The Comprehensive Aramaic Lexicon

12:01	ܘܦܩܕ ܕܢܫܘܘܢ ܠܗ܂ ܘܕܢܬܠܘܢ ܠܗ ܡܢ ܚܫܡܝܬܗ܂ ܘܡܢ ܚܡܪܐ ܕܡܫܬܝܗ܂
12:02	ܘܐܡܪܬ ܝܗܘܕܝܬ܂ ܠܐ ܐܟܠܐ ܐܢܐ ܡܢܗ ܕܠܡܐ ܢܗܘܐ ܠܝ ܠܬܘܩܠܬܐ܂ ܐܠܐ ܣܦܩ ܠܝ ܡܐ ܕܐܬܐ ܥܡܝ܂
12:03	ܐܡܪ ܠܗ ܐܠܦܪܢܐ܂ ܘܐܢ ܢܓܡܪ ܠܗ ܡܢ ܐܝܡܟܐ ܠܢ ܠܡܬܠ ܠܟܝ ܐܟܘܬܗ܂ ܡܛܠ ܕܠܝܬ ܥܡܢ ܓܒܪܐ ܡܢ ܥܡܟܝ܂ ܕܐܝܬ ܠܗ ܐܟܘܬܗ܂
12:04	ܘܐܡܪܬ ܝܗܘܕܝܬ܂ ܚܝܐ ܗܝ ܢܦܫܟ ܡܪܝ܂ ܕܠܐ ܬܓܡܪ ܐܡܬܟ ܡܕܡ ܕܐܬܐ ܥܡܗ ܃ ܂ ܥܕܡܐ ܕܢܥܒܕ ܐܠܗܐ ܒܐܝ̈ܕܝ ܡܕܡ ܕܐܬܪܥܝܬ܂
12:05	ܘܐܥܠܘܗ ܥܒܕ̈ܘܗܝ ܕܐܠܦܪܢܐ ܠܡܫܟܢܐ܂ ܘܕܡܟܬ ܥܕܡܐ ܠܦܠܓܗ ܕܠܠܝܐ܂ ܘܩܡܬ ܒܡܛܪܬܐ ܕܨܦܪܐ
12:06	ܘܫܕܪܬ ܠܘܬ ܐܠܦܪܢܐ ܘܐܡܪܬ ܠܗ܂ ܢܦܩܘܕ ܡܪܝ ܘܢܫܒܩܘܢܗ ܠܐܡܬܟ ܠܡܦܩ ܠܨܠܘܬܐ܂
12:07	ܘܦܩܕ ܐܠܦܪܢܐ ܠܢܛܘܪ̈ܐ ܕܠܐ ܢܟܠܘܢܗ܂ ܘܟܬܪܬ ܒܡܫܪܝܬܐ ܬܠܬܐ ܝܘܡ̈ܝܢ܂ ܘܢܦܩܐ ܗܘܬ ܠܢܚܠܐ ܕܒܝܬ ܦܠܘ ܒܠܝܠܘ̈ܬܐ܂ ܘܥܡܕܐ ܗܘܬ ܒܥܝܢܐ ܕܡܝ̈ܐ܂
12:08	ܘܡܐ ܕܣܠܩܐ ܗܘܬ ܒܥܝܐ ܗܘܬ ܡܢ ܐܠܗܐ ܕܐܝܣܪܠ܂ ܕܢܬܪܘܨ ܐܘܪܚܗ ܠܩܝܡܬܐ ܕܥܡܗ܂
12:09	ܘܡܐ ܕܥܐܠܐ ܗܘܬ ܡܟܬܪܐ ܗܘܬ ܒܕܟܝܘܬܐ ܒܓܘ ܡܫܟܢܐ ܥܕܡܐ ܕܢܣܒܐ ܗܘܬ ܡܐܟܘܠܬܐ ܒܪܡܫܐ܂
12:10	ܘܗܘܐ ܒܝܘܡܐ ܕܐܪܒܥܐ܂ ܘܥܒܕ ܐܠܦܪܢܐ ܡܫܬܝܐ ܠܥܒ̈ܕܘܗܝ ܒܠܚܘܕ܂ ܘܠܐܢܫ ܡܢ ܦܠܚ̈ܐ ܘܡܢ ‍{‍ܘ‍}‍ܩܝܘܡ̈ܐ ܠܐ ܩܪܐ܂
12:11	ܘܐܡܪ ܠܒܘܓܐ ܡܗܝܡܢܐ ܕܩܐܡ ܗܘܐ ܥܠ ܟܠ ܕܐܝܬ ܠܗ܂ ܙܠ ܢܐ ܐܦܝܣ ܠܐܢܬܬܐ ܗܝ܂ ܥܒܪܝܬܐ ܕܥܡܟ ܬܐܬܐ ܠܘܬܢ܂ ܘܬܠܥܣ ܘܬܫܬܐ ܥܡܢ܂
12:12	ܡܛܠ ܕܒܗܬܬܐ ܗܝ ܠܢ ܠܡܫܒܩ ܐܢܬܬܐ ܐܝܟ ܗܕܐ܂ ܘܠܐ ܢܡܠܠ ܥܡܗ܂ ܡܛܠ ܕܐܠܐ ܢܩܦܗ/ܢܦܩܗ#1#/ ܬܓܚܟ ܥܠܝܢ܂
12:13	ܘܢܦܩ ܒܘܓܐ ܡܢ ܩܕܡ ܐܠܦܪܢܐ܂ ܘܥܠ ܠܘܬܗ ܘܐܡܪ܂ ܠܐ ܬܬܟܠܐ ܥܠܝܡܬܐ ܫܦܝܪܬܐ܂ ܠܡܐܬܐ ܩܕܡ ܡܪܝ܂ ܘܠܡܫܬܒܚܘ ܩܕܡ ܐܦܘ̈ܗܝ܂ ܘܬܫܬܝܢ ܥܡܢ ܚܡܪܐ ܘܬܬܒܣܡܝܢ܂ ܬܗܘܝܢ ܝܘܡܢܐ ܡܝܩܪܐ܂ ܐܝܟ ܚܕܐ ܡܢ ܒܢ̈ܬ ܪ̈ܘܪܒܢܐ ܕܐܬܘܪ ܕܩܝܡܝܢ ܒܒܝܬܗ ܕܢܒܘܟܕܢܨܪ܂
12:14	ܘܐܡܪܬ ܠܗ ܝܗܘܕܝܬ܂ ܡܢ ܐܢܐ ܕܐܡܪ ܕܠܐ ܥܠ ܡܪܝ܂ ܡܛܠ ܕܟܘܠ ܕܫܦܝܪ ܒܥ̈ܝܢܘܗܝ ܚܦܝܛܐܝܬ ܐܥܒܕ܂ ܘܢܗܘܐ ܠܝ ܗܢܐ ܫܘܒܗܪܐ ܥܕܡܐ ܠܝܘܡܐ ܕܡܘܬܝ܂ ܂
12:15	ܘܩܡܬ ܘܐܨܛܒܬܬ ܒܡܢ̈ܝܗ܂ ܘܒܟܠ ܬܨ̈ܒܝܬܗ ܕܢܫ̈ܐ܂ ܘܥܠܬ ܐܡܬܗ ܘܫܘܝܬ ܠܗ ܩܕܡ ܐܠܦܪܢܐ ܥܠ ܐܪܥܐ܂ ܫ̈ܠܚܐ ܕܐܡܪ̈ܐ ܘܢܣܒܬ ܡܢ ܒܘܓܐ ܠܡܕܡܟ ܥܠܝܗܘܢ ܃ ܕܬܬܒ ܥܠܝܗܘܢ ܠܡܠܥܣ܂
12:16	ܘܥܠܬ ܘܝܬܒܬ ܝܗܘܕܝܬ܂ ܘܐܬܙܝܥ ܠܒܗ ܕܐܠܦܪܢܐ ܥܠܝܗ܂ ܘܐܬܛܪܦܬ ܢܦܫܗ܂ ܡܛܠ ܕܐܬܪܓܪܓ ܛܒ ܠܡܗܘܐ ܥܡܗ܂ ܘܒܥܐ ܗܘܐ ܠܗ ܥܕܢܐ ܕܢܕܥܝܗ ܡܢ ܝܘܡܐ ܕܚܙܗ܂
12:17	ܘܐܡܪ ܠܗ ܐܠܦܪܢܐ܂ ܐܫܬܝ ܘܚܕܝ ܥܡܢ܂

12:18	ܘܐܡܪܐ ܝܗܘܕܝܬ܂ ܐܫܬܐ ܡܪ̈ܝ܂ ܡܛܠ ܕܝܪܒܘ ܥܠܝ ܚܝ̈ܝ ܝܘܡܢܐ܂ ܛܒ ܡܢ ܟܠܗܘܢ ܝܘܡܬ̈ܐ ܕܗܘܝܬ ܒܗܘܢ ܃

12:19	ܘܢܣܒܬ ܘܐܟܠܬ ܩܕܡܘܗܝ ܡܕܡ ܕܬܩܢܬ ܠܗ ܐܡܬܗ܂
12:20	ܘܚܕܝ ܐܠܦܪܢܐ ܠܩܘܒܠܗ܂ ܘܐܫܬܝ ܚܡܪܐ ܣܘܓܐܐ܂ ܕܠܐ ܫܬܐ ܠܗ ܗܟܘܬ ܚܕ ܡܢ ܝܘܡ̈ܬܐ ܗܐ ܡܢ ܕܐܬܝܠܕ܂