← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60040: OS Mt

Click on a word for lexical analysis
Click on a red-colored coordinate for comments and/or translations of the line

previous chapter


09:01 ܘܥܠ ܠܣܦܝܢܬܐ ܘܥܒܪ ܐܬܐ ܠܡܕܝܢܬܗ
09:02 ܘܐܙܠܘ ܠܗܘܢ ܘܩܪܒܘ ܡܫܪܝܐ ܟܕ ܪܡܐ ܒܥܪܣܐ ܘܟܕ ܚܙܐ ܡܪܢ ܗܝܡܢܘܬܗܘܢ ܐܡܪ ܠܗܘ ܡܫܪܝܐ ܠܐ ܬܕܚܠ ܒܪܝ ܫܒܝܩܝܢ ܠܟ ܚܛܗܝܟ
09:03 ܐܢܫܐ ܕܝܢ ܡܢ ܣܦܪܐ ܐܡܪܘ ܗܢܐ ܡܓܕܦ
09:04 ܡܪܢ ܟܕ ܚܙܐ ܡܚܫܒܬܗܘܢ ܐܡܪ ܠܗܘܢ ܡܢܐ ܡܬܚܫܒܝܢ ܐܢܬܘܢ ܒܝܫܐ ܒܠܒܟܘܢ
09:05 ܐܝܢܐ ܦܫܝܩܐ ܠܡܐܡܪ ܕܫܒܝܩܝܢ ܠܟ ܚܛܗ̈ܝܟ܂ ܐܘ ܠܡܐܡܪ ܕܩܘܡ ܗܠܟ
09:06 ܕܬܕܥܘܢ ܕܝܢ ܕܫܠܝܛ ܗܘ ܒܪܗ ܕܐܢܫܐ ܥܠ ܐܪܥܐ ܠܡܫܒܩ ܚܛܗ̈ܐ ܗܝܕܝܢ ܐܡܪ ܠܗܘ ܡܫܪܝܐ ܩܘܡ ܫܩܘܠ ܥܪܣܟ ܘܐܙܠ ܠܒܝܬܟ
09:07 ܘܩܡ ܫܩܠ ܥܪܣܗ ܘܐܙܠ ܠܒܝܬܗ
09:08 ܘܟܕ ܚܙܘ ܟܢܫܐ ܕܚܠܘ ܘܡܫܒܚܝܢ ܗܘܘ ܠܐܠܗܐ ܕܝܗܒ ܗܢܐ ܫܘܠܛܢܐ ܠܒ̈ܢܝ ܐܢܫܐ܀
09:09 ܘܫܢܝ ܡܢ ܬܡܢ ܘܟܕ ܥܒܪ ܡܪܢ ܚܙܐ ܓܒܪܐ ܚܕ ܕܝܬܒ ܒܝܬ ܡܟܣܐ ܕܫܡܗ ܡܬܝ ܘܐܡܪ ܠܗ ܬܐ ܒܬܪܝ ܘܩܡ ܐܙܠ ܒܬܪܗ
09:10 ܘܟܕ ܣܡܝܟܝܢ ܒܒܝܬܐ ܐܬܘ ܚܛܝܐ ܘܡܟܣܐ ܣܓܝܐܐ ܘܟܕ ܐܟܠܘ ܐܣܬܡܟܘ ܠܘܬ ܡܪܢ ܘܠܘܬ ܬܠܡܝܕܘܗܝ
09:11 ܗܝܕܝܢ ܟܕ ܚܙܝܢ ܦܪܝܫܐ ܐܡܪܝܢ ܠܬܠܡܝܕܘܗܝ ܠܡܢܐ ܥܡ ܡܟܣܐ ܘܚܛܝܐ ܐܟܠܝܢ ܐܢܬܘܢ ܘܫܬܝܢ
09:12 ܗܘ ܕܝܢ ܟܕ ܫܡܥ ܐܡܪ ܠܐ ܣܢܝܩܝܢ ܚܠܝܡܐ ܥܠ ܐܣܝܐ܂ ܐܠܐ ܐܝܠܝܢ ܕܒܝܫ ܒܝܫ ܥܒܝܕܝܢ
09:13 ܐܙܠܘ ܕܝܢ ܝܠܦܘ ܡܢܘ ܚܢܢܐ ܒܥܢܐ ܘܠܐ ܕܒܚܬܐ ܠܐ ܓܝܪ ܐܬܝܬ ܕܐܩܪܐ ܠܙܕܝܩܐ ܐܠܐ ܠܚܛܝܐ ܠܬܝܒܘܬܐ
09:14 ܗܝܕܝܢ ܐܬܘ ܬܠܡ̈ܝܕܘܗܝ ܕܝܘܚܢܢ ܘܐܡܪܝܢ ܡܢܘ ܕܐܢܚܢܢ ܘܦܪ̈ܝܫܐ ܨܝܡܝܢ ܐܢܚܢܢ ܚܦܝܛܝܐܝܬ܂ ܘܬܠܡ̈ܝܕܝܟ ܠܐ ܨܝܡܝܢ
09:15 ܐܡܪ ܠܗܘܢ ܡܪܢ ܠܐ ܡܫܟܚܝܢ ܒ̈ܢܘܗܝ ܕܓܢܘܢܐ ܠܡܛܪ ܐܒܠܐ ܟܡܐ ܕܚܬܢܐ ܥܡܗܘܢ ܢܐܬܘܢ ܕܝܢ ܝܘܡ̈ܬܐ ܕܢܬܥܠܐ ܡܢܗܘܢ ܚܬܢܐ ܘܗܝܕܝܢ ܢܨܘܡܘܢ܀
09:16 ܠܐ ܐܢܫ ܪܡܐ ܐܪܩܘܥܬܐ ܚܕܬܐ ܥܠ ܢܚܬܐ ܒܠܝܐ ܕܠܐ ܡܠܝܘܬܗ ܕܚܕܬܐ ܡܢܬܦܐ ܡܚܝܠܘܬܗ ܕܒܠܝܐ ܘܗܘܐ ܣܕܩܐ ܒܝܫ ܡܢ ܩܕܡܝܐ
09:17 ܘܐܦ ܠܐ ܪܡܝܢ ܚܡܪܐ ܚܕܬܐ܂ ܒܙܩ̈ܐ ܒܠܝ̈ܬܐ ܕܠܐ ܚܡܪܐ ܡܨܪܐ ܠܗܝܢ ܠܙܩ̈ܐ ܘܗܘ ܚܡܪܐ ܡܬܐܫܕ ܘܙܩ̈ܐ ܐܒܕܢ܂ ܐܠܐ ܪܡܝܢ ܚܡܪܐ ܚܕܬܐ ܒܙܩܐ ܚܕܬ̈ܬܐ ܘܬܪ̈ܝܗܘܢ ܡܬܢܛܪ̈ܝܢ܂
09:18 ܟܕ ܗܘ ܕܝܢ ܡܡܠܠ ܗܘܐ ܥܡܗܘܢ܂ ܘܗܐ ܪܒ ܟܢܘܫܬܗܘܢ ܚܕ ܐܬܐ ܢܦܠ ܗܘܐ ܣܓܕ ܠܗ ܘܐܡܪ ܒܪܬܝ ܗܫܐ ܡܝܬܬ ܐܠܐ ܣܝܡ ܐܝܕܟ ܘܬܚܐ܂
09:19 ܘܩܡ ܡܪܢ ܐܙܠ ܥܡܗ ܗܘ ܘܬܠܡ̈ܝܕܘܗܝ܂
09:20 ܘܗܐ ܐܢܬܬܐ ܕܪܕܐ ܗܘܐ ܕܡܗ ܫܢ̈ܝܢ ܬܪܬܥܣܪ̈ܐ ܘܐܬܬ ܘܩܪܒܬ ܠܟܢܦܐ ܕܡܪܛܘ̈ܛܐܗ
09:21 ܐܡܪܐ ܗܘܬ ܓܝܪ ܒܝܢܝܗ݀ ܘܠܢܦܫܗ݀܂ ܕܐܦܢ ܠܢܚ̈ܬܘܗܝ ܩܪܒܐ ܐܢܐ ܡܬܐܣܝܐ ܐܢܐ
09:22 ܗܘ ܕܝܢ ܐܬܦܢܝ ܠܗ ܘܐܡܪ ܠܗ ܠܐ ܬܕܚܠܝܢ ܒܪܬܝ ܗܝܡܢܘܬܟܝ ܐܚܝܬܟܝ ܘܡܢ ܗܝ ܫܥܬܐ ܐܬܚܠܡܬ ܐܢܬܬܐ ܗܝ܂
09:23 ܘܟܕ ܐܬܐ ܡܪܢ ܠܒܝܬܗ ܕܗܘ ܪܒ ܟܢܘܫܬܐ ܘܚܙܐ ܠܙܡܪܐ ܘܠܟܢܫܐ ܗܘ ܕܡܫܬܓܫܝܢ ܗܘܘ
09:24 ܐܡܪ ܠܗܘܢ ܫܢܘ ܠܗܠ ܛܠܝܬܐ ܓܝܪ ܠܐ ܡܝܬܬ ܐܠܐ ܡܕܡܟ ܗܘ ܕܡܟܐ ܗܢܘܢ ܕܝܢ ܓܚܟܝܢ ܗܘܘ ܥܠܘܗܝ܂
09:25 ܟܕ ܕܝܢ ܐܦܩܘܗܝ ܠܟܢܫܐ ܗܘ ܠܒܪ ܐܬܐ ܩܪܒ ܠܐܝܕܗ ܘܒܪ ܫܥܬܗ ܩܡܬ
09:26 ܘܢܦܩ ܛܒܐ ܗܢܐ ܒܟܠܗ ܐܪܥܗ ܗܝ
09:27 ܘܟܕ ܥܒܪ ܡܪܢ ܕܒܩܘܗܝ ܬܪܝܢ ܣܡܝܐ ܘܩܥܝܢ ܒܩܠܐ ܪܡܐ ܐܬܪܚܡ ܥܠܝܢ ܒܪܗ ܕܕܘܝܕ
09:28 ܘܟܕ ܐܬܐ ܠܒܝܬܐ ܩܪܒܘ ܠܗ ܗܢܘܢ ܣܡܝܐ ܐܡܪ ܠܗܘܢ ܡܗܝܡܢܝܢ ܐܢܬܘܢ ܕܡܫܟܚ ܐܢܐ ܕܐܥܒܕ ܗܕܐ܂ ܐܡܪ̈ܝܢ ܠܗ ܐܝܢ ܡܪܢ ܡܗܝܡܢܝܢ ܐܢܚܢܢ
09:29 ܗܝܕܝܢ ܩܪܒ ܠܥܝܢܝܗܘܢ ܘܐܡܪ ܐܝܟܢܐ ܕܗܝܡܢܬܘܢ ܢܗܘܐ ܠܟܘܢ
09:30 ܘܒܗ ܒܫܥܬܐ ܐܬܦܬܚ ܥܝܢܝܗܘܢ܂ ܘܟܐܐ ܒܗܘܢ ܡܪܢ ܘܐܡܪ ܠܗܘܢ ܗܐ ܚܙܘ ܕܠܡܐ ܠܐܢܫ ܐܡܪܝܢ ܐܢܬܘܢ
09:31 ܗܢܘܢ ܕܝܢ ܟܕ ܢܦܩܘ ܠܟܠ ܐܢܫ ܐܛܒܘ ܒܗ ܒܐܪܥܐ ܗܝ
09:32 ܘܡܢ ܒܬܪ ܕܢܦܩܘ ܩܪܒܘ ܠܗ ܚܪܫܐ ܚܕ ܕܪܟܝܒ ܠܗ ܫܐܕܐ
09:33 ܘܟܕ ܢܦܩ ܡܢܗ ܫܐܕܐ ܡܠܠ ܚܪܫܐ ܗܘ܂ ܘܡܬܕܡܪܝܢ ܗܘܘ ܟܢܫ̈ܐ ܘܐܡܪ̈ܝܢ ܕܠܐ ܡܡܬܘܡ ܐܬܚܙܝ ܗܟܢܐ ܒܝܬ ܐܝܣܪܐܝܠ܀
09:35 ܘܡܗܠܟ ܗܘܐ ܡܪܢ ܒܡܕܝܢ̈ܬܐ ܘܒܩܘܪܝܐ ܘܡܠܦ ܗܘܐ ܒܟܢܘܫܬܗܘܢ܂ ܘܡܟܪܙ ܗܘܐ ܣܒܪܬܐ ܕܡܠܟܘܬܐ܂ ܘܡܐܣܐ ܗܘܐ ܟܘܠ ܟܐܒ ܘܟܠ ܟܘܪܗܢ
09:36 ܟܕ ܚܙܐ ܕܝܢ ܟܢܫ̈ܐ ܐܬܪܚܡ ܥܠܝܗܘܢ ܕܠܐܝܢ ܗܘܘ ܫܪܝܢ ܐܝܟ ܥܢܐ ܕܠܝܬ ܠܗܘܢ ܪܥܝܐ
09:37 ܗܝܕܝܢ ܐܡܪ ܠܬ̈ܠܡܝܕܘܗܝ ܚܨܕܐ ܣܓܝ ܘܦܥܠܐ ܙܥܘܪܝܢ
09:38 ܒܥܘ ܗܟܝܠ ܡܢ ܡܪܗ ܕܚܨܕܐ ܕܢܦܩ ܦܥ̈ܠܐ ܠܚܨܕܗ

next chapter