The Comprehensive Aramaic Lexicon

00103_04	ܕܵܐܬܸܐ ܢܒܝܼܵܐ ܠܸܗ ܘܲܠܡܸܛܪܵܐ ܣܘܲܚܘ ܫܵܡ̈ܽܘܥܸܐ܀
00103_05	ܫܡܸܗ ܕܐܸܠܝܼܵܐ ܟܲܢܫܸܗ ܠܥܲܡܵܐ ܥܲܡ ܦܽܘܩܕܵܢܵܐ܃
00103_06	ܘܲܚܒܲܨܘ ܟܸܢܫܸ̈ܐ ܚܕ̈ܵܕܸܐ ܒܛܽܘܪܵܐ ܕܸܐܬܟܲܢܲܫܘ ܠܸܗ܀
00103_07	ܩܪܵܐ ܠܗܽܘܢ ܡܲܠܟ̇ܵܐ ܕܢܲܝܬܸ݁ܐ ܐܸܢܽܘܢ ܨܹܝܕ ܐܸܠܝܼܵܐ܃
00103_08	ܘܡܲܢ ܦܵܐܸܫ ܗܼܘܵܐ ܡܸܢ ܗܲܘ ܫܸܡܥܵܐ ܘܡܸܢ ܦܽܘܩܕܵܢܵܐ܀
00103_09	ܡܸܛܽܠ ܡܲܠܟ̇ܵܐ ܕܠܵܐ ܐܼܢܵܫ ܢܸܥܒܲܪ ܥܲܠ ܦܽܘܩܕܵܢܸܗ܃
00103_10	ܘܲܕܢܸܚܙܽܘܢ ܗܼܘܲܘ ܬܘܽܒ ܠܲܢܒܝܼܵܐ ܟ݂ܢܲܫܘ ܥܸܒܪ̈ܵܝܸܐ܀
00103_11	ܘܲܗܘܵܐ ܒܛܘܽܪܵܐ ܚܲܓ̇ܵܐ ܪܲܒܵܐ ܕܟܽܠܸܗ ܥܲܡܵܐ܃
00103_12	ܘܲܣܕܲܪܘ ܫܲܒ̈ܛܸܐ ܘܲܡܠܵܬ̤ ܐܲܪܥܵܐ ܡܸܢ ܓܽܘܕܲܝ̈ܗܽܘܢ܀
00103_13	ܘܲܩܛܲܪܘ ܟܸܢܫܸ̈ܐ ܢܒܝܼܸ̈ܐ ܕܒܲܥܠܵܐ ܘܲܕܕܸܚ̈ܠܵܬܵܐ܃
00103_14	ܘܩܵܡ ܐܸܠܝܼܵܐ ܗܽܘ ܒܲܠܚܽܘܕܲܘܗܼܝ ܠܲܡܡܲܠܵܠܽܘ܀
00103_15	ܪܵܥܝܵܐ ܚܦܝܼܛܵܐ ܕܲܒ݂ܛܝܼܠ ܗܼܘܵܐ ܠܸܗ ܥܲܠ ܡܲܪܥܝܼܬܵܐ܃
00103_16	ܟܲܢ݂ܫܵܗ݀ ܠܟܽܠܵܗ݀ ܕܲܢܚܲܘܸܐ ܠܵܗ݀ ܕܡܲܢܽܘ ܡܵܪܵܗ݀܀
00103_17	ܩܵܡ ܛܲܢܵܢܵܐ ܘܲܐܙܝܼܥ ܡܸܠܬܸܗ ܒܚܲܝܠܵܐ ܪܲܒܵܐ܃
00103_18	ܨܹܝܕ ܥܸܒܪ̈ܵܝܸܐ ܕܸܐܬܟܲܢܲܫܘ ܗܼܘܲܘ ܡܸܛܽܠܵܬܸܗ܀
00103_19	ܥܕܲܡܵܐ ܠܸܐܡܲܬܝ ܗܵܐ ܦܵܠܓܝܼܢ ܐܼܢܼܬܘܽܢ ܠܲܡܢܲܘ̈ܵܬܵܐ܃
00103_20	ܘܡܸܢܟܽܘܢ ܡܵܪܝܵܐ ܘܡܸܢܟܽܘܢ ܒܲܥܠܵܐ ܕܒ݂ܲܪ ܠܼܐܝܩܵܪܸܗ܀
00103_21	ܒܢ̈ܲܝ ܚܲܕ ܓܲܒܪܵܐ ܟܼܐܢܵܐ ܪܲܒܵܐ ܕܚܲܕ ܗܼܽܘ ܥܲܡܵܐ܃
00103_22	ܠܡܽܘܢ ܬܸܬܦܲܠܓܽܘܢ ܥܲܠ ܐܲܠ̈ܵܗܸܐ ܘܡܵܪ̈ܲܘܵܬܵܐ܀
00103_23	ܠܚܲܕ ܐܲܠܵܗܵܐ ܣܓܽܘܕܘ ܒܲܐܘܝܽܘܬܵܐ ܐܲܝܟܵܐ ܕܼܐܝܬܲܘܗ̄ܝ܃
00103_24	ܘܲܟܢܝܼܫܽܘܬܟܽܘܢ ܠܵܐ ܬܸܬܒܲܕܲܪܝ ܥܲܠ ܣܲܓܝܼܸ̈ܐܐ܀
00103_25	ܠܲܬܪܸ̈ܝܢ ܟܸܢܫܝܼ̈ܢ ܠܵܐ ܬܸܣܬܲܕܩܽܘܢ ܥܲܠ ܕܸܚܠ̈ܵܬܵܐ܃
00103_26	ܐܲܘ݁ ܠܲܐܠܵܗܵܐ ܐܲܘ݁ ܠܸܗ ܠܒܲܥܠܵܐ ܠܚܲܕ ܐܸܬܢܲܩܲܦܘ܀
00103_27	ܠܕܲܐܪܵܐ ܢܸܚܬܘܽܢ ܡܵܪܝܵܐ ܘܒܲܥܠܵܐ ܩܕܵܡ ܣܸܕܪ̈ܲܝܟܽܘܢ܃
00103_28	ܘܲܐܝܢܵܐ ܕܙܵܟܸܐ ܗܽܘ ܢܼܕܒ݂ܲܪܟܽܘܢ ܬܼܐܙܽܠܼܘܢ ܥܲܡܸܗ܀

00103_29	ܠܚܲܕ ܢܲܨܝܼܚܵܐ ܣܲܒܘ ܡܸܢ ܕܲܐܪܵܐ ܡܵܐ ܕܸܐܫ݂ܬܲܡܲܗ܃

00103_30	ܘܗܽܘ ܢܸܗܘܸܐ ܠܟܽܘܢ ܡܵܪܵܐ ܘܪܝܼܫܵܐ ܐܵܦ ܐܲܠܵܗܵܐ܀
00103_31	ܡܸܢ ܐܲܓܽܘܢܵܐ ܓܒܲܘ ܚܲܕ ܛܲܪܩܵܐ ܡܵܐ ܕܲܙܟ݂ܵܐ ܒܸܗ܃
00103_32	ܘܟܽܠܸܗ ܥܲܡܵܐ ܕܝܼܠܸܗ ܢܸܗܘܸܐ ܘܠܵܐ ܢܸܬܦܲܠܲܓ܀
00103_33	ܐܲܘ݁ ܬܲܘ݁ ܟܽܠܟܽܘܢ ܒܵܬܲܪ ܡܵܪܝܵܐ ܐܸܢ ܐܲܠܵܗܲܐ ܗܼܘ܃
00103_34	ܐܲܘ݁ ܙܸܠܘ ܟܽܠܟܽܘܢ ܒܵܬܲܪ ܒܲܥܠܵܐ ܐܸܢ ܡܸܬܢܲܨܲܚ܀
00103_35	ܬܸܗܘܸܐ ܒܥܵܬܵܐ ܘܢܸܬܒܲܚܪܽܘܢ ܒܵܗ݀ ܡܵܪܝܵܐ ܘܒܲܥܠܵܐ܃
00103_36	ܘܡܲܢ ܕܲܡܚܲܘܸܐ ܒܽܘܩܝܵܐ ܕܚܲܝܠܸܗ ܢܸܕܒܲܪ ܥܲܡܵܐ܀
00103_37	ܚܲܕ ܚܸܙܘܵܢܵܐ ܬܡܝܼܗܵܐ ܢܸܗܘܸܐ ܗܵܪܟܵܐ ܝܲܘܡܵܢ܃
00103_38	ܘܡܲܢ ܕܲܐܠܵܗܲܐ ܗܼܼܘ ܢܸܓ݂ܠܸܐ ܢܲܦܫܸܗ ܒܓܲܢܼܒܵܪܽܘܬܵܐ܀
00103_39	ܟܢܽܘܫܬܵܐ ܒܣܝܼܪܬܵܐ ܘܪܵܚܡܲܬ ܓܲܘܪܵܐ ܫܸܡܥܲܬ̤ ܘܲܫܠ݂ܵܬ܀
00103_40	ܕܠܵܐ ܡܲܨܝܵܐ ܗܼܘܵܬ̤ ܬܸܦܽܘܩܝ ܪܽܘܚܵܐ ܥܲܠ ܣܽܘܪܚܵܢܵܗ݀܀
00103_41	ܠܚܲܕ ܒܲܠܚܽܘܕܲܘܗܼܝ ܠܵܐ ܐܸܨܛܲܒ݂ܝܲܬ̤ ܬܸܪܚܲܡܝ ܡܸܡܬܘܽܡ܃
00103_42	ܕܥܲܠ ܣܲܓܝܼܸ̈ܐܐ ܫܲܕܝܵܐ ܥܲܝܢܵܗ݀ ܕܚܲܒܪܲܬ̤ ܨܲܠܡܸ̈ܐ܀
00103_43	ܘܥܲܠ ܕܸܐܡܲܪ ܠܵܗ݀ ܢܒܝܼܵܐ ܕܬܸܓܒܸܐ ܠܚܲܕ ܫܲܪܝܼܪܵܐ܃
00103_44	ܠܵܐ ܐܸܨܛܲܒ݂ܝܲܬ̤ ܬܡܲܠܸܠܝ ܥܲܡܸܗ ܕܲܒܣܝܼܪܵܐ ܗܼܘܵܬ܀
00103_45	ܨܹܝܕ ܣܲܓ̈ܝܼܸܐܐ ܨ݁ܠܸܐ ܗܼܘܵܐ ܚܝܵܪܵܗ݀ ܘܠܵܐ ܪܵܥܝܵܐ ܗܼܘܵܬ܃
00103_46	ܕܚܲܕ ܒܲܠܚܽܘܕܲܘܗܼܝ ܢܸܫܬܲܡܲܗ ܠܵܗ݀ ܘܬܸܗܘܸܐ ܕܝܼܠܸܗ܀
00103_47	ܡܸܛܽܠܗܵܢܵܐ ܐܵܦܠܵܐ ܡܸܠܬܵܐ ܥܢ݂ܵܬ̤ ܠܸܐܠܝܼܵܐ܃
00103_48	ܟܲܕ ܐܸܡܲܪ ܠܵܗ݀ ܓܒܲܝ ܠܸܟܝ ܡܵܪܝܵܐ ܚܠܵܦ ܡܵܪ̈ܲܝܵܐ܀
00103_49	ܐܵܡܲܪ ܙܲܗܝܵܐ ܐܸܢܲܐ ܗܼܘ ܦܵܫܸܬ ܢܒܝܼܵܐ ܠܡܵܪܝܵܐ܃
00103_50	ܘܗܵܐ ܐܲܪ̈ܒܲܥܡܵܐܐ ܘܚܲܡ̈ܫܝܼܢ ܢܒ̈ܝܼܸܐ ܕܒܲܥܠܵܐ ܗܵܪܟܵܐ܀
00103_51	ܐܸܢܵܐ ܘܗܸܢܽܘܢ ܢܸܕܒܲܚ ܗܵܫܵܐ ܐܼܢܵܫ ܠܲܐܠܵܗܸܗ܃
00103_52	ܢܲܝܬܘܽܢ ܬܲܘܪܸ̈ܐ ܘܢܲܣܩܽܘܢ ܕܸܒܚܵܐ ܠܒܲܥܠܵܐ ܗܸܢܽܘܢ܀
00103_53	ܘܲܢܦܲܫܚܽܘܢܵܝܗܼܝ ܘܲܢܣܝܼܡܽܘܢܵܝܗܼܝ ܠܥܸܠ ܡܸܢ ܩܲܝ̈ܣܸܐ܃
00103_54	ܘܒܲܫܡܸܗ ܕܒܲܥܠܵܐ ܟܲܕ ܠܵܐ ܣܵܝܡܝܼܢ ܢܽܘܪܵܐ ܢܸܩܪܽܘܢ܀