← Back
The Comprehensive Aramaic Lexicon
← Return to the Text Browser
click on the file description for more information
62043: P Jn

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


19:01 [ai]ܗܳܝܕܶܝܢ ܦܿܺܝܠܰܛܳܘܣ ܢܰܓܿܕܼܶܗ ܠܝܶܫܽܘܥ܂
19:02 [ai]ܘܶܐܣܛܪ̈ܰܛܺܝܽܘܛܶܐ ܓܕܼܰܠܘ ܟܠܺܝܠܳܐ ܡܶܢ ܟܽܘܒܿܶܐ̈܂ ܘܣܳܡܘ ܠܶܗ ܒܪܺܫܶܗ܂ ܘܟܼܰܣܝܽܘܗ̱ܝ ܢܰܚܬܿܶܐ̈ ܕܰܐܪܓܿܘܳܢܳܐ܂
19:03 [ai]ܘܳܐܡܪܺܝܢ ܗ̱ܘܰܘ܃ ܫܠܳܡ ܠܳܟܼ܂ ܡܰܠܟܿܳܐ܃ ܕܺܝܗܽܘܕܼܳܝܶܐ̈܂ ܘܡܳܚܶܝܢ ܗ̱ܘܰܘ ܠܶܗ ܥܰܠ ܦܰܟܿܰܘܗ̱ܝ̈܀
19:04 [ai]ܘܰܢܦܼܰܩ ܦܿܺܝܠܰܛܳܘܣ ܬܽܘܒܼ ܠܒܼܰܪ܂ ܘܶܐܡܰܪ ܠܗܽܘܢ܂ ܗܳܐ ܡܰܦܿܶܩ ܐ̱ܢܳܐ ܠܶܗ ܠܟܼܽܘܢ܂ ܠܒܼܰܪ܂ ܕܬܶܕܿܥܽܘܢ܃ ܕܠܳܐ ܡܶܫܟܿܰܚ ܐ̱ܢܳܐ ܒܳܬܼܪܶܗ܂ ܐܳܦܼܠܳܐ ܚܕܼܳܐ ܥܶܠܬܼܳܐ܂
19:05 [ai]ܘܰܢܦܼܰܩ ܝܶܫܽܘܥ ܠܒܼܰܪ܃ ܟܰܕܼ ܐܺܝܬܼ ܥܠܰܘܗ̱ܝ ܟܠܺܝܠܳܐ ܕܟ̈ܽܘܒܿܶܐ܂ ܘܢܰܚܬܿܶܐ̈ ܕܰܐܪܓܿܘܳܢܳܐ܂ ܘܶܐܡܰܪ ܠܗܽܘܢ ܦܿܺܝܠܰܛܳܘܣ܂ ܗܳܐ ܓܰܒܼܪܳܐ܀
19:06 [ai]ܟܰܕܼ ܕܶܝܢ ܚܙܰܐܘܽܗ̱ܝ ܪ̈ܰܒܰܝ ܟܳܗܢܶܐ̈ ܘܕܼܰܚܫܶܐ̈܃ ܩܥܰܘ ܘܳܐܡܪܺܝܢ܂ ܨܠܽܘܒܼܳܝܗ̱ܝ܂ ܨܠܽܘܒܼܳܝܗ̱ܝ܀ ܐܳܡܰܪ ܠܗܽܘܢ ܦܿܺܝܠܰܛܳܘܣ܂ ܕܒܰܪܘ ܐܰܢ̱ܬܿܽܘܢ ܘܙܽܘܩܦܼܽܘܗ̱ܝ܂ ܐܶܢܳܐ ܓܶܝܪ ܠܳܐ ܡܶܫܟܿܰܚ ܐ̱ܢܳܐ ܒܶܗ ܥܶܠܬܼܳܐ܀
19:07 [ai]ܐܳܡܪܺܝܢ ܠܶܗ ܺܝܗܽܘܕܼܳܝܶܐ̈܂ ܠܰܢ ܢܳܡܽܘܣܳܐ ܐܺܝܬܼ ܠܰܢ܂ ܘܰܐܝܟܼ ܕܰܒܼܢܳܡܽܘܣܰܢ܂ ܚܰܝܳܒܼ ܗ̱ܽܘ ܡܰܘܬܳܐ܃ ܕܰܥܒܼܰܕܼ ܢܰܦܼܫܶܗ ܒܪܶܗ ܕܰܐܠܳܗܳܐ܂
19:08 [ai]ܟܰܕܼ ܫܡܰܥ ܕܶܝܢ ܦܿܺܝܠܰܛܳܘܣ ܗܳܕܼܶܐ ܡܶܠܬܼܳܐ܃ ܝܰܬܿܺܝܪܳܐܺܝܬܼ ܕܚܶܠ܂
19:09 [ai]ܘܥܰܠ ܬܽܘܒܼ ܠܰܦܿܪܶܛܳܘܪܺܝܢ܂ ܘܶܐܡܰܪ ܠܝܶܫܽܘܥ܂ ܐܰܝܡܶܟܿܳܐ ܐܰܢ̱ܬܿ܂ ܝܶܫܽܘܥ ܕܶܝܢ ܦܶܬܼܓܼܳܡܳܐ ܠܳܐ ܝܰܗ̱ܒܼ ܠܶܗ܀
19:10 [ai]ܐܳܡܰܪ ܠܶܗ ܦܿܺܝܠܰܛܳܘܣ܂ ܥܰܡܝ܃ ܠܳܐ ܡܡܰܠܶܠ ܐܰܢ̱ܬܿ܃ ܠܳܐ ܝܳܕܼܰܥ ܐܰܢ̱ܬܿ ܕܫܰܠܺܝܛ ܐ̱ܢܳܐ ܕܶܐܫܪܶܝܟܼ ܘܫܰܠܺܝܛ ܐ̱ܢܳܐ ܕܶܐܙܩܦܼܳܟܼ܃
19:11 [ai]ܐܳܡܰܪ ܠܶܗ ܝܶܫܽܘܥ܂ ܠܰܝܬܿ ܗ̱ܘܳܐ ܠܳܟܼ ܥܠܰܝ ܫܽܘܠܛܳܢܳܐ ܐܳܦܼ ܠܳܐ ܚܰܕܼ܃ ܐܶܠܽܘ ܠܳܐ ܺܝܗܺܝܒܼ ܗ̱ܘܳܐ ܠܳܟܼ ܡܶܢ ܠܥܶܠ܂ ܡܶܛܽܠ ܗܳܢܳܐ ܗܰܘ ܡܰܢ ܕܰܐܫܠܡܰܢܝ ܠܳܟܼ܃ ܪܰܒܿܳܐ ܗ̱ܝ ܚܛܺܝܬܼܶܗ ܡܶܢ ܕܺܝܠܳܟܼ܀
19:12 [ai]ܘܡܶܛܽܠ ܗܳܕܼܶܐ܂ ܨܳܒܼܶܐ ܗ̱ܘܳܐ ܦܿܺܝܠܰܛܳܘܣ ܕܢܶܫܪܶܝܘܗ̱ܝ܂ ܺܝܗܽܘܕܼܳܝܶܐ̈ ܕܶܝܢ ܩܳܥܶܝܢ ܗ̱ܘܰܘ܃ ܕܶܐܢ ܠܗܳܢܳܐ ܫܳܪܶܐ ܐܰܢ̱ܬܿ܂ ܠܳܐ ܗܘܰܝܬܿ ܪܳܚܡܶܗ ܕܩܶܣܰܪ܂ ܟܽܠ ܡܰܢ ܓܶܝܪ ܕܢܰܦܼܫܶܗ ܡܰܠܟܿܳܐ ܥܳܒܼܶܕܼ܃ ܣܰܩܽܘܒܼܠܳܐ ܗܽܘ ܕܩܶܣܰܪ܂
19:13 [ai]ܟܰܕܼ ܫܡܰܥ ܕܶܝܢ ܦܿܺܝܠܰܛܳܘܣ ܗܳܕܼܶܐ ܡܶܠܬܼܳܐ܃ ܐܰܦܿܩܶܗ ܠܝܶܫܽܘܥ ܠܒܼܰܪ܂ ܘܺܝܬܼܶܒܼ ܥܰܠ ܒܺܝܡ܂ ܒܕܽܘܟܿܬܼܳܐ ܕܡܶܬܼܩܰܪܝܳܐ܂ ܪܨܺܝܦܼܬܳܐ ܕܟܺܐܦܼܶܐ̈܂ ܥܶܒܼܪܳܐܺܝܬܼ ܕܶܝܢ ܡܶܬܼܰܐܡܪܳܐ܂ ܓܦܼܺܝܦܼܬܳܐ܂
19:14 [ai]ܘܰܥܪܽܘܒܼܬܳܐ ܗ̱ܘܳܬܼ ܕܦܶܨܚܳܐ܂ ܘܺܐܝܬܼ ܗ̱ܘܰܝ̈ ܐܰܝܟܼ ܫܳܥܶܐ̈ ܫܶܬܼ܀ ܘܶܐܡܰܪ ܠܺܝܗܽܘܕܼܳܝܶܐ̈܂ ܗܳܐ ܡܰܠܟܿܟܼܽܘܢ܂
19:15 [ai]ܗܶܢܽܘܢ ܕܶܝܢ ܩܳܥܶܝܢ ܗ̱ܘܰܘ܃ ܫܩܽܘܠܳܝܗ̱ܝ܂ ܫܩܽܘܠܳܝܗ̱ܝ܂ ܨܠܽܘܒܼܳܝܗ̱ܝ܂ ܨܠܽܘܒܼܳܝܗ̱ܝ܂ ܐܳܡܰܪ ܠܗܽܘܢ ܦܿܺܝܠܰܛܳܘܣ܂ ܠܡܰܠܟܿܟܼܽܘܢ ܐܶܙܩܽܘܦܼ܃ ܐܳܡܪܺܝܢ ܪ̈ܰܒܰܝ ܟܳܗܢܶܐ̈܂ ܠܰܝܬܿ ܠܰܢ ܡܰܠܟܿܳܐ܂ ܐܶܠܳܐ ܐܶܢ ܩܶܣܰܪ܀
19:16 [ai]ܗܳܝܕܶܝܢ ܐܰܫܠܡܶܗ ܠܗܽܘܢ ܕܢܶܙܩܦܼܽܘܢܳܝܗ̱ܝ܂ ܘܕܼܰܒܼܪܽܘܗ̱ܝ ܠܝܶܫܽܘܥ ܘܰܐܦܿܩܽܘܗ̱ܝ܂
19:17 [ai]ܟܰܕܼ ܫܩܺܝܠ ܙܩܺܝܦܼܶܗ܃ ܠܕܼܽܘܟܿܬܼܳܐ ܕܡܶܬܼܩܰܪܝܳܐ܂ ܩܰܪܩܰܦܼܬܼܳܐ܂ ܥܶܒܼܪܳܐܺܝܬܼ ܕܶܝܢ ܡܶܬܼܰܐܡܪܳܐ܂ ܓܳܓܼܽܘܠܬܳܐ܂
19:18 [ai]ܐܰܬܼܰܪ ܕܙܰܩܦܿܽܘܗ̱ܝ܂ ܘܥܰܡܶܗ ܬܿܪ̈ܶܝܢ ܐ̱ܚܪ̈ܳܢܺܝܢ܂ ܚܰܕܼ ܡܶܟܿܳܐ ܘܚܰܕܼ ܡܶܟܿܳܐ܂ ܘܰܠܝܶܫܽܘܥ ܒܰܡܨܰܥܬܼܳܐ܀
19:19 [ai]ܘܰܟܼܬܼܰܒܼ ܐܳܦܼ ܠܽܘܚܳܐ ܦܿܺܝܠܰܛܳܘܣ܃ ܘܣܳܡ ܥܰܠ ܙܩܺܝܦܼܶܗ܂ ܟܬܼܺܝܒܼ ܗ̱ܘܳܐ ܕܶܝܢ ܗܳܟܼܰܢܳܐ܂ ܗܳܢܳܐ ܝܶܫܽܘܥ ܢܳܨܪܳܝܳܐ ܡܰܠܟܿܳܐ ܕܺܝܗܽܘܕܼܳܝܶܐ̈܂
19:20 [ai]ܘܰܠܗܳܢܳܐ ܕܰܦܿܳܐ܂ ܣܰܓܿܺܝܶܐܐ̈ ܡܶܢ ܺܝܗܽܘܕܼܳܝܶܐ̈ ܩܪܰܐܘܽܗ̱ܝ܂ ܡܶܛܽܠ ܕܩܰܪܺܝܒܼܳܐ ܗ̱ܘܳܬܼ ܠܰܡܕܼܺܝܢ̱ܬܳܐ ܕܽܘܟܿܬܼܳܐ ܕܶܐܙܕܿܩܶܦܼ ܒܿܳܗ ܝܶܫܽܘܥ܂ ܘܰܟܼܬܼܺܝܒܼܳܐ ܗ̱ܘܳܐ ܥܶܒܼܪܳܐܺܝܬܼ܂ ܘܝܰܘܢܳܐܺܝܬܼ܂ ܘܰܪܽܗ̱ܘܡܳܐܺܝܬܼ܂
19:21 [ai]ܘܶܐܡܰܪܘ ܪ̈ܰܒܰܝ ܟܳܗܢܶܐ̈ ܠܦܿܺܝܠܰܛܳܘܣ܂ ܠܳܐ ܬܶܟܼܬܽܘܒܼ ܕܡܰܠܟܿܳܐ ܗܽܘ ܕܺܝܗܽܘܕܼܳܝܶܐ̈܂ ܐܶܠܳܐ ܕܗܽܘ ܐܶܡܰܪ܂ ܕܡܰܠܟܿܳܐ ܐܶܢܳܐ ܕܺܝܗܽܘܕܼܳܝܶܐ̈܂
19:22 [ai]ܐܳܡܰܪ ܦܿܺܝܠܰܛܳܘܣ܂ ܡܶܕܶܡ ܕܟܶܬܼܒܿܶܬܼ܂ ܟܶܬܼܒܿܶܬܼ ܿ܀ܿ܀ܿ
19:23 [ai]ܐܶܣܛܪ̈ܰܛܺܝܽܘܛܶܐ ܕܶܝܢ܂ ܟܰܕܼ ܙܰܩܦܿܽܘܗ̱ܝ ܠܝܶܫܽܘܥ܃ ܫܩܰܠܘ ܢܰܚܬܰܘܗ̱ܝ̈܂ ܘܰܥܒܼܰܕܼܘ ܠܰܐܪܒܿܰܥ ܡܢܰܘܳܢ̈܂ ܡܢܳܬܼܳܐ ܠܚܰܕܼ ܡܶܢ ܐܶܣܛܪ̈ܰܛܺܝܽܘܛܶܐ܂ ܟܽܘܬܿܺܝܢܶܗ ܕܶܝܢ ܐܺܝܬܼܶܝܗ ܗ̱ܘܳܬܼ ܕܠܳܐ ܚܺܝܛܳܐ ܡܶܢ ܠܥܶܠ܂ ܙܩܺܝܪܬܳܐ ܟܽܠܳܗ܂
19:24 [ai]ܘܶܐܡܰܪܘ ܚܰܕܼ ܠܚܰܕܼ܂ ܠܳܐ ܢܶܣܕܿܩܺܝܗ܂ ܐܶܠܳܐ ܢܶܦܿܶܣ ܥܠܶܝܗ ܡܶܦܿܰܣ܂ ܕܡܰܢܽܘ ܬܶܗܘܶܐ܀ ܘܰܫܠܶܡ ܟܬܼܳܒܼܳܐ ܕܶܐܡܰܪ܃ ܕܦܰܠܶܓܼܘ ܢܰܚܬܿܰܝ̈ ܒܰܝܢܳܬܼܗܽܘܢ܃ ܘܥܰܠ ܠܒܼܽܘܫܝ ܐܰܪܡܺܝܘ ܦܶܣܳܐ܂ ܗܳܠܶܝܢ ܥܒܼܰܕܼܘ ܐܶܣܛܪ̈ܰܛܺܝܽܘܛܶܐ܀
19:25 [ai]ܩܳܝܡܳܢ̈ ܗ̱ܘܰܝ̈ ܕܶܝܢ ܠܘܳܬܼ ܙܩܺܝܦܼܶܗ ܕܝܶܫܽܘܥ܃ ܐܶܡܶܗ܂ ܘܚܳܬܼܳܗ ܕܶܐܡܶܗ܂ ܘܡܰܪܝܰܡ ܗܳܝ ܕܰܩܠܶܝܳܘܦܿܳܐ܂ ܘܡܰܪܝܰܡ ܡܰܓܼܕܿܠܳܝܬܳܐ܂
19:26 [ai]ܝܶܫܽܘܥ ܕܶܝܢ ܚܙܳܐ ܠܶܐܡܶܗ܂ ܘܰܠܬܼܰܠܡܺܝܕܼܳܐ ܗܰܘ ܕܪܳܚܶܡ ܗ̱ܘܳܐ ܕܩܳܐܶܡ܃ ܘܶܐܡܰܪ ܠܶܐܡܶܗ܂ ܐܰܢ̱ܬܿܬܼܳܐ ܗܳܐ ܒܪܶܟܼܝ܂
19:27 [ai]ܘܶܐܡܰܪ ܠܬܼܰܠܡܺܝܕܼܳܐ ܗܰܘ܂ ܗܳܐ ܐܶܡܳܟܼ܂ ܘܡܶܢ ܗܳܝ ܫܳܥܬܼܳܐ܂ ܕܰܒܼܪܳܗ ܬܰܠܡܺܝܕܼܳܐ ܗܰܘ ܠܘܳܬܼܶܗ܀܀
19:28 [ai]ܒܳܬܼܰܪ ܗܳܠܶܝܢ܂ ܺܝܕܼܰܥ ܝܶܫܽܘܥ ܕܟܽܠܡܶܕܶܡ ܐܶܫܬܿܰܠܰܡ܃ ܘܰܕܼܢܶܬܼܡܰܠܶܐ ܟܬܼܳܒܼܳܐ ܐܶܡܰܪ܂ ܨܗܶܐ ܐ̱ܢܳܐ܀
19:29 [ai]ܘܡܳܐܢܳܐ ܣܺܝܡ ܗ̱ܘܳܐ ܕܰܡܠܶܐ ܚܰܠܳܐ܂ ܗܶܢܽܘܢ ܕܶܝܢ ܡܠܰܘ ܐܶܣܦܼܽܘܓܿܳܐ ܡܶܢ ܚܰܠܳܐ܃ ܘܣܳܡܘ ܥܰܠ ܙܽܘܦܿܳܐ܂ ܘܩܰܪܶܒܼܘ ܠܘܳܬܼ ܦܽܘܡܶܗ܂
19:30 [ai]ܟܰܕܼ ܕܶܝܢ ܫܩܰܠ ܗܰܘ ܚܰܠܳܐ ܝܶܫܽܘܥ܃ ܐܶܡܰܪ܂ ܗܳܐ ܡܫܰܠܰܡ܂ ܘܰܐܪܟܿܶܢ ܪܺܫܶܗ܂ ܘܰܐܫܠܶܡ ܪܽܘܚܶܗ܀
19:31 [ai]ܺܝܗܽܘܕܼܳܝܶܐ̈ ܕܶܝܢ ܡܶܛܽܠ ܕܰܥܪܽܘܒܼܬܳܐ ܗ̱ܘܳܬܼ܂ ܐܳܡܪܺܝܢ܂ ܠܳܐ ܢܒܼܽܘܬܼܽܘܢ ܦܿܰܓܼܪ̈ܶܐ ܗܳܠܶܝܢ ܥܰܠ ܙܩܺܝܦܼܝܰܗܽܘܢ܂ ܡܶܛܽܠ ܕܫܰܒܿܬܼܳܐ ܢܳܓܼܗܳܐ܂ ܝܰܘܡܳܐ ܗ̱ܘܳܐ ܓܶܝܪ ܪܰܒܿܳܐ܂ ܝܰܘܡܳܐ ܕܫܰܒܿܬܼܳܐ ܗܳܝ܂ ܘܰܒܥܰܘ ܡܶܢ ܦܿܺܝܠܰܛܳܘܣ܃ ܕܰܢܬܼܰܒܿܪܽܘܢ ܫܳܩܰܝܗܽܘܢ̈܂ ܕܗܳܢܽܘܢ ܙܩܺܝܦܼܶܐ̈܂ ܘܢܰܚܬܼܽܘܢ ܐܶܢܽܘܢ܂
19:32 [ai]ܘܶܐܬܼܰܘ ܐܶܣܛܪ̈ܰܛܺܝܽܘܛܶܐ܃ ܘܬܼܰܒܰܪܘ ܫܳܩܰܘܗ̱ܝ̈ ܕܩܰܕܼܡܳܝܳܐ܃ ܘܰܕܼܗܰܘ ܐ̱ܚܪܺܢܳܐ ܕܶܐܙܕܿܩܶܦܼ ܥܰܡܶܗ܂
19:33 [ai]ܘܟܼܰܕܼ ܐܶܬܼܰܘ ܠܘܳܬܼ ܝܶܫܽܘܥ܃ ܚܙܰܘ ܕܡܺܝܬܼ ܠܶܗ ܡܶܢ ܟܰܕܿܽܘ܂ ܘܠܳܐ ܬܿܰܒܰܪܘ ܫܳܩܰܘܗ̱ܝ̈܂
19:34 [ai]ܐܶܠܳܐ ܚܰܕܼ ܡܶܢ ܐܶܣܛܪ̈ܰܛܺܝܽܘܛܶܐ܂ ܡܚܳܝܗ̱ܝ ܒܕܰܦܼܢܶܗ ܒܠܽܘܟܿܳܝܬܳܐ܃ ܘܡܶܚܕܼܳܐ ܢܦܼܰܩ ܕܡܳܐ ܘܡܰܝܳܐ̈܂
19:35 [ai]ܘܡܰܢ ܕܰܚܙܳܐ ܐܰܣܗܶܕܼ܂ ܘܫܰܪܺܝܪܳܐ ܗ̱ܝ ܣܳܗܕܿܽܘܬܼܶܗ܂ ܘܗܽܘ ܝܳܕܼܰܥ܂ ܕܰܫܪܳܪܳܐ ܐܶܡܰܪ܂ ܕܳܐܦܼ ܐܰܢ̱ܬܿܽܘܢ ܬܗܰܝܡܢܽܘܢ܂
19:36 [ai]ܗܳܠܶܝܢ ܓܶܝܪ ܗܘܰܝ̈܃ ܕܢܶܬܼܡܰܠܶܐ ܟܬܼܳܒܼܳܐ ܕܶܐܡܰܪ܃ ܕܓܰܪܡܳܐ ܠܳܐ ܢܶܬܿܬܿܒܼܰܪ ܒܶܗ܂
19:37 [ai]ܘܬܼܽܘܒܼ ܟܬܼܳܒܼܳܐ ܐ̱ܚܪܺܢܳܐ܂ ܕܶܐܡܰܪ܃ ܕܰܢܚܽܘܪܽܘܢ ܒܡܰܢ ܕܰܕܼܩܰܪܘ܀
19:38 [ai]ܒܳܬܼܰܪ ܗܳܠܶܝܢ܃ ܝܰܘܣܶܦܼ ܗܰܘ ܕܡܶܢ ܪܳܡܬܼܳܐ܂ ܒܥܳܐ ܡܶܢ ܦܿܺܝܠܰܛܳܘܣ܃ ܡܶܛܽܠ ܕܬܰܠܡܺܝܕܼܳܐ ܗ̱ܘܳܐ ܕܝܶܫܽܘܥ܃ ܘܰܡܛܰܫܶܐ ܗ̱ܘܳܐ܂ ܡܶܢ ܕܶܚܠܬܼܳܐ ܕܺܝܗܽܘܕܼܳܝܶܐ̈܂ ܕܢܶܫܩܽܘܠ ܦܰܓܼܪܶܗ ܕܝܶܫܽܘܥ܂ ܘܰܐܦܿܶܣ ܦܿܺܝܠܰܛܳܘܣ܂ ܘܶܐܬܼܳܐ ܘܰܫܩܰܠ ܦܰܓܼܪܶܗ ܕܝܶܫܽܘܥ܀
19:39 [ai]ܘܶܐܬܼܳܐ ܐܳܦܼ ܢܺܝܩܳܕܼܺܡܳܘܣ܃ ܗܰܘ ܕܶܐܬܼܳܐ ܗ̱ܘܳܐ ܡܶܢ ܩܕܼܺܝܡ ܠܘܳܬܼ ܝܶܫܽܘܥ ܒܠܺܠܝܳܐ܃ ܘܰܐܝܬܿܺܝ ܥܰܡܶܗ ܚܽܘܢܛܬܼܳܐ ܕܡܽܘܪܳܐ ܘܰܕܼܥܰܠܘܰܝ܂ ܐܰܝܟܼ ܡܳܐܐ ܠܺܝܛܪ̈ܺܝܢ܀
19:40 [ai]ܘܫܰܩܠܽܘܗ̱ܝ ܠܦܼܰܓܼܪܶܗ ܕܝܶܫܽܘܥ܃ ܘܟܼܰܪܟܼܽܘܗ̱ܝ ܒܟܶܬܿܳܢܶܐ̈ ܘܰܒܒܼܶܣܡܶܐ̈܂ ܐܰܝܟܿܰܢܳܐ ܕܺܐܝܬܼ ܥܝܳܕܼܳܐ ܠܺܝܗܽܘܕܼܳܝܶܐ̈ ܕܢܶܩܒܿܪܽܘܢ܂
19:41 [ai]ܐܺܝܬܼ ܗ̱ܘܳܬܼ ܕܶܝܢ܂ ܒܗܳܝ ܕܽܘܟܿܬܼܳܐ ܕܶܐܙܕܿܩܶܦܼ ܒܿܳܗ ܝܶܫܽܘܥ܂ ܓܰܢܬܼܳܐ܂ ܘܒܼܳܗ ܒܓܰܢܬܼܳܐ܂ ܒܶܝܬܼ ܩܒܼܽܘܪܳܐ ܚܰܕܼ̱ܬܼܳܐ܂ ܕܐ̱ܢܳܫ ܥܕܼܰܟܿܺܝܠ ܠܳܐ ܐܶܬܿܬܣܺܝܡ ܗ̱ܘܳܐ ܒܶܗ܂
19:42 [ai]ܘܣܳܡܽܘܗ̱ܝ ܬܰܡܳܢ ܠܝܶܫܽܘܥ܂ ܡܶܛܽܠ ܕܫܰܒܿܬܼܳܐ ܥܳܐܠܳܐ ܗ̱ܘܳܬܼ܃ ܘܡܶܛܽܠ ܕܩܰܪܺܝܒܼ ܗ̱ܘܳܐ ܩܰܒܼܪܳܐ܀

next chapter