The Comprehensive Aramaic Lexicon

00524_1	ܘܡܸܛܽܠܗܵܢܵܐ ܙܵܥܸܬ ܐܸܢܵܐ ܡܸܢ ܩܽܘܠܵܣܲܘ̈ܗ̄ܝ܃
00524_2	ܘܠܵܐ ܡܲܡܪܲܚ ܐ̄ܢܵܐ ܐܸܣܚܸܐ ܒܝܲܡܵܐ ܕܫܲܦܝܼܪ̈ܵܬܸܗ܀
00524_3	ܡܸܢ ܟܲܕ ܫܲܪܝܼ ܟܬܵܒܵܐ ܒܫܲܪܒܸܗ ܢܸܚܙܸܐ ܫܽܘܦܪ̈ܲܘܗ̄ܝ܃
00524_4	ܡܸܢܸܗ ܘܲܠܗܲܠ ܪܵܡܝܼܢ ܘܲܟܣܸܝܢ ܡܸܢ ܝܼܕܲܥܬܵܐ܀
00524_5	ܢܸܕܲܥ ܗܵܕܸܐ ܥܲܠ ܡܽܘ̈ܫܚܵܬܵܐ ܣܲܓܝܼ̈ܵܐܬܵܐ܃
00524_6	ܥܒܲܪ ܐܸܠܝܼܵܐ ܘܟܸܢ ܠܲܫܡܲܝܵܐ ܡܛܵܐ ܢܸܐܣܽܘܪ ܗ̄ܘܵܐ܀
00524_7	ܘܬܽܘܒ ܡܸܢ ܬܲܡܵܢ ܪ̈ܲܘܡܸܐ ܐ̄ܚܪ̈ܵܢܸܐ ܐܸܬܥܲܠܝܼ ܗ̄ܘܵܐ܃
00524_8	ܒܲܓܡܝܼܪܽܘܬܵܐ ܘܟܸܢ ܡܲܪܟܲܒܬܵܐ ܒܵܬܪܸܗ ܢܸܚܬܲܬ܀
00524_9	ܡܸܢ ܛܲܠܝܽܘܬܸܗ ܫܩܲܠ ܗ̄ܘܵܐ ܢܝܼܪܵܐ ܕܙܲܕܝܼܩܽܘܬܵܐ܃
00525_0	ܘܒܲܥܠܲܝܡܽܘܬܸܗ ܩܵܡ ܗ̄ܘܵܐ ܒܕܲܪܓܵܐ ܕܪܽܘܚܵܢܽܘܬܵܐ܀
00525_1	ܘܸܐܣܬܲܝܲܟܘ ܒܸܗ ܟܽܠܗܽܘܢ ܫܽܘܦܪܸ̈ܐ ܕܲܓܡܝܼܪܽܘܬܵܐ܃
00525_2	ܘܗܵܝܕܸܝܢ ܡܲܛܝܼ ܕܢܸܫܪܸܐ ܘܢܸܐܣܽܘܪ ܐܲܠܵܗܵܐܝܼܬ܀
00525_3	ܒܲܝܬܵܝܽܘܬܵܐ ܪܲܒܬܵܐ ܗܘܵܬ ܠܸܗ ܥܲܡ ܐܲܠܵܗܵܐ܃
00525_4	ܘܟܸܢ ܐܸܫܬܲܠܲܛ ܥܲܠ ܒܸܪ̈ܝܵܬܵܐ ܕܢܸܦܩܽܘܕ ܐܸܢܸܝܢ܀
00525_5	ܐܸܬܓܲܘܝܼ ܗ̄ܘܵܐ ܥܕܲܡܵܐ ܕܢܸܥܡܲܪ ܒܲܐܠܵܗܽܘܬܵܐ܃
00525_6	ܘܟܸܢ ܐܲܝܟ ܡܵܪܵܐ ܦܩܲܕ ܠܲܟܝܵܢܸ̈ܐ ܕܢܸܫܬܲܡܥܽܘܢ ܠܸܗ܀
00525_7	ܐܸܬܕܲܪܲܓ ܗ̄ܘܵܐ ܒܲܡܝܲܬܪܽܘܬܵܐ ܘܲܒܕܲܟܝܽܘܬܵܐ܃
00525_8	ܥܕܲܡܵܐ ܕܢܸܗܘܸܐ ܐ̄ܢܵܫܵܐ ܓܡܝܼܪܵܐ ܒܚܲܝܸ̈ܐ ܚܲܕ̈ܬܸܐ܀
00525_9	ܗܘܵܐ ܗ̄ܘܵܐ ܢܲܘܣܵܐ ܪܲܒܵܐ ܘܕܲܟܝܵܐ ܠܲܐܠܵܗܽܘܬܵܐ܃
00526_0	ܘܸܐܫܬܲܡܫܲܬ ܒܸܗ ܩܲܕܝܼܫܽܘܬܵܐ ܐܲܝܟ ܨܸܒܝܵܢܸܗ܀
00526_1	ܒܡܲܟܝܼܟܽܘܬܵܐ ܥܡܲܪ ܒܸܗ ܒܥܵܠܡܵܐ ܕܠܵܐ ܢܸܪܓܲܫ ܒܸܗ܃
00526_2	ܥܕܲܡܵܐ ܕܲܩܢܵܐ ܟܽܠܗܽܘܢ ܫܽܘܦܪܸ̈ܐ ܕܲܓܡܝܼܪܽܘܬܵܐ܀
00526_3	ܡܸܢ ܕܸܐܬܐܲܣܢܲܬ ܢܲܦܫܸܗ ܒܚܲܝܠܵܐ ܕܓܲܢ̄ܒܵܪܽܘܬܵܐ܃
00526_4	ܦܩܲܕ ܠܲܟܝܵܢܸ̈ܐ ܡܵܪܵܢܵܐܝܼܬ ܘܲܐܠܵܗܵܐܝܼܬ܀
00526_5	ܡܸܢ ܕܲܗܘܵܐ ܚܲܕ ܥܲܡ ܐܲܠܵܗܵܐ ܒܲܚܕܵܐ ܪܽܘܚܵܐ܃
00526_6	ܐܸܫܬܲܠܲܛ ܗ̄ܘܵܐ ܕܲܠܒܸܪ̈ܝܵܬܵܐ ܢܲܪܗܸܒ ܐܸܢܸܝܢ܀
00526_7	ܩܝܵܡܬܵܐ ܕܡܝܼ̈ܬܸܐ ܗܽܘ ܩܲܕܡܵܝܲܬ ܚܲܘܝܼ ܒܲܐܪܥܵܐ܃
00526_8	ܐܵܬܵܐ ܐ̄ܚܪܼܬܵܐ ܕܠܵܐ ܐܸܬܚܲܙܝܲܬ ܐܸܠܵܐ ܡܸܢܸܗ܀
00526_9	ܓܸܐܪܵܐ ܩܲܕܡܵܐ ܗܽܘ ܫܕܵܐ ܒܡܲܘܬܵܐ ܕܢܲܪܦܸܐ ܓܸܙܪܸܗ܃
00527_0	ܘܲܚܛܲܦ ܡܸܢܸܗ ܛܲܠܝܵܐ ܒܚܲܝܸ̈ܐ ܘܝܲܗܒܸܗ ܠܸܐܡܸܗ܀
00527_1	ܥܒܲܕ ܥܲܡ ܡܲܘܬܵܐ ܕܲܪܵܐ ܘܚܲܣܢܸܗ ܘܲܐܥܕܝܼ ܠܲܚܡܸܗ܃
00527_2	ܘܟܸܢ ܐܸܬܵܐ ܠܸܗ ܟܠܝܼܠܵܐ ܕܚܲܝܸ̈ܐ ܕܵܐܦܠܵܐ ܢܡܽܘܬ܀
00527_3	ܚܲܠܨܵܗ݀ ܠܲܫܝܽܘܠ ܘܲܫܩܲܠ ܡܸܢܵܗ݀ ܚܲܕ ܥܲܢܝܼܕܵܐ܃
00527_4	ܘܲܪܓܝܼܙܽܘܬܵܐ ܪܲܒܬܵܐ ܥܒܲܕ ܒܵܗ݀ ܕܠܵܐ ܢܸܥܽܘܠ ܠܵܗ݀܀
00527_5	ܓܲܫܸܗ ܠܡܲܘܬܵܐ ܒܚܲܕ ܕܲܐܦܸܩ ܗ̄ܘܵܐ ܡܸܢ ܒܸܝܬ ܫܸܢܲܘ̈ܗ̄ܝ܃
00527_6	ܕܲܦܫܝܼܩ ܢܚܽܘܒ ܡܸܢ ܫܽܘܠܛܵܢܵܗ݀ ܕܲܓܡܝܼܪܽܘܬܵܐ܀
00527_7	ܚܽܘܪ ܒܸܐܠܝܼܵܐ ܟܡܵܐ ܡܫܲܡܠܲܝ ܗ̄ܘܵܐ ܒܪܽܘܚܵܢܽܘܬܵܐ܃
00527_8	ܕܠܲܘ ܗܽܘ ܠܵܐ ܡܝܼܬ ܐܸܠܵܐ ܡܝܼܬܵܐ ܐ̄ܚܪܼܢܵܐ ܐܲܚܝܼ܀
00527_9	ܡܚܽܘܬܵܐ ܪܲܒܬܵܐ ܡܚܵܝܗ̄ܝ ܗ̄ܘܵܐ ܠܡܲܘܬܵܐ ܕܢܸܕܚܲܠ ܡܸܢܸܗ܃
00528_0	ܒܡܝܼܬܵܐ ܕܲܐܚܝܼ ܘܲܒܢܽܘܚܵܡܵܐ ܪܲܒܵܐ ܕܲܕܢܲܚ܀
00528_1	ܘܒܵܬܲܪ ܗܵܢܵܐ ܥܒܵܕܵܐ ܪܲܒܵܐ ܕܸܐܫܬܲܡܲܫ ܒܸܗ܃
00528_2	ܟܸܢ ܡܸܢ ܥܵܠܡܵܐ ܒܙܲܘܚܵܐ ܢܸܣܲܩ ܐܸܬܡܲܛܝܼ ܗ̄ܘܵܐ܀
00528_3	ܒܵܬܲܪ ܕܲܦܠܲܚ ܡܸܢ ܛܲܠܝܽܘܬܸܗ ܥܲܡ ܐܲܠܵܗܵܐ܃
00528_4	ܒܵܬܲܪ ܕܲܫܕܵܐ ܥܵܠܡܵܐ ܠܒܸܣܬܪܸܗ ܡܸܛܽܠ ܣܲܒܪܵܐ܀
00528_5	ܒܵܬܲܪ ܕܲܪܗܸܛ ܒܲܥܠܲܝܡܽܘܬܸܗ ܪܽܘܚܵܢܵܐܝܼܬ܃
00528_6	ܒܵܬܲܪ ܕܲܢܨܲܚ ܒܲܒܬܽܘܠܽܘܬܵܐ ܕܠܲܝܬ ܐܲܟܘܵܬܵܗ݀܀
00528_7	ܒܵܬܲܪ ܕܲܚܝܵܐ ܒܩܲܕܝܼܫܽܘܬܵܐ ܥܲܡ ܐܲܠܵܗܵܐ܃
00528_8	ܒܵܬܲܪ ܕܲܣܢܵܐ ܠܲܕܡܸܬܚܲܙ̈ܝܵܢ ܘܲܛܥܵܐ ܐܸܢܸܝܢ܀
00528_9	ܒܵܬܲܪ ܕܲܐܕܪܸܟ ܪܲܘܡܵܐ ܘܥܽܘܡܩܵܐ ܦܬܵܝܵܐ ܘܽܐܘܪܟܵܐ܃
00529_0	ܒܵܬܲܪ ܕܲܐܡܠܸܟ ܥܲܠ ܝܼܕܲܥܬܵܐ ܕܲܐܠܵܗܽܘܬܵܐ܀
00529_1	ܒܵܬܲܪ ܕܲܩܢܵܐ ܟܽܠܸܗ ܣܵܟܵܐ ܕܲܓܡܝܼܪܽܘܬܵܐ܃