The Comprehensive Aramaic Lexicon

407:R01	אל מראן בגוהי פחת יהוד עבדיך ידניה וכנותה כהניא זי ביב בירתא שלם
407:R02	מראן אלה שמיא ישאל שגיא בכל עדן ולרחמן ישימנך קדם דריוהוש מלכא
407:R03	ובני ביתא יתיר מן זי כען חד אלף וחין אריכן ינתן לך וחדה ושריר הוי בכל עדן
407:R04	כען עבדך ידניה וכנותה כן אמרן בירח תמוז שנת 10־3־1 דריוהוש מלכא כזי ארשם
407:R05	נפק ואזל על מלכא כמריא זי חנוב ^אלהא^ זי ביב בירתא המונית עם וידרנג זי פרתרך תנה
407:R06	הוה לם אגורא זי יהו אלהא זי ביב בירתא יהעדו מן תמה אחר וידרנג זך
407:R07	לחיא אגרת שלח על נפין ברה זי רבחיל הוה בסון בירתא לאמר אגורא זי ביב
407:R08	בירתא ינדשו אחר נפין דבר מצריא עם חילא אחרנן אתו לבירת יב עם תליהם
407:R09	עלו באגורא זך נדשוהי עד ארעא ועמודיא זי אבנא זי הוו תמה תברו ^המו^ אף הוה תרען
407:R10	זי אבן 3־2 בנין פסילה זי אבן זי הוו באגורא זך נדשו ודשיהם קימן וציריהם
407:R11	זי דששיא אלך נחש ומטלל עקהן ^זי^ ארז כלא זי עם שירית אשרנא ואחרן זי תמה
407:R12	הוה כלא באשה שרפו ומזרקיא זי זהבא וכסף ומנדעמתא זי הוה באגורא זך כלא לקח^ו^
407:R13	ולנפשהום עבדו ומן יומי מלך מצרין אבהין בנו אגורא זך ביב בירתא וכזי כנבוזי על למצר^ין^
407:R14	אגורא זך בנה השכחה ואגורי אלהי מצרין כל מגרו ואיש מנדעם באגורא זך לא חבל
407:R15	וכזי כזנה עביד אנחנה עם נשין ובנין שקקן לבשן הוין וצימין ומצלין ליהו מרא שמיא
407:R16	זי החוין בוידרנג זך כלביא הנפקו כבלא מן רגלוהי וכל נכסין זי קנה אבדו וכל גברין
407:R17	זי בעו באיש לאגורא זך כל קטילו וחזין בהום אף קדמת זנה בעדן זי זא באיש^תא^
407:V18	עביד לן אגרה שלחן מראן ועל יהוחנן כהנא רבא וכנותה כהניא זי בירושלם ועל אוסתן אחוה^י^
407:V19	זי ענני וחרי יהודיא אגרה חדה לא שלחו עלין אף מן ירח תמוז שנת 10־3־1 דריהוש מלכא

407:V20	וע^ד^זנה יומא אנחנה שקקן לבשן וצימין נשיא זילן כארמלה עבידין משח לא משחין

407:V21	וחמר לא שתין אף מן זכי ועד יום שנת 10־3־3־1 דריהוש מלכא מנחה ולבו[נ]ה ועלוה
407:V22	לא עבדו באגורא זך כען עבדיך ידניה וכנותה ויהודיא כל בעלי יב כן אמרי^ן^
407:V23	הן על מראן טב אתעשת על אגורא זך למבנה בזי לא שבקן לן למבניה חזי
407:V24	בעלי ̊̊טבתך ורחמיך ^זי^ תנה במצרין אגרה מנך ישתלח עליהום על אגורא זי יהו אלהא
407:V25	למבניה ביב בירתא לקבל זי בנה הוה קדמין ומחתא ולבונתא ועלותא י{{ה}}קרבון
407:V26	על מדבחא זי יהו אלהא בשמך ונצלה עליך בכל עדן אנחנה ונשין ובנין ויהודיא
407:V27	כל זי תנה הן כן עבדו עד זי אגורא זך יתבנה וצדקה יהוה לך קדם יהו אלה
407:V28	שמיא מן גבר זי יקרב לה עלוה ודבחן דמן כדמי כסף כנכרין 1⸢לף ועל זהב על זנה
407:V29	שלחן הודען אף כלא מליא באגרה חדה שלחן ^בשמן^ על דליה ושלמיה בני סנאבלט פ^ח^ת שמרין
407:V30	אף בזנה זי עביד לן ^כלא^ ארשם לא ידע ב20 למרחשון שנת 10־3־3־1 דריהוש מלכא