The Comprehensive Aramaic Lexicon

13:01 [ai]	ܘܛܘܒܝܛ ܟܬܒ ܗܼܘܐ ܨܠܘܬܐ ܒܐܪܘܙܐ ܘܐܡܼܪ܂ ‍{‍ܨܠܘܬܐ ܕܛܘܒܝܛ‍}‍ ܡܒܪܟܐ ܗܼܘ ܐܠܗܐ ܗܿܘ ܕܚܝ ܠܥܠܡܝܢ܂ ܘܡܠܟܘܬܐ ܕܝܠܗ܂܂
13:02 [ai]	ܡܛܠ ܕܗܼܘ ܡܢܓܕ ܘܡܪܚܡ܂ ܡܚܬ ܠܫܝܘܠ ܘܡܿܣܩ܂ ܘܠܐ ܐܝܬ ܗܿܘ ܕܢܥܪܘܩ ܡܢ ܐܝܕܐ ܕܝܠܗ܂܂
13:03 [ai]	ܐܘܕܘ ܠܗ ܒܢ̈ܝܐ ܕܐܝܣܪܝܠ ܩܕܡ ܥܡ̈ܡܐܼ܂ ܡܛܠ ܕܗܼܘ ܒܕܪܟܘܢ ܒܗܘܢ܂܂
13:04 [ai]	ܬܡܢ ܚܘܘ ܪܒܘܬܐ ܕܝܠܗ܃ ܘܪܡܪܡܘܢܝܗܝ ܩܕܡ ܟܠ ܕܚܝ܂ ܡܛܠ ܕܗܘܝܘ ܡܪܝܐ ܕܝܠܢ܂ ܘܐܠܗܐ ܐܒܐ ܕܝܠܢ ܒܟܠܗܘܢ ܥ̈ܠܡܐ܂܂
13:05 [ai]	ܡܿܢܓܕ ܠܢ ܒܥ̈ܘܠܐ ܕܝܠܢ܂ ܘܬܘܒ ܢܪܚܡ ܘܢܟܢܫ ܠܢ ܡܢ ܟܠܗܘܢ ܥܡ̈ܡܐ܂ ܡܢ ܐܝܟܐ ܕܐܢ ܬܬܒܕܪܘܢ ܒܗܘܢ܂܂
13:06 [ai]	ܐܢ ܬܬܦܼܢܘܢ ܠܘܬܗܼ ܒܟܠܗ ܠܒܐ ܕܝܠܟܘܢ ܘܒܟܠܗܿ ܢܦܫܐ܃ ܠܡܥܒܕ ܩܕܡܘܗܝ ܫܪܪܐܼ܂ ܗܝܕܝܢ ܢܬܦܼܢܐ ܠܘܬܟܘܢ܂ ܘܠܐ ܢܿܛܫܐ ܠܦܪܨܘܦܐ ܕܝܠܗ ܡܢܟܘܢ܂ ܘܚܼܙܘ ܗܠܝܢ ܕܥܿܒܕ ܥܡܟܘܢ܃ ܘܐܘܕܘ ܠܗ ܒܟܠܗ ܦܘܡܐ ܕܝܠܟܘܢ܃ ܘܒܪܟܘ ܠܡܪܝܐ ܕܙܕܝܩܘܬܐ܂ ܘܪܡܪܡܘ ܠܡܿܠܟܐ ܕܥ̈ܠܡܐ܂܂ ܐܢܐ ܒܐܪܥܐ ܕܫܒܝܬܐ ܕܝܠܝ ܡܘܕܐ ܐܢܐ ܠܗܼ܂ ܘܡܚܘܐ ܐܢܐ ܚܝܠܐ ܕܪܒܘܬܐ ܕܝܠܗ ܠܥܡܐ ܚܛܝܐ܂܂ ܐܬܦܢܘ ܚ̈ܛܝܐ ܘܥܒܕ ܙܕܝܩܘܬܐ ܩܕܡܘܗܝ܂ ܡܢ ܝܕܿܥ ܐܢ ܒܿܥܐ ܠܟܘܢ܂ ܘܥܿܒܕ ܡܪܚܡܢܘܬܐ ܠܟܘܢ܂܂
13:07 [ai]	ܠܐܠܗܐ ܡܪܡܪܡ ܐܢܐܼ܂ ܘܢܦܫܐ ܕܝܠܝ ܠܡܠܟܘܬܐ ܕܫܡܝܐ܂ ܘܬܪܘܙ ܒܪ̈ܒܘܬܐ ܕܝܠܗ܂܂
13:08 [ai]	ܢܐܡܪܘܢ ܟܠܗܘܢ ܘܢܘܕܘܢ ܠܗ ܒܐܘܪܫܠܡ܂
13:09 [ai]	ܡܕܝܢܬܗ ܕܩܕܫܐ܂ ܡܿܢܓܕ ܥܠ ܥܿܒ̈ܕܐ ܕܒܢ̈ܝܐ ܕܝܠܟܝ܂ ܘܬܘܒ ܡܪܚܡ ܥܠ ܒ̈ܢܝܐ ܕܙ̈ܕܝܩܐ܂܂܂
13:10 [ai]	ܐܘܕܝ ܠܡܪܝܐ ܛܒܐܝܬܼ ܘܒܪܟܝ ܠܡܿܠܟܐ ܕܥ̈ܡܐܼ܂ ܐܝܟܢܐ ܕܬܘܒ ܡܫܼܟܢܐ ܕܝܠܗ ܢܬܒܢܝ ܒܟܝ܂ ܥܡ ܚܕܘܬܿ܂܂
13:11 [ai]	ܥܡ̈ܡܐ ܣ̈ܓܝܐܐ ܡܢ ܪܘܚܩܐ ܢܐܬܘܢ ܠܘܬ ܫܡܗ ܕܡܪܝܐ ܐܠܗܐܼ܂ ܟܕ ܩܘܪ̈ܒܢܐ ܒܐ̈ܝܕܝܐ ܐܝܬ ܠܗܘܢ܃ ܩܘܪ̈ܒܢܐ ܠܡܿܠܟܐ ܕܫܡܝܐ܂܂
13:12 [ai]	ܠܝܛܝܢ ܟܠܗܘܢ ܗܿܢܘܢ ܕܣܢܝܢ ܠܟܝ܂ ܡܒܪ̈ܟܐ ܢܗܘܘܢ ܐܝܬܝܗܘܢ ܟܠܗܘܢ ܗܿܢܘܢ ܕܡܚܒܝܢ ܠܟܝ܂ ܠܥܠܡ܂ ܂
13:13 [ai]	ܚܕܝ ܘܐܪܘܙܝ ܒܒ̈ܢܝܐ ܕܙܕ̈ܝܩܐܼ܂ ܡܛܠ ܕܢܬܟܢܫܘܢ ܘܢܒܪܟܘܢ ܠܡܪܝܐ ܙܕܝܩܐ܂܂
13:14 [ai]	ܡܐ ܛܘܒ̈ܬܢܐ ܐܝܬܝܗܘܢ ܗܢܘܢ ܕܡܚܒܝܢ ܠܟܝ܃ ܢܚܕܘܢ ܥܠ ܫܝܢܐ ܕܝܠܟܝ܂ ܛܘܒ̈ܬܢܐ ܐܢܘܢ ܗܿܢܘܢ ܕܐܬܬܥܝܩܘ ܥܠ ܟܠܗܘܢ ܢܓ̈ܕܐ ܕܝܠܟܝ܂ ܡܛܠ ܕܒܟܝ ܢܚܕܘܢ ܟܕ ܚܙܝܢ ܟܠܗܿ ܬܫܒܘܚܬܐ ܕܝܠܟܝ܂ ܘܬܬܒܣܡ ܠܥܠܡ ܢܦܫܐ ܕܝܠܟܝ܂܂
13:15 [ai]	ܒܪܟܘ ܠܐܠܗܐ ܠܡܿܠܟܐ ܗܿܘ ܪܡܐ܂܂
13:16 [ai]	ܡܛܠ ܕܬܬܒܢܐ ܐܘܪܫܠܡ ܒܣܐܦܝܪܐܼ ܘܒܐܙܡܪܓܕܐܼ܂ ܘܒܟܐܦܐ ܡܝܩܪܬܐ܂ ܫܘܪܐ ܕܝܠܟܝ܃ ܦܘܪ̈ܩܣܐ ܘܦܪܘܡܐܟܘܢܐ ܒܕܗܒܐ ܕܟܝܐ܂܂
13:17 [ai]	ܘܦܠܛܘ̈ܬܐ ܕܐܘܪܫܠܡܼ܂ ܒܒܪ̈ܘܠܐ ܘܒܐܢܬܪܩܘܣ ܘܒܟܐܦܐ ܕܡܢ ܣܘܦܝܪ ܢܬܬܩܦܣܘܢ܂܂
13:18 [ai]	ܘܢܐܡܪܘܢ ܟܠܗܘܢ ܫܘ̈ܩܐ ܕܝܠܗܿ ܗܠܠܘܝܐ܂ ܘܢܫܒܚܘܢ ܟܕ ܐܡܪܝܢ܃ ܡܒܪܟܐ ܗܼܘ ܐܠܗܐܿ܂ ܗܿܘ ܕܪܡܪܡ ܠܟܠܗܘܢ ܥ̈ܠܡܐܿ܂܂

next chapter