The Comprehensive Aramaic Lexicon

00563_5	ܓܲܕܸܡ ܨܲܠܡ̈ܲܝ ܩܲܠܸܦ ܨܝܼܪ̈ܲܝ ܩܲܛܸܠ ܟܽܘܡܪ̈ܲܝ܃
00563_6	ܢܨܵܐ ܥܲܡ ܪ̈ܵܚܡܲܝ ܣܢܵܐ ܠܚܲܒܝܼ̈ܒܲܝ ܘܲܐܣܓܝܼ ܫܵܛܲܢܝ܀
00563_7	ܨܲܥܲܪ ܡܲܕܒ̈ܚܲܝ ܐܲܙܥܲܪ ܕܸܒ̈ܚܲܝ ܐܲܥܪܸܩ ܟܵܗ̈ܢܲܝ܃
00563_8	ܦܣܲܩ ܠܲܥܝܵܕ̈ܲܝ ܫܵܛ ܠܲܦܬܲܟܪ̈ܲܝ ܐܲܦܛܲܪ ܚܲܓ̈ܲܝ܀
00563_9	ܐܲܚܪܸܒ ܟܸܢ̈ܫܲܝ ܦܲܪܣܝܼ ܐ̄ܪ̈ܵܙܲܝ ܒܲܥܲܪ ܒܵܬܲܪܝ܃
00564_0	ܘܥܲܒܕܲܢܝ ܓܽܘܚܟܵܐ ܒܥܵܠܡܵܐ ܟܽܠܸܗ ܘܟܸܢ ܐܸܬܥܲܠܝܼ܀
00564_1	ܠܲܘ ܒܲܩܪܵܒܵܐ ܕܥܸܒܕܸܬ ܥܲܡܸܗ ܡܸܕܡܲܟ ܕܸܡܟܸܬ܃
00564_2	ܕܥܝܼܪ ܗ̄ܘܝܼܬ ܘܲܚܦܝܼܛ ܘܲܢܩܸܐ ܠܕܲܪܵܐ ܘܲܠܗܸܪ̈ܵܬܵܐ܀
00564_3	ܗܽܘ ܐܸܠܝܼܵܐ ܐܸܬܬܥܝܼܪ ܣܲܓܝܼ ܥܲܠ ܬܲܟܬܽܘܫܵܐ܃
00564_4	ܘܲܕܠܵܐ ܫܲܠܝܵܐ ܥܒܲܕ ܐܲܓܽܘܢܵܐ ܘܕܲܪܵܐ ܠܽܘܩܒܲܠܝ܀
00564_5	ܒܙܲܕܝܼܩܽܘܬܵܐ ܐ̄ܣܲܪ ܗ̄ܘܵܐ ܚܲܨܲܘ̈ܗ̄ܝ ܡܸܢ ܛܲܠܝܽܘܬܸܗ܃
00564_6	ܒܗܲܝܡܵܢܽܘܬܵܐ ܚܙܝܼ̈ܩܵܢ ܗ̄ܘ̈ܲܝ ܠܸܗ ܟܽܠ ܕܲܦ̈ܢܵܬܸܗ܀
00564_7	ܒܪܸܚܡܲܬ ܡܵܪܸܗ ܐܲܝܟ ܕܲܒܫܽܘܪܵܐ ܡܪܲܕ ܡܸܢ ܨܸܢ̈ܥܵܬܝ܃
00564_8	ܒܲܒܬܽܘܠܽܘܬܵܐ ܠܥܸܠ ܡܸܢ ܥܵܠܡܵܐ ܪܕܵܐ ܘܠܵܐ ܚܲܫܒܲܢܝ܀
00564_9	ܒܲܡܣܲܪܩܽܘܬܵܐ ܣܢܵܐ ܠܩܸܢ̈ܝܵܢܸܐ ܕܦܲܚ̈ܲܝ ܐܸܢܽܘܢ܃
00565_0	ܠܪܸܚܡܲܬ ܕܲܗܒܵܐ ܒܡܸܣܟܼܢܽܘܬܵܐ ܕܲܫܲܗ݀ ܘܲܥܒܲܪ܀
00565_1	ܠܪܸܓܲܬ ܟܲܪܣܵܐ ܒܨܲܘܡܸܗ ܪܲܒܵܐ ܡܩܲܦܲܚ ܗ̄ܘܵܐ ܠܵܗ݀܃
00565_2	ܘܲܠܪܵܡܽܘܬܵܐ ܒܡܲܟܝܼܟܽܘܬܵܐ ܒܵܣܲܪ ܗ̄ܘܵܐ ܠܵܗ݀܀
00565_3	ܐܲܚܝܼܕܝܼܢ ܗ̄ܘܲܘ ܬܲܪ̈ܥܸܐ ܕܢܲܦܫܸܗ ܡܸܢ ܒܝܼ̈ܫܵܬܵܐ܃
00565_4	ܕܡܵܐ ܕܢܵܩ̈ܫܵܢ ܗ̄ܘ̈ܲܝ ܠܵܐ ܦܵܬܲܚ ܗ̄ܘܵܐ ܠܲܪ̈ܓܝܼܓܵܬܵܐ܀
00565_5	ܥܲܒܪܸܗ ܠܫܽܘܠܛܵܢܝ ܘܲܡܛܵܐ ܠܲܐܝܟܵܐ ܕܠܲܝܬ ܐܲܓܽܘܢܵܐ܃
00565_6	ܫܩܲܠ ܠܸܗ ܟܠܝܼܠܵܐ ܘܬܽܘܒ ܠܵܐ ܡܲܩܪܸܒ ܕܸܐܫܬܲܡܠܝܼ ܠܸܗ܀
00565_7	ܠܒܝܼܫܵܐ ܘܡܲܘܬܵܐ ܒܣܲܪ ܐܸܠܝܼܵܐ ܟܲܕ ܣܵܠܸܩ ܗ̄ܘܵܐ܃
00565_8	ܕܠܵܐ ܐܸܬܥܲܪܩܲܠ ܒܲܬܚܽܘܡܲܝ̈ܗܽܘܢ ܟܲܕ ܥܵܒܲܪ ܗ̄ܘܵܐ܀
00565_9	ܬܪܸܝܢ ܓܲܝ̈ܵܣܸܐ ܕܒܽܐܘܪܚܸܗ ܕܥܵܠܡܵܐ ܢܦܲܠܘ ܥܲܠ ܐ̄ܢܵܫܵܐ܃

00566_0	ܘܲܐܥܸܠܘ ܘܲܡܠܲܘ ܠܲܫܝܽܘܠ ܒܸܙܬܲܐ ܕܬܲܚܠܽܘܨܲܝ̈ܗܽܘܢ܀

00566_1	ܐܸܠܝܼܵܐ ܕܹܝܢ ܫܲܦܸܠ ܐܸܢܽܘܢ ܒܽܐܘܚܕܵܢܲܝ̈ܗܽܘܢ܃
00566_2	ܘܲܐܝܟ ܓܲܢ̄ܒܵܪܵܐ ܠܒܝܼܒܵܐ ܐܲܗܸܠ ܒܲܟܡܼܐܢܲܝ̈ܗܽܘܢ܀
00566_3	ܥܲܒܪܸܗ ܬܚܽܘܡܗܽܘܢ ܘܲܐܡܠܸܟ ܒܲܐܬܪܵܐ ܕܠܵܐ ܚܵܫܽܘ̈ܫܸܐ܃
00566_4	ܘܥܲܠ ܐܸܬܓܲܐܝܼ ܒܚܲܝܸ̈ܐ ܕܪܵܡܝܼܢ ܡܸܢ ܫܽܘܠܵܡܵܐ܀
00566_5	ܣܘܲܚܘ ܡܲܠܲܐܟܸ̈ܐ ܘܲܢܦܲܩܘ ܠܽܐܘܪܥܸܗ ܒܲܟܠܝܼ̈ܠܲܝܗܽܘܢ܃
00566_6	ܟܲܕ ܡܸܣܬܲܠܲܩ ܚܲܒܝܼܒܵܐܝܼܬ ܨܹܝܕ ܟܸܢܫܲܝ̈ܗܽܘܢ܀
00566_7	ܩܲܒܠܽܘܗ̄ܝ ܚܲܒܒܽܘܗ̄ܝ ܝܲܩܪܽܘܗ̄ܝ ܚܲܠܛܽܘܗ̄ܝ ܥܲܡ ܣܸܕܪ̈ܲܝܗܽܘܢ܃
00566_8	ܘܸܐܬܕܲܡܲܪܘ ܒܸܗ ܕܲܗܘܵܐ ܟܢܵܬܗܽܘܢ ܟܲܕ ܦܲܓܪܵܢܵܐ ܗ̄ܘ܀
00566_9	ܘܲܐܝܟ ܕܲܒܡܸܕܸܡ ܚܲܕܬܵܐ ܪܚܝܼܡܵܐ ܚܵܪܘ ܗ̄ܘܲܘ ܘܲܚܕܝܼܘ܃
00567_0	ܕܡܲܠܲܐܟܵܐ ܗ̄ܘܵܐ ܦܲܓܪܵܢܵܝܵܐ ܒܸܝܬ ܣܸܕܪ̈ܲܝܗܽܘܢ܀
00567_1	ܘܲܐܟܡܵܐ ܕܗܵܠܸܝܢ ܡܸܬܐܲܡܪ̈ܵܢ ܗ̄ܘ̈ܲܝ ܡܸܢ ܡܲܠܲܐܟܸ̈ܐ܃
00567_2	ܨܹܝܕ ܐܸܠܝܼܵܐ ܟܲܕ ܣܵܘܚܝܼܢ ܠܸܗ ܒܦܽܘܪ̈ܫܵܢܲܝܗܽܘܢ܀
00567_3	ܬܵܐ ܒܲܫܠܵܡܵܐ ܚܽܘܬܪܵܐ ܕܟܽܠܵܗ݀ ܙܲܕܝܼܩܽܘܬܵܐ܃
00567_4	ܘܲܡܢܲܨܚܵܢܵܐ ܕܲܒܬܽܘܠܽܘܬܵܐ ܘܩܲܕܝܼܫܽܘܬܵܐ܀
00567_5	ܬܵܐ ܒܲܫܠܵܡܵܐ ܚܲܒܪܲܢ ܕܲܗܘܵܐ ܠܲܘ ܡܸܢ ܓܸܢܣܲܢ܃
00567_6	ܐܸܠܵܐ ܡܸܢ ܗܲܘ ܛܽܘܗܡܵܐ ܪܓܝܼܙܵܐ ܕܲܐܪ̈ܥܵܢܵܝܸܐ܀
00567_7	ܬܵܐ ܒܲܫܠܵܡܵܐ ܣܵܗܕܵܐ ܕܲܬܪܸܝܢ ܕܵܐܬܸܐ ܕܢܲܘܕܲܥ܃
00567_8	ܕܸܐܠܽܘ ܠܵܐ ܚܛܵܐ ܐܵܕܵܡ ܒܲܥܕܸܢ ܠܵܐ ܡܵܐܸܬ ܗ̄ܘܵܐ܀
00567_9	ܬܵܐ ܒܲܫܠܵܡܵܐ ܕܟܽܠܸܗ ܫܽܘܦܪܵܐ ܕܼܐܝܬ ܠܲܟܝܵܢܵܐ܃
00568_0	ܐܲܢ̄ܬ ܚܲܘܝܼܬܵܝܗ̄ܝ ܕܲܟܡܵܐ ܦܸܐܐ ܗ̄ܘܵܐ ܥܲܕܠܵܐ ܢܸܚܛܸܐ܀
00568_1	ܬܵܐ ܒܲܫܠܵܡܵܐ ܥܝܼܪܵܐ ܕܒܸܣܪܵܐ ܐ̄ܢܵܫܵܐ ܕܪܽܘܚܵܐ܃
00568_2	ܝܠܝܼܕܵܐ ܕܠܵܐ ܡܝܼܬ ܓܫܝܼܡܵܐ ܕܡܸܟܝܼܠ ܬܽܘܒ ܠܵܐ ܚܵܐܸܫ܀
00568_3	ܬܵܐ ܒܲܫܠܵܡܵܐ ܕܒܵܟ ܡܸܬܝܲܠܦܵܐ ܒܪܝܼܬܸܗ ܕܵܐܕܵܡ܃
00568_4	ܕܸܐܠܽܘܠܵܐ ܢܦܲܠ ܡܸܢ ܐܲܠܵܗܵܐ ܚܲܝ ܗ̄ܘܵܐ ܥܲܡܲܢ܀
00568_5	ܡܹܐܡܪܵܐ ܪܡܲܙ ܠܝܼ ܕܠܵܐ ܐܸܡܲܠܸܠ ܥܲܠ ܐܸܠܝܼܵܐ܃