← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

62081: P 4Mac

Click on a word for lexical analysis
Click on a red-colored coordinate for comments and/or translations of the line

previous chapter


09:01 ܡܢܐ ܡܫܬܘܚܪ ܐܢܬ ܐܘ ܛܪܘܢܐ܂ ܥܬܝܕܝܢ ܚܢܢ ܗܘ ܓܝܪ ܠܡܡܬ݂ ܐܘ ܕܢܥܒܪ ܥܠ ܦܘܩܕܢܐ ܕܐܒ̈ܗܝܢ܃
09:02 ܒܗ݀ܬܝܢܢ ܓܝܪ ܡܢܗܘܢ ܙܕܩ݁ܐܝܬ݁܂ ܐܢܗ݂ܘ ܕܠܐ ܒܡܬܛܦܝܣܢܘܬܗ ܕܢܡܘܣܐ܂ ܘܒܡܘܫܐ ܐܝܟ ܕܒܡܠܘܟܐ ܢܬܚܫܚ܃
09:03 ܐܘ ܛܪܘܢܐ ܡ݁ܠܘܟܐ ܕܥܒܪ ܢܡܘܣܐ܂ ܠܐ ܟܕ ܣ݁ܢܐ ܐܢܬ ܠܢ ܚܠܦ ܢܦܫܟ ܬܚܘܣ ܥܠܝܢ܃
09:04 ܣܝܡ݂ܐ ܗܝ ܠܢ ܓܝܪ ܕܡܢ ܡܘܬܐ ܩܫܝܐ ܗܝ ܡܪܚܡܢܘܬܟ ܕܥܠ ܐ̈ܦܝ ܚ̈݁ܝܐ ܕܠܒܪ ܡܢ ܢܡܘܣܐ ܗܘ݁ܝܐ ܠܘܬܢ܃
09:05 ܡܣܪܕ ܐܢܬ ܠܢ ܕܝܢ ܟܕ ܡܬܠܚܡ ܐܢܬ݂ ܥܠܝܢ ܡܘܬܐ ܕܒܝܕ ܫ̈ܢܕܐ܂ ܐܝܟ ܗ݀ܘ ܕܠܘ ܡܢ ܩܕܡ ܩܠܝܠ ܡܢ ܐܠܝܥܙܪ ܐܝܠܦ݂ܬ݁܂ ܕܡܚܝܠ ܗܘ ܚܝܠܐ ܕܫ̈ܢܕܝܟ܃
09:06 ܐܢ ܕܝܢ ܣܒܐ ܡܢ ܒ̈ܢܝ ܥܒܪ̈ܝܐ ܡܛܠ ܫ݂ܪܪܐ ܐܦ ܐܘ̈ܠܨܢܐ ܣܝܒܪ ܘܡ݂ܝܬ݂܂ ܠܐ ܕܝܢ ܝܬܝܪܐܝܬ ܙܕ݁ܩ ܠܢ ܕܛܠ݂ܝܢ ܚܢܢ ܠܡܣܝ݁ܒܪܘ܂ ܟܕ ܡܒܣܪܝܢܢ ܥܠ ܫܢ̈ܕܝܟ ܩܫ̈ܝܐ܂ ܗ݀ܢܘܢ ܕܐܦ ܡܠܦܢܢ ܣܒܐ ܙܟ݂ܐ܃
09:07 ܢܣܐ ܗܟܝܠ ܐܘ ܛܪܘܢܐ ܢܦ̈ܫܬܢ܂ ܐܢ ܗܘ ܓܝܪ ܕܬܡܝܬ ܠܢ ܡܛܠ ܫܪܪܐ݂܂ ܠܐ ܬܣܒܪ ܕܙܟ݁ܐ ܐܢܬ ܠܢ ܒܝܕ ܫܢ̈ܕܝܟ܃
09:08 ܚܢܢ ܓܝܪ ܒܝܕ ܗܠܝܢ ܐܘܠܨ̈ܢܐ ܘܒܝܕ ܗܕܐ ܡܣܝܒܪܢܘܬܐ ܟ̈ܠܝ̈ܠܐ ܕܢܨܝܚܘܬܢ ܫܩ݁ܠܝܢ ܚܢܢ݁܃
09:09 ܐܢܬ ܕܝܢ ܡܛܠ ܕܡܬܛܦܠ ܐܢܬ ܒܩܛܠܢ݂܂ ܣܒ݁ܠ ܐܢܬ ܡܢ ܕܝܢ݂ܐ ܕܐܠܗܐ ܬܫ‍<‍ܢ‍>‍ܝܩܐ ܕܠܥܠܡ܃
09:10 ܟܕ ܕܝܢ ܐܡ݂ܪܘ ܗܠܝ݂ܢ܂ ܠܐ ܒܠܚܘܕ ܐܝܟ ܕܠܘܩܒܠ ܗܠܝܢ ܕܠܐ ܡܛܦܝܣܝܢ ܐܬܚܡܬ ܛܪܘܢܐ݂܂ ܐܠܐ ܐܦ ܐܝܟ ܕܠܘܩܒܠ ܚܪ̈ܝܝܐ܃
09:11 ܘܥܠ ܗܕܐ ܠܩܫܝܫܗܘܢ ܐܬܦܩܕܘ ܦܠܚ̈ܐ ܠܡܝܬܝܘ ܠܡܨܥܬܐ܂ ܘܣܕܩܘܗ݀ ܠܟܘܬܝܢܗ܂ ܘܐܣܪܘ ܐܝܕ̈ܘܗܝ ܘܕܪ̈ܥܘܗܝ݂܂ ܒܥܪ̈ܩܐ ܡܢ ܬܪ̈ܝܗܘܢ ܓܒ̈ܐ܃
09:12 ܟܕ ܕܝܢ ܠܐܝܘ ܡܢ ܕܡܢܓܕܝܢ ܗܘܘ ܠܗ ܘܡܕܡ ܠܐ ܣ݁ܥܪܝܢ܂ ܐܪܡܝܘܗܝ ܥܠ ܓܝܓܠܐ܃
09:13 ܘܒܡܬܚܐ ܕܥܠܝܗ݀ ܥܠܝܡܐ ܢܨܝܚܐ ܡܢ ܫܪ̈ܝܬܗ ܡܬܦܪܩ ܗܘܐ܃
09:14 ܘܟܕ ܟܠܗܘܢ ܗܕܡ̈ܘܗܝ ܡܬܒܪܝܢ ܗܘܘ݂܂ ܡܨܚܐ ܗܘܐ ܘܐܡ݁ܪ܃
09:15 ܐܘ ܛܪܘܢܐ ܛܡܐ ܘܒܥܠܕܒܒܐ ܕܕܝ݂ܢܐ ܫܡ݁ܝܢܐ܂ ܘܚܪܡܐ ܒܪܥܝܢܗ܂ ܠܐ ܗܘܐ ܕܩܛ݁ܠܬ ܐܢܫ ܒܐܣܟܡܐ ܗ݀ܢܐ ܡܫܬܢܕ ܐܢܬ ܒܝ܂ ܘܠܐ ܗܘܐ ܕܒܐܠܗܐ ܐܪܫ݁ܥܬ܂ ܐܠܐ ܕܡܥܙܐ ܐܢܐ ܡܛܠ ܢܡܘܣܐ ܐܠܗܝܐ܃
09:16 ܟܕ ܕܝܢ ܐܡ݁ܪܝܢ ܗܘܘ ܠܗ ܦܠܚ̈ܐ ܕܐܘܕܐ ܕܐܟܠ ܐܢܬ ܕܬܓܗܐ ܡܢ ܫܢ̈ܕܐ݂܃
09:17 ܐܡ݂ܪ܂ ܠܐ ܗܟܢܐ ܚܣܝܢܐ ܓܝܓܠܟܘܢ ܐܘ ܡܫܡ̈ܫܢܐ ܛܡ̈ܐܐ ܕܠܪܥܝܢܝ ܬܟܒܘܫ܂ ܦܣܩܘ ܗܕ̈ܡܝ ܘܐܘܩܕܘ ܒܢܘܪܐ ܒܣܪܝ܃
09:18 ܘܫܪ̈ܝܬܝ ܦܫ݁ܚ݂ܘ܂ ܒܝܕ ܓܝܪ ܟܠ ܫ̈ܢܕܝܢ ܐܦܝܣܟ݂ܘܢ܂ ܕܒܠܚܘܕ ܒܢ̈ܝ ܥܒܪ̈ܝܐ ܒܬܟܬܘܫܐ ܕܚܠܦ ܡܝܬܪܘܬܐ ܐܝܬܝܗܘܢ ܠܐ ܡܙܕ̈ܟܝܢܐ܃
09:19 ܟܕ ܕܝܢ ܐ݁ܡ݂ܪ ܗܠܝ݂ܢ܂ ܢܘܪܐ ܬܚܘܬܘܗܝ ܡ݁ܟܘ܂ ܘܓܝ̈ܓܠܐ ܐܝܟ ܕܒܥܨܝܢܐ ܥܠܘܗܝ ܒܐܘܡܢܘܬܐ ܐܩܫܝܘ܃
09:20 ܡܬܦܠܦܠܐ ܗܘܬ ܕܝܢ ܓܝܓܠܐ ܡܢ ܟܘܠ ܓܒ̈ܝܢ܂ ܘܟܪܝܐ ܕܓܘܡܪܐ ܕܬܚܘܬܘܗܝ ܡܢ ܢܘ̈ܛܦܬܐ ܕܕܡܗ ܡܬܕܥܟ ܗܘܐ܂ ܘܟܕ ܥܠ ܣ̈ܪܢܘܗܝ ܕܡܐܢܐ ܗܢܐ ܒܣܪܗ ܫ݁ܐ݂ܚ ܗܘܐ̈
09:21 ܘܓܪ̈ܡܘܗܝ ܡܬܦܪܩܝܢ ܗܘܘ܂ ܠܐ ܒܓܢ ܥܠܝܡܐ ܠܒܝܒܐ ܒܪܗ ܕܐܒܪܗܡ܃
09:22 ܐܠܐ ܐܝܟ ܗ݀ܘ ܕܒܓܘ ܢܘܪܐ ܡܫܬܚܠܦ ܗܘܐ ܠܠܐ ܡܬܚܒܠܢܘܬܐ܂ ܡܣܝܒܪ ܗܘܐ ܚܠܝܨܐܝܬ ܫܢ̈ܕܐ ܟܕ ܐܡ݁ܪ܃
09:23 ܐܬܕܡܘ ܒܝ ܐܚ̈ܝ܂ ܘܡܢ ܬܓܡܐ ܗܢܐ ܕܝܠܝ݂ ܠܥܠܡ ܠܐ ܬܫܢܘܢ܂ ܘܠܐ ܬܟܦܪܘܢ ܒܐܚܘܬܐ ܕܠܒܝܒܘܬܐ ܕܢܦܫܝ܂ ܦܠܚܘܬܐ ܙܗܝܬܐ ܘܢܨܝܚܬܐ ܦܠܘܚܘ ܥܠ ܐ̈ܦܝ ܫܪܪܐ܃
09:24 ܕܒܐܝܕܗ݀ ܒܛܝܠܘܬܐ ܟܐܢܬܐ ܕܐܠܗܐ ܕܡܢ ܝܘܡ̈ܝ ܐܒܗ̈ܝܢ ܬ݁ܬܪܥܐ ܠܥܡܢ܂ ܘܬܣܝܡ ܒܪܫܗ ܕܛܪܘܢܐ ܗܢܐ ܕܐܝܬܘܗܝ ܕܝܘܐ ܡܚܒܠܢܐ܃
09:25 ܘܟܕ ܐܡ݂ܪ ܗܠܝܢ ܛܠܝܐ ܙܗܝܐ ܢܦܫܗ ܫܠܡܬ܀
09:26 ܟܕ ܕܝܢ ܟܠܢܫ ܬܗ݀ܪ ܗܘܐ ܒܡܚܡܣܢܢܘܬܐ ܕܢܦܫܗ܂ ܢܓ݂ܕܘ ܦܠܚ̈ܐ ܠܗ݀ܘ ܕܛܠ݂ܐ ܗܘܐ ܒܩܘܡܬܗ ܕܐܝܬܘܗܝ ܡܢ ܒܬܪ ܗ݀ܘ ܩܕܡܝܐ܂ ܘܐܠܒܫܘ ܠܐܝ̈ܕܝܗܘܢ ܐܝ̈ܕܝܐ ܕܦܪܙܠܐ܂ ܘܒܛܦܪ̈ܝܗܘܢ ܚܪ̈ܝܦܬܐ ܟܕ ܬܠ݂ܐ ܓܙܡܝܢ ܗܘܘ ܕܢܣܪܩܘܢܝܗܝ܃
09:27 ܟܕ ܕܝܢ ܫܐܠܘܗܝ ܕܐܢ ܗ݂ܘ ܕܨ݁ܒܐ ܕܢܐܟܘܠ ܥܕ ܠܐ ܢ݁ܩܒܠ ܫܢ̈ܕܐ܃ ܘܫܡ݂ܥܘ ܡܢܗ ܡܠܬܐ ܠܒܝܒܬܐ݂܃
09:28 ܐܝ̈ܕܝܐ ܕܦܪܙܠܐ݂ ܐܩܬܘ ܒܣܬܪ ܩܕܠܗ܂ ܘܢܓܕܘܗܝ ܠܒܣܪܐ ܟܘܠܗ݂ ܥܕܡܐ ܠܕܩܢܗ܂ ܘܠܡܫܟܐ ܕܪܫܗ ܗܘ݂ ܗܟܢܐ ܢܫ݂ܛܘ ܗ݀ܢܘܢ ܚܝ̈ܘܬܐ ܢܡܪ̈ܝܬܐ܂ ܗ݂ܘ ܕܝܢ ܟܕ ܚܫܐ ܗܢܐ ܝܩܝܪܐܝܬ ܡܣܝܒܪ ܗܘܐ ܐܡ݁ܪ ܗܘܐ܃
09:29 ܡܐ ܗܢܝ ܟܠ ܐܣܟܝܡ ܕܡܘܬܐ ܡܛܠ ܗܝܡܢܘܬܐ ܕܐܒ̈ܗܝܢ܂ ܐܡ݁ܪ ܗܘܐ ܕܝܢ ܐܦ ܠܛܪܘܢܐ܃
09:30 ܠܐ ܣ݂ܝܡܐ ܠܟ ܐܘ ܛܪܘܢܐ ܕܡܢ ܟܘܠ ܛܪܘܢܝܢ ܚ݂ܪܡ ܐܢܬ܂ ܕܛܒ ܡܢ ܕܝܠܝ ܐܢܬ ܐܝܬܝܟ ܒܐܘܠܨܢܐ܂ ܕܚܐ݁ܪ ܐܢܬ ܕܚܘܫܒܐ ܕܫܘܥܠܝܐ ܕܪܡܘܬܟ݁܂ ܡܢ ܡܣܝܒܪܢܘܬܐ ܕܥܠ ܐ̈ܦܝ ܫܪܪܐ ܐܙܕܟܝ܃
09:31 ܐܢܐ ܓܝܪ ܒܝܕ ܪܓܝܓܘܬܐ ܕܥܠ ܐ̈ܦܝ ܢܨܝܚܘܬܐ ܚܫ̈ܝ ܥܠܝ ܩ݁ܠܝܢ܃
09:32 ܐܢܬ ܕܝܢ ܒܠܘܚ̈ܡܐ ܕܫܘ̈ܢܩܐ݁܂ ܕܟܦܘܪܘܬܟ ܠܗܘܢ ܢܛܝܪܐ ܡܬܢܓܕ ܐܢܬ܂ ܠܐ ܕܝܢ ܡܫܬܘܙܒ ܐܢܬ ܐܘ ܛܪܘܢܐ ܛܡܐܐ݁܂ ܡܢ ܕܝܢ݂ܐ ܟܐܢܐ ܕܐܠܗܐ܀

next chapter