The Comprehensive Aramaic Lexicon

00514_0	ܗܘܲܘ ܠܸܗ ܒܥܵܠܡܵܐ ܘܟܸܢ ܐܸܬܡܲܛܝܼ ܠܗܵܝ ܪܲܒܽܘܬܵܐ܀
00514_1	ܠܲܟܡܵܐ ܕܲܪܸ̈ܐ ܟܣܲܝ̈ܵܐ ܢܚܸܬ ܗ̄ܘܵܐ ܘܲܙܟܵܐ ܘܲܣܠܸܩ܃
00514_2	ܘܟܸܢ ܐܸܬܵܐ ܠܸܗ ܗܵܢܵܐ ܟܠܝܼܠܵܐ ܕܚܲܝܸ̈ܐ ܚܲܕ̈ܬܸܐ܀
00514_3	ܟܡܵܐ ܐܵܓܽܘ̈ܢܸܐ ܘܩܼܐܪ̈ܣܸܐ ܦܓܲܥܘ ܒܸܗ ܒܥܵܠܡܵܐ ܒܝܼܫܵܐ܃
00514_4	ܘܗܵܝܕܸܝܢ ܥܲܒܪܸܗ ܠܲܐܬܪܵܐ ܕܡܲܘܬܵܐ ܘܲܐܓܗܝܼ ܡܸܢܸܗ܀
00514_5	ܠܲܟܡܵܐ ܦܲܚܸ̈ܐ ܒܽܐܘܪܚܸܗ ܕܥܵܠܡܵܐ ܚܙܵܐ ܕܲܛܡܝܼܪܝܼܢ܃
00514_6	ܘܲܫܘܲܪ ܐܸܢܽܘܢ ܒܥܲܡܠܵܐ ܪܲܒܵܐ ܘܟܸܢ ܐܸܬܢܲܨܲܚ܀
00514_7	ܟܡܵܐ ܟܝܼܡܽܘ̈ܢܸܐ ܢܲܗܙܽܘܗ݀ ܠܸܐܠܦܸܗ ܒܝܲܡܵܐ ܡܝܼܬܵܐ܃
00514_8	ܘܗܵܝܕܸܝܢ ܡܲܛܝܼ ܠܗܵܢܵܐ ܠܡܼܐܢܵܐ ܕܠܵܐ ܡܵܝܽܘ̈ܬܸܐ܀
00514_9	ܟܡܵܐ ܐܸܬܟܲܬܲܫ ܥܲܡ ܫܲܠܝܼܛܵܐ ܕܢܵܛܲܪ ܐܵܐܲܪ܃
00515_0	ܘܲܟܡܵܐ ܙܵܟ̈ܘܵܢ ܐܸܬܢܲܦܲܩ ܗ̄ܘܵܐ ܘܟܸܢ ܐܸܫܬܲܡܲܗ܀
00515_1	ܟܡܵܐ ܗܸܪ̈ܵܬܵܐ ܕܫܼܐܕܸ̈ܐ ܦܓܲܥ ܒܸܗ ܘܠܵܐ ܝܼܕܝܼ̈ܥܵܢ܃
00515_2	ܘܒܵܬܲܪ ܕܲܙܟܵܐ ܒܟܽܠܗܽܘܢ ܕܲܪܸ̈ܐ ܗܘܵܐ ܢܲܨܝܼܚܵܐ܀
00515_3	ܠܲܘ ܗܵܝ ܕܲܣܠܸܩ ܬܸܫܡܲܥ ܒܲܠܚܽܘܕ ܡܵܐ ܕܫܵܡܲܥ ܐܲܢ̄ܬ܃
00515_4	ܐܸܠܵܐ ܕܒܲܐܝܠܸܝܢ ܫܽܘܦܪܸ̈ܐ ܩܵܡ ܗ̄ܘܵܐ ܘܟܸܢ ܐܸܣܬܲܠܲܩ܀
00515_5	ܥܸܠܬܵܐ ܕܲܣܠܸܩ ܗܝܼ ܗܵܝ ܕܲܫܦܲܪ ܒܲܥܒܝܼ̈ܕܵܬܸܗ܃
00515_6	ܠܲܘ ܓܹܝܪ ܡܸܛܽܠ ܕܲܣܠܸܩ ܫܲܦܝܼܪ ܠܲܕܚܵܐܲܪ ܒܸܗ܀
00515_7	ܐܸܠܽܘ ܐܝܼܬ ܗ̄ܘܵܐ ܡܽܘܡܵܐ ܒܫܽܘܦܪܸܗ ܪܽܘܚܵܢܵܝܵܐ܃
00515_8	ܚܵܙܸܐ ܗ̄ܘܵܐ ܠܸܗ ܟܼܐܢܵܐ ܠܡܽܘܡܸܗ ܘܠܵܐ ܡܲܣܸܩ ܠܸܗ܀
00515_9	ܐܸܠܽܘ ܐܝܼܬ ܗ̄ܘܵܐ ܨܵܐܬܵܐ ܒܢܲܦܫܸܗ ܒܚܲܕ ܡܸܢ ܐܸܣܟܝܼܡ܃
00516_0	ܐܸܠܽܘ ܡܛܵܐ ܗ̄ܘܵܐ ܚܛܵܗܵܐ ܕܢܸܛܪܸܐ ܠܦܲܓܪܸܗ ܡܸܡܬܽܘܡ܀
00516_1	ܐܸܠܽܘ ܦܓܲܥ ܒܸܗ ܚܲܕ ܣܽܘܓܦܵܢܵܐ ܐܲܘ ܒܽܘܨܵܪܵܐ܃
00516_2	ܐܸܠܽܘ ܕܵܠ ܒܸܗ ܚܽܘܫܵܒܵܐ ܚܲܕ ܕܡܲܘܠܸܕ ܡܲܘܬܵܐ܀
00516_3	ܐܸܠܽܘ ܐܸܬܬܚܸܕ ܒܲܚܕܵܐ ܡܸܠܬܵܐ ܕܠܵܐ ܫܲܦܝܼܪܵܐ܃
00516_4	ܐܸܠܽܘ ܕܲܘܕܸܗ ܚܲܕ ܣܽܘܥܪܵܢܵܐ ܥܵܠܡܵܢܵܝܵܐ܀

00516_5	ܐܸܠܽܘ ܨܵܕܸܗ ܚܲܕ ܡܸܢ ܦܲܚܸ̈ܐ ܕܲܪ̈ܓܝܼܓܵܬܵܐ܃

00516_6	ܐܸܠܽܘ ܨܠܵܐ ܗ̄ܘܵܐ ܚܙܵܬܸܗ ܒܪܸܓܬܵܐ ܥܲܠ ܨܸܒ̈ܘܵܬܵܐ܀
00516_7	ܐܸܠܽܘ ܫܕܵܬ ܒܸܗ ܚܛܝܼܬܵܐ ܢܝܼܒܵܗ݀ ܐܲܝܟ ܕܲܡܥܵܕܵܐ܃
00516_8	ܐܸܠܽܘ ܢܲܟܬܸܗ ܚܲܕ ܡܸܢ ܚܲܫܸ̈ܐ ܕܲܪ̈ܓܝܼܓܵܬܵܐ܀
00516_9	ܐܸܠܽܘ ܗܘܵܐ ܒܸܗ ܚܲܕ ܡܸܢ ܡܽܘ̈ܡܸܐ ܦܲܓܪ̈ܵܢܵܝܸܐ܃
00517_0	ܐܸܠܽܘ ܢܦܲܠ ܗ̄ܘܵܐ ܚܲܕ ܡܸܢ ܙܲܘܥܲܘ̈ܗ̄ܝ ܡܸܢ ܐܲܠܵܗܵܐ܀
00517_1	ܐܸܠܽܘ ܢܚܸܬ ܗ̄ܘܵܐ ܗܲܘܢܸܗ ܠܥܵܠܡܵܐ ܕܲܢܕܲܝܲܪ ܒܸܗ܃
00517_2	ܦܵܐܸܫ ܗ̄ܘܵܐ ܠܸܗ ܘܠܲܐܝܟܵܐ ܕܲܣܠܸܩ ܠܵܐ ܣܵܠܸܩ ܗ̄ܘܵܐ܀
00517_3	ܥܲܠ ܕܲܙܗܸܐ ܗ̄ܘܵܐ ܫܲܦܝܼܪ ܘܲܚܣܸܐ ܘܠܲܝܬ ܒܸܗ ܡܽܘܡܵܐ܃
00517_4	ܐܸܬܥܲܠܝܼ ܗ̄ܘܵܐ ܠܲܐܬܪܵܐ ܕܡܽܘ̈ܡܸܐ ܠܵܐ ܥܵܐܠܝܼܢ ܠܸܗ܀
00517_5	ܡܲܢ ܕܹܝܢ ܝܲܗ̄ܒ ܠܵܗ݀ ܐܲܬܪܵܐ ܠܡܸܠܲܬܝ ܬܸܬܢܸܐ ܫܽܘܦܪ̈ܲܘܗ̄ܝ܃
00517_6	ܡܸܢ ܛܲܠܝܽܘܬܸܗ ܕܒܲܐܝܠܸܝܢ ܚܲܝܸ̈ܐ ܐܸܬܪܲܒܝܼ ܗ̄ܘܵܐ܀
00517_7	ܡܲܢ ܕܹܝܢ ܝܲܗ̄ܒ ܠܝܼ ܟܬܵܒܵܐ ܐܝܼܕܵܐ ܐܸܚܽܘܪ ܘܸܐܚܙܸܝܘܗ̄ܝ܃
00517_8	ܒܲܥܠܲܝܡܽܘܬܸܗ ܟܡܵܐ ܢܲܨܝܼܚ ܗ̄ܘܵܐ ܒܩܲܕܝܼܫܽܘܬܵܐ܀
00517_9	ܡܚܲܦܲܝ ܗ̄ܘܵܐ ܡܸܢܝ ܫܽܘܦܪܸܗ ܪܵܡܵܐ ܘܪܽܘܚܵܢܵܝܵܐ܃
00518_0	ܕܲܐܝܟܲܢ ܫܲܪܝܼ ܒܪܲܗܛܵܐ ܕܽܐܘܪܚܸܗ ܨܹܝܕ ܐܲܠܵܗܵܐ܀
00518_1	ܟܬܵܒܵܐ ܫܲܪܒܸܗ ܗܵܪܟܵܐ ܚܲܘܝܼ ܠܥܵܠܡܵܐ ܒܲܠܚܽܘܕ܃
00518_2	ܐܲܝܟܵܐ ܕܲܟܠܵܐ ܡܸܛܪܵܐ ܘܛܲܠܵܐ ܡܸܛܽܠ ܐܵܚܵܒ܀
00518_3	ܥܕܲܡܵܐ ܠܗܵܪܟܵܐ ܟܲܣܝܵܐ ܗ̄ܝ ܐܽܘܪܚܵܐ ܕܙܲܕܝܼܩܽܘܬܸܗ܃
00518_4	ܘܫܽܘܦܪܵܐ ܕܪܲܗܛܸܗ ܘܲܡܝܲܬܪܽܘܬܵܐ ܕܲܒܬܽܘܠܽܘܬܸܗ܀
00518_5	ܡܸܢ ܗܵܐ ܡܸܟܵܐ ܫܲܪܝܼ ܟܬܵܒܵܐ ܕܢܸܬܢܸܐ ܫܲܪܒܸܗ܃
00518_6	ܕܒܲܚܕܵܐ ܡܸܠܬܵܐ ܐ̄ܣܲܪ ܠܲܫܡܲܝܵܐ ܒܥܲܘܠܸܗ ܕܵܐܚܵܒ܀
00518_7	ܪܢܝܼ ܐܲܢ̄ܬ ܗܵܫܵܐ ܕܲܩܕܵܡ ܗܵܢܵܐ ܥܒܵܕܵܐ ܪܲܒܵܐ܃
00518_8	ܟܡܵܐ ܦܽܘ̈ܠܚܵܢܸܐ ܘܥܲܡ̈ܠܸܐ ܗܘܲܘ ܠܸܗ ܨܹܝܕ ܐܲܠܵܗܵܐ܀
00518_9	ܘܡܸܛܽܠܗܵܢܵܐ ܚܲܦܝܼ ܟܬܵܒܵܐ ܥܲܠ ܕܽܘܒܵܪ̈ܲܘܗ̄ܝ܃
00519_0	ܕܪܵܡܝܼܢ ܗ̄ܘܲܘ ܠܸܗ ܘܠܵܐ ܡܸܫܟܲܚ ܗ̄ܘܵܐ ܢܡܲܠܸܠ ܐܸܢܽܘܢ܀