← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63403: JS_Elijah (Jacob of Saroug on Elijah)

Click on a word for lexical analysis
Click on a red-colored coordinate for comments and/or translations of the line

▲ earlier lines

00425_2 ܘܲܓܪܲܦ ܐܸܢܽܘܢ ܠܲܒܢ̈ܲܝ ܥܲܘܠܵܐ ܕܸܐܫܬܲܕܲܪܘ ܗ̄ܘܲܘ܀
00425_3 ܐܸܢ ܕܲܐܠܵܗܵܐ ܢܒܝܼܵܐ ܐ̄ܢܵܐ ܠܲܡ ܬܸܚܽܘܬ ܢܽܘܪܵܐ܃
00425_4 ܘܢܸܚܬܲܬ ܡܸܚܕܵܐ ܕܢܲܘܕܲܥ ܡܵܪܝܵܐ ܕܲܢܒܝܼܸܗ ܗ̄ܽܘ܀
00425_5 ܡܩܲܒܲܠ ܗ̄ܘܵܐ ܥܠܲܘܗ̄ܝ ܕܸܐܠܽܘ ܩܪܵܐ ܠܸܗ ܗܽܘ ܢܲܚܸܬ ܗ̄ܘܵܐ܃
00425_6 ܡܵܪܝܵܐ ܕܢܲܣܗܸܕ ܥܲܠ ܐܸܠܝܼܵܐ ܕܲܢܒܝܼܸܗ ܗ̄ܘܵܐ܀
00425_7 ܘܕܲܒܥܵܐ ܢܽܘܪܵܐ ܢܸܚܬܲܬ ܢܽܘܪܵܐ ܐܲܝܟܲܢ ܕܲܦܩܲܕ܃
00425_8 ܕܢܸܪܓܲܫ ܥܵܠܡܵܐ ܕܗܵܢܵܐ ܢܒܝܼܵܐ ܐܝܼܬ ܠܲܐܠܵܗܵܐ܀
00425_9 ܟܽܠܵܗ݀ ܢܽܘܪܵܐ ܕܼܐܝܬ ܗ̄ܘܵܐ ܠܡܵܪܝܵܐ ܡܫܲܕܲܪ ܗ̄ܘܵܐ ܠܸܗ܃
00426_0 ܐܸܢ ܐܵܠܨܵܐ ܗ̄ܘܵܬ ܘܕܲܢܒܝܼܸܗ ܗ̄ܘܵܐ ܠܵܐ ܟܵܦܲܪ ܗ̄ܘܵܐ܀
00426_1 ܐ̄ܚܪܼܢܵܐ ܡܸܕܸܡ ܐܸܠܽܘ ܒܥܵܝܗ̄ܝ ܗ̄ܘܵܐ ܝܵܗܸܒ ܗ̄ܘܵܐ ܠܸܗ܃
00426_2 ܕܢܸܬܗܲܝܡܲܢ ܗ̄ܘܵܐ ܢܒܝܼܵܐ ܪܲܒܵܐ ܐܲܝܟ ܕܼܐܝܬܲܘܗ̄ܝ ܗ̄ܘܵܐ܀
00426_3 ܪܲܒܵܐ ܕܚܲܡܫܝܼܢ ܩܪܵܐ ܗ̄ܘܵܐ ܢܒܝܼܵܐ ܘܸܐܡܲܪ ܠܸܗ ܚܽܘܬ܃
00426_4 ܘܬܲܪܬܸܝܢ ܡܸܠܝܼ̈ܢ ܕܸܐܡܲܪ ܗ̄ܘܵܐ ܠܸܗ ܕܲܠܩܽܘܒܠܵܐ ܗ̄ܘ̈ܲܝ܀
00426_5 ܐܸܢ ܢܒܝܼܵܐ ܗ̄ܘܵܐ ܘܕܲܐܠܵܗܵܐ ܗ̄ܘܵܐ ܐܲܝܟ ܕܸܐܡܲܪ ܠܸܗ܃
00426_6 ܠܡܵܢ ܢܸܚܽܘܬ ܗ̄ܘܵܐ ܕܢܸܪܫܝܼܘܗ̄ܝ ܡܲܠܟܵܐ ܐܲܝܟ ܕܸܐܬܢܲܒܝܼ܀
00426_7 ܐܲܘ ܠܵܐ ܢܸܚܽܘܬ ܐܸܢ ܫܲܪܝܼܪܵܐ ܕܲܢܒܝܼܵܐ ܗ̄ܘܵܐ܃
00426_8 ܘܸܐܢ ܢܵܚܸܬ ܗ̄ܘܵܐ ܐܵܦܠܵܐ ܢܒܝܼܵܐ ܚܫܝܼܒ ܕܼܐܝܬܲܘܗ̄ܝ ܗ̄ܘܵܐ܀
00426_9 ܢܒܝܼܵܐ ܩܪܵܝܗ̄ܝ ܗ̄ܘܵܐ ܘܠܲܘ ܢܸܬܢܲܒܸܐ ܒܵܥܸܐ ܗ̄ܘܵܐ ܠܸܗ܃
00427_0 ܐܸܠܵܐ ܕܢܸܬܬܫܝܼܛ ܘܲܕܢܸܬܩܲܦܲܚ ܥܲܠ ܕܸܐܬܢܲܒܝܼ܀
00427_1 ܫܡܲܥ ܐܸܠܝܼܵܐ ܕܲܩܪܵܝܗ̄ܝ ܢܒܝܼܵܐ ܘܸܐܡܲܪ ܠܸܗ ܚܽܘܬ܃
00427_2 ܒܲܚܕܵܐ ܝܲܩܪܸܗ ܘܒܲܚܕܵܐ ܨܲܥܪܸܗ ܘܸܐܬܡܲܪܡܲܪ ܗ̄ܘܵܐ܀
00427_3 ܘܡܸܚܕܵܐ ܦܲܢܝܼ ܕܸܐܢ ܢܒܝܼܵܐ ܐ̄ܢܵܐ ܘܕܲܐܠܵܗܵܐ ܐ̄ܢܵܐ܃
00427_4 ܠܵܐ ܢܵܚܸܬ ܐ̄ܢܵܐ ܐܸܠܵܐ ܚܠܵܦܲܝ ܢܽܘܪܵܐ ܬܸܚܽܘܬܝ܀
00427_5 ܐܸܢܵܐ ܕܡܵܪܝܵܐ ܘܢܽܘܪܵܐ ܕܡܵܪܝܵܐ ܢܫܲܕܲܪ ܢܽܘܪܵܐ܃
00427_6 ܘܸܐܦܽܘܫ ܐܸܢܵܐ ܘܗܵܐ ܐܸܬܝܲܕܥܲܬ ܕܲܢܒܝܼܵܐ ܐ̄ܢܵܐ܀
00427_7 ܘܲܕܢܲܘܕܲܥ ܗ̄ܘܵܐ ܡܵܪܝܵܐ ܕܣܲܓܝܼ ܢܒܝܼܵܐ ܐܝܼܬܲܘܗ̄ܝ܃
00427_8 ܐܲܝܟܲܢ ܕܲܨܒܵܐ ܢܸܚܬܲܬ ܢܽܘܪܵܐ ܥܲܠ ܪ̈ܲܫܝܼܥܸܐ܀
00427_9 ܐܵܬܵܐ ܒܥܵܐ ܗ̄ܘܵܐ ܢܒܝܼܵܐ ܠܢܽܘܪܵܐ ܕܗܝܼ ܬܲܘܕܲܥ ܗ̄ܘܵܬ܃
00428_0 ܕܸܐܢ ܐܝܼܬܲܘܗ̄ܝ ܗ̄ܘܵܐ ܢܒܝܼܸܗ ܕܡܵܪܝܵܐ ܐܲܘ ܠܵܐ ܐܝܼܬܲܘܗ̄ܝ܀
00428_1 ܘܲܕܢܼܐܠܦܽܘܢ ܗ̄ܘܲܘ ܚܲܢ̈ܦܸܐ ܒܩܽܘܫܬܵܐ ܕܲܢܒܝܼܵܐ ܗ̄ܘܵܐ܃
00428_2 ܢܸܚܬܲܬ ܢܽܘܪܵܐ ܕܢܸܫܪ̈ܵܢ ܡܸܠܲܘ̈ܗ̄ܝ ܕܲܢܒܝܼܵܐ ܗ̄ܘܵܐ܀
00428_3 ܠܚܲܢܦܽܘܬܵܐ ܗܵܝ ܒܫܲܠܗܸܒܝܼܬܵܐ ܡܟܲܘܸܐ ܗ̄ܘܵܐ ܠܵܗ݀܃
00428_4 ܘܟܲܕ ܛܵܒ ܗܵܟܲܢ ܡܲܪܝܼܕܵܐ ܗ̄ܘܵܬ ܡܸܢ ܚܽܘܠܡܵܢܵܐ܀
00428_5 ܢܸܚܬܲܬ ܢܽܘܪܵܐ ܘܸܐܟܠܲܬ ܠܚܲܡܫܝܼܢ ܘܲܠܚܲܕ ܪܲܒܵܐ܃
00428_6 ܘܚܲܢܦܵܐ ܟܪܝܼܗܵܐ ܠܚܝܼܡ ܘܲܡܫܲܕܲܪ ܥܲܠ ܐܸܠܝܼܵܐ܀
00428_7 ܫܽܘܚܢܸܗ ܥܒܸܐ ܗ̄ܘܵܐ ܕܵܐܦܠܵܐ ܟܘܵܝܵܐ ܕܢܽܘܪܵܐ ܓܲܫܸܗ܃
00428_8 ܕܢܸܦܣܽܘܩ ܪܸܕܝܵܗ݀ ܕܗܵܝ ܚܲܢܦܽܘܬܵܐ ܒܝܼܫܬܵܐ ܕܲܐܒܽܘܗ̄ܝ܀
00428_9 ܗܘܵܬ ܫܽܘܚܵܪܵܐ ܓܽܘܕܵܐ ܕܚܲܡܫܝܼܢ ܥܲܠ ܪܝܼܫ ܛܽܘܪܵܐ܃
00429_0 ܘܠܸܒܸܗ ܩܲܫܝܵܐ ܒܕܝܼܠܸܗ ܩܲܘܝܼ ܨܹܝܕ ܚܲܢܦܽܘܬܵܐ܀
00429_1 ܢܦܲܠ ܚܲܕ ܪܲܒܵܐ ܘܸܐܣܦܝܼܪ ܕܝܼܠܸܗ ܡܸܢ ܡܲܠܟܽܘܬܵܐ܃
00429_2 ܘܠܵܐ ܐܸܬܬܘܝܼ ܗ̄ܘܵܐ ܕܢܲܪܦܸܐ ܦܬܲܟܪܸ̈ܐ ܕܼܐܝܙܒܸܠ ܐܸܡܸܗ܀
00429_3 ܠܣܝܼܥܬܵܐ ܕܫܲܕܲܪ ܢܦܲܚ ܐܸܠܝܼܵܐ ܘܥܲܒܕܵܗ݀ ܩܸܛܡܵܐ܃
00429_4 ܘܬܽܘܒ ܠܲܐ̄ܚܪ̈ܵܢܸܐ ܢܫܲܕܲܪ ܥܠܲܘܗ̄ܝ ܡܸܬܚܲܦܲܛ ܗ̄ܘܵܐ܀
00429_5 ܗܵܠܸܝܢ ܕܲܣܠܸܩܘ ܣܵܦܘ ܐܲܝܟ ܓܸ̈ܠܸܐ ܒܫܲܠܗܸܒܝܼܬܵܐ܃
00429_6 ܬܽܘܒ ܟܲܢܸܫ ܠܸܗ ܟܽܘ̈ܒܸܐ ܐ̄ܚܪ̈ܵܢܸܐ ܕܲܢܫܲܕܲܪ ܗ̄ܘܵܐ܀
00429_7 ܥܠܲܘܗ̄ܝ ܐܸܫܵܬܵܐ ܘܢܽܘܪܵܐ ܠܩܽܘܒܠܸܗ ܘܠܵܐ ܕܵܚܸܠ ܗ̄ܘܵܐ܃
00429_8 ܕܠܸܒܵܗ݀ ܩܲܫܝܵܐ ܕܼܐܝܙܒܸܠ ܐܸܡܸܗ ܩܢܸܐ ܗ̄ܘܵܐ ܚܲܢܦܵܐ܀
00429_9 ܘܬܽܘܒ ܫܲܕܲܪ ܗ̄ܘܵܐ ܪܲܒܵܐ ܕܚܲܡܫܝܼܢ ܘܚܲܡܫܝܼܢ ܕܥܲܡܸܗ܃