The Comprehensive Aramaic Lexicon

00317_9	ܒܨܲܘܡܵܗ݀ ܩܸܛܠܵܐ ܘܲܒܫܵܪܽܘܬܵܗ݀ ܟܽܠ ܣܽܘܪ̈ܚܵܢܝܼܢ܃
00318_0	ܕܵܐܦ ܟܲܕ ܨܵܝܡܵܐ ܐܵܦ ܡܵܐ ܕܵܐܟܠܵܐ ܠܲܕܡܵܐ ܨܲܗܝܵܐ܀
00318_1	ܒܲܢܙܝܼܪܽܘܬܵܗ݀ ܬܸܩܛܽܘܠ ܒܵܥܝܵܐ ܒܲܪ̄ܬ ܪ̈ܲܫܝܼܥܸܐ܃
00318_2	ܐܸܢ ܟܲܝ ܪܲܘܝܵܐ ܡܵܢܵܐ ܥܵܒܕܵܐ ܣܪܝܼܚܲܬ ܠܸܒܵܐ܀
00318_3	ܐܸܢ ܡܸܢ ܨܲܘܡܵܗ݀ ܫܠܲܕܵܐ ܢܵܦܠܵܐ ܕܚܲܕ ܙܲܕܝܼܩܵܐ܃
00318_4	ܒܲܚܫܵܡܝܼܬܵܗ݀ ܟܡܵܐ ܟܲܝ ܩܵܛܠܵܐ ܘܟܸܢ ܟܲܕܽܘ ܠܵܗ݀܀
00318_5	ܡܸܢ ܐܸܓܲܪܬܵܗ݀ ܝܼܕܝܼܥ ܠܸܒܵܗ݀ ܕܲܡܣܲܝܲܒܬܵܐ܃
00318_6	ܕܲܒܚܽܘ̈ܫܵܒܸܐ ܣܪ̈ܝܼܚܸܐ ܟܽܠ ܝܽܘܡ ܪܵܡܝܵܐ ܩܸ̈ܛܠܸܐ܀
00318_7	ܟܲܕ ܕܹܝܢ ܣܵܒܸ̈ܐ ܝܼܠܸܦܘ ܥܸܠܬܸܗ ܕܨܲܘܡܵܐ ܡܵܢܵܐ ܗ̄ܝ܃
00318_8	ܣܵܡܘ ܐܲܦܲܝ̈ܗܽܘܢ ܥܲܠ ܣܽܘܥܪܵܢܵܐ ܒܝܼܫܵܐ ܕܲܢܒܲܥ܀
00318_9	ܘܲܐܝܟ ܦܽܘܩܕܵܢܵܐ ܕܪܽܘܫܥܵܐ ܕܸܐܬܵܐ ܡܸܢ ܒܸܝܬ ܐܵܚܵܒ܃
00319_0	ܫܲܡܠܝܼܘ ܗܸܢܽܘܢ ܕܲܠܙܲܕܝܼܩܵܐ ܒܦܲܚܸ̈ܐ ܢܲܪܡܽܘܢ܀
00319_1	ܘܲܓܙܲܪܘ ܨܲܘܡܵܐ ܕܲܡܠܸܐ ܘܵܝܸ̈ܐ ܘܬܽܘ̈ܟܸܐ ܒܝܼ̈ܫܸܐ܃
00319_2	ܘܲܥܒܲܕܘ ܢܸܟܠܵܐ ܠܲܡܫܲܦܵܥܽܘ ܕܡܵܐ ܙܲܟܵܝܵܐ܀
00319_3	ܚܲܓܵܐ ܠܡܵܪܝܵܐ ܐܲܟܪܸܙܘ ܒܝܼ̈ܫܸܐ ܠܟܽܠܸܗ ܥܲܡܵܐ܃
00319_4	ܘܲܗܘܵܐ ܟܢܽܘܫܝܵܐ ܕܟܲܣܝܵܐ ܥܸܠܬܸܗ ܡܸܢ ܣܲܓܝܼܸ̈ܐܐ܀
00319_5	ܥܒܲܕܘ ܒܵܥܽܘܬܵܐ ܕܡܵܐ ܕܸܐܬܒܲܨܝܲܬ ܡܲܨܽܘܬܵܐ ܗ̄ܘܵܬ܃
00319_6	ܘܨܲܘܡܵܐ ܕܲܛܥܝܼܢ ܚܲܪܒܵܐ ܠܩܸܛܠܵܐ ܥܲܘܵܠܵܐܝܼܬ܀
00319_7	ܟܢܽܘܫܝܵܐ ܕܢܸܟܠܵܐ ܕܲܚܦܝܼܪ ܗ̄ܘܵܐ ܒܸܗ ܓܽܘܒܵܐ ܪܲܒܵܐ܃
00319_8	ܕܢܲܦܸܠ ܗ̄ܘܵܐ ܒܸܗ ܚܲܕ ܬܲܡܝܼܡܵܐ ܟܲܕ ܠܵܐ ܝܵܕܲܥ܀
00319_9	ܨܲܘܡܵܐ ܛܲܡܐܵܐ ܕܲܡܦܲܠܦܲܠ ܗ̄ܘܵܐ ܒܲܕܡܵܐ ܚܲܣܝܵܐ܃
00310_00	ܘܕܲܢܦܲܩܘ ܚܵܒܘ ܗ̄ܘܲܘ ܟܸܬܒܲܬ ܬܸܬܒܲܥ ܡܸܢ ܝܲܠܕܲܝ̈ܗܽܘܢ܀
00310_01	ܕܝܲܩܝܼܪ ܗ̄ܘܵܐ ܠܵܗ݀ ܗܲܘ ܡܸܣܟܼܢܵܐ ܬܪܝܼܨܵܐ ܕܲܥܠܝܼܒ܃
00310_02	ܣܸܚܦܲܬ ܒܲܐܪܥܵܐ ܫܠܲܕܵܐ ܕܡܲܠܟܵܐ ܡܸܛܽܠܵܬܸܗ܀
00310_03	ܢܸܕܚܲܠ ܟܽܠ ܐ̄ܢܵܫ ܡܸܢ ܟܼܐܢܽܘܬܵܐ ܟܡܵܐ ܥܲܙܝܼܙܵܐ܃

00310_04	ܘܲܣܦܝܼܪ ܩܲܢܝܵܗ݀ ܘܲܕܚܝܼܠ ܕܝܼܢܵܗ݀ ܘܲܩܫܸܐ ܢܸܓܕܵܗ݀܀

00310_05	ܪܽܘܚܵܗ݀ ܡܲܓܪܵܐ ܠܲܬܒܲܥܬܵܐ ܕܹܝܢ ܣܲܓܝܼ ܩܲܫܝܵܐ܃
00310_06	ܙܲܒܢܵܐ ܢܵܛܪܵܐ ܘܡܵܐ ܕܡܸܬܬܥܝܼܪܵܐ ܥܵܒܕܵܐ ܓܽܘܢܚܵܐ܀
00310_07	ܟܲܕ ܪܵܓܡܝܼܢ ܠܸܗ ܠܗܲܘ ܙܲܕܝܼܩܵܐ ܘܠܵܐ ܡܸܬܦܲܨܸܐ܃
00310_08	ܐܲܝܟ ܡܵܐ ܕܠܲܝܬܸܝܗ݀ ܗܝܼ ܟܼܐܢܽܘܬܵܐ ܡܸܣܬܲܒܪܵܐ ܗ̄ܘܵܬ܀
00310_09	ܘܟܲܕ ܒܵܙܥܵܐ ܠܸܗ ܒܓܸܐܪܵܐ ܠܵܐܚܵܒ ܘܵܐܫܕܵܐ ܠܲܕܡܸܗ܃
00310_10	ܝܲܠܦܵܗ݀ ܥܵܠܡܵܐ ܕܼܐܝܬܸܝܗ݀ ܘܬܵܒܥܵܐ ܥܲܙܝܼܙܵܐܝܼܬ܀
00310_11	ܨܵܪܲܬ ܢܲܦܫܵܗ݀ ܒܗܲܘ ܬܲܟܬܽܘܫܵܐ ܕܲܐܕܽܘܡܵܝܸ̈ܐ܃
00310_12	ܕܬܸܚܙܸܝܗ݀ ܒܪܝܼܬܵܐ ܟܡܵܐ ܫܲܦܝܼܪܵܐ ܘܠܲܝܬ ܒܵܗ݀ ܡܽܘܡܵܐ܀
00310_13	ܐܸܬܝܲܕܥܲܬ ܗ̄ܘܵܬ ܕܵܐܦ ܠܵܐ ܛܵܥܝܵܐ ܘܠܵܐ ܡܸܬܥܲܒܪܵܐ܃
00310_14	ܘܒܲܬܪܝܼܨܽܘܬܵܐ ܡܒܲܥܪܵܐ ܘܬܵܒܥܵܐ ܟܽܠ ܣܽܘܥܪ̈ܵܢܝܼܢ܀
00310_15	ܩܲܠܝܼܠ ܕܲܘܩܵܗ݀ ܘܲܠܟܽܠ ܓܲܒܝܼ̈ܢ ܚܵܝܪܵܐ ܥܲܝܢܵܗ݀܃
00310_16	ܘܲܐܝܟܵܐ ܕܚܵܙܝܵܐ ܥܲܘܠܵܐ ܟܬܲܒܬܸܗ ܒܣܸܦܪܵܐ ܪܲܒܵܐ܀
00310_17	ܨܲܠܝܵܐ ܐܸܕܢܵܗ݀ ܘܨܵܝܬܵܐ ܩܵܠܵܐ ܕܟܽܠ ܕܲܥܠܝܼܒܝܼܢ܃
00310_18	ܘܡܸܚܕܵܐ ܕܫܵܡܥܵܐ ܐ̄ܢܲܩܬܵܐ ܥܸܩܒܲܬ ܥܸܠܬܵܗ݀ ܡܵܢܵܐ ܗ̄ܝ܀
00310_19	ܥܒܵܕܸ̈ܐ ܘܡܸ̈ܠܸܐ ܟܵܬܒܵܐ ܒܟܸܪܟܵܐ ܘܣܵܝܡܵܐ ܨܸܐܕܸܝܗ݀܃
00310_20	ܘܡܵܐ ܕܫܵܦܲܪ ܠܵܗ݀ ܩܵܪܝܵܐ ܘܬܵܒܥܵܐ ܘܠܵܐ ܡܸܬܥܲܠܒܵܐ܀
00310_21	ܡܸܠܬܵܐ ܕܦܽܘܡܵܐ ܘܪܸܡܙܵܐ ܕܥܲܝ̈ܢܸܐ ܬܵܒܥܵܐ ܡܸܢ ܐ̄ܢܵܫ܃
00310_22	ܘܟܽܠ ܚܽܘ̈ܫܵܒܸܐ ܘܟܽܠ ܣܽܘܥܪ̈ܵܢܸܐ ܡܲܥܠܵܐ ܩܽܘܕܡܸܝܗ݀܀
00310_23	ܫܲܦܝܼܪ ܗ̄ܘܵܐ ܠܵܗ݀ ܟܲܕ ܬܵܒܥܵܐ ܗ̄ܘܵܬ ܠܲܕܡܸܗ ܕܢܵܒܽܘܬ܃
00310_24	ܕܲܛܠܝܼܡ ܘܲܥܠܝܼܒ ܘܲܪܓܝܼܡ ܘܲܦܥܝܼܥ ܟܲܕ ܠܵܐ ܐܲܣܟܸܠ܀
00310_25	ܕܲܛܠܝܼܡ ܢܸܚܕܸܐ ܘܲܕܛܵܠܽܘܡܵܐ ܢܙܽܘ̈ܥܵܢ ܐܲܦܲܘ̈ܗ̄ܝ܃
00310_26	ܕܲܬܪܝܼܨ ܡܵܪܝܵܐ ܘܬܵܒܲܥ ܕܝܼܢܵܐ ܕܟܽܠ ܕܲܛܠܝܼܡܝܼܢ܀
00310_27	ܕܒܵܐܸܙ ܢܸܕܚܲܠ ܗܲܘ ܕܹܝܢ ܕܲܒܙܝܼܙ ܠܵܐ ܬܸܟܪܸܐ ܠܸܗ܃
00310_28	ܕܲܩܕܵܡ ܡܵܪܝܵܐ ܗܵܘܝܵܐ ܬܒܲܥܬܵܐ ܕܟܽܠ ܣܽܘܥܪ̈ܵܢܝܼܢ܀
00310_29	ܠܵܐ ܐ̄ܢܵܫ ܢܼܐܡܲܪ ܕܲܡܓܲܙܲܝ ܐ̄ܢܵܐ ܥܲܠ ܗܵܝ ܥܲܠܒܽܘܢܝ܃