The Comprehensive Aramaic Lexicon

00301_4	ܘܕܲܒܗܽܘܢ ܚܵܝܸܐ ܪܵܡܝܼܢ ܚܲܝܲܘ̈ܗ̄ܝ ܡܸܢ ܢܸܟܝ̈ܵܢܸܐ܀
00301_5	ܢܽܘܗܪܵܐ ܪܲܒܵܐ ܩܒܸܐ ܒܓܲܘ ܣܸܦܪܵܐ ܕܲܢܒܝܼܽܘܬܵܐ܃
00301_6	ܘܲܒܙܲܠܝܼܩܲܘ̈ܗ̄ܝ ܢܵܗܪܵܐ ܢܲܦܫܵܐ ܐܲܝܟ ܒܼܐܝܡܵܡܵܐ܀
00301_7	ܦܬܲܚ ܠܲܟܬܵܒܵܐ ܐܵܘ ܦܵܪܽܘܫܵܐ ܟܲܕ ܪܵܚܸܡ ܐܲܢ̄ܬ܃
00301_8	ܘܗܽܘ ܡܚܲܘܸܐ ܠܵܟ ܫܽܘܦܪܸ̈ܐ ܚܠܲܝ̈ܵܐ ܕܠܵܐ ܡܸܣܬܲܒܥܝܼܢ܀
00301_9	ܐܵܣܲܘ̈ܵܬܵܐ ܕܢܲܦܫܵܐ ܟܪܝܼܗܬܵܐ ܟܬܵܒܸ̈ܐ ܐܸܢܽܘܢ܃
00302_0	ܘܦܸܬܓܵܡܲܝ̈ܗܽܘܢ ܐܲܝܟ ܥܸܩܵܪܸ̈ܐ ܛܵܒܸ̈ܐ ܣܝܼܡܝܼܢ܀
00302_1	ܗܵܐ ܦܽܘܩܕ̈ܵܢܸܐ ܐܲܝܟ ܣܲܡ̈ܡܵܢܸܐ ܠܽܘܩܒܲܠ ܫܽܘܚܢܸ̈ܐ܃
00302_2	ܡܲܕܸܟ ܐܵܣܝܵܐ ܡܠܸܐ ܚܸܟ̈ܡܵܬܵܐ ܘܣܵܡ ܒܲܟܬܵܒܸ̈ܐ܀
00302_3	ܠܽܘܩܒܲܠ ܪܸܓܬܵܐ ܕܼܐܝܬܸܝܗ݀ ܒܢܲܦܫܵܐ ܫܽܘܚܢܵܐ ܪܲܒܵܐ܃
00302_4	ܣܝܼܡ ܦܽܘܩܕܵܢܵܐ ܕܡܸܬܚܲܠܡܵܐ ܒܸܗ ܕܠܵܐ ܠܲܡ ܬܸܪܲܓ܀
00302_5	ܘܲܐܝܢܵܐ ܕܗܵܢܵܐ ܥܨܵܒܵܐ ܡܲܣܠܸܐ ܒܡܲܪܥܵܐ ܢܵܦܸܠ܃
00302_6	ܘܫܵܪܟܵܐ ܡܚܽܘܬܸܗ ܠܚܲܠܵܕܝܼܬܵܐ ܘܠܵܐ ܡܸܬܚܲܠܡܵܐ܀
00302_7	ܠܵܐ ܠܲܡ ܬܸܪܲܓ ܐܲܢ̄ܬܬܸܗ ܕܚܲܒܪܵܟ ܐܵܦܠܵܐ ܬܲܘܪܸܗ܃
00302_8	ܐܵܦ ܠܵܐ ܚܡܵܪܸܗ ܘܠܵܐ ܟܽܠܡܸܕܸܡ ܕܲܩܢܸܐ ܚܲܒܪܵܟ܀
00302_9	ܐܵܚܵܒ ܡܲܠܟܵܐ ܟܲܪܡܵܐ ܪܲܓ ܗ̄ܘܵܐ ܕܠܲܘ ܕܝܼܠܸܗ ܗ̄ܘܵܐ܃
00303_0	ܘܒܸܠܥܲܬ ܢܲܦܫܸܗ ܒܟܼܐܒܵܐ ܕܪܸܓܬܵܐ ܡܲܪܝܼܪܵܐܝܼܬ܀
00303_1	ܥܲܠ ܩܸܢܝܵܢܵܐ ܕܚܲܒܪܸܗ ܫܕܵܐ ܗ̄ܘܵܐ ܒܪܸܓܬܵܐ ܥܲܝܢܸܗ܃
00303_2	ܘܲܐܝܟ ܟܽܘܪܗܵܢܵܐ ܪܲܒܵܐ ܐܲܚܕܸܗ ܚܲܡܝܼܡܵܐܝܼܬ܀
00303_3	ܐܸܠܽܘ ܫܡܲܥ ܗ̄ܘܵܐ ܗܲܘ ܦܽܘܩܕܵܢܵܐ ܕܠܵܐ ܢܸܪܲܓ ܗ̄ܘܵܐ܃
00303_4	ܠܵܐ ܢܵܦܸܠ ܗ̄ܘܵܐ ܬܚܸܝܬ ܗܲܘ ܫܽܘܚܢܵܐ ܕܪܸܓܬܵܐ ܕܲܢܦܲܠ܀
00303_5	ܐܸܠܽܘ ܩܪܵܐ ܗ̄ܘܵܐ ܒܣܸܦܪܸܗ ܕܡܽܘܫܸܐ ܘܲܫܩܲܠ ܡܸܢܸܗ܃
00303_6	ܥܨܵܒܵܐ ܠܟܼܐܒܸܗ ܡܲܚܠܸܡ ܗ̄ܘܵܐ ܠܸܗ ܘܠܵܐ ܡܸܬܚܲܒܲܠ܀
00303_7	ܪܸܓܬܵܐ ܬܲܪܥܵܐ ܗ̄ܝ ܕܥܵܐܠܵܐ ܒܝܼܫܬܵܐ ܠܢܲܦܫܵܐ ܡܸܢܵܗ݀܃
00303_8	ܕܲܟܡܵܐ ܕܲܐܚܝܼܕ ܐܵܦ ܠܵܐ ܚܛܵܗܵܐ ܠܡܸܢܥܵܐ ܢܵܦܸܩ܀
00303_9	ܡܸܢܵܗ݀ ܡܫܲܪܸܐ ܚܛܵܗܵܐ ܕܢܸܬܬܨܝܼܪ ܒܲܕܡܽܘܬ ܥܽܘܠܵܐ܃
00304_0	ܘܗܝܼ ܒܵܛܢܵܐ ܠܸܗ ܘܲܡܪܲܒܝܵܐ ܠܸܗ ܠܦܼܐܪܵܐ ܒܝܼܫܵܐ܀
00304_1	ܪܸܓܬܵܐ ܡܪܲܚܦܵܐ ܘܒܵܪܝܵܐ ܚܛܵܗܸ̈ܐ ܚܲܡܝܼܡܵܐܝܼܬ܃
00304_2	ܘܲܡܓܲܫܡܵܐ ܠܗܽܘܢ ܕܢܸܗܘܽܘܢ ܦܼܐܪܸ̈ܐ ܕܡܲܘܬܵܐ ܟܽܠܝܽܘܡ܀
00304_3	ܡܸܢܵܗ݀ ܡܫܲܪܸܐ ܫܽܘܚܢܵܐ ܕܥܲܘܠܵܐ ܕܢܽܘܡܼܐ ܢܸܐܚܽܘܕ܃
00304_4	ܘܲܟܡܵܐ ܕܠܲܝܬܸܝܗ݀ ܚܣܝܼܟܵܐ ܗ̄ܝ ܢܲܦܫܵܐ ܡܸܢ ܣܽܘܓܦܵܢܸ̈ܐ܀
00304_5	ܐܲܝܟ ܫܲܬܐܸܣܬܵܐ ܗ̄ܝ ܕܲܥܠܸܝܗ݀ ܒܵܢܝܵܐ ܒܝܼܫܬܵܐ ܢܲܦܫܵܗ݀܃
00304_6	ܘܡܵܐ ܕܠܵܐ ܣܝܼܡܵܐ ܒܢܲܦܫܵܐ ܚܛܵܗܵܐ ܠܵܐ ܩܵܐܸܡ ܒܵܗ݀܀
00304_7	ܕܪܵܐܸܓ ܐܲܢ̄ܬܬܵܐ ܓܵܪܵܗ݀ ܒܠܸܒܸܗ ܘܸܐܠܵܐ ܡܸܫܟܲܚ܃
00304_8	ܒܝܼܫܬܵܐ ܐ̄ܚܪܼܬܵܐ ܐܲܟܒܲܪ ܣܵܥܲܪ ܥܲܡ ܗܵܝ ܕܲܢܓܽܘܪ܀
00304_9	ܪܲܓ ܗ̄ܘܵܐ ܐܵܚܵܒ ܕܢܸܣܲܒ ܟܲܪܡܵܐ ܘܲܕܠܵܐ ܐܸܫܟܲܚ܃
00305_0	ܐܸܫܬܲܦܲܥ ܗ̄ܘܵܐ ܕܡܵܐ ܙܲܟܵܝܵܐ ܘܟܸܢ ܢܲܣܒܸܗ ܗ̄ܘܵܐ܀
00305_1	ܪܸܓܬܵܐ ܥܒܵܕܵܐ ܗ̄ܘ ܕܲܒܓܲܘ ܢܲܦܫܵܐ ܟܣܸܐ ܘܲܡܫܲܠܲܡ܃
00305_2	ܘܲܕܠܵܐ ܬܸܪܲܓ ܐܲܝܟ ܠܵܐ ܬܸܩܛܽܘܠ ܣܝܼܡ ܢܵܡܽܘܣܵܐ܀
00305_3	ܐܲܝܢܵܐ ܕܪܵܐܸܓ ܡܸܕܸܡ ܕܚܲܒܪܸܗ ܛܒܲܥ ܒܲܚܛܵܗܵܐ܃
00305_4	ܗܵܟܲܢܵܐ ܓܹܝܪ ܣܝܼܡ ܢܵܡܽܘܣܵܐ ܕܠܵܐ ܐ̄ܢܵܫ ܢܸܪܲܓ܀
00305_5	ܕܠܲܘ ܕܠܵܐ ܬܸܣܲܒ ܨܒܽܘܬܸܗ ܕܚܲܒܪܵܟ ܐ̄ܡܲܪ ܢܵܡܽܘܣܵܐ܃
00305_6	ܐܸܠܵܐ ܕܡܸܪܲܓ ܠܵܐ ܬܸܪܲܓܝܼܗ݀ ܒܓܲܘ ܪܸܥܝܵܢܵܟ܀
00305_7	ܪܲܓ ܗ̄ܘܵܐ ܐܵܚܵܒ ܟܲܪܡܸܗ ܕܢܵܒܽܘܬ ܥܲܘܵܠܵܐܝܼܬ܃
00305_8	ܘܚܵܒ ܠܲܐܠܵܗܵܐ ܚܛܵܗܵܐ ܟܲܣܝܵܐ ܕܠܵܐ ܟܲܕܽܘ ܠܸܗ܀
00305_9	ܡܸܚܕܵܐ ܕܪܲܓܸܗ ܐܸܬܚܲܝܲܒ ܗ̄ܘܵܐ ܡܸܢ ܢܵܡܽܘܣܵܐ܃
00306_0	ܟܲܕ ܫܲܩܠܸܗ ܕܹܝܢ ܒܲܕܠܵܐ ܢܵܡܽܘܣ ܡܸܬܚܲܫܲܚ ܗ̄ܘܵܐ܀
00306_1	ܐܝܼܬ ܗ̄ܽܘ ܚܛܵܗܵܐ ܕܠܵܐ ܢܵܡܽܘܣܵܐ ܘܲܒܢܵܡܽܘܣܵܐ܃
00306_2	ܘܲܓܙܵܪ ܕܝܼܢܸܗ ܕܚܲܕ ܚܲܕ ܡܸܢܗܽܘܢ ܐܲܝܟ ܣܽܘܥܪܵܢܸܗ܀
00306_3	ܟܬܝܼܒ ܓܹܝܪ ܗܵܟܲܢ ܕܲܐܝܠܸܝܢ ܕܲܚܛܲܘ ܡܸܢ ܢܵܡܽܘܣܵܐ܃
00306_4	ܒܸܗ ܒܢܵܡܽܘܣܵܐ ܐܵܦ ܡܸܬܬܕܝܼܢܝܼܢ ܐܲܝܟܲܢ ܕܲܚܛܲܘ܀