The Comprehensive Aramaic Lexicon

00510_0	ܕܠܵܐ ܓܫܲܦ ܗ̄ܘܵܐ ܒܸܗ ܥܒܵܪ ܦܽܘܩܕܵܢܵܐ ܕܗܽܘܝܽܘ ܩܲܛܸܠ܀
00510_1	ܢܛܲܪ ܒܲܩܢܽܘܡܸܗ ܗܲܘ ܢܵܡܽܘܣܵܐ ܪܽܘܚܵܢܵܝܵܐ܃
00510_2	ܥܕܲܡܵܐ ܕܢܸܗܘܸܐ ܠܵܐ ܡܵܝܽܘܬܵܐ ܒܚܲܝܸ̈ܐ ܕܲܪܚܸܡ܀
00510_3	ܕܲܟܡܵܐ ܫܽܘܦܪ̈ܝܼܢ ܐܝܼܬ ܠܸܐܠܝܼܵܐ ܬܡܝܼܗ ܕܽܘܒܵܪܸ̈ܐ܃
00510_4	ܣܵܦܩܵܐ ܕܬܸܣܗܲܕ ܗܵܝ ܕܵܐܦܠܵܐ ܡܝܼܬ ܡܸܛܽܠ ܫܽܘܦܪ̈ܲܘܗ̄ܝ܀
00510_5	ܗܵܝ ܡܲܪܟܲܒܬܵܐ ܫܓܝܼܪܬܵܐ ܕܢܽܘܪܵܐ ܕܸܐܣܬܲܠܲܩ ܒܵܗ݀܃
00510_6	ܡܚܲܘܝܵܐ ܠܥܵܠܡܵܐ ܕܲܟܡܵܐ ܓܡܝܼܪ ܗ̄ܘܵܐ ܒܫܽܘܦܪܸ̈ܐ ܕܲܠܓܲܘ܀
00510_7	ܢܽܘܪܵܐ ܕܢܸܚܬܲܬ ܒܵܬܪܸܗ ܠܲܐܪܥܵܐ ܕܢܸܬܥܲܠܸܐ ܒܵܗ݀܃
00510_8	ܡܚܲܘܝܵܐ ܕܲܟܡܵܐ ܪܬܲܚ ܗ̄ܘܵܐ ܚܽܘܒܸܗ ܒܚܲܝܸ̈ܐ ܕܲܠܥܸܠ܀
00510_9	ܐܽܘܪܚܸܗ ܕܪܸܗܛܲܬ ܒܲܝܢܵܬ ܓܽܘܡܪܸ̈ܐ ܕܫܲܠܗܸܒܝܼܬܵܐ܃
00511_0	ܡܲܨܝܵܐ ܕܬܲܠܸܦ ܕܢܽܘܪܵܢܵܐ ܗ̄ܘܵܐ ܒܲܥܒܝܼ̈ܕܵܬܸܗ܀
00511_1	ܗܽܘ ܕܹܝܢ ܗܵܢܵܐ ܝܲܡܵܐ ܕܫܽܘܦܪܸ̈ܐ ܓܲܙܵܐ ܕܡܼܐܡܪܸ̈ܐ܃
00511_2	ܣܝܼܡܬܵܐ ܕܫܲܪ̈ܒܸܐ ܪܵܡ ܕܽܘܒܵܪܸ̈ܐ ܫܒܝܼܚ ܣܽܘܥܪ̈ܵܢܸܐ܀
00511_3	ܓܡܝܼܪܵܐ ܕܟܽܠܝܽܘܡ ܚܲܣܝܵܐ ܕܟܽܠܫܵܥ ܬܽܘܒ ܬܵܒܲܥ ܠܝܼ܃
00511_4	ܕܬܽܘܒ ܢܸܬܡܲܠܲܠ ܫܲܪܒܸܗ ܒܬܸܗܪܵܐ ܨܹܝܕ ܫܵܡܽܘ̈ܥܸܐ܀
00511_5	ܘܲܒܡܽܘܢ ܘܲܐܝܟܲܢ ܡܸܬܡܲܠܲܠ ܒܝܼ ܡܼܐܡܪܸܗ ܪܲܒܵܐ܃
00511_6	ܕܲܙܥܽܘܪ ܗ̄ܽܘ ܦܽܘܡܝ ܕܲܢܓܝܼܚ ܫܽܘܦܪ̈ܲܘܗ̄ܝ ܒܸܐܣܟܼܡܲܝ̈ܗܽܘܢ܀
00511_7	ܒܚܽܘܒܵܐ ܕܼܐܝܬܲܘܗ̄ܝ ܐܲܝܟ ܠܸܫܵܢܵܐ ܕܫܲܠܗܸܒܝܼܬܵܐ܃
00511_8	ܢܡܲܠܸܠ ܫܲܪܒܸܗ ܕܵܐܦ ܗܽܘ ܒܢܽܘܪܵܐ ܐܸܬܥܲܠܝܼ ܗ̄ܘܵܐ܀
00511_9	ܐܸܠܽܘ ܚܽܘܒܵܐ ܠܵܐ ܡܓܲܪܸܓ ܠܝܼ ܥܲܠ ܢܸܨܚܸܢܲܘ̈ܗ̄ܝ܃
00512_0	ܙܲܘܥܵܐ ܕܡܼܐܡܪܸܗ ܡܣܲܪܸܕ ܗ̄ܘܵܐ ܠܝܼ ܕܠܵܐ ܐܸܩܪܽܘܒ ܠܸܗ܀
00512_1	ܗܵܟܲܢ ܘܲܠܟܽܘܢ ܚܽܘܒܵܐ ܡܓܲܪܸܓ ܠܲܡܩܲܒܵܠܽܘ܃