← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 8: on the baptism of Jesus in the Jordan

Click on a word for lexical analysis
Click on a red-colored coordinate for comments and/or translations of the line

▲ earlier lines

008:0210 ܕܚܲܣܝܼܪ ܗܼܽܘ ܠܝܼ ܐܵܕܵܡ ܕܢܸܥܽܘܠ ܥܲܠ ܝܵܪܬܽܘܬܸܗ܀
008:0211 ܫܒ݂ܽܘܩܲܝܢܝ ܡܵܕܸܝܢ ܐܸܚܽܘܬ݂ ܐܸܡܪܽܘܩ ܨܲܠܡܵܐ ܕܲܐܫܚܸܬ݂܃
008:0212 ܕܠܵܐ ܚܲܣܝܼܪܵܐ ܢܸܗܘܸܐ ܐܵܦ ܗܽܘ ܡܵܐ ܕܲܟ݂ܠܲܝܬܵܢܝ܀
008:0213 ܗܵܝ ܛܲܝܒ݁ܽܘܬ݂ܵܐ ܕܲܩܪܵܬܲܢܝ ܗܼܘܵܬ݂ ܐܼܬܸܐ ܠܝܲܠܕܵܐ܃
008:0214 ܗܝܼ ܬܽܘܒ݂ ܟܲܕ݂ ܗܝܼ ܩܪܵܬܲܢܝ ܕܼܐܬܸܐ ܐܵܦ ܠܲܥܡܵܕ݂ܵܐ܀
008:0215 ܚܢܵܢܵܐ ܪܲܒܵܐ ܢܲܓܕܲܢܝ ܐܸܚܽܘܬ݂ ܐܸܗܘܸܐ ܥܽܘܠܵܐ܃
008:0216 ܗܽܘܝܽܘ ܗܵܢܵܐ ܕܢܲܓܕܲܢܝ ܐܸܚܽܘܬ݂ ܐܸܗܘܸܐ ܥܡܝܼܕ݂ܵܐ܀
008:0217 ܠܵܐ ܐܼܠܝܼܨ ܥܽܘܒܵܗ݀ ܕܡܲܥܡܽܘܕ݂ܝܼܬ݂ܵܐ ܛܵܒ݂ ܡܸܢ ܟܲܪܣܵܐ܃
008:0218 ܘܡܲܝ̈ܵܐ ܕܢܲܗܪܵܐ ܛܵܒ݂ ܡܸܢ ܡܲܪܒܥܵܐ ܠܵܐ ܚܸܫܽܘܟ݂ܝܼܢ܀
008:0219 ܐܸܢ ܐܝܼܩܵܪܵܐ ܦܵܠܸܓ ܐܲܢܼܬ݁ ܠܝܼ ܡܸܣܬܲܒ݂ܪܵܐ ܠܵܟ݂܃
008:0220 ܙܵܕܸܩ ܗܼܘܵܐ ܠܵܟ݂ ܕܵܐܦ ܡܸܢ ܒܲܛܢܵܐ ܘܝܲܠܕܵܐ ܬܸܟ݂ܠܸܝܢܝ܀
008:0221 ܐܸܢ ܨܲܥܪܲܐ ܗܼܘ ܠܝܼ ܐܲܝܕܵܐ ܕܽܘܟ݁ܬ݂ܵܐ ܫܝܼܛܵܐ ܣܲܓ݁ܝܼ܃
008:0222 ܟܲܪܣܵܐ ܕܒܸܣܪܵܐ ܐܲܘ ܪܲܒ݁ܽܘܬ݂ܵܐ ܕܡܲܥܡܽܘܕ݂ܝܼܬ݂ܵܐ܀
008:0223 ܐܸܠܽܘ ܟܠܲܝܬܵܢܝ ܕܼܐܬܸܐ ܠܒܲܛܢܵܐ ܟܲܕ݂ ܐܲܢܼܬ݁ ܒܸܐܡܵܟ݂܃
008:0224 ܦܫܝܼܩ ܗܼܘܵܐ ܕܬܸܬ݂ܟ݁ܽܘܣ ܕܵܐܦܠܵܐ ܐܸܥܡܲܕ݂ ܐܲܝܟ݂ ܕܸܐܫܬܲܠܚܸܬ݂܀
008:0225 ܐܸܢ ܐܲܗܦܸܟ݂ܬܵܢܝ ܡܸܢ ܗܲܘ ܕܲܪܓܵܐ ܕܝܼܠܝܼܕ݂ܽܘܬ݂ܵܐ܃
008:0226 ܬܵܐ ܐܲܗܦܸܟ݂ܲܝܢܝ ܡܸܢܸܗ ܕܛܸܟ݂ܣܵܐ ܕܡܲܥܡܽܘܕ݂ܝܼܬ݂ܵܐ܀
008:0227 ܐܸܢ ܐܲܥܒܲܪܬܵܢܝ ܡܸܢ ܥܲܙܪܽܘܪܸ̈ܐ ܘܠܵܐ ܟܸܪܟܸܬ݂ ܗܼܘܝܼܬ݂܃
008:0228 ܛܪܝܼ ܡܸܢ ܨܸܐܕܲܝ ܓ̈ܲܠܠܸܐ ܕܢܲܗܪܵܐ ܕܠܵܐ ܢܟܲܣܽܘܢܵܢܝ܀
008:0229 ܐܸܢ ܒܲܛܸܠܬܵܢܝ ܕܠܵܐ ܐܸܡܬ݁ܽܘܩ ܗܼܘܝܼܬ݂ ܚܲܠܒ݂ܵܐ ܫܝܼܛܵܐ܃
008:0230 ܟܵܠܸ݁ܐ ܗܼܘܲܝܬ݁ ܠܝܼ ܡܸܢ ܡܲܒ݁ܽܘܥܵܐ ܕܠܵܐ ܐܸܚܽܘܕ݂ ܠܸܗ܀
008:0231 ܐܸܠܽܘ ܟܠܲܝܬܵܢܝ ܕܠܵܐ ܐܸܫܪܸܐ ܗܼܘܝܼܬ݂ ܒܟܸܢܦܵܗ݀ ܕܡܲܪܝܲܡ܃
008:0232 ܥܵܒܲܪ ܗܼܘܝܼܬ݂ ܠܝܼ ܐܵܦ ܡܸܢ ܥܽܘܒܵܗ݀ ܕܡܲܥܡܽܘܕ݂ܝܼܬ݂ܵܐ܀
008:0233 ܘܗܵܫܵܐ ܕܲܪܕܝܼܬ݂ ܘܐܸܬܝܼܬ݂ ܒܽܐܘܪܚܵܐ ܗܵܝ ܕܝܼܠܝܼ̈ܕܸܐ܃
008:0234 ܐܸܠܵܐ ܓܡܲܪܬܵܗ݀ ܐܲܝܟܲܢ ܡܲܨܝܵܐ ܕܸܐܗܦܽܘܟ݂ ܡܸܢܵܗ݀܀
008:0235 ܐܵܦ ܗܵܟܲܢܵܐ ܝܵܐܸܐ ܠܝܼ ܓܹܝܪ ܐܲܝܟ݂ ܕܸܐܫܬܲܠܚܸܬ݂܃
008:0236 ܕܬܸܬ݂ܡܲܠܸܐ ܒܝܼ ܟܽܠܵܗ݀ ܐܽܘܪܚܵܐ ܕܲܥܠܸܝܗ݀ ܢܸܚܬܸܬ݂܀
008:0237 ܟܘܲܙ ܝܽܘܚܲܢܵܢ ܙܵܥ ܘܸܐܣܬܲܪܲܕ݂ ܡܸܢ ܒܲܪ ܡܲܠܟܵܐ܃
008:0238 ܣܓܸܕ݂ ܠܸܗ ܘܲܐܘܕܝܼ ܟܲܕ݂ ܡܸܬ݂ܟܲܫܲܦ ܪܵܥܽܘܡܵܐܝܼܬ݂܀
008:0239 ܒܵܥܸܐ ܐܼܢܵܐ ܡܵܪܝ ܠܵܐ ܣܵܦܸܩ ܐܼܢܵܐ ܕܸܐܬ݂ܩܲܪܲܒ݂ ܠܵܟ݂܃
008:0240 ܡܚܝܼܠܵܐ ܗܼܝ ܚܲܒ݁ܬ݂ܵܐ ܕܲܬ݂ܣܝܼܡ ܐܝܼܕ݂ܵܗ݀ ܥܲܠ ܓܲܘܙܲܠܬܵܐ܀
008:0241 ܐܲܝܟܲܢ ܡܸܫܟܲܚ ܢܸܐܚܽܘܕ݂ ܓܸܠܵܐ ܠܫܲܠܗܸܒ݂ܝܼܬ݂ܵܐ܃
008:0242 ܐܵܘ ܚܲܒ݁ܽܘܒ݂ܵܐ ܥܠܸܝܗ݀ ܕܲܓܡܽܘܪܬܵܐ ܐܝܼܕܸܗ ܢܲܪܡܸܐ܀
008:0243 ܪܸܬ݂ܚܸܗ ܕܥܽܘܙܵܟ݂ ܣܲܦ ܠܸܗ ܒܢܲܗܪܵܐ ܘܗܵܐ ܡܲܘܩܸܕ݂ ܠܸܗ܃
008:0244 ܘܲܐܝܟܲܢܵܐ ܟܲܝ ܠܼܐܝ̈ܕܲܝ ܒܸܣܪܵܐ ܠܵܐ ܡܚܲܪܸܟ݂ ܐܲܢܼܬ݁܀
008:0245 ܐܵܦܠܵܐ ܐܵܠܨܵܐ ܕܲܐܢܼܬ݁ ܡܸܢܝ ܬܸܥܡܲܕ݂ ܐܲܝܟ݂ ܚܲܣܝܼܪܵܐ܃
008:0246 ܕܠܵܐ ܢܸܗܘܸܐ ܠܸܗ ܣܸܕ݂ܩܵܐ ܒܥܵܠܡܵܐ ܕܚܲܣܝܼܪܵܐ ܐܲܢܼܬ݁܀
008:0247 ܙܸܠ ܒܲܪ ܡܲܠܟܵܐ ܦܪܽܘܩ ܠܲܫܒ݂ܝܼܬ݂ܵܐ ܕܗܵܐ ܚܵܝܪܵܐ ܠܵܟ݂܃
008:0248 ܠܵܐ ܚܲܣܝܼܪ ܠܵܟ݂ ܙܲܝܢܵܐ ܕܬܸܣܲܒ݂ ܡܸܢ ܓܲܘ ܡܲܝ̈ܵܐ܀
008:0249 ܬܵܓܵܟ݂ ܕܝܼܠܵܟ݂ ܡܸܢ ܥܵܠܲܡ ܗܼܽܘ ܘܠܵܐ ܡܸܫܬܲܚܠܲܦ܃
008:0250 ܠܲܘ ܡܸܢ ܓܲܙܵܐ ܕܡܲܥܡܽܘܕ݂ܝܼܬ݂ܵܐ ܡܸܬ݂ܡܲܠܸܐ ܐܲܢܼܬ݁܀
008:0251 ܛܪܽܘܕ݂ ܥܲܠ ܐܽܘܪܚܵܟ݂ ܗܵܐ ܓܵܠܽܘܬ݂ܵܐ ܨܲܗܝܵܐ ܕܬܸܚܙܸܝܟ݂܃
008:0252 ܠܲܘ ܠܲܠܘܝܼܬ݂ܵܐ ܕܐܼܢܵܫ ܚܵܐܲܪ ܐܲܢܼܬ݁ ܕܢܼܐܙܲܠ ܥܲܡܵܟ݂܀
008:0253 ܥܲܠ ܐܲܪ̈ܓܘܵܢܲܘܗܝ ܕܲܐܒ݂ܵܐ ܝܠܝܼܕ݂ ܐܲܢܼܬ݁ ܡܸܢ ܐܝܼܬ݂ܽܘܬܸܗ܃
008:0254 ܘܠܵܐ ܚܲܣܝܼܪ ܐܲܢܼܬ݁ ܕܬܸܠܒܲܫ ܡܸܟܵܐ ܘܗܵܝܕܸܝܢ ܬܸܦܪܽܘܩ܀
008:0255 ܩܼܐܪܣܵܐ ܒܲܐܪܥܵܐ ܠܵܐ ܬܸܫܬܲܘܚܲܪ ܡܸܢ ܦܽܘܪܩܵܢܵܐ܃
008:0256 ܦܽܘܩ ܙܸܠ ܐܲܥܕܵܐ ܫܒ݂ܝܼܬ݂ܵܐ ܕܥܲܡܡܸ̈ܐ ܡܸܢ ܪ̈ܵܕ݂ܽܘܦܸܐ܀
008:0257 ܚܕ݂ܵܐ ܗܼܝ ܡܲܠܟ݁ܽܘܬ݂ܵܐ ܕܲܐܒ݂ܵܐ ܘܕ݂ܝܼܠܵܟ݂ ܡܵܪܸܐ ܡܲܠܟܸ̈ܐ܃
008:0258 ܠܲܘ ܡܸܢ ܗܵܪܟܵܐ ܡܸܬ݂ܓܲܢܼܒܲܪ ܐܲܢܼܬ݁ ܥܲܠ ܫܽܘܠܛܵܢܵܐ܀
008:0259 ܗܵܐ ܓܵܠܽܘܬ݂ܵܐ ܥܒܲܪܬܸܗ ܠܫܲܝܢܵܐ ܡܽܘܢ ܩܵܐܸܡ ܐܲܢܼܬ݁܃
008:0260 ܪܕ݂ܝܼ ܐܲܗܦܸܟܸܝܗ݀ ܡܸܢ ܬܽܘܩ̈ܠܵܬ݂ܵܐ ܕܲܒ݂ܗܸܝܢ ܢܸܦܩܲܬ݂܀

▼ later lines