The Comprehensive Aramaic Lexicon

04:01	ܘܡܘܪܕܟ݂ܝ ܝܕܥ ܟܠܡܕܡ ܕܐܬ݂ܥܒܕ ܘܨܪܝ ܡܘܪܕܟܝ ܠܒܘ̈ܫܘܗܝ ܘܐܬܟ݂ܒܢ ܣܩܐ ܘܐܬ݂ܬܦܝܠ ܒܩܛܡܐ܂ ܘܢܦܩ ܡܝܠܠ ܒܓܘ ܡܕܝܢܬܐ ܝܠܠܬܐ ܪܒܬܐ ܘܡܪܝܪܬܐ܂
04:02	ܘܐܬ݂ܐ ܥܕܡܐ ܠܬܪܥܐ ܕܡܠܟܐ܂ ܘܠܝܬ ܗܘܐ ܢܡܘܣܐ ܕܐܢܫ ܢܠܒܫ ܣܩܐ ܘܢ݂ܐܬ݂ܐ ܠܬܪܥܐ ܕܡܠܟܐ܂
04:03	ܘܒܟ݂ܠ ܡܕܝܢܐ ܟܕ ܕܡܛܝ ܦܬܓܡܐ ܕܡܠܟܐ ܗܘܐ ܐܒܠܐ ܪܒܐ ܠܝܘܕ̈ܝܐ܂ ܘܨܘܡܐ ܘܒܟ݂ܬܐ܂ ܘܡܪ̈ܩܕܬ݂ܐ ܘܣܩܐ ܘܩܛܡܐ ܡܟ݁ܟ ܠܣ̈ܓܝܐܐ܂

04:04	ܘܥܠ݂ܘ ܡܗܝܡ̈ܢܝܗ݀ ܕܝܠܗ݀ ܕܐܣܬܝܪ ܘܚܘܝܘܗ݀܂ ܘܐܬܬܙܝܥܬ ܡܠܟܬܐ ܛܒ܂ ܘܫܕܪܬ ܡ̈ܐܢܐ ܠܡܠܒܫܘܬܗ ܠܡܘܪܕܟܝ܂ ܘܠܡܫܠܚܘ ܣܩܐ ܡܢܗ ܘܠܐ ܩܒܠ܂

04:05	ܘܩܪܬ ܐܣܬܝܪ ܠܗܬܢ ܡܗܝܡܢܐ ܡ݂ܢ ܡܗ̈ܝܡܢܐ ܕܡܠܟ݁ܐ܂ ܕܩܐܡ ܩܕܡܝܗ݀܂ ܘܦܩܕܬܗ ܠܘܬ ܡܘܪܕܟܝ܃ ܕܬܕܥ ܕܡܢܐܗܝ ܗܕܐ ܘܥܠ ܡܢܐ܂
04:06	ܘܢܦ݂ܩ ܗܬܢ ܠܘܬ ܡܘܪܕܟܝ ܠܫܘ̈ܩܐ ܕܡܕܝܢܬܐ܂ ܩܕܡ ܬܪܥܐ ܕܡܠܟܐ܂
04:07	ܘܚܘܝܗ ܡܘܪܕܟ݂ܝ ܟܠܡܕܡ ܕܓܕܫ ܠܗ܂ ܘܚܘܫܒܢܐ ܕܟ݂ܣܦܐ ܕܐܡ݂ܪ ܗܡܢ ܠܡܬܩܠ܂ ܠܡܥܠܘ ܠܒܝܬܓܙܐ ܥܠ ܝܘܕ̈ܝܐ ܕܢܐܒܕܘܢ܂
04:08	ܘܦܪܫܓܢܐ ܕܣܝ݂ܡ ܒܫܘܫܢ ܒܝܪܬܐ ܝܗܒ݂ܗ ܠܗ ܕܢܚܘܐ ܠܐܣܬܝܪ܂ ܘܢܦܩܕܝܗ݀ ܕܬܥܘܠ ܠܘܬ ܡܠܟܐ ܘܬܒܥܐ ܡܢܗ܃ ܘܬ݂ܬ݂ܟ݁ܫܦܝ ܠܗ ܥܠ ܥܡܐ܂
04:09	ܘܥ݂ܠ ܗܬܢ ܘܐܡ݂ܪ ܠܐܣܬܝܪ ܡܠܘ̈ܗܝ ܕܡܘܪܕܟ݂ܝ܂
04:10	ܘܐܡܪܬ ܐܣܬܝܪ ܠܗܬ݂ܢ܂ ܘܦܩܕܬ݁ܗ ܠܘܬ ܡܘܪܕܟ݂ܝ ܠܡ݂ܐܡܪ܂
04:11	ܟܠܗܘܢ ܥܒܕ̈ܐ ܕܡܠܟܐ ܝ݁ܕܥܝܢ܂ ܕܟ݂ܠ ܓܒܪܐ ܐܘ݁ ܐܢܬ݁ܬ݂ܐ ܕܥ݁ܐܠ ܩܕܡ ܡܠܟܐ ܠܕܪܬܐ ܓ݁ܘܝܬܐ ܐܝܢܐ ܕܠܐ ܡܬܦܩܕ ܚܕܐܗܝ ܐܬܐ ܕܐܬܐ ܠܡܬܩܛܠܘ܂ ܠܒ݂ܪ ܡ݂ܢ ܡ݁ܢ ܕܡܘܫܛ ܠܗ ܡܠܟܐ ܫܒܛܐ ܕܕܗܒܐ ܘܚ݁ܝܐ܂ ܘܐܢ݁ܐ ܠܐ ܐܬܩ݁ܪܝܬ ܠܡܥ݂ܠ ܩܕܡ ܡܠܟܐ ܗܐ ܬܠ̈ܬܐ ܝܘܡ̈ܝܢ
04:12	ܘܚܘܝ ܠܡܘܪܕܟܝ ܡܠ̈ܝܗ݀ ܕܐܣܬܝܪ܂
04:13	ܘܐܡܪ ܡܘܪܕܟܝ ܐܡܪ ܠܗ݂ ܠܐܣܬܝܪ܂ ܠܐ ܬܣܒܪܝ ܒܢܦܫܟ݂ܝ܃ ܕܟܕ ܒܝܬ ܡܠܟܐ ܐܢܬ݁ܝ܃ ܡܬ݂ܦ݁ܠܛܐ ܐܢܬܝ ܡ݂ܢ ܟܠܗܘܢ ܝܘܕ̈ܝܐ܃
04:14	ܐܢ ܬܫܬܩܝܢ ܒܙܒܢܐ ܗܢܐ܂ ܪܘܚܬܐ ܘܦܘܪܩܢܐ ܗ݀ܘܐ ܠܝܘܕ̈ܝܐ ܡ݂ܢ ܕܘܟܐ ܐܚܪܢܐ ܘܐܢܬ݁ܝ ܘܒܝܬ ܐܒܘܟܝ ܐܒ݁ܕ ܐܢܬ݁ܝ܂ ܘܡ݁ܢܘ ܝ݁ܕܥ܃ ܐܢ ܡܛܠܗܢܐ ܙܒܢܐ ܐܬܩܪܝܬܝ ܘܐܬܩܪܒܬܝ ܠܡܠܟܘܬܐ܂
04:15	ܘܐܡܪܬ ܐܣܬܝܪ ܐܡ݂ܪ ܠܡܘܪܕܟ݂ܝ܂
04:16	ܙܠ ܟܢܫ ܠܟܠܗܘܢ ܝܘܕ̈ܝܐ ܕܐܝܬ݁ ܒܫܘܫܢ ܒܝܪܬܐ܂ ܘܨܘ݂ܡܘ ܥܠܝ܂ ܘܠܐ ܬܐܟ݂ܠܘܢ ܘܠܐ ܬܫܬ݂ܘܢ ܬܠ̈ܬܐ ܝܘܡܝܢ ܠܠܝܐ ܘܐܝܡܡܐ܂ ܘܐܦ ܐܢ݁ܐ ܘܥܠܝ̈ܡܬܝ ܐܨ݁ܘܡ ܗܟ݂ܢܐ܂ ܗܝܕܝܢ ܐܥܘ݁ܠ ܩܕܡ ܡܠܟܐ ܕܠܐ ܒܢܡܘܣܝ܂ ܘܐܢ ܥܒ݁ܕܬ ܥܒ݁ܕܬ݂܂
04:17	ܘܐܙ݂ܠ ܡܘܪܕܟܝ ܘܥ݂ܒܕ ܟܠܡܕܡ ܕܫܠܚܬ ܠܗ ܐܣܬܝ݂ܪ܃