The Comprehensive Aramaic Lexicon

00343_0	ܕܵܠ ܒܸܗ ܛܢܵܢܵܐ ܘܡܲܟܣܵܢܽܘܬܵܐ ܠܽܘܩܒܲܠ ܐܵܚܵܒ܀
00343_1	ܘܣܵܡ ܠܸܐܠܝܼܵܐ ܓܲܒܪܵܐ ܕܲܢܩܸܐ ܠܡܲܟܣܵܢܽܘܬܵܐ܃
00343_2	ܕܗܽܘ ܢܸܦܽܘܩ ܗ̄ܘܵܐ ܠܽܘܩܒܲܠ ܐܵܚܵܒ ܚܲܢܦܵܐ ܪܲܒܵܐ܀
00343_3	ܘܲܩܪܵܝܗ̄ܝ ܡܵܪܝܵܐ ܠܥܲܒܕܸܗ ܟܼܐܢܵܐ ܘܡܲܠܸܠ ܥܲܡܸܗ܃
00343_4	ܕܩܽܘܡ ܚܽܘܬ ܠܽܐܘܪܥܸܗ ܕܵܐܚܵܒ ܡܲܠܟܵܐ ܘܦܲܪܣܵܐ ܙܼܐܦܸܗ܀
00343_5	ܠܟܲܪܡܵܐ ܚܛܝܼܦܵܐ ܗܵܐ ܢܚܸܬ ܢܼܐܪܲܬ ܙܸܠ ܘܸܐܡܲܪ ܠܸܗ܃
00343_6	ܕܲܒܝܵܪܬܽܘܬܵܐ ܠܵܐ ܬܸܬܚܲܕܸܐ ܕܠܲܘ ܕܝܼܠܵܟ ܗ̄ܝܼ܀
00343_7	ܙܸܠ ܘܸܐܡܲܪ ܠܸܗ ܠܗܵܢܵܐ ܕܲܩܛܲܠ ܘܲܣܒܲܪ ܕܝܼܪܸܬ܃
00343_8	ܕܠܝܼ ܐܲܓܥܸܠ ܗ̄ܘܵܐ ܢܵܒܽܘܬ ܟܲܪܡܸܗ ܟܲܕ ܡܵܐܸܬ ܗ̄ܘܵܐ܀
00343_9	ܐ̄ܢܵܐ ܐ̄ܢܵܐ ܝܵܪܬܸܗ ܕܗܲܘ ܬܲܡܝܼܡܵܐ ܘܕܝܼܠܝ ܗ̄ܽܘ ܟܲܪܡܵܐ܃
00344_0	ܘܲܒܝܵܪܬܽܘܬܸܗ ܐܸܢܵܐ ܩܵܡܸܬ ܐܸܥܒܸܕ ܕܝܼܢܸܗ܀
00344_1	ܨܹܝܕ ܩܸܢܝܵܢܵܐ ܕܒܼܐܝ̈ܕܲܝ ܡܲܓܥܲܠ ܡܵܢ ܒܵܥܸܐ ܐܲܢ̄ܬ܃
00344_2	ܠܝܼ ܩܪܵܐ ܘܦܲܩܸܕ ܟܲܕ ܪܵܓܡܝܼܢ ܠܸܗ ܘܠܵܐ ܡܲܗܡܸܐ ܐ̄ܢܵܐ܀
00344_3	ܬܵܒܲܥ ܥܝܵܪܬܸܗ ܐܸܢܵܐ ܕܢܵܒܽܘܬ ܡܸܢ ܟܼܐܢܽܘܬܵܐ܃
00344_4	ܘܟܽܠ ܡܲܢ ܕܲܛܠܝܼܡ ܠܝܼ ܢܛܝܼܪ ܕܝܼܢܸܗ ܘܠܵܐ ܫܵܠܸܐ ܐ̄ܢܵܐ܀
00344_5	ܒܗܵܝ ܕܽܘܟܬܵܐ ܕܠܲܥܘ ܟܲܠܒܸ̈ܐ ܠܲܕܡܸܗ ܢܸܠܥܽܘܢ ܠܲܕܡܵܟ܃
00344_6	ܒܗܲܘ ܓܹܝܪ ܟܲܝܠܵܐ ܕܲܕܡܵܐ ܕܲܐܟܝܼܠܬ ܐܵܦ ܡܸܬܦܲܪܥܲܬ܀
00344_7	ܢܚܸܬ ܥܲܘܵܠܵܐ ܢܼܐܪܲܬ ܟܲܪܡܵܐ ܐܲܝܟ ܕܲܣܒܲܪ ܠܸܗ܃
00344_8	ܘܗܵܐ ܐܸܠܝܼܵܐ ܡܛܵܐ ܐܲܝܟ ܣܲܝܦܵܐ ܕܲܬܪܸܝܢ ܦܽܘܡܲܘ̈ܗ̄ܝ܀
00344_9	ܫܓܝܼܪ ܒܲܛܢܵܢܵܐ ܘܥܲܬܝܼܪܵܐ ܒܸܗ ܡܲܟܣܵܢܽܘܬܵܐ܃
00345_0	ܒܪܽܘܚܵܐ ܪܵܬܲܚ ܘܲܒܟܼܐܢܽܘܬܵܐ ܨܒܝܼ̈ܥܵܢ ܐܲܦܲܘ̈ܗ̄ܝ܀
00345_1	ܡܛܲܝܲܒ ܘܲܠܚܝܼܡ ܕܢܲܟܸܣ ܡܲܠܟܸ̈ܐ ܥܲܠ ܐܲܦܲܝ̈ܗܽܘܢ܃
00345_2	ܘܥܝܼܪ ܠܲܬܒܲܥܬܵܐ ܕܢܸܩܪܸܐ ܠܪܽܘܓܙܵܐ ܥܲܠ ܥܲܘ̈ܵܠܸܐ܀
00345_3	ܪܟܝܼܒ ܥܲܠ ܡܸܠܬܵܐ ܕܩܽܘܫܬܵܐ ܘܪܵܕܸܦ ܠܲܕܒܸܝܬ ܐܵܚܵܒ܃
00345_4	ܘܲܡܠܸܐ ܦܽܘܡܸܗ ܫܪܵܪܵܐ ܡܦܲܪܣܸܐ ܠܕܲܓܵܠܽܘܬܵܐ܀
00345_5	ܓܲܠܝܵܐ ܡܸܠܬܸܗ ܘܪܵܡܝܼܢ ܩܵܠܲܘ̈ܗ̄ܝ ܒܲܬܪܝܼܨܽܘܬܵܐ܃
00345_6	ܘܓܵܙܸܡ ܘܲܬܟܝܼܠ ܕܬܸܗܘܸܐ ܢܩܲܡܬܵܐ ܡܸܢ ܡܵܪ̈ܽܘܕܸܐ܀
00345_7	ܦܵܣܲܥ ܘܲܠܒܝܼܒ ܕܢܸܛܪܽܘܕ ܡܲܠܟܵܐ ܡܸܢ ܝܵܪܬܽܘܬܵܐ܃
00345_8	ܡܙܲܝܲܢ ܒܡܵܪܝܵܐ ܘܡܲܠܟܸ̈ܝܗ݀ ܕܲܐܪܥܵܐ ܠܵܐ ܚܫܝܼܒܝܼܢ ܠܸܗ܀
00345_9	ܢܲܩܝܼܦܵܐ ܠܸܗ ܙܲܕܝܼܩܽܘܬܵܐ ܘܲܬܪܝܼܨܽܘܬܵܐ܃
00346_0	ܘܪܵܗܛܵܐ ܥܲܡܸܗ ܗܲܝܡܵܢܽܘܬܵܐ ܘܲܓܡܝܼܪܽܘܬܵܐ܀
00346_1	ܫܝܼܛ ܠܸܗ ܬܵܓܵܐ ܕܪܝܼܚܵܐ ܕܥܲܘܠܵܐ ܡܚܵܝܗ̄ܝ ܗ̄ܘܵܐ ܡܸܢܸܗ܃
00346_2	ܘܲܠܫܽܘܠܛܵܢܵܐ ܒܵܣܲܪ ܡܲܣܓܸܐ ܘܠܵܐ ܡܸܣܬܲܪܲܕ܀
00346_3	ܘܟܲܕ ܩܵܐܸܡ ܗ̄ܘܵܐ ܒܟܲܪܡܵܐ ܕܲܢܚܸܬ ܢܼܐܪܲܬ ܐܵܚܵܒ܃
00346_4	ܚܙܵܝܗ̄ܝ ܠܸܐܠܝܼܵܐ ܟܲܕ ܐܵܬܸܐ ܗ̄ܘܵܐ ܘܪܲܬ ܥܲܘܵܠܵܐ܀
00346_5	ܢܒܝܼܵܐ ܘܡܲܠܟܵܐ ܐܲܝܟ ܠܸܣܛܵܝܵܐ ܘܡܵܪܸܐ ܒܲܝܬܵܐ܃
00346_6	ܦܓܲܥܘ ܒܲܚܕ̈ܵܕܸܐ ܟܲܕ ܬܲܚܠܽܘܨܵܐ ܠܵܐ ܐܸܣܬܲܬܲܪ܀
00346_7	ܨܵܕܸܗ ܒܟܲܪܡܵܐ ܕܲܩܛܝܼܠ ܡܵܪܸܗ ܡܸܛܽܠܵܬܸܗ܃
00346_8	ܘܲܒܗܸܬ ܡܲܠܟܵܐ ܩܕܵܡ ܚܲܙܵܝܵܐ ܒܲܕܡܵܐ ܕܸܐܫܲܕ܀
00346_9	ܐܵܡܲܪ ܚܲܢܦܵܐ ܗܵܐ ܐܸܫܟܲܚܬܵܢܝ ܗܵܫܵܐ ܒܥܸܠܕܒܵܒܝ܃
00347_0	ܒܥܸܠܕܒܵܒܵܐ ܗ̄ܘܵܐ ܕܒܸܝܬ ܐܲܠܵܗܵܐ ܐܵܦ ܕܲܢܒܝܼܵܐ܀
00347_1	ܚܲܘܝܼ ܢܲܦܫܸܗ ܕܲܟܡܵܐ ܣܵܢܸܐ ܠܥܲܒ̈ܕܲܝ ܡܵܪܝܵܐ܃
00347_2	ܚܲܒܪܵܐ ܕܨܲܠܡܸ̈ܐ ܘܕܲܐܠܵܗ̈ܵܬܵܐ ܕܵܐܡܽܘܪ̈ܵܝܸܐ܀
00347_3	ܒܥܸܠܕܒܵܒܽܘܬܵܐ ܪܲܒܬܵܐ ܐܝܼܬ ܗ̄ܘܵܐ ܒܸܝܬ ܠܸܗ ܠܡܵܪܝܵܐ܃
00347_4	ܕܚܲܒܝܼܒܵܐ ܗ̄ܘܵܐ ܕܟܽܠ ܐܲܠܵܗܸ̈ܐ ܕܲܟܢܲܥܢܵܝܸ̈ܐ܀
00347_5	ܘܥܲܠ ܕܲܙܩܝܼܦ ܗ̄ܘܵܐ ܢܒܝܼܵܐ ܠܩܽܘܒܠܸܗ ܒܡܲܟܣܵܢܽܘܬܵܐ܃
00347_6	ܒܥܸܠܕܒܵܒܸܗ ܗ̄ܘܵܐ ܐܲܝܟ ܕܲܩܪܵܝܗ̄ܝ ܗ̄ܘܵܐ ܘܦܲܪܣܝܼ ܢܲܦܫܸܗ܀
00347_7	ܐܵܡܲܪ ܟܼܐܢܵܐ ܐܲܝܢ ܐܸܫܟܲܚܬܵܟ ܐܲܝܟܲܢ ܕܸܐܡܲܪܬ܃
00347_8	ܠܵܐ ܓܹܝܪ ܡܲܨܝܵܐ ܕܡܸܢ ܐܲܠܵܗܵܐ ܬܟܲܣܸܐ ܥܲܘܠܵܟ܀
00347_9	ܕܡܵܐ ܙܲܟܵܝܵܐ ܡܲܠܝ̈ܵܢ ܐܝܼ̈ܕܲܝܟ ܘܲܐܝܟܲܢ ܬܸܙܟܸܐ܃
00348_0	ܚܛܽܘܦܝܵܐ ܘܒܸܙܬܵܐ ܠܓܲܘ ܡܸܢ ܬܲܪܥܵܟ ܘܲܟܡܵܐ ܬܲܨܠܲܚ܀