← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63403: JS_Elijah (Jacob of Saroug on Elijah)

Click on a word for lexical analysis
Click on a red-colored coordinate for comments and/or translations of the line

▲ earlier lines

00242_4 ܘܡܝܼܬ ܡܸܢ ܥܵܠܡܵܐ ܘܚܲܝ ܒܸܗ ܡܫܝܼܚܵܐ ܘܲܡܡܲܠܸܠ ܒܸܗ܀
00242_5 ܘܕܵܡܸܐ ܠܦܲܘܠܽܘܣ ܐܲܘ ܠܸܐܠܝܼܵܐ ܒܪܽܘܚܵܢܽܘܬܵܐ܃
00242_6 ܗܵܢܲܘ ܝܵܪܸܒ ܡܵܐ ܕܸܐܫܬܲܡܲܗ ܕܼܐܝܬܲܘܗ̄ܝ ܡܸܕܸܡ܀
00242_7 ܘܡܸܛܽܠܗܵܕܸܐ ܡܚܲܦܸܐ ܡܵܪܝܵܐ ܥܲܠ ܫܲܦܝܼܪܸ̈ܐ܃
00242_8 ܕܠܵܐ ܓܲܢ̄ܒܵܪܝܼܢ ܠܽܘܩܒܲܠ ܚܲܫܸ̈ܐ ܠܲܡܥܲܙܵܝܽܘ܀
00242_9 ܘܡܸܢܵܗ݀ ܕܗܵܕܸܐ ܡܫܽܘܚܬܵܐ ܪܚܝܼܡܬܵܐ ܕܠܵܐ ܝܼܕܝܼ̈ܥܸܐ܃
00243_0 ܐܝܼܬ ܗ̄ܘܵܐ ܒܥܲܡܵܐ ܐܲܠܦܸ̈ܐ ܫܲܒܥܵܐ ܒܝܲܘ̈ܡܲܝ ܐܵܚܵܒ܀
00243_1 ܟܲܕ ܚܲܢܦܽܘܬܵܗ݀ ܕܼܐܝܙܒܸܠ ܕܵܡܝܵܐ ܠܝܲܡܵܐ ܪܲܒܵܐ܃
00243_2 ܠܗܽܘܢ ܠܵܐ ܚܸܢܩܲܬ ܕܲܐܝܟ ܒܲܠܡܼܐܢܵܐ ܫܪܲܘ ܒܲܐܠܵܗܵܐ܀
00243_3 ܘܲܕܠܵܐ ܢܸܫܘܲܪ ܪܸܙܦܵܐ ܕܓ̈ܲܠܠܸܐ ܘܢܸܟܸܐ ܐܸܢܽܘܢ܃
00243_4 ܟܲܣܝܼ ܡܵܪܝܵܐ ܕܠܵܐ ܢܸܬܝܲܕܥܽܘܢ ܠܲܕܒܸܝܬ ܐܵܚܵܒ܀
00243_5 ܘܲܐܝܟ ܕܲܠܪܵܚܡܵܐ ܘܲܠܒܲܝܬܵܝܵܐ ܘܝܵܕܲܥ ܐ̄ܪ̈ܵܙܸܐ܃
00243_6 ܓܠܵܐ ܠܸܐܠܝܼܵܐ ܕܼܐܝܬܲܝܗܽܘܢ ܠܸܗ ܘܠܵܐ ܝܼܕܝܼܥܝܼܢ܀
00243_7 ܡܵܪܝܵܐ ܒܟܸܣܝܵܐ ܚܙܵܐ ܗ̄ܘܵܐ ܐܸܢܽܘܢ ܘܝܼܕܲܥ ܐܸܢܽܘܢ܃
00243_8 ܘܲܕܗܵܘܸܝܢ ܗ̄ܘܲܘ ܐܲܠܦܸ̈ܐ ܫܲܒܥܵܐ ܓܠܵܐ ܠܸܐܠܝܼܵܐ܀
00243_9 ܕܠܵܐ ܐܝܼܬ ܗ̄ܘܵܐ ܒܗܽܘܢ ܢܼܐܪܥܽܘܢ ܕܲܪܵܗ݀ ܕܗܵܝ ܚܲܢܦܽܘܬܵܐ܃
00244_0 ܠܵܐ ܫܚܲܩ ܐܸܢܽܘܢ ܢܸܬܝܲܕܥܽܘܢ ܗ̄ܘܲܘ ܠܲܕܒܸܝܬ ܐܵܚܵܒ܀
00244_1 ܒܨܵܝܗ̄ܝ ܠܸܐܠܝܼܵܐ ܘܸܐܫܟܲܚ ܕܼܐܝܬ ܒܸܗ ܠܩܼܐܪܣܵܐ ܪܲܒܵܐ܃
00244_2 ܘܠܸܗ ܐܲܩܝܼܡ ܗ̄ܘܵܐ ܢܸܡܚܸܐ ܩܪܵܒܵܐ ܥܲܡ ܪ̈ܲܫܝܼܥܸܐ܀
00244_3 ܗܽܘ ܒܲܠܚܽܘܕܲܘܗ̄ܝ ܐܸܫܬܲܡܲܗ ܗ̄ܘܵܐ ܘܲܐܩܝܼܡ ܓܲܒܵܐ܃
00244_4 ܘܲܙܟܵܐ ܠܛܽܘܥܝܲܝ ܪܲܒܬܵܐ ܕܼܐܝܙܒܸܠ ܓܲܢ̄ܒܵܪܵܐܝܼܬ܀
00244_5 ܠܗܵܢܵܐ ܦܐܸܐ ܗ̄ܘܵܐ ܕܢܸܗܘܸܐ ܝܕܝܼܥܵܐ ܡܫܲܡܗܵܐ ܘܪܲܒܵܐ܃
00244_6 ܕܼܐܝܬ ܗ̄ܘܵܐ ܒܢܲܦܫܸܗ ܚܲܝܠܵܐ ܕܙܵܟܸܐ ܠܚܲܫܸ̈ܐ ܟܽܠܝܽܘܡ܀
00244_7 ܚܵܒ ܠܸܗ ܗܲܘܢܵܐ ܡܸܢ ܬܲܫܥܝܼܬܸܗ ܕܲܡܠܸܐ ܫܽܘܦܪܸ̈ܐ܃
00244_8 ܕܪܵܡ ܗ̄ܽܘ ܡܼܐܡܪܸܗ ܡܸܢ ܠܸܫܵܢܵܐ ܘܡܸܢ ܪܸܥܝܵܢܵܐ܀
00244_9 ܒܡܵܢ ܡܸܬܝܲܩܲܪ ܐܸܚܒܽܘܨ ܥܠܲܘܗ̄ܝ ܠܲܡܝܲܩܵܪܽܘ܃
00245_0 ܟܲܕ ܕܵܚܸܠ ܐ̄ܢܵܐ ܕܕܲܠܡܵܐ ܐܝܼܩܵܪܝ ܟܽܠܸܗ ܨܲܥܪܵܐ ܗ̄ܘ܀
00245_1 ܠܸܗ ܠܵܐ ܨܲܥܪܵܐ ܘܠܵܐ ܐܝܼܩܵܪܵܐ ܚܫܝܼܒ ܠܸܗ ܡܸܕܸܡ܃
00245_2 ܕܠܲܘ ܥܲܡܲܢ ܗ̄ܽܘ ܕܢܸܬܝܲܩܲܪ ܒܲܢ ܐܲܘ ܢܸܨܛܲܥܲܪ܀
00245_3 ܦܲܛܽܘܢܽܘܬܸܗ ܡܚܲܘܸܐ ܒܲܠܚܽܘܕ ܡܲܢ ܕܲܡܝܲܩܲܪ܃
00245_4 ܘܥܲܠܗܵܝ ܚܸܒܨܸܬ ܕܲܐܝܕܵܐ ܕܦܲܐܝܵܐ ܗܝܼ ܐܸܓܒܸܐ ܠܝܼ܀
00245_5 ܐܲܟܒܲܪ ܫܸܬܩܵܐ ܛܵܒ ܡܸܢ ܡܹܐܡܪܵܐ ܡܝܲܩܲܪ ܗ̄ܽܘ ܠܸܗ܃
00245_6 ܘܙܵܕܸܩ ܐܸܫܠܸܐ ܕܠܵܐ ܐܸܨܲܥܲܪ ܟܲܕ ܐܵܡܲܪ ܐ̄ܢܵܐ܀
00245_7 ܬܸܫܠܸܐ ܡܸܠܬܵܐ ܟܲܕ ܬܵܗܪܵܐ ܒܸܗ ܕܠܵܐ ܡܸܬܡܲܠܲܠ܃
00245_8 ܘܕܽܘܟܲܬ ܡܹܐܡܪܵܐ ܢܡܲܠܸܐ ܬܸܗܪܵܐ ܘܲܐܝܟ ܐܝܼܩܵܪܵܐ ܗ̄ܘ܀
00245_9 ܕܠܵܐ ܡܸܫܟܲܚ ܐ̄ܢܵܐ ܕܼܐܡܲܪ ܡܹܐܡܪܵܐ ܥܲܠ ܐܸܠܝܼܵܐ܃
00246_0 ܐܸܬܗܲܪ ܡܸܬܗܲܪ ܕܲܟܡܵܐ ܫܲܦܝܼܪ ܘܲܡܠܸܐ ܛܽܘ̈ܒܸܐ܀
00246_1 ܒܡܼܐܡܪܸܗ ܫܽܘܒܚܵܐ ܒܫܸܬܩܸܗ ܬܸܗܪܵܐ ܘܠܵܐ ܡܸܣܬܲܝܲܟ܃
00246_2 ܚܲܣܢܲܢܝ ܡܼܐܡܪܸܗ ܘܲܙܟܵܢܝ ܬܸܗܪܸܗ ܒܪܝܼܟ ܗ̄ܽܘ ܕܲܓܒܵܝܗ̄ܝ܀
00246_3 ܫܠܸܡ ܕܲܬܪܸܝܢ ܕܥܲܠ ܐܸܠܝܼܵܐ ܟܲܕ ܥܪܲܩ ܡܸܢ ܩܕܵܡ ܐܝܼܙܒܸܠ݁