The Comprehensive Aramaic Lexicon

00544_5	ܫܲܪܝܼܪܵܐ ܓܹܝܪ ܠܵܐ ܒܵܙܥܽܘܪܬܵܐ ܘܠܵܐ ܒܲܕܪܲܒܵܐ܃
00544_6	ܓܵܫܦܵܐ ܒܡܸܠܬܸܗ ܕܲܓܵܠܽܘܬܵܐ ܡܵܐ ܕܲܡܡܲܠܸܠ܀
00544_7	ܐܵܦܠܵܐ ܒܩܲܠܝܼܠ ܐܵܦܠܵܐ ܒܣܲܓܝܼ ܐܵܦܠܵܐ ܠܲܓܡܵܪ܃
00544_8	ܡܕܲܓܸܠ ܡܸܡܬܽܘܡ ܐܲܝܢܵܐ ܕܫܲܪܝܼܪ ܒܲܥܒܝܼ̈ܕܵܬܸܗ܀
00544_9	ܒܸܗ ܒܲܫܪܵܪܵܐ ܛܒܝܼܥܵܐ ܡܸܠܬܵܐ ܕܟܽܠ ܫܲܪܝܼܪܵܐ܃
00545_0	ܘܠܵܐ ܡܸܨܛܲܠܝܵܐ ܒܕܲܓܵܠܽܘܬܵܐ ܘܠܵܐ ܒܸܐܣܟܼܡܵܐ܀
00545_1	ܥܲܠ ܐܸܠܝܼܵܐ ܙܲܘܥܵܐ ܗ̄ܘ ܢܸܪܢܸܐ ܕܲܡܕܲܓܸܠ ܗ̄ܘܵܐ܃
00545_2	ܒܲܬܠܵܬ ܙܲܒܢܝܼ̈ܢ ܕܲܠܬܲܠܡܝܼܕܸܗ ܒܥܵܐ ܕܢܸܟܠܸܐ ܗ̄ܘܵܐ܀
00545_3	ܐܸܠܽܘ ܠܵܐ ܓܹܝܪ ܡܵܪܝܵܐ ܫܲܕܪܸܗ ܠܵܐ ܐܵܡܲܪ ܗ̄ܘܵܐ܃
00545_4	ܕܡܵܪܝܵܐ ܫܲܕܪܲܢܝ ܘܲܡܕܲܓܸܠ ܗ̄ܘܵܐ ܓܲܒܪܵܐ ܕܲܐܝܟ ܗܲܘ܀
00545_5	ܗܵܟܲܢ ܫܲܪܝܼܪ ܕܸܐܠܽܘ ܬܲܒܥܽܘܗ̄ܝ ܕܲܢܕܲܓܸܠ ܗ̄ܘܵܐ܃
00545_6	ܘܟܸܢ ܣܵܠܸܩ ܗ̄ܘܵܐ ܠܵܐ ܡܕܲܓܸܠ ܗ̄ܘܵܐ ܘܠܵܐ ܣܵܠܸܩ ܗ̄ܘܵܐ܀
00545_7	ܡܵܐ ܕܡܸܣܬܲܒܪܵܐ ܕܲܓܵܠܽܘܬܵܐ ܨܹܝܕ ܫܲܪܝܼܪܵܐ܃
00545_8	ܠܲܘ ܗܽܘ ܕܲܓܸܠ ܚܢܲܢ ܠܵܐ ܒܨܲܝܢܵܝܗ̄ܝ ܕܲܟܡܵܐ ܫܲܪܝܼܪ܀
00545_9	ܪܽܘܚܵܢܵܐ ܓܹܝܪ ܠܟܽܠܢܵܫ ܕܵܐܸܢ ܘܗܽܘ ܠܵܐ ܡܸܬܬܕܝܼܢ܃
00546_0	ܠܟܽܠܢܵܫ ܝܵܕܲܥ ܘܗܽܘ ܠܲܘ ܟܽܠܢܵܫ ܡܨܸܐ ܝܵܕܲܥ ܠܸܗ܀
00546_1	ܪܕܵܐ ܟܝܼܬ ܗܵܢܵܐ ܓܲܒܪܵܐ ܕܛܽܘ̈ܒܸܐ ܡܠܸܐ ܢܸܨܚܵܢܸ̈ܐ܃
00546_2	ܘܲܡܛܵܐ ܠܝܽܘܪܕܢܵܢ ܥܲܡ ܬܲܠܡܝܼܕܵܐ ܡܠܸܐ ܦܽܘܪܫܵܢܵܐ܀
00546_3	ܫܲܪܝܼܪ ܘܲܙܗܝܼܪ ܘܲܓܡܝܼܪ ܘܲܒܬܽܘܠ ܘܲܢܟܸܦ ܘܲܢܩܸܕ܃
00546_4	ܘܲܚܣܸܐ ܘܢܲܨܝܼܚ ܘܲܬܡܝܼܗ ܘܲܡܠܸܐ ܬܸܗܪܵܐ ܪܲܒܵܐ܀
00546_5	ܪܵܕܸܐ ܠܲܐܬܪܸܗ ܘܣܝܼܡ ܠܸܗ ܥܵܠܡܵܐ ܒܸܣܬܲܪ ܐܲܦܲܘ̈ܗ̄ܝ܃
00546_6	ܬܪܝܼܨ ܠܲܫܡܲܝܵܐ ܘܕܲܢܚܽܘܪ ܒܲܐܪܥܵܐ ܠܵܐ ܝܵܕܲܥ ܗ̄ܘܵܐ܀
00546_7	ܩܵܡ ܥܲܠ ܢܲܗܪܵܐ ܘܲܡܠܸܐ ܚܼܐܦܵܐ ܕܓܲܢ̄ܒܵܪܽܘܬܵܐ܃
00546_8	ܘܲܠܒܝܼܫ ܥܽܘܫܢܵܐ ܘܚܲܠܝܵܐ ܪܲܒܵܐ ܕܪܽܘܚܵܢܽܘܬܵܐ܀
00546_9	ܘܲܒܡܲܥܦܪܸܗ ܡܚܵܐ ܗ̄ܘܵܐ ܠܢܲܗܪܵܐ ܘܥܲܒܕܸܗ ܝܲܒܫܵܐ܃

00547_0	ܘܩܵܡܘ ܪ̈ܵܕܲܝܵܐ ܕܲܒܓܲܪ ܐܸܢܽܘܢ ܡܸܢ ܡܲܪܕܝܼܬܵܐ܀

00547_1	ܐܽܘܪܚܵܐ ܫܪܝܼܬܵܐ ܕܢܲܗܪܵܐ ܪܗܝܼܒܵܐ ܒܸܗܠܲܬ ܩܵܡܲܬ܃
00547_2	ܕܬܸܬܸܠ ܐܲܬܪܵܐ ܠܽܐܘܪܚܵܐ ܕܙܲܗܝܵܐ ܥܲܕ ܡܸܬܥܲܠܸܐ܀
00547_3	ܫܸܦ̈ܥܸܐ ܛܪ̈ܝܼܕܸܐ ܦܵܫܘ ܡܸܢ ܚܼܐܦܵܐ ܕܲܥܝܵܕܲܝ̈ܗܽܘܢ܃
00547_4	ܕܬܸܪܗܲܛ ܐܽܘܪܚܸܗ ܕܗܲܘ ܩܲܕܝܼܫܵܐ ܓܲܢ̄ܒܵܪܵܐܝܼܬ܀
00547_5	ܙܲܥ ܗ̄ܘܵܐ ܝܽܘܪܕܢܵܢ ܘܲܗܦܲܟ ܠܒܸܣܬܪܸܗ ܡܸܢ ܐܸܠܝܼܵܐ܃
00547_6	ܘܲܐܬܩܸܢ ܐܽܘܪܚܵܐ ܕܝܲܒܫܵܐ ܒܓܲܘܸܗ ܕܲܢܗܲܠܸܟ ܒܵܗ݀܀
00547_7	ܦܫܝܼܛܵܐ ܘܪܵܕܝܵܐ ܐܽܘܪܚܵܐ ܕܡܲܝ̈ܵܐ ܘܟܲܕ ܠܸܐܠܝܼܵܐ܃
00547_8	ܚܙܵܬ ܐܸܬܩܲܦܣܲܬ ܕܽܐܘܪܚܸܗ ܕܝܼܠܸܗ ܠܵܐ ܬܸܒܛܲܠ ܗ̄ܘܵܬ܀
00547_9	ܙܪܝܼܒܝܼܢ ܫܸܦ̈ܥܸܐ ܥܲܠ ܡܲܥܒܲܪܬܵܐ ܠܲܡܫܲܢܵܝܽܘ܃
00548_0	ܘܲܒܓܲܪ ܐܸܢܽܘܢ ܚܲܝܠܵܐ ܟܲܣܝܵܐ ܘܦܵܫܘ ܡܸܢ ܪܲܗܛܵܐ܀
00548_1	ܐܸܬܕܲܪܫܲܬ ܗ̄ܘܵܬ ܐܽܘܪܚܵܐ ܚܕܲܬܵܐ ܕܡܲܠܝܵܐ ܬܲܗܪܵܐ܃
00548_2	ܘܲܐܝܟ ܕܲܒܝܲܒܫܬܵܐ ܥܒܲܪ ܐܸܠܝܼܵܐ ܕܢܸܪܕܸܐ ܠܲܐܬܪܸܗ܀
00548_3	ܘܲܠܡܵܢܵܐ ܟܲܝ ܐܲܠܨܲܬ ܗ̄ܘܵܬ ܠܸܗ ܗܵܝ ܡܲܥܒܲܪܬܵܐ܃
00548_4	ܘܟܸܢ ܡܸܬܥܲܠܸܐ ܢܒܝܼܵܐ ܪܲܒܵܐ ܠܲܐܬܪܵܐ ܪܵܡܵܐ܀
00548_5	ܟܲܕ ܡܲܪܟܲܒܬܵܐ ܒܵܬܪܸܗ ܢܸܚܬܲܬ ܡܸܛܽܠ ܡܵܢܵܐ܃
00548_6	ܦܠܲܓ ܗ̄ܘܵܐ ܢܲܗܪܵܐ ܘܟܸܢ ܩܲܒܸܠܬܸܗ ܕܢܸܬܥܲܠܸܐ ܒܵܗ݀܀
00548_7	ܗܵܝ ܡܲܥܒܲܪܬܵܐ ܕܲܗܘܵܬ ܬܲܡܵܢ ܐ̄ܪܵܙܵܐ ܨܵܪܲܬ܃
00548_8	ܕܥܸܒܪܵܐ ܪܲܒܵܐ ܘܲܕܗܲܘ ܦܲܚܬܵܐ ܕܣܝܼܡ ܒܸܝܬ ܓܲܒܸ̈ܐ܀
00548_9	ܡܲܬܠܸܗ ܒܝܽܘܪܕܢܵܢ ܠܢܲܗܪܵܐ ܪܲܒܵܐ ܕܫܲܠܗܸܒܝܼܬܵܐ܃
00549_0	ܘܦܲܠܓܸܗ ܘܲܥܒܲܪ ܠܲܐܬܪܵܐ ܕܚܲܝܸ̈ܐ ܕܪܵܕܸܐ ܗ̄ܘܵܐ ܠܸܗ܀
00549_1	ܚܲܘܝܼ ܕܲܐܝܟܲܢ ܥܵܒܪܝܼܢ ܛܵܒܸ̈ܐ ܠܒܸܝܬ ܡܲܠܟܽܘܬܵܐ܃
00549_2	ܘܠܵܐ ܟܵܠܸܐ ܗ̄ܘܵܐ ܦܲܚܬܵܐ ܘܗܲܘܬܵܐ ܕܼܐܝܬ ܒܲܡܨܲܥܬܵܐ܀
00549_3	ܘܲܐܝܟ ܕܲܨܪܵܐ ܗܽܘ ܠܢܲܗܪܵܐ ܘܲܥܒܲܪ ܐܲܝܟ ܕܲܒܝܲܒܫܵܐ܃
00549_4	ܓܡܝܼܪܸ̈ܐ ܟܽܠܗܽܘܢ ܗܵܟܲܢ ܥܵܒܪܝܼܢ ܨܹܝܕ ܐܲܠܵܗܵܐ܀
00549_5	ܠܵܐ ܟܵܠܸܐ ܠܗܽܘܢ ܢܲܗܪܵܐ ܕܢܽܘܪܵܐ ܕܦܵܓܲܥ ܒܗܽܘܢ܃