܬܼܟܰܪܟܿܺܝܢ ܐܢ̱ܬܿܽܘܢ ܝܰܡܳܐ ܘܝܰܒܼܫܳܐ܃ ܕܬܶܥܒܿܕܼܽܘܢ ܚܰܕܼ ܓܺܝܽܘܪܳܐ܂ ܘܡܳܐ ܕܰܗܘܳܐ܃ ܥܳܒܼܕܺܝܢ ܐܢ̱ܬܿܽܘܢ ܠܶܗ ܒܪܶܗ ܕܓܺܗܰܢܳܐ܂ ܐܰܥܦܼܳܐ ܥܠܰܝܟܿܽܘܢ܀
23:16 [ai]ܘܳܝ܂ ܠܟܼܽܘܢ܂ ܢܳܓܼܽܘܕܼܶܐ̈ ܣܡܰܝܳܐ̈܃ ܕܳܐܡܪܺܝܢ ܐܢ̱ܬܿܽܘܢ܂ ܕܡܰܢ ܕܝܳܡܶܐ ܒܗܰܝܟܠܳܐ܂ ܠܳܐ ܗ̱ܘܳܐ ܡܶܕܶܡ܂ ܡܰܢ ܕܶܝܢ ܕܝܳܡܶܐ ܒܕܰܗܒܼܳܐ ܕܰܒܼܗܰܝܟܠܳܐ܂ ܚܳܐܶܒܼ܂
23:17 [ai]ܣܰܟܼܠܶܐ̈ ܘܰܣܡܰܝܳܐ̈܃ ܡܳܢܳܐ ܓܶܝܪ ܪܰܒܼ܂ ܕܰܗܒܼܳܐ܂ ܐܰܘ ܗܰܝܟܠܳܐ ܕܗܽܘ ܡܩܰܕܿܶܫ ܠܶܗ ܠܕܼܰܗܒܼܳܐ܂
23:18 [ai]ܘܡܰܢ ܕܝܳܡܶܐ ܒܡܰܕܼܒܿܚܳܐ܂ ܠܳܐ ܗ̱ܘܳܐ ܡܶܕܶܡ܂ ܡܰܢ ܕܶܝܢ ܕܝܳܡܶܐ ܒܩܽܘܪܒܿܳܢܳܐ ܕܰܠܥܶܠ ܡܶܢܶܗ܂ ܚܳܐܶܒܼ܂
23:19 [ai]ܣܰܟܼܠܶܐ̈ ܘܰܥܘܺܝܪ̈ܶܐ܃ ܡܳܢܳܐ ܪܰܒܼ܂ ܩܽܘܪܒܿܳܢܳܐ܂ ܐܰܘ ܡܰܕܼܒܿܚܳܐ ܕܰܡܩܰܕܿܶܫ ܠܩܽܘܪܒܿܳܢܳܐ܂
23:20 [ai]ܡܰܢ ܕܝܳܡܶܐ ܗܳܟܼܺܝܠ ܒܡܰܕܼܒܿܚܳܐ܃ ܝܳܡܶܐ ܒܶܗ܂ ܘܰܒܟܼܽܠ ܡܳܐ ܕܺܐܝܬܼ ܠܥܶܠ ܡܶܢܶܗ܂
23:21 [ai]ܘܡܰܢ ܕܝܳܡܶܐ ܒܗܰܝܟܠܳܐ܃ ܝܳܡܶܐ ܒܶܗ܂ ܘܰܒܡܰܢ ܕܥܳܡܰܪ ܒܶܗ܂
23:22 [ai]ܘܡܰܢ ܕܝܳܡܶܐ ܒܰܫܡܰܝܳܐ܃ ܝܳܡܶܐ ܒܟܽܘܪܣܝܶܗ ܕܰܐܠܳܗܳܐ܂ ܘܰܒܡܰܢ ܕܝܳܬܼܶܒܼ ܠܥܶܠ ܡܶܢܶܗ܀
23:23 [ai]ܘܳܝ܂ ܠܟܼܽܘܢ܂ ܣܳܦܼܪ̈ܶܐ ܘܰܦܼܪ̈ܺܝܫܶܐ܂ ܢܳܣܒܰܝ̈ ܒܰܐܦܿܶܐ̈܃ ܕܰܡܥܰܣܪܺܝܢ ܐܢ̱ܬܿܽܘܢ ܢܳܢܥܳܐ܂ ܘܰܫܒܼܶܬܳܐ ܘܟܼܰܡܽܘܢܳܐ܃ ܘܰܫܒܼܰܩܬܿܽܘܢ ܝܰܩܺܝܪ̈ܳܬܼܶܗ ܕܢܳܡܽܘܣܳܐ܂ ܕܺܝܢܳܐ܂ ܘܰܚܢܳܢܳܐ܂ ܘܗܰܝܡܳܢܽܘܬܼܳܐ܂ ܗܳܠܶܝܢ ܕܶܝܢ ܘܳܠܶܐ ܗ̱ܘܳܐ ܕܬܶܥܒܿܕܼܽܘܢ܃ ܘܗܳܠܶܝܢ ܠܳܐ ܬܶܫܒܿܩܽܘܢ܀
23:24 [ai]ܢܳܓܼܽܘܕܼܶܐ̈ ܣܡܰܝܳܐ̈܃ ܕܰܡܨܰܠܠܺܝܢ ܒܳܩܶܐ̈܂ ܘܒܼܳܠܥܺܝܢ ܓܰܡܠܶܐ̈܀
23:25 [ai]ܘܳܝ܂ ܠܟܼܽܘܢ܂ ܣܳܦܼܪ̈ܶܐ ܘܰܦܼܪ̈ܺܝܫܶܐ܂ ܢܳܣܒܰܝ̈ ܒܰܐܦܿܶܐ̈܃ ܕܰܡܕܼܰܟܿܶܝܢ ܐܢ̱ܬܿܽܘܢ܂ ܒܰܪܶܗ ܕܟܳܣܳܐ ܘܰܕܼܙܳܒܼܽܘܪܳܐ܃ ܠܓܼܰܘ ܕܶܝܢ ܡܠܶܝܢ ܚܛܽܘܦܼܝܳܐ܂ ܘܥܰܘܠܳܐ܂
23:26 [ai]ܦܿܪ̈ܺܝܫܶܐ ܥܘܺܝܪ̈ܶܐ܂ ܕܰܟܿܰܘ ܠܽܘܩܕܼܰܡ ܓܰܘܶܗ ܕܟܳܣܳܐ ܘܰܕܼܙܳܒܼܽܘܪܳܐ܃ ܕܰܗܘܳܐ ܐܳܦܼ ܒܰܪܗܽܘܢ ܕܟܶܐ܀
23:27 [ai]ܘܳܝ܂ ܠܟܼܽܘܢ܂ ܣܳܦܼܪ̈ܶܐ ܘܰܦܼܪ̈ܺܝܫܶܐ܂ ܢܳܣܒܰܝ̈ ܒܰܐܦܿܶܐ̈܃ ܕܕܼܳܡܶܝܢ ܐܢ̱ܬܿܽܘܢ ܠܩܰܒܼܪ̈ܶܐ ܡܰܟܼܠܫܶܐ̈܂ ܕܡܶܢ ܠܒܼܰܪ ܡܶܬܼܚܙܶܝܢ ܫܰܦܿܺܝܪ̈ܶܐ܃ ܡܶܢ ܠܓܼܰܘ ܕܶܝܢ ܡܠܶܝܢ ܓܿܰܪ̈ܡܶܐ ܕܡܺܝܬܼܶܐ̈܂ ܘܟܼܽܠܳܗ ܛܰܢܦܼܽܘܬܼܳܐ܂
23:28 [ai]ܗܳܟܼܰܢܳܐ ܐܳܦܼ ܐܰܢ̱ܬܿܽܘܢ܂ ܡܶܢ ܠܒܼܰܪ ܡܶܬܼܚܙܶܝܢ ܐܢ̱ܬܿܽܘܢ ܠܰܒܼܢܰܝ ܐ̱ܢܳܫܳܐ̈ ܐܰܝܟܼ ܙܰܕܿܺܝܩܶܐ̈܃ ܘܡܶܢ ܠܓܼܰܘ ܡܠܶܝܢ ܐܢ̱ܬܿܽܘܢ ܥܰܘܠܳܐ܂ ܘܡܰܣܰܒܼ ܒܰܐܦܿܶܐ̈܀
23:29 [ai]ܘܳܝ܂ ܠܟܼܽܘܢ܂ ܣܳܦܼܪ̈ܶܐ ܘܰܦܼܪ̈ܺܝܫܶܐ܂ ܢܳܣܒܰܝ̈ ܒܰܐܦܿܶܐ̈܃ ܕܒܳܢܶܝܢ ܐܢ̱ܬܿܽܘܢ ܩܰܒܼܪ̈ܶܐ ܕܰܢܒܼܺܝܶܐ̈܃ ܘܰܡܨܰܒܿܬܼܺܝܢ ܐܢ̱ܬܿܽܘܢ ܒܶܝܬܼ ܩܒܼܽܘܪ̈ܶܐ ܕܙܰܕܿܺܝܩܶܐ̈܂
23:30 [ai]ܘܳܐܡܪܺܝܢ ܐܢ̱ܬܿܽܘܢ܂ ܕܶܐܠܽܘ ܗܘܰܝܢ ܒܝܰܘܡܰܝ̈ ܐܰܒܼܳܗܰܝܢ̈܃ ܠܳܐ ܗܳܘܶܝܢ ܗ̱ܘܰܝܢ ܠܗܽܘܢ ܫܰܘܬܿܳܦܼܶܐ̈ ܒܰܕܼܡܳܐ ܕܰܢܒܼܺܝܶܐ̈܂
23:31 [ai]ܡܳܕܼܶܝܢ ܡܰܣܗܕܼܺܝܢ ܐܢ̱ܬܿܽܘܢ ܥܰܠ ܢܰܦܼܫܟܼܽܘܢ܃ ܕܿܰܒܼܢܰܝܳܐ ܐܰܢ̱ܬܿܽܘܢ ܕܗܳܢܽܘܢ ܕܩܰܛܶܠܘ ܠܰܢܒܼܺܝܶܐ̈܀
23:32 [ai]ܘܳܐܦܼ ܐܰܢ̱ܬܿܽܘܢ܂ ܡܰܠܰܘ ܡܫܽܘܚܬܼܳܐ ܕܰܐܒܼܳܗܰܝܟܿܽܘܢ̈܂
23:33 [ai]ܚܘܰܘܳܬܼܳܐ̈܂ ܝܰܠܕܿܳܐ ܕܳܐܟܼܶܕܼܢܶܐ̈܃ ܐܰܝܟܿܰܢܳܐ ܬܶܥܪܩܽܘܢ ܡܶܢ ܕܺܝܢܳܐ ܕܓܺܗܰܢܳܐ ܿ܀ܿ܀ܿ
23:34 [ai]ܡܶܛܽܠ ܗܳܢܳܐ܂ ܗܳܐ ܐܶܢܳܐ ܡܫܰܕܿܰܪ ܐ̱ܢܳܐ ܠܘܳܬܼܟܼܽܘܢ܃ ܢܒܼܺܝܶܐ̈ ܘܚܰܟܿܺܝܡܶܐ̈܂ ܘܣܳܦܼܪ̈ܶܐ܂ ܡܶܢܗܽܘܢ ܩܳܛܠܺܝܢ ܐܢ̱ܬܿܽܘܢ ܘܙܳܩܦܿܺܝܢ ܐܢ̱ܬܿܽܘܢ܂ ܘܡܶܢܗܽܘܢ ܡܢܰܓܿܕܼܺܝܢ ܐܢ̱ܬܿܽܘܢ ܒܰܟܼܢܽܘܫܳܬܼܟܼܽܘܢ̈܂ ܘܬܼܶܪܕܿܦܼܽܘܢ ܐܶܢܽܘܢ ܡܶܢ ܡܕܼܺܝܢܳܐ ܠܰܡܕܼܺܝܢܳܐ܃
23:35 [ai]ܐܰܝܟܿܰܢܳܐ ܕܢܺܐܬܼܶܐ ܥܠܰܝܟܿܽܘܢ ܟܽܠܶܗ ܕܡܳܐ ܕܙܰܕܿܺܝܩܶܐ̈ ܕܶܐܬܼܶܐܫܶܕܼ ܥܰܠ ܐܰܪܥܳܐ܃ ܡܶܢ ܕܡܶܗ ܕܗܳܒܼܶܝܠ ܙܰܕܿܺܝܩܳܐ܃ ܘܰܥܕܼܰܡܳܐ ܠܰܕܼܡܶܗ ܕܰܙܟܼܰܪܝܳܐ ܒܰܪ ܒܿܪܰܟܼܝܳܐ܂ ܗܰܘ ܕܰܩܛܰܠܬܿܽܘܢ ܒܰܝܢܰܝ ܗܰܝܟܠܳܐ ܠܡܰܕܼܒܿܚܳܐ܂
23:36 [ai]ܐܰܡܺܝܢ ܐܳܡܰܪ ܐ̱ܢܳܐ ܠܟܼܽܘܢ܃ ܕܢܺܐܬܼܝܳܢ̈ ܗܳܠܶܝܢ ܟܽܠܗܶܝܢ ܥܰܠ ܫܰܪܒܿܬܼܳܐ ܗܳܕܼܶܐ܀
23:37 [ai]ܐܽܘܪܺܫܠܶܡ ܐܽܘܪܺܫܠܶܡ܃ ܩܳܛܠܰܬܼ ܢܒܼܺܝܶܐ̈܂ ܘܪܳܓܼܡܰܬܼ ܠܰܐܝܠܶܝܢ ܕܰܫܠܺܝܚܺܝܢ ܠܘܳܬܼܳܗ܂ ܟܡܳܐ ܙܰܒܼܢܺܝܢ̈ ܨܒܼܺܝܬܼ ܕܶܐܟܰܢܶܫ ܒܢܰܝܟܿܝ܃ ܐܰܝܟܼ ܕܟܳܢܫܳܐ ܬܿܰܪܢܳܓܼܽܘܠܬܳܐ ܦܿܰܪ̈ܽܘܓܼܶܝܗ ܬܚܶܝܬܼ ܓܶܦܼܶܝܗ̈܂ ܘܠܳܐ ܨܒܼܰܝܬܿܽܘܢ܂
23:38 [ai]ܗܳܐ ܡܶܫܬܿܒܼܶܩ ܠܟܼܽܘܢ ܒܰܝܬܿܟܼܽܘܢ ܚܰܪܒܿܳܐ܂
23:39 [ai]ܐܳܡܰܪܢܳܐ ܠܟܼܽܘܢ ܓܶܝܪ܃ ܕܠܳܐ ܬܶܚܙܽܘܢܳܢܝ ܡܶܢ ܗܳܫܳܐ܂ ܥܕܼܰܡܳܐ ܕܬܺܐܡܪܽܘܢ܃ ܒܪܺܝܟܼ ܗ̱ܽܘ ܕܳܐܬܼܶܐ ܒܰܫܡܶܗ ܕܡܳܪܝܳܐ܀

next chapter