← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information
62045: Rom

Click on a word for lexical analysis.
Click on a red-colored coordinate for comments and/or translations of the line
View in Serto
Ask AI about a passage
Hide manuscript variants

previous chapter


11:01 [ai]ܐܶܠܳܐ ܐܳܡܰܪ ܐ̱ܢܳܐ܃ ܕܰܠܡܳܐ ܕܰܚܩܶܗ ܐܰܠܳܗܳܐ ܠܥܰܡܶܗ܂ ܚܳܣ܂ ܐܳܦܼ ܐܶܢܳܐ ܓܶܝܪ ܡܶܢ ܐܺܝܣܪܳܝܶܠ ܐ̱ܢܳܐ܂ ܡܶܢ ܙܰܪܥܶܗ ܕܰܐܒܼܪܳܗܳܡ܂ ܡܶܢ ܫܰܪܒܿܬܼܳܐ ܕܒܼܶܢܝܳܡܺܝܢ܂
11:02 [ai]ܠܳܐ ܕܚܰܩ ܐܰܠܳܗܳܐ ܠܥܰܡܶܗ܂ ܐܰܝܢܳܐ ܕܡܶܢ ܩܕܼܺܝܡ ܺܝܕܼܺܝܥ ܗ̱ܘܳܐ ܠܶܗ܂ ܐܰܘ ܠܳܐ ܝܳܕܼܥܺܝܢ ܐܢ̱ܬܿܽܘܢ ܒܰܟܼܬܼܳܒܼܳܐ ܕܶܐܠܺܝܳܐ܂ ܡܳܢܳܐ ܐܶܡܰܪ܃ ܟܰܕܼ ܩܳܒܼܶܠ ܗ̱ܘܳܐ ܠܰܐܠܳܗܳܐ ܥܰܠ ܐܺܝܣܪܳܝܶܠ܂ ܘܳܐܡܰܪ܃
11:03 [ai]ܡܳܪܝ ܠܰܢܒܼܺܝܰܝܟܿ̈ ܩܰܛܶܠܘ܂ ܘܰܠܡܰܕܼܒܿܚܰܝܟܿ̈ ܣܰܚܶܦܼܘ܂ ܘܶܐܢܳܐ ܗܽܘ ܒܰܠܚܽܘܕܼܰܝ ܐܶܫܬܿܰܚܪܶܬܼ܃ ܘܒܼܳܥܶܝܢ ܠܢܰܦܼܫܝ܂
11:04 [ai]ܘܶܐܬܼܶܐܡܰܪ ܠܶܗ ܒܓܶܠܝܳܢܳܐ܃ ܕܗܳܐ ܫܶܒܼܩܶܬܼ ܠܢܰܦܼܫܝ ܫܰܒܼܥܳܐ ܐܰܠܦܼܺܝܢ̈ ܓܿܰܒܼܪ̈ܺܝܢ܃ ܐܰܝܠܶܝܢ ܕܥܰܠ ܒܽܘܪ̈ܟܰܝܗܽܘܢ ܠܳܐ ܒܪܶܟܼܘ܂ ܘܠܳܐ ܣܓܼܶܕܼܘ ܠܒܼܰܥܠܳܐ܂
11:05 [ai]ܗܳܟܼܰܢܳܐ ܐܳܦܼ ܒܗܳܢܳܐ ܙܰܒܼܢܳܐ܃ ܫܰܪܟܿܳܢܳܐ ܗܽܘ ܐܶܫܬܿܚܰܪ ܒܰܓܼܒܼܺܝܬܼܳܐ ܕܛܰܝܒܿܽܘܬܼܳܐ܂
11:06 [ai]ܐܶܢ ܕܶܝܢ ܒܛܰܝܒܿܽܘܬܼܳܐ܃ ܠܳܐ ܗ̱ܘܳܐ ܡܶܢ ܥܒܼܳܕܼܶܐ̈܂ ܘܶܐܢ ܠܳܐ܃ ܛܰܝܒܿܽܘܬܼܳܐ ܠܳܐ ܐܺܝܬܼܶܝܗ ܛܰܝܒܿܽܘܬܼܳܐ܂ ܐܶܢ ܕܶܝܢ ܒܰܥܒܼܳܕܼܶܐ̈܃ ܠܳܐ ܗ̱ܘܳܐ ܡܶܢ ܛܰܝܒܿܽܘܬܼܳܐ܂ ܘܶܐܢ ܠܳܐ܃ ܥܒܼܳܕܼܳܐ ܠܳܐ ܐܺܝܬܼܰܘܗ̱ܝ ܥܒܼܳܕܼܳܐ܀
11:07 [ai]ܡܳܢܳܐ ܗܳܟܼܺܝܠ܂ ܗܳܝ ܕܒܳܥܶܐ ܗ̱ܘܳܐ ܐܺܝܣܪܳܝܶܠ܂ ܠܳܐ ܐܶܫܟܿܰܚ܂ ܓܒܼܺܝܬܼܳܐ ܕܶܝܢ ܐܶܫܟܿܚܰܬܼ܂ ܫܰܪܟܿܗܽܘܢ ܕܶܝܢ ܐܶܬܼܥܰܘܰܪܘ ܒܿܠܶܒܗܽܘܢ܂
11:08 [ai]ܐܰܝܟܿܰܢܳܐ ܕܰܟܼܬܼܺܝܒܼ܃ ܕܝܰܗ̱ܒܼ ܠܗܽܘܢ ܐܰܠܳܗܳܐ ܪܽܘܚܳܐ ܡܕܼܰܥܪܳܢܺܝܬܼܳܐ܂ ܘܥܰܝܢܶܐ̈ ܕܠܳܐ ܢܶܒܼܚܪܽܘܢ ܒܗܶܝܢ܂ ܘܶܐܕܼܢܶܐ̈ ܕܠܳܐ ܢܶܫܡܥܽܘܢ܃ ܥܕܼܰܡܳܐ ܠܝܰܘܡܳܐ ܕܝܰܘܡܳܢܳܐ܂
11:09 [ai]ܘܕܼܰܘܺܝܕܼ ܬܽܘܒܼ ܐܶܡܰܪ܃ ܢܶܗܘܶܐ ܦܳܬܼܽܘܪܗܽܘܢ ܩܕܼܳܡܰܝܗܽܘܢ ܠܦܼܰܚܳܐ܂ ܘܦܼܽܘܪܥܳܢܗܽܘܢ ܠܬܼܽܘܩܰܠܬܼܳܐ܂
11:10 [ai]ܢܶܚܫܟܼܳܢ̈ ܥܰܝܢܰܝܗܽܘܢ̈ ܕܠܳܐ ܢܶܚܙܽܘܢ܂ ܘܚܰܨܗܽܘܢ ܒܟܽܠܙܒܼܰܢ ܢܶܗܘܶܐ ܟܦܼܺܝܦܼ܂
11:11 [ai]ܐܳܡܰܪ ܐ̱ܢܳܐ ܕܶܝܢ܃ ܕܰܠܡܳܐ ܐܶܬܿܬܿܩܶܠܘ ܐܰܝܟܼ ܕܢܶܦܿܠܽܘܢ܂ ܚܳܣ܂ ܐܶܠܳܐ ܒܬܽܘܩܠܰܬܼܗܽܘܢ ܕܺܝܠܗܽܘܢ܃ ܗܘܰܘ ܚܰܝ̈ܶܐ ܠܥܰܡ̱ܡܶܐ̈܂ ܠܰܛܢܳܢܗܽܘܢ܂
11:12 [ai]ܘܶܐܢ ܬܽܘܩܠܰܬܼܗܽܘܢ ܗܘܳܬܼ ܥܽܘܬܼܪܳܐ ܠܥܳܠܡܳܐ܃ ܘܚܰܝܳܒܼܽܘܬܼܗܽܘܢ ܥܽܘܬܼܪܳܐ ܠܥܰܡ̱ܡܶܐ̈܃ ܟܡܳܐ ܗܳܟܼܺܝܠ ܫܽܘܡܠܳܝܗܽܘܢ܀
11:13 [ai]ܠܟܼܽܘܢ ܕܶܝܢ ܐܳܡܰܪ ܐ̱ܢܳܐ ܠܥܰܡ̱ܡܶܐ̈܂ ܐܶܢܳܐ ܕܺܐܝܬܼܰܝ ܫܠܺܝܚܳܐ ܕܥܰܡ̱ܡܶܐ̈܃ ܠܬܼܶܫܡܶܫܬܿܝ ܡܫܰܒܿܰܚ ܐ̱ܢܳܐ܂
11:14 [ai]ܕܰܠܡܳܐ ܐܰܛܶܢ ܠܰܒܼܢܰܝ ܒܶܣܪܝ܃ ܘܰܐܚܶܐ ܐ̱ܢܳܫܺܝܢ̈ ܡܶܢܗܽܘܢ܂
11:15 [ai]ܐܶܢ ܓܶܝܪ ܡܶܣܬܿܰܠܝܳܢܽܘܬܼܗܽܘܢ ܬܰܪܥܽܘܬܼܳܐ ܠܥܳܠܡܳܐ ܗܘܳܬܼ܃ ܟܡܳܐ ܗܳܟܼܺܝܠ ܦܽܘܢܳܝܗܽܘܢ܃ ܐܶܠܳܐ ܚܰܝ̈ܶܐ ܕܡܶܢ ܒܶܝܬܼ ܡܺܝܬܼܶܐ̈܂
11:16 [ai]ܘܶܐܢ ܕܶܝܢ ܪܺܫܺܝܬܼܳܐ ܩܰܕܿܺܝܫܳܐ܃ ܐܳܦܼ ܓܒܼܺܝܠܬܳܐ܂ ܘܶܐܢ ܥܶܩܳܪܳܐ ܩܰܕܿܺܝܫ ܗ̱ܽܘ܃ ܐܳܦܼ ܣܰܘܟܿܶܐ̈܂
11:17 [ai]ܘܶܐܢ ܡܶܢ ܣܰܘܟܿܶܐ̈ ܐܶܬܼܦܿܫܰܚ܃ ܘܰܐܢ̱ܬܿ ܕܙܰܝܬܳܐ ܐܰܢ̱ܬܿ ܕܒܰܪܳܐ ܐܶܬܿܛܥܶܡܬܿ ܒܕܽܘܟܿܝܳܬܼܗܶܝܢ̈܃ ܘܰܗܘܰܝܬܿ ܫܰܘܬܿܳܦܼܳܐ ܠܥܶܩܳܪܶܗ ܘܰܠܫܽܘܡܢܶܗ ܕܙܰܝܬܳܐ܃
11:18 [ai]ܠܳܐ ܬܶܫܬܿܰܒܼܗܰܪ ܥܰܠ ܣܰܘܟܿܶܐ̈܂ ܐܶܢ ܕܶܝܢ ܡܶܫܬܿܰܒܼܗܰܪ ܐܰܢ̱ܬܿ܃ ܠܳܐ ܗ̱ܘܳܐ ܐܰܢ̱ܬܿ ܫܩܺܝܠ ܠܶܗ ܠܥܶܩܳܪܳܐ܃ ܐܶܠܳܐ ܗܽܘ ܥܶܩܳܪܳܐ ܫܩܺܝܠ ܠܳܟܼ܂
11:19 [ai]ܘܰܟܼܒܼܰܪ ܬܺܐܡܰܪ ܕܣܰܘܟܿܶܐ̈ ܕܶܐܬܼܦܿܫܰܚ܃ ܕܶܐܢܳܐ ܒܕܽܘܟܿܝܳܬܼܗܶܝܢ̈ ܐܶܬܿܛܥܶܡ܂
11:20 [ai]ܫܰܦܿܺܝܪ܂ ܗܳܠܶܝܢ ܡܶܛܽܠ ܕܠܳܐ ܗܰܝܡܶܢ܂ ܐܶܬܼܦܿܫܰܚ܂ ܐܰܢ̱ܬܿ ܕܶܝܢ ܒܗܰܝܡܳܢܽܘܬܼܳܐ ܩܳܡܬܿ܂ ܠܳܐ ܬܶܬܿܪܺܝܡ ܒܪܶܥܝܳܢܳܟܼ܃ ܐܶܠܳܐ ܕܚܰܠ܂
11:21 [ai]ܐܶܢ ܐܰܠܳܗܳܐ ܓܶܝܪ ܥܰܠ ܣܰܘܟܿܶܐ̈ ܕܡܶܢ ܟܝܳܢܗܶܝܢ ܠܳܐ ܚܳܣ܃ ܕܰܠܡܳܐ ܐܳܦܼܠܳܐ ܥܠܰܝܟܿ ܢܶܚܽܘܣ܂
11:22 [ai]ܚܙܺܝ ܗܳܟܼܺܝܠ ܒܰܣܺܝܡܽܘܬܼܶܗ ܘܩܰܫܝܽܘܬܼܶܗ ܕܰܐܠܳܗܳܐ܂ ܥܰܠ ܐܰܝܠܶܝܢ ܕܰܢܦܼܰܠܘ܂ ܩܰܫܝܽܘܬܼܳܐ܂ ܥܠܰܝܟܿ ܕܶܝܢ ܒܰܣܺܝܡܽܘܬܼܳܐ܃ ܐܶܢ ܬܩܰܘܶܐ ܒܿܳܗ ܒܒܼܰܣܺܝܡܽܘܬܼܳܐ܂ ܘܶܐܢ ܠܳܐ܃ ܐܳܦܼ ܐܰܢ̱ܬܿ ܬܶܬܼܦܿܫܰܚ܂
11:23 [ai]ܘܗܳܢܽܘܢ ܐܶܢ ܠܳܐ ܢܩܰܘܽܘܢ ܒܚܰܣܺܝܪܽܘܬܼ ܗܰܝܡܳܢܽܘܬܼܗܽܘܢ܃ ܐܳܦܼ ܗܶܢܽܘܢ ܢܶܬܿܛܰܥܡܽܘܢ܂ ܡܶܫܟܿܰܚ ܓܶܝܪ ܐܰܠܳܗܳܐ ܕܬܽܘܒܼ ܢܰܛܥܶܡ ܐܶܢܽܘܢ܂
11:24 [ai]ܐܶܢ ܓܶܝܪ ܐܰܢ̱ܬܿ ܕܡܶܢ ܙܰܝܬܳܐ ܐܰܢ̱ܬܿ ܕܒܰܪܳܐ܃ ܗܰܘ ܕܒܰܟܼܝܳܢܳܟܼ ܐܶܬܼܦܿܫܰܚܬܿ܃ ܘܰܕܼܠܳܐ ܒܰܟܼܝܳܢܳܟܼ ܐܶܬܿܛܥܶܡܬܿ ܒܙܰܝܬܳܐ ܛܳܒܼܳܐ܃ ܟܡܳܐ ܗܳܟܼܺܝܠ ܗܳܢܽܘܢ ܐܶܢ ܢܶܬܿܛܰܥܡܽܘܢ ܒܙܰܝܬܳܐ ܕܰܟܼܝܳܢܗܽܘܢ ܿ܀ܿ܀ܿ
11:25 [ai]ܨܳܒܼܶܐ ܐ̱ܢܳܐ ܓܶܝܪ ܕܬܶܕܿܥܽܘܢ ܐܰܚܰܝ̈܂ ܐ̱ܪܳܙܳܐ ܗܳܢܳܐ܃ ܕܠܳܐ ܬܶܗܘܽܘܢ ܚܰܟܿܺܝܡܺܝܢ ܒܪܶܥܝܳܢ ܢܰܦܼܫܟܼܽܘܢ܃ ܕܰܥܘܺܝܪܽܘܬܼ ܠܶܒܿܳܐ ܡܶܢ ܐܰܬܼܰܪ ܩܰܠܺܝܠ ܗܘܳܬܼ ܠܺܐܝܣܪܳܝܶܠ܃ ܥܕܼܰܡܳܐ ܕܢܶܥܽܘܠ ܡܽܘܠܳܝܳܐ ܕܥܰܡ̱ܡܶܐ̈܃
11:26 [ai]ܘܗܳܝܕܶܝܢ ܟܽܠܶܗ ܐܺܝܣܪܳܝܶܠ ܢܺܚܶܐ܂ ܐܰܝܟܿܰܢܳܐ ܕܰܟܼܬܼܺܝܒܼ܂ ܕܢܺܐܬܼܶܐ ܡܶܢ ܨܶܗܝܽܘܢ ܦܳܪܽܘܩܳܐ܃ ܘܢܰܗܦܿܶܟܼ ܥܰܘܠܳܐ ܡܶܢ ܝܰܥܩܽܘܒܼ܂
11:27 [ai]ܘܗܳܝܕܶܝܢ ܬܶܗܘܶܐ ܠܗܽܘܢ ܕܺܝܰܬܼܺܩܺܐ ܗܳܝ ܕܡܶܢ ܠܘܳܬܼܝ܃ ܡܳܐ ܕܫܶܒܼܩܶܬܼ ܠܗܽܘܢ ܚܛܳܗܰܝܗܽܘܢ̈܂
11:28 [ai]ܒܶܐܘܰܢܓܿܶܠܺܝܳܘܢ ܕܶܝܢ܃ ܒܥܶܠܕܿܒܼܳܒܼܶܐ̈ ܐܶܢܽܘܢ ܡܶܛܽܠܳܬܼܟܼܽܘܢ܂ ܘܰܒܓܼܰܒܼܝܽܘܬܼܳܐ ܚܰܒܺܝܒܼܰܝܢ ܐܶܢܽܘܢ ܡܶܛܽܠ ܐܰܒܼܳܗܳܬܼܳܐ̈܂
11:29 [ai]ܠܳܐ ܓܶܝܪ ܗܳܦܼܟܿܳܐ ܐܰܠܳܗܳܐ ܒܡܰܘܗܰܒܼܬܼܶܗ ܘܰܒܩܶܪܝܳܢܶܗ܂
11:30 [ai]ܐܰܝܟܿܰܢܳܐ ܓܶܝܪ ܕܳܐܦܼ ܐܰܢ̱ܬܿܽܘܢ ܠܳܐ ܡܶܬܿܛܦܿܺܝܣܺܝܢ ܗ̱ܘܰܝܬܿܽܘܢ ܠܰܐܠܳܗܳܐ ܡܶܢ ܩܕܼܺܝܡ܃ ܘܗܳܫܳܐ ܐܶܬܼܚܢܶܢܬܿܽܘܢ ܡܶܛܽܠ ܠܳܐ ܡܶܬܿܛܦܿܺܝܣܳܢܽܘܬܼܗܽܘܢ ܕܗܳܢܽܘܢ܃
11:31 [ai]ܗܳܟܼܰܢܳܐ ܐܳܦܼ ܗܳܠܶܝܢ ܠܳܐ ܐܶܬܿܛܦܿܺܝܣܘ ܗܳܫܳܐ ܠܪ̈ܰܚܡܶܐ ܕܰܥܠܰܝܟܿܽܘܢ܃ ܕܳܐܦܼ ܥܠܰܝܗܽܘܢ ܢܶܗܘܽܘܢ ܪ̈ܰܚܡܶܐ܂
11:32 [ai]ܚܒܼܰܫ ܓܶܝܪ ܐܰܠܳܗܳܐ ܠܟܼܽܠܢܳܫ ܒܠܳܐ ܡܶܬܿܛܦܿܺܝܣܳܢܽܘܬܼܳܐ܃ ܕܥܰܠ ܟܽܠ ܐ̱ܢܳܫ ܢܪܰܚܶܡ܀
11:33 [ai]ܐܳܘ ܥܽܘܡܩܳܐ ܕܥܽܘܬܼܪܳܐ ܘܚܶܟܼܡܬܼܳܐ ܘܡܰܕܿܥܳܐ ܕܰܐܠܳܗܳܐ܃ ܕܐ̱ܢܳܫ ܠܳܐ ܡܳܫ ܕܺܝܢܰܘܗ̱ܝ̈܃ ܘܽܐܘܪ̈ܚܳܬܼܶܗ ܠܳܐ ܡܶܬܼܥܰܩܒܼܳܢ̈܂
11:34 [ai]ܡܰܢܽܘ ܓܶܝܪ ܺܝܕܼܰܥ ܪܶܥܝܳܢܶܗ ܕܡܳܪܝܳܐ܂ ܐܰܘ ܡܰܢܽܘ ܗܘܳܐ ܠܶܗ ܒܥܶܠ ܡܶܠܟܿܳܐ܂
11:35 [ai]ܘܡܰܢܽܘ ܩܰܕܶܡ ܝܰܗ̱ܒܼ ܠܶܗ܃ ܘܟܼܶܢ ܢܣܰܒܼ ܡܶܢܶܗ܂
11:36 [ai]ܡܶܛܽܠ ܕܟܽܠ ܡܶܢܶܗ܂ ܘܟܼܽܠ ܒܶܗ܂ ܘܟܼܽܠ ܒܺܐܝܕܼܶܗ܂ ܕܠܶܗ ܬܶܫܒܿܚܳܢ̈ ܘܒܼܽܘܪ̈ܟܿܳܢ܃ ܠܥܳܠܰܡ ܥܳܠܡܺܝܢ ܐܰܡܺܝܢ܀

next chapter