← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62042: P Lk

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


02:01 [ai]ܗܘܳܐ ܕܶܝܢ ܒܝܰܘܡܳܬܼܳܐ̈ ܗܳܢܽܘܢ܃ ܘܰܢܦܼܰܩ ܦܽܘܩܕܳܢܳܐ ܡܶܢ ܐܰܓܼܽܘܣܛܳܘܣ ܩܶܣܰܪ܃ ܕܢܶܬܼܟܿܬܼܶܒܼ ܟܽܠܶܗ ܥܰܡܳܐ ܕܽܐܘܚܕܼܳܢܶܗ܂
02:02 [ai]ܗܳܕܼܶܐ ܡܰܟܼܬܿܒܼܳܢܽܘܬܼܳܐ ܩܰܕܼܡܳܝܬܳܐ ܗܘܳܬܼ܃ ܒܗܺܓܼܡܳܢܽܘܬܼܳܐ ܕܩܽܘܪܺܝܢܳܘܣ ܒܣܽܘܪܺܝܰܐ܂
02:03 [ai]ܘܳܐܙܶܠ ܗ̱ܘܳܐ ܟܽܠܢܳܫ ܕܢܶܬܼܟܿܬܼܶܒܼ ܒܰܡܕܼܺܝܢ̱ܬܿܶܗ܂
02:04 [ai]ܣܠܶܩ ܗ̱ܘܳܐ ܕܶܝܢ ܐܳܦܼ ܝܰܘܣܶܦܼ ܡܶܢ ܢܳܨܪܰܬܼ ܡܕܼܺܝܢ̱ܬܳܐ ܕܰܓܼܠܺܝܠܳܐ܂ ܠܺܝܗܽܘܕܼ܂ ܠܰܡܕܼܺܝܢ̱ܬܿܶܗ ܕܕܼܰܘܺܝܕܼ ܕܡܶܬܼܩܰܪܝܳܐ ܒܶܝܬܼ ܠܚܶܡ܂ ܡܶܛܽܠ ܕܺܐܝܬܼܰܘܗ̱ܝ ܗ̱ܘܳܐ܂ ܡܶܢ ܒܰܝܬܿܶܗ܂ ܘܡܶܢ ܫܰܪܒܿܬܼܶܗ ܕܕܼܰܘܺܝܕܼ܂
02:05 [ai]ܥܰܡ ܡܰܪܝܰܡ ܡܟܼܺܝܪܬܿܶܗ ܟܰܕܼ ܒܰܛܢܳܐ܂ ܕܬܰܡܳܢ ܢܶܬܼܟܿܬܼܶܒܼ܀
02:06 [ai]ܘܰܗܘܳܐ ܕܟܰܕܼ ܬܰܡܳܢ ܐܶܢܽܘܢ܃ ܐܶܬܼܡܰܠܺܝܘ ܝܰܘܡܳܬܼܳܗ̈ ܕܬܺܐܠܰܕܼ܂
02:07 [ai]ܘܝܶܠܕܿܰܬܼ ܒܪܳܗ ܒܽܘܟܼܪܳܐ܃ ܘܰܟܼܪܰܟܼܬܿܶܗ ܒܥܰܙܪ̈ܽܘܪܶܐ܂ ܘܰܐܪܡܝܰܬܼܶܗ ܒܽܐܘܪܝܳܐ܂ ܡܶܛܽܠ ܕܠܰܝܬܿ ܗ̱ܘܳܐ ܠܗܽܘܢ ܕܽܘܟܿܬܼܳܐ܂ ܐܰܝܟܿܳܐ ܕܰܫܪܶܝܢ ܗ̱ܘܰܘ܀
02:08 [ai]ܪ̈ܳܥܰܘܳܬܼܳܐ ܕܶܝܢ܂ ܐܺܝܬܼ ܗ̱ܘܰܘ ܒܶܗ ܒܰܐܬܼܪܳܐ܃ ܕܰܫܪܶܝܢ ܗ̱ܘܰܘ ܬܰܡܳܢ܂ ܘܢܳܛܪܺܝܢ ܡܰܛܰܪܬܼܳܐ ܕܠܺܠܝܳܐ ܥܰܠ ܡܰܪ̈ܥܝܳܬܼܗܽܘܢ܂
02:09 [ai]ܘܗܳܐ ܡܰܠܰܐܟܼܳܐ ܕܰܐܠܳܗܳܐ ܐܶܬܼܳܐ ܠܘܳܬܼܗܽܘܢ܂ ܘܬܼܶܫܒܿܽܘܚܬܿܶܗ ܕܡܳܪܝܳܐ ܐܰܢܗܪܰܬܼ ܥܠܰܝܗܽܘܢ܂ ܘܰܕܼܚܶܠܘ ܕܶܚܠܬܼܳܐ ܪܰܒܿܬܼܳܐ܂
02:10 [ai]ܘܶܐܡܰܪ ܠܗܽܘܢ ܡܰܠܰܐܟܼܳܐ܂ ܠܳܐ ܬܶܕܼܚܠܽܘܢ܂ ܗܳܐ ܓܶܝܪ ܡܣܰܒܰܪ ܐ̱ܢܳܐ ܠܟܼܽܘܢ ܚܰܕܼܽܘܬܼܳܐ ܪܰܒܿܬܼܳܐ܂ ܕܬܶܗܘܶܐ ܠܟܼܽܠܶܗ ܥܳܠܡܳܐ܂
02:11 [ai]ܐܶܬܼܺܝܠܶܕܼ ܠܟܼܽܘܢ ܓܶܝܪ ܝܰܘܡܳܢܳܐ ܦܳܪܽܘܩܳܐ܃ ܕܺܐܝܬܼܰܘܗ̱ܝ ܡܳܪܝܳܐ ܡܫܺܝܚܳܐ܂ ܒܰܡܕܼܺܝܢ̱ܬܿܶܗ ܕܕܼܰܘܺܝܕܼ܂
02:12 [ai]ܘܗܳܕܼܶܐ ܠܟܼܽܘܢ ܐܳܬܼܳܐ܂ ܡܶܫܟܿܚܺܝܢ ܐܢ̱ܬܿܽܘܢ ܥܽܘܠܳܐ܂ ܕܰܟܼܪܺܝܟܼ ܒܥܰܙܪ̈ܽܘܪܶܐ܂ ܘܣܺܝܡ ܒܽܐܘܪܝܳܐ܂
02:13 [ai]ܘܡܶܢ ܫܶܠܝ܂ ܐܶܬܼܚܙܺܝܘ ܥܰܡ ܡܰܠܰܐܟܼܳܐ ܚܰܝܠܰܘܳܬܼܳܐ̈ ܣܰܓܿܺܝܶܐܐ̈ ܕܰܫܡܰܝܳܐ܃ ܟܰܕܼ ܡܫܰܒܿܚܺܝܢ ܠܰܐܠܳܗܳܐ܂ ܘܳܐܡܪܺܝܢ܃
02:14 [ai]ܬܿܶܫܒܿܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ܂ ܘܥܰܠ ܐܰܪܥܳܐ ܫܠܳܡܳܐ܂ ܘܣܰܒܼܪܳܐ ܛܳܒܼܳܐ ܠܰܒܼܢܰܝ ܐ̱ܢܳܫܳܐ̈܀
02:15 [ai]ܘܰܗܘܳܐ ܕܟܰܕܼ ܐܶܙܰܠܘ ܡܶܢ ܠܘܳܬܼܗܽܘܢ ܡܰܠܰܐܟܼܶܐ̈ ܠܰܫܡܰܝܳܐ܃ ܡܰܠܶܠܘ ܪ̈ܳܥܰܘܳܬܼܳܐ ܚܰܕܼ ܥܰܡ ܚܰܕܼ܂ ܘܳܐܡܪܺܝܢ܂ ܢܶܪܕܿܶܐ ܥܕܼܰܡܳܐ ܠܒܼܶܝܬܼ ܠܚܶܡ܃ ܘܢܶܚܙܶܐ ܠܡܶܠܬܼܳܐ ܗܳܕܼܶܐ ܕܰܗܘܳܬܼ܂ ܐܰܝܟܼ ܕܡܳܪܝܳܐ ܐܰܘܕܿܰܥ ܠܰܢ܂
02:16 [ai]ܘܶܐܬܼܰܘ ܡܣܰܪܗܒܼܳܐܺܝܬܼ܂ ܘܶܐܫܟܿܰܚܘ ܠܡܰܪܝܰܡ ܘܰܠܝܰܘܣܶܦܼ܂ ܘܰܠܥܽܘܠܳܐ ܕܣܺܝܡ ܒܽܐܘܪܝܳܐ܂
02:17 [ai]ܘܟܼܰܕܼ ܚܙܰܘ܃ ܐܰܘܕܰܥܘ ܠܡܶܠܬܼܳܐ ܕܶܐܬܼܡܰܠܠܰܬܼ ܥܰܡܗܽܘܢ ܥܠܰܘܗ̱ܝ ܥܰܠ ܛܰܠܝܳܐ܂
02:18 [ai]ܘܟܼܽܠܗܽܘܢ ܕܰܫܡܰܥܘ܃ ܐܶܬܿܕܰܡܰܪܘ ܥܰܠ ܐܰܝܠܶܝܢ ܕܶܐܬܼܡܰܠܶܠ ܠܗܽܘܢ ܡܶܢ ܪ̈ܳܥܰܘܳܬܼܳܐ܂
02:19 [ai]ܡܰܪܝܰܡ ܕܶܝܢ܂ ܢܳܛܪܳܐ ܗ̱ܘܳܬܼ ܟܽܠܗܶܝܢ ܡܶܠܶܐ̈ ܗܳܠܶܝܢ܃ ܘܰܡܦܼܰܚܡܳܐ ܒܠܶܒܿܳܗ܂
02:20 [ai]ܘܰܗܦܼܰܟܼܘ ܪ̈ܳܥܰܘܳܬܼܳܐ ܗܳܢܽܘܢ܃ ܟܰܕܼ ܡܫܰܒܿܚܺܝܢ܂ ܘܰܡܗܰܠܠܺܝܢ ܠܰܐܠܳܗܳܐ܃ ܥܰܠ ܟܽܠ ܕܰܚܙܰܘ ܘܰܫܡܰܥܘ܂ ܐܰܝܟܿܰܢܳܐ ܕܶܐܬܼܡܰܠܰܠ ܥܰܡܗܽܘܢ܀
02:21 [ai]ܘܟܼܰܕܼ ܡܠܰܘ ܬܡܳܢܝܳܐ ܝܰܘܡܺܝܢ̈ ܕܢܶܬܼܓܿܙܰܪ ܛܰܠܝܳܐ܃ ܐܶܬܼܩܪܺܝ ܫܡܶܗ܂ ܝܶܫܽܘܥ܂ ܕܶܐܬܼܩܪܺܝ ܡܶܢ ܡܰܠܰܐܟܼܳܐ ܩܕܼܳܡ ܕܢܶܬܼܒܿܛܶܢ ܒܟܰܪܣܳܐ܂
02:22 [ai]ܘܟܼܰܕܼ ܐܶܬܼܡܰܠܺܝܘ ܝܰܘܡܳܬܼܳܐ̈ ܕܬܰܕܼܟܿܺܝܬܼܗܽܘܢ܂ ܐܰܝܟܼ ܢܳܡܽܘܣܳܐ ܕܡܽܘܫܶܐ܃ ܐܰܣܩܽܘܗ̱ܝ ܠܽܐܘܪܺܫܠܶܡ ܕܰܢܩܺܝܡܽܘܢܳܝܗ̱ܝ ܩܕܼܳܡ ܡܳܪܝܳܐ܂
02:23 [ai]ܐܰܝܟܼ ܕܰܟܼܬܼܺܝܒܼ ܒܢܳܡܽܘܣܳܐ ܕܡܳܪܝܳܐ܂ ܕܟܽܠ ܕܶܟܼܪܳܐ ܦܳܬܼܰܚ ܡܰܪܒܥܳܐ܃ ܩܰܕܿܺܝܫܳܐ ܕܡܳܪܝܳܐ ܢܶܬܼܩܪܶܐ܂
02:24 [ai]ܘܰܕܼܢܶܬܿܠܽܘܢ ܕܶܒܼܚܬܼܳܐ܂ ܐܰܝܟܿܰܢܳܐ ܕܰܐܡܺܝܪ ܒܢܳܡܽܘܣܳܐ ܕܡܳܪܝܳܐ܂ ܙܰܘܓܿܳܐ ܕܫܽܘܦܼܢܺܝܢܶܐ̈ ܐܰܘ ܬܿܪ̈ܶܝܢ ܦܿܰܪ̈ܽܘܓܼܶܐ ܕܝܰܘܢܳܐ܀
02:25 [ai]ܓܰܒܼܪܳܐ ܕܶܝܢ ܚܰܕܼ ܐܺܝܬܼ ܗ̱ܘܳܐ ܒܽܐܘܪܺܫܠܶܡ܂ ܫܡܶܗ ܗܘܳܐ ܫܶܡܥܽܘܢ܂ ܘܓܼܰܒܼܪܳܐ ܗܳܢܳܐ ܟܺܐܝܢ ܗ̱ܘܳܐ܂ ܘܙܰܕܿܺܝܩ܂ ܘܰܡܣܰܟܿܶܐ ܗ̱ܘܳܐ ܠܒܼܽܘܝܳܐܶܗ ܕܺܐܝܣܪܳܝܶܠ܂ ܘܪܽܘܚܳܐ ܕܩܽܘܕܼܫܳܐ ܐܺܝܬܼ ܗ̱ܘܳܬܼ ܥܠܰܘܗ̱ܝ܂
02:26 [ai]ܘܰܐܡܺܝܪ ܗ̱ܘܳܐ ܠܶܗ ܡܶܢ ܪܽܘܚܳܐ ܕܩܽܘܕܼܫܳܐ܃ ܕܠܳܐ ܢܶܚܙܶܐ ܡܰܘܬܳܐ܃ ܥܕܼܰܡܳܐ ܕܢܶܚܙܶܐ ܠܰܡܫܺܝܚܶܗ ܕܡܳܪܝܳܐ܂
02:27 [ai]ܗܽܘ ܗܳܢܳܐ ܐܶܬܼܳܐ ܗ̱ܘܳܐ ܒܪܽܘܚܳܐ ܠܗܰܝܟܠܳܐ܂ ܘܟܼܰܕܼ ܡܰܥܠܺܝܢ ܠܶܗ ܐܰܒܼܳܗܰܘܗ̱ܝ̈܂ ܠܝܶܫܽܘ ܛܰܠܝܳܐ܃ ܕܢܶܥܒܿܕܼܽܘܢ ܚܠܳܦܼܰܘܗ̱ܝ ܐܰܝܟܿܰܢܳܐ ܕܰܦܼܩܺܝܕܼ ܒܢܳܡܽܘܣܳܐ܃
02:28 [ai]ܩܰܒܿܠܶܗ ܥܰܠ ܕܿܪ̈ܳܥܰܘܗ̱ܝ܂ ܘܒܼܰܪܶܟܼ ܠܰܐܠܳܗܳܐ܂ ܘܶܐܡܰܪ܂
02:29 [ai]ܡܶܟܿܺܝܠ ܫܰܪܳܐ ܐܰܢ̱ܬܿ ܠܶܗ ܠܥܰܒܼܕܿܳܟܼ ܡܳܪܝ܃ ܐܰܝܟܼ ܡܶܠܬܼܳܟܼ ܒܰܫܠܳܡܳܐ܃
02:30 [ai]ܕܗܳܐ ܚܙܰܝ̈ ܥܰܝܢܰܝ̈ ܚܢܳܢܳܟܼ܃
02:31 [ai]ܗܰܘ ܕܛܰܝܶܒܼܬܿ ܒܦܰܪܨܽܘܦܿܳܐ ܕܟܽܠܗܶܝܢ ܐܶܡܘܳܬܼܳܐ̈܂
02:32 [ai]ܢܽܘܗܪܳܐ ܠܓܼܶܠܝܳܢܳܐ ܕܥܰܡ̱ܡܶܐ̈܂ ܘܫܽܘܒܼܚܳܐ ܠܥܰܡܳܟܼ ܐܺܝܣܪܳܝܶܠ܀
02:33 [ai]ܝܰܘܣܶܦܼ ܕܶܝܢ ܘܶܐܡܶܗ܂ ܬܰܡܺܝܗܺܝܢ ܗ̱ܘܰܘ ܥܰܠ ܐܰܝܠܶܝܢ ܕܡܶܬܼܡܰܠܠܳܢ̈ ܗ̱ܘܰܝ̈ ܥܠܰܘܗ̱ܝ܂
02:34 [ai]ܘܒܼܰܪܶܟܼ ܐܶܢܽܘܢ ܫܶܡܥܽܘܢ܂ ܘܶܐܡܰܪ ܠܡܰܪܝܰܡ ܐܶܡܶܗ܂ ܗܳܐ ܗܳܢܳܐ ܣܺܝܡ ܠܡܰܦܿܽܘܠܬܳܐ܂ ܘܠܰܩܝܳܡܳܐ ܕܣܰܓܿܺܝܶܐܐ̈ ܒܺܐܝܣܪܳܝܶܠ܂ ܘܠܳܐܬܼܳܐ ܕܚܶܪܝܳܢܳܐ܂
02:35 [ai]ܘܰܒܢܰܦܼܫܶܟܼܝ ܕܶܝܢ ܕܺܝܠܶܟܼܝ ܬܿܶܥܒܰܪ ܪܽܘܡܚܳܐ܂ ܐܰܝܟܼ ܕܢܶܬܼܓܿܰܠܝܳܢ̈ ܡܰܚܫܒܼܳܬܼܳܐ̈ ܕܠܶܒܿܰܘܳܬܼܳܐ ̈ܕܣܰܓܿܺܝܶܐܐ̈ ܿ܀ܿ܀ܿ
02:36 [ai]ܘܚܰܢܳܐ ܕܶܝܢ ܢܒܼܺܝܬܼܳܐ܂ ܒܰܪܬܼܶܗ ܕܰܦܼܢܽܘܐܺܝܠ܃ ܡܶܢ ܫܰܒܼܛܳܐ ܕܳܐܫܺܝܪ܃ ܐܳܦܼ ܗܺܝ ܩܰܫܺܝܫܰܬܼ ܒܝܰܘܡܳܬܼܳܗ̈ ܗ̱ܘܳܬܼ܂ ܘܰܫܒܼܰܥ ܫܢܺܝܢ̈ ܥܰܡ ܒܰܥܠܳܗ ܚܝܳܬܼ ܡܶܢ ܒܬܽܘܠܽܘܬܼܳܗ܂
02:37 [ai]ܘܰܗܘܳܬܼ ܐܰܪܡܰܠܬܳܐ܂ ܐܰܝܟܼ ܫܢܺܝܢ̈ ܬܡܳܢܺܐܝܢ ܘܰܐܪ̈ܒܿܰܥ܂ ܘܠܳܐ ܦܳܪܩܳܐ ܗ̱ܘܳܬܼ ܡܶܢ ܗܰܝܟܠܳܐ܂ ܘܰܒܨܰܘܡܳܐ܂ ܘܒܼܰܨܠܽܘܬܼܳܐ ܦܳܠܚܳܐ ܗ̱ܘܳܬܼ܂ ܒܺܐܝܡܳܡܳܐ܂ ܘܰܒܠܺܠܝܳܐ܂
02:38 [ai]ܘܳܐܦܼ ܗܺܝ ܩܳܡܰܬܼ ܒܿܳܗ ܒܫܳܥܬܼܳܐ܂ ܘܰܐܘܕܿܝܰܬܼ ܠܡܳܪܝܳܐ܂ ܘܰܡܡܰܠܠܳܐ ܗ̱ܘܳܬܼ ܥܠܰܘܗ̱ܝ ܥܰܡ ܟܽܠܢܳܫ܃ ܕܰܡܣܰܟܿܶܐ ܗ̱ܘܳܐ ܠܦܼܽܘܪܩܳܢܳܗ ܕܽܐܘܪܺܫܠܶܡ܂
02:39 [ai]ܘܟܼܰܕܼ ܫܰܠܶܡܘ ܟܽܠ ܡܶܕܶܡ ܐܰܝܟܼ ܕܰܒܼܢܳܡܽܘܣܳܐ ܕܡܳܪܝܳܐ܃ ܗܦܼܰܟܼܘ ܠܰܓܼܠܺܝܠܳܐ܂ ܠܢܳܨܪܰܬܼ ܡܕܼܺܝܢ̱ܬܿܗܽܘܢ܂
02:40 [ai]ܛܰܠܝܳܐ ܕܶܝܢ ܪܳܒܼܶܐ ܗ̱ܘܳܐ܂ ܘܡܶܬܼܚܰܝܰܠ ܒܪܽܘܚܳܐ܂ ܘܡܶܬܼܡܰܠܶܐ ܚܶܟܼܡܬܼܳܐ܂ ܘܛܰܝܒܿܽܘܬܼܳܐ ܕܰܐܠܳܗܳܐ ܐܺܝܬܼ ܗ̱ܘܳܬܼ ܥܠܰܘܗ̱ܝ܂
02:41 [ai]ܘܐ̱ܢܳܫܰܘܗ̱ܝ̈ ܒܟܽܠ ܫܢܳܐ܂ ܐܳܙܺܠ̱ܝܢ ܗ̱ܘܰܘ ܠܽܐܘܪܺܫܠܶܡ ܒܥܰܕܼܥܺܕܼܳܐ ܕܦܶܨܚܳܐ܀
02:42 [ai]ܘܟܼܰܕܼ ܗܘܳܐ ܒܰܪ ܫܢܺܝܢ̈ ܬܿܰܪ̈ܬܿܰܥܶܣܪܶܐ܃ ܣܠܶܩܘ ܐܰܝܟܿܰܢܳܐ ܕܰܡܥܳܕܼܺܝܢ ܗ̱ܘܰܘ ܠܥܰܕܼܥܺܕܼܳܐ܂
02:43 [ai]ܘܟܼܰܕܼ ܫܠܶܡܘ ܝܰܘܡܳܬܼܳܐ̈܂ ܗܦܼܰܟܼܘ ܠܗܽܘܢ܂ ܝܶܫܽܘܥ ܕܶܝܢ ܛܰܠܝܳܐ܂ ܦܳܫ ܠܶܗ ܒܽܐܘܪܺܫܠܶܡ܂ ܘܝܰܘܣܶܦܼ ܘܶܐܡܶܗ܂ ܠܳܐ ܺܝܕܼܰܥܘ܂
02:44 [ai]ܣܳܒܼܪܺܝܢ ܗ̱ܘܰܘ ܓܶܝܪ ܕܥܰܡ ܒܢܰܝ ܠܘܺܝܬܼܗܽܘܢ ܗ̱ܽܘ܂ ܘܟܼܰܕܼ ܐܶܬܼܰܘ ܡܰܪܕܿܶܐ ܝܰܘܡܳܐ ܚܰܕܼ܃ ܒܥܰܐܘܽܗ̱ܝ ܠܘܳܬܼ ܐ̱ܢܳܫܽܘܬܼܗܽܘܢ܂ ܘܰܠܘܳܬܼ ܡܰܢ ܕܝܳܕܼܰܥ ܠܗܽܘܢ܂
02:45 [ai]ܘܠܳܐ ܐܶܫܟܿܚܽܘܗ̱ܝ܂ ܘܰܗܦܼܰܟܼܘ ܠܗܽܘܢ ܬܽܘܒܼ ܠܽܐܘܪܺܫܠܶܡ܂ ܘܒܼܳܥܶܝܢ ܗ̱ܘܰܘ ܠܶܗ܂
02:46 [ai]ܘܡܶܢ ܒܳܬܼܰܪ ܬܠܳܬܼܳܐ ܝܰܘܡܺܝܢ̈܃ ܐܶܫܟܿܚܽܘܗ̱ܝ ܒܗܰܝܟܠܳܐ܂ ܟܰܕܼ ܝܳܬܼܶܒܼ ܡܶܨܥܰܬܼ ܡܰܠܦܼܳܢܶܐ̈܂ ܘܫܳܡܰܥ ܡܶܢܗܽܘܢ܂ ܘܰܡܫܰܐܶܠ ܠܗܽܘܢ܂
02:47 [ai]ܘܬܼܰܡܺܝܗܺܝܢ ܗܘܰܘ ܟܽܠܗܽܘܢ ܐܰܝܠܶܝܢ ܕܫܳܡܥܺܝܢ ܗ̱ܘܰܘ ܠܶܗ܃ ܒܚܶܟܼܡܬܼܶܗ ܘܰܒܦܼܶܬܼܓܼܳܡܰܘܗ̱ܝ̈܀
02:48 [ai]ܘܟܼܰܕܼ ܚܙܰܐܘܽܗ̱ܝ܂ ܬܡܰܗܘ܂ ܘܶܐܡܪܰܬܼ ܠܶܗ ܐܶܡܶܗ܂ ܒܶܪܝ܂ ܠܡܳܢܳܐ ܥܒܼܰܕܿܬܿ ܠܰܢ ܗܳܟܼܰܢܳܐ܃ ܕܗܳܐ ܐܰܒܼܽܘܟܼ ܘܶܐܢܳܐ ܒܛܽܘܪܳܦܼܳܐ ܣܰܓܿܺܝܳܐܐ ܒܿܳܥܶܝܢ ܗܘܰܝܢ ܠܳܟܼ܂
02:49 [ai]ܐܳܡܰܪ ܠܗܽܘܢ܂ ܡܳܢܳܐ ܒܿܳܥܶܝܢ ܗܘܰܝܬܿܽܘܢ ܠܺܝ܂ ܠܳܐ ܝܳܕܼܥܺܝܢ ܐܢ̱ܬܿܽܘܢ܃ ܕܒܶܝܬܼ ܐܳܒܼܝ ܘܳܠܶܐ ܠܺܝ ܕܶܐܗܘܶܐ܃
02:50 [ai]ܗܶܢܽܘܢ ܕܶܝܢ ܠܳܐ ܐܶܫܬܰܘܕܰܥܘ ܠܡܶܠܬܼܳܐ܂ ܕܶܐܡܰܪ ܠܗܽܘܢ܂
02:51 [ai]ܘܰܢܚܶܬܼ ܥܰܡܗܽܘܢ܂ ܘܶܐܬܼܳܐ ܠܢܳܨܪܰܬܼ܂ ܘܡܶܫܬܿܰܥܒܿܰܕܼ ܗ̱ܘܳܐ ܠܗܽܘܢ܂ ܐܶܡܶܗ ܕܶܝܢ ܢܳܛܪܳܐ ܗ̱ܘܳܬܼ ܟܽܠܗܶܝܢ ܡܶܠܶܐ̈ ܒܠܶܒܿܳܗ܂
02:52 [ai]ܝܶܫܽܘܥ ܕܶܝܢ ܪܳܒܼܶܐ ܗ̱ܘܳܐ܂ ܒܩܰܘܡܬܼܶܗ܂ ܘܰܒܚܶܟܼܡܬܼܶܗ܂ ܘܰܒܛܰܝܒܿܽܘܬܼܳܐ ܠܘܳܬܼ ܐܰܠܳܗܳܐ܂ ܘܰܒܢܰܝܢܳܫܳܐ܀

next chapter