The Comprehensive Aramaic Lexicon

14:01	ܘܟܕ ܥܠ ܠܒܝܬܐ ܕܚܕ ܡܢ ܪ̈ܫܐ ܕܦܪ̈ܝܫܐ܂ ܕܢܐܟܘܠ ܠܚܡܐ ܒܝܘܡܐ ܕܫܒܬܐ܂ ܘܢܛܪܝܢ ܗܘܘ ܕܢܚܙܘܢ ܡܢܐ ܥܒܕ܂
14:02	ܘܓܒܪܐ ܚܕ ܗܕܪܘܦܝܩܣ ܐܝܬ ܗܘܐ ܩܕܡܘܗܝ܂
14:03	ܥܢܐ ܝܫܘܥ ܘܐܡܪ ܠܣ̈ܦܪܐ ܘܠܦܪ̈ܝܫܐ܂ ܕܐܢ ܫܠܝܛ ܠܡܐܣܝܘ ܒܫܒܬܐ ܐܘ ܠܐ܂
14:04	ܘܗܢܘܢ ܫܬܝܩܝܢ ܗܘܘ܂ ܘܗܘ ܐܚܕܗ ܘܐܣܝܗ܂ ܘܫܪܝܗܝ܂
14:05	ܘܐܡܪ ܠܗܘܢ ܡܢܘ ܡܢܟܘܢ ܕܢܦܠ ܒܪܗ ܐܘ ܬܘܪܗ܂ ܐܘ ܚܡܪܗ ܒܒܪܐ ܒܝܘܡܐ ܕܫܒܬܐ܂ ܘܠܐ ܡܚܕܐ ܢܓܕ ܡܣܩ ܠܗ܂
14:06	ܘܠܐ ܐܫܟܚܘ ܠܡܬܠ ܠܗ ܦܬܓܡܐ ܥܠ ܗܠܝܢ܀
14:07	ܘܐܡܪ ܗܘܐ ܡܬܠܐ ܗܢܐ܂ ܠܘܬ ܗܢܘܢ ܕܡܙܡܢܝܢ ܗܘܘ܂ ܘܓܒܝܢ ܗܘܘ ܪܝܫ ܣ̈ܡܟܐ܂
14:08	ܐܡܪ ܠܗܘܢ ܐܡܬܝ ܕܡܙܕܡܢ ܐܢܬ ܠܡܫܬܘܬܐ܂ ܠܐ ܬܐܙܠ ܬܣܬܡܟ ܒܕܘܟܬܐ ܡܝܩܪܬܐ܂ ܕܠܐ ܢܗܘܐ ܬܡܢ ܡܢܘ ܕܡܝܩܪ ܡܢܟ܂
14:09	ܘܢܐܬܐ ܗܘ ܡܢ ܕܠܟ ܘܠܗ ܙܡܢ܂ ܘܢܐܡܪ ܠܟ ܕܗܒ ܕܘܟܬܐ ܠܗܢܐ܂ ܘܗܝܕܝܢ ܟܕ ܒܗܝܬ ܐܢܬ ܬܣܬܡܟ ܒܕܘܟܬܐ ܐܚܪܝܬܐ܂
14:10	ܐܠܐ ܡܐ ܕܐܙܕܡܢܬ܂ ܙܠ ܐܣܬܡܟ ܒܕܘܟܬܐ ܐܚܪܝܬܐ܂ ܕܡܐ ܕܐܬܐ ܗܘ ܡܢ ܕܙܡܢܟ܂ ܢܐܡܪ ܠܟ ܪܚܡܝ ܐܬܥܠܐ ܠܥܠ܂ ܘܬܗܘܐ ܠܟ ܬܫܒܘܚܬܐ ܒ̈ܥܝܢܝ ܣ̈ܡܝܟܐ ܟܠܗܘܢ܂
14:11	ܟܘܠ ܓܝܪ ܕܢܪܝܡ ܢܦܫܗ ܢܬܡܟܟ܂ ܘܟܠ ܕܢܡܟ ܢܦܫܗ ܢܬܪܝܡ܂
14:12	ܘܐܡܪ ܗܘܐ ܐܦ ܠܡܪܐ ܐܚܫܡܝܬܐ܂ ܡܐ ܕܥܒܕ ܐܢܬ ܫܪܘܬܐ ܐܘ ܐܚܫܡܝܬܐ܂ ܠܐ ܬܩܪܐ ܪ̈ܚܡܝܟ܂ ܘܐܦ ܠܐ ܠܐ̈ܚܝܟ܂ ܘܠܐ ܠܐܚ̈ܝܢܝܟ܂ ܘܠܐ ܠܫ̈ܒܒܝܟ ܐܝܠܝܢ ܕ̈ܥܬܝܪܐ ܐܢܘܢ܂ ܕܠܡܐ ܐܦ ܗܢܘܢ ܢܩܪܘܢܟ܂ ܘܢܗܘܐ ܠܟ ܦܘܪܥܢܐ܂
14:13	ܐܠܐ ܡܐ ܕܥܒܕ ܐܢܬ ܚܫܡܝܬܐ܂ ܩܪܝ ܠܡܣ̈ܟܢܐ ܘܠܥܘ̈ܝܪܐ ܠܚ̈ܓܝܣܐ ܘܠܡܟܐ̈ܒܐ܂
14:14	ܘܛܘܒܝܟ ܕܠܝܬ ܠܗܘܢ ܕܢܦܪܥܘܢܟ܂ ܘܢܗܘܐ ܦܘܪܥܢܟ ܒܩܝܡܐ ܕܙܕ̈ܝܩܐ܂
14:15	ܘܟܕ ܫܡܥ ܗܘܐ ܗܠܝܢ ܚܕ ܡܢ ܗܠܝܢ ܕܣܡܝܟܝܢ ܗܘܘ܂ ܐܡܪ ܠܗ ܛܘܒܘܗܝ ܠܡܢ ܕܢܐܟܘܠ ܫܪܘܬܐ ܒܡܠܟܘܬܗ ܕܐܠܗܐ܂
14:16	ܐܡܪ ܠܗ ܡܪܢ܂ ܓܒܪܐ ܚܕ ܥܒܕ ܗܘܐ ܐܚܫܡܝܬܐ ܪܒܬܐ܂ ܘܩܪܐ ܠܣ̈ܓܝܐ܂
14:17	ܘܫܕܪ ܥܒܕܗ ܒܥܕܢܐ ܕܣܡܟܐ ܕܢܐܡܪ ܠܗܢܘܢ ܕܡܙܡܢܝܢ ܕܢܐܬܘܢ܂ ܗܐ ܠܡ ܓܝܪ ܟܘܠ ܡܕܡ ܡܛܝܒ ܗܘ܂
14:18	ܘܫܪܝܘ ܗܘܘ ܡܚܕܐ ܠܡܫܬܐܠܘ܂ ܐܡܪ ܠܗ ܩܕܡܝܐ ܩܪܝܬܐ ܙܒܢܬ܂ ܘܐܠܝܨ ܐܢܐ ܕܐܦܘܩ ܐܚܙܝܗ܂ ܒܥܐ ܐܢܐ ܡܢܟ ܐܫܐܠܝܢܝ܂
14:19	ܘܐܚܪܢܐ ܐܡܪ ܚܡ̈ܫܐ ܙܘܓ̈ܝܢ ܬܘ̈ܪܐ ܙܒܢܬ܂ ܘܐܙܠ ܐܢܐ ܕܐܒܩܐ ܐܢܘܢ܂ ܒܥܐ ܐܢܐ ܡܢܟ ܐܫܐܠܝܢܝ܂
14:20	ܘܕܬܠܬܐ ܐܡܪ ܐܢܬܬܐ ܢܣܒܬ܂ ܠܐ ܡܫܟܚܢܐ ܕܐܬܐ܂
14:21	ܘܐܬܐ ܗܘ ܥܒܕܐ ܐܡܪ ܗܠܝܢ ܠܡܪܗ܂ ܗܝܕܝܢ ܪܓܙ ܡܪܐ ܒܝܬܐ܂ ܘܐܡܪ ܠܥܒܕܗ܂ ܦܘܩ ܒܥܓܠ ܠܫܘܩ̈ܐ ܘܠܫܩ̈ܩܐ ܕܡܕܝܢܬܐ܂ ܘܐܥܠ ܠܟܐ ܠܡ̈ܣܟܢܐ ܘܠܡ̈ܚܓܪܐ܂ ܘܠܡ̈ܟܐܒܐ ܘܠܡ̈ܥܘܪܐ܂
14:22	ܘܐܡܪ ܥܒܕܐ ܡܪܝ ܗܐ ܗܘܐ ܡܕܡ ܕܦܩܕܬ܂ ܘܬܘܒ ܐܝܬ ܐܬܪܐ ܒܣܡܟܐ܂
14:23	ܐܡܪ ܡܪܐ ܠܥܒܕܗ ܦܘܩ ܠܐܘܪ̈ܚܬܐ ܘܠܒܝܬ ܣܝ̈ܓܐ܂ ܘܥܒܕ ܕܢܥܠܘܢ ܕܢܬܡܠܐ ܒܝܬܝ܂
14:24	ܐܡܪ ܐܢܐ ܠܟܘܢ ܓܝܪ ܕܚܕ ܡܢ ܗܠܝܢ ܐܢܫܐ ܕܩܪܝܢ ܗܘܘ ܠܐ ܢܛܥܡܘܢ ܐܚܫܡܝܬܝ܀
14:25	ܘܟܕ ܐܙܠܝܢ ܗܘܘ ܥܡܗ ܟܢ̈ܫܐ܂ ܐܬܗܦܟ ܐܡܪ ܠܗܘܢ܂
14:26	ܡܢ ܕܐܬܐ ܠܘܬܝ ܘܠܐ ܣܢܐ ܠܐܒܘܗܝ ܘܠܐܡܗ܂ ܘܠܐ̈ܚܘܗܝ ܘܠܐ̈ܚܘܬܗ܂ ܘܠܐܢܬܬܗ ܘܠܒ̈ܢܘܗܝ܂ ܐܦ ܠܢܦܫܗ܂ ܬܠܡܝܕܐ ܠܐ ܡܫܟܚ ܕܢܗܘܐ ܠܝ܂
14:27	ܘܡܢ ܕܠܐ ܫܩܠ ܨܠܝܒܗ ܘܐܬܐ ܒܬܪܝ ܬܠܡܝܕܐ ܠܐ ܡܫܟܚ ܕܢܗܘܐ ܠܝ܂

14:28	ܡܢܘ ܓܝܪ ܡܢܟܘܢ ܕܨܒܐ ܕܢܒܢܐ ܡܓܕܠܐ܂ ܘܠܐ ܠܘܩܕܡ ܝܬܒ ܡܬܚܫܒ ܢܦܩ̈ܬܗ܂ ܕܐܢܗܘ ܕܐܝܬ ܠܗ ܠܡܫܠܡܘܬܗ܂

14:29	ܕܠܐ ܐܢ ܢܣܝܡ ܫܬܐܣܬܐ ܘܠܐ ܐܫܟܚ ܕܢܫܠܡ܂ ܟܠ ܕܚܙܝܢ ܢܗܘܘܢ ܡܒܙܚܝܢ ܒܗ
14:30	ܘܐܡܪܝܢ܂ ܗܢܐ ܓܒܪܐ ܫܪܝ ܕܢܒܢܐ ܡܓܕܠܐ܂ ܘܠܐ ܐܫܟܚ ܕܢܫܠܡ܂
14:31	ܐܘ ܡܢܘ ܡܠܟܐ ܕܐܙܠ ܠܡܬܟܬܫܘ ܥܡ ܡܠܟܐ ܐܚܪܢܐ܂ ܘܠܐ ܠܘܩܕܡ ܡܬܪܥܐ܂ ܕܐܢ ܡܫܟܚ ܒ̈ܥܣܪܐ ܐ̈ܠܦܝܢ ܠܡܐܪܥ ܠܗܘ ܕܐܬܐ ܥܠܘܗܝ ܒ̈ܥܣܪܝܢ ܐ̈ܠܦܝܢ܂
14:32	ܘܐܠܐ ܥܕ ܪܚܝܩ ܡܢ ܒܝܬ ܩܪܣܐ܂ ܡܫܕܪ ܐܝ̈ܙܓܕܐ ܘܒܥܐ ܡܢܗ ܥܠ ܫܠܡܐ܂
14:33	ܗܟܢܐ ܟܠ ܐܢܫ ܡܢܟܘܢ ܕܠܐ ܫܒܩ ܟܘܠܗ ܩܢܝܢܗ܂ ܬܠܡܝܕܝ ܠܐ ܡܫܟܚ ܕܢܗܘܐ܂
14:34	ܫܦܝܪܐ ܗܝ ܡܠܚܐ܂ ܐܢ ܕܝܢ ܡܠܚܐ ܬܦܟܗ ܒܡܢܐ ܬܬܡܠܚ܂
14:35	ܠܐ ܠܐܪܥܐ ܐܙܠܐ ܐܦܠܐ ܠܙܒܠܐ܂ ܐܠܐ ܠܒܪ ܡܫܬܕܝܐ܂ ܡܢ ܕܐܝܬ ܠܗ ܐ̈ܕܢܐ ܕܢܫܡܥ ܢܫܡܥ܀