← Back
The Comprehensive Aramaic Lexicon
Return to Search Page →
← Return to the Text Browser
click on the file description for more information

63404: JSBhom 8: on the baptism of Jesus in the Jordan

Click on a word for lexical analysis
Click on a red-colored coordinate for comments and/or translations of the line

▲ earlier lines

008:0460 ܚܲܝ̈ܠܸܐ ܙܵܝܥܝܼܢ ܓܽܘ̈ܕܸܐ ܪ̈ܵܥܠܵܢ ܐܲܠܦܸ̈ܐ ܪܵܐܬܝܼܢ܀
008:0461 ܫܲܠܗܸܒ݂ܝܼܬ݂ܵܐ ܩܵܝ݁ܡܵܐ ܠܲܣܛܲܪ ܟܲܕ݂ ܪܲܬܝܼܬ݂ܵܐ܃
008:0462 ܘܲܢܚܸܬ݂ ܢܸܥܡܲܕ݂ ܡܸܢ ܕܲܚܝܼܚܵܐ ܕܲܓܒܲܠ ܐܝܼܕ݂ܲܘ̈ܗܝ܀
008:0463 ܨܲܪܝܵܐ ܫܡܲܝܵܐ ܘܡܲܙܥܸܩ ܐܲܒ݂ܵܐ ܥܲܠ ܚܲܒܝܼܒܸܗ܃
008:0464 ܙܲܗܝܵܐ ܪܽܘܚܵܐ ܘܩܵܝܡܵܐ ܕܬܸܣܗܲܕ݂ ܥܲܠ ܝܼܚܝܼܕ݂ܵܐ܀
008:0465 ܢܦܲܩ ܗܼܘܵܐ ܩܵܠܵܐ ܡܸܢ ܩܲܝܛܽܘܢܵܐ ܕܒܸܝܬ݂ ܡܲܠܟ݁ܽܘܬ݂ܵܐ܃
008:0466 ܕܲܢܒܲܕܸܩ ܗܼܘܵܐ ܥܲܠ ܒܲܪ ܡܲܠܟܵܐ ܕܠܲܘ ܢܽܘܟ݂ܪܵܝܲܐ ܗܼܘ܀
008:0467 ܐܸܬ݁ܬ݁ܙܝܼܥܲܬ݂ ܗܼܘܵܬ݂ ܡܸܠܬ݂ܵܐ ܓܢܝܼܙܬܵܐ ܕܠܵܐ ܡܸܢ ܦܽܘܡܵܐ܃
008:0468 ܕܬܸܦܽܘܩ ܬܸܣܗܲܕ݂ ܥܲܠ ܗܲܘ ܝܲܠܕܵܐ ܕܲܐܠܵܗܽܘܬ݂ܵܐ܀
008:0469 ܐܸܬ݂ܓܲܠܝܲܬ݂ ܗܼܘܵܬ݂ ܗܵܝ ܒܲܪܼܬ݂ ܩܵܠܵܐ ܓܢܝܼܙܲܬ݂ ܡܸܢ ܟܽܠ܃
008:0470 ܟܲܕ݂ ܙܵܥܩܵܐ ܗܼܘܵܬ݂ ܥܲܠ ܗܲܘ ܟܲܣܝܵܐ ܕܸܐܬܵܐ ܠܓܸܠܝܵܐ܀
008:0471 ܪܥܸܡ ܒܲܫܡܲܝܵܐ ܩܵܠܵܐ ܪܵܡܵܐ ܕܠܵܐ ܠܸܫܵܢܵܐ܃
008:0472 ܡܸܢ ܠܵܐ ܓܫܝܼܡܵܐ ܥܲܠ ܚܲܒܝܼܒܸܗ ܕܸܐܬ݂ܓܲܫܲܡ ܗܼܘܵܐ܀
008:0473 ܠܵܐ ܡܲܠܸܠ ܗܼܘܵܐ ܒܝܲܕ݂ ܡܲܠܲܐܟ݂ܵܐ ܒܗܲܘ ܥܸܕܵܢܵܐ܃
008:0474 ܘܠܵܐ ܐܲܟ݂ܪܸܙ ܗܼܘܵܐ ܒܦܽܘܡܵܐ ܫܓܝܼܪܵܐ ܕܚܲܕ݂ ܡܸܢ ܥܝܼܪܸ̈ܐ܀
008:0475 ܠܵܐ ܫܐܸܠ ܗܼܘܵܐ ܠܸܗ ܡܸܠܬ݂ܵܐ ܘܩܵܠܵܐ ܡܸܢ ܥܸܠܵܝܸ̈ܐ܃
008:0476 ܕܗܽܘ ܡܡܲܠܸܠ ܗܼܘܵܐ ܡܸܢ ܐܝܼܬ݂ܽܘܬܸܗ ܥܲܠ ܝܼܚܝܼܕܸܗ܀
008:0477 ܗܽܘ ܒܲܩܢܽܘܡܸܗ ܡܲܠܸܠ ܐܲܒ݂ܵܐ ܫܲܪܝܼܪܵܐܝܼܬ݂܃
008:0478 ܕܲܢܒܲܕܸܩ ܗܼܘܵܐ ܡܸܛܽܠ ܝܲܠܕܸܗ ܕܫܲܪܝܼܪܵܐ ܗܼܘܵܐ܀
008:0479 ܡܸܠܬ݂ܵܐ ܚܕܲܬܵܐ ܐܸܫܬܲܡܥܲܬ̤ ܗܼܘܵܬ݂ ܒܲܝܢܵܬ݂ ܟܸܢܫܸ̈ܐ܃
008:0480 ܩܵܠܵܐ ܪܵܡܵܐ ܕܬ݂ܽܘܒ݂ ܐܲܟ݂ܘܵܬܸܗ ܠܵܐ ܐܸܬ݂ܡܲܠܲܠ܀
008:0481 ܩܝܼܢܬܵܐ ܕܡܸܡܬ݂ܽܘܡ ܒܸܐܕ݂ܢܸ̈ܐ ܕܐܼܢܵܫܵܐ ܠܵܐ ܐܸܙܕܲܪܥܲܬ̤܃
008:0482 ܪܲܥܡܵܐ ܕܚܝܼܠܵܐ ܕܝܼܚܝܼܕ݂ܵܐܝܼܬ݂ ܐܲܫܡܲܥ ܩܵܠܸܗ܀
008:0483 ܠܵܐ ܡܲܠܸܠ ܗܼܘܵܐ ܐܲܝܟ݂ ܗܵܝ ܡܸܠܬ݂ܵܐ ܒܚܲܕ݂ ܡܸܢ ܙܲܒ̈ܢܝܼܢ܃
008:0484 ܕܠܵܐ ܐܝܼܬ݂ ܗܼܘܵܐ ܠܸܗ ܝܲܠܕܵܐ ܐܼܚܪܼܢܵܐ ܒܚܲܕ݂ ܡܸܢ ܓܲܒܝܼ̈ܢ܀
008:0485 ܪܥܸܡ ܬܲܩܝܼܦܵܐ ܢܚܲܒܸܒ݂ ܠܲܒ݂ܪܸܗ ܒܲܝܢܵܬ݂ ܟܸܢܫܸ̈ܐ܃
008:0486 ܕܢܲܘܕܲܥ ܐܸܢܽܘܢ ܕܗܵܢܲܘ ܐܝܼܬ݂ ܠܸܗ ܒܪܵܐ ܫܲܪܝܪܵܐ܀
008:0487 ܪܬܲܚܘ ܗܼܘܲܘ ܪ̈ܲܚܡܸܐ ܕܲܐܒ݂ܵܗܽܘܬ݂ܵܐ ܥܲܠ ܝܼܚܝܼܕ݂ܵܐ܃
008:0488 ܘܢܲܨܲܪܬܸܗ ܗܼܘܵܬ݂ ܕܲܬ݂ܚܲܘܸܐ ܗܼܘܵܬ݂ ܕܲܪܚܽܘܡܵܗ݀ ܗܼܘܵܐ܀
008:0489 ܠܵܐ ܢܸܟ݂ܦܲܬ̤ ܗܼܘܵܬ ܐܲܠܵܗܽܘܬ݂ܵܐ ܪܵܡܲܬ݂ ܡܸܢ ܟܽܠ܃
008:0490 ܕܬܸܚܙܸܐ ܠܲܒ݂ܪܵܗ݀ ܕܲܠܒ݂ܝܼܫ ܦܲܓܪܵܐ ܘܣܵܚܸܐ ܒܡܲܝ̈ܵܐ܀
008:0491 ܠܵܐ ܙܸܥܪܲܬ̤ ܗܼܘܵܬ݂ ܗܵܝ ܪܲܒ݁ܽܘܬ݂ܵܐ ܟܲܕ݂ ܚܲܒܝܼܒ݂ܵܗ݀܃
008:0492 ܢܚܸܬ݂ ܠܲܥܡܵܕ݂ܵܐ ܕܲܠܦܽܘܪܩܵܢܵܐ ܡܸܬ݂ܚܲܫܲܚ ܗܼܘܵܐ܀
008:0493 ܠܲܘ ܡܸܢ ܡܲܝ̈ܵܐ ܡܸܬ݂ܡܲܠܝܵܐ ܗܼܘܵܬ݂ ܚܲܣܝܼܪܽܘܬܸܗ܃
008:0494 ܕܢܸܟ݂ܦܽܘܪ ܐܲܒ݂ܵܐ ܘܠܵܐ ܢܲܘܕܸܐ ܒܸܗ ܡܸܛܽܠ ܕܲܒ݂ܨܝܼܪ܀
008:0495 ܡܫܲܠܡܵܢܵܐ ܗܼܘܵܐ ܥܲܕ݂ܠܵܐ ܢܸܚܽܘܬ݂ ܐܵܦ ܡܸܢ ܕܲܢܚܸܬ݂܃
008:0496 ܘܓܲܠܝܽܘܬ݂ ܐܲܦܸ̈ܐ ܐܝܼܬ݂ ܗܼܘܵܐ ܠܲܐܒ݂ܵܐ ܕܢܲܘܕܸܐ ܒܲܒ݂ܪܸܗ܀
008:0497 ܗܵܕܸܐ ܥܸܠܬ݂ܵܐ ܩܪܵܬܸܗ ܕܢܼܐܬܸܐ ܠܡܲܥܡܽܘܕ݂ܝܼܬ݂ܵܐ܃
008:0498 ܕܼܐܝܕ݂ܵܐ ܕܟ݂ܽܘܡܪܸ̈ܐ ܒܸܗ ܬܸܣܬܲܝܲܟ݂ ܘܡܸܢܸܗ ܬܸܦܽܘܩ܀
008:0499 ܦܲܪܲܬܸܩܸܐ ܝܲܗܼܒ݂ ܗܼܘܵܐ ܐܲܒ݂ܵܐ ܠܡܽܘܫܸܐ ܒܛܽܘܪܵܐ܃
008:0500 ܘܫܲܕܪܸܗ ܠܲܒ݂ܪܸܗ ܕܢܲܣܒܵܗ݀ ܒܡܲܝ̈ܵܐ ܡܸܢ ܝܽܘܚܲܢܵܢ܀
008:0501 ܐܸܬ݂ܝܲܒ݁ܠܲܬ̤ ܗܼܘܵܬ݂ ܥܲܠ ܗܲܘ ܫܲܒ݂ܛܵܐ ܕܲܒ݂̈ܢܲܝ ܠܸܘܝܼ܃
008:0502 ܘܩܵܡ ܗܼܘܵܐ ܓܽܘܪܝܵܐ ܕܒܸܝܬ݂ ܝܼܗܽܘܕ݂ܵܐ ܘܫܲܩܠܵܗ݀ ܡܸܢܸܗ܀
008:0503 ܩܽܘܕ݂ܫܵܐ ܫܦܲܥ ܗܼܘܵܐ ܥܲܠ ܛܽܘܪ ܣܝܼܢܲܝ ܡܸܢ ܥܸܠܵܝܵܐ܃
008:0504 ܘܲܒ݂ܝܽܘܚܲܢܵܢ ܥܲܠ ܦܵܪܽܘܩܲܢ ܐܸܫܬܲܦܲܥ ܗܼܘܵܐ܀
008:0505 ܡܸܢ ܫܽܘܪܵܝܸܗ ܢܣܲܒ݂ ܗܼܘܵܐ ܕܢܸܓܡܽܘܪ ܐܽܘܪܚܸܗ ܡܵܪܲܢ܃
008:0506 ܕܠܵܐ ܢܸܩܲܦ ܗܼܘܵܐ ܫܒ݂ܝܼܠܵܐ ܐܼܚܪܼܢܵܐ ܐܲܝܟ݂ ܢܽܘܟ݂ܪܵܝܵܐ܀
008:0507 ܗܵܝ ܟܽܘܡܪܽܘܬ݂ܵܐ ܕܐܸܬ݂ܝܲܒ݁ܠܲܬ̤ ܗܼܘܵܬ݂ ܡܸܢ ܒܸܝܬ݂ ܐܲܗܪܽܘܢ܃
008:0508 ܗܝܼ ܒܲܫܠܝܼܚܸ̈ܐ ܠܥܵܠܡܵܐ ܢܸܦܩܲܬ̤ ܡܸܢ ܦܵܪܽܘܩܲܢ܀
008:0509 ܠܲܘ ܕܲܒ݂ܨܝܼܪ ܗܼܘܵܐ ܡܸܢ ܟܽܘܡܪܽܘܬ݂ܵܐ ܪܲܒܵܐ ܕܟ݂ܽܘܡܪܸ̈ܐ܃
008:0510 ܥܲܠܗܵܝ ܫܲܩܠܵܗ݀ ܒܡܲܥܡܽܘܕ݂ܝܼܬ݂ܵܐ ܘܗܵܝܕܸܝܢ ܝܲܗܼܒ݂ܵܗ݀܀

▼ later lines