The Comprehensive Aramaic Lexicon

00532_5	ܒܵܬܲܪ ܗܵܠܸܝܢ ܟܽܠܗܽܘܢ ܫܽܘܦܪܸ̈ܐ ܪ̈ܵܡܸܐ ܕܲܩܢܵܐ܃
00532_6	ܫܲܩܠܽܘܗ̄ܝ ܡܸܟܵܐ ܕܢܸܣܲܩ ܢܸܥܡܲܪ ܒܸܝܬ ܫܲܦܝܼܪܸ̈ܐ܀
00532_7	ܒܵܬܲܪ ܕܲܢܗܲܪ ܡܸܢ ܓܸܠܝܵܢܸ̈ܐ ܕܲܒܛܽܘܪ ܣܝܼܢܲܝ܃
00532_8	ܘܕܸܠܩܲܬ ܢܲܦܫܸܗ ܐܲܝܟ ܓܲܘܙܲܠܬܵܐ ܒܚܸܙܘܵܐ ܕܲܠܥܸܠ܀
00532_9	ܘܸܐܬܚܲܙܝܲܬ ܠܸܗ ܫܟܝܼܢܬܵܐ ܕܐ̄ܪ̈ܵܙܸܐ ܘܲܡܪܲܩܬܸܗ ܗ̄ܘܵܬ܃
00533_0	ܘܠܵܐ ܦܵܫܲܬ ܒܸܗ ܡܢܵܬܸܗ ܕܥܵܠܡܵܐ ܕܠܵܐ ܐܸܬܓܲܡܪܲܬ܀
00533_1	ܘܲܣܠܸܩ ܗ̄ܘܵܐ ܠܸܗ ܒܗܲܘܢܸܗ ܕܢܸܥܡܲܪ ܥܲܡ ܐܲܠܵܗܵܐ܃
00533_2	ܘܲܢܚܸܬ ܗ̄ܘܵܐ ܠܸܗ ܪܵܡܵܐ ܠܘܵܬܸܗ ܕܲܢܕܲܝܲܪ ܒܸܗ܀
00533_3	ܘܠܲܘ ܥܸܕܵܢܸ̈ܐ ܦܪܝܼܫܝܼܢ ܗ̄ܘܲܘ ܠܸܗ ܠܲܓܡܝܼܪܽܘܬܵܐ܃
00533_4	ܕܟܽܠܗܽܘܢ ܚܲܝܲܘ̈ܗ̄ܝ ܥܲܡ ܐܲܠܵܗܵܐ ܚܠܝܼܛ ܗ̄ܘܵܐ ܙܲܗܝܵܐ܀
00533_5	ܘܠܵܐ ܣܵܠܸܩ ܗ̄ܘܵܐ ܒܲܡܝܲܬܪܽܘܬܵܐ ܘܬܽܘܒ ܢܵܚܸܬ ܗ̄ܘܵܐ܃
00533_6	ܕܡܸܢ ܟܲܕ ܫܲܪܝܼ ܠܥܸܠ ܐܸܣܬܲܝܲܟ ܒܲܓܡܝܼܪܽܘܬܵܐ܀
00533_7	ܘܟܲܕ ܠܵܐ ܐܝܼܬ ܒܸܗ ܡܢܵܬܵܐ ܕܨܵܠܝܵܐ ܠܥܵܠܡܵܐ ܕܢܸܚܙܸܝܘܗ̄ܝ܃
00533_8	ܨܒܵܐ ܥܸܠܵܝܵܐ ܕܢܲܣܩܸܗ ܠܪܲܘܡܵܐ ܠܒܲܪ ܬܲܚ̈ܬܵܝܸܐ܀
00533_9	ܨܒܵܐ ܕܢܸܬܸܠ ܠܸܗ ܟܠܝܼܠܵܐ ܕܚܲܝܸ̈ܐ ܠܵܐ ܡܵܝܽܘܬܵܐ܃
00534_0	ܗܲܘ ܕܲܣܚܲܦ ܗ̄ܘܵܐ ܡܸܢܸܗ ܕܵܐܕܵܡ ܟܲܕ ܐܲܬܦܲܪܣܝܼ܀
00534_1	ܨܒܵܐ ܕܲܢܟܲܠܠܸܗ ܥܲܠ ܕܲܐܓܽܘܢܵܐ ܥܒܲܕ ܫܲܦܝܼܪܵܐ܃
00534_2	ܒܥܵܠܡܵܐ ܕܼܐܝܬܲܘܗ̄ܝ ܒܸܝܬ ܚܸܙܘܵܢܸ̈ܐ ܠܲܕܝܵܕܲܥ ܠܸܗ܀
00534_3	ܨܒܵܐ ܕܢܸܬܸܠ ܠܸܗ ܕܵܫܢܵܐ ܕܚܲܝܸ̈ܐ ܠܗܲܘ ܟܲܫܝܼܪܵܐ܃
00534_4	ܥܲܠ ܕܲܐܝܟ ܛܲܪܩܵܐ ܪܗܸܛ ܒܲܐܬܠܝܼ̈ܣܸܐ ܕܙܲܕܝܼܩܽܘܬܵܐ܀
00534_5	ܨܒܵܐ ܕܲܢܥܲܠܝܼܘܗ̄ܝ ܡܸܢ ܥܵܡܲܪܬܵܐ ܕܡܲܠܝܵܐ ܚܲܫܸ̈ܐ܃
00534_6	ܥܲܠ ܕܲܚܙܵܝܗ̄ܝ ܗ̄ܘܵܐ ܕܟܲܕ ܥܵܡܲܪ ܒܵܗ݀ ܠܵܐ ܪܵܚܸܡ ܠܵܗ݀܀
00534_7	ܨܒܵܐ ܒܸܗ ܕܢܲܣܩܸܗ ܕܢܸܥܒܸܕ ܥܽܘܡܪܸܗ ܒܸܝܬ ܪ̈ܽܘܚܵܢܸܐ܃
00534_8	ܥܲܠ ܕܲܣܢܵܐ ܗ̄ܘܵܐ ܟܽܠܗܽܘܢ ܦܸܓ̈ܥܸܐ ܦܲܓܪ̈ܵܢܵܝܸܐ܀
00534_9	ܨܒܵܐ ܕܢܸܬܸܠ ܠܸܗ ܐܲܬܪܵܐ ܒܥܵܠܡܸܗ ܠܵܐ ܚܵܫܽܘܫܵܐ܃
00535_0	ܥܲܠ ܕܲܐܪܓܸܫ ܗ̄ܘܵܐ ܕܗܵܢܵܐ ܐܲܬܪܵܐ ܠܲܘ ܕܝܼܠܸܗ ܗ̄ܘܵܐ܀
00535_1	ܨܒܵܐ ܕܲܢܥܲܠܝܼܘܗ̄ܝ ܡܸܢ ܓܲܘ ܥܽܘܡܩܵܐ ܕܲܡܠܸܐ ܦܲܚܸ̈ܐ܃
00535_2	ܠܲܐܬܪܵܐ ܪܵܡܵܐ ܕܲܦܸܐܐ ܘܲܡܪܝܼܕ ܡܸܢ ܒܝܼ̈ܫܵܬܵܐ܀
00535_3	ܨܒܵܐ ܒܸܗ ܡܸܛܽܠ ܟܽܠܗܽܘܢ ܫܽܘܦܪ̈ܲܘܗ̄ܝ ܪ̈ܽܘܚܵܢܵܝܸܐ܃
00535_4	ܕܥܲܡ ܪ̈ܽܘܚܵܢܸܐ ܢܲܣܩܸܗ ܢܕܲܝܲܪ ܒܸܝܬ ܟܸܢܫܲܝ̈ܗܽܘܢ܀
00535_5	ܨܒܵܐ ܗ̄ܘܵܐ ܘܲܪܡܲܙ ܡܵܪܵܐ ܟܲܣܝܵܐ ܠܥܲܒܕܵܐ ܛܵܒܵܐ܃
00535_6	ܕܬܵܐ ܠܵܟ ܠܲܐܝܵܐ ܢܽܘܚ ܡܸܢ ܥܲܡܠܵܟ ܘܲܪܕܝܼܦܽܘܬܵܟ܀
00535_7	ܬܵܐ ܢܲܨܝܼܚܵܐ ܥܽܘܠ ܠܲܓܢܽܘܢܵܐ ܕܚܲܝܸ̈ܐ ܚܲܕ̈ܬܸܐ܃
00535_8	ܕܠܵܐ ܫܵܘܸܐ ܠܵܟ ܡܲܘܬܵܐ ܝܲܥܢܵܐ ܕܬܸܗܘܸܐ ܠܲܚܡܸܗ܀
00535_9	ܬܲܪ̈ܥܲܝ ܪܲܘܡܵܐ ܗܵܐ ܦܬܝܼܚܝܼܢ ܠܵܟ ܥܽܘܠ ܩܲܕܝܼܫܵܐ܃
00536_0	ܕܠܵܐ ܢܸܬܟܲܦܲܦ ܪܝܼܫܵܟ ܪܵܡܵܐ ܒܬܲܪܥܵܗ݀ ܕܲܫܝܽܘܠ܀
00536_1	ܒܪܸܡܙܵܐ ܟܲܣܝܵܐ ܙܵܥ ܐܸܠܝܼܵܐ ܠܡܸܬܛܲܝܵܒܽܘ܃
00536_2	ܘܲܐܪܡܝܼ ܐܽܘܪܚܸܗ ܕܢܼܐܙܲܠ ܠܲܐܬܪܸܗ ܐܲܝܟ ܕܸܐܬܛܲܝܲܒ܀
00536_3	ܘܡܸܛܽܠ ܫܽܘܦܪܸ̈ܐ ܕܡܲܟܝܼܟܽܘܬܸܗ ܠܵܐ ܨܵܒܸܐ ܗ̄ܘܵܐ܃
00536_4	ܕܐ̄ܢܵܫ ܢܸܪܓܲܫ ܒܸܗ ܡܵܐ ܕܡܸܬܥܲܠܸܐ ܠܲܐܬܪܵܐ ܪܵܡܵܐ܀
00536_5	ܡܸܬܡܲܟܲܟ ܗ̄ܘܵܐ ܘܠܵܐ ܒܵܥܸܐ ܗ̄ܘܵܐ ܕܐ̄ܢܵܫܵܐ ܢܸܚܙܽܘܢ܃
00536_6	ܙܲܘܚܵܐ ܕܡܲܣܩܸܗ ܘܫܽܘܒܚܵܐ ܪܲܒܵܐ ܕܡܸܬܥܲܠܸܐ ܒܸܗ܀
00536_7	ܘܡܸܛܽܠܗܵܢܵܐ ܟܲܣܝܼ ܐ̄ܪܵܙܵܐ ܡܸܢ ܬܲܠܡܝܼܕܸܗ܃
00536_8	ܘܲܒܥܸ̈ܠܠܵܬܵܐ ܛܵܪܸܐ ܗ̄ܘܵܐ ܠܸܗ ܕܠܵܐ ܢܸܪܓܲܫ ܒܸܗ܀
00536_9	ܥܲܠ ܕܲܠܥܸܠ ܗ̄ܽܘ ܐ̄ܣܲܪ ܗܽܘ ܠܸܒܸܗ ܠܥܸܠ ܪܵܢܸܐ ܗ̄ܘܵܐ܃
00537_0	ܘܲܕܢܸܚܙܸܝܘܗ̄ܝ ܐ̄ܢܵܫ ܡܸܢ ܬܲܚ̈ܬܵܝܸܐ ܠܵܐ ܒܵܥܸܐ ܗ̄ܘܵܐ܀
00537_1	ܠܫܽܘܒܚܸܗ ܘܨܲܥܪܸܗ ܕܗܵܢܵܐ ܥܵܠܡܵܐ ܠܵܐ ܝܵܕܲܥ ܗ̄ܘܵܐ܃
00537_2	ܘܠܵܐ ܠܫܝܼܛܽܘܬܸܗ ܘܠܵܐ ܠܼܐܝܩܵܪܸܗ ܕܡܸܕܸܡ ܐܝܼܬܲܘܗ̄ܝ܀
00537_3	ܘܲܐܝܟ ܕܲܐܡܝܼܪܵܐ ܕܲܐܝܢܵܐ ܕܢܲܡܸܟ ܢܲܦܫܸܗ ܢܸܬܬܪܝܼܡ܃
00537_4	ܓܠܵܝܗ̄ܝ ܗ̄ܘܵܐ ܟܼܐܢܵܐ ܕܢܲܪܓܸܫ ܥܵܠܡܵܐ ܘܟܸܢ ܡܲܣܸܩ ܠܸܗ܀
00537_5	ܠܚܲܫ ܠܲܢܒܝܼܸ̈ܐ ܘܲܠܬܲܠܡܝܼܕܸܗ ܕܡܽܘܢ ܥܵܒܸܕ ܗ̄ܘܵܐ܃