The Comprehensive Aramaic Lexicon

02:01 [ai]	ܒܿܳܥܶܐ ܐ̱ܢܳܐ ܗܳܟܼܺܝܠ ܡܶܢܳܟܼ܃ ܕܡܶܢ ܩܕܼܳܡ ܟܽܠܡܶܕܶܡ ܒܳܥܽܘܬܼܳܐ ܬܶܗܘܶܐ ܡܩܰܪܶܒܼ ܠܰܐܠܳܗܳܐ܂ ܘܰܨܠܽܘܬܼܳܐ܂ ܘܬܼܰܚܢܰܢܬܳܐ܂ ܘܬܼܰܘܕܿܺܝܬܼܳܐ܃ ܚܠܳܦܼ ܟܽܠܗܽܘܢ ܒܢܰܝܢܳܫܳܐ܂
02:02 [ai]	ܚܠܳܦܼ ܡܰܠܟܿܶܐ̈ ܘܪ̈ܰܘܪܒܼܳܢܶܐ܃ ܕܥܽܘܡܪܳܐ ܫܰܠܝܳܐ ܘܢܺܝܚܳܐ ܢܶܥܡܰܪ ܒܟܽܠܳܗ ܕܶܚܠܰܬܼ ܐܰܠܳܗܳܐ ܘܕܰܟܼܝܽܘܬܼܳܐ܂
02:03 [ai]	ܗܳܕܼܶܐ ܓܶܝܪ ܫܰܦܿܺܝܪܳܐ ܘܰܡܩܰܒܠܳܐ ܩܕܼܳܡ ܐܰܠܳܗܳܐ ܡܰܚܝܳܢܰܢ܃
02:04 [ai]	ܗܰܘ ܕܨܳܒܼܶܐ ܕܟܽܠܗܽܘܢ ܒܢܰܝܢܳܫܳܐ ܢܺܚܽܘܢ܃ ܘܢܶܬܼܦܿܢܽܘܢ ܠܺܝܕܼܰܥܬܼܳܐ ܕܰܫܪܳܪܳܐ܂
02:05 [ai]	ܚܰܕܼ ܗ̱ܽܘ ܓܶܝܪ ܐܰܠܳܗܳܐ܂ ܘܚܰܕܼ ܗ̱ܽܘ ܡܶܨܥܳܝܳܐ ܕܰܐܠܳܗܳܐ ܘܕܼܰܒܼܢܰܝܢܳܫܳܐ܂ ܒܰܪܢܳܫܳܐ ܝܶܫܽܘܥ ܡܫܺܝܚܳܐ܃
02:06 [ai]	ܗܰܘ ܕܝܰܗ̱ܒܼ ܢܰܦܼܫܶܗ ܦܽܘܪܩܳܢܳܐ ܚܠܳܦܼ ܟܽܠ ܐ̱ܢܳܫ܃ ܣܳܗܕܿܽܘܬܼܳܐ ܕܶܐܬܼܳܬܼ ܒܙܰܒܼܢܳܗ܂
02:07 [ai]	ܗܳܝ ܕܶܐܢܳܐ ܐܶܬܣܺܝܡܶܬܼ ܟܪܽܘܙܳܗ ܘܰܫܠܺܝܚܳܗ܂ ܩܽܘܫܬܳܐ ܐܳܡܰܪ ܐ̱ܢܳܐ ܘܠܳܐ ܡܕܼܰܓܿܶܠ ܐ̱ܢܳܐ܃ ܕܰܗܘܺܝܬܼ ܡܰܠܦܼܳܢܳܐ ܕܥܰܡ̱ܡܶܐ̈ ܒܗܰܝܡܳܢܽܘܬܼܳܐ ܕܰܫܪܳܪܳܐ܀
02:08 [ai]	ܨܳܒܼܶܐ ܐ̱ܢܳܐ ܗܳܟܼܺܝܠ܃ ܕܰܗܘܰܘ ܡܨܰܠܶܝܢ ܓܿܰܒܼܪ̈ܶܐ ܒܟܽܠ ܕܽܘܟܿܳܐ܃ ܟܰܕܼ ܡܪܺܝܡܺܝܢ ܐܺܝܕܼܰܝܗܽܘܢ̈ ܕܰܟܼܝܳܐܺܝܬܼ܂ ܕܠܳܐ ܪܽܘܓܼܙܳܐ ܘܰܕܼܠܳܐ ܡܰܚܫܒܼܳܬܼܳܐ̈܂
02:09 [ai]	ܗܳܟܼܰܢܳܐ ܐܳܦܼ ܢܶܫܶܐ̈ ܒܶܐܣܟܿܺܡܳܐ ܢܰܟܼܦܿܳܐ ܕܰܠܒܼܽܘܫܳܐ܂ ܒܬܰܚܡܶܨܬܳܐ ܘܰܒܢܰܟܼܦܿܽܘܬܼܳܐ ܢܶܗܘܶܐ ܬܿܰܨܒܺܝܬܼܗܶܝܢ܃ ܠܳܐ ܒܰܓܼܕܼܽܘܠܶܐ̈ ܘܰܒܕܼܰܗܒܼܳܐ܂ ܐܰܘ ܒܡܰܪ̈ܓܿܳܢܝܳܬܼܳܐ܂ ܐܰܘ ܒܢܰܚܬܿܶܐ̈ ܫܰܦܿܺܝܪ̈ܶܐ܃
02:10 [ai]	ܐܶܠܳܐ ܒܰܥܒܼܳܕܼܶܐ̈ ܛܳܒܼܶܐ̈܃ ܐܰܝܟܿܰܢܳܐ ܕܝܳܐܶܐ ܠܢܶܫܶܐ̈ ܕܡܶܫܬܰܘܕܿܝܳܢ̈ ܕܶܚܠܰܬܼ ܐܰܠܳܗܳܐ܂
02:11 [ai]	ܐܰܢ̱ܬܿܬܼܳܐ ܒܫܶܠܝܳܐ ܗܘܳܬܼ ܝܳܠܦܿܳܐ ܒܟܽܠ ܫܽܘܥܒܿܳܕܼ܂
02:12 [ai]	ܠܰܐܢ̱ܬܿܬܼܳܐ ܓܶܝܪ ܠܡܰܠܳܦܼܽܘ ܠܳܐ ܡܰܦܿܶܣ ܐ̱ܢܳܐ܃ ܘܠܳܐ ܠܡܰܡܪܳܚܽܘ ܥܰܠ ܓܰܒܼܪܳܐ܃ ܐܶܠܳܐ ܬܶܗܘܶܐ ܒܫܶܠܝܳܐ܂
02:13 [ai]	ܐܳܕܼܳܡ ܓܶܝܪ ܐܶܬܼܓܿܒܼܶܠ ܠܽܘܩܕܼܰܡ ܘܗܳܝܕܶܝܢ ܚܰܘܳܐ܂
02:14 [ai]	ܘܳܐܕܼܳܡ ܠܳܐ ܛܥܳܐ܃ ܐܰܢ̱ܬܿܬܼܳܐ ܕܶܝܢ ܛܥܳܬܼ ܘܥܶܒܼܪܰܬܼ ܥܰܠ ܦܽܘܩܕܳܢܳܐ܂
02:15 [ai]	ܚܳܝܳܐ ܕܶܝܢ ܒܝܰܕܼ ܝܰܠܕܿܶܝܗ̈܃ ܐܶܢ ܢܩܰܘܽܘܢ ܒܗܰܝܡܳܢܽܘܬܼܳܐ܂ ܘܰܒܚܽܘܒܿܳܐ܂ ܘܰܒܩܰܕܿܺܝܫܽܘܬܼܳܐ܂ ܘܰܒܢܰܟܼܦܿܽܘܬܼܳܐ܀

next chapter