← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

51008: TgJ 1S

Click on a word for lexical analysis
Click on a red-colored coordinate for comments and/or translations of the line

previous chapter


13:01 )1( כְבַר שְנָא דְלֵית/דליה#3#/ בֵיה חוֹבִין שָאוּל כַד מְלַך וְתַרתֵין שְנִין מְלַך עַל יִשרָאֵל:
13:02 )1( וֻבחַר לֵיה שָאוּל תְלָתָה אַלפִין מִיִשרָאֵל וַהְווֹ עִם שָאוּל תְרֵין/תרתין#3#/ אַלפִין בְמִכמָש וֻבטוּר בֵיתאֵל וְאַלפָא הְווֹ עִם יוֹנָתָן בְגִבעְתָא דְבֵית בִניָמִין וֻשאָר עַמָא שַלַח גְבַר לְקִרוֹהִי/למשכניה#3#/:
13:03 )1( וֻמחָא יוֹנָתָן יָת אִסטַרטֵיג/איסטרטיגי#3#/אצטרטיג#3#/אצטרטג#3#/ פְלִשתָאֵי דִבגִבעְתָא וֻשמַעוּ פְלִשתָאֵי וְשָאוּל תְקַע בְשוּפָרָא בְכָל אַרעָא לְמֵימַר יִשמְעוּן יְהוּדָאֵי:
13:04 )1( וְכָל יִשרָאֵל שְמַעוּ לְמֵימַר מְחָא שָאוּל יָת אִסטַרטֵיג פְלִשתָאֵי וְאַף אִתגָרִי יִשרָאֵל בִפלִשתָאֵי וְאִתכְנִישוּ עַמָא בָתַר שָאוּל לְגִלגָלָא:
13:05 )1( וֻפלִשתָאֵי אִתכְנִישוּ לְאָגָחָא קְרָבָא \עִם יִשרָאֵל /בישראל#3#/ תְלָתִין אַלפִין רְתִכִין וְשִתָא אָלפִין פָרָשִין וְעַמָא כְחָלָא דְעַל כֵיף יַמָא לִסגֵי וֻסלִיקוּ וֻשרוֹ בְמִכמָש מַדנַח בֵית אָוַן:
13:06 )1( וַאְנָש יִשרָאֵל חְזוֹ אְרֵי עַקַת לְהוֹן אְרֵי אִדְחֵיק/אִרַחֵיק#3#/ עַמָא וְאִטְמַרוּ עַמָא בִמעָרָתָא וֻבִמצָדָתָא וֻבִשקִיפֵי כֵיפַיָא וֻבִמעָרָת טִנָרַיָא וֻבגוּבַיָא:
13:07 )1( וִיהוּדָאֵי עְבַרוּ יָת יַרדְנָא לַאְרַע גָד וְגִלעָד וְשָאוּל עַד כְעַן בְגִלגָלָא וְכָל עַמָא אִתכְנִישוּ בָתְרוֹהִי:
13:08 )1( וְאוֹרֵיך שִבעָה יוֹמִין לְזִמנָא דַאְמַר <ליה#3#> שְמוּאֵל וְלָא אְתָא שְמוּאֵל לְגִלגָלָא וְאִתבַדַר עַמָא מֵעִלָוֹהִי:
13:09 )1( וַאְמַר שָאוּל קָרִיבוּ לְוָתִי עְלָתָא וְנִכסַת קֻדשַיָא וְאַסֵיק עְלָתָא:
13:10 )1( וַהְוָה כְשֵיצָיוּתֵיה/כד שיצי#3#/ לְאַסָקָא עְלָתָא וְהָא שְמוּאֵל אְתָא וֻנפַק שָאוּל לְקַדָמוּתֵיה לְמִשאַל בִשלָמֵיה:
13:11 )1( וַאְמַר שְמוּאֵל מָא עְבַדתָא וַאְמַר שָאוּל אְרֵי חְזֵיתִי אְרֵי אִתבַדַר עַמָא מֵעִלָוַי וְאַת לָא אְתֵיתָא לִזמַן יוֹמַיָא וֻפלִשתָאֵי אִתכְנִישוּ לְמִכמָש:
13:12 )1( וַאְמַרִית כְעַן <דִלמָא#2#/ יֵיחְתוּן פְלִשתָאֵי לְוָתִי לְגִלגָלָא וֻקדָם יְיָ לָא צַלִיתִי וְאִתחַסַנִית/וְאִתחַסֵינִית#2#/ וְאַסֵיקִית עְלָתָא:
13:13 )1( וַאְמַר שְמוּאֵל לְשָאוּל טְפֵישתָא/איטפשתא#3#/ לָא נְטַרתָא יָת תַפקֵידַת מֵימְרָא דַיְיָ אְלָהָך דְפַקְדָך אְרֵי כְעַן אַתקֵין יְיָ יָת מַלכוּתָך עַל יִשרָאֵל עַד עָלְמָא:
13:14 )1( וֻכעַן מַלכוּתָך לָא תִתקַיַים אַתקֵין יְיָ קֳדָמוֹהִי גְבַר עָבֵיד רְעוּתֵיה וֻפַקְדֵיה יְיָ לְמִהוֵי מַלכָא עַל עַמֵיה אְרֵי לָא נְטַרתָא יָת דְפַקְדָך יְיָ:
13:15 )1( וְקָם שְמוּאֵל וֻסלֵיק מִן גִלגָלָא לְגִבעְתָא דְבֵית בִניָמִין וֻמנָא שָאוּל יָת עַמָא דְאִשתְכַחוּ עִמֵיה כְשֵית מְאָה גֻברָא:
13:16 )1( וְשָאוּל וְיוֹנָתָן בְרֵיה וְעַמָא דְאִשתְכַח/דְאִשתְכַחוּ#3#/ עִמְהוֹן יָתְבִין בְגִבעְתָא דְבֵית בִניָמִין וֻפלִשתָאֵי שְרוֹ/אתכנישו#3#/ בְמִכמָס:
13:17 )1( וֻנפַק מְחַבְלָא מִמַשרְיָת פְלִשתָאֵי תְלָת מַשרְיָן מַשרִיתָא חְדָא מִתפַניָא לְאוֹרַח עָפרָה לַאְרַע דָרוֹמָא/שועל#3#/:
13:18 )1( וֻמַשרִיתָא חְדָא מִתפַניָא לְאוֹרַח בֵית חוֹרוֹן וֻמַשרִיתַא חְדָא מִתפַניָא לְאוֹרַח תְחוּמָא דְמִסתַכֵי לְחִלַת/מישר#3#/ אְפָעַיָא לְמַדבְרָא:
13:19 )1( וְאוּמָן/וְאָמָן#3#/ עָבֵיד זֵין לָא מִשתְכָח/אישתכח#3#/ בְכֹל תְחוּם אַרעָא דְיִשרָאֵל אְרֵי אְמַרוּ פְלִשתָאֵי דִלמָא יַעבְדוּן יְהוּדָאֵי סֵיפִין אוֹ רֻמחִין:
13:20 )1( וֻנחַתוּ כָל יִשרָאֵל לַאְרַע פְלִשתָאֵי לְחָרָפָא גְבַר יָת פָרָשֵיה וְיָת סִכַת פַדָנֵיה וְיָת כוֹלַבֵיה/כֻלבֵיה#2#/כולכיה#3#/ וְיָת עְשָפֵיה:
13:21 )1( וְהָוֵי לְהוֹן שוֹפִינָא לְחָרָפָא בֵיה פְגִימַת כָל מָן דְבַרזַל לְעַשפַיָה וֻלסִכַת פַדָנַיָא וְלִמצִלַת קָצְרַיָא דְלֵיה/דְלַה#2#/ תְלָת שִנִין/שִנַיִן#3#/ וֻלכֻלבַיָא וֻלאַנָצָא/ולאפצא#3#/ולאנצבא#3#/ זְקַת:
13:22 )1( וְהָוֵי/והוה#3#/ בְיוֹמָא דִקרָבָא וְלָא מִשתַכחָא חַרבָא וֻמוֹרָנִיתָא בִידָא דְכָל עַמָא דְעִם שָאוּל וְעִם יוֹנָתָן וֻמִשתַכחָא/וְאִשתְכַחָא#2#/ לְשָאוּל וֻליוֹנָתָן בְרֵיה:
13:23 )1( וֻנפַק אִסטַרטֵיג פְלִשתָאֵי לִמגָזַת מִכמָס:

next chapter