The Comprehensive Aramaic Lexicon

00310_15	ܩܲܠܝܼܠ ܕܲܘܩܵܗ݀ ܘܲܠܟܽܠ ܓܲܒܝܼ̈ܢ ܚܵܝܪܵܐ ܥܲܝܢܵܗ݀܃
00310_16	ܘܲܐܝܟܵܐ ܕܚܵܙܝܵܐ ܥܲܘܠܵܐ ܟܬܲܒܬܸܗ ܒܣܸܦܪܵܐ ܪܲܒܵܐ܀
00310_17	ܨܲܠܝܵܐ ܐܸܕܢܵܗ݀ ܘܨܵܝܬܵܐ ܩܵܠܵܐ ܕܟܽܠ ܕܲܥܠܝܼܒܝܼܢ܃
00310_18	ܘܡܸܚܕܵܐ ܕܫܵܡܥܵܐ ܐ̄ܢܲܩܬܵܐ ܥܸܩܒܲܬ ܥܸܠܬܵܗ݀ ܡܵܢܵܐ ܗ̄ܝ܀
00310_19	ܥܒܵܕܸ̈ܐ ܘܡܸ̈ܠܸܐ ܟܵܬܒܵܐ ܒܟܸܪܟܵܐ ܘܣܵܝܡܵܐ ܨܸܐܕܸܝܗ݀܃
00310_20	ܘܡܵܐ ܕܫܵܦܲܪ ܠܵܗ݀ ܩܵܪܝܵܐ ܘܬܵܒܥܵܐ ܘܠܵܐ ܡܸܬܥܲܠܒܵܐ܀
00310_21	ܡܸܠܬܵܐ ܕܦܽܘܡܵܐ ܘܪܸܡܙܵܐ ܕܥܲܝ̈ܢܸܐ ܬܵܒܥܵܐ ܡܸܢ ܐ̄ܢܵܫ܃
00310_22	ܘܟܽܠ ܚܽܘ̈ܫܵܒܸܐ ܘܟܽܠ ܣܽܘܥܪ̈ܵܢܸܐ ܡܲܥܠܵܐ ܩܽܘܕܡܸܝܗ݀܀
00310_23	ܫܲܦܝܼܪ ܗ̄ܘܵܐ ܠܵܗ݀ ܟܲܕ ܬܵܒܥܵܐ ܗ̄ܘܵܬ ܠܲܕܡܸܗ ܕܢܵܒܽܘܬ܃
00310_24	ܕܲܛܠܝܼܡ ܘܲܥܠܝܼܒ ܘܲܪܓܝܼܡ ܘܲܦܥܝܼܥ ܟܲܕ ܠܵܐ ܐܲܣܟܸܠ܀
00310_25	ܕܲܛܠܝܼܡ ܢܸܚܕܸܐ ܘܲܕܛܵܠܽܘܡܵܐ ܢܙܽܘ̈ܥܵܢ ܐܲܦܲܘ̈ܗ̄ܝ܃
00310_26	ܕܲܬܪܝܼܨ ܡܵܪܝܵܐ ܘܬܵܒܲܥ ܕܝܼܢܵܐ ܕܟܽܠ ܕܲܛܠܝܼܡܝܼܢ܀
00310_27	ܕܒܵܐܸܙ ܢܸܕܚܲܠ ܗܲܘ ܕܹܝܢ ܕܲܒܙܝܼܙ ܠܵܐ ܬܸܟܪܸܐ ܠܸܗ܃
00310_28	ܕܲܩܕܵܡ ܡܵܪܝܵܐ ܗܵܘܝܵܐ ܬܒܲܥܬܵܐ ܕܟܽܠ ܣܽܘܥܪ̈ܵܢܝܼܢ܀
00310_29	ܠܵܐ ܐ̄ܢܵܫ ܢܼܐܡܲܪ ܕܲܡܓܲܙܲܝ ܐ̄ܢܵܐ ܥܲܠ ܗܵܝ ܥܲܠܒܽܘܢܝ܃
00310_30	ܕܗܵܐ ܕܲܝܵܢܵܐ ܬܪܝܼܨܵܐ ܝܵܨܸܦ ܕܲܐܝܢܵܐ ܕܲܥܠܝܼܒ܀
00310_31	ܠܵܐ ܐ̄ܢܵܫ ܢܼܐܡܲܪ ܘܵܝ ܠܸܗ ܠܲܐܝܢܵܐ ܕܠܲܝܬ ܠܸܗ ܐ̄ܢܵܫܵܐ܃
00310_32	ܕܗܵܐ ܐܲܠܵܗܵܐ ܕܟܽܠ ܐ̄ܢܵܫ ܐܝܼܬܲܘܗ̄ܝ ܒܸܗ ܢܸܬܛܲܦܸܐ܀
00310_33	ܠܲܝܬ ܗ̄ܘܵܐ ܠܢܵܒܽܘܬ ܘܼܐܝܬ ܗ̄ܘܵܐ ܠܵܐܚܵܒ ܣܲܓܝܼ ܐ̄ܢܵܫܵܐ܃
00310_34	ܢܸܚܙܸܐ ܗܵܫܵܐ ܠܲܐܝܢܵܐ ܓܲܒܵܐ ܗܘܵܐ ܢܸܨܚܵܢܵܐ܀
00310_35	ܡܵܢ ܟܲܝ ܥܲܕܪܽܘܗ̄ܝ ܐ̄ܢܵܫܵܐ ܠܵܐܚܵܒ ܟܲܕ ܟܼܐܢܽܘܬܵܐ܃
00310_36	ܥܸܩܒܲܬ ܕܝܼܢܵܐ ܘܬܸܒܥܲܬ ܡܸܢܸܗ ܕܡܵܐ ܙܲܟܵܝܵܐ܀
00310_37	ܡܲܢ ܗܵܟܲܢܵܐ ܡܨܸܐ ܗ̄ܘܵܐ ܕܢܸܬܒܲܥ ܥܝܵܪܬܸܗ ܕܢܵܒܽܘܬ܃
00310_38	ܐܲܝܟ ܕܲܐܠܵܗܵܐ ܒܥܵܐ ܣܽܘܥܪܵܢܸܗ ܘܲܥܒܲܕ ܕܝܼܢܸܗ܀
00310_39	ܡܸܣܟܼܢܵܐ ܗ̄ܘܵܐ ܘܩܲܛܠܽܘܗ̄ܝ ܡܲܠܟܸ̈ܐ ܘܡܲܢ ܬܵܒܲܥ ܗ̄ܘܵܐ܃
00310_40	ܐܸܠܽܘ ܡܵܪܝܵܐ ܚܠܵܦܲܘܗ̄ܝ ܠܵܐ ܩܵܡ ܐܲܝܟ ܓܲܢ̄ܒܵܪܵܐ܀
00310_41	ܕܠܲܝܬ ܗ̄ܘܵܐ ܐ̄ܢܵܫܵܐ ܕܲܠܨܸܒܝܵܢܸܗ ܕܡܲܠܟܵܐ ܢܸܥܨܽܘܢ܃
00310_42	ܐܝܼܬ ܗ̄ܘܵܐ ܡܵܪܝܵܐ ܕܗܽܘܝܽܘ ܣܝܼܥܬܵܐ ܕܟܽܠ ܕܲܡܓܲܙܲܝ܀
00310_43	ܟܸܢܫܵܐ ܕܥܲܡܵܐ ܩܵܡ ܗ̄ܘܵܐ ܒܟܼܐܦܸ̈ܐ ܥܲܠ ܡܸܣܟܼܢܵܐ܃
00310_44	ܣܵܒܸ̈ܐ ܘܚܼܐܪܸ̈ܐ ܘܲܒܢ̈ܲܝ ܥܲܘܠܵܐ ܘܠܲܝܬ ܐܝܼܵܠܵܐ܀
00310_45	ܨܲܚܝܽܘܗ̄ܝ ܘܲܫܬܸܩ ܛܲܠܡܽܘܗ̄ܝ ܘܲܫܠܝܼ ܪܲܓܡܽܘܗ̄ܝ ܘܲܢܦܲܠ܃
00310_46	ܦܵܥܽܘܗ̄ܝ ܘܲܐܘܦܝܼ ܘܠܲܝܬ ܗ̄ܘܵܐ ܐ̄ܢܵܫܵܐ ܕܲܢܦܲܨܽܘܢܵܝܗܝ܀
00310_47	ܠܵܐ ܒܢ̈ܲܝ ܓܸܢܣܵܐ ܐܵܦ ܠܵܐ ܪ̈ܵܚܡܸܐ ܘܠܵܐ ܚܲܒܝܼ̈ܒܸܐ܃
00310_48	ܡܲܠܟܵܐ ܘܡܲܠܟܬܵܐ ܘܥܲܡܵܐ ܠܩܽܘܒܠܸܗ ܘܡܲܢ ܩܵܐܸܡ ܗ̄ܘܵܐ܀
00310_49	ܐܲܠܵܗܵܐ ܕܹܝܢ ܩܲܪܝܼܒ ܗ̄ܘܵܐ ܠܸܗ ܘܡܵܢܸܐ ܟܼܐܦܲܘ̈ܗ̄ܝ܃
00310_50	ܕܲܟܡܵܐ ܒܠܲܥ ܗ̄ܘܵܐ ܘܲܐܝܟܵܐ ܒܠܲܥ ܗ̄ܘܵܐ ܟܲܕ ܠܵܐ ܐܲܣܟܸܠ܀
00310_51	ܘܲܕܓܲܒܝܵܐ ܠܸܗ ܕܢܸܗܘܸܐ ܒܓܲܒܸܗ ܕܲܐܝܢܵܐ ܕܲܛܠܝܼܡ܃
00310_52	ܬܒܲܥ ܫܽܘܩܵܦܲܘ̈ܗ̄ܝ ܘܲܥܒܲܕ ܕܝܼܢܸܗ ܐܲܝܟ ܩܲܪܝܼܒܵܐ܀
00310_53	ܐܸܠܽܘ ܐܝܼܬ ܗ̄ܘܵܐ ܐ̄ܢܵܫܵܐ ܚܠܵܦܲܘܗ̄ܝ ܠܽܘܩܒܲܠ ܡܲܠܟܵܐ܃
00310_54	ܫܵܠܸܐ ܗ̄ܘܵܐ ܠܸܗ ܡܵܪܝܵܐ ܘܡܲܗܡܸܐ ܡܸܢ ܣܽܘܥܪܵܢܸܗ܀
00310_55	ܘܡܸܛܽܠ ܗܵܕܸܐ ܩܵܡ ܐܸܬܓܲܒܲܪ ܡܸܛܽܠܵܬܸܗ܃
00310_56	ܥܲܠ ܕܲܛܠܝܼܡ ܗ̄ܘܵܐ ܘܲܡܓܲܙܲܝ ܗ̄ܘܵܐ ܘܠܲܝܬ ܠܸܗ ܐ̄ܢܵܫܵܐ܀
00310_57	ܡܸܟܝܼܠ ܥܵܕܪܵܐ ܗ̄ܝ ܕܲܕܠܵܐ ܐ̄ܢܵܫܵܐ ܢܸܗܘܸܐ ܠܸܗ ܐ̄ܢܵܫ܃
00310_58	ܕܲܚܠܵܦܲܝܗܽܘܢ ܡܵܪܝܵܐ ܢܸܗܘܸܐ ܥܲܡܸܗ ܒܲܠܚܽܘܕ܀
00310_59	ܡܸܢ ܗܲܘ ܕܲܥܠܝܼܒ ܡܸܢܸܗ ܗܵܘܸܐ ܐܲܝܟܵܐ ܕܼܐܝܬܲܘܗ̄ܝ܃
00310_60	ܛܽܘܒ ܠܲܥܠܝܼ̈ܒܸܐ ܘܲܠܥܵܠܽܘ̈ܒܸܐ ܘܵܝܵܐ ܪܲܒܵܐ܀
00310_61	ܥܠܝܼܒ ܗ̄ܘܵܐ ܩܛܝܼܠܵܐ ܕܪܲܡܝܵܐ ܫܠܲܕܸܗ ܘܲܫܩܝܼܠ ܟܲܪܡܸܗ܃
00310_62	ܘܲܥܠܲܒ ܡܲܠܟܵܐ ܕܲܩܛܲܠ ܘܝܼܪܸܬ ܟܲܕ ܡܸܬܓܲܐܸܐ܀
00310_63	ܘܡܵܪܝܵܐ ܕܙܲܕܝܼܩ ܘܲܬܪܝܼܨ ܦܲܪܥܸܗ ܒܝܼܫܬܵܐ ܕܲܥܒܲܕ܃
00310_64	ܒܪܝܼܟ ܗ̄ܽܘ ܟܼܐܢܵܐ ܕܬܵܒܲܥ ܕܝܼܢܵܐ ܕܟܽܠ ܕܲܛܠܝܼܡܝܼܢ܀
00310_65	ܫܠܸܡ ܡܹܐܡܪܵܐ ܕܥܲܠ ܢܵܒܽܘܬ ܐܝܼܙܲܪܥܠܵܝܵܐ܃