← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

60805: Proba's Prior Analytics

Click on a word for lexical analysis
Click on a red-colored coordinate for comments and/or translations of the line

▲ earlier lines

138:06 ܡܕܡ ܐܚܪܢܐ ܓܕܫ ܒܗ݀ܝ ܕܗܠܝܢ ܐܝܬܝܗܝܢ ܂ ܗ݀ܝ ܕܡܕܡ ܐܚܪܢܐ ܐܡ݁ܪ ܕܢܦܪܫܝܘܗܝ ܡ݂ܢ
138:07 ܣܘܢܠܘܓܝܣܡܘܣ ܕܗ̈ܢܝܢ ܟܕ ܗ̈ܢܝܢ ܡܝܬܐ ܂ ܕܐܝܟ ܐܝܟܢ ܐܢ ܫܡܫܐ ܠܥܠ ܡܢ ܐܪܥܐ ܐܝܬܘܗܝ
138:08 ܐܝܡܡܐ ܐܝܬܘܗܝ ܂ ܘܐܢ ܐܝܡܡܐ ܗ݂ܘ ܫܡܫܐ ܠܥܠ ܡ݂ܢ ܐܪܥܐ ܐܝܬܘܗܝ ܂ ܕܬܪ̈ܬܝܢ ܕܝܢ
138:09 ܕܦܪ̈ܘܛܐܣܝܣ ܐܝܟ ܗܘܠܐ ܐܝܬܝܗܝܢ ܂ ܣܘܡܦܗܪܣܡܐ ܕܝܢ ܐܝܟ ܐܕܫܐ ܂ ܕܬܠܬ ܕܦܪ̈ܘܛܐܣܝܣ
138:10 ܡܛܠ ܐܚܪܢܐ ܐܝܬܝܗܝܢ ܂ ܣܘܡܦܗܪܣܡܐ ܕܝܢ ܗܘ ܡܛܠܬܗ ܂ ܡܛܠ ܓܝܪ ܣܘܡܦܗܪܣܡܐ ܡܫܬܩ̈ܠܢ
138:11 ܦܪ̈ܘܛܐܣܝܣ ܂ ܕܐܪܒܥ ܕܦܪ̈ܘܛܣܝܣ ܡܬܬܘܕܝ̈ܢܝܬܐ ܐܝܬܝܗܝܢ ܂ ܣܘܡܦܗܪܣܡܐ ܕܝܢ ܡܬܒܥܝܢܐ ܂
138:12 ܐܚܪܢܐ ܡܕܡ ܡ݂ܢ ܐܢܐܢܩܐ ܓܕ݁ܫ ܂ ܙ݁ܕܩ ܠܡܕܥ ܕܟܠܡܕܡ ܕܡܬܚܘܐ ܐܘܡ݂ܢ ܢܩܝܦܘܬܐ ܡܬܚܘܐ ܂
138:13 ܗܢܘ ܕܝܢ ܡ݂ܢ ܩܢܘܢܐ ܂ ܐܘܡ݂ܢ ܟܝܢܐ ܕܣܘܥܪ̈ܢܐ ܂ ܐܘܡ݂ܢ ܬܪ̈ܬܝܗܝܢ ܐܟܚܕܐ ܂ ܕܐܝܟ ܐܝܟܢ ܇ ܟܠ
138:14 ܒܪܢܫܐ ܟܐܦܐ ܐܝܬܘܗܝ ܂ ܟܠ ܟܐܦܐ ܐܘܣܝܐ ܐܝܬܝܗ݀ ܂ ܟܠ ܒܪܢܫܐ ܐܘܣܝܐ ܐܝܬܘܗܝ ܂ ܗܕܐ
138:15 ܒܝܕ ܩܢܘܢܐ ܐܬܚܘܝܬ ܂ ܗ݀ܘ ܕܐܡ݁ܪ ܕܡ݂ܢ ܬܪ̈ܬܝܢ ܩܐܛܐܦܐܣܝ̈ܣ ܟܠܢܝ̈ܬܐ ܩܛܦܐܣܝܣ ܟܠܢܝܬܐ
138:16 ܡܬܟܢܫܐ ܂ ܐܝܟ ܟܝܢܐ ܕܝܢ ܕܣܘܥܪ̈ܢܐ ܠܐ ܡܬܟܢܫ ܡܛܠ ܕܓܠܘܬܐ ܕܒܗ ܂ ܡ݂ܢ ܟܝܢܐ ܕܝܢ ܕܣܘܥܪ̈ܢܐ
138:17 ܡܬܟܢܫ ܐܟܙܢܐ ܕܣܘܩܪܐܛܝܣ ܡܠܝܠܐ ܐܝܬܘܗܝ ܂ ܡܕܡ ܡܠܝܐ ܡܝܘܬܐ ܂ ܣܘܩܪܐܛܝܣ ܐܪܐ
138:18 ܡܝܘܬܐ ܐܝܬܘܗܝ ܂ ܡ݂ܢ ܟܝܢܐ ܕܝܢ ܕܣܘܥܪ̈ܢܐ ܗܕܐ ܐܡ݁ܪܝܢܢ ܕܐܬܚܘܝܬ ܂ ܘܠܘܡ݂ܢ ܩܢܘܢܐ ܂ ܡܛܠ
138:19 ܕܫܪܝܪ̈ܢ ܡ݁ܢ ‍>‍݁݁݁‍<‍ ܡܢܬܝ̈ܬܐ ܕܝܢ ܒܠܚܘܕ ܠܐ ܗܘܐ ܟܘܢܫܐ ܕܡ݂ܢ ܐܢܐܢܩܐ ܐܝܟ ܕܥܬܝܕܝܢܢ ܕܢܐܠܦ ܂
138:20 ܒܝܕ ܬܪ̈ܬܝܗܝܢ ܕܝܢ ܐܟܚܕܐ ܂ ܐܟܙܢܐ ܕܟܠ ܒܪܢܫܐ ܚܝܘܬܐ ܐܝܬܘܗܝ ܂ ܟܠ ܕܝܢ ܚܝܘܬܐ ܐܘܣܝܐ
138:21 ܐܝܬܝܗ݀ ܂ ܟܠ ܒܪܢܫܐ ܐܪܐ ܐܘܣܝܐ ܐܝܬܘܗܝ ܂ ܗܪܟܐ ܘܬܚܘܡܐ ܕܩܢܘܢܐ ܢܛܝܪ ܘܟܝܢܐ ܕܣܘܥܪ̈ܢܐ
138:22 ܗܟܢܐ ܐܝܬ ܠܗ ܂
138:23 ܕܬܪ̈ܬܝܢ ܕܝܢ ܕܟܠ ܐܦܘܕܝܟܣܝܣ ܕܗܘܝܐ ܐܘܡ݂ܢ ܟܠܢܝ̈ܬܐ ܕܫܘܝ̈ܢ ܗܘܝܐ ܂ ܐܘܡ݂ܢ ܗܠܝܢ ܕܝܬܝܪ
138:24 ܟܠܢܝ̈ܢ ܂ ܡ݂ܢ ܗܠܝܢ ܕܝܢ ܕܒܨܝܪ̈ܢ ܠܐ ܗܘܝܐ ܂ ܘܡ݂ܢ ܗܠܝܢ ܡ݁ܢ ܕܫܘܝ̈ܢ ܗܘܝܐ ܂ ܐܟܙܢܐ ܕܟܠ ܒܪܢܫܐ
138:25 ܓܚܘܟܐ ܐܝܬܘܗܝ ܂ ܟܠ ܓܚܘܟܐ ܕܝܢ ܡܩܒܠܢܐ ܕܗܘܢܐ ܘܕܝܕܥܬܐ ܐܝܬܘܗܝ ܂ ܟܠ ܒܪܢܫܐ ܐܪܐ
138:26 ܡܩܒܠܢܐ ܕܗܘܢܐ ܘܕܝܕܥܬܐ ܐܝܬܘܗܝ ܂ ܡ݂ܢ ܗܠܝܢ ܕܝܢ ܕܝܬܝܪ ܟܠܢܝܐ ܗܘܝܐ ܂ ܟܠ ܒܪܢܫܐ ܚܝܘܬܐ
138:27 ܐܝܬܘܗܝ ܂ ܟܠ ܕܝܢ ܚܝܘܬܐ ܐܘܣܝܐ ܐܝܬܝܗ݀ ܂ ܟܠ ܒܪܢܫܐ ܡܕܝܢ ܐܘܣܝܐ ܐܝܬܘܗܝ ܂
138:28 ܐܢܕܝܢ ܒ݁ܥܐ ܐܢܫ ܕܢܚܘܐ ܡ݂ܢ ܡܢܬܝܬܐ ܡܢܬܝܬܐ ܂ ܐܟܙܢܐ ܕܦܠܢ ܕܗܠܟ ܒܠܠܝܐ ܓܢܒܐ
138:29 ܐܫܬܟܚ ܂ ܘܡܕܝܢ ܘܐܢܬ ܕܗܠܟܬ ܒܠܠܝܐ ܓܢܒܐ ܐܝܬܝܟ ܂ ܗܕܐ ܠܘ ܐܦܘܕܝܟܣܝܣ ܐܝܬܝܗ݀ ܂
138:30 ܐܠܐ ܬܚܘܝܬܐ ܡܬܐܡܪܐ ܂
138:31 ܘܬܘܒ ܐܢ ܟܘܠܢܝܬܐ ܡ݂ܢ ܡܢܬ̈ܝܬܐ ܐܢܫ ܢܚܘܐ ܂ ܐܟܙܢܐ ܕܡܛܠ ܦܝܬܘܓܘܪܘܣ ܦܝܠܣܘܦܐ
138:32 ܘܣܘܩܪܐܛܝܣ ܦܝܠܣܘܦܐ ܘܦܠܢ ܘܦܠܢ ܦܝܠܣܘ̈ܦܐ ܐܬܩܛܠܘ ܂ ܟܠܗܘܢ ܦܝܠܣܘ̈ܦܐ ܡܬܩܛܠܝܢ ܂ ܐܘ
138:33 ܡܛܠ ܕܬܘܪܐ ܘܚܡܪܐ ܘܓܡܠܐ ܂ ܡܐ ܕܐܟܠܝܢ ܦܟܝ̈ܗܘܢ ܬܚ̈ܬܝܐ ܡܙܝܥܝܢ ܂ ܟܠ ܚܝܘܬܐ ܡܕܝܢ
138:34 ܡܐ ܕܐܟܠܐ ܦܟܗ ܬܚܬܝܐ ܡܙܝܥܐ ܂ ܗ݀ܝ ܕܕܐܝܟ ܗܕܐ ܐܦܓܘܓܐ ܡܬܐܡܪܐ ܂ ܘܠܘ ܚܘܘܝܐ ܂
138:35 ܒܝܕ ܕܗܠܝܢ ܐܝܬܝܗܝܢ ܐ݁ܡܪ ܂ ܕܠܐ ܙ݁ܕܩ ܕܢܗܘܐ ܣܘܡܦܗܪܣܡܐ ܕܢܣܬܢܩ ܥܠ ܬܚܘܡܐ ܣܛܪ ܡ݂ܢ
138:36 ܗܠܝܢ ܕܣܝ̈ܡܢ ܂ ܕܐܝܟ ܐܝܟܢ ܟܠ ܒܪܢܫܐ ܡܠܝܐ ܂ ܟܠ ܡܠܝܠܐ ܚܝܘܬܐ ܂ ܡܕܝܢ ܟܠ ܒܪܢܫܐ ܚܝܘܬܐ ܂
138:37 ܐܢܕܝܢ ܬܐܡܪ ܇ ܟܠ ܒܪܢܫܐ ܡܠܝܠܐ ܂ ܟܠ ܡܠܝܠܐ ܚܝܘܬܐ ܂ ܟܠ ܒܪܢܫܐ ܐܪܐ ܐܘܣܝܐ ܂ ܗܕܐ ܠܘ
138:38 ܒܝܕ ܗܠܝܢ ܕܐܬܬܣܝܡܘ ܡܬܟܢܫܐ ܂ ܐܠܐ ܣܢܝܩ ܥܠ ܬܚܘܡܐ ܐܚܪܢܐ ܕܢܫܬܩܠ ܒܦܪܘܛܐܣܝܣ
138:39 ܘܗܟܢܐ ܗܘ݁ܐ ܟܘܢܫܐ ܂